Yéramos guah.es y díbamos pal cine un día de la seronda. Comprábamos un capiruchu de castañes y metíamosles en bolsu pa escalecer mientres les díbamos espellicando. Echaben una de vikingos y romanos. Daquella, había películes d'eses a embute y ganaben los vikingos que yeren los bonos. Anguaño eses películes sumiéronse como por encantu, anque dalguna tovía debe circular per ende.Nestes dómines que tamos, hai vegaes que me vienen a l'alcordanza aquelles películes por mor d'una nueva engarradiella, pero esta vez non nos cines, sinón nos aruelos virtuales y nes llurigues culturales y politizaes davezu. Agora acútense celtes y romanos. Pero estos caberos lleven les de ganar porque cuenten colos meyores medios.
Entusiastes de lo romano son los cosmopaletos que lo veneren como constitutivo de lo español más castizo. Los demás son bárbaros. N'Asturies tienen llevantada una estatua a Octavio Augusto. Y pretenden convencenos a los demás que, si tapeces lo romano, alcuentres un ermu históricu y cultural, como si antes de llegar les lexones equí namás qu'hubieres corzos, rebecos, y dalgún xabalín escabarriáu.
Del otru llau tan los celtistes. Consideren los ástures como pertenecientes a les cultures antigües celtes y, quiciabes, nun-yos falte razón. La pallabra celta ye afayadiza pa referise a aquellos pueblos y rasgos culturales que nun yeren romanos y, nel nuestru casu, a los nicios que dexaron nel nuestru territoriu. La cultura del fierro, colos sos castros fortificaos, ye la más cercana a nós, los actuales asturianos. Ñegá la so importancia ye una patochada inteleutual. El problema ta cuando s'arreblaga perriba de sucos históricos y culturales y s'entra no cultural-político. Yo, el términu naciones celtes rínchame cada vez que lleo a xente que tal paez que plantega que yeren una nación política como la entendemos hoi (esi términu ye del sieglu XIX). Y, nesi sen, aludir a una supuesta nación celta asturiana hai dos mil años nun me paez de recibu.
Lo cierto ye que, cola arqueoloxía na mano, n'Asturies hubo bien de civilizaciones. Unes dexaron una güelga feble. Otra más fonda. Ehí tenemos la franco-cantábrica. Dalgunes representaciones rupestres pasaron a ser símbolos de nuestro pese a los milenios trescurríos. Basta como exemplu mencioná'l mamuth del Pindal. Ehí tenemos el neolíticu con túmulos tan importantes como'l de Santa Cruz en Cangues d'Onís, onde llevantaron la capiella y au enterraron a Favila. So padre, Pelayu, taba enterráu na ilesia d'Abamia, onde hubo tamién otru túmulu yá desaniciáu. Peñatú, allá peles dómines del bronce, tovía nos respiga y considerámoslu un símbolu identitariu nuestru nos tiempos actuales. Y, por supuesto la de los ástures, citada enantes, la más cercana y de la que deriva'l nuestru nome actual y una parte importante del nuestru bagaxe históricu y cultural.
Pero'l finxu de partida de l'Asturies d'anguaño allúgase nel sieglu VIII col biltu aniciáu en Cuadonga y col reinu que foi esporpollando dempués. Ye nesos tiempos cuando formienta lo asturiano, cuando empecipiamos a camudar de ser ástures a ser asturianos y asturianes, que ye lo que somos güei, que da hasta perceguera recordalo. Y si queremos falar de los raigones políticos de la nación asturiana tenemos que dir buscalos nel reinu que fuimos, al desendolcu posteriór del medievu que protagonizaron los nuestros antepasaos, coles poles, parroquies, conceyos, maneres d'esplotación del mediu rural y marín, drechu consuetudinariu...Lo anterior ye prehistoria. Nuestra tamién, pero que convién nun sacar del so contestu. Nun dexa de llamame l'atención que, mientres notres partes del Estáu, rebusquen nel so pasáu de reinos medievales p'amosá l'antigüedá de los sos raigaños identitarios, equí tal paez que se ven con rocea en dellos ámbitos y búsquense en cualquier otra dómina historica. Un fitu más de l'anormalidá político-cultural asturiana en que nos movemos anguaño.
Dempués de les películes de vikingos y romanos, y de la griesca ente celtes y romanos, taría bien que centráremos el discursu sobre d'onde venimos y quién somos atropando tol pasáu y poniéndolu en valor, pero ensin simplificaciones romántiques y poco riguroses, sobre manera cuando fincamos la estaya política. Si nun nos gusta que nos manipulen la historia los adoradores de lo romano, nun la deformemos nosotros mesmos p'acabar de rematala.
