Notres dómines pasaes, per Uviéu arroxaben en fornos de teya y piedra
como los qu'anguaño inda podemos ver amestaos a les paredes de bien
de cases asturianes de tipoloxíes populares.Otramiente, la vida nocherniega y bohemia siempre foi perquerida por ciertes persones que-yos gusta esfrutar la nueche y andar candonguiando de velea como les curuxes.
Pasaba entós que a esa xente qu'andaba de corrigüela amanecía-yos per ende albintestate, empecipiaben a sintir que'l fríu diba trescalándo-yos el cuerpu y buscaben entós abellugu.
¿Y qué meyor posafuelles pal vagarientu bohemiu qu'entrar a escalecer nuna casa onde taben arroxando al amanecerín?. ¡Pues a ello!. Y entóncenes toa aquella xermandía de vividores de la nueche empobinaben p'aquelles cases a arrimase a los fornos y reanimase col calorín.
Ñació d'esta miente una espresión que s'espardió per dayures. Neto a como los gatos busquen calor a la vera del llar, o acurrucándose pente los escarpinos, como aquella xente tamién buscaba'l so escalecer, nesti casu cabo los fornos, bautizáronlos como "gatos del fornu".
Anque nunca nun se pue afirmar dafechu qu'un vezu ta desaniciáu, el casu ye qu'hoi pocos fornos d'aquellos queden activos. En dalgunos casos reconvirtiéronlos nuna especie d'alacenes pa guardar coses na cocina. Nos casos más llaceriosos, podemos velos anguaño esbarrumbando y dexando vé les sos coraes de teya xunta les cases y horros, tamién esboroñándose, au notros tiempos tuvieron una utilidá central nes economíes de los nuestros pueblos.
Los que nun lleven migaya camín d'esaniciase son los gatos del fornu, anque actualmente nun los llamemos asina. Porque la vida de correla y andar de comedia pela nueche y hasta'l riscar l'alba tien nestos tiempos que vivimos más puxu que nunca, miániques que sí.
