Restallaben les castañes en farol. La sidra'l duernu amugaba los gargüelos que daba gloria. El vieyu Xanu carpió y faló-yos asina a los rapacinos que formaben aruelu cabo d'elli."Ello yera una vegada un grupu peludinos qu'aconceyó nel fondu del océanu. Taben siguiendo'l rellatu qu'una serena-yos facía d'unos premios principescos de gran sonadía. Pintó entós qu'apaeció pellí Tolanonos, un reporteru que tenía fama de metese nos sitios más gafos y peligrosos. Venía d'una reunión de Yetis allarribones nun monte que fincaba'l mesmu cielu y que tamién taben siguiendo aquellos premios. Decidió entós somorguiase na mar y escribir lo que taba viendo. Al día siguiente dio anuncia de lo planetariu que fuera aquel acontecimientu qu'hasta algamara de les altes cumes a lo fondero la mar. Otra reportera, Pegadina, prefirió informar de lo maraviyosos que yeren los virigüetos de les tierres que s'alcontraben más p'acullá, camín del Finisterre. Vese que Pegadina nun entendía nada de cumes, d'océanos, nin de premios principescos."
Los rapacinos siguíen empapirotiaos el rellatu del Xanu mentes espeñicaben castañes y sorbiataben sidra. El Xanu tizó'l llar pa escalecer toos y siguió.
"Había un país llonxanu, mesetariu y secu, onde mandaba un rei. Pero esto nun cuacaba a dellos que queríen otra forma de gobiernu. Un día na lluriga onde aconceyaben decidieron que la manera más afayadiza d'acabar col monarca yera facer xirigoncia d'otru rei, d'un vieyu país atlánticu, que lu matare un osu diba más de mil años. Y, a manera de conxuru, dedicábense tolos años a entamar tal moxiganga. Como la bandera de los herederos d'aquel rei muertu cuantisimayá llevaba una cruz, decidieron tamién puñar contra ella pa ver si asina puxaben con más brenga pa cambiar el réxime monárquicu del país mesetariu pol republicanu de suyo. Pero nada, el rei mesetariu siguió mandando tan guapamente. ¿Por qué?. Pues porque s'equivocaron d'época, de monarca, de bandera y de país."
Escucó'l Xanu pela ventana de la cocinona y agüeyó pa la lluna que rescamplaba sele allarribón nel cielu. Dempués miró pa los rapacinos y púnxose elli:
-Yá ye sero. Mañana la viesca va rellucir al amanecerín cola orbayada. Ye hora de dir achucamos, que tamién mañana toca dir a escuela.
Y los rapacinos, acabando les últimes castañes del amagüestu y dando los sorbiatos caberos a la sidra'l duernu, colaron a echase sonriendo y contentos d'escuchar los cuentiquinos qu'aquel mes d'Ochobre-yos contare'l Xanu.
