viernes, 30 de abril de 2010

25 de Mayu de 2.010


Voi dicilo cola boca pequeña. Xuxuriando y respetando decisiones soberanes d'aquellos a los que-yos correspondería llevar a cabu lo qu'espongo de siguío.

Falta menos d'un mes pa la conmemoración del 25 de Mayu. Una fecha cimera nel calandariu reivindicativu de nuestro.

Y nun taría nada mal ser a llograr una concentración unitaria nacionalista/asturianista alredor d'esta fecha. Camiento que sedría afayadiza y daría moral a la xente.

Tampoco resultaría imprescindible sentase a iguar un comunicáu conxuntu. Una ofrenda floral y la interpretación del himnu asturianu al son d'un gaiteru, o una simple concentración namás, podría ser un actu tresversal y cenciellu que nun tendríen por qué refugar dende los nacionalistes más radicales a los asturianistes más moderaos.

Con eso, precedío por que cada organización convocare a la xente'l mesmu día, llugar y hora, sedría abondo.

Nun me cai tampoco embaxo la preocupación con que dalgunos sectores más ultramontanos del réximen veríen esi actu n'andecha con motivu d'esa conmemoración.

Pienso que nun dibar tar nada mal consiguir dalgo asina. Claro que, si nun se llograre, tampoco nun pasaría nada, por supuesto. Sestaferiar caminos que propicien esti tipu d'acercamientos tien la so innegable dificultá.

miércoles, 28 de abril de 2010

Asturianismu


L'asturianismu nun ye de güei. Restrexando pela historia nuestra podemos alcontrar personaxes, momentos y movimientos acordies con esta definición.

Cualquier asturianu d'anguaño identifica l'asturianismu con una defensa de lo asturiano. Pues ser llingüística, cultural, política, etc.

Pudiere paecer como lo más normal que los asturianos defendieren les coses de so. Pero esto nun sucede siempre. Incluso cuando nos referimos a cuestiones identitaries (llingua, historia, patrimoniu, cultura...) rescamplen actitúes que bancien de la indiferencia hasta la hostilidá hacia lo propio.

Poro, arrecoyer la herencia histórica del asturianismu ye daqué imprescindible pa toes aquelles persones que se nieguen a qu'Asturies seya una simple demarcación xeográfica norteña ensin conteníu identitariu nengún. Realmente, nin identitariu, nin políticu, nin económicu, nin nada: un sitiu despersonalizáu ensin más y en manes de cualquiera menos nes propies.

L'asturianismu modernu naz a mediaos de los años setenta del sieglu pasáu. Ya'l so finxu de referencia asitióse na reivindicación de la dignificación, difusión y esporpolle de la milenaria llingua asturiana. Una querencia que nun nació de la nada: ehí tenemos los casos de Xovellanos y la so hermana Xosefa, Caveda, Acebal, Marirreguera, H.unquera Huergo y tantísimos otros.

El rei Alfonsu II fundó na ciudá d'Uviéu el monasteriu de San Pelayu, conocíu actualmente col nome popular de "les pelayes" poles monxes qu'ellí s'alluguen. Y ye precisamente esti monasteriu'l que va ser la sede de l'Academia de la Llingua Asturiana. La historia del Reinu d'Asturies fusionada cola reivindicación de la nuestra llingua nestes dómines que protagonizamos y vivimos.

Quiciabes teamos delantre de tou un símbolu pa enfonanos nel futuru: l'ayeri abellugando'l güei p'algamar el mañana. L'asturianismu alita y tenemos de facer que , pasiquín a pasu, anque adulces, avance. Hai que siguir puxando y tando ehí.

lunes, 26 de abril de 2010

¡Güi, güi, güi, los de la banda tamos equí!


Echar el goxu y nun dar batalla nun yera lo nuestro. Porque nosotros yéremos valientes, gafos, heroicos...

Aquella tarde aconceyemos y decidimos dir buscar al enemigu. Ellos y nosotros yéremos xermandíes d'edaes asemeyaes, alrodiu los diez años.

Asina qu'enfilemos p'allá cantando enfotaos el nuestru himnu guerreru:

"¡Güi, güi, güi, los de la banda, los de la banda!.
¡Güi, güi, güi, los de la banda tamos equí!.
¡Unos beben vinu, otros aguardiente,
y, los más borrachos, agua de la fuente!".

L'enemigu taba nun prau daqué fondigonáu y escuquémoslos dende la parte d'arriba, un sitiu estratéxicamente afayadizu pal ataque. Foi entós cuando ún de los nuestros dio la voz d'alarma:

-¡Cagondiola, cho, tienen xigante!-.

-¿Que tienen qué, ho?-

-¡Que tienen xigante!. ¡Corréi!.

Y... n'efectu, teníen xigante. Percima aquellos guah.es destacaba un rapazón altu y trabáu de polo menos quince años...

Miró pa onde tábemos nosotros, pero poco pudo ver. Porque pa entós yá saliéremos fuxendo a carrenderes camín del abellugu más seguru de caún, que yera la so casa.

Al día siguiente, aconceyemos otra vuelta p'analizar el resultáu de la ofensiva. Por unanimidá decidimos cambiar l'himnu antiguu por otru que me cantare mio güela cuando-y rellatare'l sucesu y que yera más acordies col nuestru valor:

"¡Cagalera fue al cuartel
y díxo-y al coronel
que punxere la bandera
del color la cagalera!".

jueves, 22 de abril de 2010

El mechinal


Miles de pieces arqueolóxiques afayaes nun mechinal na Campa Torres de Xixón y procedentes de les escavaciones feches ellí hai años. Acabamos d'enteranos del so afayu. Un afayu fechu va un tiempu y ocultáu a la vista de toos pola tralla política y cultural que carecemos.

Un asuntu puercu. Que fiede que tira p'atrás. Toa una ayalga arqueolóxica que se sabía desapaecida y pola que naide nun pidía cuentes nin se molestaba en pescudar ú s'alcontraba. Cuesta trabayu creyelo. Porque pa creyer noticies d'estes fai falta resfregar los güeyos varies vegaes y tornar a lleeles.

Total qu'una bayura pieces d'esti perimportante yacimientu arqueolóxicu depositáronse nun furacu en caxes y paquetes a la suerte del destín, l'escaezu y la humedanza. Y atopáronse de chiripa. Que si non...

Dicen tamién que falten otres pieces de les que se tenía conocencia y que nun se sabe cualu foi'l so paraderu. Mayor incompetencia, chapucería, desdexamientu y desvergüenza son imposibles d'imaxinar.

Nun país normal, tal despropósitu tendría de tener consecuencies bultables darréu. Responsabilidaes clares, esplicaciones nel intre y dimisiones fulminantes. Apuesto a que nada d'ello va pasar equí.

miércoles, 21 de abril de 2010

¿Hai país?.


Recuerdo hai años qu'un conocíu de mio cuando nos enartábamos falando de les coses d'esta tierra acababa xingando la tiesta pa los llaos repitiendo: "¡Nun hai país!".

Nun se refería con ello a la falta territoriu, o cultura, o llingua, o cualquier otru tema ferial nuestru. Con aquella esclamación amosaba la falta de compromisu claru de la ciudadanía asturiana a la hora de sofitar lo propio y defendelo.

Nesta tierra nuestra resulta perdifícil axuntar a la xente na andecha de defender les coses de so. El desdexamientu y l' empampirolase colo ayeno en perxuiciu de lo propio son finxos que guíen dende cuantisimayá'l nuestru comportamientu colectivu.

Poro, cada vuelta que s'entama nesti país asturianu dalguna sestaferia que nos pueda ayudar a tener un sitiu acutáu nel futuru esnala la bisarma de si realmente tenemos país pa llevala a cabu.

sábado, 17 de abril de 2010

Hacia'l partíu únicu ya'l sindicatu vertical


Quexábense xente y colectivos cuando la transición de qu'aquella manera de facela nun yera l'adecuada y que lo que se taba iguando yera pasar de la dictadura a la dictablanda.

N'Asturies, dempués de pasar décades d'aquél entós hasta güei, formóse un sistema políticu y social que podríamos definilu como"peculiar" y, como ayuri yá se tien espresao, más concretamente d'esta manera: un réximen políticu clientelar.

La vida cotidiana dientro les fronteres d'esta tierra paez aneciar en demostranos de que tenemos una oposición política que nun quier gobernar, unos sindicatos qu'actúen al son del poder, y un gobiernu que se quier perpetuar a base de distribuir favores per ende a cambiu de les sos correspondientes servidumbres.

Nun nos allugamos los asturianos nuna dictadura nel sentíu ortodoxu de la pallabra. Pero tampoco nun nos alcontramos no que realmente se define por un estáu democráticu de derechu. En realidá fincamos nun puntu intermediu. Nin allá nin acá. La nuestra vida desendolcámosla nuna hibridación política y social permanentes.

Exemplos pa pañar hai abondos. Pero como botones de muestra podemos trayer dos de rabiosa actualidá.

Ehí tenemos per un llau'l tema de la malfadiada incineradora. Los dos grandes y aparentemente enfrentaos partíos hexemónicos diendo de la mano felizmente a favor de la mesma. La teórica oposición política izquierdista-verde-nacionalista esprecetándose pero atechaos a la solombra del poder. Y con más d'un 90% de la población escontra. Al final, salvando les apariencies, una bisarma que peñera no alto: el vieyu partíu únicu.

Vamos esbillar otru exemplu. El tema ingrientu de la llinia eléctrica Sama-Velilla. El desarrollu de los fechos yá lu conocemos de sobra. Vecinos d'equí y de la comunidá vecina lleonesa arregañando los dientes contra'l trazáu. Vamos, en llinguaxe vulgar, el pueblu. Pero mira tu per ónde la patronal y los sindicatos mayoritarios y subvencionaos pol poder faen frente común a favor de que se lleve a cabu'l trazáu. Nuevamente reminiscencies de los teóricamente vieyos tiempos: el sindicalismu vertical compañeru de viaxe de la patronal.

Un partíu y un sindicatu (marutaos de diversidá) remando na dirección que'l poder señala. Aparentemente diversidá política y sindical. Pero solamente eso: aparentemente.

Porque n'Asturies quiciabes nun podamos afirmar rotundamente que quedare too atao y bien atao, según frase célebre del anterior xefe del estáu. Pero sí podemos dicir bien alto que polo menos bastante atao sí que quedare. Y con mui poques posibilidaes actualmente de desfacer los nuedos.

sábado, 10 de abril de 2010

SGAE


El nerviosismu peñeraba penriba toles cabeces. El noviu, enchipándose pa impresionar a la so mante, garró les riendes de la situación distribuyendo la xera. Los padrinos curiaríen de la entrada principal del salón. Les madrines escucaríen peles ventanes. Los cuñaos y cuñaes, con una llibretuca nuna mano y un bolígrafu na otra, entrugaríen y pescudaríen pente l'asistencia que yeren xente invitao de verdá y de confianza.

Escomencipió la xera con enfotu espartanu. Los vixilantes vixilaben. Los investigadores investigaben. Los entrugadores entrugaben. Too paecía dir bien. Empezaron entós a aselar los ánimos. Paeció-y entós al noviu'l momentu afayadizu pa entamar cola música y el baille. Capió a la orquesta y un son pachangueru esnaló pel salón. Cuando se disponíen los invitaos a xiringar la cadarma con gayola un berríu xeló hasta'l corazón más brengosu:

-¡La pasma!. ¡Ta ehí la pasma!.-

Tres llecheres d'antidisturbios dexaren el cauchu de les sos ruedes na corrada del restaurante. Una camaretada d'axentes espardiéronse pela rodiada. Un mandu llevando un megáfonu a la boca esberrelló:

-¡Tán arrodiaos!. ¡Salgan toos coles manes arriba y el carné na boca!. ¡Que naide nun se resista o sgaeamos a discreción!.-

Como una filera de formiguines medranoses foron saliendo pa la corrada los participantes nel festín. Cacheáronlos y fixéronlos empobinar pa comisaría pa toma-yos declaración. En llegando a los miembros de la orquesta punxéron-yos les esposes y enfiláronlos pa prisión preventiva.

Tando nestes, el cura invitáu qu'oficiare la ceremonia y que perdiere tol xaréu por culpa d'una inoportuna floxera de les sos tripes, arremellando los güeyos incrédulos glayó escaeciendo sotana y bones maneres:

-¡¡Cago en diola!!. ¡¡Garráronnos!!.-

sábado, 3 de abril de 2010

Yá sangra'l tonel...

Contárenme que naquellos tiempos d'antiguamente la xente sentía'l rixu por participar na folixa. Cuando durante les fiestes pasaben pela mañana'l gaiteru ya'l tamboriteru tocando, salíen persones conocíes del barriu a recibilos. Facíen que tocasen una pieza y poníense a espatuxar y castañolar los deos baillando a lo suelto. Salíen d'una casa y d'otra. Yera tou un traxín que festexaba la xente. Los cancios, les tonaes, los bolos... y la danza onde cada parroquia armaba la de so.

Recuerdo endagora cuando a la fiesta de prau la xente aportaba cola merienda. Dempués a lo llargo la xornada entamaben a formar corros, entonar canciones, baillar... La reciella entreteníense colos xuegos adeprendíos dende bien ceo. Col tapecer tornaba la xente en xermandía cantando, rinflando y participando gayoleros de la fiesta. Rematábase tol argüellu enxareyaos del moñín xirando cola danza.

Pero los tiempos cambien y nel escaezu quedaron les dómines onde la xente salía a recibir la música'l país cabo casa. Tamién en sucu baxeru van cayendo los tiempos de los xuegos, los cancios y los sones de nuestro nes romeríes dayuri. El mesmu vezu d'orniar los ramos y acarretalos camín de la puya na fiesta patronal va quedando, pali que pali, arrequexáu. Les vieyes costumes van despintándose de l'alcordanza de la xente.

Dacuando siente ún sentencies d'eses que dexen buelga porque lu garren nun momentu afayadizu pa ello. Abenayá nun chigre un grupu de rapazonos avezábamos a dir a tomar unes de sidra o a pimplar unes pintes. Cuando tábamos pa la mano tamién cantábamos. Un meudía de la que colábamos gayasperos dempués de cantales toes, un paisanu que taba na barra vieno pa nosotros. Pensé entós que nos diba llamar l'atención polos cancios ya'l xaréu. Nun foi asina. Convencíu de lo que nos taba diciendo sentenció:

"Sois de los últimos asturianos que vamos quedando yá".

Pescancié nel intre'l sen de les sos pallabres. El vezu de cantar asturianaes nun chigre yera pa él ún resclavu d'una cultura popular qu'amortecía. Nun sé por qué nunca escaecí aquella anécdota. Tamién por suerte, aquel badagüeyu inda nun se cumpió dafechu: porque afortunadamente tovía s'acolumbren rellumos de xente enfotao en siguir participando de lo culturalmente llariego y puxando por ello. Y precisamente tamos nes dómines onde entamen les tradicionales espiches. El llagar, el chigre, la espicha. Vieyos bierzos d'identidá cultural propio y antañu auténticos conservatorios populares d'aprendizaxe y tresmisión de la nuestra música. Un momentu afayadizu pa recordar que daveres depende de la nuetra voluntá y enfotu dir recuperando y volviendo a facer de nuestro toa una bayura cultural heredada y al empar abondo escaecida. Y consiguir asina que per munchos más años y xeneraciones siga sangrando'l tonel...