Contárenme que naquellos tiempos d'antiguamente la xente sentía'l rixu por participar na folixa. Cuando durante les fiestes pasaben pela mañana'l gaiteru ya'l tamboriteru tocando, salíen persones conocíes del barriu a recibilos. Facíen que tocasen una pieza y poníense a espatuxar y castañolar los deos baillando a lo suelto. Salíen d'una casa y d'otra. Yera tou un traxín que festexaba la xente. Los cancios, les tonaes, los bolos... y la danza onde cada parroquia armaba la de so.Recuerdo endagora cuando a la fiesta de prau la xente aportaba cola merienda. Dempués a lo llargo la xornada entamaben a formar corros, entonar canciones, baillar... La reciella entreteníense colos xuegos adeprendíos dende bien ceo. Col tapecer tornaba la xente en xermandía cantando, rinflando y participando gayoleros de la fiesta. Rematábase tol argüellu enxareyaos del moñín xirando cola danza.
Pero los tiempos cambien y nel escaezu quedaron les dómines onde la xente salía a recibir la música'l país cabo casa. Tamién en sucu baxeru van cayendo los tiempos de los xuegos, los cancios y los sones de nuestro nes romeríes dayuri. El mesmu vezu d'orniar los ramos y acarretalos camín de la puya na fiesta patronal va quedando, pali que pali, arrequexáu. Les vieyes costumes van despintándose de l'alcordanza de la xente.
Dacuando siente ún sentencies d'eses que dexen buelga porque lu garren nun momentu afayadizu pa ello. Abenayá nun chigre un grupu de rapazonos avezábamos a dir a tomar unes de sidra o a pimplar unes pintes. Cuando tábamos pa la mano tamién cantábamos. Un meudía de la que colábamos gayasperos dempués de cantales toes, un paisanu que taba na barra vieno pa nosotros. Pensé entós que nos diba llamar l'atención polos cancios ya'l xaréu. Nun foi asina. Convencíu de lo que nos taba diciendo sentenció:
"Sois de los últimos asturianos que vamos quedando yá".
Pescancié nel intre'l sen de les sos pallabres. El vezu de cantar asturianaes nun chigre yera pa él ún resclavu d'una cultura popular qu'amortecía. Nun sé por qué nunca escaecí aquella anécdota. Tamién por suerte, aquel badagüeyu inda nun se cumpió dafechu: porque afortunadamente tovía s'acolumbren rellumos de xente enfotao en siguir participando de lo culturalmente llariego y puxando por ello. Y precisamente tamos nes dómines onde entamen les tradicionales espiches. El llagar, el chigre, la espicha. Vieyos bierzos d'identidá cultural propio y antañu auténticos conservatorios populares d'aprendizaxe y tresmisión de la nuestra música. Un momentu afayadizu pa recordar que daveres depende de la nuetra voluntá y enfotu dir recuperando y volviendo a facer de nuestro toa una bayura cultural heredada y al empar abondo escaecida. Y consiguir asina que per munchos más años y xeneraciones siga sangrando'l tonel...
