Per estes dómines del mes de Payares, pela viesca Dayuri enagora tán tirando los oricios caberos les castañales. Asina que güei llevantéme ceo, col amanecerín, y púnxime a esperar al trasgu Manfurada, qu'aprució darréu. Quedáremos con Espi la Mariñana que mos brindare dir con ella a un castañéu que tien allá arriba en monte. Nun mos probeció esperala, porque deseguidina sintimos madreñar pel camín y Masgallu salió h.ispiando a recibila. Saludémosla, dexemos al velociraptor curiando de la llende'l caborniu y enveredemos monte arriba camín del castañéu. Dempués d'un cachu caminando algamemos el sitiu onde díbamos guetar y punxímonos a pañar castañes mentes parllotiábamos tranquilamente. Entós Espi ponse ella:
-Mirái, yá se mos adelantaron. Hai oricios esbillaos per ende.
-¡Rediola!, pues nun sé yo quién pudo entainar a la rebusca más que nós. Pela nueche nun se ve y madruguemos abondo -dixi yo estrañáu.
-Pela nueche sí hai quien ve p'andar a castañes. Trátase del xabalín, Xanu. Y esta nueche anduvieron per equí. Y puestos a madrugar, los corzos son campeones, cho. Menos mal que quedaron castañes bramente pa que podamos pañar a modo -puntualizó Espi.
Y asina siguimos guetando y charrando hasta que Manfurada púnxose a glayar y a esparabaniar:
-¡Nun lo puedo creyer!. ¡La mio bolsa con castañes!. ¡Teníala equí mesmo delantre de los güeyos y yá nun ta!. ¡Tragóla la tierra!. ¡La tierra come castañes...!.
-¡Ai, Manfuradina!. Eso nun foi tierra nenguna. Eso ye obra del to primu'l sumiciu Patriciu. Ye la manera que tien él d'andar a la gueta. Amatágase escucando lo que paña daquién, y nun descuidu, arrámpla-y cola bolsa castañes y alón. Y figúraseme que'l pinín qu'escoyó esta mañana p'arrampuñá-yles les fuisti tu -espliqué-y yo al mio amigu'l trasgu.
-Nun te preocupes, hom, -permedió Espi. Tovía te queda tiempu pa echar na bolsa. Toma, tengo yo equí otra. Y, amás, si al final lleves poques, yá t'apurriremos el Xanu y yo de les nueses.
-Ta viniéndome a l'alcordanza la importancia que teníen les castañes antiguamente -dixi yo-. Nun había bayura nes cases, a vegaes apretaba la fame o la escasez, y les castañes yeren un alimentu perimportante pa la xente. Curiábense los castañeos. Rozábense ya inxertábense. Pela seronda diben a demer les castañales pa echar de siguío los oricios na cuerria y tapábenlos. Ellí diben abriendo y averábense a ella a sacá les castañes pa llevar pa casa. Tamién diben a la gueta o la rebusca, que tamién se coñoz asina, y que ye lo que tamos faciendo nós esta mañana.
-Pues sí -añadió Espi-. Y dempués podíen comeles pulguines cocíes con agua y un plizcu sal. O amagostábenles en farol, na chapa la cocina, cuando vinieron les de carbón, metiéndoles en fornu...Tamién facíen potaxe con elles echándo-yos compangu. Y un datu bien importante ye la manera de conservales pa que duraren tol añu. Yera mayucándoles. La cultura de les castañes tien unos raigaños mui fondos nes nueses tierres asturianes, collacios...
Un cosa en que mos fixemos Espi y yo foi en que Manfurada, pa escoyé les castañes que diba echar na bolsa, usaba como preba'l furacu de la mano. Si nun pasaben, valíen. Pero si coyíen de sobra, entós refugábales por ruines. A too esto, que'l mio amigu'l trasgu nun soltaba la bolsa de la mano nin echándo-y agua ferviendo. ¡Encamentáu que quedara cola engatada d'enantes del sumiciu Patriciu!. Yá bien avanzada la mañana, y dempués de pañar a modo, ponse Espi:
-Bono, chachos, pámidea que yá va siendo hora de tirar monte abaxo. Pero antes voi echavos una, que yá sabéis que si nun lo faigo nun me presta. Mirái que canciu más guapu garráu de la tradición popular de nueso:
Amagostasti castañes,
nun me convidasti a elles.
Ya vendrás a que te faiga
otra macona d'estielles.
¡Ixuxú!.
Prestómos pola vida'l cantar de la mariñana y empobinemos monte abaxo. Cuando yá tábemos cerca la llende'l mio caborniu, ponse Manfurada, a manera de despidida:
-Voi colar pa casa. Pero, de mano, voi face-y una visituca al sumiciu Patriciu. Como tenga él les mios castañes, espúrro-y les oreyes hasta dexá-yles como les d'un elefante.
-Nun-y les espurras muncho, hom. Nun vaya ser que venga l'aire les castañes y acabe esnalando como un páxaru -comenté yo echando una risotada.
-¡Que vos preste l'amagüestín, amigos! -deseómos Espi mentes siguía camín abaxo.
Y yo enfilé pal caborniu naguando namás que con pensar nes castañes amagostaes que diba tastiar esta nueche...
