El casu ye que diba yo l'otru día caminando pela viesca onde vivo cuando atopé nun requexu a Xuan Moñiz d'Ambás, lliteratu en bable refugáu por academies y surdimientos, esmesando'l pelo la cabeza y glayando colos güeyos clisaos:
-¡Tán como tuques!. ¡Tán como gradies!. ¡Tán como una madreña!.
-¡Ayó, Xuan! -saludé yo al mio amigu-. ¿Por qué glayes d'esa manera tan desesperáu, hom?.
-¡Ai, Xanín del alma!. Estos de la llingua van alloriame...
-¿Pero por qué, cho?.
Y entós, Xuan Moñiz d'Ambás, tratando de tranquilizase una migayina cuntóme:
-Mira, Xanu. La xermandía de la llingua lleva tres décades esprecetándose y vocinglando porque los escolinos qu'escueyen asturianu na enseñanza tienen otra asignatura alternativa y entós puen decidir dir pa ella y ñon pa la de llingua. Pero resulta qu'agora rúxese que quieren quitar esa otra alternativa y cayeron na cuenta de que la opción a dir a llingua ye tar folgando. Y, claro, el remediu ye tovía peor que lo qu'había hasta agora.
-¿Y nun se dieron cuenta hasta agora del problema? -entrugué yo perestrañáu con esti asuntu.
-Pues figúraseme que non, a lo que paez...
-¿Entós cuála sedría la solución más amañosa?.
-Pues que nun hubiere alternativa dala a la de la clas d'asturianu...
-Pero pa eso ¿nun tendría que ser un idioma oficial como'l gallegu o'l catalán, Xuan?.
-Pues sí, Xanu.
-Entós habrá que puxar con toles fuerces pa ello...
-Yá, pero tenemos otru problema añadíu -púnxose entós Xuan arrestellando la voz y abriendo los brazos pal cielu, como implorando-. ¡Nun dan una a dreches, nin!. ¡Qué desastre!.
-¿Qué otru pilancu ves agora colo de la oficialidá? -torné a pregunta-y al mio amigu que yá casi que llevitaba de pura desesperación-.
-Que ye amable. La oficialidá pola que se riespe...¡ye "amable", rediola!.
-¡Rediós!. ¿Y qué ye eso de "amable"?.
-Pues vien a ser un traxe a la midida que sirve pa que l'idioma seya oficial y al empar nun lo ser. Y traducío a la enseñanza pudiere ser que, guapamente, el castellanu funcionare como idioma verdaderamente oficial y l'asturianu siguiere siendo optativu como hasta agora. Estos amagüestos lleven la so apegadiella, Xanu...
Les pallabres de Xuan Moñiz d'Ambás dexáronme pensatible. Brindélu a caleyar un poco comigo pa siguir charrando, pero nun taba l'home pa más nada. Asina qu'ellí lu dexé coles sos cuites, mentes yo tiraba viesca p'alantre dándo-y vueltes a lo que me contare. Y l'asuntu paecióme perenguedeyáu, miániques...
