Un día d'Avientu. La mochila preparada la xornada anterior albidrando que diba tar escamplao. Pero non. Llueve y ta frío. Había que plantar dos texucos pa ver si espoxiguen pa la primavera. Asina que a enfilar p'allá y a ello.Na viesca'l suelu ta llentu. A vegaes enllamargáu. Orpina unes vegaes, para un momentu, llueve otra vuelta. El xabalín dexó'l so rastru. De fozar y de pezuñes. Nun hai naide per equí arriba. Siéntese'l burbús de los árboles al pingar y de les fueyes qu'inda tán soltando.
A la vera'l camín hai un plantonín de lloréu. Puestos a ello, vamos llevalu tamién p'allá. El cachu monte d'un día de gües tien castañales, carbayos, abedurios, árgomes, escayos...y munchu felechu que voi tratando de desaniciar pa que bilten árboles y torná la llaceria del fueu si aporta. Pasu ente pasu, voi llantando dalgunos plantones, que cuadren col entornu y queden chuscos: un carrascu, dalgunes fayes, y hoi un par de texos y el lloréu que mencioné enantes.
La xera de ponelo ye cenciella. La tierra ta blando pol agua y deseguida ta too yá asitiao. Sorpréndeme a la espalda un ruíu que nun ye de goteriar nin cayer fueya. Voltio y veo pasar a tou meter un corzu y darréu lladrar un perru. Tiros nun se sienten, asina que nun paez que naide ande de caza furtiva. Ver a los corzos correr impresiona. Casi nun los ves nin cruzar per delantre ti. Yá otra vegada pasó delantre les mios ñarices ún a toa mecha y téngolos visto dacuando lloñe, pero nun te dexen acercate migaya, ¡ca!.
Empecipia a posá la borrina. Nun ye trupo y vese bastantina. La impresión de la viesca empapada pola muga y cola borrina endolcándola ye máxica. Pues creyer que per ende anda escucándote una xana, o un diañu, o un busgosu. Somorguiáu nesi mantu, la mente esnala a dómines de cuantisimayá.
Taba recién l'anuncia del descubrimientu per tierres del norte francés d'una nueva venus. Eses figurines femenines ñarres con unes formes corporales acutralaes y perbultables. Dicen que puen tener un aquello relacionao cola fertilidá. Nos tiempos au les facíen la supervivencia del clan yera prioritaria. Nun tienen cara davezu y equí guirrió'l mio maxín a otres figures femenines ensin cara y que formen parte d'abondes cultures, incluyida la nuestra. Refiérome a les moñeques de maíz (o d'otros cereales, en xeneral). Les figures iguaes con cereal tamién tienen la so relación cola fertilidá, pero de la semiente y escurque de la tierra.
Figures femenines, ensin cara, relacionaes cola fertilidá del clan y de la semiente. Otra vuelta apruz na alcordanza una nueva referencia femenina: La Vieya. Que ye como dicir el bierzu onde ñacemos, crecemos y vivimos. La Vieya, la venus, la moñeca de cereal, la tierra, la ñatura. Y la viesca falando col agua que l'amuga, coles fueyes qu'anubren los caminos, col ruíu del corzu que h.ispia.
Tenemos el megollu del nuestru ser formáu por milenta capes. Por ñicios de vieyes cultures. Viéndolos dende la güeyada urbanita igual nos paecen daqué ensin xuntura, ensin relación, coses ensin mayor importancia pa la nuestra vida actual.
Pero non. Tamos fechos de toes eses capes y basta con zampuxase na viesca pa que la nuestra parte animal y ancestral apodere a la racionalidá con que davezu nos mazcaritamos. Y entós, les fayes, los carbayos, les castañales y árgomes, la muga, la borrina, el reinu de La Vieya cola so maxa, estampla con tol so grandor y trescálamos. Y pescanciamos entós el siginficáu de les venus, de les moñeques de cereal, de la fertilidá que trai bayura y supervivencia al clan humanu.
Porque, por muncho que nos enchipemos sofitándonos nel actual esporpolle tecnolóxicu de la nuestra civilización occidental, la supervivencia sigue siendo daqué qu'enxamás tenemos garantizao. Y, mesmo anguaño, ehí tenemos la gafura tarrecible del cambiu climáticu que nos esmolez y hasta axoriza. Y ye que nun tamos tresnaos d'asfaltu, hormigón y urbe, magar vivamos y nos afayemos nello. Los nuestros raigaños fúndense na tierra, na muga, na viesca...Porque anguaño somos animales de la ñatura, neto a como lo fuimos milenios atrás, na alborada de la nuestra especie. Y aneciar n'escaecelo nun va resolvenos la nuestra vieya llucha pola supervivencia.
