Pues yá ta'l branu escucando a la vuelta la esquina. Y con elli, la ẍermandía turística. Nun ye la nuestra tierra afayadiza pal turismu de sol, magar les nuestres playes y mariñes ufierten un atractivu claru pa visitales.Nun too ye tirase pámpana arriba y pámpana abaẍo a turrar como un llargatu. Pequí tenemos bayura qu'ofrecer a esgaya. Paisaẍes pa escontra la mar. Valles prestosos. Zones de montaña perguapes. Cultura material y inmaterial a magüeyu...
Y gastronomía. Qu'equí quería yo llegar. Platos de toa mena a zurriburri. Pescaos y mariscos. Potaẍes. Carnes. Embutíos...La ẍente que nos visita sabe que pue fartucase a un preciu amañosu. Mesmo, hai menús del día que quedes con ellos bien fartu y ensin desperrate. Yo fadría publicidá sobre esto cabero, porque ñon en tolos sitios pues atopar la carrapotada de menús del día que s'ofrecen n'Asturies.
Dicen que la danza sal de la panza. Y ye bien cierto que teniendo'l butiellu contentu anda'l personal más gayoleru pa entamar tou tipu d'actividaes cuando se ta de folgueta. Claro que taría bien encamentar al visitante con otru dichu nuestru bien ciertu: lleva más el güeyu que'l butiellu.
Y, precisamente con esti dichu postreru voi pone-y el ramu a esta entrada, contando una anécdota que viví hai unos años en primer persona.
Ello foi que taba yo pela nueche cenando nun bar cuando entranon unos turistes. Echánon-y una güeyada a la carta y pidienon de primeru fabada, y dempués unos chuletones de ẍata roẍa.
Traẍénon-yos la fabada como estilamos equí. Nuna sopera pa que cadún se sirva como-y pete y, si quier repitir, pues a ello. Deẍánonse los comensales empobinar polo que'l güeyu-yos pidía y fartucánonse a fabes hasta'l puntu que empecipianon a deẍar de comer porque l'estómagu nun-yos daba pa tanto. Y, claro, cenar fabes si vas entrar nun relevu na mina o a facer un trabayu d'esfuerzu pues igual cuadra, pero pa dir echate porque tas de refalfiu la cosa cambia a embute...
Y tando nestes lléguen-yos unos chuletones que nun saltaba nin un sidru cola pértiga. Quedanon entós mirando unos pa otros, como entrugándose que qué cóime podíen facer con aquel segundu platu, si teníen les fabes a puntu de sali-yos peles oreyes.
Yo tengo una capacidá d'aguante pa esto de la risa hasta un puntu. Pero nun soi de piedra. Asina qu'al contemplá la escenta tuvi que me poner d'una postura que nun se me notare que taba p'arrollicame de la risa. Como yo yá acabare de cenar, capié al camareru, pagué-y y colé del bar, antes que los fartones se mosquearen comigo.
Dacuando, cuando recuerdo aquello prúyeme que nun quedare un pocoñín más ellí pa sabé'l desenllaz del asuntu, anque camiento que tendríen que ñegociar colos del sitiu en cuestión deẍar los chuletones pa otra ocasión. O, igual fuenon a papalos arriesgándose a acabá la nueche escuchando cómo-yos cantaben el gori-gori...
De toles maneres, al dia siguiente nun se comentó pel llugar qu'hubiere desgracia gastronómica dala. Asina que la cosa debeo acabar bien. Allégrome d'ello, mialma, nun vayaes ser mal pensaos...
