Prestábame pola vida de rapacín sentame a la puerta casa, nuna nueche escamplada, a cenar fariñes con una cuyar de madera mentes agüeyaba allarribón pa les estrelles. Y, a manera de postre, arrallar dempués la pota.Había coses que te vagaben ver llograes. Como que te traxeren d'una vegada puñeflera aquel corriverás con cascabelinos atrás que tantes veces te prometíen y nunca nun aportaba. Hasta que, convencíu de qu'aquello yera una especie de versión del cuentu de la bona pipa, que siempre entamaba pero nunca finaba, acababes dexando la ilusión por aquel xuguete escaecida y cubriéndose col mofu del olvidu.
El mieu a lo inesplicable plasmábase en dos bisarmes que t'acuruxaben pela nueche. La marimanta, que miániques qu'esistía, porque más d'una vez asomare pal fondu, pa escontra la galería, en ca güela. Y pa rematala taba la mano qu'aprieta, siempre pudiendo aprucir pela bufarda p'añusgate.
Acusate de coses que nun fixisti tien un sabor amargu especialmente. Que te mirare entientes un paisanu y t'espetare aquello de que fueres tu'l que-y robares les ferradures al perru'l cura apolmonábate y poníeste no peor.
Pero colos años los rapacinos medramos, escutruxamos y facémonos adultos. Y nesi procesu rescampla la trampa del corriverás, de la marimanta y de la mano qu'aprieta. Arriendes de cayer na cuenta que los perros nun lleven ferradures, asina que malamente pudieres tu roba-yles al del mesmísimu cura.
De toles maneres, hai cuestiones que compruebes que sí esistíen daveres. Como les estrelles que siguen ehí arriba visibles nes nueches seles. Y como les fariñes, que bien que siguen sabiendo pa dempués rematales arrallando la pota. ¡Ah! y tamién esisten les cuyares de madera pa comeles.Y la puerta casa pa sentate cabo ella.
Tamién esiste eso que llamamos la ilusión, l'enfotu, o los suaños. Esos motores que nos faen embarcanos dacuando n'empreses que nos abulten prestoses, magar puedan ser pindies y revesoses de llograr. Pa ello los asturianos tenemos una ayuda perestimable que nos recuerda esi cantar cenciellu, melgueru y afayadizu:
"Santa María,
nel cielu hai una estrella
que a los asturianos guía".
Mialma qu'eso de la estrella sí que ye otra verdá. Vila yo colos mios güeyos nuna nueche escamplada y sele comiendo a la puerta casa un platu fariñes con una cuyar de madera. Miráila na semeya. Ehí la tenéis relluciendo nel firmamentu azul.
