Escribía allá pel mes de Xunetu un post sobre esa triba qu'abonda cada vegada más de la xente pa la que la educación y los bonos modales son dalgo asina como una gaxapada tarrecible.Torno güei a añadir a aquellos exemplos dalgunos relacionaos toos col tema de la xintadera y la bebedera onde comportamientos a lo xole hai a embute.
Tenemos pa entamar el casu de la familia o grupu d'amigos que padecen el síndrome que podríemos bautizar como "Hernán Cortés" o, dicho d'otra miente, ellí onde finquen el pie considérense conquistadores d'espacios. Hai d'estos manguanes dos variantes principales. Una, los atrocadores de barres. Vamos, que tas tu tranquilín na barra d'un bar tomando daqué y pónensete esos especímenes de llau. Empiecen a ganate terrén metiéndote la espalda, el costazu... lo que pinte y, cuando quies date cuenta tas un metru desplazáu de la to posición inicial.
Hai otra variante cinexéticamente interesante d'estos primates bípedos. Son aquellos grupos qu'ocupen una mesa pa ellos, otra pa la reciella y, como son conocedores d'esi dichu que reza que nun hai dos ensin tres, ocupen una tercer mesa poniendo nella les chaquetes, les mochiles y demás indumentaria de turistes verbeneros. Y si ven xente de pies o esperando por una mesa pa xintar muéstrense indiferentes dafechu a nun ser que dalgún camareru con galones-yos solicite que dexen llibre el sitiu ocupáu de más.
Tenemos d'otru llau aquellos suxetos cola enfermedá del "güe truñón" o de la vaca ídem, según el sexu. Esta xente pasa pela entepierna aquella norma elemental d'educación que nos diz qu'enantes d'entrar nun sitiu hai que dexar salir a los que coinciden contigo na puerta. Asina qu'estos cornúpetes vocacionales emburrien puerta alantre pudiendo pasa-y penriba al incautu que nesi momentu trata de salir como si lu arrollare una machucona. Un casu asina asocedióme talamente a min y namás qu'un maxistral xiru de la mio cintura col que consiguí poneme de llau impidió qu'una rapaza afalada -supongo yo- pol ruxir famientu de les sos tripes dexare la mio cadarma cutiendo pel suelu como un vulgar felpeyu.
Y qué dicivos de la última moda que fai furor. Ye la que podríamos denominar "Pa Gallu, Yo". Emplégase cuando un bar ta atarraquitáu de xente. En vez d'esperar a que'l camareru garre nota de lo que quier, el gallu de turnu llevántase, enfila pa la barra y fai el so pidíu señalando col deu pa la mesa onde s'alluga.Si nun cuela la xugada nun pasa nada, pues pa sentir vergoña hai que la tener primero. Pero si sal bien la estratexa pue sirvir pa colase delantre una carrapotada xente.
Y yá p'acabar tenemos tola enfilandrada de repunantucos. El que nun ta conforme cola taza onde-y sirven el café -el mismu tipu que pa tolos demás- y pide otra diferente acordies col so rangu, el qu'alloria al probe camareru pa escoyer el vasu onde quier beber que talo paez que nun hai recipiente amañosu nel llocal pa les sos esquisites esixencies. Y otro tanto pal aquello de la comida, anque seya pa encargar un simple bocadillu: que si les rodaxes son demasiao fines, que si mui gordes, que si munches, que si poques, que si picará'l chorizu, que si sedrá mui dulzón, que si lo quitamos y lo cambiamos por quesu, pero ye que quesos hai tantos tamién... y too ello mientres la cola de los que tán detrás esperando agranda per momentos ante la desesperación de la probe dependiente.
En fin, que dir de folgueta unos miserables díes ta convirtiéndose nuna auténtica esperiencia vital. Tou un cursu superior en comportamientos pazguatos, peores maneres y munchu pioyu resucitáu al que paez que-y queda grande cualquier situación de convivencia colos demás. Pero, como tantes veces se tien dicho, ye lo qu'hai.
