martes, 30 de enero de 2018

Trebeyos y alcordances

"Pintalarrama/descoloría/narices chates/boca torcía".

Los sapos decíen que teníen na pelleya mexacán, un remexu venenosu. Tamién lu llevaben na cuspe, asina que si t'acercabes y t'echaben un gaxapu podía date problemes. Peor fama teníen les sacaveres, que consideraben gafures perdañibles. Creyíamos que les culiebres picaben col guispiu que yera la llingua acabada en dos puntes que xiringaben de contino. Y cuando s'acercaba esnalando un sacagüeyos nun te facía gracia y entrábate perceguera si se t'acercaba. Nes charques había chupasangres y si te metíes nelles pues podíen apegásete y mancate. Mirábamos con rocea los frutos colloraos de la planta de la culiebra. Y tocántenes a reptiles, les culiebres, en xeneral, mala cosa. Pero bones yeren les llagarteses, pues onde taben elles nun había culiebres.

Como daquella xugábase albintestate, había xuegos colectivos a embute. El pío campo, saltu y arroba, tres marinos a la mar, l'escondite, el pinchu, a roma, a la peonza, a los banzones, al cascayu o castru, a la goma (estos dos caberos yeren propios de les neñes)...Tamién per époques facíense arcos, gomeros, tocaba xugar a les fiches que podíes fichar con una semeya y un cristal o con simples pulgos de naranxes, facíes xiblatos agüecando güesos de piescos, xugábase a guiar aros con ganchos, iguábense choces...

Quedaben inda resclavos de cultura popular tresmitida de boca a oreya. Recuerdo teneme contao un cuentu popular arrecoyíu por investigadores del nuestru folklor, el del pastor y la culiebra, que yá rellaté notra entrada de la bitácora. Si desapaecía daqué echáben-y la culpa al sumiciu, si daquién diba esglamiando, la culpa de la guaxa que lu chupaba. Y la güestia o santa compaña andaba de procesión pelos camínos col so recitáu de "andar de día que la nueche ye mía". Allá pa tolosantos yera'l momentu de garrar una  calabaza, agüecala, tallar nella una calavera y mete-y dientro una vela prendida. Dempués asitiala en dalgún sitiu p'axorizar a quien pasare pellí pela nueche. L'antroxu taba prohibíu, pero pa los rapacinos siempre había caretes de cartón, carraques de madera y güevos rellenos de papelinos de collores.

Pa qu'una fiesta fuere tala teníen que salir los xigantes y cabezudos, que mieu que nos daben a los rapacinos, miániques. Y cuando acompañabes a los mayores al chigre, habíalos con bolera y col xuegu de la rana. Tamién había ún col xuegu de la llave. Agora los xuegos de les modernes sidreríes ye quedar papiaos mirando pa la televisión, que dacuando tal paez como'l güeyu d'un gran hermanu que tolo controla dende'l so tronu.

Mialma que los trebeyos daquellos tiempos, que tan relativamente bien cerquina, yeren diferentes a los d'anguaño. Y les alcordances van suniéndose según va esfaraguyándose la tresmisión oral de xeneración en xeneración. La televisión tenía pocu sitiu nos xuegos, nun había artiluxos eléctricos con pantalles como agora y eso de trancase nun cuartu arrodiáu d'aparatos pa entretenese nun se llevaba. Si acasu, da-y cuerda a ún d'aquellos trenes metálicos con vagones pa que dieren vueltes nunes víes ensamblaes formando un círculu y dalguna cosuca más onde la cuerda yera'l motor y que, pasu ente pasu, foron conpartiendo'l so dominiu colos xuguetes movíos a piles más modernos. Pero agora'l tren d'aquelles histories yá pasó y a la estación aporten otros. Otros trebeyos, otres alcordances y otros tiempos.
                                                                            

lunes, 15 de enero de 2018

De la voz del monte cantábricu: el faisán.

El cordal cantábricu espúrrese dende l'oriente de Galicia, a Asturies, Cantabria, Euskadi, Llion, Burgos, Palencia, Euskadi, Navarra y La Rioja.

Nél habiten especies animales a esgaya. Si'l día pinta afayadizu puen observase ferres, utres, aigles, corzos, rebecos, venaos, xabariles, raposos...

Pero hai dos tribes animales que rescamplen sobremanera porque trespasen la so condición d'especies biolóxiques p'algamar otra dimensión que ye la de consideralos símbolos identitarios de los territorios del cordal onde perviven. Esti ye, por exemplu, el casu d'Asturies. Y eses dos tribes animales son l'osu pardu y el faisán o gallu monte cantábricos.

Son dos subespecies estremaes de les sos hermanes europees pol so aisllamientu milenariu nel cordal cantábricu. Nel casu del osu ye d'un tamañu menor que los d'otres zones más al norte d'Europa. Nel casu del faisán ye la única subespecie d'esta ave qu'habita en viesques caducifolies en vez de facelo n'ámbitos au l'arboleda ye de fueya perenne.

Y dambes especies comparten la mesma llaceria. Tuvieron a piques de quedar desaniciaes al entamar los años noventa del sieglu pasáu por aciu de la caza intensiva que menguó la so población hasta'l finxu del casi esterminiu, amás d'otros factores añadíos que contribuyeron a la mengua de les poblaciones.

D'entós p'acá son especies protexíes y vien tratándose de recuperales. Pero los resultaos dixébrense en dambos casos.

Nel casu del osu pardu, consiguióse dir aumentando la población, fundamentalmente na zona más occidental del cordal. Anque hoi nun ta fuera del peligru d'estinción, sí se llogró superar les peores fases y el futuru apaez más escampláu.

Otra suerte corrió'l casu del gallu monte o faisán. La so población siguió menguando col pasu de los años y na actualidá queden pocos cantaderos (sitios u gargolien el so cantu de cortexu) onde se puedan sintir. Los mesmos estudiosos de la so situación nun son quien a coincidir nes causes y soluciones qu'eviten esti desaniciu que tal paez sigue avanzando.

Too ello fai que'l faisán seya anguaño la especie emblemática asturiana más cercana al precipiciu de la desaparición. Quiciabes, como apunten dellos estudiosos del tema, caltener na mayor pureza xabaz les zones onde tovía perviven, protexéndoles como auténticos santuarios d'esta ave, puea ser una solución.

Oxalá que nos años vinientes puedan aportamos noticies de que'l faisán llogra por fin frenar el so desaniciu y vaya consiguiendo, pasu ente pasu, recuperar la so población.

Comenta xente que lu escuchó cantar, allá no cimero de la viesca, que ye una de les sensaciones más impresionantes que se puen esfrutar.

Tamién hai quien comenta que si desapaecen los faisanes, los montes de nuestro van ser otra cosa, va morrer la viesca xabaz d'antaño pa pasar a ser otra estremada.

Coincido dafechu con esta apreciación cabera. Porque camiento que si daqué día desapaeciere'l faisán desapaecería tamién con elli la voz ancestral y milenaria del monte cantábricu y, en consecuencia, del asturianu.
                                                                    
                                                                                     
                                                                   

viernes, 12 de enero de 2018

De sidros, comedies, y embaxaes culturales

Cuando les coses se faen bien, l'esfuerzu ye continuáu, y hai enfotu, la cultura popular en xuntanza cola llingua puen ser tou un motor dinamizador cultural nuna sociedá bien atrancada como l'asturiana.

De magar hai yá unos cuantos años, el primer domingu dempués de la festividá de reis, aconceya'l personal pa ver les comedies de los sidros en Valdesoto. Son dos, una de rapacinos y otra d'adultos. Los personaxes malpenes sufren variaciones y recuperaos de la tradición: el vieyu y la vieya, el diablu, les dames y los galanes, los tontos, el ciegu y el llazarín, el cura...Y al traviés d'ellos espellícase l'actualidá, dende los asocedíos llocales, a los d'ámbitu asturianu, estatal ya internacional si cuadra. Un analís en clave d'humor, pero onde s'avienten carrobexazos en toles direcciones y onde'l que se ríe de la que-y ta cayendo al so contrincante políticu pue ver en cuestión de segundos que la risa cambia de bandu. Una demostración clara de que, al traviés de la cultura y llingua llariegues, pue algamase'l mundu, revisalu, analizalu y criticalu. Y que lo llocal nun ta reñío gota colo internacional (que tomen nota los cosmopaletos).

Na última representación, correspondiente a esti añu de 2.018, acabante d'echar les comedies, el públicu dedicó-yos una ovación de varios minutos. Foi impresionante. Un públicu qu'atarraquitaba les instalaciones del centru polivalente de Valdesoto. Les comedies échense albintestate na antoxana la ilesia, pero esi domingu'l nuberu taba en danza. Un día fríu, de descorchar agua de contino, nada afayadizu p'andar per ende de romandela. Pero la xente enfiló a ver a los sidros y les comedies como si tal cosa y enllenó'l recintu. Cuántos entamadores d'actividaes culturales naguaríen por tener un ésitu asina. Pero nun ye un reconocimientu regaláu. Detrás hai bien d'años de trabayu, esfuerzu, sacrificiu y superación. Y yá da los sos frutos bien visibles. Hai inda quien piensa que a estes actividaes hai que dir por militancia y chute, independientemente de que gusten o cafien. Quien asina piense, equivócase de finxu a finxu. La militancia hai que la ganar col trabayu afechiscu, col bien facer y buscando siempre que l'espectador lo pase bien nel actu que va a ver. Asina se gana, y les comedies de los sidros tiénenlo mui claro y, en resultancia, los resultaos lleguen. Basta con echar una güeyada al públicu pa comprobar qu'ellí aconceya xente de tou tipu d'edá y condición, non sólo d'un perfil determináu. Ehí radica tamién una parte principal del ésitu.

Pero estos actos culturales nun queden trancaos dientro de les llendes asturianes. Dende hai años, los sidros y les comedies salen fuera a esparder el so llabor. Visiten otros llugares d'España onde hai mazcaraes, tienden llazos d'amistá col hermanu país portugués, salen p'acullá de los Pirineos. Y tamién inviten a venir a venos a xermandíes mazcaritaes de perdayures. D'esta miente, el llabor d'embaxada cultural que tán faciendo ye perimportante daveres. Al traviés d'él, visivilízase la nuestra cultura, la nuestra llingua, y tamién la nuestra tierra fuera de les nuestres fronteres. Y esto nun-y pue cayer embaxo a naide. Si hai dellos años nos dicen qu'unes de les nuestres meyores embaxaes diben ser los sidros y les comedies podíemos tomalo como una graciosada. Pero, ¡ca!, güei ye una realidá incontestable.

Y nestes tamos. La consolidación de les comedies de los sidros ye un fechu que nos tenemos que felicitar por él. Evidentemente hai que tar argutos y sollertes. Les zunes y los pilancos tan ehí y siguir sacando alantre tolos años esta actividá cultural nun ye nada fácil. Si acasu, el gran reconocimientu que tan algamando dientro y fuera de les nuestres fronteres, la presencia abonda de públicu cuando tolos años entamen la temporada d'echar la comedia, y la repercusión mediática que tán llogrando (retrasmisiones pola tv autonómica, p.ex) son una gabita que pue ayudar a caltener esti trabayu cultural y llingüísticu que m'atrevo a afirmar que ye de lo meyor que tenemos anguaño n'Asturies.
                                                                                 


martes, 2 de enero de 2018

De la patria del signifer ástur Pintaius

Vamos entamar l'añu na bitácora averándonos a un tema sobre la nuestra historia, estaya esta que tengo por ella un enclín especial, como los que pasáis pequí yá sabéis.

Cuando los romanos diben mardomando los pueblos que trataben de conquistar, teníen l'aquello de reclutar ente los sos varones soldaos pa les sos cohortes o cuerpos ausiliares. Con ello trataben de consiguir un oxetivu doble. D'un llau, algamá'l mayor númberu d'efectivos pa los sos exércitos. D'otru, menguar el númberu de guerreros de los territorios conquistaos y al empar tratar d'evitar sublevaciones mandándolos a lluchar a miles de kilómetros de la so tierra.

Según diben franciendo la resistencia de los ástures, bien de guerreros de so pasaron a reclutalos inxertándolos nes cohortes ausiliares, neto a la práctica corriente que realizaben notros territorios y pueblos conquistaos. Mandábenlos a la llende del imperiu. A sitios como'l muru d'Adriano. Y nel casu de la Cohors V Asturum, a lluchar a la Xermania.

Quixo la casualidá qu'hai bien d'años apaeciere una estela funeraria con llápida dedicada a ún d'estos ástures de la cohors mencionada na actual Alemaña. Tratábase de Pintayu (Pintaius), un signifer o portaestandarte de la mesma. Una réplica d'ella podemos observala actualmente nel Muséu Arqueolóxicu d'Asturies.

Nella figura esti ástur con mantu de llana, malla metálica pa protexese (los signifer nun llevaben escudu), sandalies, espada llarga, puñal, l'estandarte en cuestión y una pelleya d'osu cola cabeza encaxada nel cascu y les pates delanteres cruzaes sobre'l pechu. Nada novedoso no que se refier a la indumentaria, pues yera bien conocida poles investigaciones históriques.

Pero lo que sí resultó novedoso y chocante foi la inscripción de la llápida de la estela. Normalmente, nestos descubrimientos esa inscripción nun nos da datos sobre l'orixe del soldáu a quien se dedicaba. Pero'l casu de Pintaius france con ello y la so llápida danos datos sobre esi orixe. Esos datos foron un deséu, a costa fecha, del singifer ástur al traviés del so testamentu pa que l'encargáu de recordalu si morría lo realizare asina.

D'esta manera, Pintaius encamienta que na so llápida figurare quién yera so pa, Pediliciu, que yera un ástur tresmontanu y que'l so llar yera'l castru d'Intercatia, que los investigadores cuenten que pertenecía a los orniacos, lo que güei ye'l Güerna, nel conceyu de L.lena.

¿Y por qué Pintaius s'enfotó en pasar a la posteridá dando a conocer el so orixe cuando lo normal yera nun lo facer?. Pues simplemente porque tenía mui claru'l sentimientu de pertenencia a la so tierra, l'ástur tresmontana, y porque nunca dexare de considerase un ástur, magar el so reclutamientu pol exércitu romanu.

Ente les causes d'esti ciñu y señaldá a la so tierra ("patria o nación" na terminoloxía qu'usamos anguaño) ta la de la so edá de reclutamientu. Fixéronlo cuando tenía  23 años, que naquel entós yera la edá d'un home bien maduru, un reclutamientu serondu. Ello fixo que yá tuviere perfecha la so conciencia de pertenencia a la so triba y a la so tierra, hasta'l puntu de qu'enxamás s'escaeció d'ella nin se consideró de nengún otru llugar. Morrió a los 30 años y nos siete que tuvo de serviciu na so cohorte d'ástures ascendió a signifer, toa una distinción. Yera l'engargáu de llevar bien altu l'estandarte pa que los collacios ástures que lluchaben al so llau nun perdieren la so referencia. La edá de reclutamientu y la grabación de la llápida tamién empobina a la posibilidá de que'l so reclutamientu fuere forzosu y non voluntariu, anque esti ye un tema que nos resulta imposible d'afirmar o refugar anguaño.

Imaxinar a aquelles cohortes d'ástures reclutaos, en bien de casos escontra la so voluntá, combatiendo a miles de kilómetros de la so tierra, faciendu piñu ente collacios y "vecinos" pa tratar de sobrevivir asina los 25 años de serviciu que teníen que tener pa poder retirase, respiga. Supón una mezcla d'épica, tristura y desaniciu. Tamién, dende una perspectiva histórica, llanta un finxu que podemos restrexar hasta l'actualidá si nos entrugamos cuánta xente asturiano se vió enguedeyada, al traviés de los sieglos, en conflictos bélicos onde nun queríen participar, pero au nun teníen otra salida que facelo o emigrar lloñe de la so tierra.

La Cohors V Asturum ya'l signifer Pintaius son, arriendes d'un episodiu de la nuestra historia antigua, una metáfora de les amarraces béliques de tou signu onde participaron  los nuestros antepasaos. Son parte de la nuestra alcordanza histórica más antigua. Paga la pena entós dedica-yos unes llinies d'homenax y renombranza.