domingo, 27 de enero de 2013

Aprendiendo a saltar. (Asturies nes escueles).

Si m'encargaren poner escuela a la manera antigua y tuviere que contratar un maestru, igual-y ofrecía'l puestu a... un sidru, encamentándo-y qu'aprendiere a saltar bien a tolos rapacinos.
 
Yá toi imaxinando cómo podría ser la primer clase. El maestru cola piértiga dirixéndose a los neños y diciéndo-yos dalgo asina como:

"Güei vamos aprender a saltar el bardial de la nuestra historia escaecida."

Y los guah.es venga a blincar d'un llau pa otru del bardial hasta que supieren que teníen una historia con raigaños fondos nel pasáu de la que sentise arguyosos.

La segunda clase podría entamar asina:

"Güei vamos aprender a saltar la muria de la nuestra llingua marxinada"

 Y otra vuelta a practicar d'un llau al otru de la muria hasta que s'enfotaren en que diben defender y usar la so llingua llariega d'un finxu al otru d'Asturies y en toles situaciones.

D'esta miente diben dir enriestrándose les clases guapamente: cómo resalvar el regatu del nuestru patrimoniu abandonáu; cómo superar la portiella de la nuestra cultura apostalgada; cómo cruzar el sucu de la nuestra música despreciada y un llargu etcétera.

Y al final del cursu tolos rapacinos de la clase diben ser tan espertísimos saltadores que nengún manguán cosmopaletu tendría l'atrevimientu de pone-yos pilancos nel camín del so futuru asturianu, sabedor de que d'intentar facelo espondríase al mayor y más espantosu de los ridículos.

domingo, 20 de enero de 2013

Del llar a internet.

Los llugares onde se practica eso que güei llamamos comunicación variaron tanto al traviés del tiempu que casi que paez que falamos de mundos irreconocibles.

Anque inda queden nicios de la manera tradicional de tresmitise mensaxes anguaño, aquel mundu que conocieron los antiguos esbarrumbó va tiempu. Ya nun son el conceyu cabo'l llar, el filandón, la esfoyaza, les llurigues y los aruelos los sitios onde la xente s'intercambia noticies.

Esos llugares camudaron actualmente nos foros d'internet y nes redes sociales. Milenta persones comunicando nos sos muros les noticies, lo que piensen, debatiendo. Incluso hai vegaes qu'estos conceyos virtuales sirven pa difundir conteníos que los grandes medios de comunicación anecien en tapecer o deformar. 

En mui poques xeneraciones pasemos del llar a internet. Camudó'l mundu de tresmitir conocimientos tradicional per otru onde aquel ciudadanu que nun navegue pel mundu virtual queda poco menos que descolgáu del aquello comunicativu. 

Claro que tamos falando de maneres estremaes d'interrelacionanos, pero más nada. De la mesma manera que'antaño nun yera oru tolo que rellucía a la hora d'interrelacionase y mecíense coses verdaderes con bilordios y mentires, anguaño pasa otro tanto. Bien de vegaes zampuxámonos na piscina d'una determinada información ensin contrastar, a lo xole.

Poro, convendría que nos mentalizáremos que siguimos moviéndonos nesi folleru peligrosu de lo veraz y lo falso y facer l'esfuerzu d'informanos lo meyor posible antes d'enfilar pel camín de repitir a botavoléu los mensaxes que nos lleguen. Una piedra na que zapicamos toos davezu y que pudiere mancar intereses de terceros.

Y ye que, por muncho que camudare la manera de comunicanos, el razonamientu, el xuiciu críticu y la contrastación d'informaciones sigue siendo fundamental pa buscar esi tesoru qu'a toos nos gustaría atopar de la veracidá  qu'añera en cada espirica y que precisa d'una busca constante y esforzada pola nuestra parte.

jueves, 17 de enero de 2013

Espirica náutica (o la busca del nacionalismu perdíu).


Hai capitanes arteros en llevar les sos naves a la deriva hasta acabar por escentellales nos cantiles. Nun faen casu a faros nin conseñes. Ellos a lo so hasta acabar ayuri desarbolaos nel fondu'l mar. Confórmense col aplausu de los más incondicionales qu'afalague'l so narcisismu infinitu.

Hai proyectos anclaos permanentemente nel pasáu y cubiertos pol ocle de la marxinalidá vocacional. Enxamás arriben a puertu dalgún porque enxamás son a salir del puertu propiu. Acaben camudando en barcos pantasmes llibrando batalles imposibles. Pero, na ilusión de los sos tripulantes, naveguen vientu en popa y a toa vela. Y, a la so manera, son felices asina y tranquilicen les sos conciencies.

Hai proyectos qu'enxamás trespasen les llendes de la memoria. Pasa'l tiempu y nunca son a salir del astilleru. Nin siquiera llogren la posibilidá d'echase a la mar ya intentar navegar. Salen de puertos imaxinarios p'arribar a puertos imaxinarios tamién. Los bravos marinos enfótense en llegar a nenyures. Porque namás qu'a nenyures se pue llegar si nun hai barcu.

De too eso hai nestes costes atlántiques u vivimos y más inda que podríemos enxareyar de siguío, pero nun avaga enguedeyase en siguir esbillando erros y llaceries. 

Porque camiento que tolos que  nos embarquemos dalguna vegada, con mayor o menor enfotu,  na xera d'axeitar un proyectu nacional pa esti país, tamién acabemos zarapicando en dalguna de les categoríes enantes descrites o d'otra miente. Y, gústenos o non, bien de xente enfotao en tresna-y un futuru a Asturies estremáu al que-y diseñen les fuerces estatales  enagora siguimos moviéndonos al aldu y ensin nortiar tierra.

Pero, magar los sapiazos, desalcuentros y carrobexazos onde acabemos tantes vegaes, nun queda otra que continuar insistiendo. Puxar por iguar la flota esmanganiyada y echanos otra vuelta a la mar a la busca d'esi nacionalismu perdíu que talo paez que nun hai manera d'entamangar d'una vegada por toes.

Claro que pa ello ye mester tamién deprender de la esperiencia. Saber qu'hai xente esperto n'abrir víes d'agua ellí onde participen. Saber qu'un proyectu pue nacer como minoritariu, pero que la marxinalidá indefinida lleva al desaniciu. Saber que nun se pue pasar la vida naguando por proyectos que nunca nacen; o s'entamen o s'olviden y alón. Y, por supuesto, persaber que dende delles fuerces estatales cuantayá que llanzaron cancios de serena col envís d'integrar nelles y fagocitar cualquier proyectu asturianu autónomu o de fundilu simplemente si nun llograren lo anterior.

De toles maneres, entrín y non somos quien (si ye que lo somos) a amechar nesti cacíu revueltu en que fuimos a parar anguaño, convién tener clarísima una cosa. De les escuadres estatales namás que podemos esperar qu'acaben por convertir esti país nuestru nun cementeriu de naves fundíes. Dende lo económico a lo cultural pasando per tola recatafila estayes que queramos amestar. Ehí ta la buelga d'estes tres décades caberes pa comprobalo. Siguir dexando en manes d'elles el nuestru futuru ye una posición suicida. 

Nel tiempu presente observamos badagüeyos de la vagamar que s'avecina. Cada vegada suena con más fuerza una posible reorganización autonómica del Estáu. Nun tien que nos cayer embaxo que pudiéremos acabar, guapamente, como una provincia- balcón castellana con vistes al mar. Por poder, too ye posible. Vese claro que la nuestra identidá incomoda y que'l nuestru autogobiernu nun-y interesa a fueza estatal nenguna más allá de valir pa crear chiringos y prebendes. Asina que pesllar lo que con tanta desgana abrieren nel so día nun ye descartable.

Pa dir acabando, personalmente nun tengo anguaño claro cuala ye la flota más afayadiza pa salir alantre. Si se trata de  dalguna de les opciones esistentes actualmente. Si quiciabes haya que siguir insistiendo en xuntances más amplies. Si, seique, too se resuma en partir de cero y botar daqué nuevo. De lo que sí toi seguru ye de que tenemos que ser conscientes de que nun nos queda otra qu'intentar armar esa flota les vegaes que seyan necesaries hasta consiguir, definitivamente, iguar un llugar d'alcuentru onde nos afayemos la mayoría  sí o sí. 

Hai una sentencia popular que diz que na rula nun pregunten, apunten. Pues eso. Trátase de salir del círculu viciosu de les preguntes recurrentes (de les qu'esti post pudiere sirvir, guapamente, d'exemplu) y d'apuntar yá d'una vegada, que vien a ser afitar proyectos amplios y sólidos y algamar oxetivos, espacios dambos per agora atrocaos siempre pa otros. Perdifícil. Revesoso. Infinitamente más fácil de plantegar que de realizar. Pero son la única opción y la única salida que tenemos.
  

jueves, 10 de enero de 2013

Rellumos d'un país.

Tán faciéndo-y daqué na cara a una paisana y diz que la van dexar "como un guirriu". Metanos un cascu urbanu crúceste con un paisanu en madreñes. El burbús del chigre france cuando un paisanu arranca echando una tonada. Nun llugar de ringurrango sientes a dos veceros falar asturiano bien curioso. Na corrada d'un colexu entamen un amagüestu y los rapacinos lleven na cabeza unes monteres de papel. Una madre comenta que lleva al neñu a clases de gaita. Nun puestu del mercáu ves bolles d'escanda...

De los tiempos que conocemos el discursu de qu'Asturies muerre. Que los rasgos culturales propios de so esboróñense y despíntense hasta facese irreconocibles. Que son otres llingues y otros vezos lo que güei-y cuaca a la xente. Y nun ye que too ello seya mentira. Hai esbarrumbe. Hai un dir picu abaxo que se restrexa dende cuantayá...

Pero tamién hai cultura y llingua propies alitando enagora. El desaniciu milenta vegaes anunciáu nun se perfixo inda. Dicho d'otra miente, ye una evidencia qu'anguaño puen observase, dayures, los rellumos de lo que foi y tovía ye esti país.

Y ehí tán el retu y la xera que nos finquen a les xeneraciones qu'actualmente heredemos esta tierra. Enfotanos en qu'esos rellumos nun  amortezan. Pero non sólo eso. Tenemos delantre'l descomanáu retu y la perimportante xera de dir recuperando lo qu'esboroñare, lo que quedare nel olvidu, lo que se sumiere tiempu atrás y, xunto colo que llegó a nós y  les nueves aportaciones que seyamos a amestar nel presente, da-yos proyección nel futuru.

Podemos entruganos entós: ¿pero ye eso posible?. Esta identidá esfarrapada en bien de casos qu'heredemos ¿tien igua?. La mio rempuesta ye que sí que la tien. Ello, claro ta, siempre que pongamos voluntá y enfotu nello. Desterrando definitivamente esa indiferencia y esi desdexamientu que llamentablemente y davezu amosamos hacia les coses nuestres mientres arranamos como paletos pampirolos por tolo que venga de fuera como si, por esi sólu fechu, yá fuese meyor y superior. Aventando lloñe'l claru complexu d'inferioridá que nos enguedeya ya inmoviliza tantes vegaes.

Sí, miániques. Ye posible afitar los rellumos qu'entá queden d'esti país y convertilos en tou un rescamplíu qu'allume y guíe'l camín de siguir conservando y utilizando les nuestres erbíes culturales a les xeneraciones futures de nuestro. De nosotros depende facelo posible y nuestra ye tamién la decisión de puxar por echar arriba toa esa bayura patrimonial cultural y llingüística heredada o dexala sumise, definitivamente, nel abandonu.

jueves, 3 de enero de 2013

Tiempu d'antroxos.

Aportó l'iviernu. Y, con elli, la renombranza del tiempu los antroxos. 

Porque, antaño, yeren nestes dómines au mazcaritos, aguilanderos y xente echando la comedia percorríen los nuestros llugares. Dempués, pasu ente pasu, foi amorteciendo too ello...

Pero, asina y too, tovía güei queda la buelga de los tiempos d'antiguamente. El guirria, los sidros, os reises... El zurriburri mazcaritáu, aguilanderu y comediante enagora se dexa ver ayuri. Y presta pola vida que seya asina.

Y too ello gracies al trabayu enfotáu de xente que quier seguir dándo-y tira a unes tradiciones que pertenecen al nuestru patrimoniu cultural. Ye xusto, entós, que-yos deamos el nuestru reconocimientu y apoyu.

El casu ye que, nel tiempu en que se dexa notar el cutu y la ñeve entama anubrir les cumes, en dalgunos llugares d'esta vieya nación asturiana tovía remanecen los ancestrales antroxos. Y esperemos y deseemos que lo faigan cada vez en más sitios y que llogremos tresmitilos a les xeneraciones vinientes afitando asina la so supervivencia...

Porque mientres les vieyes tradiciones aliten va ser menos cuestu'l camín que nos lleve a compartir un sentimientu común de pertenencia a esta tierra y a la conservación de la nuestra alcordanza colectiva.