lunes, 30 de abril de 2012

La pescadera.

Siendo rapacetu diba en tren pela nueche con unos collacios n'iviernu. Montó entós una muyer que venía de comprar pescáu na rula y trayíalo nun balde pente xelu enriba un rodiellu na cabeza.

Cuando nos posemos na nuestra estación fíxolo ella tamién y ofrecímonos dos de nosotros a lleva-y el balde. Garrémoslu peles ases y nun yéramos pa con él de lo que pesaba. Pasemos abonda vergoña puxando por aquel balde pescáu hasta acarretalu a la plaza d'abastos onde diba vendelo al día siguiente pela mañana. Quedemos frayaos pa percorrer una distancia  d'unos doscientos metros aprosimao.
 
Dicen que los cascoxos lleven la so casa a recostines. Pero nenguna gracia tien qu'heba xente que llevó nada menos que la so vida entera engolada nun rodiellu enriba la cabeza.Y, n'agradecimientu, morrieron probes.

lunes, 23 de abril de 2012

El Carriquín Del Rei.

Una de les alcordances más antigües que tengo de cuando rapacín ye que me prestaba pola vida sentame nes nueches bonancibles y de cielu escampláu a la puerta casa a que me diere mio ma fariñes mientres miraba pa les estrelles.

Dempués fui creciendo, escutruxé, pasé per mozu y algamé a ser paisanu y siempre me dio por fixame neses coses y causes que puen dar satisfacciones, pero duldosamente, por nun dicir enxamás, perres. Seique por ello nunca fui a faceme ricu, pasando los mios díes como un xanu picuscayu engoláu allá nun caborniu nel monte.

Nesti mundu camiento que siempre hubo y va haber de too. Xente nacío n'altu bierzu y otro añao n'escaniellu probe, pasando por bien de casos estremaos ente ún y otru. Tampoco nun sé si cuando un rapacín s'estela mirando pa les estrelles y otru pal estoyu onde se guarden les perres en casa yá tán indicando daqué de per onde van empobinar col pasu de los años.

Y ye que nesto de la bayura siempre fui mui neciu. Nes dómines u les carteres cuenten con bien de requexos pa guardar les más granibles tarxetes de créditu voi yo y siempre tuvi y tengo una querencia especial poles vieyes corexes, que ye como decidise pol ruxir d'un puñáu de monedes en vez d'enchipase con unes cuentes bancaries preñaes de númberos gordos.

Asina que, avezáu dende siempre a tar empapirotiáu con asuntos poco productivos, pintó qu'esti plaxu perroneru d'una comedia de sidros axeitáu dende les altures, pero non nes estelares sinón nes político-financieres, tituláu "La Crisis" garróme en porricu y col pie cambiáu.

Lo curioso del casu ye que mos garró a la mayoría de la xente de la mesma manera. A los que de rapacinos mirábemos pa les estrelles y a los que s'envizcaben col estoyu. Porque lo que desconocíemos unos y otros yera que los que diben algamar bramente la bayura yeren otros guah.es nacíos col gran privilexu de tener unos cerebros superdotaos pa la especulación, la puñalada, la trampa y l'arte realmente galácticu de saber esguilar, con una facilidá asombrosa, pel gurugú de cualquier poder hasta la mesma picorota.

Asina que, polo qu'a min respecta y a los que nacimos con esa desviación del pescuezu y de la mente que nos fixo que, cuando miramos p'arriba, nunca vemos poder algamable, sinón estrelles rellucientes, quédamos el consuelu de que, quiciabes, el carriquín del rei tea acutáu namás que pa nós esi día en que'l cagüercu nos acueya nel so somantu bien achucaos pámpana arriba, que ye, curiosamente, una posición afayadiza pa mirar pal cielu, anque nun podamos pa entós saborgar un bon platu de fariñes.

jueves, 19 de abril de 2012

Cartafueyos: La base social pa un nacionalismu asturianu.

Una de les entrugues qu'esmolecen davezu a los nacionalistes ye si realmente hai base social pa sofitar nella un movimientu nacionalista n'Asturies. Yo cuento que sí. Otra cosa ye lo revesoso que pueda resultar aportar a ella. Pero, ¿úla?.

Sigún yo lo veo, hai un sector nada despreciable de la nuestra sociedá que ye l'unicu sitiu onde camiento, daveres y sinceramente, que se pue alcontrar un viveru potencialmente granible tanto de militantes como de votantes pal nacionalismu. Ye un sector hetereoxéneu, pero que caltién unes característiques asturianes y/o asturianistes mínimes coles que s'identifica. Podrán abultar a los güeyos d'un nacionalista estes característiques como daqué importante o como caxigalines, depende de les que seyan. Pero la cuestión ye'l grau d'importancia que tienen pa la xente que les vive y comparte y pescancialo, interpretalo, y actuar acordies a ello. Un llabor que requier dexar los prexuicios de llau y les grandes construcciones de nacionalismu cuasi metafísicu allugaes nel sobráu de lo non urxente.

Esi sector o viveru fórmenlu eses persones que conocemos que manden a los rapacinos voluntariamente a clas d'asturianu, qu'escueyen como la profesión del so futuru ser maestros d'esti idioma, que s'axunten en miles de semeyes dando la cara pola oficialidá, que-yos presta espresase ensin renunciar a usar, anque seyan unos pocos rasgos, esti idioma porque se sienten más identificaos al traviés d'ellos cola so identidá d'asturianos. Pero tamién lu formen abonda más xente. Nunos casos, asisten a los sitios onde hai actuaciones de música asturiana de la más diversa mena. Notros, ciudadanos a los que-yos presta facer semeyes a los rapacinos col traxe'l país, participar en grupos folclóricos, en bandes de gaites, en deportes y xuegos populares de nuestro... Asturianos que nun son a entender una primavera n'Asturies ensin espiches o una seronda ensin amagüestos. Que te dicen con arguyu que son del Sporting o del Uviéu, cuando esperes sentir del Madrid o del Barcelona. Que saben quién son Manolo Busto, Chechu, Samu, o'l Biesca Xixón de h.ockey. Ciudadanos que tienen en casa la nuestra bandera, música asturiana, llibros sobre'l país y/o n'asturianu... Y asina podría siguir con una llarguísima enfilandrada de descripciones de lo más hetereoxéneo y ensin entrar a valorar categoríes nin rangos no importante como yá escribí enantes.

Nesti grupu social allúguense tamién los que te dicen que-yos prestaría qu'equí hubiere un partíu "rexonalista", "asturianista", "nacionalista", como tienen los vascos y catalanes pa que mirare un pocoñín polo nuestro, que ta too abandonao, pero d'otru llau nun son a identificase con opción política nenguna nesi sen. Asina que... a la hora la verdá queden en casa'l día les elecciones o voten con bien pocu convencimientu a los partíos estatales de siempre. Porque nun acaben d'identificase col nacionalismu/asturianismu políticos. La conexón, a la hora la verdá falla. Y ehí ta otru pilancu fundamental p'arreblagar. Cómo llegar a toa esta carrapotada nada despreciable de ciudadanos de nuestro.

Y enantes de siguir, quiero dexar nidio que nun toi diciendo que cualquier persona d'esos ámbitos vaya aceptar y/o participar del mensaxe nacionalista asturianu, por mui bien iguáu y espuestu que se presente. Habrálos que sí lo faigan. Pero tamién habrá ocasiones en que namás que vamos dar voces en castañéu. Lo que sí digo ye que tenemos que reflexonar a fondo sobre cuálu ye'l castañéu pal que tenemos qu'empobinar y cómo nos tenemos que mover per él si queremos tornar a casa con dalguna gueta, anque seya pequeña, nel zurrón, y non coles manes llastimosamente vacíes que ye, por desgracia pa toos, cásique una constante histórica nel nuestru nacionalismu. Dambes cuestiones son bien estremaes.

Quciabes dende'l puntu vista de la poca xente concienciao nacionalmente nesti país, esti grupu social, o parte d'él polo menos, vese como una folclorada, como ciudadanos escabarriaos políticamente onde nun paga la pena dirixir el discursu nin gastar tiempu. Y ehí ta un de los grandísimos errores, por nun dicir el gran error y fundamental. Porque esa ye la única parte de la ciudadanía asturiana onde se pue intentar sofitar social y electoralmente'l nacionalismu. Porque esa ye la sociedá asturiana real, la qu'esiste, la que se ve na barriada onde vives, nel supermercáu o la tienda la esquina, nel chigre, nel trabayu... Y ye la única a la que se pue dirixir el discursu y pidir apoyu. Porque nun esiste otra sociedá asturiana nenyures, si acasu namás que nos suaños o na mente de los que viven de contino trancaos voluntariamente nes sos llurigues, nel so guetu nacional químicamente puru.

Y nun queda otra qu'enfotase d'una vez por toes en trabayar con esi sector social. De mano, esguedeyándose por entender cómo funciona realmente, cuálu ye'l so bagaxe simbólicu real respetándolu escrupulosamente, refugando dafechu mancorniar cualquier sentimientu de la mena que seya: dende la ufrienda d'un ramu a la Cruz de la Victoria, dende los vezos llariegos al folklor tradicional. Fuxendo como de la güestia de cayer en despotismos ilustraos queriendo axeitar un futuru pa los asturianos dexando de llau les sos opiniones y sentimientos, otra zuna mui espardida ente nós los que nos allugamos -o eso creemos-nun grau mayor de consciencia y conciencia nacional. Si dacuando se fala de la necesidá de facer una inmersión llingüística p'adeprender bien la nuestra llingua, equí habríamos de falar d'entamar una inmersión social y cultural na sociedá asturiana real, na idiosincrasia asturiana real.

Dempués del respetu, queda una xera revesosa y abegosa. Adaptar el discursu nacionalista a esi sector social importante como pasu previu p'algamar a tola sociedá. Saber qué coses puen guañar en cada momentu y la manera afayadiza y entendible de plantegales. Decatase, definitivamente, que se mueven en coordenaes sociales y polítiques moderaes y qu'hai qu'entamar perhí. Porque una escalera tien peldaños y ye mester dir percorriéndolos toos pa llegar al caberu, por muncho que nos afale l'ansiedá de llegar arriba darréu. Y como punxi va tiempu nun exemplu, un paisanu pue dir guiando un carru unos pasos per delantre de los armentíos y éstos síguenlu. Pero si sal xispiando escopetáu acaba sólu. Dir unos pasos per delantre de la sociedá plantegando alternatives novedoses ye una cosa y pretender que siga y atalante discursos perellaboraos otra mui estremada.

En definitiva y pa dir acabando, como dixi al principiu sí cuento qu'hai una base social onde semar l'ideariu nacionalista y consiguir resultaos. Pero hai que saber ú ta y empobinar pa ella. Con abonda humildá, respetu, y enfotándonos en perconocer la realidá dixebrándola dafechu de los nuestros xuicios preconcebíos, y siendo conscientes de que si refugamos esi sector y buscamos sofitar el nacionalismu notros que nun esisten, o qu'esistiendo son yá bien ayenos a esta ideoloxía (militantes y simpatizantes concienciaos dafechu de delles formaciones españolistes), tenemos munches probabilidaes d'acabar por nun llegar nenyures.





miércoles, 18 de abril de 2012

El Suañador Vagamundu.

Cuandu na nuachi seli las estrellas chisgaban nel cialu
un barcu de velas esgayadas atracóu adulcis nel mualli.

Era la navi del Suañador Vagamundu qu’un viayu
llobu de mar me cuntari cuantayá nuna nuachi de velea.

Saliarun entoncias cadarmas blancas comu faloupus
que fuarun espardiándusi pelas caleas baleras
hasta amatagasi colas solombras.

De siguíu, una nublina trupa avanzóu pela mar
ya entróu nel puablu hasta anubrir el faru ya las casas
deixandu güir sólu’l febli burbús de las folas.

Cola alborada, la xanti cruzábasi muda colas caras pálidas ya lus güayus ingriantus nas sous concas renigridas.

Ya miantras las bisarmas mariñeiras xuxuriaban
desdeixadas xugandu al mus so lus curadillus,
lus nuastrus suañus muartus iban ya vinían colus cachonis que tamián morrían besándunus lus pías.

lunes, 16 de abril de 2012

Lletres: Un creitu pa la bolera.

Visto agora, en frío, que saliere aquel día del conceyu como xabaril escopetiáu valióme pa que nun m’azafranaren nel sitiu.

Ye bobada. Hai xente tan aquello que si te pones a argumentar con ellos ye neto que si t’escentellares escontra una peña. Das voces en castañéu y rinches como un carru. Yá se sabe qu’oyer y escuchar nun son lo mesmo.

Y yo intentar intentélo con brenga. Falé, di razones a embute, enfotéme y esparabanié pa da-yos más tiez a les mios pallabres, pero confiéseme cura, confiéseme flaire que per esa m’entra y pela otra me sal. Que nada, cho. Poníense a burbusar pelo baxo y a mirame de regüeyu y dempués nun me facíen nin plizca casu y namás que me contestaben que la mio proposición yera "imposible de llevar a cabu dafechu". Y puntu redondu.

Asina que cuando fui decatándome de que, ante la mio insistencia y enfotu, la xente empezó a mirame de llau, foíno, con cares gafes y xuxuriando una y otra vuelta ente ellos abultóme’l momentu afayadizu pa colar y poner tierra pel medio. Hasta me paeció ver a dalgún arregañar los dientes, apretar los puños y esbabayase como con ganes de faceme callar d'un enviyón.

Lo que más me fadia de too ye que los fechos diéron-yos a ellos la razón. Ye lo que pasa cuando dexes qu’el corazu apodere al xacíu, que pues meter el cuezu hasta atrás.

Poro, teo de reconocer que cuando traté de convencelos pa dir en xermandía encabezaos pol nuestru campeonísimu nel xuegu de los bolos camín del  bancu y pidir falar col director pa que nos concediere un creitu pa construir la bolera taba equivocáu.

Pero non pola mor de la famosa crisis, les dificultaes pa llograr creitos y bla-bla-xu-xu, tema tristemente permansuñáu y de la mayor actualidá anguaño. ¡Ca!. Non. Too resultare ser abondo más cenciello.

 Simplemente  que yo daquella nun sabía que’l director de la sucursal yá s’enterare cuantayá que Pachu, el nuestru campeón indiscutible de cuatriada,  llevaba bien de tiempu acomuñáu cola so muyer y poniéndo-y entrambos a dos una cuerna más grande que la d'un venáu en plena berrea.

Y, claro, cuando m’empeñé en que fuere precisamente Pachu l’encargáu d'encabezar la comitiva pa pidir el  puñefleru creitu pa la bolera pues… que cásique me puñen… faltó poco… vamos, nada…

jueves, 12 de abril de 2012

Estoyu: Cerámica y Arte Asturianu, non. Feries d'Abril y Toros, sí.



Aporten tres noticies casi al empar. D'un llau'l refugu n'Uviéu a la creación d'una escuela-taller que pueda servir pa garantiza-y un futuru mui inciertu a la cerámica tradicional de Faro. D'otru una nueva edición de la Feria d'Abril en Xixón. Otramiente, nun va haber presupuestu estatal pa iguar l'Arte Asturianu.

Son tres exemplos que sirven guapamente pa ilustrar l'actuación cultural n'Asturies dende les instituciones d'equí y d'acullá. Lo propio siempre bregando cuesta arriba. Lo ayeno coles puertes abiertes de par en par. Nun hai perres pa curiar d'un patrimoniu de la humanidá como ye l'Arte Asturianu. Tampoco nun les hai pa potenciar una alfarería tradicional. Pero sí les hai pa potenciar feries d'Abril y, pel branu, feries taurines.

Ye lo que tenemos. El productu d'una tirria contra lo propio que remanez dende les instituciones y que tien los sos raigaños agarraos cuantayá nel tiempu. El cosmopaletismu de considerar lo foriato siempre nun llugar más altu nel escalafón de lo importante.

Pero tampoco nun vamos escurrir el bultu. Nosotros, la población asturiana d'anguaño, somos tamién los primeros responsables d'esti desastre y desaniciu. Col nuestru desdexamientu, col nuestru parrulismu avergoñándonos de lo propio pa naguar polo de fuera. Y col nuestru apoyu cómpliz a unes élites polítiques y culturales que nun paren de poner estorvises a lo de casa y fomentar lo foriato.

miércoles, 11 de abril de 2012

Estoyu: Cada día menos democracia.


Lleo  noticies d'eses que dexen a ún clisáu. Nos tiempos vinientes la resistencia pasiva pue considerase un atentáu a l'autoridá. Otramiente, convocatories per internet que puedan alterar l'orden públicu tamién puen tipificase como delictives.

Axuntando anuncies d'esta mena zárrase un círculu absurdu. Si actúes de manera pacífica penalícente. Si faes una convocatoria pa manifestate quedes albentestate de que te la clasifiquen como violenta y prepárate.  En dambos casos remanez un filu conductor claru: cortar pela freba la llibertá de convocatoria, d'espresión y de manifestación. Toos ellos drechos básicos en cualquier democracia.

Pero cuestiones como éstes nun son pa veles de manera aisllada. Encaxen, perfectamente, dientro de toa una recatafila de midíes dirixíes a recortar derechos ciudadanos. Porque la nuestra historia más reciente resúmese como un entainar de manera que da vértigu hacia una sociedá de ciudadanos con menos derechos cada vegada. Hacia una nueva sustitución del conceptu de ciudadanu llibre pol de ciudadanu custodiáu, por non dicir un simple trasuntu de vasallu.

Y nun taría de más entrugase qué encaxe real tien too ello na actual Constitución vixente. Porque talo paez qu'hai un nuevu deporte qu'espolleta con fuerza pente cierta clase política con añorances del pasáu más murniu: el pasar los artículos constitucionales pela parte del cuerpu allugada una cuarta embaxo l'embeligru.

Porque basta con observar la realidá cotidiana pa comprobar exemplos de recortes de derechos y llibertaes ciudadanos a embute. Cada día somos menos llibres. Cada día tenemos menos drechos. Cada día avanzamos más, con pasu fitu y decidíu, hacia una democracia esfarrapada, ruina y convertida nun simple espantayu tres d'el qu'escuca la solombra d'una cada vez más visible dictadura.

lunes, 9 de abril de 2012

Estoyu: Fraudes y lladroniciu.


La secuencia repítese con una frecuencia corriente dafechu. Un partíu fai campaña electoral, presenta un programa y candidatos y gana. Dempués, darréu incumple'l programa o, cenciellamente, fai tolo contrario a lo plantegao a los electores.

Cuando un partíu, el que seya, fai tolo contrario a lo que prometió pa llegar al poder ta cometiendo un fraude. Esto ye lo qu'asocede dayures y ente nós, concretamente nesti Estáu.

Espárdese per ende la idea de que democracia ye dir votar cada ciertu tiempu. Que dempués amenorguen los drechos ciudadanos, que s'incumplan les cartes magnes, que los partíos engañen a los votantes, que l'estáu de derechu seya una espantayada, eso queda nun segundu planu como si nun fuere lo fundamental.

Y esa ye la trampa que rescampla. Cuando lo anterior argaya la democracia tamién y entramos, de capitón, notru sistema políticu estremáu. Eso ye lo que tenemos güei. Otra cosa. Otru sistema.

Un sistema basáu nel fraude a tolos niveles y nel lladroniciu. Talo paez qu'anguaño'l que nun roba ye tontu o nun ta no que se celebra. Ísennos el perru si nos equivocamos nes nuestres cuentes y dempués esos mesmos perdonen los grandes fraudes financieros de los que refalfien de dineru. Una estafa social de meter mieu.

Y nestes tamos actualmente. Con recortes casi diarios de drechos, con les nuestres economíes feches una llaceria mientres vemos medrar les de los grandes grupos del poder y de les finances. Con una Constitución camudada en papel moyao y con un futuru que respiga los pelos al más trabáu.