sábado, 29 de diciembre de 2012

El magu Merlín a la Xunta Xeneral.

Andaba'l sr. presidente pensatible, gachu y silenciosu, esmolecíu pola falta de cerebros sesudos conque atapar los furacos qu'atopaba nel so a la hora de buscar soluciones. Pero nada. Por más que rebuscaba nos milenta chiringos espardíos perdayures, por más qu'estruyaba al zurriburri d'asesores puestos a deu nada nun-y valía. 

Escurrió entós daqué brillante. Alcordóse cuando de rapacín diba, güevera en mano, a por una docenina de güevos de pita roxa y pensó por qué nun buscar media docenina de cerebros fondos, persesudos, almirablemente amueblaos y arrodiase d'ellos. Y dicho y fecho. D'esta miente, nació lo nunca visto na xermandía autonómica del mundu mundial galácticu internacional. ¡Un conceyu asesor de doce sabios!. ¡Adepuxa!. ¿Viesti tu otru tal, manín?.

Y formóse asina esa versión moderna de los caballeros de la mesa redonda del rei Arturu en versión de los cerebros de la rueda cuadrada del sr. presidente. ¡Acabóse'l tiempu les tiniebles!. Un simple castañolar de los deos y ¡fáigase la lluz!.

Yo mesmu de cuerpu presente y oyíos sollertes tuvi'l privilexu de sentir a una d'estes mentes sesudes que, como n'El Quixote, prefiero nun m'alcordar del nome,  l'otru día facer unes declaraciones esllumantes. Venía a dicir daqué asina como qu'Asturies tenía que tar preparada pa cuando Europa y España remontaren el vuelu poder enganchase a elli. A esto nel mio pueblu llamámoslo una perogrullada. Pero reconozo humildemente que nel mio pueblu somos unos simplayos y más daos a catar cabres qu'a practicar la fonda sabiduría conseyeril.

De toles maneres, yo nun lo tengo nada claro. Pa mio idea llegó'l momentu de dar un pasu cualitativu p'alantre. Y ye que camiento que, pa dexar de siguir dando arrollicones picu abaxu, deporte que llevamos practicando n'Asturies guiaos pola sabia batuta socialistera cuantisimayá, nun necesitamos sabios nin asesores, nin nada d'eso. Lo que necesitamos ye maxa de la bona. Maxa de nivel, contrastada, druídrica. Asina que yo recomendaría-y al sr. presidente que contrate directamente los servicios del magu Merlín, que-y acuriose un despachu afayadizu y soleyeru nel corazu de la Xunta Xeneral y... ¡a iguar problemes a golpe de varina máxica como cuentu risa!.

viernes, 14 de diciembre de 2012

De madreñes pela villa.


Hai vezos que van quedando, adulces, nel recuerdu. Nun hai tantos años que taben vixentes, pero a la velocidá que cambien anguaño los tiempos pue haber xente que-yos resulte chocante dafechu. Ún dellos ye'l del emplegu de les madreñes pa pasiar y con un usu urbanu lloñe de praos, lloses o cuadres. Porque antes nun toles madreñes se facíen y usaben namás que pa trabayar nel mediu rural.

El casu ye qu'hai años dibes a comprar unes madreñes y podíen entrugate, guapamente, pa qué les queríes, si pa la corte o la güerta o pa pasiar. Les primeres yeren más fuertes y les segundes más fines y como acabaes con mayor procuru. A min mesmu preguntárenme una vegada siendo rapacetu'l tipu que quería, nel mercáu del Fontán n'Uviéu, cuando fui con una güela mía que tenía casería a comprar unes pa caleyar pela aldea. Nun sé si esti vezu taría xeneralizáu, pero apunta a que dalgunos madreñeros, polo menos, facíen el distingu.

Recuerdo ver a paisanos caminando peles cais y aceres de la villa cuando arreciaben l'agua ya'l fríu del iviernu vestíos cola ropa "los domingos" cola so chaqueta, corbata, abrigu... y madreñes. Llevábenles llimpies neto que si fueren zapatos. Recuérdoles barnizaes en negro incluyendo la parte fuera de los tazos. Diben con elles los domingos hasta al campu fútbol tamién porque  nun quedaben les dees tán talludes pol fríu de tar quietos durante'l partíu. Sentí contar en casa cómo hasta un mesmu notariu diba con elles al so despachu. Conservo unes d'un familiar míu que morriere siendo yo guah.e. Son llixeres y de pocu grosor en comparanza, por exemplu, a les que yo mesmu tenía apocayá p'andar trepando pela corrada de la casa familiar o pela güerta.

Anguaño paezme qu'esti usu urbanu de les madreñes foi cayendo en sucu baxeru. O yo polo menos nun me paez que lu vea como antaño. Los zapatos y les botes apoderáronles como prendes de vistir que nun tán venceyaes al trabayu. Tampocu nun sé si actualmente se faen toles madreñes iguales o sigue habiéndoles más fines pa los que nun les van usar peles caleyes y llabores del campu. De toles maneres paecióme interesante facer na bitácora esta reseña de la esistencia  d'un emplegu netamente urbanu -polo menos en dalgunes villes nuestres- d'esti calzáu tán vinculáu a la nuestra manera tradicional de calzar...

jueves, 15 de noviembre de 2012

A la gueta.

El cultivu y aprovechamientu de los castañeos foron una de les bases alimentaries na nuestra sociedá tradicional. Enxertar, rozar, demer, guetar, rebuscar, echar na cuerria, mayucar... Hai quien diz, ayuri, que si la xente del norte lleguemos hasta güei débese a les castañes. Escurque una desaxeración, pero que pieslla la so parte de razón tocántenes a la importancia d'esti frutu antiguamente.

Na actualidá los castañeos tán, davezu, n'abertal y ensin curiáu dalu. Nun estáu abandonáu y xabaz. La vieya cultura alrodiu les castañes foi quedando apostalgada y casi que dasaniciada. Cola entrada de nuevos alimentos, como por exemplu, la patata, les castañes, al empar qu'arrequexaes, arrecostinaron cola so lleenda negra. "Ye como comer madera" reza ún  de los sos sambenitos más repitíos.

Pero'l casu ye que nos últimos tiempos vien recuperándose daqué la importancia d'esti frutu. Sigue fomentándose la celebración de los antiguos amagüestos, mesmo nes corraes de los colexos (actividá bien interesante p'amorosar a los rapacinos cola cultura tradicional del país). Recuperóse'l vezu de los potaxes, nes sos distintes variantes, pali que pali va esconsoñando la utilización pa la repostería, etc.

Y, arriendes de lo anterior, quédanos tamién a bastantes ciudadanos esi rixu por dir a la gueta. Enfilar pa los castañeos, de magar mediaos d'Ochobre n'adelantre, a buscar los oricios que van dexando cayer les castañales y esbillalos pa tornar pa casa con una bona pañada. Bolsa, gorru pa evitar una mancadura na cabeza por una rama inoportuna, palu p'arreblagar y ayudase, guantes de protección o les vieyes morgaces y, si acasu, botes altes o polaines pa metese pente'l felechu y los escayos rastreros ye tola equipación -barata y alcanzable- que necesitamos pa esta actividá.

Dempués dir percorriendo los carreros del castañéu, esbillando y pañando. Observar qué castañales yá tiraron la so producción y cuáles son más serondes. Les que dan la fruta más gordo o más ruino... Y, de pasu, esfrutar de la prestancia que nos ofrez una viesca autóctona col colloríu perguapu de la seronda. Descubrir per ende setes de diverses tribes y pasar una xornada afayadiza cola sida d'andar a castañes, meciendo l'actividá deportiva col divertimientu.

Hai persones, ente les que m'alcuentro, que nun somos a pescanciar un otoñu ensin dir a la gueta, o facer dalgún amagüestu. Estes actividaes vienen a ser como un finxu nel calandariu añal que nun se pue dexar pasar de llargo si les circunstancies nun lo torguen. Empozase en castañéu, caleyar, empapase d'una guapura icomparable y guetar. Estos díes tovía tamos a tiempu d'ello. Y cuando la pañada empieze a escasear queda la última fase, la de la rebusca, garrando aquelles castañes que foron quedando amatagaes y conservaes pente'l morgazu y la foyarasca. Ensin escaecer intentar llegar a eses castañales allugaes nes zones más abegoses, ente'l felechu y los escayos y que, por aciu d'ello, quiciabes naide nun visitare tovía, aprovechando que'l fríu y les xelaes van engurriándolos col pasu los díes.

En fin, que tamos na seronda y ye la gueta...

jueves, 8 de noviembre de 2012

Tarzanín de Ventanielles, voceru presidencial.

PRIMER. Un paisanu asturianu viaxó un día peles selves africanes. Ellí faláron-y d'un home que criaren los goriles y que col so rinflíu atorollante, un taparrabos y un cuchiellu por arma yera l'amu del llugar. Conociólu y convenciólu pa vinir con él a Asturies. Y asina entamó a conocese la lleenda de Tarzanín de Ventanielles.

SEGUN.  Los miembros del gobiernu asturianu andaben desorientaos y esmolecíos dafechu. Cuantayá que'l señor presidente andaba como n'ayén pel palacete de la cai Fruela gachu, pensatible, meditabundu y ensin que naide fuere quien a sentilu gorgutar nin triándo-y a costa fecha una dea pa ver si facíen asina que'l so gargüelu esconsoñare. Aconceyaron entós y decidieron dir buscar a daquién que, con voz arrecha, arrestellada, descomanada y que naide nun pudiere dexar de sentir, fixere de voceru circunstancial p'acabar asina cola mareona de crítiques que-yos venía encima por culpa del silenciu llóbregu presidencial. Y una llama feble d' uz allumó entós les sos mentes galvaniegues. La persona afayadiza pa ello yera... ¡¡Tarzanín de Ventanielles!!.

TERCE. La última vez que'l director del diariu "La Trolona Vomitiva" me llamare a la so oficina encamentáremelo bien encamentao. Pa la prósima vez que tuviere que cubrir una comparecencia del señor presidente tenía que venir con un artículu fechu y perfechu. Nun me valía la xida de que'l mandatariu cimeru nun falaba pa yo nun escribir nada. Eso yera problema míu. Tenía que tornar con daqué escrito pa la edición del periódicu o enfilar al paru con una patada na culera.

CUARTU. La rueda de prensa llevantare una espectación desaxerada. Anunciáresenos qu'un sustitutu del señor presidente diba ser l'encargáu de treslladar a los representantes de los medios de comunicación ellí presentes les opiniones del dirixente atacáu d'una "afonía gafa, fonda y brutal" según la definíen los sos llambeculos más sumisos. Yo temblaba de nervios y malpenes podía tragar el cuspe pola mor de saber si esta vez diba poder escribir l'artículu o si la mio carrera en "La Trolona Vomitiva" diba finar ellí mesmo. De reflundiu, salió Tarzanín de Ventanielles acompañáu d'un llambeculos gubernamental que lu presentó invitándonos dempués a face-y toles preguntes que nos paecieren pertinentes.

QUINTU. Entamó entós la batería d'entrugues y...¡les rempuestes más alloriantes y repetivives que viere en tola mio vida profesional!.

-Dígame, señor voceru, ¿qué opina'l señor presidente de la situación política asturiana?-.

-¡¡Aaaaaiiaiiaaaaaaiiaiiaaaaahhh!!-.

-Señor voceru, ¿qué medíes va axeitar el gobiernu p'amatagar los efectos de la crisis?-.

-¡¡Aaaaaiiaiiaaaaaiiaiiaaaaahhh!!-.
  
Y asina unes cuantes intervenciones más hasta que llegó'l mio turnu:

-Por favor, ¿podría usté dicinos....?-.

Y quixo la mala trampa que fuere  nesi momentu cuando Tarzanín de Ventanielles quedó clisáu nuna llámpara d'araña que colgaba del techu, pegó un saltu felín y garróse a ella. Dempués con un xiringón que dió algamó otra llámpara allugada p'hacia la salida de la sala de prensa y... ¡xispió!.

SESTU. Salía yo fechu moralmente una llaceria viéndome despidíu ensin remediu de "La Trolona Vomitiva" cuando sentí un burbús p'hacia una oficinuca allá pa la manzorga. Escuqué ensin que me vieren y ellí taben el señor presidente y Tarzanín de Ventanielles. Quedé claváu... ¡el presidenta falaba!. ¡Falaba...!

-En confianza, Tarzanín, ¿tú crees que la comparecencia convenció?-.

-Yo camentar que non, señor presidente. Paecer que periodistes querer sentir daqué más convincente que los mios arruxíos-.

-Yá, yá... pero a min nun se m'ocurre contate nada pa que lo digas, ¿qué podemos facer entós?-.

-Yo nun saber, señor presidente. Quiciabes contratar loru que saber dicir dos o tres frases siguíes... Mi nun gustar esti trabayu. Preferir siguir esguilando peles faroles allá per Ventanielles...-.

PORRA. Nunca pudi imaxinar que los mios colegues de profesión yeren tán esquiroles ya insolidarios. Por más que-yos relaté la conversación que sintiera ente'l señor presidente y Tarzanín de Ventanielles nengún me quixo creyer. Asina que tampoco nun quixeron facer de testigos delantre del director del diariu "La Trolona Vomitiva" pa que nun me despidiere. Y, pa detrás, inventáronse unes declaraciones falses del mandatariu cimeru autonómicu, que redactaron a comuña, pa salvar les sos pelleyes delantre  los sos respectivos directores arriendes d'engañar de pasu a los llectores de los sos diarios y echa-y una manina al presidente mudu. 

Yo, d'entós p'acá ando al paru y en tratamientu siquiátricu. ¡¡Surrealismu de país!!.





jueves, 25 de octubre de 2012

L'Aquello.

Yo llevaba yá varios díes de velea. Y falando colos otros dos compañeros míos arqueólogos contárenme que taben paecío. Tol día de remandela, ensin pegar güeyu nin pescanciar nada. Alloriaos. Desconcertaos. Plasmaos.

Cuando nos presentaron aquel proyectu nun yéremos a creyelo y enchipémonos llueu de pura ilusión y allegría. Estudiar un túmulu virxe que milagrosamente inda nun fuere esfarrapáu por ayalgueros en busca de tesoros. La prestixosa y famosa revista internacional d'arqueoloxía que nos plantegare'l tema encargárase de too. Contactos cola Conseyería, permisos, financiación...

Asina qu'allá pel mes de Mayu empobinemos pal campu tumular y entamemos col nuestru trabayu. Fuimos furando y analizando adulces aquel coteru de tierra y piedra a la busca d'un dolmen que nun tenía nes sos coraes. Allá una vegada, atopemos una capa de magre y debaxo unes llábanes que tapaben un cabuercu abiertu na roca del terrén u taba l'enterramientu yá ensin restos humanos. Pero la bayura del axuar dexónos empapirotiaos. Amosaben que nos afayábemos nun túmulu de los anicios neolíticos con escatafinos anteriores: dos hachos pulimentaos, un picu asturiense, una piedra de moler, un anzuelu de dos piques, fueyes y puntes de pedernal, un puñáu de lláscares pequeñes, un regodón mancháu d'ocre... y, metanos d'aquella guaña arqueolóxica, surdió entós lo que nos fixo arremellar los güeyos, sentir añusgáu'l gargüelu y tar a puntu de sufrir un válamu. Sí, ellí taba... ¡¡l'aquello!!.

¡Nun podía ser!. Comprendimos darréu que nosotros tres nun yéremos otra cosa qu'unos pininos ciguaos. Un pozu ensin fondu de mala suerte. El surrealismu fechu arqueoloxía. La negación. ¿Ónde díbamos dir a contar aquel descubrimientu?. ¿Quién rediós diba ser tan fatu pa danos creitu?. Si se nos ocurría gorgutar pallabra del sucesu, si escribíamos una sola llinia de lo qu'atopáremos -y yá nun digo nada si lo enseñáremos- convertiríemonos nel intre na risión. Nos payasos de les calicates prehistóriques. Na carnaza espuesta a les xirigoncies de los picoteros zuniegos. La chancia andante. La comedia de tolos foros científicos espardíos perdayures nel mundu.

Sí, miániques, un proyectu ilusionante y prestosu a esgaya tiráu pela borda por culpa del ...¡¡aquello!!. Pero pa nada nun nos valiera apurrimoslu ún a otru ente los tres pa ver si yéremos a ver per dalgún llau la figura d'una venus, la cabeza d'un ciervu, dalguna representación humana, animal o abstracta si acasu. Nada. L'esfuerzu interpretativu yera inútil dafechu. L'aquello yera... ¡¡l'aquello!! ensin polibilidá de discusión nin dulda dala y puntu redondu.

Asina que a ver a quién, ónde y cuándo díbemos convencer que metanos un axugal mortuoriu d'un túmulu virxe d'un llugar del oriente asturianu atopáremos una reproducción calcada, esacta y maxistralmente fecha d'un ratón d'ordenador pulimentáu primorosamente sobre un mogote d'alabastru...



domingo, 14 de octubre de 2012

Pasiando na seronda...

 Ta fresquina la mañana d'esti día de seronda. Lluz el sol arribones y col pasu les hores dirá calentando de xuro. Pela carretera que xube de La Pola Somiedu camín d'Aguinu y Perl.lunes crúzome con un rapaz que lleva un perru como pa restrexar. Siéntese la voz d'otra persona p'hacia dientro d'una viesca que llenda cola carretera. Ta claro que busquen daqué.

Un poco más alantre observo una imaxen impagable. Nes ruines medievales del torruxón del Castiellu del Alba abúltame qu' hai posaes dos utres una en cada esquina d'él nortiando. Garro los prismáticos y compruebo que toi no cierto.  Tán mirando p'hacia'l llugar onde buscaben los homes. Seguro que saben perfectamente ú anda lo que busquen y ónde los perseguidores cola so vista avezada a vixilar y atopar dende les altures.

Trato d'averame un pocoñín más pa sacar una semeya que me paez prestosísima de les utres na so talaya privilexada. Pero esnalen dexándome coles ganes. Poco dempués siento lladrar perros y varies detonaciones d'escopeta. Observo tamién cómo una utre va planiando baxo penriba la viesca.

Yá pela tarde salgo a dar una revolada. A la vera de la sienda veo un llantáu un cartel onde s'encamienta a los pasiantes andar con procuru porque ta celebrándose nesta xornada una cacería pelos montes de la contorna. Too encaxa entós. Les utres que viere pela mañana nun facíen otra cosa qu'esperar, sollertes, pola so oportunidá neto a como lo lleven faciendo dende siempres cuando allá en monte muerre una presa...

miércoles, 26 de septiembre de 2012

Corruptos, totalitarios y pensamientu fósil.

Cada día almorzamos con casos de corrupción y con casos tamién que, si nun entren llegalmente no corrupto, sí lo faen moral o éticamente.

D'una banda, xente implicao en meter mano na caxa de los dineros de toos. Pocedentes de la política, de les finances, etc. D'otru llau unes dietes y unos privilexos que van quedando albintestate y de los que disfruten esos mesmos que nos torguen con recortes y midíes antisociales de toa mena.

Nuna situación como esta na que nos alcontramos danse les condiciones afayadices pa la involución. Aquellos deseos qu'albergaben les clases más reaccionaries ven un caldu de cultivu onde espoxigar y facese reales.

Entamen d'esta miente a plantegase nunos casos y a facese reales notros unes polítiques y unes decisiones que nos quieren emburriar p'hacia situaciones que contábemos quedaren anubríes nel pasáu. Cuestiónase la estructuración autonómica del estáu. Cuestiónense o tarácense derechos ciudadanos y sociales básicos. Aprovéchase'l ríu revueltu d'esta situación interesosa d'esbarrumbe xeneral bautizada como crisis pa recular a vieyes dómines de totalitarismu y esplotación, a lo retrógrado, a lo mugoroso.

Pero pa llevar alantre los sos llogros, los grandes poderes necesiten contar con peones de brega abondantes que sofiten los sos postulaos. Precisen contar cola collaboración de capes de la población con un pensamientu fosilizáu cuantayá, que viven nesti sistema débilmente democráticu con maneres de razonar claramente predemocrátiques, servilistes, reaccionaries y que contribuyen a furar los cimientos de cualquier movimientu de reacción ciudadana. Numbéricamente los que detenten los grandes resortes del poder financieru y políticu son una clarísima minoría, pero les redes clientelares, d'amomiaos sociales, de llambeculos con vocación d'esclavu, de pensamientos fosilizaos son grandes y algamen a tolos rincones de la sociedá. Y si yá teníen de por sí la fuerza y el poder acaben d'esta miente de reforzalu y afitalu.

Y con esti panorama, va vaganos resalvar esta auténtica llamarga na que nos alcontramos. Tamos yá somorguiaos en tiempos mui prietos y tremendamente difíciles onde nos xugamos derechos y llibertaes consiguíos col esfuerzu de varies xeneraciones que nos precedieron. Y de  la manera en  que respondamos a esta situación va depender el  nuestru  futuru y el  d'otra enfilandrada de xeneraciones vinientes.


viernes, 7 de septiembre de 2012

Recuerdos de Cuadonga.



Los primeros recuerdos de Cuadonga que tengo ye siendo rapacín cuando me llevaben en casa a visitar el llugar. De mano, la impresión del  paraxe de la cueva, colos sos tabayones cayendo. La xente devoto  xubiendo en promesa  los peldaños de la escalera de rodiyes. Y la  imaxe de la virxe. Y na antoxana la estatua de Pelayu cola Cruz de la Victoria. Y na mio mente'l cutir d'espades y los glayíos de lo que me contaren que fuere, allá de los tiempos, una gran batalla heroica. Tamién cuando una tía de mio ma bebiera del cañu de la  fonte onde dicíen que la moza que lo fixere casábase dientro l'añu, pero nesti casu quedare soltera tola vida y yá pasa de los noventa. Tamién cuando foron en casa a bendecir el primer coche que tuvimos, cosa que nesti casu paez que tuvo efectu y pintó bien, porque enxamás espetemos con él, lo que ye d'agradecer. Y aquella bola de ñeve de cristal que tenía una güela mía con una imaxe de la Santina dientro y cola que me prestaba xugar cuando la visitaba.

Alcuérdome, d'otru llau, de los actos que per Setiembre del añu 80  fixere l'entós Conseyu Rexonal. Un actu políticu y una folixa en Cangues d'Onís. Un grupu xente acudimos a una convocatoria alternativa y plantémonos pela mañana al pie de la cueva a repartir unos panfletos onde se dicía qu'aquello yera la cuna d'Asturies y más nada. Dempués fuimos pal actu políticu a esberridar les nuestres conseñes contra aquella xigomencia entamada pol gobiernu que teníemos, hasta que nos encamentaron que, o callábamos, o de cabeza pal cuartón. Como a los pocos díes tenía yo que dir pa la mili, maldita la gracia que me fixo aquella situación. Pero al final, la cosa nun pasó d'ehí y acabemos meciéndonos cola xente de la fiesta de pela tarde.

Si dalgo define la relixosidá asturiana ye'l sincretismu. D'un llau, la parte pagana de reminiscencies tribales relluma enagora nos nuestros díes y, d'otru, allúgase la cristiana que foi espoxigando de magar fuimos reinu cola cruz como emblema cimeru. Una bona preba d'él tenémosla na Ilesia de la Santa Cruz, en Cangues d'Onís, asitiada enriba un dolmen que se pue ver dende'l so interior. Ellí cuenten qu'enterraren al rei Favila y, dicen los que pescuden nestes coses, que'l so funeral pudo oficialu, guapamente, non un sacerdote cristianu, sinón otru paganu. Mesmo ensin salir de la mio casa y más de mil años dempués yo soi una de tantes prebes andantes de la simboloxía d'esi sincretismu. Llevo al pescuezu una colgadiella que me regalaren na mio familia cuantayá con dos elementos protectores. Ún d'ellos, una cigua tradicional d'acebache, y l'otru... una medalla de Cuadonga pasada pel mantu la virxe.

Y acabo col últimu recuerdu d'esta enfilandrada que me dio guei por dir esbillando na bitácora y que ye anguaño un documentu históricu del llugar (semeya d'esti post). Trátase del grabáu tituláu "Topografía devota de Covadonga" realizáu en 1.759 por Gerónimo A. Gil sobre un dibuxu d'Antonio Miranda unos años antes del incendiu de 1.777 onde amburare la antigua ilesia de la cueva y la virxe que custodiaba. Una información afayadiza de cómo yera'l sitiu naquel entós. Vese nél  una representación de la Santina con Pelayu y Favila afinoxaos el pie d'ella. Un resumen perfectu del simbolismu del llugar qu'amiesta lo relixoso colo político y del que nun se pue dicir otra cosa más que foi cuna d'un vieyu reinu altomedieval del que venimos los asturianos. Otra cuestión yá ye que tea reinterpretáu y remanáu munchayá y de contino  pol yá perconocíu discursu cuadonguista y españolista que lu fai berciu xustificativu d'otru reinu nacíu sieglos dempués y ferramienta ideolóxica d'una concepción centralizada políticamente y uniformista cultural y llinguísticamente d'esti estáu onde los asturianos nos allugamos anguaño.

viernes, 24 de agosto de 2012

El Castiellu y les Utres.

Amiyen los rellumos del día nidiu como esproñando a posase nes cogorutes u tienes fincaos los güeyos na mañana sele.

Y  norties allarribón, empicorotiáu nel gurugú casi inalcanzable, los muruecos del castiellu vixilando enagora sollertes la vallada.

Y , al velume del cielu que rescampla d'azul espurechu, esnalen les utres observando la contorna dende esi altor casi qu'acutáu namái que pal tronu de los dioses.

Glaya entós nel nial de l'alcordanza la imaxen gafa del señor feudal y los soldaos arramplando colos tributos. Arrampuñando les vides. Semando les lloses de llárimes.

Tamién entós, per milenta requexos de la renombranza, gorgolita y arreciende la sangre caliente arramao nel campu de batalla ya'l traxín de les utres pente los calabres resuena gafu cabruñándo nes vidayes hasta la llocura.

Eso arruxiden les imáxenes llonxanes tarazando la lluz como cuchiellos. Eso paez a cencielles. Nel rixu primeru, mialma que señor feudal y utres asemeyen talo que miembros tenebrosos d'una mesma güestia, socios daveres espantibles...

Pero son namái que les garduñes zorramples de l'apariencia. Porque xurgando pente la borrina trupo del  ayeri, rebuscando nes buelgues mofoses del pasáu, hai inda más, hai abondo más que refocila entós amosando una dixebra clara y fonda:

Y ello ye que, nes vieyes tradiciones celtes, teníen l'honor les utres de cumplir l'encargu d'ayudar a les ánimes de los guerreros muertos a llegar al llau del gran dios Lug. Poro, tres la batalla, aprucíen los cuerpos mancorniaos de los calabres espardíos a botavoléu y a la vista de les aves. Pues yeren les utres nes dómines del ixuxú xabaz,  de la brenga rebalba ya'l  cutir arrechu del fierro, neto a los ánxeles maxestuosos y nobles de los vieyos dioses.

martes, 7 de agosto de 2012

Pontes, molinos, horros...

Caleyar peles siendes y caminos d'esti país nuestru ye convertise nun testigu murniu de milenta imáxenes del esbarrumbe del patrimoniu material de nós.

Pontes, molinos, horros, teitos, cases de tipoloxíes tradicionales, castiellos medievales... construcciones  de toa mena d'otres dómines que van quedando camudaes en muruecos que la maleza va anubriendo.

Un patrimoniu que ye toa una renombranza del nuestru pasáu, que posibilitó a los antiguos resalvar ríos, moler la escanda o'l maíz, curiar la collecha, escalecer cabo'l llar, dar abellugu a persones y animales, o escribir páxines llexendaries de la nuestra historia va quedando amorteciendo ante la indiferencia ya'l desdexamientu más llastimosos y de los que toos somos responsables.

Dempués aprucen delantre los nuestros güeyos grandes proyectos, obres faraóniques, entamos culturales atarraquitaos de cosmopaletismu acomplexáu,  sumidorios auténticos d'un dineru que nun cuaca emplegar en reconstruir toa esta bayura de resclavos que perviven  inda del nuestru pasáu.

Y ye que cuando un pueblu va dexando esfarrapar el so patrimoniu material ya inmaterial daqué grave y gafo echa raigones nes sos coraes. La gafura del olvidu, del autoodiu, d'esmucise de ser quien se ye pa olivar por vivir pasaos y, de xuro, tamién presentes y futuros ayenos.


lunes, 9 de julio de 2012

El misteriosu casu del gobiernu invisible.

L'estudiu de televisión ta en penumbra. Pente los xuegos de lluces y solombres asomen les figures del Presentador y l'Invitáu. El primeru vestíu de negro y el segundu de blanco inmaculao. Acércase la cámara y empiecen a falar.

P-¿Asina que diz usté que nun se ven?-.

I-Non. Nin gota. Pero tán. Mialma que tán-.

P-¿Y por qué sabe que tán si nun se ven?-.

I-Hai nicios d'ello. Les sielles de los despachos movíes del sitiu. Les coses de la mesa movíes tamién. Puertes pesllaes abiertes y puertes abiertes pesllaes. Y les cuentes bancaries colos movimientos pertinentes de les pagues qu'enfonilen por nun la bicar nin facer nada-.

P-Y cuando la xente los necesita. Cuando los ciudadanos aforfugaos polos problemes los necesiten, ¿cómo dan con ellos?-.

I-De nenguna de les maneres. Simplemente nun dan. Pretender eso ye como querer tocar cola punta de los deos les barbes de San Pedru allá en cielu-.

P-¿Y nun intentaron buscar l'ayuda de dalgún profesional de lo esotérico?. ¿Dalgún exorcista?. ¿Dalgún medium...?-.

I-Pel nuestru país llévase más lo de pasar l'agua. Pero nada. Fíxese usté hasta qué puntu ta la cosa fea pa dar con ellos qu'hasta cuando s'echa'l cuernu al agua nun fai nin guruyos y queda como muerto. ¡Un desastre!-.

P-Pero entós cómo se gobiernen ustedes?-.

I-De nenguna manera. Andamos toos desgobernaos. Unos llorando. Otros glayando. Otros puñando les paredes... Aquello ye un dolor-.

P-Pues créame que lo llamento daveres. Poques veces vieno naide al estudiu a contar una llaceria como la que me ta relantando usté. En fin... si podemos ayudar dende'l programa en daqué...-.

I-Pues quiciabes si me pudiere dar el teléfonu d'aquél rapaz... el que tenía un programa pa buscar xente desapaecío... ¿cómo se llamaba?... ¡Ah, sí, Lobatón!-.

P-Paezme que nesi tema igual sí lu vamos poder ayudar. Enseguidina-y lu busco. Por cierto, ¿por qué viste usté tán de blanco que talo paez un falopu?-.

I-Un intentu desesperáu d'atopar trabayu allá pela mio tierra. Como tenemos un gobiernu pantasma y dicen que les pantasmes son como la marimanta, asina toos blancuzos cuando se dexen ver, igual me tomen por ún d'ellos y me coloquen a deu en dalgún chiringuín... A, ho, ¿y usté por qué va tou de negro?-.

P-De llutu y pena pola que-yos ta cayendo enriba, compañerín, con esa tropa. De llutu y pena...-.

domingo, 8 de julio de 2012

Los milagros del códiz.

El presidente del gobiernu español  fixo entrega del Códiz Calixtín a los sos custodiadores dempués de que lu rescataren del robu sufríu abenayá.

Ente los documentos del mesmu figuren informaciones sobre la ruta del Camín de Santiago pa los pelegrinos que lu facíen naquelles dómines, conseyos ya informaciones de los vezos de los llugares per onde pasaben... Tamién atroca un sitiu pa los milagros relacionaos col apóstol.

Llamen l'atención la preocupación y molestia tomaes pol señor presidente por ser él mesmu'l que devuelva'l códiz a la catedral compostelana. Que se convierta en pelegrín a la so manera. Y nun taría nada mal que la entamare a caleyar per ende a lo llargo y ancho d'esti estáu, sinón devolviendo códices, sí apurriendo soluciones. Que se molestare en conocer tamién los vezos y preocupaciones de la xente de los llugares sobre los que gobierna.

Asina, podría visitar a los que-yos robaron el trabayu pa devolve-yos otru nuevu. Tamién podría visitar centros educativos  aforfugaos pola que se-yos avecina pa devolve-yos los puestos y calidá nel serviciu tamién robaos poles tisories ministeriales. A los pensionistes, a tanta mocedá ensin futuru, a la sanidá ya'l copagu...Y siguir d'esta miente pelegrinando pa desfacer tantu robu como hai espreganciáu perdayures al traviés de les devoluciones afayadices.Y yá nun digo nada de dar una vueltiquina peles comarques mineres pa devolve-yos les perres robaes  nos presupuestos d'esti añu en cursu. Y asina sucesivamente.

Pero camiento que too ello nun va asoceder. Seique porque'l señor presidente anda con munchu afoguín copiando lo que-y dicten dende allarribones mirando'l mapa européu ya reinterpretándolo a la so manera. Y talo paez que nesos testos nun figuren estes nin otres midíes que tienen esmanganiyaes la economía y la moral a la mayoría de la población. Claro que a lo meyor nun ta too perdío. Quiciabes el señor presidente pudiera iguar tantes cuestiones ingrientes consultando l'apartáu de los milagros del códiz. 

Porque talo paez que va ser cuestión de milagros iguar tantu despropósitu contra los de siempre como'l que'l gobiernu del señor de la barba blanca ya'l pelo negro tien entamáu nel pocu tiempu qu'enagora lleven nel poder.

jueves, 5 de julio de 2012

Coses del branu.

Los díes del branu tienen el so aquello. Sales a espansionar per ende y de pasu reflexones daqué y desconectes una migayina. Dempués tornes y compruebes que too sigue igual, sólo que te paez como que yá nun entendieres delles coses o que, entendiéndoles, empieces a veles distante y dibuxando na cara un xestu ente la estrañeza y l'escepticismu.

Navegando per ende pela rede atopo noticies como la de la formación d'una nueva organización política sofitada na base de dos anteriores más otres y independientes,pero al empar y darréu, entérome qu'una de les fuerces que participaben hasta apocayá nuna de les fuerces entamadores salióse del proyectu. Nun digo que seya bono o malo. Que tengan razón tirios o troyanos. Por dicir tampoco nun digo que talos acontecimientos m'interesen sobremanera a estes altures de la película. Lo que sí llama la mio atención ye esi dir y venir d'aliances y separaciones polítiques al traviés d'abondos años nun ciclu casi eternu en ciertos ámbitos del abanicu políticu autóctonu.

Entérome tamién que la oficina de política llingüística yá tien directora procedente del campu de la docencia. Nun voi ser yo'l qu'opine del llabor d'una persona que tovía nun fixo nin les galanes nel cargu, pero llamáronme l'atención dos comentarios picuscayos que lleí en diarios dixitales. Nún d'ellos calificábase a los maestros de ser un sector non productivu del bable. Nun sabía yo qu'esto del asturiano tenía sectores productivos y otros que nun lo son. Nin tampoco sabía nin sé cuálos son uno o lo otro. Pero la cosa tien el so megollu. Supongo qu'un blog nun ye productivu, asina que cuando escribo nesta bitácora debo tar faciendo un exerciciu públicu y descaráu de galvana, asina qu'aprovecho pa pidivos disculpes por ello.Otramiente, notru comentariu afirmaben que la citada persona nun falaba asturiano. Y paecióme raro porque viendo la biografía d'ella y el sitiu y conceyu onde nació y se crió  lo normal ye que fale como mínimo amestao. Simplemente por eso y pola dedicación a la enseñanza d'asturiano durante munchos años. De toles maneres nun mundín onde nun ye nada raro atopar dende escritores a académicos que nun falen la llingua na qu'escriben tampoco sedría esto como pa refierta-ylo a naide n'esclusiva y como si fuere un casu aisláu, escandalosu y descalificante dafechu por sigo mesmo.

Y arriendes d'esto lo yá persabío. El conflictu de la minería engafentáu y con mui difícil igua nestos momentos. L'atorollamientu esi del "yo soi español, español, español" pola mor del européu de fútbol de la selección española. Les nueves medíes con que nos van solmenar el llombu y la corexa les monxures polítiques de los embeligros de reinu y del principáu respectivamente... y tira que llibres.

Tornando al principiu, anduvi unos díes pela parte más occidental del país y sentí falar a dalgunes persones a la manera del llugar onde taba. Préstame sentir la fala vivo de la xente. Per ellí llámenlo coloquialmente precisamente asina, la fala. Dempués lleendo les asignatures qu'imparten nun centru escolar apaecía escrito como gallego-asturiano y tengo lleío tamién llamalo eonaviego y tamién asturiano occidental, magar esta última denominación úsase pa la variantes llingüístiques del Navia p'hacia l'oriente. Camiento que tenemos una especie d'enzancu que vien d'antiguo a la hora de poner denominaciones llingüístiques. De la qu'entamaba too esto de reivindicar un futuru meyor y dignu pal nuestru idioma llariegu usábase abondo'l términu bable. Tanto qu'hasta una de les organizaciones pioneres na estaya reivindicativa bautizábase con él.  Dempués hubo una reacción clara de refugu y desanicióse'l términu pa usar el d'asturianu que yera lo que la xente solía utilizar. Y d'una manera más cultista el de llingua asturiana, que nun yera tán popular, pero que reconozo que viste elegante y queda curiosu.

Pues ello ye que diendo camín del sableru d'una playa un día d'estos d'atrás quedé esteláu na escena d'unos abeyones qu'andaben zucando nun matu flores coles cestes de les pates traseres acarretando unes pelotes de polen mariello. Dicen que si les abeyes, abeyones y demás insectos polinizadores desapaecieren del planeta acabaríase l'agricultura y con ella tamién la nuestra presencia nel mesmu. De toles maneres, pol aquello de que la esperanza ye lo último que se pierde, supongo que siempre nos quedaría l'ocle pa mazcar y les serenes y l'home marín como referentes evolutivos pa los naturales d'estes riberes atlántiques. 

En fin, qu'otra vuelta de nuevo al llar, nun dexa de tener el so aquello comprobar que les rutines repítense como la morciella y que, anque les apariencies pudieren indicar lo contrario, la realidá amuesa que nun hai nada nuevo baxo'l sol nesta quintana alloquecida. Y pa siguir. Y qu'eso de deconectar dando una vuelta dayures ye una ilusión. Coses del branu namás.

lunes, 25 de junio de 2012

Emoh.

Riscaba l'alba cuando'l xamán Emoh espertó. Espurrióse y tizó la foguera echándo-y unos gárabos. Asomóse a la entrada de la cueva. El sol entamaba a rescamplar como un güeyu descomanáu de fueu mariellu. En silenciu miró a los demás que siguíen tarreciendo abandonar el suañu pola mor de la velea d'una nueche no fondero l'abellugu viendo aquelles imáxenes como garraben vida pente los xuegos de solombres de les llámpares de cañamina. Acuriosó'l ropiellu pelleyes que cubríen el so cuerpu. Apalpó'l collar de conches que colgaben del so pescuezu y garró l'azagaya. Dempués salió y entamó a caleyar enfotáu.

La ñeve retirárese bien lloñe aquella primavera  y la tierra dexárese ver afatada de verde. El sable de la playa asemeyaba cachos del arniu que'l gran güeyu mariellu esfaraguyare, arrogante, cabo la mar que ruxía pacetible y donda. De sutrucu, viéno-y daqué a l'alcordanza y echó la mano a la fardelina de pelleya de ciervu apalpando daqué. Sí, la figura de la fema siguía ellí.

Empobinó pa la viesca allugada allarribones, onde naide nun quería dir pola mor de la curuxía a les gafures espantibles que glayaben peles nueches faciendo respigase hasta a los que se teníen por más valerosos y de mayor cuayu. Sentía cómo'l mieu lu afalaba. Cualquier ruxerrux, cualquier tascar d'una rama, cualquier chíu inesperáu facía que'l so calter s'engurriare axorizáu. Yera un auténticu pasamentu pa él llegar hasta'l sitiu onde los antiguos encamentaren que s'afayaba l'ayalga del alitar del grupu. El llugar sagráu onde preñaba la natura.

Cuando'l sol cayía a plombu señalando la metá del día, Emoh llegó al sitiu máxicu tresmitíu de los tiempos polos xamanes del clan. Un nial de piedres formaba'l güeyu per onde esquitaba l'agua más claro y fresco que naide nunca viere desfaciéndose en pómpares y espluma al cutir en remexón contra una llábana enorme. Garró varies ambozaes d'aquel agua y entamó'l ritual  xaguando la cara, los brazos, el cuepu... Dempués, a la veriquina daquella gran diosa camudada en nial d'agua, escarbó na tierra una poza pequenina. Sacó de la fardela la figurina de muyer arrecachada teñida d'ocre y allugola nella. Zarró los güeyos como un faisán en celu y dexó que la madre tierra-y entrare per tolos poros del cuerpu hasta somorguiase dafechu nel vientre de la vida mientres gargoliaba vieyos esconxuros . Darréu, foi esconsonando adulces, retiró la figurina y tornó a guardala na fardela. Dempués echó mano al aquello xiringándolo hasta qu'un chirlotu blancu desamó al fondu la poza. Adulces cubrióla otra vuelta de tierra y alendó.

Cuando'l xamán Emoh aportó a la contorna de la cueva, el sol taba a piques d'amatagase allalantrón tres los cordales. Homes, muyeres y rapacinos salieron a recibilu a carrenderes dexando dibuxase nes sos cares l'aforfugu y espayando aquella entruga compartida a comuña. Emoh sonrió y xuxurió-yos lo que tanto naguaben por sentir. La tierra diba ser fértil. El grupu diba ser fértil. Y na viesca, el ríu y la mariña'l ciclu de la vida tornaría otra vuelta a guañar.



lunes, 18 de junio de 2012

De la minería y l'ermu llaboral asturianu.

Sigue la fuelga na minería'l carbón en tol estáu y concretamente n'Asturies. Tamién les acciones reivindicatives, los encierros y los enfrentamientos  dayures coles fuerces encargaes d'amatagar l'españíu reivindicativu qu'espolleta nestes feches na nuestra sociedá.

Y allá, nos madriles, un gobiernu que namás que val p'apretar les clavíes a los de siempre, pa siguir al rau de les órdenes alemanes y de los mercaos financieros, y pa incumplir too darréu promeses y alcuerdos de toa mena y condición, interpretando mui peculiarmente'l mandatu de les urnes como una carta blanca pa facer y desfacer a lo xole y al so antoxu.

El sector de la minería del carbón tenía firmáu un alcuerdu hasta esti añu antes de negociar el siguiente a partir del añu que vien, pero que l'actual gobiernu quier pasase pel aquello. Entamando una reducción qu'algama'l 63% de les ayudes y que pon a esta actividá camín del desaniciu final y a les poblaciones onde s'asitia nuna situación prácticamente terminal y desesperada.

Un  sector el mineru que, con tolo que menguó desque s'entamare'l procesu de desmantelamientu y zarru de pozos compensáu con prexubilaciones y fondos mineros (nesti últimu casu con una más que mui cuestionable xestión), hai que dicir al alto la lleva que sigue siendo anguaño una guaña económica importante  nunes comarques onde la emigración ye casi que la única alternativa actual p'abonda  xente ante l'esfarrapamientu económicu que les afuega.

Si tocamos el tema de les subvenciones hai que destacar que son abondos los sectores, actividaes y organizaciones subvencionaos nesti estáu ya'l de la minería ye sólo un casu de tantísimos, que talo paez, a veces, que se nos intenta vender como si fuere l'únicu y, poro, una prioridá "nacional española" cortá-y el grifu como seya. Ehí tenemos el tema rescamplante de la banca como botón de muestra. Tampoco nun convién escaecer los marafundios de dineru públicu esbardiao al traviés de los años nos milenta casos de corrupción, mangonéu y amagüestos varios con que tolos díes, ensin escepción, almorzamos dende cuantisimayá. D'otru llau, convien recordar que los fondos pa esti sector vienen vía europea.

Camiento que nes circunstancies actuales nun se pue renunciar de nenguna manera a siguir colo que nos queda de la minería n'Asturies porque, metanos la crisis onde tamos metíos, diba ser dar les boquiaes pa unos conceyos que vieron nel so día colar la siderurxa, cayer una tres d'otra una carrapotada d'empreses y actividaes económiques y que puen ver agora pesllar otru sofitu llaboral que foi -y aínda ye-  la minería del carbón. Tamién pienso qu'esti sector habría considerase estratéxicu y, en resultancia, garantizá-y una pervivencia futura afayadiza.

Otramiente, escurque'l  problema concretu de les nuestres esplotaciones mineres habría que lu enxertar notru más xeneral que ye, cenciellamente, el del esbarrumbe estrepitosu de la nuestra economía dende hai bien d'años y d'Asturies en xunto. Esbarrumbe agraváu pola actitú de sucesivos gobiernos autonómicos dedicaos preferentemente a xestionar la crisis dende la sumisión ya'l conformismu, a establecer redes clientelares y a mantener chiringos, rematada col actual encerrizamientu hostil d'un gobiernu central pal que que talo paez  que somos los asturianos una provincia norteña tarrecible que nada-y importa y de la que nada nun quier saber, ayudáu pola enésima falta de xixa y brenga reivindicatives pa defender lo propio del gobiernu autonómicu de turnu.

Y tamién, lo que tendríemos que nos meter na cabeza d'una vez por toes, ye que llevamos camín de convertinos nun ermu llaboral y que cualquier pérdida de puestos de trabayu, en cualquier sector, algama nestos momentos una gravedá y unes consecuencies bramente especiales y descomanaes, polo que facer piñu pa conservar lo poquísimo que yá nos va quedando ye toa una urxencia nacional asturiana, entrín y non, llegue'l día en que vaya escamplando un finxu'l cielu llaboral güei prácticamente invisible dafechu.Cualquier enfrentamientu, cualquier discursu basáu en facenos reproches (por mui xustos o cargaos de razón que nos paezan) unos a otros al empar que miramos pa otru llau mientres nun nos toque personalmente la gafura del paru, camiento que ye afondar nun cagüercu económicu colectivu.

Curiosamente, esti añu cúmplense cincuenta de la famosa fuelgona qu'esmoleciere bien nel so día al mesmu réximen franquista. Nestes dómines onde los drechos de los trabayadores y los recortes de les llibertaes ciudadanes alcancen proporciones escandaloses, auténticamente brutales, y onde too apunta qu'enagora van dir mui pa peor,  l'arrecha resistencia de los mineros pudiere ser un avisu de la que nos va cayer enriba per munchos años y hasta xeneraciones si nun reaccionamos yá de manera colectiva, firme y decidida.

jueves, 14 de junio de 2012

Andarines y raitanes.

Páxaros hai munchos na nuestra tierra. Pero si tuviere qu'escoyer dos que me caen epecialmente prestosos sedríen les andarines y los raitanes. Porque en dambos casos son páxaros casi domésticos, d'esos qu'anden per dellos sitios onde t'allugues, pero guardando les distancies y ensin dexase garrar nin afalagar.

Les andarines son los güéspedes qu'agospien dende la primavera hasta finales del branu nes nuestres cortes como si fueren pa elles unes cases posafuelles atopadices asitiando nelles los sos ñeros de barru y paya. Esnalen per elles, entren y salen... Poro, siempre ye conveniente dexa-yos la puerta entornada (si ye de cuarterón, la parte d'arriba pinta bien amañosa pa ello) o un ventanu abiertu pa que puedan salir y entrar al so gustu.

Lo de los raitanes ye bien prestoso. Póneste a facer cualquier xera na corrada o na llosa y ellí tán ellos, a unos metros de ti esnalando o blincando pel suelu y espicotiando. Pónense enriba un balagar, nel magu una traenta espetada en suelu... Siempre a unos metros prudenciales d'onde tas tu, pero tamién siempre cerca.

Recuerdo un casu que me pasó una vez con un raitán. Confióse tanto qu'entró dientro'l sótanu de la casa au yo taba. Nun lu vi y yá diba trancar la puerta cuando sentí como piar. Diome por mirar y ellí taba'l raitán, xubíu nun xarrón y ensin atopar la salida. Apartéme y desiguida foi pa alcontrar la puerta abierta y coló. Menos mal, si nun me llego a dar cuenta, piésllolu ellí y alón.

Hai compañíes d'animales que presten. Yo, pásolo bien cola cercanía d'andarines y raitanes. Respetámonos mutuamente. Guardamos les distancies y sabemos que caún ta a lo so y que nun tien por qué incordiar nin molestar al otru. Un bon exemplu de lo que ye una convivencia afayadiza.

jueves, 7 de junio de 2012

Patente de corsu.

Lloñe quedaron yá aquellos tiempos onde los corsarios presentábense como talos, yeren reconocíos y la xente preparábase pa recibilos acordies a la so condición.

Y ello ye que d'entós p'acá la piratería camudó de manera d'actuar. Amazcaróse, dexaron d'utilizase les vieyes armes y procedimientos y sustituyéronse por otros nuevos.

Tamién esa manera llegalizada p'actuar dayures, la patente de corsu del rei de turnu, cambió por otra patente: la de arramplar coles economíes de los ciudadanos con toles benciciones de los gobiernos y  poderes fácticos estatales.

Los nuevos bucaneros nun llancen andanaes, nin nos aborden glayando sable en mano. Anguaño fixéronse muncho más sutiles, más educaos, con munchu guante blancu tapando unes manes prietes como'l galipote.

Pero tán ehí agrandando los sos tesoros a base d'enfonilar pa sigo lo qu'a los demás nos cuesta munchu sudu consiguir. Enllenando les sos islles colos sos tesoros convertíos anguaño en cuentes descomanaes en paraísos fiscales.

Creyíamos que los corsarios yeren personaxes perdíos en vieyes histories d'un pasáu ocurríu hai sieglos...

¡Inocentes de nós!.


jueves, 31 de mayo de 2012

En Monte.


Allaribones en monte hai una vaguada percorrida por un reguerín que baxa dende una fonte con barcal amatagada pente'l morgazu y los felechos.

Nun requexu d'esta viesca hai un caboxu chamuscáu. Un tueru vieyu d'una castañal amburáu por mor d'un de los milenta incendios que cutieron a lo llargo'l tiempu esti llugar. Cada vegada que lu veo pienso cuánto podrá aguantar endagora ellí, enantes que se suma dafechu.

La soledá anegratada de so antóxaseme como un símbolu. Ta arrodiáu d'arboles, pero ellos tán vivos formando'l so grupu y él non. Neto a lo que nos pasa dacuando a nosotros. Tamos bien de veces arrodiaos de xente y, al empar, solos. Observamos trepe alredor nuestru, dacuando participamos d'él tamién, pero sentímonos bien de vegaes valeros y enfalmaraos per dientro.

Un grupu equí y otru acullá. Nun corriellu dayuri charrando. Nun conceyu acullá esparabaniando. Arboles d'una viesca humana que paecen vivos a los güeyos del solitariu que se siente escaecíu, chamuscáu, ellí nel so requexu, como'l vieyu caboxu.

domingo, 20 de mayo de 2012

Vida Xabaz.

A la so edá tenía yá los güeyos ya'l corazón mui cansos y abenayá qu'utilizaba lentes y traxinaba adulces.

Otra nueche más, sele y con aquel güeyón rescamplando allarribones, baxó la tabla del escañu y entamanó les coses pa escribir. El candelabru, el tinteru, la pluma, los papeles... Y la compañía sele de los gárabos restallando nel llar encesu qu'arumaba con fueyes de lloréu.

Empezó a escribir otra vuelta les sos alcordances y conocimientos de la vida que llevare dende bien mozu. L'arcón u guardaba los sos escritos taba bien apináu de testos onde esplicaba abondes coses de los árboles, de les plantes y los animales domésticos y xabaces... Podía afirmase que naquel arca vieya de castañal pesllábase la so vida esmigayada en milenta esperiencies arrecoyíes al traviés de los años.

La xera de xuncir, la maña de cabruñar, l'arte d'ensertar, de curiar pumaraes y castañeos, de semar y recoyer, d'iguar truébanos, de llendar y catar... Milenta llabores esmuciéndose pel papel y dexando testimoniu d'aquella manera estremada d'afechiscar la so vida naquel requexu apartáu del mundu correctu, vixiláu, fayadizu y candial.

Porque la so vida pertenecía a otru mundu que se sumiere cuantísimayá, a otres dómines que nin los más vieyos recordaben, a otru xacer, a otru vivir, allugase, entamar... Un resclavu vivu de tiempos esfaraguyaos nuna historia tresmanada allá perlloñe.

Pero aquella nueche nun diba escribir de los sos conocimientos en nengún llabor. Coles vidayes teñíes pol blancor de los años, paecía-y yá'l momentu de dir amosando les sos esperiencies murnies nos xuicios onde lu condergaren, nes cárceles onde lu trancaren, los insultos y palices que davezu recibiere a lo llargo de la so vida por ser un inadaptáu a la modernidá, al progresu y sobre manera... al control.

Y ye qu'enxamás nun-y perdonaren que viviere albentestate d'aquel gran güeyu protector que toles nueches achisbaba sollerte allá nel cielu. Que nun s'integrare nel engranaxe social, na sabencia programada, na tecnoloxía sagrada, nos principios incontestables. Enxamás,nenyuri, naide diba perdoná-y la so vida desapartada y xabaz, el so enfotu por nun ser una pieza más d'aquella maquinaria perfechamente vixilada onde la llibertá d'escoyeta y pensamientu pertenecíen al ferial del gran mundu de los suaños...

miércoles, 16 de mayo de 2012

La poltrona, los privilexos y les perres fáenlo too compatible.

Acabante facese públicu l'alcuerdu a tres bandes, PSOE, IU, UPyD pa da-yos a los primeros el gobiernu asturianu aprucen na prensa unes declaraciónes del Sr. Llamazares camentando que IU y UPyD puen tener los sos puntos compatibles.

Como bien dicía nun foru un ciudadanu, tán compatibles como, por exemplu, que los de Llamazares dicen tar pola oficialidá del asturiano y por más competencies estatutaries y los de Rosa Díez por torgar eso de los bables y por devolver competencies. Dos caxigalines ente tantes otres, polo que se ve.

La política siempre fixo compañeros de viaxe estraños, pero tamos llegando a unes llendes onde yá se pue acolumbrar el facismu en finxu'l cielu. Porque equí yá val too. Incluyendo caminar xuto al neofacismu instaláu de recién na Xunta Xeneral. Y cuando en política val too les estructures democrátiques acaben esbarrumbando ceo o sero y la mano terria del poder absolutu peñera sobre les cabeces de los ciudadanos.

Pasa dayures, pero concretamente n'Asturies que, por engolase nel poder y vivir tirando del tetu, yá sirve cualquier cosa y la ética na cosa pública ye una moñolada pa engrandar la pila cuchu, como tamos viendo tolos díes y a toles hores. Dende parcicipar con gayola nun réximen clientelar, a enxaretar unes componendes polítiques ente la izquierda y la derecha tipu Pactu del Duernu pa rucar entrambos a dos, hasta a dir de la mano con quien dalgún líder de la estrema derecha española consideraba apocayá lo más cercano al so ideariu..

Rescampla qu'Asturies agoniza estrapayada por una clase política ensin principiu nengún que nun seya otru que'l d'enfonilar prebendes, privilexos y perres. Pero nun nos engañemos. Cuenta pa ello cola ayuda clara y ensin reparu dalu d' una población qu'alcagüeta y consiente casos de corrupción qu'atufen y que nun tien problema nengún en da-yos el poder a delles fuerces polítiques entamadores de tou tipu d'amagüestos. Y yá ye hora de dexase de tanta comedia y de miranos al espeyu pa reconocer qu'eses corrupteles, que tan al alto la lleva denunciamos davezu per ende, tienen el so ñeru nesta mesma sociedá civil a la que toos pertenecemos.

Y esto cabero hai que lo dexar bien claro. La sociedá asturiana nun somos xente candial que tenemos la desgracia de tener enriba apusllándonos a unos políticos y unos partíos que fieden a podrén. Non. Somos nosotros, esa sociedá los qu'empicorotiamos y encontamos a tales organizaciones ya vividores de la cosa pública. Asina que, al final, esi cáncanu que nos ta destruyendo, tamos alimentándolu nós y de nun camudar dafechu les nuestres actitúes el futuru pal que vamos de cabeza tien un collor que, dicho cola contundencia del nuestru dichu popular, preséntase más prietu que los coyones d'un burru.


domingo, 13 de mayo de 2012

Asturianos: nin tamos nin se nos espera.


El ministru Montoro amenaza con intervenir la nuestra autonomía. Non por razones de déficit, qu'hai abondes más autonomíes enantes pa la intervención. Por razones polítiques. Busquen nel gobiernu central una cobaya pa ensayar mete-y mano al estáu autonómicu y consideren que los más boborolos y que-yos lo vamos poner a güevu somos los asturianos. Normal.

Normal porque ante un anunciu de claru agraviu hacia nós podría suponese que l'espollete de reacciones escontra d'él diba ser bultable. Pero nel momentu qu'escribo estes llinies tovía non y barrunto que nos prósimos díes nun va camudar muncho la cosa (oxalá m'equivoque). Nada d'eso. Unes declaraciones contundentes por parte'l conseyeru correspondiente del gobiernu en funciones. Declaraciónes de refugu del cabezaleru n'Asturies d'IX y alón. El silenciu. El vacíu. El desdexamientu. L'abulia. L'encoyimientu de costazos. 

Entrugábase'l Padre Galo nel poema "Rigu Esva" ú taben los sos asturianos y les sos Asturies. Nun sé ú taríen per aquelles dómines, pero sí sé ónde tán anguaño: nenyures. O, si se quier, a niales, n'ayén, fuera bolos escandalosamente. Realmente y, ensin pecar nel tramendismu, camiento que podemos plantegamos con tola seriedá si bramente queden asturianos, nel sen d'identidá consciente o política del términu, o si lo qu'hai anguaño nesta tierra son castellanos del norte o poco más. Porque talo lo paez.

Amenácennos con intervenir la nuestra autonomía dexándonos nel ridículu más espantosu (hasta la prensa acullá de les fronteres españoles se fai ecu del asuntu) y quedámonos papiadinos y amomiaos. Y cuando s'afreya la dignidá de toa una comunidá lo esperable ye una reacción darréu y contundente. Claro qu'eso val pa otros sitios porque n'Asturies yá se ve lo qu'hai.

Tocaos y fundíos. Eso ye lo que somos como pueblu. Un montón de chatarra ferruñoso baxo la mar. Un llugar onde'l más tontu faise ricu vendiendo gafes de madera y onde cualquier fuerza política pue esperimentar les sos lloriaes porque persabe que nun hai nel mundu una cobaya meyor.

Los asturianos nin tamos nin se nos espera a la hora de defender lo nuestro. Nun ye nada nuevo, pero cada vez qu'ocurren fechos como ésti de l'amenaza intervencionista, rescampla que renunciemos cuantayá a protagonizar la nuestra propia historia. Llamentable, pero ye lo qu'hai.