jueves, 25 de marzo de 2010

Asturies ye diferente.

A estes hores arruxida'l baturiciu que remanez del conocimientu de la sentencia acabante dictar y onde se torguen los drechos llingüísticos d'un ciudadanu asturianu. Anque yo nesti casu concretu albidro que dan en güesu. Xurde Blanco y Xuristes pol Asturianu saben el tarrén que tríen y son profesionales del drechu. Yá encamentaron alto y claro que van recurrir.

De toles maneres, dempués del autu apocayá amosáu pol Tribunal Constitucional, la gravedá de los fechos rescampla y cabruña nesa impresión que dellos ciudadanos tenemos de que, imitando aquella frase célebre d'otres dómines, Asturies "ye diferente". Y, mialma que lo ye, a la hora de neganos drechos, como los llingüísticos, qu'esfruten dayuri notros países d'esti mesmu Estáu.

D'otru llau, estes truñaes tamién nos puen apurrir una mueya que tenemos qu'aprovechar. Sedría fundamental que nos esguedeyásemos por da-y a sucesos como ésti la mayor sonadía, esbrexar porque arruxide y puxar pa que se sopelexe per tolos requexos d'Asturies. Que s'entere la mayor parte de la ciudadanía que seyamos a algamar. Porque esti tipu fechos son los que nos dan la razón alto y claro nes nuestres reivindicaciones y retruquen a los sos propios autores y coros d'aplaudidores.

Camiento tamién que toles fuerces polítiques asturianes arriendes d'otres organizaciones de diversa mena debieren manifestase con contundencia sobre'l tema y contribuyir a la difusión d'esti atropellu y del claru refugu que provoca nos sectores más concienciaos de la nuestra sociedá. Estes baces, nun primer momentu en manes de los contrarios, tenemos que les saber aprovechar nel nuestru interés.

Otramiente, güeyando tol casu en xunto, diznos perbién lo fundamental, básico y necesario que ye tener corriellos de resistencia ciudadana énte les milenta arbitrariedaes con que de cutio nos encenten a los que simplemente queremos utilizar con normalidá l'idioma asturianu. Unes arbitrariedaes que fomenta y favorez descaradamente una gandaya política ayena dafechu a los nuestros intereses hasta'l puntu de festexar como triunfos propios les nuestres frayadures llingüístiques. Encontar una rede irreductible de defensa de lo propio. Porque por enésima vegada, el que resiste, gana.

Y otra vuelta más, pa finar, insistir en que tenemos qu'enfotanos definitivamente en saber construyir. Trabayar a modo y con procuru por coordinar fuerces, collaborar, buscar puntos d'alcuentru. En toles estayes. En tolos ámbitos. Y nel políticu tamién. Calteniendo la tranquilidá y sabiendo tar nel nuestru sitiu. Ensin zarapicar nel esparabán ya'l llantu escosu. Desaniciando d'una vegada por toes el morgazu de los amigos de dixebrar, bilordiar y semar llevantos que a la postre nun faen otra cosa qu'engabitar lo establecío. Hai que saber aprender cómo avanzar, y fechos tán llamentables como'l que nos ocupa tamién nos aprenden el camín pel que tenemos qu'empobinar pa consiguilo.

lunes, 22 de marzo de 2010

Al son que nos toquen.


Préstanos pola vida aldericar y enguedeyanos en discusiones bizantines. Cada vegada que doi una revolada perende decátome y afítome nello. Ellí onde hai un tema polémicu entramos de trebolén. Si daquién quier capiar al personal que se ponga en plan picuscayu, que xorrasque onde duel y tendrá los resultaos esperaos.

Otra cosa ye averase ellí onde'l trabayu a modo y concienzudu asoma. Porque nestos casos les escases posibilidaes d'engarradiella desmotiven al personal. L'interés despíntase y la sensación de contemplar a dalguién dar voces en castañéu ye una evidencia.

Güeyo davezu alderiques memorables alrodiu de xigomencies más memorables inda. Incluso provocaos a costa fecha por aquellos que piensen que la so misión sagrada nesta tierra ye la de dir semando la griesca a cada pasu que dan. Otramiente, observo silencios qu'atorollen ante'l llabor abegosu, seriu y fechu dayuri con procuru que me faen entrugame si realmente nos motiva dalgo más que la discusión tabernaria.

Y mientres lo bien fecho nos pasa con abonda frecuencia ensin pena nin gloria per delantre les narices al tiempu que practicamos esi deporte favoritu ente nosotros de l'apurridiella, al final acabamos siempre baillando al son que nos toquen otros. Eso sí, quexándonos bien de veces porque nun lu queremos baillar.

sábado, 20 de marzo de 2010

Antisistema & nacionalismu.

Na sociedá na que vivimos encáxennos nuna serie de valores y modos de vida. Nun sistema determináu que nos estrema lo correcto de lo incorrecto. Edúquennos pa ello y empobínennos la vida nesi sen.

Dellos grupos sociales apliquen el pensamientu críticu al sistema impuestu. Y dientro del cuestionamientu acordies con esa aplicación surde'l de la propia nación y l'estáu al que-yos encamentaron que pertenecen. Busquen entós otra marcación nacional distinta. Un nuevu allugamientu nacional.

El nacionalismu parte del fechu diferencial. La toma de conciencia de pertenecer a una comunidá territorial, histórica, cultural y llingüistica peculiar. El so finxu últimu ta en consiguir conservar y tresmitir esa identidá diferenciada al traviés de les xeneraciones futures. En resultancia, el so allugamientu nacional pue ser distintu y opuestu al del estáu-nación ayenu, impuestu y tresmitíu dende la infancia.

Y nesi allugamientu nacional puen coincidir perfectamente'l militante antisistema ya'l nacionalista identitariu.

La cuestión entama a enrevesase dende'l momentu en qu'un nacionalista identitariu pue ser, al empar, un esbrexador antisistema, pero non necesariamente lo contrario.

Porque cuando dende'l puntu vista del antisistema llega al convencimientu de qu' una nación (la nueva nación) nun ye preséu que pueda agospiar y garantizar l'algame del restante badaxe reivindicativu, esa nación pue resúlta-y inservible y, polo tanto, irrelevante y refugable. En resultancia, la historia, cultura, llingua... la nación en sí mesma tórnase escosa ya inútil de defender.

Porque ser antisistema ye una cosa y ser nacionalista otra. Puen coincidir en determinaes circunstancies cásique al cien por cien. Pero tamién puen dixebrase notres circuntancies abondo.

Ya'l problema conceptual ta en que, en sestaferies como la nuestra, suel considerase dende cuantayá como ximielgo ser antisistema y ser nacionalista. Y eso ye un erru de planteamientu y d'analís.

martes, 16 de marzo de 2010

Otres maneres de xugar.

Esto de nun ser nunca'l mano del xuegu y tar siempre allugáu na posición del porra requier una pequeña reflexón polo menos.

El casu ye que les nuestres fiches van siempre fuera la mesa. Y nos meyores casos acaben colingando enriba una ponte o cerca'l molín. Pero a la rana nin la bicamos y yá ta la probe hasta ferruñando por falta d'usu.

Ante esta situación daquién pudiere pensar que too se debe a la nuestra malísisma puntería. Pa los peor pensaos, que vamos xugar pimplaos de culinos de sidra o cachos de vinu ya'l nuestru pulsu anda fechu una llaceria.

Pero nun hai nada d'eso. Lo que pasa en realidá ye que siempre hai daquién que glaya o esparabania cuando otru va llanzar fadiándo-y la concentración. Tamién hai casos en que dalgún se cruza per delantre'l llanzador faciendo que la ficha vuele ensin sen ayuri. Hai hasta atrevíos qu'emburrien ensin más al que trata d'afinar nel tiru. El casu ta en torgar que naide nun mueva ficha nel sen deseáu.

Y, claro, nestes condiciones a ver quién ye l'artista que consigue meter anque seya una namás. Asina que quiciabes seya la hora de dici-yos, con tanta educación como contundencia, a los que nun s'afayen notra xera namás que la d'apilancar y desfacer, que cuelen coles sos xigomencies pa otru llau. Porque los que queremos axuntanos pa xugar con dalguna posibilidá de puntuar tamos nel nuestru derechu de que nos dexen llanzar en paz.

Pues lo cierto ye que, pese a lo que pudiere paecer contemplando'l nuestru pasáu, hai otres maneres de xugar.

viernes, 5 de marzo de 2010

Agua pasao...

Siempre me prestó'l refraneru. Porque bien de vegaes nél piésllense grandes verdaes, magar aneciemos d'avezu n'escaeceles. Una d'elles ye la que nos diz que l'agua pasao nun mueve'l molín.

El nuestru pasáu ta enllenu d'erros y aciertos, d'eso hai poca dulda. Y tanto de los unos como de los otros podemos siempre adeprender. Lo que nun lleva nenyuri ye aprovechar los erros de los demás p'arreflundí-yoslos como un carrobexu qu'oculte los nuestros porque esto supón avanzar pacia nenyures. Muncho meyor ye que caún abogademos la nuestra propia ropa puerco de la puerta p'adientro de casa envede asoleyar lo del vecín.

Toos conocemos perbién les frayadures de toa mena que cuten al nuestru país y la situación tremendamente delicada na que nos alcontramos güei. Y ye bastante xeneralizáu'l xacer de que si nun amestamos fuerces vamos siguir cuesta abaxo y ensin posibilidaes d'apurrir igua nenguna a los milenta problemes que tenemos.

Asina que meyor entainamos a dexar vieyes zunes trancaes nel sobráu de lo inservible pa llantar un nuevu finxu, que nos sirva a toos de referencia, y dende'l qu'empobinar hacia'l futuru aperiando una andecha arrogante na que coyamos y nos afayemos una gran mayoría social d'esta tierra de nuestro.

Claro que dicir coses como estes ye mui fácil y llevales a cabu abondo difícil. Convién dexalo claro pa nun pecar ún de ser un simplayu, enchipáu, y pinín. Asina que los que tienen les erbíes y la posibilidá política de llevalo alantre tienen que contar cola comprensión, paciencia, y ayuda de los demás.

Pero ye mester que tengamos bien afitao na mente que ye pernecesario recorrer esi camín hacia l'alcuerdu y la xuntanza. Enfotanos en construir. Encerriscanos en llevantar y non el valtar. Y mirar, d'una vegada por toes, p'alantre dexando los erros del pasáu apodreciendo. A ver si somos quien a tar a l'altor que les circunstancies históriques d'anguaño nos demanden.