Dacuando pienso qu'al entamar l'actual procesu de reivindicación de la llingua asturiana ya'l gallego-asturiano quedaron apostalgaes otres cuestiones que fueron cubriéndose col mofu del olvidu col trescurrir de los años y cuando queremos encetales talo paez que surden rocees per dayures y alderiques bizantinos como cuentu risa.
La cuestión territorial nun ye una menugancia, pero sí una lluriga p'apurrise carrobexazos a la mínima ocasión. El mapa territorial asturianu foi durante abondos sieglos estremáu al que conocemos güei. Y ello ye que, de magar la división provincial de 1.835 fecha por Julián de Burgos, Asturies foi viendo amenorgada la so territorialidá d'una manera bultable. Pero'l simple fechu de plantegar esta cuestión llevanta angüeñes bien gordes en tola contorna y l'engrifamientu gafu salta a la menor ocasión.
La historia asturiana ye una de les asignatures pendientes cola qu'arrecostinamos acuantayá. Y una asignatura qu'asemeya empozase nel suspensu eternu pol tarrecimientu d'entrar d'una vegada por toes na so reivindicación ensin complexos. Ye perconocida la perceguera que tien dalguna xente a percorrer el nuestru medievu por exemplu. Sacamtes la Revolución d'Ochobre del 34 y quiciabes en menor midida'l 25 de Mayu de 1.808 amosámonos poco dispuestos a pescudar nel nuestru pasáu colectivu. Y esi escurrir el bultu namás que val pa qu'otros usen la nuestra propia historia nacional como xugu pa xuncinos a interpretaciones ayenes y llastimoses pa nós mesmos. Pero aneciar, aneciamos en poner torgues a lo que tendría que ser más qu'evidente a estes altures.
La cultura asturiana tien tratamientos dixebraos. Dalgunos elementos d'ella algamaron reconocimientu más o menos xeneralizáu de la so importancia, pero otros siguen zampaos na pila cuchu de lo poco valoratible. Hai ocasiones en que talo paez qu'asumimos el discursu despreciatible hacia lo autóctono qu'esquita de fontes del cosmopaletismu profundu. Siguimos bien de veces confundiendo lo popular colo parrulo, lo paxarero y les pascaxaes caleyeres. Más qu'analizar a modo guiámonos emburriaos por clixés preestablecíos de despreciu a lo llariego.
Y pa rematala ye que la propia xera llingüística paez empecipiar a presentar regalladures. Porque siéntese sonar cada vegada con más fuerza un discursu que trata d'amenorgar la so importancia, que considera que se-y ta dando al tema de la llingua escesiva reblanea cuando lo realmente prioritario son otres cuestiones, zarapicando asina nuna espirica interesosa aventada sobre nós dende los sectores más reaccionarios y antiasturianos que s'alluguen nel nuestru país. En disyuntives falses, auténtiques xigomencies pa incautos.
Asina qu'ello ye que bramente anguaño nun tengo claro si avanzamos o si reculamos. Porque siguimos teniendo unes boleres pergrandes nel nuestru conocimientu territorial, históricu y cultural. Siguimos refugando bien de veces lo ferial d'estos temes. Y pa detrás lo qu'hasta güei paecía nun tener resquiebres como yera la reivindicación llingüística asemeya que sí les tien.
Toles facetes de la nuestra especificidá asturiana figúrenseme como una casona que cada día resulta menos afayadiza pa vivir. Crecen les goteres, argayen les paredes, esgónciense les puertes y los vieyos blasones de piedra malpenes son a estremase. Esbarrumba pasu ente pasu ensin que seyamos quien a ponenos d'alcuerdu en cuestiones que debieren ser básiques ensin apautanos pa faceles rellumar con fuerza nos nuestros discursos y actitúes.
Ye mui discutible que realmente y a estes altures de la historia recién tengamos unos finxos mínimos que nos sirvan de referencia pa guianos y averar postures comunes que nos sirvan pa puxar nuna dirección na que teamos acordies. Mui cuestionable, miániques que sí. Y ello esplica en bona midida'l por qué de la situación llaceriosa u nos atopamos. Nun ye sólo qu'ehí fuera haya un enemigu descomanáu pa valtar. Ye que dientro andamos a la tema ensin tener les coses medianamente clares en bien d'asuntos y nun hai manera d'amechar pa reconocenos nin ente nosotros mesmos.
