Metiéronmos nun fuexu, nuna fondigonada, nuna olla de mui difícil salida. Con unes paredes nidies que faen casi imposible esguilar pa salir y ver la lluz. Quiciabes fuere más correuto dicir que mos emburriaron per un sotambiu au vamos a escentellamos con toa seguridá a la vuelta d'unos años.
Una tropiella de políticos, empresarios y sindicalistes que comparten l'oxetivu común de vivir tirando del tetu d'un Estáu que caltenemos colos nuestros impuestos, tán a piques de roblar unos alcuerdos que van dexar les posibilidaes de miles de ciudadanos de xubilase decentemente na llende de la utopía. Y ello acompañao col aguilandu del retrasu en dos años de l'actual edá de xubilación.
Dicir que tamos en crisis pa sofitar ciertes midíes impresentables ye esponer una media verdá qu'amazcara una gran mentira. Porque persabemos que n'époques de crisis ye cuando unes minoríes yá asitiaes nel refalfiu económicu aprovechen pa ver cómo-yos xorrecen los ingresos y la bayura. Del otru llau sí qu'hai crisis, pero pa los de siempre qu'otra vuelta más tenemos qu'arrecostinar col pesu de sacar alantre una situación a la que lleguemos per un camín que sestaferiaron otros.
Lo llamentable y estrompético ye que son eses élites que remanen el poder y los recursos, acompañaes pola so corte de monxinos vividores los que van iguar les midíes pa salir d'una situación que -amenacen ellos- nun se pue caltener y de nun-yos facer casu'l sistema futuru de pensiones va argayar y fundise dafechu. Pero güeyu al cartafueyu: el futuru de pensiones nuestru, non el d'ellos que lu tienen blindáu de por vida.
Mentanto un día sí y otru tamién vemos xorrecer corrupteles como cogordes na seronda, quedamos arremellaos ante marafundios de recursos, contemplamos plasmaos cómo se multipliquen prebendes, chiringos, sueldos descomanaos d'amiguetes puestos a deu, viaxes de placer amatagaos de grandes esfuerzos por abrir mercaos. Adicamos tamién cómo medren les fortunes de grupos empicorotiaos nuna riqueza porcaz, indecente y atropada a costa d'esturniar milenta economíes modestes... Pero ehí nun se toca un res. Porque, a lo que se ve, la crisis nun cinca nesos llugares sagraos de bixorda y despilfarru. La crisis ye la nuestra gran propiedá privada que tenemos que curiar la lexón de currantes y paraos.
Asina que la cosa ta cantada. Cuando s'axunten alrodiu la duerna los matachinos afilando los corones yá sabemos el futuru que-yos espera a los gochinos de la corripa. Ya'l nuestru ta a piques de quedar robláu y rescamplando: si llogramos aportar a ser vieyos tamién vamos llegar a ser probes al empar. Menudu finxu'l cielu que s'acolumbra na llexura. Pa ponese a tremar.
