La gallina, la tolena, el burru y les poces

Mio bisagüela materna tenía una hermana. Dambes tuvieron una fía con pocos díes de diferencia (una d'elles tía de mio ma, evidentemente).

El casu ye que la hermana de mio bisagüela llevaba la neña de so como si fuera un bixu. Percuriosa y con munchu miramientu y rebilicoque.

Ello nun-y cayía en baxo a mio bisagüela, que-y paecía escesivu'l procuru que la so hermana ponía nel so retueyu.

Asina qu'un día que se cruzaron va mio bisagüela y fíxo-y a la hermana una observación sobre aquello que consideraba demasiáu cuentu en curiar a la so guah.a soltándo-y la siguiente fras: "nunca gallina tal güevu punxo".

Yeren otros tiempos y otra manera de dicir les coses...

                                                                 ******

Allá na posguerra había un paisanu un poco grilláu. Andaba de cacíu revueltu per ende repitiendo esta fras: "yo nun h.ui, a min obligáronme".

Y pintó que la guardia civil escuchó un día aquel riquirraque del probetón alloriáu. Detuviéronlu y lleváronlu pal cuartón pa interrogalu.

Pero por más que-y entrugaben que qué fuera lo que fixere y a qué lu obligaren a facer, el paisanu namás que yera a contestar col aquello de siempre: "yo nun h.ui a min obligáronme".

Y too acabó metiéndo-y una tolena al probetón grilláu que nun pudo informalos de nada, porque de nada se trataba, arriendes de la so chifladura.

                                                                    ******

Diba yo de rapacín caminando con mio güela. Y pintó que venía pela carretera un paisanu con un burru.

Fixéme yo nel animal que venía con tolos sos correaxes puestos. Y agüeyé en concreto pa ún que-y pasaba per detrás, debaxo del rau.

Chocóme tanto aquello qu'empecipié a rabilar cómo se les arreglaría'l burru si-y entraben ganes d'echar unos cagallones, pues abultábame que'l correax podía tapa-y el furacu d'atrás.

Asina que señalando pal animal y en voz bien alta entrugué-y a mio güela: "A, güelita, pero esi burru ¿per ónde caga?".

L'escachondéu foi de tal grandor, que tola vida me recordaron el sucesu como la mio particular aportación al mundu de la bioloxía y la filosofía.

                                                                     ******

Los montes qu'arrodien el valle de Llangréu tán formaos de carbón. Hai zones onde namás que quites el mantu vexetal yá atopes esti mineral.

Nun ye nada raro entós que si daquién se pon a cimentar pa llevantar una casa acabe por sacar carraos d'esti combustible fósil. O si abre un camín. O hasta si pasa l'aráu. Cuando l'airón valta una castañal resulta fácil de ver ente los raigaños carbón mecío con tierra o magre.

Asina qu'hubo tiempos onde la xente diba pal monte cola fesoria o el picu al costazu y poníase a escarabicar pa enllenar unos paxos de mineral. Nos tiempos de les cocines de carbón y les economíes familiares esglamiaes venía aquello estupendamente pa tizar, escalecer y cocinar. En dalgunos casos facíen tamién chamizos ilegales.

Ello llevó a qu'hoi cuando vas a caleyar pel monte, simplemente pa espansionar, o mesmamente p'andar a la gueta pela seronda, pues atopar estes poces que la xente fixera antaño tapaes pol felechu. Tamién pues alcontrar chimenees de les mines, nesti casu más peligroses si zapiques y te zampes nuna delles. Sentí yo comentar que dalguna d'elles tragare dalgún animal.

Actualmente nes dómines de les cocines alimentaes por gas, o de les vitrocerámiques eléctriques, lo anterior pue paecenos de tiempos remotos. Pero ye una engatada. Nun hai que recular tanto. Son d'ayeri mesmo, como si dixéremos.

                                                                             

                                                                             

"Compañeru, dame tira"

La esplotación del carbón n'Asturies vien d'antiguo. Yá nel sieglu XVIII, nes dómines de Xovellanos, dase anuncia d'ello, magar el desendolcu a modo d'esta actividá venga a dase a mediaos del sieglu XIX.

Ello ye qu'estos díes lo que n'Asturies vien a ser la vida cotidiana d'una parte anguaño pequeña de la nuestra actividá productiva rescampló nel restu del Estáu.

Ello debióse al rescate d'un rapacín que cayó a un pozu bien allá de nós, nun pueblu de Málaga.

Ente los efectivos movilizaos pal rescate acudieron miembros de la brigada de salvamentu minera asturiana. Tien a recostines más d'un sieglu sacando xente atrapao nes mines. Pero tamién tien fechu llabor fuera d'asti ámbitu dayures.

El despliegue mediáticu estatal y foriatu foi considerable. Al final, la brigada asturiana, encargada del tramu final del rescate, consiguió llegar hasta'l guahe, que llamentablemente ya fallecliere.

Arriendes de lo relativo al rescate en sigo mesmu, llamóme l'atención un fechu. Y ye que tuvieron apartaos de cualquier apaición mediática, fuxendo de cualquier tipu de protagonismu, magar ocuparon una parte básica y central nos trabayos pa rescatar al neñu.

Como los brigadistes nun gorgutiaron mientres realizaben la so xera, centrándose dafechu nella, les noticies sobre esti grupu llegáronme al traviés de tres ex-xefes de la brigada. Y nos tres casos coincidieron nun argumentu común. Trátase de que, si les últimes esplotaciones mineres acaben por zarrales, sedría perimportante que la brigada de salvamentu, que cuenta a recostines con más d'un sieglu d'historia y esperiencia, siguiere n'activo pa poder intervenir en casos como'l del rapacín malagueñu, por exemplu.

Pues paezme una propuesta perinteresante y amañosa pa collaboran nel futuru en llabores de rescate pa les que, amás de les estrictamente mineres, pudieren  necesitar de l'amplia esperiencia de los rescatistes asturianos.

"Compañeru, dame tira". Pues sí. Ye mui importante dar tira a esta xente p'ayudar nel rescate a quien lo necesite. Con mines o, si desgraciademente aportare'l casu, ensin elles. Pero a dar tira, compañeru.

                                                                                  

D'horros, frixuelos, asturianu y babayaes.

Hai poques figures tan representatives de la cultura material asturiana como horros y paneres. Asitiaos ente nós dende hai sieglos, estos graneros valieron pa guardar la collecha y p'abellugar a les persones.

La gastronomía asturiana tien bayura de platos. Y dientro del apartáu de la repostería, hai llambiotaes a magüeyu: borrachinos, picatostes, arroz con lleche, casadielles...Y frixuelos. Comer un frixuelu tien la so parte de ritual. Cuanto más finu se faiga, meyor. Dempués espolvorialu con zucre, endolcalu curiosín y a la boca a saborgalu.

El perconocíu polígrafu xixonés Xovellanos sabía falar n'asturianu. Apreciaba l'idioma propiu de la so tierra y foi partidariu d'usalu, estudialu y da-y viabilidá de futuru. Recibió cartes nesta llingua por parte d'amigos suyos y él mesmu escribióles tamién.

La babayada ye una de les espresiones más conocíes n'asturianu. Y otres vinculaes a ella, como esbabayar y babayu. Nun ye fácil traducila con esactitú al castellanu. Vien a ser una mezclienda de tontería, estupidez, inorancia, falar fuera de sitiu, pontificar a lo tontorolo...

Desgraciadamente, política ya inoracia xuncen bien abondes vegaes. El despreciu que dende ciertos aruelos políticos se tien pa cola cultura pue observase guapamente dayures. Tamién el pulsu ente la concepción centraliega y uniformista  del Estáu Español y la descentralizada y plural ye vieyu. Y foi ún de los encontos llamentables de guerres y derramamientos de sangre. Cola actual Constitución trató d'iguase l'enguedeyu apostando por un Estáu descentralizáu y autonómicu qu'acoyía'l reconocimientu históricu, llingüísticu y cultural esistende dientro del mesmu.

Asina trescurrieron unes décades...hasta hoi. Porque dende hai unos años p'acá hai una clarísima apuesta en dellos sectores políticos por valtar esi Estáu autonómicu. Por desaniciar los idiomes propios de dalgunes comunidaes y por apostar por un uniformismu a bas de la utilización malintencionada de ciertos rasgos folkóricos, relixosos o culturales (incluyendo espectáculos de simple y llanu maltratu animal) que se quieren xeneralizar como finxos cimeros d'una supuesta cultura española común. Dicho resumidamente, volver a la concepción d'una España preconstitucional.

Ello ye qu'hai un líder políticu de la drecha española que cada vez qu'abre la boca echa la llingua a pacer. Pese a nun ser asturianu, domina con gran arte y maña la babayada. Suéltales a monteraes. Impresiona la capacidá que tien pa molestar y crear conflictos ellí onde naide lu llama.

Estos díes anduvo de visita pela nuestra tierra. La sida yera la de presentar  les candidatures autonómiques de la so formación pa les elecciones a celebrar allá pela primavera. Pero'l casu ye que, a la hora la verdá,  apoderáronlu les zunes y armóla  otra vuelta. Total, qu'al final la so visita rescampló nos medios de comunicación por dos fechos ayenos a lo que se supón que venía a facer y que nun se sabe bien pa qué sirven, qué utilidá tienen y qué xuntanza col progresu de la ciudadanía y la sociedá democrátiques asturianes puedan tener.

D'un llau, metióse colos horros y los frixuelos porque, desconociendo dafechu y clamorosamente la realidá escolar asturiana, deduxo que ye lo que estudien los escolinos nos centros educativos asturianos. D'otru llau, truñó contra la llingua asturiana, ñegándo-y el pan y la sal, y pasándose pel arcu del triunfu lo qu'afita la Constitución sobre la oficialidá de los idiomes peninsulares distintos del castellanu. Y, pa rematala, mencionó a Xovellanos, inorando que'l xixonés yera amante y estudiosu d'esa cultura asturiana y d'esi idioma del país au ñaciera, qu'emplegaba con toa normalidá oralmente y que tamién escribía.

Les reacciones a les babayaes del cabezaleru políticu nun se fixeron esperar. Hubo xente qu'engurrió'l ceyu y retrucó contundentemente y hubo otro que tiró pel camín de moflase de les ocurrencies del políticu en cuestión. En dambos casos, tratóse de la reacción esperable que pue tener cualquier persona con un rispiu de dignidá cuando falten al respetu y gratuitamente a la so cultura ya idioma.

Dicía enantes qu'inorancia y política xuncen bien. Non como un comportamientu xeneral, pero sí demasiao frecuente, polo menos en ciertos ámbitos ideolóxicos. Y toi convencíu dafechu que cualquier sociedá dirixida por políticos inorantes nun tien futuru nengún. Pero, desgraciadamente, son lexón los ciudadanos que, a la hora de posar el votu nes urnes, escueyen a esti tipu de políticos. Exemplos hailos a esgaya pa cualquier sitiu que miremos.

Y voi poner yá'l ramu a esta entrada. La sociedá asturiana tien drechu a que se respete la so cultura. Tien drechu a que se respete'l so idioma. Tien drechu a que se respeten los sos drechos democráticos como a cualquier otra sociedá. Y tien drechu a poder buscar el so futuru, dende'l fonderu respetu a toles demás sociedaes, pero ensin renunciar a ser ella mesma.

Porque la realidá demuéstranos claramente qu'esti mundu ta formáu por un mosaicu enorme de pueblos coles sos cultures ya idiomes. Y el camín pa un mundu meyor sólo se pue percorrer dende la colaboración y el repetu ente pueblos. Pero pa qu'ello seya posible, resulta imprescindible contar con políticos cultos, non con chancletos inorantes amantes de los uniformismos y de la imposición imperial d'unes cultures y unes llingües sobre otres. Y equí sí que tenemos un gravísimu problema. Y, más concretamente, nel Estáu Español y n'Asturies.

                                                                                 

Xelada

Xineru. Añu nuevu. Patochaes vieyes. Políticos parlando y con nuevos impuestos dando. Xuba de les factures. Nada nuevo baxo'l sol.

Dende hai varios díes xela. Les temperatures pónense baxo cero. Coméntalo la xente. Andamos yá refalfiando de cambiu climáticu y, cuando vien un tiempu como antes, gárranos arremellaos y como fuera bolos.

Viénenme a l'alcordanza los tiempos de cuando guah.es. La cocina de carbón como única fonte de calor de la casa. La bolsa d'agua caliente o'l lladriyu arroxáu pa calentar los pies na cama. Los chanclos o les madreñes pa cruzar per caminos y caleyes con fontanes y barru. Xelaba. Ñevaba. Los carámpanos pingaben de los sotechos como cuchiellos de xelu. Los charcos xelaos restallaben al trialos. Y los rapacinos andábamos con pantalones curtios, porque daquella los llargos yeren pa los más mayores.

La viesca ta en reposu. Les castañaleles y los carbayos del monte desvistiéronse de la fueya. Hai castañales vieyes que tienen brotando del tueru guíes nueves. Col tiempu camudarán n'árboles arrechos. Nesto d'echar brotos dende la bas recuérdame lo que tamién faen los ablanos, magar se trate d'árboles diferentes. Que l'iviernu venga de verdá ye bono pa los árboles. Como que tamién vengan de verdá la primavera, el branu y la seronda. Pero yá sabemos que dende cuantayá les estaciones lléguennos entemecíes y eso engaña a tol mundu. A los árboles, a los páxaros...

Tornado al títulu d'esti post, anguaño cada vez que l'iviernu mete una truñonada, bien de xente quéxase y gláyalo bien. Los medios de comunicación asítiense nel tremendismu. Dalguna xente reburdia porque-yos prestaría poder andar en mangues de camisa en plenu Xineru. Y, dacuando, acabante escuchar dalgún d'estos discursos apocalípticos sobre lo que siempre foi l'iviernu,  pienso que si tuviéremos que volver a  aquellos tiempos de la cocina carbón y la bolsa d'agua a los pies podríamos estinguinos como especie...