sábado, 29 de marzo de 2014

El Xixón pixuetu y el "Retablo del Mar"

El recuerdu que tengo más afitáu nel maxín de cuando, yá dende neñu, diba a Xixón ye'l del vieyu puertu pesqueru de Cimavilla. Los barcos y les llanches de los pescadores. L'arrecender a salmoria. La rula col so traxín. Y les sardineres asitiaes cabo d'ella vendiendo'l pescáu recién rulao.

Pero los tiempos cambien y eso que llamen la modernidá fixo que nun primer momentu prohibieren la venta ambulante de pescáu desaniciando'l vieyu oficiu de les sardineres. Dempués treslladaron la rula pal puertu d'El Musel. Y dende entós dalgo fondo cambió na mio manera de ver el barriu pixuetu xixonés. Hasta tal puntu que, magar el tiempu trescurríu, entá nun soi afayame del too cuando caleyo pel actual puertu deportivu. Fáltame daqué.
 
Por fortuna, una parte d'esi daqué atopélu hai bien d'años cuando visitaba'l muséu allugáu na Ca Xovellanos. Nel so sobráu pudi ver la obra escultórica del "Retablo del Mar" de Sebastián Miranda. Delantre los mios güeyos espolletaron rescamplando les imáxenes d'antaño. Ellí taben de nuevo la rula, los pexes, les sardineres, la xente... dicen que los propios vecinos del barriu d'aquel entós tán retrataos pol  autor. Sí, delantre mio tenía l'alcordanza más playa pesllada naquel cuartu d'esposiciones.

Asina que cuando dalgún foriatu m'entruga ú pue ver dalgo típico de Xixón siempre-y contesto:

-Pue dir a dar una vuelta per Cimavilla pa ver los oríxenes de la ciudá. Y dempués pue visitar na Ca Xovellanos el "Retablo del Mar" pa entender la so esencia, el so corazón y la so alma-.

jueves, 20 de marzo de 2014

Sicópates, sociópates, y poder

Sólo dende comportamientos sicópates y/o sociópates soi a entender les decisiones polítiques que se tomen dende instituciones y que namás que sirven pa fraya-yos les vides y arruina-yos el futuru a miles de persones diariamente. Ye esti un pensamientu que me  rula pela cabeza va tiempu y qu'espreso completamente en serio. Nin ye una graciosaa, nin vo de tremendista. Non.

Porque esa rellación ente personaxes con tendencies a la sicopatía y l'enfotu por esguilar peles estructures del poder, del tipu que seya, ye un pensamientu con raíces perdayures y que yá sentí dicir y lleí tamién en xente abondo más preparao que yo nestos temes.

Que podamos -yo toi convencíu dafechu de que lo tamos- tar representando'l papel de cobayes humanes pa esta triba d'alloriaos algama unes proporciones pergraves y pon picabaxo munchos de los nuestros plantegamientos con respeutu al poder y, más en concreto, al poder políticu.

Centrándonos concretamente na estaya política ehí tenemos eses decisiones tomaes dende tou tipu d'instancies y instituciones qu'esbarrumben a diario les vides y proyeutos de miles de persones. Unes decisiones que naide ye quien a entender, que son prescindibles, y que de nun se tomar, evitaríase proporcionar un dañu descomanáu y brutal. Pero tómense contra vientu y marea, execútense, y esparden la llaceria per tolos requexos.

Conocemos perbién el dibuxu del sicópata o sociópata que fai dañu permediando la sangre y l'asesinatu. Ye'l tipu de xente qu'identificamos como talos. Pero quédanos oculta esa otra parte formada polos sicópates de paxellu y corbata, que s'asitien na estructura del poder, que controlen unos recursos enormes, y que mueven los filos de grandes mases de ciudadanos que los envidien, aplauden y idolatren, al mesmu tiempu que los sos idolatraos estrocen les vides d'una cantidá tán grande de persones que fai amoriar.

Dende esi poder, dende eses estructures polítiques y económiques, estos sicópates dexen a la xente albintestate, ensin recursos económicos, estrúyen-yos hasta escosa-yos los medios de vida, llévenlos a la ruina económica, pero tamién moral y síquica camudándolos y convenciéndolos de que son un felpeyu inservible na sociedá. La enfermedá mental, la malura física, l'aforfugu insoportable de nun atopar salida... y el suicidiu, la droga llegal o illegal, la tresformación de ser persona a ser refugayu. Y ye ehí, onde'l sicópata del poder algama l'éstasis, el gozu cimeru, l'oxetivu consiguíu de depredador.

Y, evidentemente, bregar con esa xente ye casi una utopía. Porque nin sienten nin padecen. Nun tienen un llugar na so personalidá p'abellugar sentimientos y, en consecuencia, apelar a esos sentimientos, a la caridá, a la humanidá p'ablanda-yos el corazón ye una xera que acaba ente dolco y la media manga. Namás que valtándolos d'esos puestos de poder puen llegar l'aliviu y la solución. Si nun ven perclaro que puen quedar ensin el so gurugú dende u esñicen a les vícimes, y qu'entós l'asuntu yá entama a pinta-yos mal. Entós puen ceder na so cacería, pero... col tiempu y a la postre, van tornar al so llabor depredatoriu. Llograríamos entós un sitiu pa alendar, pero una solución namás que temporal.

Tamos anguaño somorguiaos nuna situación bautizada como crisis, considerada por bien de xente como estafa y que, ente otres munches visiones más del enguedeyu, pudiere sirvinos, guapamente, pa reflexonar sobre lo anterior. Porque sobre esta situación que tamos padeciendo actualmente, onde se da una xuntanza ente'l poder políticu y el financieru, podemos facenos delles entrugues. Y una d'elles, que se m'antoxa perimportante, ye'l pesu que ta teniendo nes decisiones que nos mancornien la presencia tanto n'ámbitos políticos como económicos d'auténticos sicópates y sociópates de manual. Porque tolos díes ños enfrentamos a decisiones qu'esfarrapen la vida de miles y miles de persones. Decisiones totalmente prescindibles. Pero, tomaes con auténtica frialdá, premeditación, alevosía y ensañamientu. Carauterístiques toes elles de xentaca amalecío mentalmente, dañible y lletal. Qu'esfruta esguilando pela estructura del poder al empar qu'estrapallando a too lo que l'arrodia. 

Asina que, señores, güeyu al cartafueyu. El sicópata del poder (políticu y financieru) achisba. Piensa. Planifica. Quiciabes mañana, vustedes seyan el so prósimu oxetivu.

sábado, 8 de marzo de 2014

Privilexos y secesionismos na Asturies del sieglu XII

Si echamos una güeyada en xunto a la historia asturiana, el sieglu XII ye ún de los que más rescampla por aciu de tres personaxes y los fechos que protagonizaron a lo llargo les sos vides relacionaos col nuestru país.

L'obispu Pelayo guió los destinos de la diócesis ente los años 1.101 y 1.130. Cola pérdida del poder políticu, Asturies diba quedando apostalgada. Pelayo potenció la so diócesis tratando de dar el mayor rellumu a Uviéu y a Asturies. Mandó iguar el "Liber Testamentorum" onde atropaba documentos (camiéntase que dellos inventaos) qu'afitaben les posesiones y privilexos de la diócesis uvieína, sobre too, de magar entró en competencia cola Toledana. Les miñatures d'esti llibru considérense de lo meyor del románicu del so tiempu. Les llendes de la diócesis caltuviéronse hasta l'añu 1.954. Morrió demientres un viaxe a Santillana del Mar onde lu enterraron, anque atrocare en vida un sitiu na Catedral d'Uviéu pa recibir sepultura.

El conde Gonzalo Peláez controlaba una bona parte del territoriu asturianu. Protagonizó cuatro intentos de secesión nos años 1.132, 1.133, 1.135 y 1.137. Na sublevación de 1.133 tuvo a piques de morrer el propiu rei Alfonso VII que vieno a cercalu a Proaza y onde llegaron a mata-y el caballu que montaba. Dalgunos de los castiellos que tenía baxo'l so dominiu yeren los de Tudela, Gauzón, Proaza, Buanga y Alba de Quirós. Dempués de la derrota de 1.137 desterráronlu a Portugal onde morrió na primavera de 1.138 cuando contaba tornar a Asturies pa entamar un nuevu llevantamientu. Los sos siguidores treslladaron los restos del conde pa da-y sepultura n'Uviéu.

Acabo cola referencia a Urraca l'Asturiana, fía bastarda d'Alfonso VII y Gontrodo Petri, nacida hacia 1.133. Vilba del so primer matrimoniu, asitióse n'Asturies au gobernó a títulu de reina, pero siendo fiel a so padre, primero, y al so hermanu Fernando II dempués. Casada per segunda vegada con Alvaro Roderici, protagonizaron un intentu de secesión nel añu 1.163. De magar el fracasu del mesmu foi vivir a Palencia onde morrió hacia l'añu 1.164. Anque la so voluntá yera que la enterraren n'Asturies, el so cuerpu embalsamáu afáyase na Capiella del Sagrario de la catedral palentina (semeya qu'ilustra el post).