Vivimos nun mundu au lo simbólico tien una importancia cimera. La imaxe, el refocilu que nos alluma'l cerebru nun momentu determináu, algamen una importancia comunicativa induldable.Y les imáxenes añen nel so bierzu a los estereotipos. Remanamos asina una serie de semeyes que nos identifiquen colo propio. Unes vegaes deformaes a embute. Otres más axustaes a la realidá y la tradición. Semeyes que nos puen averar a una verdá, pero que cuando se repiten ensin la prudencia qu'acoseya'l xacíu, puen convertir esa verdá en media solamente y, en resultancia, en media mentira.
Son bastantes los casos d'estereotipos asturianos. Puen dir dende la manera de vistir, a la gastronomía o la música. Y, como dixi enantes, nun ye quen nun respuendan a una realidá, pero sí que puen tapecer otres que tienen perfectu derechu a que se vean y reconozan como tales.
Emponderamos y repitimos equí y acullá les virtúes d'esa ayalga de los nuestros llares como ye la fabada. Pero ye un platu relativamente modernu. Xovellanos yá nos escribía que xintare fabes con tocín namás, porque la bayura del compangu ye cosa más reciente. Notres dómines, los potaxes de castañes o nabos yeren de lo más corriente. Y, anguaño, dempués d'años d'escaezu, tornen a aprucir, afortunadamente, nes nuestres meses. Nun convién dexanos llevar porque'l rellumu de la primera tapeza tolo demás.
Qué dicir de la sidra y la cultura que lleva venceyada. Y del inventu del escanciáu. Inventu, históricamente, tamién reciente, prestosu y valoratible. Pero, güeyu, qu'antiguamente esta bebida nuestra tomábase en xarres, cosa güe prácticamente desaniciada. Y tamién prudencia col tema d'aplicar el vocablu "nacional" n'esclusiva a esta bebida. Porque na zona suroccidental asturiana ta enraigonada dende va sieglos la cultura del vinu. Una cultura que, afortunadamente, actualmente ta espoxigando y conociéndose per ende. Y de lo que se trata nestos casos ye de potenciar dambos sectores, llabor que siempre va dir en beneficiu del propiu país.
Si adicamos pa la música ehí ta esi istrumentu que nos identifica como asturianos como ye la gaita. Nuevamente hai que solliñar lo prestoso y interesante d'un instrumentu qu'anguaño goza de bona salú, cuando hai décades taba perarrequexáu. Pero nun nos envizquemos. Ehí tenemos la descomanada importancia de la percusión nel nuestru folclor tradicional: panderetes, panderos, castañueles... tamién la presencia de la bandurria, la trompa, l'acurdión, la zanfoña o el vigulín. Ensin olvidar la importancia del cantu simplemente a capella, enin acompañamientu instrumental dalu.
Tenemos tamién unes formes de vistir tradicionales que nos definen como asturianos. Traxes garraos del antiguu mundu rural de los nuestros antepasaos. Monteres, sayes, coricies, etc. Pero tamién equí tenemos qu'andar con seyellu. Ehí tenemos la nuestra fastera que baña la mar, los nuestros puertos y los descendientes de los pixuetos d'antaño. Y ellos tamién teníen la so forma de vistir, con gorros de manga, xilecos col cuellu altu, pantalones llargos, etc. Eso tamién ye nuestro y asturiano. Pero ye corriente dexalo nun segundu planu pol puxu de lo vinculao a la quintana rural.
Y asina podríamos siguir enxareyando exemplos. Y convién, al llegar equí, dexar les coses clares pa nun empixar al llector con equívocos. Tenemos delles formes culturales enraigonaes d'una manera más xeneralizada qu'otres nel bagaxe simbólicu de la nuestra identidá colectiva. Utilizámosles como imaxe o estereotipos identificativos y ye normal que lo faigamos, pues esti proceder ye xeneral nos pueblos y cultures d'ayuri. Pero lo qu'encamiento ye tener el procuru de nun dexar que dalgunos árboles, pervaloratibles, nun nos dexen ver la rica viesca del nuestru patrimoniu cultural en xunto. Y cuando procedemos a etiquetar de "nacionales" a casos mui concretos, o cuando nos centramos n'esclusividá en dalgunos d'ellos repitiéndolos como una especie de mantres culturales, corremos el peligru d'empozanos nel barrizal de les medies verdaes, apostalgando otres manifestaciones tamién de nuestro y faciendo un flacu favor al conxuntu de la nuestra cultura.
