jueves, 27 de febrero de 2014

Antroxos y mazcaraes tradicionales.

Tamos estos díes, un añu más, somorguiaos nel tiempu del antroxu.

Cuando nos referimos al antroxu tenemos qu'entamar estremando'l conteníu tradicional del términu y lo que supón inxertar elementos ayenos.

Amazcarase con procuru buscando l'aplausu estéticu, buscar referencies nel cine o cómic, asonsañar charangues d'ayuri o arruxidar con ritmos brasileños ye corriente de ver güe ente nós, icluyendo desfiles que son tou un pase de modelos con premiu incluyíu a los más guapos y trabayaos. Pero los antroxos asturianos yeren otra cosa y d'ellos quenden inda rellumos nesta dómina.

La manera d'amazcarase antiguamente entraba no esperpéntico y lo moxiganguero. Homes camudaos en muyeres, xente vestío a lo zapalastro, cubierto con sábanos, ropa vieyo de casa, pintando les cares col sarru d'un corchu quemáu... eso yera lo que se facía antes y que bien reflexó'l pintor Evaristo Valle nes sos Carnavalaes (la semeya del post correspuende a una d'elles). Y la tresgresión irrespetuosa de lo establecío (entamando polo vinculao al poder que, paradóxicamente, subvenciona y organiza anguaño los carnavales), la trastada (garrar el carru a un vecín y engolalu per ende), la mofla, el retu (echando los mozos d'un llugar un goxu con paya ardiendo a los d'otru), el xaréu ensin norma, y les fartures pa entrar col butiellu bien enllenu na Cuaresma.

Arriendes de lo anterior, tenemos les mazcaraes tradicionales. Entamaben coles boquiaes del añu anterior, allá peles fiestes navidiegues y siguíen pel mes de Xineru o, en dellos casos,  más allá a lo llargo del iviernu. Yera l'otru antroxu -recordemos que'l vocablu significa "entrada", nesti casu del añu-, quiciabes l'orixinal del que derivó esti otru qu'antecede a la Cuaresma y que vien a ser el finxu que marca'l final d'esi ciclu ivernal (anque podía espurríse dacuando). Per esti tiempu salíen guirria, reises, bardancos, sidros, zamarrones, etc. Pidíase l'aguilandu. Escorríase o afalagábase a les moces (guirria, sidros).  Facíense representaciones que diben dende espantayaes y asonsañamientos (imitar un partu onde acaba saliendo un meñacu pel aire o hasta un mesmu gatu) a comedies yá más desarrollaes. En xunto, una xermandía amazcarada con llazos tanto peninsulares como europeos. A manera d'exemplos pongo al final del post tres vídeos de dalguna d'estes mazcaraes.

Anguaño lo corriente que podemos observar ye namás que l'antroxu como viéspora de la Cuaresma onde s'aveza a empobinar bien de veces pel camín de les imitaciones despersonalizaes de lo que se fai per ende acullá de les nuestres llendes. Unos carnavales con poca xixa llariega. Y hasta apocayá un escaezu del otru antroxu, el de les mazcaraes y aguilandos tradicionales. Pero, como escribía notru post d'esta bitácora, queden caricós encesos de los vezos d'antaño y, pali que pali, van dexándose ver cada vez con más fuerza y siendo conocíos por más xente. Ello nun quita pa qu'heba per delantre una xera bien grande por facer.

Ye un llabor perinteresante -y descomanáu-  la de recuperar mazcaraes y antroxos afondando nel bagaxe de les nuestres tradiciones. D'animase a echa-y el goxu a tanta aculturación acomplexada, y de recuperar y gritar esa frase d'antiguamente que, ente otros, tenía un significáu de perder el mieu y salir albintestate: ¡Antroxu Fuera!.

Pues venga. Que salga. Y a emburriar p'alantre.
                                      

miércoles, 19 de febrero de 2014

La Teoría de D. Sauriu.

Hai vegaes que dalguna imaxe suxer-y a ún una enfilandrada d'idees, con tiez o febles, que pa valoralo ta'l xacíu de caún. El casu ye que va tiempu taba yo viendo una colección de fósiles. Metanos una especie gárabos que yeren corales, llamóme l'atención una lláscara. Nella apaecía bien marcada la cabeza d'un sauriu o reptil, partes de la pelleya y nicios de dalgún deu. Y foi entós cuando, por nun sé qué enxareyada de conceptos o seique dalgún cruce neuronal, rellumóme na mente l'aquello que vien de siguío y que me dio por llamar, en plan de pensador de madreñes y caleya, la Teoría de D. Sauriu.

Porque quién diba suponer qu'aquel ser irracional que vivió nesti planeta, allá de los tiempos, diba remanecer na actualidá, camudáu en fósil, a la vista de nuestro, y llegando a ser conocíu per ende, convirtiéndose asina nun privilexáu de la so especie. Pero estes coses pasen y, agüeyaes dende la nuestra querencia actual pol control y la planificación que finquen la nuestra xera nel más alloñáu porvenir, dannos rocea al nuestru pensamientu racional y al nuestru ego. Y ye que, enchipaos que solemos andar nesta dómina narcisista de considerar al nuestru embeligru como'l centru del mundu, queremos controlalo too, tener bien ataes les coses del nuestru presente y hasta ser quien a planificar la nuestra trescendencia futura.Queremos rescamplar, facer historia y pasar a ella. Convertinos en referentes d'esto y aquello. Controlar la nuestra inmortalidá, al traviés del nuestru llegáu, pa cuando nun teamos nesti mundu puñefleru. Y, pa ello, nun duldamos davezu n'eliminar al que consideramos contrariu desamando pa les práciques cainites, clientelares, amiguistes, buscando la solombra del poder, o renunciando al propiu criteriu por consiguir una reblaneda efímera.

Pero, ¡ai, hom!, mirái per ónde pue pintar que se cumpla la Teoría de D. Sauriu. Y que nun ye otra cosa qu'intervengan nesi destín nuestru, que contábamos encarriláu, tres variables, a manera de santísima trinidá descontrolada, que tracamundien los nuestros planes y faigan taramiellar les nuestres segurances, y que son: Casualidá, Circunstancies y Suerte. Una triada de mui difícil o simplemente nula posibilidá de mardomar col ñarigón de los nuestros deseos y estratexes. Y ocurre entós que, cuando nos veíamos empicorotiaos na fama y ringurrangu blindaos indefinidamente, zampámonos na pura llamarga del escaezu col devenir del tiempu. O, pela cueta, cuando nos apalpábamos fechos una llaceria, empozaos na indiferencia y l'olvidu, acabamos rescamplando tan guapamente daqué día, magar pa entós podamos ser yá namás que cadarma y polvu.  Pa qu'ocurra lo uno o lo otro depende de que la casualidá, les circunstancies y la suerte, les tres partes que  formen el finu guispiu con que nos gusmia D. Sauriu, nos esfaraguyen los enfotos y trabayos na invisibilidá o, al contrario, que los fosilicen, camudándolos en güelgues clares y permanentes pa qu'un día futuru remanezamos a los güeyos d'otra xente qu'amuese per dayures qu'hubo un tiempu en qu'esistimos.

sábado, 8 de febrero de 2014

Les llaceries de les vagamares.

Nestes dómines tán aportando a les nuestres costes unes vagamares descomanaes. Unes galernes qu'emburrien puertos, cais y espigones. Tamién solmenen edificios y esmanganien o funden embarcaciones. Acompañao too ello por rabaseres d'aire pergrandes que contribuyen nes estroces na costa y nel interior.

Son les llaceries d'unos temporales que nos dexen clisaos pol so encabritamientu, y que perdayures vienen quedando plamaos en semeyes que faen respigase pola potencia qu'algamen.

Centrándonos na mariña, toles villes costeres de nuestro tán sufriendo los enviyones de la mar y ye llarga la llista d'estroces bultables dayures. Podemos agüeyar milenta imáxenes de foles enormes escentellándose contra la costa y causando daños no que garren per delantre. 

Escurque heba que facer mención a parte pa una desgracia cultural y científica. Trátase del esfarrapamientu del centru qu'en L.luarca tien el Cepesma col Muséu del Calamar Xigante. Un centru que dende diba bien d'años venía desendolcando un llabor perestimable y que güe ye la imaxe del desastre llastimosu. A lo llargo d'estos díes fueron abondes les muestres d'apoyu al mesmu, incluyendo recoyíes de firmes al traviés de les redes sociales rispiendo pola so reconstrucción. 

Queda esperar qu'abocane tanta turbonada p'acabar cola xera desagradable de facer  recuentu de les abundantes pérdides y de tratar d'iguar lo meyor posible lo esgonciao. D'atropar medios y soluciones pa dir llevantando tantu estropiciu, reforzando si fuere posible les midíes de protección y seguridá de los nuestros puertos. Claro que, al final, suel cumplise por desgracia eso que tantes vegaes comprobamos de que, cuando les fuerces de la naturaleza se desencadenen engrifaes y gafes, tornales conviértese nun imposible.

sábado, 1 de febrero de 2014

Les medies verdaes de los estereotipos.

Vivimos nun mundu au lo simbólico tien una importancia cimera. La imaxe, el refocilu que nos alluma'l cerebru nun momentu determináu, algamen una importancia comunicativa induldable.

Y les imáxenes añen nel so bierzu a los estereotipos. Remanamos asina una serie de semeyes que nos identifiquen colo propio. Unes vegaes deformaes a embute. Otres más axustaes a la realidá y la tradición. Semeyes que nos puen averar a una verdá, pero que cuando se repiten ensin la prudencia qu'acoseya'l xacíu, puen convertir esa verdá en media solamente y, en resultancia, en media mentira.

Son bastantes los casos d'estereotipos asturianos. Puen dir dende la manera de vistir, a la gastronomía o la música. Y, como dixi enantes, nun ye quen nun respuendan a una realidá, pero sí que puen tapecer otres que tienen perfectu derechu a que se vean y reconozan como tales.

Emponderamos y repitimos equí y acullá les virtúes d'esa ayalga de los nuestros llares como ye la fabada. Pero ye un platu relativamente modernu. Xovellanos yá nos escribía que xintare fabes con tocín namás, porque la bayura del compangu ye cosa más reciente. Notres dómines, los potaxes de castañes o nabos yeren de lo más corriente. Y, anguaño, dempués d'años d'escaezu, tornen a aprucir, afortunadamente, nes nuestres meses. Nun convién dexanos llevar porque'l rellumu de la primera tapeza tolo demás.

Qué dicir de la sidra y la cultura que lleva venceyada. Y del inventu del escanciáu. Inventu, históricamente, tamién reciente, prestosu y valoratible. Pero, güeyu, qu'antiguamente esta bebida nuestra tomábase en xarres, cosa güe prácticamente desaniciada. Y tamién prudencia col tema d'aplicar el vocablu "nacional" n'esclusiva a esta bebida. Porque na zona suroccidental asturiana ta enraigonada dende va sieglos la cultura del vinu. Una cultura que, afortunadamente, actualmente ta espoxigando y conociéndose per ende. Y de lo que se trata nestos casos ye de potenciar dambos sectores, llabor que siempre va dir en beneficiu del propiu país.

Si adicamos pa la música ehí ta esi istrumentu que nos identifica como asturianos como ye la gaita. Nuevamente hai que solliñar lo prestoso y interesante d'un instrumentu qu'anguaño goza de bona salú, cuando hai décades taba perarrequexáu. Pero nun nos envizquemos. Ehí tenemos la descomanada importancia de la percusión nel nuestru folclor tradicional: panderetes, panderos, castañueles... tamién la presencia de la bandurria, la trompa, l'acurdión, la zanfoña o el vigulín. Ensin olvidar la importancia del cantu simplemente a capella, enin acompañamientu instrumental dalu.

Tenemos tamién  unes formes de vistir tradicionales que nos definen como asturianos. Traxes garraos del antiguu mundu rural de los nuestros antepasaos. Monteres, sayes, coricies, etc. Pero tamién equí tenemos qu'andar con seyellu. Ehí tenemos la nuestra fastera que baña la mar, los nuestros puertos y los descendientes de los pixuetos d'antaño. Y ellos tamién teníen la so forma de vistir, con gorros de manga, xilecos col cuellu altu, pantalones llargos, etc. Eso tamién ye nuestro y asturiano. Pero ye corriente dexalo nun segundu planu pol puxu de lo vinculao a la quintana rural. 

Y asina podríamos siguir enxareyando exemplos. Y convién, al llegar equí, dexar les coses clares pa nun empixar al llector con equívocos. Tenemos delles formes culturales enraigonaes d'una manera más xeneralizada qu'otres nel bagaxe simbólicu de la nuestra identidá colectiva. Utilizámosles como imaxe o estereotipos identificativos y ye normal que lo faigamos, pues esti proceder ye xeneral nos pueblos y cultures d'ayuri. Pero lo qu'encamiento ye tener el procuru de nun dexar que dalgunos árboles, pervaloratibles,  nun nos dexen ver la rica viesca del nuestru patrimoniu cultural en xunto. Y cuando procedemos a etiquetar de "nacionales" a casos mui concretos, o cuando nos centramos n'esclusividá en dalgunos d'ellos repitiéndolos como una especie de mantres culturales, corremos el peligru d'empozanos nel barrizal de les medies verdaes, apostalgando otres manifestaciones tamién de nuestro y faciendo un flacu favor al conxuntu de la nuestra cultura.