miércoles, 29 de enero de 2014

Ruxen los campanos.

Les guedeyes de les melenes ximiélguense col aire. Les caretes colloraes. Los paxellos blancos. Una moza fai un biecu al vese afalagada pol rau de raposu que corona'l capiruchu. Afítense nel suelu  les piértigues y los mazcaritos úpense nel aire y pósense faciendo ruixir los campanos. Vienen los sidros.

Detrás asomen los marutaos de les comedies. Una de rapacinos. Otra d'adultos, col vieyu y la vieya, los tontos. los galanes y les dames, el pecáu, el ciegu col criáu... sofitándose na xermandía comediante qu'afitare nel so tiempu nel papel José Noval "Siero". Empobinen pal llugar au van echales. 

Los sidros llenden l'espaciu de la representación albintestate si'l Nuberu nun anda gafu. Les comedies entamen.Toca asonsañar asocedíos y aconteceres del añu. Facer xirigoncia de situaciones y personaxes d'equí y allá. La xente españa en carcaxaes y aplausos. Ye'l momentu de la mampurra a manera d'aguilandu.

Les comedies de los sidros (Siero y Bimenes), de los guirrios dayures (Llangréu, Samartín, Llaviana...), pinten con collores gayasperos l'antroxu del iviernu. Del nuestru iviernu y del nuestru antroxu. Y, con elles, nel vieyu tueru del milenariu texu astur, aprucen  brotos nuevos de tradición y vida.

jueves, 23 de enero de 2014

La increible historia de Fartón Mangante.


Fartón Mangante ye actualmente una cabeza de xibaru con una historia increible y triste.

Nel so día fuere un conocíu diputáu de la Xunta Xeneral al que mandaron cruzar l'Atlánticu con una perimportante misión representativa, pero qu'acabó cambiando por dase una vida regalada a base de nun facer nada, da-y pol gustu a la bragueta, al butiellu, y apigazar nuna hamaca  sorbiendo per una paya agua de coco, pagao too ello, claro ta, col dineru del contribuyente.

Pero tuvo la mala suerte de cayer nes manes d'unos xíbaros amantes de les tradiciones más ancestrales que garraron la so cabeza inútil camudándola nuna obra d'artesanía d'un tamañu poco mayor que'l d'una bola de billar al tiempu qu'un vieyu xamán-y realizaba un tremendu fechizu.

Nun se sabe bien qué gran fondura y desgracia llevaba'l fechizu aquel que, d'entós p'acá, Fartón Mangante viose condergáu a vagar a lo llargo y ancho del mundu en busca d'una "irú" que nun ye otra cosa que l'apócope d'una "idea-realmente-útil", como la única posibilidá que-y quedaba pa poder desfacer l'encantamientu y descansar eternamente.

Y asina lleva yá venti años llargos vagando perende. La última vegada que lu vi taba yo arrecostináu nel tueru una castañal y cruzó per delantre de min flotando nel aire y moviéndose en ziszás, de la izquierda a la derecha y de la derecha a la izquierda. Díxome que tornaba pa la Xunta pa ver si yera a inspirase en dalguna "irú"que pudiere sentir nun debate llibrándolu del fechizu. El probetón inda nun s'enterara que tornaba pa un sitiu onde atopar una idea realmente útil ye persiguir una auténtica quimera.

jueves, 16 de enero de 2014

La política del mieu.

Cuando una castra política empobina pal convencimientu fondu de que'l so papel ye allugase nun sitiu privilexáu y a parte del que tienen el restu de los ciudadanos empecipia a iguar les midides afayadices pa protexese d'ellos. Y, neto a los fuexos, muros y torres de los castiellos medievales, escomiencen a llevantar la parafernalia defensiva de so.

Enxareten entós toa una recatafila de midíes tresnaes col envís d'apilancar cualquier focu de resistencia, protesta o cuestionamientu por parte d'esos ciudadanos que se sienten gravemente perxudicaos. Les midides p'acuruxalos viñen y puen dir dende multes descomanaes pa la supuesta infracción cometida a penes de cárcel espantibles pal supuestu delitu castigáu.

Pues lo anterior ye lo que vien desendolcándose actualmente ente nós, dende va tiempu, d'una manera clara y que nun para  d'espolletar. La castra política dominante, xuncida y cómpliz colos creadores d'esta estafa descomanada amazcarada como crisis, trata de blindase arreflundiendo sobre los ciudadanos tou tipu de tisoriazos a les llibertaes y sanciones a les discrepancies que faen que, cada día, un nuevu drechu, de la frasca que seya, quede arcoxáu o, simplemente, suprimíu.

D'esta miente, la enxareyada de toes eses midides tán llogrando, yá anguaño, que'l sistema políticu vixente pile cada vegada más pal llau de los sistemes totalitarios que de los estaos democráticos y de drechu. Y l'afirmación tantísimes vegaes repitida de qu'esti Estáu onde vivimos ye una verdadera democracia cada vez s'asemeya más a una auténtica y gafa xirigoncia.

lunes, 6 de enero de 2014

El rastru de Molinera.

La conservación del osu pardu cantábricu tien interés por sigo mesma, dende'l puntu vista biolóxicu y cultural. Como cualquier especie en peligru de desaniciu -osu, faisán...- l'enfotu por conservales tien que ser una prioridá al marxe de porgüeyos d'estremada frasca.

Pero la realidá impónse y dellos sectores economicos, como pue ser el del turismu,  puen vese beneficiaos de les actividaes vinculaes al mundu animal xabaz. Ehí tenemos el casu de la berrea del venáu pela seronda. Colos osos tenemos centros d'interpretación y tamién quien se dedica a facer visites guiaes a zones u se mueven estos animales cola posibilidá d'atopar nicios d'ellos o incluso llograr avistamientos, y alredor de too ello espolleten agospios y hostelería. Si se fai con xacíu, respetu y procuru ye posible concasar conservación con eses o otres actividaes económiques. Asina se lleva faciendo en dalgunos llugares de la nuestra tierra abenayá mientres medra la población osera.

Un casu dixebráu a lo anterior foi'l que se dio cuando abenayá apaecieron los esbardos güérfanos Paca y Tola. Entamangóse entós un cercáu na bautizada como Senda del Osu onde quedaron en cautividá. Equí los visitantes diben a ver, a costa fecha, a estos exemplares. Pero esti modelu tien un problema grave como ye que, dalgún día, los exemplares amosaos tienen que morrer. Poro, de mano la cosa funcionó bien varios años, pero'l tiempu biolóxicu foi escosando y les oses entamaron la recta final de les sos vides. Pudo reconducise la situación pa otru modelu, porque atractivos na zona hai a esgaya como pa nun necesitar cercaos oseros, pero non. Anecióse nun modelu caducu y entós aprució l'aforfugu y la necesidá de llograr nuevos exemplares pa siguir col modelu axeitáu. Tráxose de Cantabria'l machu Furacu, pero l'intentu reproductor fracasó...

Cuando  pelos medios de comunicación vimos la semeya d'una conseyera del gobiernu asturianu afalagando a la osina Molinera, un exemplar atopáu nel conceyu de Cangas del Narcea, nos grupos conservacionistes prendióse l'alarma. Dempués los badagüeyos cumpliéronse. Tres d'una recuperación chapucera del animal onde s'avezó a la presencia humana, soltáronlu. De siguío contaron que s'acercare a un nucliu de población y que nun podía entós vivir en llibertá. Darréu, dende l'alministración afirmaron que diben a metela nel cercáu de la Senda del Osu. La operación pa sustituir a Paca y Tola taba en plena marcha.

Surden varies duldes y entrugues sobre lo anterior. Por qué avezaron al esbardu a los humanos. Si ye verdá que s'acercó a un centru población -y si lo fixo nun ye novedá nenguna nel comportamientu de los osos-. Y si tol asuntu de Molinera nun foi otra cosa qu'una engatada preparada dende'l primer momentu pa sustituir a les oses vieyes del cercáu y echar una gabita a sectores que podíen ver mancorniaos los sos intereses económicos. Amás, hai quien opina que podría ser posible reconducir la situación y eliminar el vezu a los humanos del animal.

Tamién se llevantaron otres voces que dan rocea. Dende va tiempu hai quien plantega notros llaos entamar cercaos asemeyaos al de la Senda del Osu pa meter nellos posibles esbardos escabarriaos. Si daqué día s'empobinare perhí, el modelu de turismu venceyáu a esta especie daría entós un xiru radical. L'agüeyar osos en cautividá sedría'l motor turísticu y non el visitar zones onde viven en llibertá. De xorrecer esti planteamientu podríamos tener una rede de barganaces oseros na nuestra tierra. Tou un despropósitu.

En resultancia, el rastru de Molinera llevándonos a un cercáu onde va pasar el restu la so vida en cautividá fai que remanezan entrugues razonables de per ónde va empobinar nel futuru la política de la recuperación osera nel nuestru país. Porque l'intentu de xuncir actividaes económiques y conservacionismu alrodiu del osu, que nun principiu pudiere llevar a un tratamientu del tema afayadizu, pue tener anguaño guapamente una apegadiella tarrecible que nun cuadra pa nada cola conservación d'esta triba animal tan emblemática d'Asturies: la potenciación y espardimientu del turismu oseru sofitáu na cautividá d'una parte de los exemplares.