jueves, 30 de mayo de 2013

La guapura de la centaura.

Una de les plantes en peligru d'estinción que tenemos ye la endémica de la cordelera cantábrica conocida como la Centaura de Somiedu. Allúgase n'humedales.

Si-y echamos una güeyada vemos un floritu de tantos y si pasáremos al so llau probablemente nun nos llamare l'atención porque rescamplare la so guapura.

Pero tienla. Y ye la que-y da ser una planta minoritaria, arrinconada, una xoya botánica qu'alita enagora contribuyendo asina a la bayura biolóxica de nuestro.

Y el casu ye que, faciendo un paralelismu notru terrén, escurro que  les cultures y llingües minoritaries tienen tamién una guapura que rescampla. Una guapura que nun se debe a que seyan por sigo mesmes más galanes qu'otres, nin meyores, nin más afechisques. Tampoco nun ye que zapiquen en tolo contrario.

Camiento yo qu'eses cultures y llingües minoritaries, que son una carrapotada d'elles nel nuestru mundu actual y ente les que s'alcuentren les nuestres, son a la so manera xoyes inestimables de cada pueblu que les tien y tamién xoyes y patrimoniu de valor incalculable de tola humanidá. 

A lo llargo de la historia morrieron munches cultures y llingües. Y na actualidá hai una cantidá perimportante d'elles en grave peligru de desaniciu. Les asturianes tamién. Y toes formen una especie d'axuntanza de centaures guapes polo úniques y por apurrir el so granín d'arena a la riqueza d'esti patrimoniu de la humanidá al que me refería enantes.

Poro, consiguir unes condiciones afayadices pa la so supervivencia presente y la so tresmisión a les xeneraciones futures ye un llabor cimeru ya inescusable p'aquellos pueblos que somos depositarios d'elles y pal conxuntu de les sociedaes y naciones qu'habitamos esti planeta  y ante'l que nun podemos adoptar el posicionamientu fatu de quedar desdexaos o indiferentes.   

jueves, 23 de mayo de 2013

Del 25 de Mayu de 1.808

Dientro de les feches memorables de la historia asturiana rescampla la del llevantamientu del 25 de Mayu de 1.808 escontra la invasión napoleónica.

Naquelles dómines la Xunta Xeneral toma'l mandu de tol territoriu asturianu, declara la guerra al invasor, organiza un exércitu propiu y manda embaxadores a Inglaterra pa solicitar ayuda.

Aquel llevantamientu foi posible por aciu d'una xuntanza de los estamentos sociales asturianos (nobleza, campesináu, gremios d'ofcios...) col enfotu común de defender el país. 

Otru datu a nun escaecer ye que daquella Asturies yera biprovincial. Constaba de les Asturies d'Uviéu y de les Asturies de Santillana, zona esta última onde se celebraron delles batalles.

Tamién daquellos tiempos vien la bandera asturiana, que foi escoyida a propuesta de Xovellanos.

De magar finales de los 70 del sieglu pasáu, colectivos y persones vinieron faciendo alcordanza d'esta fecha. Hubo años que se facía una fiesta na plaza la Catedral, un actu na Sala Capitular y una ofrenda floral. Anguaño yá nun se celebra col puxu d'entós, pero asina y too sigue siendo una fecha presente nel calandariu reivindicativu asturianu.

Sirve tamién pa recordar que les nuestres instituciones d'autogobiernu nun son un inventu o concesión nacíes al calor del actual sistema autonómicu español. Tienen raigaños fondos nel pasáu y antigüedá. Y, allá un día hai más de doscientos años, fueron instituciones d'un pequeñu país que tuvo la decisión y valentía de declara-y la guerra al meyor exércitu del momentu. Que nun ye cosa menor.

jueves, 16 de mayo de 2013

La romería de la Santa Crisis.

"Co la chaqueta terciada/y el civiellu llevantadu/Pericón el de Maruxa/non tien miedu al más pintadu/y piernes llime y costielles/como quien llime morgazu".

Asina entamaba Caveda una de les sos poesíes onde describía una engarradiella nuna romería de les d'antaño.

Y el casu ye que tando yo relleendo estos versos viénome nun refocilu a l'acordanza un paralelismu cola situación que vivimos nestes dómines.

Porque esa romería pa onde empobinemos  gayasperos y gargoliando cancios dempues del franquismu cambió de santa (Democracia por Crisis) y d'entós p'acá nun hai manera d'enxareyar una danza colectiva y de futuru que preste.

Antaño por culpa de Zapaterón el de Pucela, anguaño por Marianón el de Compostela, apruciendo dacuando Xabelón el de Mieres... el casu ye que llevámosles toes en llombu una tres d'otra. 


Porque vivimos arrodiaos per farfantones que nun paren d'echar ronques, gritar ixuxús y solmenar civiellazos a la nuestra economía y a los nuestros derechos de toa mena ensin danos tiempu nin a gorgutar siquiamente.

Y l'asuntu ye qu'esa inmensa mayoría que formamos la xente que participamos na romería de la Santa Crisis nun atopemos enagora manera de safanos de tantu mazcayu que nos tien aforfugaos y faciéndonos la vida imposible. 

Rebullimos, pelámonos la cabeza escurriendo qué facer, buscamos y rebuscamos cómo valtar a tantu abusón, pero nada. Que nun hai manera. 

Y asina andamos, como almes en pena, estrapayaos de tanto llevales un día sí y otru tamién.

¿Hasta cuándo?.

-¿Sabes que vienen perhí afalándonos pa la romería de la Santa Crisis, cho?-
-¡Hai, hom!. ¿Pa llevales otra vuelta, manín?. ¡Yá nun sé si tengo costielles o farrapes por cadarma...!-

martes, 7 de mayo de 2013

De los osos.


Nos capiteles del conventu de Villanueva nel conceyu de Cangues d'Onís podemos ver representada una historia que pudiere ser la de la muerte del rei Favila, ún de los poquísimos episodios históricos propios conocíos polos asturianos y que, interpretaciones crítiques al marxe, cuenten les cróniques qu'asocedió nun alcuentru con un osu.  

Nun dexa de ser curioso que l'unicu rei asturianu que se reconoz como muertu nun combate nun lo fuere a manes d'un enemigu humanu, sinón d'otru rei, el de les viesques asturianes, l'osu.

Tamién me llama l'atención que munchos cuentos y lleendes de personaxes famosos que se tresmitieron a la llume del llar y nes nueches de filandones tienen por protagonistes humanos, non a grandes soldaos o bravos guerreros, sinón a llexendarios cazadores d'osos, o simplemente a estos animales.

La relación de los asturianos colos osos ye mui particular. Compartimos con ellos durante sieglos y xeneraciones el territoriu y guerriamos contra ellos dende la reconocencia d'un animal maxestuosu dignu de batise con un rei hasta la consideración probetaya de siemple alimaña pa desaniciar.

El final previsible de tantu enfrentamientu foi al qu'empobinábamos hai pocos años inda. Tuvimos a piques d'acabar cola especie definitivamente. Y foi entós cuando nos vieno un rellumu a la mente, como una llamada que nos encamentaba de la salvaxada que díbamos peracabar.

Entamemos entós a valorar la triba osera como nos tiempos más vieyos. Devolvímos-y el tronu al rei de les nuestres viesques y enfotémonos n'ayudalu a recuperar población y territoriu. Dexó de ser enemigu y alimaña pa convertise en símbolu de la nuestra natura y hasta n'emblema del nuestru país.

Nun tán los osos a salvu del too del peligru que cuerre la so especie de desapaecer, pero vamos avanzando pel bon camín. Siempre van quedar los xabaces a los que-yos importe un res el so futuru y anecien n'esterminalos. Pero lo importante ye comprobar cómo cada vegada más conciudadanos s'allegren de los esbardos que van poblando los nuestros montes, que refuguen cualquier agresión que se cometa sobre esta especie, y que la consideren como parte de la cultura de nuestro.

Del enemigu osu al hermanu osu. Un bon reblagu pa bien. L'únicu animal de la nuestra biesca al que-y permitimos l'honor de dexanos ensin un rei por aciu d'un combate ente iguales. Casi nada.

sábado, 4 de mayo de 2013

Vivir el país.

Nun paga la pena. Decididamente, nun paga la pena siguir emburriaos pola inercia acrítica. Nesti país vivimos a la rebalgueta ente andar  allancaos nel pasáu guerracivilista y el progresismu de neñu de bien metíu a revolucionariu de cervecería. Y too ello pasando tamién polo que podríamos denominar como una versión rabiosamente autóctona del despotismu ilustráu (too pa los asturianos ensin contar con ellos nin escuchalos casi que pa nada) d'aplicación tanto en dellos ámbitos políticos como llingüísticos.

La crítica, el cuestionamientu de lo fecho hasta hoi, el razonamientu sinceru y desapasionáu, el sestaferiar nuevos caminos a los caleyaos hasta agora,  dan les boquiaes como pexe fuera l'agua  dende abenayá. Vense mal dayures. Sustitúyense poles virtudes prusianes de zarrar files. Empobínase emburriaos pola inercia. Talo paez que, como nes bodes, equí, de puertes de "casa" p'adientro ta too mui rico y mui abondante. La culpa siempre ye del enemigu, mayolón, gafu y abusón.


Pero ello ye que, cuando dempués de tres décades onde se supón que díbamos a puxar por otra manera de facer y construir n'Asturies les coses tán como tán, les intenciones y proyectos aseméyense más a un podriellu qu'a otra cosa. Y falar acordies nun tendría de mancar a naide, pero paez que cuestionar cualquier cosa de lo establecío ye sospechoso de traidoría o quién sabe de qué escuros intereses.


Construir dialécticamente nun paez llevar a nenyures nestos momentos. Talo asemeya que ye una manera fata de dar voces en castañéu. Axeitar llurigues nueves d'alcuentru nesta llamarga d'autocomplacencia, regustu pol pasáu y incapacidá pa imaxinar un futuru rescampláu d'un país fechu dende l'arrogancia y a comuña figúraseme casi qu'un imposible nestes dómines. Equí caún ta a lo que ta. Unos al duernu. Otros al autobombu. Otros al rau del cabezaleru incuestionable. Y, otros, tratando d'anovar discursos y planteamientos y quedando por ello como frikis ante la indiferencia xeneral.


Asina que talo paez que nestes dómines queda namás que'l refuxu últimu de la posición personal. Del dicir alto y claro "non" a tantu despropósitu y a participar como mecanos onde se nos llame y ensin gorgutar. D'escaecer definitivamente  tantu inmovilismu alcanforáu d'un asturianismu caducu, fosilizáu, inoperante y tronáu.


Pero queda, afortunadamente, tovía país. Ta ende testonamente. Alienda ehí afuera mostrándose a los gueyos de quien lu quiera ver. Esa suma de redes vivenciales qu'aliten anguaño. Porque la vieya nación asturiana inda nun morrió. Y tenemos el gran privilexu d'esfrutala enagora, de poder somorguianos nesa parte de la sociedá que conserva les raíces ancestrales y que busca afayase nel futuru ensin renunciar a ser ella mesma, de tratar d'entendela, d'enfotase en vivila y de sentinos nós parte d'ella.


Ye l'últimu abellugu d'aquellos que sentimos cómo se nos respiga la piel colo ermuno de la nuestra tierra y que nos esmolez la llaceria que la embarbia. Prúyenos desenguedayanos de discursos alcanforaos, de seguidismos acríticos y ciegos, de participar no que pa la propia población asturiana se-yos antoxa como auténtiques xigomencies y da'l llombu una y otra vegada. 


Quédanos vivir el país. Y, quien sabe, si decidiéndonos a vivilu d'una  puñeflera vegada por toes , si somorguiándonos con una mentalidá abierta, parcial y ensin prexuicios nél pa deprender y tamién p'apurrir, almeyor somos hasta quien d'ellaborar discursos nuevos, sinceros, intelixentes y vidables qu'ayuden a qu'esta vieya nación perviva nun futuru.


jueves, 2 de mayo de 2013

Del asturianismu clientelar.

Nel asturianismu hai dos partes. Una poco visible que vive de los sos recursos escasos. Otra visible que vive de los recursos de toos al traviés del réxime clientelar que lu subvenciona.

Ye lo que tenemos anguaño. Lo que la xente conoz, falando en términos xenerales solamente, ye lo que'l réxime clilentelar quier que se vea. 

Una relación nesti últimu casu, d'intereses recíprocos. Unos, consiguen que salgan a la lluz los sos productos, calidaes a parte. Otros, utilicen a los primeros pa contrarrestar la opinión de que'l réxime practica una política etnocida.

Tamién hai un enguedeyu ente la xente que de bona fe s'avera al asturianismu. Bien de veces nun son estremar ónde ta'l granu del trabayu arrogante y ónde la poxa de los intereses. Aparentemente, toos son collacios y tiren pel mesmu carru. Pero en realidá ye mui cuestionable.

Nesta mesma bitácora tengo dexao per escrito qu'Asturies necesita d'un proyectu nacional arrogante y ampliu qu'acueya a tou aquel que quiera participar d'él. 

Pero tamién tengo dexao per escrito nesta bitácora que l'oxietivu cimeru y principal a llograr ye valtar el réxime clientelar que nos afuega y destrúi como comunidá nacional. 

Poro, esi sector más visible del asturianismu que participa d'esi réxime descaradamente, llogrando con ello dende consiguir un puestiquín a poder sacar a la lluz los sos productos fortísimamente subvencionaos a cambiu de collaborar en tapar les vergüences del mesmu, tendrá qu'escoyer posicionamientu. O sigue asina, o andecha cola oposición al clientelismu.

El que quiera que se moleste n'entrugar pente la xente conocío más concienciao nos temes de defender al país. Yo fáigolo y les opiniones hacia esa "parte visible" nun son precisamente afalagadores. Quiciabes esa seya una de les razones de que nun espollete por más prebendes clientelares que reciba. Una cosa ye la opinión de los que "tán nel rollu" y otra los que lo ven dende fuera.

Señores, o intentamos facer país o tratamos d'aprovechanos de los qu'esgoncien el país nun alcuerdu recíprocu d'intereses. 

Porque anguaño la trampa rescampló. Y los patriotismos interesaos del tipu "colócame lo mío a cambiu de..." yá nun cuelen.