viernes, 22 de febrero de 2013

El peculiar bipartidismu asturianu.

La situación política asturiana aseméyase abondo a un sistema bipartidista. La instalación ente nós, dende acuantayá, d'un réxime clientelar corruptu y onde'l que nun participa tienlo bramente feo pa salir alantre, propició que dende sectores sindicales, a empresariales, culturales y políticos s'apuntare xente, de trebolén, a participar de la nuestra peculiar estructura político social pa tirar del tetu.

Concretamente, na estaya política, esi réxime plasmóse no que se vien conociendo como Pactu del Duernu. Un amagüestu onde participen anguaño dende una organización pequeña populista, a dos formaciones de la izquierda, pasando per un partíu de la drecha que se supón que tendría que ser alternativa de gobiernu. Pero non. Los papeles tán bien distribuyíos. Persábese, dende amunchayá, quién tien que gobernar n'Asturies, quién nel ayuntamientu d'Uviéu y quién nel de Xixón, por poner tres de los casos que más  rescamplen.

Ello fai que cualquier fuerza política que quiera aportar al gobiernu de la Xunta Xeneral nun tenga otru remediu que sacar mayoría absoluta. De nun lo facer, los duernistes del réxime van dar bona cuenta d'ella. Eso foi lo que-y pasó al partíu ganador de les anteriores elecciones autonómiques. Pero nun nos engañemos.Cualquier otra fuerza política que nun participe d'esi pactu pola esllava y que ganare unes elecciones asturianes sufriría les mesmes consecuencies. Tamién ye cierto que, dacuando, los partícipes del repartu del pastel políticu asturianu tienen les sos engarradielles. Pero ye una falsa ilusión. Una simple representación d'un paripé p'aparentar a los güeyos de la población asturiana lo contrario de lo que son.

En resultancia, tenemos fincáu nel nuestru panorama políticu un bipartidismu de facto. D'un llau, el zurriburri clientelar espresáu políticamente pol Pactu'l Duernu al que me refería enantes. D'otru, tolos demás, pallamentarios o extraparllamentarios. Y con dos característiques que faen a los primeros prácticamente imbatibles. D'un llau la potencia d'esa  rede de clientelismu y corrupteles bien afitada ente nosotros. Y d'otru que, nel momentu que-yos interese, los duernistes van actuar a comuña, mientres que los demás non, pola disparidá d'opciones que nesti últimu casu se dan.

De toles maneres, camiento que tendría qu'haber una cosa clara ente tola xente y organizaciones que s'oponen a esta situación, pa nada democrática, perdayuri. Y nun ye otra  que convencese, d'una vez por toes, qu'esti réxime duernista ye'l principal responsable del esboroñamientu asturianu que lleva camín de dexanos como un ermu económicu, social, llaboral y cultural. Poro, trabayar pol so desaniciu tendría de ser un oxetivu nidiu, cimeru y prioritariu. Claro qu'ello ye plantegar una utopía viendo cómo tán les coses. Pero ye lo qu'hai.

sábado, 16 de febrero de 2013

El Morrillazu.

Llevamos milenios d'evolución armamentística pa poder espichala, guapamente, como gurriapos espanzurraos d'un mísere gomerazu espacial.

Hachos, cuchiellos, pistoles, bombes, aviones, arbíes de toa frasca  pa zumbanos la badana como manden los cánones y total pa nada.

Anque cuando'l primer homínidu qu'escurrió garrar un regodón p'acuti-y na mollera a otru de los suyos igual llevare'l camín correctu hacia l'autodestrucción como especie. Seique porque nos xenes llevamos de los tiempos la herencia d'esi otru meteoritu que, al dicir de ciertos científicos, pudo aniciar la vida nel planeta.

El casu ye que'l nuestru final pue venir vía espacial, como cuenten dellos que-yos ocurriera a los dinosaurios. Acabante cayer en Rusia un bon xigu con bona estroza de bienes  y persones, va tiempu que comenten per ende que pal dos mil trenta y tantos va enfilar hacia'l nuestru planeta otru bien bultable que d'aperrillanos pue mandanos a tomar pol sacu. Y hasta yá anden los qu'entienden d'estes coses escurriendo la manera d'esvia-y la trayectoria y too por si acasu.

Y digo yo que si, entrín y non aporta a nós un mal día un d'esos regalos envenenaos del universu, nun nos saldría más rentable pelar la cabeza y emplegar los recursos d'esti planeta en tratar de vivir toos dignamente en vez d'aneciar n'amarganos la vida diariamente unos a otros.Anque ello supunxere enterrar esa llinia evolutiva ancestral en sen completamente contrariu pola qu'amosamos tanta querencia.

Porque total, p'acabar fulminaos por un triste y primitivu morrillazu galácticu, cola frustración añadida de la clarísima falta de respetu por parte de los astros hacia  tanta evolución qu'acumulemos hasta'l puntu de llegar a creyenos los reis del mundu, del universu ya inclusive del mambu, nun sé pa qué vamos siguir con eses ganes d'enguedeyanos mutuamente les nuestres bípedes esistencies...    

sábado, 9 de febrero de 2013

Carnavalada.

Enfilamos al domingu'l gordu y al martes d'antroxu. Finxu final del antroxu bautizáu   tamién en carnaval col pasar del tiempu. Pero qu'antiguamente aniciaba a finales d'avientu y espurríase pel iviernu hasta acabar (o hasta resalvar) el martes d'antroxu. Ehí tenemos les salíes actuales, nesti períodu, de reises, gurria o sidros y comedies, como exemplu.

Son les dómines de los antroxos tiempu de tresgresión. De recular a époques xamániques. De facer moxiganga de lo establecío. El mazcaritu ye'l rei qu'echa'l goxu retador a una sociedá guiada por normes y dogmes. En parte, sólo en parte, esta función llegó hasta nós. Porque, anguaño, hai esi otru carnaval de lo guapo, lo competitivo, lo políticamente correcto y alloñao del antroxu tradicional de les trastaes y xirigoncies. Y de les fartures, de potaxes, picadillos, frixuelos, picatostes...

Ún de los artistes que más maxistralmente retrató los carnavales foi'l xixonés Evaristo Valle. Los sos cuadros son alcordanza viva de cómo se vivíen esos tiempos abenayá. Dalguna representación como la del carnaval de los osos yá son mazcaraes sumíes nel pasáu.

Mazcaritos, pitances, trastaes, folixa... estos díes de Febreru tamos nel final del antroxu y nos carnavales. La  xente qu'inda conserve un espíritu antroxeru tien el so tiempu pa demostralo...

Por cierto, una de les frases del antroxu tradicional que pudieren valinos, guapamente, pa inyectanos una migayina de moral nestos tiempos abegosos de crisis en que nos movemos ye aquella que nos diz "¡antroxu fuera!" y que vien a significar que nun hai que temer y qu'hai que dexar de llau mieos y complexos.

Pues eso.

domingo, 3 de febrero de 2013

Los rabotazos de la Tierra.

La Tierra tien el so falaxe y les sos señales. Delles veces son melgueros. Otres son un avisu, un badagüeyu de lo que ta por venir.

Davezu préstanos esfrutar del so burbús prestosu, pero otres vegaes sentimos l'aforfugu de cayer impotentes nes sos garduñes.

L'enchipamientu na nuestra bayura tecnolóxica fainos cayer de cutiu na creyencia de la nuestra superioridá pa controlar el planeta u vivimos. Pero, a la postre, ye él quien impón les sos lleis.

Namái que cuando les sos fuerces nos lo recuerden, vemos nel so espeyu lo ñarros ya impotentes que somos en comparanza con esa Tierra que creyemos mardomar. A fin de cuentes, d'ella ye d'onde procede'l remu que nos alimenta de vida y la que tien y va tener siempre la última pallabra.