A estes hores fierven redes sociales y foros. El seleccionador español de fútbol sub-19 arrampuñó-y la bandera asturiana al xugador Juan Muñiz demientres la celebración de la victoria del campeonatu d'Europa y delantre de los güeyos de mediu mundu.L'Insultu d'esti individuu algamó d'esta manera llendes descomanaes. Una bandera llegal y constitucional, l'asturiana, ximielgada bien de veces per dayuri por deportistes de toa mena, futbolistes incluíos, foi tratada como un felpeyu por Ginés Meléndez. Y, repito, delantre de bien de medios de comunicación qu'agranda l'agraviu.
Pero si daquién viere nello un xestu de querer namás que la bandera española fuere la presente nes celebraciones del campu equivócase. Detrás d'esta actitú rescampla una ideoloxía preconstitucional y facistoide del técnicu español. Hai que recordar qu'esisten semeyes pela rede onde apaecen xugadores españoles siendo él entrenador cola bandera franquista y ensin qu'amosare desaprobación dala nesos casos. D'otru llau, esa bandera qu'asoleya'l güe d'Osborne tampoco nun-y paez nada mal al señor Meléndez, que tamién la permite utilizar a los sos xugadores.
Yo pienso qu'esti actu d'insultu y ningunéu hacia Asturies y los asturianos al traviés del despreciu a la nuestra bandera nun debiere cayer en baxo a los organismos competentes. Dende la Federación Asturiana de Fútbol al Gobiernu Asturianu o a la Conseyería correspondiente habríen a estes hores d'esixir les disculpes clares y contundentes al seleccionador.
Diz un refrán nuestru que "la que fixisti en Payares, pagarásla en Campumanes". Esta vida da munches vueltes y tampoco nun sedría raro que dalgún día'l Sr. Ginés tuviere que visitar dalgún campu de fútbol asturianu, bien con una selección española o entrenando a dalgún otru equipu. Y cuando vea entós dalguna bandera asturiana, a ver si se pon tan gallu y s'atreve a pone-y una mano enriba.
A ver.
6 comentarios:
Y Cascos,¿que dira de tou esto?, ¿callara como un afogáu?
por amosar a tol mundu qu'Asturies nun ye España. ¡¡¡Puxa Asturies dixebrá!!!
El seleicionador esi ye un putu censor. Ye un actu de censura. Quixera you vellu quitar una bandera del Vaticanu o una Ikurriña.
Póngome malu.
Paez qu'esu de "Más Asturias, mejor España" nun chegóu a los oyíos del seleicionador necional (nun ta mal puestu, ho) español. Ya you encantáu tamién: pa esti puntu, Asturies tampoucu yía España.
Camiento que la xente qu´actua d´esa mena amuesa un miéu profundu a perder los privilexos de los que siempre gozaron nun estáu centralista, como el fíu únicu que pierde posiciones ante los hermanos.
Yo veo nestes actitúes resclavos del "franquismu sociolóxicu". Magar llevemos décades de Constitución, inda hai una bona parte de la población española y asturiana con un conceutu del Estáu uniformista, centralista (como bien diz Catalina) y que siguen naguando por una única alministración central, l'uniformismu llingüísticu y, en definitiva, la España totalitaria d'otros tiempos.
Publicar un comentario en la entrada