domingo, 26 de julio de 2009

Asturies River.

Unos turistes suben en dos coches per una carretera d'un parque natural asturianu. Pósense, espurren nel capó d'un de los vehículos un planu y entamen a especular rutes. De sutrucu, ún d'ellos garra unos cuantos cascos de botelles y escuéndeles pente unos matos. Dempués cuelen.

Nun desfiladeru una senderista ta enclicada tratando de garrar una sacavera. Acércase-y otra xente y entrúguen-y qué fai. Respuende:

--Quiero cogerla para dársela en casa a mi gatita--.

Ante los conseyos de los demás caminantes, encamentándo-y que dexe en paz al animal, dase por vencida y desiste.

Nun camín llendáu per ablanos y nozales asomen pente la yerba les fueyes d'una orquídea. Al pie d'elles apaez en suelu tarazáu'l so garapiellu floral. Dalgún paseante escurrió que la espiga flores yera una pelota golf y solmenó-y un bastonazu. O quiciabes pensó que la meyor manera de miralu y golelu yera arrincándolu pa acercalu a la cara, quién sabe.

Unos pocos exemplos esbillaos ente milenta. Una manera de facer turismu inorante y desvergonzada. Totalmente xabaz y destructiva pa col entornu natural. Hai casos en que tán arrasando especies enteres. Los montañeros avezaos podríen contanos bien de casos de xuro.

Pero una manera de facer turismu que se potencia dende'l mesmu poder asturianu, dende onde se pretende vender la nuestra naturaleza como si fuere un recuerdu típicu más. El turismu tipu osu Yogui xurgando pente les cestes de la merienda. Que masifica, tría y esgoncia paraxes naturales, porque la conservación de los mesmos y la llegada del turismu en masa opónense radicalmente.

Una apuesta clara dende les nuestres instituciones pol númberu y non pola calidá. Que tamién la hai, y convién amestar que nos visita xente d'otros llugares que sabe a lo que vien, que se comporta respetuoso ellí onde ta y con una educación que salta a la vista. Nun voi ser yo'l que caiga en xeneralizaciones fates y falses.

Porque pa los que nun saben, nin quieren saber, nin ven otra rentabilidá de los nuestros paraxes naturales que la esplotación salvaxe durante unes décades hasta convertilos nun ermu, Asturies ye como un ríu onde s'invita masivamente a batear tol oru que caún pueda llevar pa casa hasta que nel fondu namás que queden regodones inservibles.








sábado, 25 de julio de 2009

Mentes Xurásiques.

Hebo un tiempu, cuantayá, en que la tierra que güei triamos taba habitada por unos seres monstruosos y gafos. Y les sos mentes yeren más monstruoses y gafes inda. Grandes mentes xurásiques.
Los humanos fuxíen acuruxaos a buscar abellugu nos requexos más alloñaos que los protexere d'estos seres espantibles. Hasta'l mesmu Sol escucaba y escucaba ensin atrevese casi a riscar nel finxu'l cielu.

Les Mentes Xurásiques papábenlo too coles sos grandes fauces vervenaes de dientes afilaos y llargos caniles: la llibertá, les llingües, la vida digna, l'amistá... Tolo ferial de los tiempos onde reinare la hermandá ente los humanos yera devorao polos monstruos ensin contemplaciones.

Namás qu'un grupu xente ensin escrúpulos andaba al rau de los xurásicos, señalando onde s'escondíen los demás y conformándose, a cambiu, coles migayes que los sos amos-yos aventaben con despreciu.

Un día, de sópitu, les Mentes Xurásiques colaron alluendi, a los confines de la tierra. Entós los humanos entamaron a salir de los sos escondites y a caleyar con munchu procuru per onde nunca nun s'atrevieren a facelo. Surdió entós una vieya lleenda que dicía que los grandes monstruos y la so tropiella d'humanos fieles perdiérense pa siempre enxamás devoraos pela borrina del tiempu. Fixeron entós un muséu pa enseñar a les nueves añaes d'humanos los horrores d'aquel pasáu espantible.

Pero yo vi buelgues fresques d'aquellos seres terroríficos. Hailes dayuri: nes viesques, nel sable de les playes, nos montes, nes aldees y ciudaes. Siguen ende marutaos. Les sos mentes espantibles texen grandes telarañes invisibles onde, adulces, atrapen tolos díes a milenta humanos. Non. Nun colaron. Camudaron. Amazcaráronse. Pero siguen ehí como siempre. Encamiéntovos tar sollertes. Tan acusbando...




miércoles, 15 de julio de 2009

N'Uviéu nun me caso y en Xixón póngolo en dulda...


Asina entama una canción popular asturiana. Y ye un aniciu afayadizu pa esta época onde l'ociu y los festexos guañen ayuri.


Ehí tenemos l'anunciu de los organizadores festexeros uvieínos que cuenten traer a la Pantoja a enllenar d'españolismu cañí, alpargateru y foriatu'l branu capitalín. Bates de cola, olés, troníu y épica taurina a fargataes. Que se note que tamos na capital d'Asturies, recóime.


Y tamién tenemos ende esi eventu incalificable de la Selmana Negra xixonesa. La ciudá "eterna rival" rivalizando tamién en fuxir de lo propio pa festexar un grupu d'amiguetes la mayor demostración d'amiguismu y clientelismu que pueda dase baxo la bandera de lo cutre y el llinguaxe tabernariu.


Y nun escaezamos les feries taurines. Que'l nuestru branu trainos los toros a enllenar col so sangre l'arena de les places. Si Teodoru Cuesta o Xovellanos llevantaren la cabeza...


Menos mal qu'inda queden perende chigrinos onde pasar una tarde soleyera a la solombra amugando'l gargüelu con sidra fresquino. Y hasta poder escuchar a dalgún parroquianu echar una si hai suerte. ¡Menos mal que lo nuestro inda bilta pese al desastrosu facer de los de siempre!.

viernes, 10 de julio de 2009

Un movimientu que nun piensa na victoria.

Abenayá nesti pergamín yá tratare esti tema. Daquella llamárelu tener "moral de velatoriu". Dalgo que considero un pilancu nel camín que nos lleva a algamar los nuestros oxetivos. Y que me paez que nunca nun lu consiguimos arreblagar.

Tenemos una capacidá de resistencia demostrada. Magar los abondos ataques que llevamos arrecostinando a lo llargo de bien d'años siguimos equí de pies y alendando. Y paezme que tamos en condiciones de prolongar esa resistencia por munchu tiempu más. Nesi sen, somos necios pa danos y tamos enfotaos no que defendemos.


Pero namás que tener capacida pa resistir nun basta pa llograr los oxetivos. Pa ello ye mester un saltu cuaitativu importante y perdifícil. Tener les ganes y el convencimientu de querer ganar. De valtar les dificultaes y de pasar de la defensiva a la ofensiva.


Y esto ye lo que me paez qu'enxamás tuvimos, nin tenemos anguaño, nin nortio nel finxu'l cielu que temos cerca de tener. Basta pa ello con echar una güeyada a los nuestros discursos. De poner la oreya no que se siente dayuri. El finxu alredor que xiren los plantegamientos foi y ye siempre'l memu: que nun hai nada que facer, que dalgún día esto va acabase, que namás que tamos ganándo-y tiempu a un pasamentu inevitable.


El movimientu por conservar la nuestra llingua y la nuestra identidá nació y espoxigó hata onde pudo ensin pensar nunca na victoria. Y cualquiera podría dicinos que cualquier actividá que s'entame ensin plantegase nin enfotase en ganar nun suel consiguir los sos oxetivos. La perogrullada de que pa ganar hai que querelo paez como si nos pasare desapercibida per delantre les narices.


Y mientres nun cambiemos el chip y sigamos asitiaos en discursos de simple resistencia endolcaos les más de les veces en llantos polo que fuimos y nunca más vamos volver a ser podremos siguir resistiendo de xuru por un tiempu inda considerable. Pero va ser una resistencia d'aguantar como podamos los emburriones del enemigu ensin casi nin atrevenos d'asomar la cabeza de les trincheres pa escucar siquiera les posibilidaes que tenemos d'avanzar un migayín.


sábado, 4 de julio de 2009

Dellos trazos d'un pequeñu esbozu nacional.

HISTORIA

Estudiu, difusión y reivindicación de la nuestra historia como manera d'afitar y espolletar una conciencia identitaria asturiana. L'alcordanza histórica ye un encontu fundamental pa la pervivencia d'un pueblu.

LLINGUA

Oficialidá de la llingua asturiana y utilización a tolos niveles por toles instituciones y alministraciones. Presencia en tolos niveles educativos. Utilización como mediu habitual y normal d'espresión en tolos medios de comunicacion. Recuperación del so emplegu nos llugares onde tuviere más escaecida.

ORGANIZACION POLÍTICO-SOCIAL

Recuperar y afitar la organización política del país adaptándola en tolo posible a la sociedá de güei en base a la institución tradicional del Conceyu Abiertu. Otramiente, adaptar tamién a la sociedá actual formes tradicionales de collaboración como l'Andecha. Recuperar y adptar en tolo posible acordies cola sociedá que vivimos de la convivencia ente l'ambitu priváu y el comunal de fonda tradición y frayada ente la privatización , d'un llau, ya'l pasu al ámbitu de l'alministración política nacional y estatal d'otru. En definitiva alitar les formes d'organización social, política y territorial (parroquies y conceyos) tradicionales del País Astur.

TERRITORIALIDÁ

Conocimientu del nuestru territoriu nacional incluyendo los territorios históricos arrampuñaos a lo llargo del tiempu. Desendolcar el trabayu afayadizu pa la restitución d'eses fasteres al nuestru terrtoriu respetando siempre la llibre voluntá de los sos habitantes como requistu y condición previos.

SOLIDARIDÁ

Andechar na construcción d'un sistema economicu solidariu que desanicie la esplotación d'unos ciudadanos por otros. Sestaferiar un camín que nos avere cada vegada más a la igualdá y a la xusticia. Afitamientu d'un sistema económicu, social y políticu que garantice una vida digna y una democracia real pa tolos ciudadanos asturianos.