La cultura del pan

Anque na actualidá nun tenga'l raigañu d'antiguamente, n'Asturies el cultivu de cereales panificables foi una xera per munchos sieglos. El trigu, el centén y la escanda semáronse na nuestra tierra y, de magar principios del sieglu diecisiete, añadióse'l maíz del que se conserva nel palaciu de Cancio en Tapia de Casariego l'arca en qu llegaron les semientes a nós.

Nes quintanes y caseríes la xente semaba, molía, amasaba y enfornaba'l pan. Ello fixo que s'usaren una serie d'arbíes como les mesories p'arrincar les espigues de la escanda, el vañu p'aventar, el baléu pa barrer l'eru o llimpiar el fornu, o los manales pa mayar, amás del molín de rabil pa dar la primer pasada a los granos d'escanda. Como mueble vinculáu a esta actividá tenemos la masera, onde s'amasaba la fariña y se ponía a formientar antes de metela al fornu, y onde se guardaben les pamestes. Como construcciones vinculaes a la cultura cerealística tenemos l'horru que, cola entrada del maíz, pudimos velos representaos coles riestres colgando de gabitos y corredores. Y los molinos d'agua, qu'amás de la so función foron fonte de cuentos, sucesos y cantares na nuestra cultura. Y como parte de la casa, el fornu que podía tar dientro la estancia del llar o amestáu pela parte de fuera.

La collecha del cereal dionos ámbitos de trabayu colectivu como les andeches, les mayaes o les esfoyaces onde, arriendes de trabayar, la xente tenía un ratiquín pa garrar daqué del convite de la garulla o pa espansionar con xuegos, cantares, cosadielles...

Conocemos el pan en forma de riche, de bollos de cuernos, de barra, de rosca, de trenzaos o de pamesta, y tamién na forma de bollos y boroñes preñaes, que nun hai que lo escaecer. Pero hai una figura, que se conserva principalmente pa la escanda y que ye da-y forma d'una cruz, unes vegaes más recta y otres más n'aspa. Pudiere ser una casualidá, pero tamién podemos fixanos na relación del pan colo sagrao dientro del sincretismu relixosu asturianu. Ehí tenemos el pan d'ánimes o mesmamente'l ramu que se lleva en procesión, bendizse y dempués faise una puya (semeya del post).

Dexo pal final d'esta esbilla sobre'l pan la relación ente ésti y la llingua asturiana. Porque tanto les arbíes como los llabores tienen una bayura espresiva nesti idioma. Al traviés d'él queda reflexáu perfectamente tol procesu dende la sema a la hora de ponelu na mesa pa comer. Y antes de roblar el post, pongo un poema qu'escribí hai unos años sobre esta relación llingua-pan. 

El Pan Que Se Fala

 El pan que se sema.
 El pan que na andecha s’amesoria.
 El pan que se muel y fai fariña,
 que s’amasa y formienta na masera.
 El pan que se tresna
 arroxando con carbayu’l fornu.
 El pan que s’ornia y ufierta nel ramu.
 El pan del llar y de los antiguos.
 El pan que se vive.
 El pan que se fala.
 Porque, ensin fala, nun  hai pan.