Aviones de papel

Alcuérdome cuando de guaẖes facíamos aviones de papel. Dempues, a vegaes, echábamos-yos aliendu na pica -ñunca supe mui bien pa qué- y tirábamoslos a volar. Dalgunos cayíen darréu picabaẍo. Pero otros calteníense nel aire, como en pelondines, y diben planiando hasta posase en suelu adulces. Estos caberos yeren, evidentemente, los que prestaben y esmerábamonos n'igualos pa qu'aguantaren nel aire.

Podía pintar tamién, esta vegada como daqué bastante raro qu'asocediere, que sintiéramos ruíu en cielu y entós mirábamos p'allarribón y veíamos pasar una avioneta o un elicópteru. Quedabamos entós ababoriaos mirando pa ellos, porque diba ser difícil observalos en bien de tiempu. Y, entrín y ñon pintaba otru avistamientu, bien que mos prestaba'l famosu madreñoẍiru de Pinín, qu'amás de volar tamien ñavegaba, recóime...

Pero los tiempos cambien una barbaridá. Nun sé yo si anguaño los rapacinos saben facer aviones de papel, envizcaos qu'anden con tanta pantalla y tantu meriñaque eléctricu. Pero actualmente ñon namás que se ven dacuando avionetes o elicópteros en cielu. De magar hai bien d'años punẍénonse de moda les exhibiciones d'aviación militar en dalgunos sitios. Yo tocóme una vegada una d'elles onde vivo y respigábeste con ella. El ruíu yera d'atorollar y cimblaben los cristales de la casa. Nun me cuacó gota la cosa, pa dicir la verdá. Y nun voi poneme a facer una espirica antimilitarista nin nada d'eso, ñon. Simplemente escurro que les ciudaes, villes y pueblos de nuestro nun son un sitiu afayadizu pa esos actos y más nada.

En resumíes cuentes, el reblagu que dimos nunes décades foi bien curiosu. D'aqueños ñeños que facíamos aviones de papel y veíamos mui de ralo en ralo sechá'l cielu a dalguna avioneta o elicópteru, pasemos a otros ñeños que puen estelase viendo demostraciones aeries espectaculares d'aviones de verdá, qu'hasta deẍen unes esteles de fumu encarnaes y marielles que nun adoctrinen nin nada d'eso, como sí lo faen los ñacionalistes periféricos cuando usen los collores representativos de los llugares de so.

Pero voi ser sinceru. Si me ponen a escoyer ente aquellos aviones de papel que tresnábamos nos mios tiempos de guaẖe y los espectáculos aerios a los que lleven a milenta rapacinos d'hoi, quédome colos tiempos de mio. Y ello, arriendes de que pueda deẍar llevame por sentimentalismos d'otres dómines, porque camiento qu'aquellos aviones de papel ayudábenmos a desendolcar dos cualidaes que, quiciabes, los reales de combate nun seyan pa competir con ellos: La Creatividá y La Imaẍinación. Escrites asina con mayúscules, como s'escriben los ñomes de les coses importantes y con reblanea.

                                                                                        

Marqués del Pelleyu

Somos la ẍente asturiano amigos del humor y de la ẍirigoncia. Pero ñon siempre acertamos cuando tamos pa la mano neso de la chancia y ello pue empatonamos en delles ocasiones. Cuantayá  contánonme l'anécdota que vien de siguío, que-y pasare a un conocíu miuyu, y que m'aseguranon, da papu sanu, que fore verdá. Asina que voi treslladávosla pa pone-y un migayín d'humor al archivu d'esta bitácora...

Ello ye qu'una vegada una pareẍa decideo dir cenar a un restaurante de munchu ringorrango de Ẍiẍón. Llamanon y atrocanon mesa. Vistiénonse colos paẍellos más elegantes que teníen y empobinanon p'allá.

Cuando taben yá sentaos a la mesa vieno a atendelos un camareru que, pola manera de falar, amosaba que yera foriatu. A la hora d'escoyé'l vinu, por aquello d'aẍeitar un ambiente afayadizu, diẍénon-y en broma que diben tomar un Marqués del Pelleyu. Pa la so sorpresa, el camareru nun gorgutó, dio la vuelta y marchó. Contanon entós que taben nun sitiu onde andar con graciosaes nun cuacaba migaya, cho.

El casu ye que pasaba'l tiempu y per ellí nun apaecía naide. Empecipianon entós a esmolecese pensando que quiciabes se pasaren de graciosos y que-y sentare mal al que los atendiere l'aquello del vinu. Taben con esto enguedeyaos cuando ven apaecer otra vuelta al camareru, contrariáu y afanosu que diriẍéndose a ellos va y diz-yos:

"Disculpen los señores, pero en nuestra bodega no hemos encontrado el vino que desean. Si son tan amables, escojan algún otro de los que les ofrecemos en la carta...". Pidienon entós otru, deẍánonse de bromes...y a cenar.

Afortunadamente, too quedó namás que nel asuntu del vinu. Porque si se-yos llega a ocurrir pidir pa cenar cordobeyu al fornu, gamusinos a la plancha o ñuños n'almíbare, la cosa pudría acabar en surrealismu de ñiveles estratosféricos...

                                                                          

Un paseín llangreanu (o turismu de cercaníes)

Tamos en branu. Época afayadiza pa empobinar per ende p'acullá a visitar sitios. Facé les maletes y viaẍar. Sano y prestoso pa desconectar y esfrutar, y recomendable, pero...

Suel asoceder que bien de veces desconocemos sitios que tán cerca d'onde vivimos. Y tamién suel asoceder qu'esos sitios tamién sirven pa espansionar, resulten prestosos de visitar, y ufiértenmos coses interesantes pa ver y sentir. Vamos entós hoi a rellatar un paseín cerquina casa, ensin salir del conceyu llangreanu.

La mañana ye soleyera y la temperatura agradable, ensin resultar demasiao chornosa. Salimos de La Felguera col envís de dar simplemente un paseín y enveredamos pal oeste, camín de Barros. Cruzamos el pueblu y enfilamos per una cuesta pindia. Empecipiamos a sintí l'aquello prestoso de caminar escoltaos por carbayos centenarios, castañales curioses, fresnos...Algamamos la parte cimera y podemos observar, d'un llau, el valle, y a un tiru piedra los muruecos d'un pozu mineru con una chimenea de ventilación. Del otru llau, montes verdes con praos y arboledes. Alagamamos ceo'l llugar de La Tabierna. Sorpréndenmos les cases conservaes mui curioses, dalgún ẍalé bien guapu, una fonte restaurada que da gloria vela...

Tenemos dos alternatives. Una siguir pela carretera a mano drecha y otra baẍar pa Riañu, a mano izquierda. Escoyemos esta cabera, pues la idea ye tornar llueu y ẍintar en casa. Carretera abaẍo aportamos al llugar de Viesques. Tengo alcordances d'él dende rapacetu, porque la mio familia materna tenía amistá, que yá venía de los antiguos, con una familia d'esti sitiu. Ellí recuerdo tener visto una vegada mayar mazanes nun duernu con mayos de madera, a l'antigua usanza. Pero yá nun recuerdo qué casa yera, nin cómo se llamaba aquella ẍente, asina que nun puedo entrugar, nin toi por molestar tampoco.

Son poques cases y ta de pies una panera bien guapa, pero con parte del techu y una esquina casi esbarrumbando, polo que col pasu los años la cosa pinta fea. Pal final de Viesques hai un llavaderín y una fonte. Atopo un vecín que llevaba una cachaba curiosa, mialma, y echamos una rocada. Esplícame que les piedres pa iguá les cases trayíenles d'una cantera d'allarribón. Enséñame l'abasón col que les tresportaben, averáu a un muru cabo la panera, ẍunciendo a él los gües. L'agua, antiguamente, teníen que lo trayer d'una fonte cercana con rodillos y calderos na cabeza. Diznos dalgunes rutes y pueblos que podemos visitar pela contorna, pero aperiaos de mochila, agua, bocadiellu y un palu, ñon como díbamos simplemente de paséu pa echar tiempu na mañana. Nel añu 1.969 l'Ayuntamientu fíẍo-yos el llavaderu y la fonte ellí mesmo nel llugar y ellí siguen hasta l'actualidá. Como en La Tabierna, les cases tán bien afechisques.

Siguimos baẍando y algamamos el camín que, al llau la carretera ẍeneral, permítenos dá la vuelta pa La Felguera. Tocaba agora dir pa casa a duchase, tirar pa una terraza a tomar daqué y dempués ẍintar.

Y equí pongo'l ramu a esta reseña d'un paseín llangreanu prestosu, cerquina casa, onde pues ver viesca, etnografía, vistes bien guapes, y tiempu pa charrar con dalgún vecín que te cuente coses del llugar. Porque arriendes del turismu de viaẍar lloñe y conocer sitios d'allalantrón, tamién hai otru, de cercaníes, que pue resultar, guapamente, afayadizu ya interesante, miániques.