Del autoodiu y cosmopaletismu asturianos.

Cuando nuna sociedá hai una parte importante de ẍente atarraquitao d'autoodiu, esa sociedá tien mui difícil afayase nel futuru.

Na sociedá asturiana apréciase cuantisimayá un componente bultable de tirria hacia lo propio. Al empar, esa parte de la sociedá qu'arreniega del bierzu y llar propios allampa por tolo procedente de fuera.

L'autoodiu y el  cosmopaletismu son dos cares de la mesma moneda. Una cara representa l'enfotu por valtá lo llariego. La otra, por sustituilo polo foriato.

Pero cuando esa enfermedá del autoodiu s'asitia nes instituciones y nos aruelos de poder, les consecuencies qu'algamen les sos actitúes agrávense inda más. Y tanto'l nuestru patrimoniu material, como l'inmaterial y llingüísticu cuerren un pelligru claru de desaniciu.

Y nun mos engañemos. Ensin autoestima y valoración de lo propio'l finẍu'l cielu del nuestru futuru va tar ñublu de contino. Basta con agüeyar pa cómo avancen otres sociedaes qu'aprecien lo suyo y cómo recula la nuestra.

Y son precisamente esos patrimonios que mencionaba enantes una herencia de tola ẍente asturiano d'hoi. Tresmitiénonmoslos los antiguos y tenemos el deber y la obligación de preservalos y tresmitilos nós a les ẍeneraciones vinientes. Un llabor difícil de tresnar na sociedá cambiante d'anguaño y qu'algama la categoría de casi utópica naquelles sociedaes que, como la nuestra, ta abirugada poles gravísimes enfermedaes del autoodiu y el cosmopaletismu.

Poro, el turullu que llame a aconceyar a la  parte más mentalizada de la nuestra sociedá na defensa del nuestru patrimoniu material ya inmaterial nun tien de deẍar de sonar darréu. Ye necesario tar siempre sollertes contra los ataques que'l nuestru llegáu cultural sufre de contino. Y combatí la pelona que cute a la nuesta sociedá asturiana actual col caltenimientu, recuperacion, difusión y  respetu d'esi llegáu qu'afortunadamente inda conservamos.                                           

                                                                         

                                                                             

De la cueva santuariu a la Capiella Sixtina

A lo llargo de miles d'años les civilizaciones paleolítiques decoranon l'interior de les cueves onde s'abellugaben con grabaos y pintures d'animales, antropomorfos y signos. A la lluz de les llinternes de cañamina aquelles figures cobraben vida ẍiringaes por ẍuegos de lluces y solombres. Yera la maẍa de la cueva santuariu, recintu afayadizu pal arte y lo telúrico p'aquelles civilizaciones.

Dando un galmiu nel tiempu atopamos, a la reblagueta de los sieglos XV y XVI, una de les obres maestres de la pintura. Trátase de la decoración de les paredes y la bóveda de la Capiella Sixtina del Vaticanu. La maẍa otra vuelta, al traviés de la reliẍosidá canalizada per aciu del arte pictóricu, convirteo esta capiella nun referente cultural y reliẍosu cimeru.

Tresllumbada la primer mitá del sieglu XIX remanez el descomanáu y ricu universu de les pintures de la cueva d'Altamira. A la hora de buscar un calificativu pa ilustrá la bayura artística de ẍacimientu recurréose -y asina nos llegó hasta hoi-  a calificar esta cueva como la Capiella Sixtina del arte rupestre. Una comparación atopadiza que ẍunce la cueva santuariu y abellugu d'arte cola capiella, tamién santuariu y abellugu d'arte, magar tean estremaes dambes per milenios d'historia de la evolución humana.

Un eẍemplu ilustrativu de la presencia del arte y de lo máẍico-reliẍoso como atributos de la humanidá al traviés de la enẍareyada de les civilizaciones y los milenios.

                                                                                        

L'Homo Idiotensis

Los arqueólogos que trabayaben nos sótanos d'aquel edificiu institucional, ẍusto debaẍo d'onde s'afayaba'l ñegociáu de cultura, nun daben creitu a lo que veíen colos sos güeyos, arremellaos como una lluna llena na nueche sele.

Tiempu dempués los análisis d'ADN confirmaben el descubrimientu. Una triba humana ñueva y antecesora del homo sapiens habitare naquelles tierres de Perende Pacullá nel paleolíticu inferior: el Homo Idiotensis.

Pero lo qu'ablucó a la comunidá científica internacional fuere la relación directa de parentescu ente l'idiotensis y el sapiens. Espectacular.

De sópitu too entamaba a encaẍar. Aquella decisión ridícula de pidi-yos a los que queríen ayuda pa iguar aquelles construcciones te techu veẍetal -teitos que-yos llamaben-, concretamente d'escoba, qu'apurrieren factures de los manoẍos compraos tenía raigaños fondos nel pasáu.

Dende'l puntu vista del homo sapiens nun tenía ẍacíu nengún esiẍir factura de lo que, cenciellamente, se coyía del monte y más nada. Pero dende la prespectiva del homo idiotensis sí, mialma, tenía tol sentíu y coherencia del mundu.

Y equí esporpolló otra teoría que foi balumbando cada vegada más. Nenyures en tol planeta Tierra atoparen un res de la cultura idiotense, nin escatafín dalu de la cadarma de la especie. De manera ablucante, casi máẍica, l'homo idiotensis yera una especie que namás se diera naquelles tierres escaecíes y escabarriaes de Perende Pacullá. Poro, tolo raro que per ellí pasaba concasaba y esplicábase guapamente: horros esbarrumbando, molinos esboroñando, pontes esfarrapando...la estroza cultural como aportación d'aquella castra d'homo a l'antropoloẍía y la cultura.

Nada de bifaces, buriles, raspadores...Ñon. La cultura idiotense nun se basaba n'escurrir erbíes pa evolucionar, sinón en tolo contrario, n'esmigayar tolo que a evolución recordare. El dir p'atrás y ñon p'alantre. La ñegación de la evolución: la contraevolución. En resultancia nun chocó gota que dende les cugurutes polítiques y culturales mundiales entainaren a facer una campaña d'análisis comparativos ente l'homo idiotensis y los habitantes modernos -supuestamente sapiens- d'aquel país de Perende Pacullá. Nun fuere a ser que los restos atopaos polos arqueólogos naquel edificiu y so aquel ñegociáu cultural ¡respondieren a una triba humana que sobreviviere, milagrosamente, dende'l paleolíticu inferior hasta hoi mesmo...!

                                                                        

Güe bípedu

Tener como práctica habitual tirar del carrín de la compra pue acarretar los sos problemes. Como me pasó a min al dir a renová'l carné d'identidá y rellenar la casilla de la profesión. La conversación foi, más o menos, d'esta manera:

-¿Profesión?.

-Güe bípedu.

-¿Güe bípedu?. Pero ¿qué coño es eso?.

-Pues tener como actividá principal diaria tirar del carrín de la compra.

-No diga usted sandeces. Dígame otra profesión o le pongo en la casilla "mangante vocacional" y despacho el tema.

-Pero ye que yo soi güe bípedu. La mio actividá principal ye tirar del carrín de la compra. Y puedo traye-y un bon puñáu de testigos de que lo soi.

Y d'esta traza trescurreo la conversación otru cachu más. El funcionariu encerriscáu na so postura y yo na miuya, ensin que nengún de los dos nos mostráremos dispuestos a danos nin movemos un res de les nuestres postures respectives.

Al final, punẍénonme nel carné "mangante vocacional". Pero ye falso dafechu. Soi güe bípedu, y anque nun me gusta presumir, da gloria veme tirar de carrín de la compra con gallardía, elegancia y dignidá. Cola cabeza bien alta y la satisfacción de saber que nel mio trabayu pocos hai que me puedan tusir.

Y repítolo: tengo un bon puñáu de testigos que m'avalen por si daquién anecia en ñegar los mios méritos llaborales, ¡recóime!.