Siendo un rapaz conocí una asturianada que na parte final contaba cómo unos municipales queríen llevar al cuartón a un paisanu por pasiar per Xixón con unos xatiquinos a los qu'acusaben de desempiedrar la carretera. Un cantar graciosu con un final que facía sonrir, pero qu'enxamás podía imaxinar que se trataba de toa una premonición.
Hai bien d'años na ciudá Xixonesa acabaron coles tradicionales sardineres que vendíen el pescáu al pie de la rula antigua, nel anguaño puertu deportivu. Pensé entós que, pese al discursu oficial de la midida, nel fondu tratábase de desaniciar un rasgu popular y típicu de la ciudá que molestaba pa dar una imaxe cosmopaleta y finolis d'ella.
Y tal paez qu'acertare. Años dempués, el puntu mira punxéronlu na sidra. Quiso prohibise echalo nes terraces de los bares porque fedía a les fines ñarres de la xente que se bañaba en colonia pa dar un golor futurista y modernu a la ciudá.
Agora vienen con una nueva truñonada. Esta vegada multaron a unos gaiteros con 200€ cadún por tocar en plenu día na cai. El motivu de la sanción ye que'l son de les gaites perturba'l descansu de los ciudadanos xixoneses.
Nel fondu de toes estes cuestiones alcuéntrase lo de siempre y yá denunciao unes cuantes vegaes nesta bitácora: el cosmopaletismu y l'autoodiu. Dos armentíos que cuando xuncen tiren per un carru qu'estrapaya ensin contemplaciones cualquier fechu cultural que tenga'l pecáu orixinal de ser asturianu.
Entrúgome yo qué sedrá lo siguiente. Si acasu prohibirán triar la ciudá calzaos con madreñes por perxudicar les baldoses de les aceres. Si multarán por llevar una montera picona o un pañuelu añudáu a la candasina por atentar escontra'l decoru nel vistir. O si sancionarán fuertemente a quien suelte un "ye" delantre d'una ventaniella del ayuntamientu por producir otitis al funcionariu de turnu.
¡Si'l Presi o'l Gaiteru Veriña llevantaren la cabeza!.
Los idiomes vivos son los que se falen. Un idioma que se fala y nun s'escribe ta vivu. Un idioma que s'escribe y nun se fala ta muertu. Un idioma que se fala y s'escribe ta na meyor situación posible.
L'asturianu anguaño escríbese, pero fálase cada vez menos. Esti procesu de tener cada vegada menos falantes entaína nos últimos años. Sitios onde hai unes xeneraciones los rapacinos falanben un asturianu zarrao o un amestao con bona presencia del asturianu, actualmente presenten xeneraciones de neños castellanu falantes.
Nel casu asturianu xorrez el númberu d'escritores -nun sé si correspondíu por un crecimientu de los llectores-, publíquense llibros, bitácores y diarios dixitales n'internet, anúnciense actividaes con cartelos n'asturianu...pero fálase cada vegada menos. De siguir asina'l procesu aportaríamos a la situación absurda de tener un idioma que s'escribe, pero que nun se fala. O seya, un idioma muertu onde, al final, tamién dexaría d'escribise.
Tampoco nun hai una correspondencia ente'l fechu d'escribir ya'l de falar. Tenemos académicos, escritores, profesores, reivindicadores del idioma que lu escriben, pero que nun lu falen, o sólo n'actos referíos al propiu idioma, o fáenlo tan mal que dan perceguera. Esto ta indicándonos que'l procesu de recuperación y normalización del mesmu acoxa y ta perviciáu.
En bien de casos la llingua falada déxase nun segundu planu poniendo l'enfotu na escritura y nel intentu de xeneralizala y espardela lo más posible ente la población. El movimientu en favor del idioma sofítase fundamentalmente no escrito, non no oral. Y empobina irremediable al fracasu. Porque la fala ye lo que da vida a cualquier idioma y lo que, como dixi al principiu, estrema les llingües vives de les muertes.
Faise pernecesariu un xiru radical a la situación. Los poderes públicos tienen qu'emplegar el dineru de toos en campañes de concienciación ente la xente asturiano que l'animen a nun cambiar de rexistru llingüísticu a la primer ocasión, a animar a los padres a tresmiti-yos lo que saben a los fíos (la imaxe de padres asturianu falantes que-yos falen a los neños en castellano ye de lo más corriente de ver güei). Tamién a potenciar los usos del idioma nos medios audiovisuales, nel mundu dixital, etc.
Y predicar col exemplu. Esa xente qu'escribe n'asturianu o que t'anuncia actividaes nesti idioma tien qu'usalu tamién cuando se dirixe a un auditoriu, o cuando-yos ponen un micrófonu o una cámara de televisión delantre, non sólo ente ello o n'ámbitos coloquiales. Escuchar a xente que reivindica l'idioma o que lu usa per escritu ponese a falar en castellanu cuando lo faen en público ye una amuesa inequívoca de lo rematadamente mal que va esti procesu. Faigamos la comparanza colos comportamientos d'otres comunidaes con llingües propies coles que compartimos Estáu y reconozamos la nuestra singularidá negativa nel nuestru camín llingüísticu.
Y al llegar equí voi romper una llanza en favor del amestáu, blancu de los carrobexazos de la xente escribiente, y yá non tan falante, bastante davezu. Actualmente hai una parte importante de la nuestra población que lo usa. Tien hasta ciertu prestixu en dellos conceyos onde hasta la xente de ringorrangu lu usa como les clases más populares. Hai un ciertu consensu social nesi usu que nun s'estigmatiza tanto como sí se fai col asturianu dafechu. Si conectáremos con esa xente y fuéremos a llograr que nun cambiaren de rexistru llingüísticu y que siguieren tresmitiéndolu a les xeneraciones nueves tendríamos bastante avanzao. Porque esi amestáu va castellanizándose cada vez más hasta acabar en castellanu a seques. Hai que consiguir el camín inversu: afitar l'amestáu que se conoz y empobinar pal asturianu dafechu en vez de pal castellanu. Esi ye ún de los retos y nun me paez menor. Animar a quien nun seya a falar n'asturianu afechiscu que, polo menos, use l'amestáu que conoz. Too menos el cambiu de rexistru p'hacia lo castellano.
Potenciación de la llingua falada, concienciación de los falantes d'asturianu y amestáu de que nun tienen por qué tratar d'espresase en castellanu a la primer ocasión que salgan d'ámbitos coloquiales, difusión de la llingua falada a tolos niveles, utilización en públicu too darréu por aquelles persones que lu escriben y reivindiquen. Y, por supuesto, siguir espardiendo la escritura del idioma, que dambes coses son comlplementaries. Pero'l fechu fundamental y vital de la fala tenémoslu arrequexáu, a la hora la verdá, nun segundu planu. Y perhí nun vamos a nenguna parte.
"Dios y el cuchu puen munchu, pero sobre too'l cuchu". D'esta manera contundente nos encamienta un refrán asturianu qu'afita hasta qué puntu'l cuchu yera perimportante na nuestra sociedá rural tradicional. Una sociedá que tenía los sos vezos y modos de vida. Y cuando de la villa díbamos pa ella teníamos qu'adaptanos a esos vezos y a esos modos, porque los foriatos yéremos nós.
Pero, ¡ca!, eso yera notros tiempos. Too cambia y la nuestra sociedá entaína nos cambios a la velocidá del refocilu. Agora hai xente de la villa que-y presta asitiase nes zones rurales. Unes vegaes dafechu y otres pa esfrutar fines de selmana o periodos de vacaciones. Y ente esta xente hai de too. Unos saben de qué va'l tema del campu, pero otros son tán desconocedores d'ello que choquen de narices col nuevu entornu onde s'asitien.
Y nesti casu caberu vien el xaréu. Xorrecen denuncies porque'l caballu o la vaca dexó delantre casa los cagayones y moñiques correspondientes. Quiciabes esperando que'l paisanu que va llindiar lleve una bolsa como la de los perros y lo retire nel intre. Tamién molesten los gallos, maleducaos ellos que se ponen a cantar a les tantes de la mañana. Los perros lladren cuando-yos da pola gana...
Ya'l cuchu fiede pa les ñarres villandiegues. Asina que yá hai dalgún alcalde per ende que quier eliminar les piles de cuchu tamién, porque puen espantar col so arrecender a los visitantes domingueros que vienen a dar una revolada pel pueblu. O molestar a los nuevos vecinos avezaos al golor de la colonia, los escapes de los coches, o les mexaes nuna esquina, pero non al cuchu.
Y vamos dexanos de pascaxaes. Pela aldea cuando se trabaya ándase en madreñes, catiusques o botes. Siempre hai peligru de rozase con dalgún escayu del bardial o atopase con un animal a la vuelta de la caleya. Porque l'aldea ye eso, un núcliu de población estremáu a la villa y la ciudá.
Lo que nun se pue pretender ye que na zona rural aguante'l ganáu les ganes de cagar, los gallos canten cuando l'amu-yos lo diga y güela a perfume. Tampoco nun se pue esperar nun manchar los zapatos que rescamplen col serbus o que la chaqueta nun garre nin un llixu de porquería. Pero esi ye'l camín pel qu'emponina'l nuestru campu. Ser una zona residencial qu'ande al rau de la villa. Y, claro, lo propio del pueblu estorba. Asina que la xuntanza de repunantes urbanites y cosmopaletos llariegos va avanzando p'arrequexar lo cada vez menos propio que nos queda nes aldees y pueblos de les nuestres zones rurales. Un despropósitu más a añadir a la llarguísima riestra d'ellos que yá llevamos a recostines nesti país que paez que tien la cigua.
En fin, que los tiempos cambien, mialma, y aquel cuchu que tanto podía antaño güei yá nun pinta nada. Hasta'l puntu de qu'hai que lo facer desapaecer de la vista y l'olfatu de los finos y cosmopaletos de turnu. De traca.
El monte en Mayu entama a esconsonar. Echen fueya los árboles, xorrez el felechu y los carreros anúbrense de morgazu y escayos dificultando caminar. Un quiñón de los antiguos conserváu en casa ye la información documental del sitiu pa onde empobino: el monte Pataleh.os.
Nel requexu d'esta viesca que fuere poblada por castañales y carballos y que la última quema dexó medio taramingando pue ún somorguiase tovía na natura. Tres castañales vieyes sobrevivieron pa la zona intermedia más allugada al norte. Una d'elles ta casi toa cubierta por una enredadera. Otra, la más cercana al camín, empecipia a biltar. Les castañes que da pela seronda son espectaculares y nun desaxero migaya. Más p'arriba, la más maxestuosa y vieya, ta echando brotos tamién. De los árboles que planté esti iviernu, nun requexín el texu fema dexa ver los brotos verdes. De les dos fayes, una echa yá fueyiquines, y la mayor, tovía tarrez salir del reposu ivernal. El carrasquín ta como chamuscáu pero vivu. El lloréu presenta una rama ensin fueyes y la otra con elles. La semiente d'arfueyu en dalgunos tueros ta guañando: unos filos verdes qu'acaben como en ventosa finquense nos árboles. Falta saber si cuando algamen la cazumbre van afayase nellos y espolletar o van acabar secando.
Pa la mano d'abaxo ta la vaguada. Nun paez sitiu afayadizu pa que crezan los árboles y fáenlo perpocos. Les cabres que soltó un paisanu pel iviernu esmorgaron felechu y escayos y esto fai que tea más villandiega la fondigonada. Destaca equí un caborniu chamuscáu d'una castañal. D'un raigón guañó una rama va años qu'hoi ye otra castañal nueva. Observando les sos fueyes tal paez que ta amalada por dalgún andanciu, pero ella tira p'alantre. Quiciabes a la vuelta de pocos años echará flores y oricios pa dar la so collecha na seronda.
Hai raitanes que van blincanco a pocos metros onde tas, guardando esa distancia prudencial que te dexa acercate, pero non algamalos. Recuérdenme nel mundu de los páxaros a los gatos. Siempre cerca, pero roceanos al afalagu. Tamién se siente'l riquirraque de los picutorneros furando los tueros. D'animales domésticos, vaques roxes dexen sentir el tinglar de les esquiles y, a lo lloñe, lladren perros.
El camín va cubriéndose poles rames baxeres, los felechos y la yerba, dando la impresión de que pal branu va ser perabegoso aportar a estos llugares, que van quedar aisllaos pola vexetación hasta la seronda. Taramiello ente si dexar de xubir a esti rincón del monte hasta en pasando'l branu o si intentar otra incursión allá pal mes de Xunu. Ver veremos.
Cuando m'afayo solu no bisiego y metanos l'arboleda yá m'asocedió que me venga al maxín la imaxe d'una calavera de tolosantos. El camín allumáu de los antiguos. El dir a la gueta coles madreñes puestes. Les castañes cocíes na cocina de lleña. L'amagüestu. L'alcordanza. Lo vivío notros tiempos qu'inda anguaño alita, mancorniao y en mayor o menor midida tresformao. Los raigaños.
"Marchó Pachín pa la siega/y pel camín alcordóse". ¿Marchar?. ¿Quedar?. ¿Dexá'l pasáu pa prau o afitase na alcordanza y tirar p'alantre a gates si fai falta?.
Va tiempu publicaben los medios de comunicación la noticia de qu'Asturies yera la comunidá autónoma onde la xente taba menos dispuesto a trabayar por cuenta propia y más inclinao a facelo na alministración pública. Escurro qu'ello pueda debese al gran pesu que'l sector públicu tuvo -y enagora conserva daqué- na economía asturiana y tamién al avieyamientu d'una población onde les prexubilaciones y xubilaciones tienen un pesu bultable na nuestra sociedá.
La poca presencia de cultura emprendedora crea otres zunes cuando s'axunta a una baxa autoestima como colectividá y a pensar que lo fecho fuera tien de ser, por esi simple fechu, meyor que lo de casa. Ye perfácil de comprobar lo poco que se valora lo autóctono. Y tamién lo mal qu'andamos de markenting a la hora de dar a conocer dientro y fuera los productos del país.
Y el tema ye que nun ye too ermo lo que s'observa ente nós. Nun ser la mapa de les iniciatives ye una cosa y nun tener nenguna, otra. Sedría fato inorar qu'hai xente moviéndose en diverses estayes económiques. Arriendes de la sidra, espoxiga la viticultura, la cerveza artesano, trata de recuperase y de potenciar la escanda, los embutíos, los quesos, el cultivu d'ostres...too ello por poner un garrapiellu d'exemplos vinculaos cola alimentación y la bebida.
Pero ¿valoramos lo que se vien faciendo en casa?. ¿Sabemos promocionar y vender lo que facemos equí?. Como dixi enantes, yo creo qu'acoxamos en dambos casos. Tarrezo trayer otra vuelta, pa exmplificar, el tema del cachopu, pero vien como aniellu al deu. Esti platu de la nuestra gastronomía consiguió trespasar les nuestres fronteres y dase a conocer per tol Estáu. En cualquier otra comunidá rinflaríen de contentu, pero equí resulta mui corriente comprobar cómo hai xente que lu pon pingando. Tal paez qu'hai ente nosotros un regustu morbosu por poner palos nes ruedes de tolo que rueda de manera chusca. Otru exemplu tenémoslu colos vinos asturianos. Tovía hoi, magar l'esporpolle evidente del sector y del cada día mayor reconocimientu y premios internacionales algamaos, sigue habiendo bien de xente asturiano qu'afirma que ye pistraca, caldos de pocu valor y rasposos. El guiase polos prexuicios y la baxa autovaloración son la cuna d'estos comportamientos.
Cuéntennos que'l mercáu de la sidra, fuera de les llendes estatales, ta siendo ocupáu pola producción vasco. Hasta colen pa esta comunidá xoyes etnográfiques como son llagares centenarios asturianos. ¿Culpa sólo del desdexamientu más qu'evidente de la nuestra alministración o hai daqué más?. Lo asturiano conozse poco y mal fuera de la nuestra tierra, pero cuando se dediquen recursos públicos pa promocionar lo foriato como, por exemplu, inundando los nuestros conceyos con feries d'Abril, difícilmente vamos vende-y a daquién lo fecho en casa.
Fáltanos afondar más na capacidá d'iniciativa, tamos a años lluz d'autovaloranos empozaos como tamos nel más destructivu autoodiu, y vendémonos mui mal nel esterior. Quiciabes muncha xente siga pensando que nun fai falta nada de too ello, porque va apaecer papá Estáu y va iguanos la situación económica creando equí puestos de trabayu a embute. Pero non, eso nun va asoceder. Y si hai xente que sí lo piensa -que miániques que lo hai- entós igual tenemos qu'añadir otru elementu gafu pa cola nuestra economía: l'enfotu por vivir nuna nube aisllaos de la cruda realidá. Pero esi yá ye otru tema. Y bien gordu, mialma.
Siendo un rapaz conocí una asturianada que na parte final contaba cómo unos municipales queríen llevar al cuartón a un paisanu por pasiar per Xixón con unos xatiquinos a los qu'acusaben de desempiedrar la carretera. Un cantar graciosu con un final que facía sonrir, pero qu'enxamás podía imaxinar que se trataba de toa una premonición.
