La sidra de pera y lo de siempre

"Yera de peral/yera de peral la sidra/yera de peral/y por eso la botella cuesta un rial".

Asina diz la lletra d'un cantarín asturianu qu'avecen a echalu a manera d'estribillu la xente de l'asturianada. Afita un fechu conocíu por quien tea averáu a la cultura sidrera asturiana. Arriendes de la mazana, fruta principal de la nuestra sidra, tamién s'usaba dacuando la pera pa tresnar esta bebida, por exemplu cuando la collecha de los pumares yera escasa y había qu'echar mano de les perales pa completala.

El casu ye que va unos años un llagar asturianu, bien conocíu pola so llabor sidrera (Viuda d'Angelón), escurrió sacar al mercáu una sidra de pera usando fruta sólo asturiana. Nun ye d'echar como la otra y tien pinta asemeyada al albariñu blanco. Competencia pa cola sidra nenguna, simplemente una innovación pa ofrecer al mercáu arrecoyendo'l vezu d'usar la pera pa pisar. Paez ser que cayó bien y tuvo dalguna reconocencia fuera de les nuestres llendes. Pero...

Entró entós en xuegu lo de siempre. El cainismu y les zunes, d'un llau, y los pilancos alministrativos qu'atopen los que quieren entamar daqué n'Asturies. Como la normativa, mal iguada, recueye sólo cola denominación de sidra la fecha con mazana, daquién punxo la correspondiente denuncia. De siguío entró la conseyería de turnu del gobiernín en danza y prohibieron la comercialización del productu, siguiendo con una perllarga costume de poner torgues a tolo autóctono por parte de les alministraciones públiques de nueso. Y eso que la etiqueta dexa bien encamentao que se trata de sidra de pera, evitando asina que nengún cliente s'empixe.

Too ello ye más de lo mesmo de lo que siempre sucede ente nós. Entamar daqué n'Asturies y llograr qu'espoxigue ye casi un milagru. Les zunes enseguida apaecen pa valtalo. Agora sí, el primer foriatu que llega a vendenos gafes de gaxapu triunfa y empicorótiase como a un dios amiyáu de les estrelles.

Tal paez que'l llagar afectáu nun tien intención de tirar p'alantre col proyectu. Yo camiento que nun debieren dase y tendríen qu'escurrir dalguna otra denominación pa tirar p'alantre. Per equí vamos siguir llamándolo sidra de pera como siempre se dixo. Pero esi tema nun me finca a min, evidentemente.

Total qu'apocayá entamábenla escontra'l cachopu. Agora tóca-y a la sidra de pera. A ver qué va ser lo siguiente, que de xuro que la cadena nun acaba equí. Lo de siempre sigue imponiendo la so llei implacable sobre cualquier intentu de sestaferiar caminos económicos, culturales, o del tipu que seya nel nuestru mancorniáu país asturianu. Ye lo qu'hai.

                                                                                

                                                                       

Cayendo en barrena

Asturies ambura. Cada vez qu'hai una temporada ensin lluvia entamen a espurrise los incendios pel nuestru territoriu. Tal paez que tamos ante la cume del autoodiu. Cansaos de frayar patrimoniu o idioma vamos carganos físicamente al país, quemando los montes y llogrando asina pasar d'un somantu verde a un ermu chamuscáu.

Un símbolu del nuestru pasáu lleva camín d'esbarrumbar y sumise comíu pola maleza. Trátase de la torre de Sotu d'Ayer, sitiu onde naciera la reina asturiana Urraca, personaxe históricu que caló na conciencia popular. Gobernado la nuestra tierra a títulu de reina llegó a protagonizar un intentu de secesión y los sos restos reposen en Palencia.

Espárdense les feries d'Abril sofitaes con dineru públicu. Esi dineru que nun hai pa iguar el nuestru patrimoniu material, que nun apaez p'apoyar actividaes relacionaes cola nuestra cultura, sí asoma cuando de lo que se trata ye d'entamar ente nós eses moxigangues folclorizantes -na peor acepción del términu- d'una cultura totalmente respetable como l'andaluza.

Véndesenos dende les instancies del poder políticu asturianu que vivimos nun paraísu natural. Pero esto ye cada vegada más una ximuestra. Avanzamos a reblagos p'hacia un paraísu chamuscáu, una naturaleza cada vuelta peor tratada, una cultura cada día más frayada metanos una aculturación galopante, un idioma que recula ensin pausa y una sociedá desarticulada que nun ye a salir del pozu de los complexos d'inferioridá y l'autoodiu.

Siguimos cayendo en barrena.

                                                                

El nuestru corriverás

Siempre sentí de rapacín aquello de que me diben trayer un corriverás. Pero nunca fui pa velu, porque enxamás aportaba.

Davezu venía xuníu a un datu. Tenía unos cascabelinos atrás. Tamién dicíen qu'andaba p'alantre y p'atrás. Entós la mio imaxinación esnalaba tratando de da-y forma a aquel oxetu que naide describía cómo yera en realidá y tamién escurriendo ónde podría atopase.

Al dir espolletando pescancié qu'aquello yera un cuentu, una engañifa que nun esistía. Asina que dexé d'enfotame n'atopalu dalguna vez.

Pero ello ye qu'un día, nun va tanto, camudé d'idea. Camenté que'l corriveras podía esistir daveres y entróme'l pruyiciu de dir buscalu yo mesmu, yá que yera la única manera afayadiza de dar con él.

Púnxime entós a imaxinar ónde podía alcontrase y qué forma tendría. Si taría cerca casa escondíu como una ayalga, o si habría qu'empobinar acullá perlloñe a buscalu a dalgún requexu alloñáu de dalgún continente.

Y foi entós, somorguiáu nestos pensamientos, cuando miániques que di con él. Sí. Atopé'l corriverás dempués de munchos años. En realidá tuviérelu siempre comigo.

Porque'l corriverás forma parte de la nuestra imaxinación. La capacidá de dibuxar na mente coses que nun tienes delantre. Y la forma que tien ye aquella que cadún seya quien a dibuxar. Esi ye. El ser quien a esnalar a los confines del mundu ensin falta de movete d'au tas, de texer histories, de pensar qu'hai daqué más dientro de nós a parte d'adaptanos amomiaos a los aconteceres del día a día apalpuñable.

Poro, anímovos a que vosotros tamién busquéis el vuestru corriverás. De xuro que lu vais atopar, siempre que seyáis quien a suañar, a imaxinar y enfotavos por algamar, viaxando en pelondines, otros mundos que naide vos pueda arrampuñar.

Porque imaxinar otres realidaes y otros mundos ye un requisitu imprescindible pa poder daqué día iguar esa realidá na que vivís, pa cambiar  esi mundu nel que bien de vegaes vais al aldu, pa esmucivos d'esa rutina cargante que tantes vegaes vos da perceguera.

Pues ¡avanti!, como dicen los pixuetos.

                                                                     

País o endogamia estéril. Ehí ta la escoyeta.

De magar l'añu 722 pasaron abondos sucesos y xeneraciones. Asturies nació col Reinu d'Asturies y la  xente asturiano tamién. Lo demás, caxigalines de pazguatos inorantes. Pero les naciones como les persones ñacen y muerren. Y a la ñación que fixere galanes nel sieglu VIII tóquen-y nestes dómines campanes de difuntos. Esbarrumba pali que pali nun procesu imparable lo que foi país, xente construyendo país y camín de futuru sestaferiáu a comuña.

Cuando nun se tienen les idees clares el mangaráu conceptual fartuca a los descabarriaos y esllúmalos con futuros posibles que son imposibles. El tracamundiu ye descomanáu. Lo nacional sustitúise polo endogámico. A la nobleza de l'altitú de mires apodérala la xermandía empicorotiada por quien afalaga los egos ayenos con milenta "gústame" nuna rede social. N'Asturies sustituyóse cuantayá la visión de país pola perronera endogamia narcisista y folcloricista. Pol cainismu. Pol sectarismu. Pol porgüeyu. Semar la inorancia viña bien. Pa quien desconoz otru discursu alternativu, la espirica del endogámicu cainita fracasáu suéna-y a turullos melgueros tocaos por dioses arteros qu'empobinen a una victoria épica.

Esta ye l'alternativa que tenemos hoi nesti país asturianu. D'un llau'l llabor constante destructivu de quien lu quier desaniciar pa convertilu nun balcón afayadizu pa que la meseta se mire a la mar. D'otru llau, una güestia fracasada, endogámica, cainita y que se mueve según manden los designios de los sos respectivos embeligros que pasa por ser una triba de grandes y abnegaos patriotes defensores de les esencies nacionales asturianes. Ehí ta la gran mentira. Ehí ta la gran traición. Ehí ta la quintacolumna de zapadores de los enemigos del país. Los patriotes por interés que son los antipatriotes.

Pero tamién ehí ta la otra escoyeta, la de les mentes independientes y crítiques y de los espíritus llibres. Sumase a la güestia d'empapirotiaos y mansos acríticos o romper con ella y buscar caminos nuevos y vidables. Pero anguaño nesta vieya y frayada nación eses mentes y esos espíritus críticos y llibres...¿Hailos?. ¿Úlos?.

                                                            

El cachopu o la desgracia de ser de provincies

Cachopu ye una pallabra asturiana hermana de caborniu, caboxu, cazoyu o cuévanu ente otres. Con ella faise referencia a un tueru vieyu d'un árbol, güecu y secu, anque nesti últimu casu pue tar tamién vivu.

Tamién ye una pallabra que s'usa pa referise a un platu tradicional asturianu que consiste, na manera más clásica, en dos tayaes de xata rellenes de quesu y xamón, empanaes en güevu y pan rayao y tostaes nuna sartén. Trátase d'un platu que yá se conocía n'Asturies nos anicios del sieglu XX y onde s'aprovechaba les raxes de carne qu'escomenzaben a esturniase y perdese pa rellenales con otros productos qu'había per casa y empanales llogrando asina una mayor prestancia al paladar.

La entrada del cachopu nes cartes de la nuestra hostelería débese al restaurante uvieín Pelayo, que pelos años cuarenta del sieglu pasáu entamó a ufiertalu a los clientes, siguiendo una receta de tresmisión familiar. De magar entós esi productu gastronómicu de nuestro entamó un espoxigue nos fogones de los bares y restaurantes asturianos hasta ser perconocíu polos comensales de los mesmos.

El por qué del nome ye cuestión que namás que podemos encetar de manera especulativa, pues nun hai datos que nos digan quién bautizó esta comida asina nin por qué. Pue debese a l'analoxía de rellenar el güecu de dos filetes de xata, como güecu tien un árobol cachopu. Pue ser pola semeyanza esterna cola madera d'esi árbol, o pue ser porque la carne que diba camín d'apodrentar recordaba a la madera de los árboles secos que tamién apodrentaba.
                                                                               
Pero anguaño'l cachopu tuvo un emburrión pa ser más conocíu inda por culpa de la polémica entamada pol cocineru Ferran Adrià que truñó contra él comparándolu con una simple croqueta. A esti cocineru sumáronse-y dalgún otru y tamién dalgún gastrónomu. Los argumentos usaos pa puñar contra'l nuestru platu tradicional nun los voi reproducir nin retrucar porque nun son más qu'una enfilandrada de mazcayaes.

Cuando surdió esti alderique yo fíxime una entruga que m'empobinó a pescanciar les razones fonderes del mesmu. La pregunta foi la siguiente: si'l cachopu fore un platu vascu, catalán o madrilanu, los detractores d'él ¿atreveríense a turrialu o dexaríenlo tar?. Y la rempuesta clara y rápida que me di foi que nesi casu nun gorgutiaríen. Y ehí decatéme que so l'apariencia d'un debate gastronómicu lo qu'hai en realidá ye un tema políticu. Si, políticu.

Poque ello ye qu'esti reinu onde nos asitiamos ta dixebráu n'autonomíes. Y dientro d'elles hailes de primera, de segunda y de tercera. Y resulta tamién que l'asturiana va nel furgón de cola por méritos nuestros y ganao a pulsu. Entós ¿cómo xente representante de l'alta cocina de les autonomíes de primera y los sos llambeculos d'equí diben consentir qu'un platu popular d'una provinciuca de tercera pudiere facese famosu en tol Estáu?. ¡Ca!. ¡Eso enxamás!. Y lo demás yá vien rodao. Porque, miániques, nesti reinu ser de provincies págase caro, y más de provincies que l'Asturies actual poco hai ónde lo atopar.

Claro que la xugada salió-yos rana. La xente asturiano zarró files y enfotóse na defensa del so platu tradicional ensin comulgar coles mueles de molín que la foriatada gastronómica y los sos compinches autóctonos-y queríen facer tragar. Les ufiertes de cachopu multiplicáronse perdayures. Tables d'ellos, cachopos descomanaos pa compartir, recetes pa facer en casa, oferta de varios tipos de rellenos nes carniceríes, concursos dientro y fuera d'Asturies...tou un empicorotiamientu del nuestru platu onde dalgunos pensaben que diben apostalgalu.

Y asina lleguemos a hoi. El cachopu goza d'una salú envidiable, con una gran demanda y una abundante ufierta. Convertíu a güeyos de propios y estraños nun platu embaxador de la gastronomía asturiana xunto a otra bayura d'ellos -la fabada por exemplu- que yá lo yeren. Y eso ye una bona noticia. Que nos conozan fuera de les nuestres fronteres pol nuestru bon facer, nesti casu gastronómicu y que los de casa y los foriatos podamos disfrutar d'ello. Tamos entós de norabona.