jueves, 24 de septiembre de 2015

Cantando a la gaita

Los cancios individuales a la gaita tienen munchu arraigu y tradición ente nós de los tiempos. La nuestra tonada o asturianada ye la manera en que davezu escuchamos estos cantares  acompañaos polos sones del gaiteru. Dientro d'esti tipu de cancios camiento que ye de lo más desarrollao y melismático que podemos sentir dayures, lo que la fai una manifestación musical perimportante y única. Videos del nuestru cantar a la gaita hai a embute y bien bonos, asina que voi poner una voz moza, Lorena Corripio, acompañada pol gaiteru Vicente Prado "El Pravianu".





Pero siendo la gaita un instrumentu espardíu per bien de pueblos europeos y tamién fuera d'esti continente, podemos atopar cantares a la gaita notros llugares. Y como pienso que nun hai que s'encerriscar no propio namás y que ye bien importante conocer otres manifestaciones culturales de voz y gaita d'otros sitios,  voi poner de siguío dos exemplos.

El primeru ye de los cancios  italianos a la gaita qu'ellí conocen como zampogna. Pertenez a un fragmentu d'una grabación más llarga enforma. Un cantar qu'entama pelo alto y tien dempués una baxada. Ye un cantu más cenciellu y menos adornáu o melismáticu que la nuestra asturianada. Y con una posición de la mano na mexella'l cantador como echando voz asemeyada a la qu'apaez nel santu d'esti post, el cuadru "La Tonada" de Manuel Medina Díaz.





L'otru videu de cantu a la gaita ye'l qu'añado pa dir poniéndo-y el ramu a esta entrada. Nesti casu trátase del gaiteru eslovacu Juraj Dufek, nuna actuación na cai realizada n'Avilés. Nesta ocasión atopamos una manera d'interpretar el cantar que nos ye bien familiar. Ye'l propiu gaiteru'l que s'acompaña col instrumentu mentes interpreta él mesmu'l canciu. Una manera de cantar que tamién podemos adicar dacuando nos nuestros cantadores de tonada anguaño y que fixere famosa'l míticu Gaiteru Lliberdón.





Un exemplu de la nuestra tonada y otros dos exemplos más pañaos d'otres dos cultures qu'usen una manera de cantar que podemos atopar en sitios tan distantes como Asturies, Italia o Eslovaquia: los cancios individuales a la gaita. Y que cuento que nos ilustren de manera afayadiza sobre la riqueza de la música tradicional y de los llazos que la xunen dayures, plasmada en toa una bayura de manifestaciones llocales.

                                   

jueves, 17 de septiembre de 2015

Sin tabacu

Aquellos yeren otros tiempos, hom. La mocedá xubíamos a les brañes y mayaos a curiar el ganáu. Catábamoslo na cuerna y poníamos la lleche a refrescar nuna llábana de la cabaña. Dempués baxábamoslo al pueblu nel vexigu. 

Dacuando alcontrábeste solu per dalgún requexu del mayáu col palu y el mastín por si aprucía'l llobu o dalguna alimaña. Entreteníeste como se t'ocurriera. Iguando zamploñes, tallando daqué cola navaya, acuriosando coses... 

A vegaes podía pintar que tropezares con una rapaza qu'andaba tamién per ellí llendando'l ganáu como tu. Poníeste entós a echar una rocada con ella. Y el casu ye que podía ocurrir que nos gustásemos. Sentíes rebusquinos n'estómagu y entrábate'l rixu...

Si a ella-y cuacaba l'aquello tamién, podíamos acabar amatagaos, yá sabes...faciéndolo. Entós echabes un polvín y sacabes la petaca pa lliar un pitín. Si tovía nun afloxaba la calentura, pues echabes otru polvín y otru pitín. Y como la tarde provecía, pues otra vez a ello y otru pitín...

Y total, que cuando te queríes dar cuenta...¡quedabes ensin tabacu!.

jueves, 10 de septiembre de 2015

L'otru país.

Hai un país oficial n'Asturies. Cosmopaletu o autóctonu. En castellanu o bable. Primen cosmopaletismu y castellanu, pero tien les sos pingarates de tipismu culturales y llingüístiques. Ye'l país que puxa por salir na foto, trescender y algamar sonadía a cambiu de lo que cuadre.

Pero hai otru país arriendes del anterior. Xente qu'inda conserva tradiciones porque sí, porque-yos peta y porque-yos da pola gana. Y que falen asturianu porque ye como saben facelo y ensin buscar más nada. Esti otru país vive tapecíu de los circuitos oficiales, alita a la so manera. Conserva'l vieyu molín o teita la cabana, tiza'l llar o arroxa'l fornu, sema'l pan de sucu o tresna'l quesu na bota, conoz cantares y romances vieyos, xunce la pareya pola prestancia de facelo y conserva enagora bien de trazos d'una cultura ancestral.

Ye esti caberu'l país fiable. La fonte au tien de dir el caminante a la busca de les sos raíces afogaes pol uniformismu y desaniciu urbanites. Nel so somantu afáyase l'alcordanza viva de lo astur y de los ancestros. 

Esa xermandía de xente anónimo que vive una cultura y un idioma heredaos, que fai les coses porque les deprendieron de rapacinos y quieren siguir faciéndoles porque-yos peta y tira, magar nun-yos apurra porgüeyu dalgún o, si acasu, una simple mampurra p'ayudar nel vivir diariu, son el sofitu d'esi otru país qu'alienda anguaño pese a la xabaz aculturación qu'entaina y al descomanáu narcisismu de patriotes interesosos y de foínos que tolo xuncen a la politiquería más perronera.

Cuantayá qu'agüeyando'l panorama del país oficial, el cosmopaletu imperante y al so perru falderu, el marutáu d'autóctonu que paña migayes y nagua por prebendes y ringorrango, centréme en pescudar y somorguiame nel otru país, el de la xente invisible, la que trabaya en silenciu, la que caltién los raigaños, la escaecida por unos y otros de contino. Pero tamién la que tien la gran fortuna de ser depositario de la tradición que fai qu'esi otru país de so -que ye'l mio- seya dignu y grande, auténticu y de raigaños fondos, imprescindible pa comprender daveres esta tierra asturiana. Y  que ye quien a conectar, si dacuando apruz fuera del so ámbitu apostalgáu, con bien de xente asturiano que rercuerda aquellos tiempos cuando yeren rapacinos somorguiaos en vivencies llariegues.

Pues vaya'l mio reconocimientu al so facer calláu y sele. Tamién el mio deséu de qu'esi otru país, frayáu y feble, aguante ensin sumise y aliende abondo hasta que xente enfotao, parcial y arrogante pa cola so patria asturiana, garre'l testigu. Vayan pa elli, gritando a l'antigua usanza, el mio ixuxú y el mio viva.

jueves, 3 de septiembre de 2015

Cuadonga

Tenemos n'Asturies un santuariu, el de Cuadonga, que pue tener, guapamente, una antigüedá que tresllumba los 1.200 años.

Atribúise al nuestru rei Alfonso I y a la so muyer, la reina Hermesinda, un documentu au se llevanta una ilesia nesi llugar y un monasteriu. Esa donación inclúi una imaxe de la Nuestra Señora llevada dende'l Monsacro.

Nel añu 1.572 el cronista del rei Felipe II, Ambrosio de Morales, visita Cuadonga y describe la ilesia de madera que se llevantaba na cueva. Esa ilesia apaez en grabaos y cuadros antiguos sobresaliendo abondo d'ella, como encolingada nel aire y tapándola casi dafechu. Popularmente llamábenla la del Milagru, porque paecía cosa milagrosa que nun cayere. Diz tamién el cronista que la virxe ellí custodiada gozaba de gran devoción y que se facíen grandes romeríes nel so honor.

Foi en 1.777 cuando un incendiu amburó aquella ilesia de madera y la imaxe de la virxe qu'había nella. El Cabildu d'Uviéu donó entós otra imaxe que ye la que conservamos güei de La Santina. Trátase d'una talla de roble policromada del sieglu XVI. El vistíu ye de collor azul averdosao  con flores colloraes. Lleva tamién una capa en collorao con bordes doraos. Nel brazu izquierdu lleva al neñu Xesús que-y punxeron nel añu 1.704 y na mano drecha una rosa d'oru (semeya del post).

En 1.874 construyóse una capiella na cueva que yá quedaba abierta al esterior y non tapada dafechu como nes dómines de la ilesia de madera. Dempués de la Guerra Civil, constuyóse la capiella que conocemos güei y la cueva pasó a facer d'ilesia.

Nel interior del recintu alcuéntrense los sepulcros de los reis Pelayu y Alfonsu I, y de les reines Gaudiosa y Ermesinda, arriendes de la hermana del primeru, según recen les inscripciones tallaes nellos.

Tamos entós ante un llugar, Cuadonga, que, arriendes de la so importancia histórica como llugar onde se dio la batalla que foi'l puntu de partida del posterior Reinu Asturianu y del que somos herederos los asturianos actuales, ye tamién un santurariu consagráu a una virxe, La Santina, que rescampla pola so gran antigüedá y que va xuníu dafechu a la historia d'esta nación milenaria de nuestro.