Una anécdota. Andaba yo abeyando per un mercáu y averéme a un puestu de quesu asturiano. Una moza ventiañera atendióme. Tuvi charrando con ella y contóme que'l quesu facíalu la güela y que yera un puestu familiar. Entrugué-y qué quesu me recomendaba (más curao, menos...) y quedé claváu. Díxome que nun podía facelo porque a ella esi quesu nun-y gustaba. Una estratexa de venta en miániques revolucionaria. Díces-y al cliente que lo que vendes nun te gusta nin a ti.Otra anécdota. Empobino pela seronda camín del monte a la gueta. Crúzome con un paisanu y echamos una parrafada. Cuando-y digo aú voi señálame un castañéu que diz que ye suyu pa que pañe tolo que quiera porque él nun se molesta en guetar. Pregúnto-y si nun-y gusten les castañes y dizme que sí, pero que cuando-y entra'l rixu por elles va pal supermercáu y cómprales. Nesi super les castañes suelen ser bercianes o estremeñes. Nun lo entiendo. Tienes castañes tuyes apodreciendo a cien metros de casa y vas comprales a un quilómetru y, pa detrás, de fuera.
Lo anterior pudieren paecer simples casos aisllaos ensin más. Pero non. Son la punta d'un iceberg fondu y muestren unos comportamientos perafitaos pente los asturianos d'hoi. El refugu de lo propio o , simplemente, l'abandonu, y l'arranar polo ayeno. El tar tán n'ayén que nin siquiera nos decatamos que tamos tirando piedres escontra'l nuestru teyáu y perxudicando la nuestra propia economia, mesmo la que tenemos de puertes de casa p'adientro.
Y casos pa seguir enriestrando tenemos abondos. Nestes feches anden pela vendimia per tierres de Cangas del Narcea. El sector vitícola nesti conceyu espoxigó bien nos años postreros. Ameyoró en cantidá y calidá. Hasta tenemos anuncies de premios algamaos en certámenes internacionales polos caldos cangueses. Pero si-y entrugamos a un asturianu pol vinu la zona, ¿qué te contesta?. Pues mui corriente ye sentir qu'aquello ye pistraca, poco bebible y recomendable y que, si quies beber vinu, que busques no de fuera que ye lo bono. Y de la sidra, magar pueda paecer que ta notra situación, meyor andar col güeyu argutu. Ehí tenemos l'avance enorme de lo vasco mientres equí tenemos la última moda de tratar d'impedir l'escanciáu nes terraces. Venga, a poner torgues. Nun m'estrañaría un res que, de siguir per esta espiral absurda, cualquier día nos chigres y sidreríes nos anuncien en cartelonos bien grandes la sidra de los vecinos o cualquier otra d'ayuri mientres la nuestra empecipia a recular irremediablemente.
Delles vegaes pienso qu'una de les causes de tantu despropósitu ye una mentalidá heredada de cuando, apocayá, yera l'Estáu'l principal empresariu del nuestru país. Escurro que, quiciabes, haya tovía xente pensando qu'esi Estáu va venir a reabrir mines otra vegada, o a potenciar los puestos de trabayu de l'actual siderurxa, o a ponenos un tingláu tipu Eurovegas que nos va facer refalfiar de tantu trabayu como se va aniciar equí. Y, claro, tolo que seya construir dende abaxo, con redes propies y de manera ayena a esa estructura vese con rocea, ensin enfotu dalu y como maneres de perder el tiempu. Pero'l resultáu ehí lu tenemos. Cada día a menos y peor. Pero bastante personal inda anecia y sólo-yos val lo que venga de la iniciativa de Papá Estáu y el so maná salvador.
Pero esa, por doliosa y tarrecible que nos resulte, ye la realidá nuestra del día a día. El vivir fuera bolos, n'ayén, nuna alienación de tala magnitú que nun somos a ver nin a reaccionar ante lo que nos ta pasando delantre les mesmísimes narices. Poro, una de les condiciones previes pa poder dir a dalgún llugar de futuru colectivu ye un cambiu pernecesariu, urxente y vital de la nuestra mentalidá. Un cambiu revesosu y dificilísimu de llograr, porque camudar los vezos, los pensamientos fosilizaos y les actitúes ye un camín pindiu a embute. Pero ye l'únicu que nos queda por sestaferiar y con posibilidaes de dir saliendo del enguedeyu actual. Pero, entrín y non, per agora nun nos queda otra que reconocer que los asturianos siguimos tando en Babia... y comprando castañes. Ye lo qu'hai.
