Un país surrealista

Entrugábame unos post atrás nesti blogue si había país. Si realmente la xente de nuestro taba pol llabor de participar en dalguna andecha na defensa de lo propio.

Escribía tamién nesti blogue apocayá sobre la posibilidá de facer un 25 de Mayu unitariu reduciendo l'esfuerzu a convocar a la xente nel mesmu llugar, día y hora ensin roblar manifiestu dalu y cásique ensin necesidá d'aconceyar pa llamar a la concentración.

El resultáu d'esto último yá lu sabemos. Caún pel so llau faciendo oyíos sordos al deséu de bien de xente. Y una contradicción clara. Porque una de les enseñances d'eses dómines que se remembren ye la de la capacidá de xuntanza de los asturianos frente a un enemigu común.

Sigo entrugándome güei si hai país como va poco. Tengo dulda de si la nuestra ciudadanía taría dispuesto a apoyar proyectos bien axeitaos y unitarios. Claro que mientres nun se dea la posibilidá d'igualos y presentalos dayuri nun voi atopar la rempuesta.

Onde yá entamo a afitame ye nel convencimientu de que de manera organizada non, nun tenemos país. Namás qu'un garrapiellu d'actitúes afondando cada día más nel surrealismu.

Democracia

Quiciabes enantes de teorizar sobre abondos de los temes que nos tienen enartaos de contino y sobre los que construimos auténticos castiellos na playa y axeitamos increibles discusiones bizantines, vendríanos bien reflexonar sobre la base: el conceptu que tenemos de democracia y de demócrata.

Porque nesti país de nuestro, hailos que piden abiertamente'l pieslle de blogues porque refuguen lo que lleen nellos y considérense demócrates. Otros recurren al insultu porcaz pa defender los sos planteamientos ya idegues y tamién se consideren demócrates. Tamién hai dellos qu'alcagüeten y difunden gayoleros el bilordiu, la calumnia y tou tipu d'integrismos escluyentes siempre que los que los llancen seyan de "los míos".

Pienso que cuantisimayá'l nacionalismu asturianu carez d'un claru déficit democráticu. A lo meyor tamos enguedeyándonos no secundario y escaeciendo lo principal, en finxu de partida. Y nun descarto qu'esa seya una de les razones de pesu a la hora d'analizar por qué esi nacionalismu nun espoxiga.

Escurque arriendes de planteganos xuntances y pasar día tres día estremando y discutiendo sobre nacionalismu, asturianismu, izquierda, derecha... vendríanos perbién facer un altu nel camín y entamar pol principiu: dixebrar ente lo que ye ser demócrata y totalitariu. Y miranos al espeyu pa ver en realidá de qué llau tamos realmente más cerca toos y ensin esclusiones.

Que nun nos echen la comedia.

Hai comedies prestoses y qu'animen a dar la mampurra y too. Por exemplu les que salen a representar precedíes polos sidros. Tamién se puen presenciar comedies prestoses nos teatros pa esfrutar d'elles y pasar un cachu entreteníos.

Pero la xera comediante nun escosa nos casos anteriores. Hai dayuri otres comedies que nun cuaquen gota. Son les que s'empeñen n'echanos esos que s'afayen como gatos del fornu dientro'l réximen clientelar que padecemos. Nun fai falta dir lloñe pa presenciar esti tipu moxigangues. Tenémosles y abondes equí, a la puerta casa.

Xente amagando contra'l réximen de contino pa nun dar nunca. Esprecetándose y arruxidando contra él puntualmente pa dempués nun gorgutar hasta la siguiente comedia que toque echar. Arrogantes solidarios qu'ufierten el so cuellu amorosiegu a los mancorniaos pa dempués esfrutar de les prebendes de los solmenadores. Atechaos varios en chiringos clientelares vendiéndonos grandes llogros que namás qu'ellos son a ver... Unes comedies que yá dan noxu de puru repetitives ya falses. Que cafien y empalaguen.

Y yá va siendo hora de dir dexando les mázcares pal antroxu. Equí o flin o flan. O xota o fandangu. O trabayar pa facer país y ponese daveres del llau de tantos ciudadanos asturianos que lo tán pasando realmente mal, o alcagüetar a los que los frayen. Falar con fechos alto y claro y siendo coherentes d'una vegada por toes. Dexase de comedies y patagüeyos pa la galería y muncha más seriedá y compromisu verdá pa cola tierra y los ciudadanos de nuestro.

Conocer pa reconocenos.

Conocer y recuperar la nuestra historia ye un trubiecu afayadizu pa qu'espollete la conciencia d'ú venimos y de quien somos.

Neto a lo que podemos consiguir si conocemos y ponemos procuru en conservar la nuestra cultura material ya inmaterial.

Porque historia y cultura son dos armentíos que tiren pel carru au llevamos el nuestru bagaxe indentitariu.

Y como fitu que rescampla d'una manera especial ehí ta la nuestra llingua. Esa manera propia ya intresferible de ver el mundu y d'espresalu.

Afondar nel conocimientu de lo ferial de la nuestra tierra ye la manera más afechisca de reconocenos. Y, en reconociéndonos, ser pa llantar los pegollos que nos lleven a remanar los destinos del nuestru país, que son los nuestros.

El nuestru mañana pue entamar guapamente un día como güei. Escaeciendo aquello que nun lleva nenyures. Faciendo borrón coles vieyes zunes y tracamudios. Escoyendo un finxu'l cielu pa onde podamos toos, ensin esclusiones, empobinar.

Enfotándonos en que nun futuru, de la collecha surdida del más fondu y arrogante conocimientu de lo nuestro y de nosotros, seyamos a iguar una andecha con tiez qu'enconte y garantice la pervivencia futura d'esta vieya nación.

El pan que se fala

El pan que se sema.
El pan que na andecha s'amesoria.
El pan que se muel y fai fariña,
que s'amasa y formienta na masera.
El pan que se tresna
arroxando con carbayu'l fornu.
El pan que s'ornia y ufierta nel ramu.
El pan del llar y de los antiguos.
El pan que se vive.
El pan que se fala.
Porque, ensin fala,
nun hai pan.

(Nel XXXI Dia de les Lletres Asturianes)

De madreñes hasta la cocina...

Hai dos maneres de dir a visitar a un vecín allá na quintana.

La primera d'elles ye dexando les madreñes a la puerta, picando, y saludando con educación a los amos ya invitaos de la casa.

Claro que tamién hai otra. Consiste n' entrar ensin permisu coles madreñes entafarraes de cuchu hasta la cocina, echando gaxapaes, y faltando a los presentes.

Exemplos del primer tipu hai abondos afortunadamente. Pero tampoco nun escaseen los del segundu, desgraciadamente.

Ensin dir más lloñe, ehí tenemos esa castra política qu'anecia de cutiu n'entrar de trebolén na nuestra casa común de la llingua asturiana, entafarrándola coles sos bocayaes y biloridos y faltando a l'alcordanza d'aquellos que nos precedieron y tresmitieron esta ayalga del nuestru patrimoniu idientitariu.

Un proceder llamentable qu'una y otra vuelta tenemos que retrucar col nuestru reivindicar democráticu de ciudadanos asturianos conscientes del nuestru ser y respetuosos col nuestru bierzu. Y que sepan los que-yos correspuenda, qu'agora y siempre vamos tar dispuestos a curiar y defender la casa de la nuestra llingua, pese al que-y pese, y por munchu enfotu que pongan en truñar contra nosotros.

Grandeces amatagaes.

Tamos avezaos a garrar el sentíu de la midida al traviés de lo que nos muestren los medios de comunicación, naquelles actividaes onde más pon el güeyu'l dineru, naquello, en definitiva, que dalgún día decidimos, por una enguedeyada serie de circunstancies, que ye lo importante.

D'esta manera, estelámonos nes xestes deportives que nos presenten y presentamos como rellumantes: empampirolámonos con fazañes futbolístiques, de fórmula 1, de... lo que nos cuenten y nos contamos que ye lo grande.

Al delláu d'ello, tamién hai grandeces qu'escuquen casi ocultes. Fálase poco d'elles. Rellucen un instante curtiu nel tiempu si les comparamos coles anteriores. Ruxen selequino. Y abúltennos medio tapecíes. Como amatagaes.

Pero yo considéroles grandes ente les grandes. De mano, porque lo son daveres. Porque tienen amás el méritu de lo muncho qu'hai qu'esbrexar pa destacar no encasiellao como minoritario. Polo que camiento que tien de costar llograr sofitos pa salir alantre. Y hasta ónde hai qu'aportar y cuánto lluchar pa ser a que-yos reconozan, anque seya una migayina, el so enorme méritu.

Ello ye que ta acabante producise una xesta deportiva nel nuestru país. Les rapaces del equipu de h.oquei sobre patines del Biesca Xixón llograron el so tercer títulu européu ya'l segundu consecutivu. Sí, tres títulos europeos. Casi nada.

Y eso, enmarcándolo nel conxuntu de los equipos deportivos asturianos de toa mena, ye un llogru tán bultable que nun almite retruque dalu. Magar, cola particular vara de midir qu'acostumamos a utilizar, el so triunfu perteneza'l grupu de les grandeces amatagaes.