El xanu'l caborniu

Asturianos Errantes.

2012-01-25T18:15:00.002+01:00

Camiento que los collacios que pasáis dacuando per esta viesca yá tendréis reparao abondo na semeya qu'ilustra'l mio aspeutu de xanu.

Pues bien, esti dibuxu nun ta puestu ehí a voléu, nin porque me paeciere simplemente simpáticu o afayadizu, que me lo paez, pero hai inda más. Ye una calicatura que fixo David Shankbone en 1.852 pa ilustrar la lleenda del "xudíu errante".

Y ye qu'atalanto yo que ye un dibuxu con un títulu amañosu pa facer un xuegu pallabres colo que nos ta pasando anguaño a aquellos que deseamos, una cosa tán simple y tán cenciella, como la d'usar la llingua asturiana en cualquier sitiu y circunstancia dientro del nuestru propiu país: Asturies.

Porque lo cierto ye que los que queremos usar davezu y con tola normalidá esti idioma camudamos por ello nuna xermandía d'asturianos errantes, de vagarientos na nuestra propia tierra, en busca d'un sitiu onde poder afayanos y ser unos ciudadanos normales, y non un colectivu de segunda, marxináu y que tien qu'entamar tou un esfuerzu diariu d'arreblagar pilancos si queremos ser, llingüísticamente, nosotros mesmos.

Poro, arrano como tantes collacies y collacios namoraos d'esta vieya llingua, por que col esfuerzu arrogante acordies coles posibilidaes de cadún (tolos graninos de sable qu'apurramos son igualmente importantes), llogremos dalgún día, y d'una vegada por toes, pasar de ser asturianos refugaos y errantes na nuestra propia casa a ciudadanos y ciudadanes d'Asturies con plenos drechos llingüísticos.

Cultura y Cosmopaletos.

2012-01-18T19:28:00.002+01:00

A vegaes ye menester cabruñar en conceptos que tendríen que tar claros cuantayá. Pero, cuando se vive nun país u rescampla un parrulismu xabaz en ciertes clases polítiques y culturales, nun queda otra vuelta qu'insistir no que habría ser evidente.

Cualquier persona de cualquier llugar con una cultura y llingua propies ye normal que les herede, ame, utilice y difunda. Y, arriendes d'esto, por un fechu tan de caxón como de que ye fato querer vivir aislláu del mundu, tamién que sienta interés por conocer cultures y llingües d'otros llugares llegando tamién a compartiles, apreciales y utilizales. Too ello supón un arriquecimientu personal induldable y failu ser un auténticu ciudadanu del mundu dende los sos raigaños fundíos na so nación. Nel casu asturianu sedría un ciudadanu que podríemos calificar, guapamente, d'asturianu y universal.

Pero suel asoceder en llugares onde esiste, de los tiempos, un discursu de desprestixu hacia lo autóctono, qu'abunden ciudadanos que tienen un autoodiu y un complexu d'inferioridá cultural y llingüísticu pa escontra ello. Si, arriendes d'esto, esos ciudadanos algamen puestos cimeros nes estructures del poder y la cultura, el so llabor destructor de la cultura popular y de la llingua autóctona del país pue llegar a ser gafu y esperpénticu al empar.

Y esto cabero ye lo que, cenciellamente, ta ocurriendo n'Asturies anguaño. Unes élites polítiques y culturales allampiaes por tolo que venga de fuera, independientemente de que seya daqué con calidá o simples caxigalines, nun desaprovechen la ocasión pa frayar y aventar los sos carrobexos acomplexaos sobre'l patrimonu cultural y llingüísticu de nuestro. Créyense asina empicorotiaos no más esquisito de la cultura, universales a esgaya y cultos hasta velo y dexalo.

Pero non. Equivóquense dafechu. La so actitú nun tien un res de too eso. Cuando una persona o un colectivu s'avergoña de les sos raíces y non sólo fuxe d'elles, sinón qu'adopten una postura gafa, xabaz, agresiva y destructiva hacia lo ferial de la so tierra mientres nagüen como parrulos por tolo foriato lo único que tan amosando, d'una manera que rescampla hasta cegar y qu'arruxida hasta atorollar, ye que nun pasen de ser unos probetayos provincianos y cosmopaletos.

Croniquina d'un domingu de Sidros y Comedies.

2012-01-15T17:52:00.002+01:00

Presta saber que'l nuberu anda aliáu últimamente coles actividaes de los nuestros mazcaritos. Esta mañana arrampló otra vuelta coles nubes hasta que tolo entamao finare.

Aportemos bien ceo a Valdesoto, aparquemos y, como conozo la marruca, enfilemos camín de Lliceñes arriba pa saludar al collaciu Pablo que taba a puntu marutase de sidru. Dempués un ratadín en chigre y a empobinar pa l'antoxana de la ilesia u diben celebrase les representaciones.

A la entrada compremos nun puestu el segundu volumen de la "Máscara Ibérica" y un par de chapes cola imaxen d'un sidru pa facer proselitismu perende.

Alrodiu les 13h. siéntense, pa la mano d'arriba'l camín que baxa onde tábemos, los sones de la bandina ya'l ruxerrux de les equiles. Darréu, aprucen los sidros dando blincos d'un llau a otru siguíos polos participantes nes comedies.

Abonda xente, sofitu fundamental p'animar a la continuidá d'estos eventos, formen el corru curiáu polos sidros. Entamen a echar la comedia de los rapacinos que, talo que si fueren les mocedaes de los indignaos armaos con pancartes y too denunciaron, en clave d'humor, a esta castra del poder que-yos ta torgando dende yá'l so futuru. Ovación zarrada al final. Toquen la bandina un son y entama la comedia de los mayores. La política municipal, asturiana y estatal, dalgunos personaxes del famoséu y la denuncia ensin andar en caxigalines de la engatada na que tamos metíos los ciudadanos anguaño igüen una prestosa representación . Otra vuelta, una ovación zarrada premia'l bon facer representativu.

Acabante d'echar les comedies, dásenos anuncia de que pal prósimu mes de Febreru vamos tener otra vuelta les Xornaes de Mazcaraes d'Iviernu. Asina que, dempués de xintar nun bar del pueblu un bon potaxe de berces y castañes acompañao too d'una botellina vinu, saquemos la conclusión de que cuando se faen les coses bien y con enfotu, como ye'l casu, hai que tornar pa la viniente. Y nello tamos.

La dignidá de llevar boina y madreñes.

2012-01-14T09:44:00.000+01:00

La destitución y posterior sustitución del director del festival de cine de Xixón foi'l detonante. Darréru viñaron los apoyos al cesáu dayures. Tampoco nada especialmente raro, pues cuando na trestienda actúa la política caún arma la bolera a la manera de so.

Pero bien llueu viose que tres del aparente sofitu a la persona destituida rescamplaba un ataque frontal y en toa regla a la cultura tradicional asturiana, utilizada despectivamente, como carrobexu contra'l conceyal de cultura xixonés que tomare la decisión y contraponiéndola, como daqué ruino y pueblerino, a lo villandiego y culto que son les manifestaciones culturales foriates.

Una conceyala per un llau califica de querer camudar a Xixón en la aldea perdida. Un voceru d'una formación política ridiculiza les madreñes pa exemplificar lo tocho de querer llevar lo llariego a cumales altos de la cultura. En dambos casos, representantes políticos de la llamada "izquierda plural".

N'Asturies llevamos tres décades yá d'acosu y derribu de la nuestra cultura y llingua por parte d'esi amagüestu políticu marutáu d'izquierda, magar los intereses de los trabayadores nun se vean defendíos por ella nenyures. Trataron de desaniciar cualquier rasgu identitariu propiu d'esta vieya nación cuando compartíen gobiernu y en bona midida llográronlo, anque nun foron a perfacer el so llabor.

Y, anguaño, alloñaos de bien de centros de poder per aciu de les elecciones autonómiques caberes, taben esperando como agua de mayu la primer ocasión pa reiniciar la so cruzada etnocida. Asina que l'asuntu del director del festival xixonés púnxo-yos en bandexa una ofensiva desenfrenada contra la cultura popular asturiana. Y puñaron y siguen faciéndolo con tol alma contra ella.

La semeya qu'ilustra esti post ye la plantilla de la mina La Encarná, en L'Agüeria Carrocera, Samartín del Rei Aurelio, tomada en 1.955. Ellí posen los trabayadores coles sos llámpares de mina, boines y madreñes, porque asina vestíen simplemente. Y porque asina visten tovía güei bien de paisanos nel nuestru mediu rural, nesa aldea puesta como exemplu de lo indeseable pola conceyala enantes mencionada. Con eses madreñes ridiculizaes pol políticu amiguete de l'anterior. Una foto digna y una manera tan digna de vestir como cualquier otra col aquello de que s'identifica cola manera de vestir de munchos de los nuestros güelos.

Nun tenemos por qué aguantar estos ataques en tromba hacia elementos de la nuestra cultura material o inmaterial. Tenemos qu'esixir alto y claro un respetu a esos vividores de la política que se-yos enllena la boca falando de los trabayadores cuando talo paez que realmente enxamás vieron ún de cerca nin nuna fotografía.

La defensa de la nuestra cultura, como la defensa d'Asturies, nun almiten equidistancies, nin porcentaxes, nin matices. Defiéndense al cien por cien y con toles consecuencies y nun podemos permanecer impasibles ante ataques gratuitos y a lo xole.

Hai años, con motivu de la celebración del Día de Les Lletres Asturianes fíxose un llamamientu p'acudir y manifestase col traxe tradicional asturianu y los cosmpaletos de siempre fixeron xirigoncia d'ello. A lo meyor llegó'l momentu d'entamar a dir a actos y manifestaciones cola boina bien calada y les madreñes bien ferraes pa espeta-yos nos focicos a tantos desertores del aráu que consideramos digna y respetable la manera en que diben a trabayar los nuestros güelos pa sacar alatre a les families de so.

La Ferrería

2012-01-11T18:15:00.001+01:00

L'agua del banzáu cayendo en tabayón movía'l machucu que cutía con un son constante. La fragua taba bien encesa y abarquinada. La yuncla amosaba les mozquetes de milenta forxes. Y la de güei yera una más que se diba perder somorguiada nuna riestra d'elles interminable...

Pel camín avanzaben dos homes pa contra la ferrería. Ún, de barbes blanques y llargues y de güeyos argutos, garraba al otru, que caminaba nerviosu y aforgugáu, per un brazu. L'home nerviosu avanzaba como zapicando y llevaba nes sos manes una caxa de madera ferrao. La puerta de la ferrería taba abierta y entraron.

-Equí vengo con esti home-dixo'l paisanu de los güeyos argutos-.

-¿Trailo?-entrugó con indiferencia'l ferreru-.

-Sí-tornó a responder el que traxere al home nerviosu-, tienlo nesa caxina de madera ferrao que lleva nes manes-.

-Pues que me lo apurra y entamamos-dixo'l ferreru espurriendo pacia ellos una mano-.

L'home nerviosu apurrió-y entós la caxina al ferreru que l'abrió y xuxurió xingando la cabeza afirmativamente:

-Bien, bien. Bramente ye mui guapu. Bultable, con bien de seches, bon material... Podemos facer un bon llabor con esto...-

-Y ta en perfectu estáu. Empleguélu abondo y ta bien nidiu y nada ferruñentu pol usu, como usté podrá comprobar guapamente-atrevióse a tatexar l'home nerviosu-.

El ferreru mirólu con un xestu de despreciu y nun-y contestó. Sacó de la caxa'l conteníu, calentólo na fragua y asitiólo sol machucu qu'entamó a cutilo hasta que foi camudando l'aquello nuna especie de baniella llarga y achaplada. N'acabando la primer parte del procesu, foi pa la fragua y la yuncla onde entamó a trabayar sobre la pieza hasta da-y la forma d'un arcoxu. Al acabar el trabayu, miró'l resultáu y sorrió:

-¡Bien!. ¡Yá tenemos otru más...!.-

Dempués dio-y l'arcoxu al home de les barbes blanques que lu metió na caxina ferrada apurriéndo-yla al home nerviosu.

-Yá pues colar-espetó-y con voz arrestellada y segura-.

L'home nerviosu, cola caxina otra vuelta nes manes coló entainando y ensin gorgutar.

Solos na ferrería, l'home de los güeyos argutos ya'l ferreru miráronse un ratadín entientes. Dempués, el ferreru faló:

-Yá tenemos otru pensamientu críticu achapláu y convertíu n'arcoxu pa torgar que puedan movese les idees llibremente-

-Pues sí, amigu ferreru, otru más- respondió con un biecu cómpliz l'home de los güeyos argutos-. Y van una carrapotada d'ellos nes últimes feches. Al ritmu que lleva'l negociu vamos tener qu'ampliar...-.

-Probablemente... probablemente...-afirmó'l ferreru llevando una mano al cazu mientres miraba como clisáu pela puerta la ferrería-.

Allalantrón, l'home nerviosu malpenes yera un puntu casi qu'invisible, un llixu desapercibíu ya insignificante, confundíu cola muga naquella tarde buxa...

Una buelga peligrosa.

2012-01-04T19:15:00.004+01:00

Entamemos el 2.012. Y entamémoslu mal. Con anuncies nos últimos díes bien preocupantes que talo paecen llevanos a confundir al gobiernu español entrante col saliente, como si tuvieren en dambos casos la mesma fueya de ruta marcada. Colos recortes como tema estrella y col pesadiellu de la crisis engoláu nel llombu de los que menos tienen.

El nivel económicu de la ciudadanía va siguir menguando. Y si a los ciudadanos cada vegada-yos mengüen los recursos económicos menos van consumir. Y si nun se consumen les empreses nun venden, despiden a los trabayadores y piesllen. D'otra miente, consiguir dalgún tipu de creitu va ser una xera casi imposible como hasta agora.Y asina siguimos col ciclu zarráu y acabamos siempre como entamemos, neto al vieyu cuentu de la bona pipa.

Van conxelanos el salariu mínimu, conxelar tamién el sueldu a los funcionarios y aumenta-yos l'horariu llaboral, lo que vien a ser baxa-yos esi sueldu. Van xubinos el gas y los peaxes, los impuestos, l'IRPF y l'IBI y un etcétera cada vez más llargu porque lo más probable ye que, según vayan pasando les selmanes, vayamos enterándomos de nueves medíes que siempre van acutir al bolsu de los que yá tán viendo los sos recursos engurriar peligrosamente.

Anúncienmos tamién qu'esti añu qu'acaba d'empezar inda nun va haber recuperación económica nenguna. Si acasu, podemos tener la "suerte" de tocar d'una vez fondu como condición previa pa poder empecipiar a salir del folleru.

Y tenemos otru problema añadíu y ye que los gobiernos españoles, l'anterior y esti, dan l'aquello de ser simples títeres manexaos dende otros centros de poder. Ordénen-yos recortar y recorten, pero yá sabemos de sobra hacia qué sectores de la población dirixen les tisories.

Tengo la impresión de que tamos dirixíos por dinosaurios de la política y de la economía qu'apliquen recetes que tendríen que tar desaniciaes cuantisimayá. Pero non. Polo que se ve nun hai recambiu pa eses idees y pa eses recetes que nos espayen dende les altures polítiques y financieres. Asina que caminamos siguiendo una buelga peligrosa que cada día que pasa llévamos a ser un pocoñín más probes y quiciabes nun podamos descartar del too que nos empobine tamién hacia conflitos sociales gafos y de consecuencies imprevisibles.

Asina qu'aniciemos l'añu mal, con males perspectives, con badagüeyos pernublos nel finxu'l cielu, col enfotu fechu ciñiscos y esmolecíos per una situación que pa muncha xente yá-yos resulta imposible de caltener. Bramente, col panorama que se nos presenta per delantre, ye una xera casi imposible atopar un sitiu pal optimismu, anque seya un rispiu namás...

¡¡Salió'l Guirria!!. ¡¡Entró l'Añu!!.

2012-01-01T23:41:00.001+01:00

Hai unes hores confirmábase lo que los que nos guiamos poles vieyes tradiciones esperábemos. Salió'l Guirria nel conceyu Ponga repartiendo besos pente les muyeres y aventando ceniza a los homes y acompañáu polos aguilanderos a caballu. Y con ello podemos afirmar, agora sí, qu'entró l'añu. L'añu de nuestro.

Y con ello pervive'l nuestru iviernu. El de los antiguos. Con aguilandos y mazcaritos recorriendo llugares y caleyes. Llevándonos con ello en pelondines a los tiempos más reveyegos. Cuando yéramos clan, tribu, castra. Cuando yera menester facer piñu pa sobrevivir na época u la tierra y los árboles nun dan y hasta'l rei de la viesca, l'osu, retírase al so abellugu a enarciar. Axuntamos asina güei, cuando l'añu nuevu fai galanes, esos dos grandes bercios de lo que somos. Asturianos de magar el sieglu VIII y ástures de la llana y el cueru, del caballu y'l mastín, antes d'aquelles dómines.

Asina qu'entamemos el 2.012 añaos pol ruxerrux de la mar esfaciéndose n'espluma llandio nos cantiles. Curiaos poles fayes qu'enseñen nes rames les sos fueyes como llámines d'oru. Observaos por nuberos, xanes, cuélebres y demás xermandía del nuestru panteón míticu. Poseedores del esconxuru que capia a Xuan de la Borrina pa facenos nidios los díes más prietos y nublos...

Y tamién, miániques, endolcaos na renombranza de los vieyos dioses. Porque, increyiblemente, inda esistimos. Resistimos. Tamos. Somos. Increyiblemente los fíos de la vieya nación astuirana y los nietos de la vieya castra ástur tresllumbemos esti segundu mileniu magar toles escorzunes y repuelgos d'una historia de brenga y resistencia.

Afortunadamente nun vamos pasar l'iviernu albentestate y n'abertal. La solidaridá tribal de los aguilandos y la protección de los vieyos xamanes guirrios va tar otru añu con nós. Y ello va ser tou un rellumu d'esperanza pa siguir equí, triando esta tierra y esbrexando por llograr un futuru a comuña ente toos.

L'aigla peñera nortiando la nuestra tierra dende'l so gurugú. El texu viste'l so verdor niciu d'inmortalidá. L'asturcón esporitia y rincha al traviés de los sieglos...

Salió'l Guirria. Entró l'Añu. Aliten los ástures. Perviven los asturianos.

Mazcaritos y aguilanderos.

2011-12-29T12:30:00.003+01:00

Estes feches de fin d'añu son un bon momentu pa falar de mazcaritos y aguilanderos. Porque ye nestes dómines u entamaben estos personaxes y la xente los pueblos a percorrer les sos caleyes y caminos picando peles cases.

Son estes unes tradiciones que se pierden cuantisimayá na borrina de los tiempos y que son parte ferial de la identidá cultural asturiana.

Como suel asoceder con estes coses, llastimosamente foron quedando escaecíes col pasar de los años. Pero quedó un rescaldu na foguera que ye’l que sirvió pa entamar la so recuperación.

Y eso ye, precisamente, lo que vien asocediendo dende va unos años p’acá. Y nes prósimes selmanes vamos tener en dellos llugares asturianos unes amueses d’estes vieyes tradiciones.

D’esta miente, va tornar salir el Guirria de Ponga siguíu polos sos aguilanderos a caballu o’n burru, según seyan adultos o rapacinos.

Tamién van salir Os Reises de Tormaleo y los del Valledor, nel conceyu d’Ayande.

Y nel llugar de Valdesoto van tornar otru añu más los Sidros que van dir acompañaos pola Comedia, que va estrenar representación, y pola Bandina.

Nun digo que namás qu’estes d'arriba seyan les xermandíes que vayan salir. Toi refiriéndome namás a aquelles de les que teo noticia. Si hubiere otres (los Zamarrones de L.lena…) prestaríame pola vida que fuere asina.

En resultancia, vamos tener mazcaritos y aguilanderos esti iviernu qu’acaba d’empicipiar. Una noticia perbona pal caltenimientu de les nuestres señes culturales d’identidá. Queda entós da-yos la norabona a toa esa xente que, col so llabor, siguen llogrando qu’alite la llama de les vieyes tradiciones.

Más Recesión.

2011-12-26T22:30:00.000+01:00

Pues eso, que reculamos. Metíos metanos les feches navidiegues y yá nos anuncien dende les altures que pa primeros del añu que vien vamos entrar en recesión. Bono, habríen dicinos que vamos recular más inda, porque p'alantre nun veo yo que vayamos dende cuantisimayá.

La verdá ye que veninos con eso cuando tenemos tovía un cachu turrón metíu na boca ye como pa empapizanos y espirrialo too p'afuera. Comprendo que los que nun son el gochu nel samartín nin el pavu nel fornu a lo meyor nun se dan cuenta de que veninos con estes anuncies nestos momentos ye de mui mal gustu y peor falta de sensibilidá, pero...

Y ye que polo que se ve nun podemos tar nin un minutu tranquilos. Al primer descuidu acútente coles noticies más gafes y tarrecíes. Y métente unos sustos que te dexen col corazón baillando'l xiringüelu..Como por exemplu me pasó a min l'otru día. Voi tan campante pela nueche cerca un cementeriu y al doblar la equina pente la penumbra atópome con una avanzada de la güestia. Al final quedó too nun sustu porque yeren unos rapazos coles capuches de les sudaderes puestes, pero faltóme poco pa quedar ellí espatarráu.

Asina que tai sollertes. Escuca la recesión, foína y con males pulgues, allá cuando malpenes el guirria acabe d'echar unos puñaos de ceniza a los mozos y repartir unos cuantos besucos a les moces pa estrenar Xineru. Procurái nun vos atopar con ella pela nueche, xunto al cementeriu y cubierta con capucha...

Grandes Guerreros

2011-12-22T12:41:00.005+01:00

Duldar que yéramos grandes guerreros yera bobada. Y que veníamos d'una pernomada triba de cazadores más bobada tovía.

Aquella tarde díbamos de caza. Fiximos una bona poza. Dempués mexemos allá, echemos cuchu, estrapayemos cabezones, echemos tola porquería qu'atopáremos perende y más y hasta dalgún baxó los pantalones y dexó ellí la so aportación más íntima. P'acabar, tapémosla con procuru. Namás que quedaba esperar pola presa.

Amataguémonos escucando a ver qué cazábamos. Tino frotaba les manes y too de los nervios y la emoción. De sutrucu, sentimos ruíu. Acercábase dalguién. Yera la madre de Tino precisamente. Aportó a l'altura la trampa y ¡zas! metió la madreña hasta'l todiellu sacándola entafarrada de puxarra que daben hasta ganes de vomitar.

La sabia intuición d'una madre fixo'l restu:

-¡Tinoooo, ven p'acá que voi frayate!-

Les ñalgaes restallaben na culera de Tino como voladores. Los demás guerreros esnidiémonos selequino pa fuxir d'una panadera segura.

Yéramos grandes guerreros, yera bobada duldalo. Pero non suicides.

Patrimoniu material y llaceria.

2011-12-14T14:55:00.000+01:00

Salir a recorrer el nuestru territoriu y tornar con un nuedu en gargüelu por aciu de lo que se pue observar ye too uno.

Per uquiera que te mueves ves siempre les mesmes imáxenes que te muestren l'estáu de llaceria en que s'alcuentra una bona parte del nuestru patrimoniu material: horros esbarrumbando, construcciones rurales feches un puñáu de muruecos, cabanes cayendo, casones comíes pola edra y la humendanza, molinos, pontes, torrexones, elementos patrimoniales toos ellos que talo paecen clamar al traviés del so abandonu por una mano amiga que los salve d'empozase na ruina y l'olvidu.

Una bayura cultural del pasáu que va esborrándose adulces col pasu de los años. Y xunto a esi desaniciu vanse tamién rotos en felpeyos cachos de la nuestra alcordanza y de la nuestra historia. Porque non sólo falen les pallabres: los horros, les vieyes construcciones medievales, les distintes tipoloxíes de les nuestres construcciones populares... son una parte importante d'un pasáu que nos pertenez y que nun tendríamos qu'escaecer. Si hasta l'arte asturianu, reconocíu mundialmente, ye una fonte qu'enxamás escosa d'escaezu y mal facer na so conservación.

Pero ehí tenemos anguaño tou esi bagaxe cultural sumiéndose nel abandonu. Unes vegaes, los organismos que podríen entamala cola so recuperación y axeitamientu nun lo faen. Otres, somos nosotros mesmos los que por falta medios, una política d'ayudes afayadiza o, lo que ye peor, por aciu del nuestru desdexamientu, vamos dexando esfaraguyase esi patrimoniu de nuestro.

Dalgunes veces pienso, cuando veo a dalgún d'estos elementos patrimoniales del nuestru país desdibuxase pente la maleza y la ruina, qu'a la so manera representen una metáfora de lo que somos n'actualidá. Son como una semeya que nos retrata. Nun curiamos la herencia que nos dexaron los antiguos y con ello esbardiamos tamién la posibilidá de tenenos en consideración y respetanos a nós mesmos y, en consecuencia, que los demás nos tengan en consideración y nos respeten.

La Machorra.

2011-12-07T16:30:00.005+01:00

Serrano viniere de les caberes tierres de la meseta buscando ameyorar la so vida. Alcontrare trabayu y vivía nuna casuca que llograre alquilar a les afueres de la ciudá. Taba solteru, nun yera mal paecíu y la xente, yá se sabe, nestos casos marmura y fai conceyucos pa igua-y la vida al que, a lo meyor, nun tien gana nenguna d'andar en caxigalines.

El casu ye que los vecinos taben enfotaos en busca-y moza, porque víenlu siempre sólu o con amigos y entráre-yos el rixu de ver la posibilidá d'afitar la población de l'aldea y, de pasu, aumentar la tasa natalidá que-yos diba venir como aniellu al deu. Y pa bona moza y afayadiza Rosina: roxa, fecha y perfecha, formal y trabayadora. Tou un chollu.

La cuestión ye qu'a Serrano la rapaza facía-y rebusquinos y prestába-y cozcase a ella. Y, pa detrás, como los vecinos taben tol día afalándolu colo d'echar moza yá andaba él medio animaducu. Hasta qu'un día quixo la desgracia qu'oyere aquella palabra maldita que-y esbarrumbare tol so enfotu en Rosina. Diba vela a so casa, cuando sintió a dalguna xente pal prau d'atrás como acorviala diciendo:

-¡Rosina, yes la reina de la machorra!. ¡Yes una machorra col pelo roxo, rapaza!.-

¿Rosina una machorra?. ¿Un pericón con sayes?. Serrano nun quería creyer lo que sintieren les sos oreyes, pero oyéralo bien claro. La moza que-y xiringaba les coraes yera conocida como una machorra por tol mundu y hasta-y lo gritaben ensin disimulu...

Serrano dexó'l pueblu aquel, despidióse del trabayu, y coló ayuri, perlloñe, a refacer aquella nueva vida de so que se-y fuere pel sumidoriu nun Xuasús me valga.

Al final de la temporada, el diariu "Anuncies Deportives" daba la noticia de que l'equipu "Los Lleones de Pumarín", con un xuegu maxistral cola machorra de la so estrella Rosina Cienfuegos, ganaren el campeonatu d'Asturies de liriu.

El Cortín.

2011-11-28T19:50:00.004+01:00

Cuando los truébanos tán esmelgaos y podres convién cambialos por otros nuevos con ensames arrechos qu'enllenen les setes.

Hai una viesca con bayura de néctar y polen esperándonos cuantayá dayuri.

Pero hailos que s'encerrisquen en caltener los podriellos nel so cortín negándose a buscar la so propia collecha.

Y prefieren aneciar na zuna de dedicase a meter l'osu pelos caxellos ayenos.

La realidá ye la que ye.

2011-11-21T09:55:00.001+01:00

Acabante producise los resultaos de les elecciones xenerales la realidá torna a cutinos fuerte y a presentase a los nuestros güeyos d'una manera que rescampla.

El mapa políticu asturianu afítase y lleva toles traces de zarrase pa munchos años. Les tres fuerces qu'algamaben representación na Xunta Xeneral años atrás hasta güei tamién la llogren nel parllamentu español. La recién creada del FAC sigue esi camín y entra tamién nel Congresu de los Diputaos. Y destaquen enforma los resultaos asturianos d'UPyD que, magar nun consigue representación por Asturies, allúgala ente los partíos que sí pudieren entrar na Xunta Xeneral en prósimes cites electorales.

Camiento qu'eses fuerces son les que van xugar un papel relevante nel nuestru país a lo llargo d'abondu tiempu, que se ta zarrando un barganaz y que los que nun llograron asitiase dientro los sos finxos van tenelo prácticamente imposible de facelo nun horizonte que s'acolumbra acullá perlloñe nel tiempu. Hubo vagar demientres trenta años pa facer les coses d'otra manera, hubo xente que lo encamentó veces a magüeyu, que yera mester amestar y non dixebrar, hubo en definitiva abondes voces... que quedaron en castañéu.

Y quede claro que nun toi espresando nesti post deseos, nin pruyicios determinaos, nin plantegando lo que yo considero qu'habría de ser la manera más amañosa de defender políticamente la nación asturiana. Simplemente toi espresando lo que sinceramente veo y enveredando per esa carril políticamente poco correcta del posibilismu y del pragmatismu políticos. Pero pienso qu'esi refrán asturianu que nos encamienta que les "fartures de memoria son barrigaes de fame" tien la so parte de razón. Empalaguemos de proyectos imposibles, d'intentos definitivos que a la hora la verdá quedaben ente dolco y la media manga, de teoríes afechisques qu'enxamás tresllumbaren el cordal de la so plasmación real.

Asina que gústenos muncho, poco o nada, la realidá política de nuestro ye la que ye. N'Asturies preséntase bastante definida de magar dos consultes electorales separtaes por un intervalu de pocos meses. El puñáu de fuerces con posibilidaes d'aportar a les instituciones polítiques cimeres dibúxase cada vegada más claru y, anque mancornie les ilusiones y enfotos de xente que trabaya duro, sincero y honesto, tamién se dibuxa de manera bien clara qué fuerces paecen condergaes a tar empozaes de contino na marxinalidá, nel escaezu, na poca o nula visibilidá social. Nesti sen, les pequeñes fuerces asturianistes/nacionalistes son barcos fundíos dende'l pasáu mes de Mayu y la posibilidá d'entamar un proyectu nuevu renovando dafechu plantegamientos y actitúes ye anguaño un imposible porque nun hai blimes pa iguar tal cestu.

Y a partir d'ehí cada cual tendremos qu'asitianos y reflexonar qué camín tomar, ónde andechar y ónde non, en qué ámbitos hai posibilidaes de llograr que'l trabayu guañe y en cuálos tamos semando en sucu baxeru. Dicen que na rula nun pregunten, apunten y toca capiar al apuntador y ufiertar lo nuestro porque la hora d'enguedeyanos en fondes discusiones sobre cómo axeitar políticamente un nacionalismu asturianu mui probablemente yá pasó y si torna dalgún día va vaganos d'equí pa entós. Quédanos reconocer humildemente lo qu'hai daveres na cai y esbrexar por construir basándonos nello y non n'ilusiones y suaños ensin sofitancia nin posibilidaes d'espolletar na sociedá asturiana na que realmente nos movemos.

Escampla, nublina...

2011-11-16T18:30:00.001+01:00

Cuando un pastor, allá na braña, queda arrodiáu pela nublina, recita dalgún esconxuru pa escontra d'ella.

Capia entós a Xuan de la Borrina, cola so perrina y una muyer por compañía. Si tien efectu, podrá esmucise d'una situación abegosa y d'aforfugu.

Vivimos tiempos onde una borrina trupa endólcanos llantándonos la llerza bien fonda. Una llerza a dexar de ser lo que naguamos por siguir siendo.

Nortiamos pal finxu'l cielu y nun vemos nada. Porque la nublina uniformista malpenes nos dexa ver un par de metros per delantre de nosotros.

Y entós el ruxerrux melgueru de la viesca nos díes soleyeros camuda en badagüeyos prietos. Sentimos allalantrones aullar al llobu...

Tresalecemos entós por qu'escample. Y esconxuramos:

"Escampla nublina/valle, vallina/comieron los llobos la cabra cornina/comieron los güesos/dexaron cecina./Ehí va Xuan Blancu/col perru blancu/la muyer desnuda/la perra cozcorruda./Ehí va Riañu/xurando y votando/que te va cortar un calcañu."

La última partida.

2011-11-09T12:27:00.000+01:00

Cantaben los bolos un son murniu al cutilos nel castru. Aquella tarde naide nun falaba. Nin los xugadores, nin el piñu xente que siguíen la partida taben de gracia pa nada.

Yera na tarde nubla y sele la última partida na vieya bolera. Más de cien años vieren xugar a la xente del pueblu. Pero aportare la hora d'esborriar aquel requexu anticuáu pal divertimientu per otru acordies colos nuevos tiempos.

Siguía'l sonsón de la madera metanos el silenciu que s'espurría como una llábana xelu. Naide nun llevaba la cuenta de los bolos que facía caún. Aquella xornada eso yá nun importaba un res...

(................................)

Malpenes pasare un añu de magar la última partida y el llugar de la vieya bolera yá taba ocupáu pola nueva xente que trayía'l progresu a recostines. D'un bar permodernu remanecía un ruxerrux que se sentía dende bien lloñe'l día de la inauguración. La gran pantalla panorámica de tv diba ser el centru de toles güeyaes d'entós pe endelantre y la xente aperiada con gorros y bufandes esparabaniaba y glayaba clisao nella.

Un lletreru descomanáu y allumáu con colores rescamplantes daba la bienvenida a los veceros:

[Peña Madridista "Bar La Bolera"].

El nuevu CEA.

2011-11-05T13:16:00.003+01:00

Acabante presentase'l CEA d'anguaño pétame dedica-yos unes poques llinies nel blog a esti grupu de xente asturiano enfotao en trabayar pol conocimientu y difusión de lo ferial del país.

Préstenme bien de coses d'esti remanecer del CEA (Centru d'Estudios Asturianos). Y podría entamar pola alcoranza histórica que nos trai. Pues recueye'l testigu del primer CEA fundáu allá per 1.920 y esboroñáu cuando la guerra civil. Recuérdanos d'esta miente que l'asturianismu cultural nun ye nengún inventu recién de cuando la transición y yo préstame y do-y la so induldable importancia.

D'otra miente, camiento que yéremos bien de xente los que naguábemos hai tiempu por una organización d'esta frasca. Multidisciplinar, qu'axunte a aquelles persones enfotaes en trabayar con arrogancia na andecha siempre necesaria -imprescindible meyor diría- d'afondar nes nuestres coses, na nuestra cultura, na nuestra llingua. Vien a enllenar un vacíu cultural que yá se facía aforfugante y, espero y deseo, a poner un pocoñín de xacíu nesti zurriburri (con truñonaes y desalcuentros incluyíos) nel que dacuando zarapica'l facer asturianista actual.

Pola procedencia y nome de les persones qu'asistieron a la presentación abúltame qu'hai un sitiu pa la esperanza del que'l proyectu cuaye y espollete. Si de magar esti momentu pa endelantre hai xente que ye quien a axuntase, apurrir caún el trabayu que fai na so faza, dialogar, estudiar, sopelexar lo relacionao cola nuestra tierra... si se llogra facer dende la fonda voluntá del entendimientu, del respetu na discrepancia y poniendo l'interés xeneral d'esta vieya nación penriba del porgüeyu personal, la collecha que pue dar el remanecíu CEA pue ser bien granible y viñar abondo.

Asina que simplemente quixere namás que da-yos a los entamadores la mio felicitación, manda-yos tol ánimu del mundu y desea-yos -falando de papu sanu daveres- el mayor de los ésitos nesta xera qu'acaben d'echar a andar.

Tomasín.

2011-11-03T23:19:00.000+01:00

Dicen qu'una madre ye daqué a parte. Falta to padre y ye una desgracia, pero to madre... yá ye otra cosa.

Dempués acórviente, fáltente, solménente. Y tires p'allá pal monte, col xabaril, el llobu, el raposu, l'esguil. Y ellí afáyeste. Siénteste animal penriba d'humanu.

Nuna ramascada trates d'iguar les tos llaceries colos perrillos y lo que consigues ye cambiar un enguedeyu por otru.

Dempués queda empozase na viesca y andar a la rebusca d'ablanes, castañes, mazanes y lleche pa sobrevivir. Pero too ye cuestión de tiempu y acaben garrándote. Y darréu comenten dalgunos vecinos: que si yes un bon rapaz, que si te teníen azafranáu, que si...

Ehí fuera sigue la seronda. Les fueyes van anubriendo los caminos y l'aire les castañes ximielga los árboles y afala la llocura de los allunaos. Ehí dientro la xusticia romanando cola so balanza. Acaba una historia y los que tamos d'esti otru llau especulamos cómo va finar la qu'entama agora.

Asignatures pendientes.

2011-11-02T18:30:00.006+01:00

Dacuando pienso qu'al entamar l'actual procesu de reivindicación de la llingua asturiana ya'l gallego-asturiano quedaron apostalgaes otres cuestiones que fueron cubriéndose col mofu del olvidu col trescurrir de los años y cuando queremos encetales talo paez que surden rocees per dayures y alderiques bizantinos como cuentu risa.

La cuestión territorial nun ye una menugancia, pero sí una lluriga p'apurrise carrobexazos a la mínima ocasión. El mapa territorial asturianu foi durante abondos sieglos estremáu al que conocemos güei. Y ello ye que, de magar la división provincial de 1.835 fecha por Julián de Burgos, Asturies foi viendo amenorgada la so territorialidá d'una manera bultable. Pero'l simple fechu de plantegar esta cuestión llevanta angüeñes bien gordes en tola contorna y l'engrifamientu gafu salta a la menor ocasión.

La historia asturiana ye una de les asignatures pendientes cola qu'arrecostinamos acuantayá. Y una asignatura qu'asemeya empozase nel suspensu eternu pol tarrecimientu d'entrar d'una vegada por toes na so reivindicación ensin complexos. Ye perconocida la perceguera que tien dalguna xente a percorrer el nuestru medievu por exemplu. Sacamtes la Revolución d'Ochobre del 34 y quiciabes en menor midida'l 25 de Mayu de 1.808 amosámonos poco dispuestos a pescudar nel nuestru pasáu colectivu. Y esi escurrir el bultu namás que val pa qu'otros usen la nuestra propia historia nacional como xugu pa xuncinos a interpretaciones ayenes y llastimoses pa nós mesmos. Pero aneciar, aneciamos en poner torgues a lo que tendría que ser más qu'evidente a estes altures.

La cultura asturiana tien tratamientos dixebraos. Dalgunos elementos d'ella algamaron reconocimientu más o menos xeneralizáu de la so importancia, pero otros siguen zampaos na pila cuchu de lo poco valoratible. Hai ocasiones en que talo paez qu'asumimos el discursu despreciatible hacia lo autóctono qu'esquita de fontes del cosmopaletismu profundu. Siguimos bien de veces confundiendo lo popular colo parrulo, lo paxarero y les pascaxaes caleyeres. Más qu'analizar a modo guiámonos emburriaos por clixés preestablecíos de despreciu a lo llariego.

Y pa rematala ye que la propia xera llingüística paez empecipiar a presentar regalladures. Porque siéntese sonar cada vegada con más fuerza un discursu que trata d'amenorgar la so importancia, que considera que se-y ta dando al tema de la llingua escesiva reblanea cuando lo realmente prioritario son otres cuestiones, zarapicando asina nuna espirica interesosa aventada sobre nós dende los sectores más reaccionarios y antiasturianos que s'alluguen nel nuestru país. En disyuntives falses, auténtiques xigomencies pa incautos.

Asina qu'ello ye que bramente anguaño nun tengo claro si avanzamos o si reculamos. Porque siguimos teniendo unes boleres pergrandes nel nuestru conocimientu territorial, históricu y cultural. Siguimos refugando bien de veces lo ferial d'estos temes. Y pa detrás lo qu'hasta güei paecía nun tener resquiebres como yera la reivindicación llingüística asemeya que sí les tien.

Toles facetes de la nuestra especificidá asturiana figúrenseme como una casona que cada día resulta menos afayadiza pa vivir. Crecen les goteres, argayen les paredes, esgónciense les puertes y los vieyos blasones de piedra malpenes son a estremase. Esbarrumba pasu ente pasu ensin que seyamos quien a ponenos d'alcuerdu en cuestiones que debieren ser básiques ensin apautanos pa faceles rellumar con fuerza nos nuestros discursos y actitúes.

Ye mui discutible que realmente y a estes altures de la historia recién tengamos unos finxos mínimos que nos sirvan de referencia pa guianos y averar postures comunes que nos sirvan pa puxar nuna dirección na que teamos acordies. Mui cuestionable, miániques que sí. Y ello esplica en bona midida'l por qué de la situación llaceriosa u nos atopamos. Nun ye sólo qu'ehí fuera haya un enemigu descomanáu pa valtar. Ye que dientro andamos a la tema ensin tener les coses medianamente clares en bien d'asuntos y nun hai manera d'amechar pa reconocenos nin ente nosotros mesmos.

Mieu.

2011-10-26T19:15:00.012+02:00

La nueche yera escura como boca de llobu. Colás enfilaba pa casa pela caleya coles boleres del gargüelu medio pesllaes pola medrana. Yera viéspora de Tolosantos y yá se sabe que nesta fecha anden los difuntos en danza y la Güestia de ronda.

La lluna allumaba como un candilín feble. De sutrucu, sintió como un ruxerrux pa contra'l bardial y vio unes bisarmes blancucies. ¡Yera la Santa Compaña de xuro!. Entós garró un palu de la sebe y fixo un círculu en suelu pa metese dientro y oxar asina'l peligru qu'achisbaba la so vida. Pegó un blincu, metióse nel redondel, y sintió como si pisare dalgo blanduzo que chiscaba y arrecendía. Al empar, dos solombres salieron a escape al traviés del prau. Abultó-y comitiva mui ruina pa una procesión de difuntos, pero... ¡coses de la ultratumba!.

Xunta la panerona de sos padres, Tuxa comentaba col so mozu Andrés la mala suerte que tuvieren:

-¡Rediola, nin!. Pa una vez que nos ponemos a trebeyar tranquilinos va pasar per ellí'l tochu Colás-.

-Dígotelo yo, manti, colo afayadizos y calentinos que tábemos naquel requexín...-

Cuando aportó a casa, Colás aguantaba como podía la recatafila que-y taba soltando la so muyer:

-¡La Güestia, sí!. ¡Y la pigorcia que traes tamién!. ¡De los coños col xostrón!. ¡Si nun anduvieres de pingu per ende p'acullá pela nueche, pimplando y candonguiando, nun triabes moñiques, rediós que non!. ¡Mira qué entafarre de cocina, gochonzón!. ¡Vas ponete a fregalo tu...!-.

Pan recién.

2011-10-19T12:57:00.001+02:00

A-¡Qué tal, ho, bonos díes!.-

B-Bones, ¿qué te pongo?.-

A-Un cuartu de pan del día. Que nun tea duro. ¡Ye broma, hom, ye broma!.-

B-¡Ca!, d'eso nunca nun tengo, cho. Tengo d'ayeri y d'antayeri namás. Como siempre. Pero blando, blandino, eso sí.-

A-¿Como siempre?. ¿Qué ye que nunca tienes pan recién, ho?.-

B-Nunca. Yo nun trabayo asina. Como hai confianza cuéntotelo. Yo faigo güei'l pan y métolo en recipientes bien herméticos de plásticu pa vendelo mañana y pasao mañana y hasta a tres díes vista dacuando. Dempués recaliéntolo y da gloria ver a los veceros salir abrazaos a ello pela puerta p'alantre como escaleciendo. La cuestión ye que-yos abulte caliente, tiernino y esponxoso.-

A-Pero la xente ¿cómpratelo?, ¿nun se da cuenta?.-

B-¡Véndolo cuasi too!. Y asina aforro tirar lo pasao o da-ylo a les pites, porque calculo meyor y aprovecho cásique too lo qu'enforno.-

A-Tengo que lo ver pa creyelo. Nun soi a convenceme que la xente nun estreme'l pan tresnao va dos hores de lo iguao hai dos díes. Nun pue ser tan fato.-

B-La cuestión nun ye'l día que tea fecho, sinón que tea tierno y esponxoso. Y calentino pa despistar, claro. Y too eso tar, talo. Ya inda escurro más. ¿Ves eses barres d'ehí tan mariellines?. Pues barnízoles con güevu y azafrán, como les paxarines de San Mateo. Y vendo a embute y, pa detrás, más cares que les otres.-

A-Yá. Vamos, que la xente compra guiándose pel güeyu y el palpu y non pel tastu y el butiellu.-

B-Exacto.-

A-Sigo ensin creyelo. Nun pue haber tantu pampirolu sueltu pel mundu. Imposible.-

C-¡Ayó, bonos díes!. ¿Dasme un cuartu d'eso tiernino y esponxoso, ho?. ¡Ah!, y de lo mariellino aquello especial.-

B-Ehí tienes, amigu. Son dos euros.-

C-Toma. Ta llueguín. Gracies.-

A-¡Dos euros por un cuartu pan d'ayeri barnizao!. ¡Increyible!. -

B-Sí, pero ya sentisti alto y claro: "tiernino, esponxoso y mariellino". O dicho d'otra miente: prestoso al palpu y a los güeyos. ¡Ah!, y nun yera d'ayeri. Tenía dos díes y diba yá pa tres. ¡Casi que lo tengo que tirar a les pites...!.-

Farrapes de maíz

2011-10-12T18:30:00.003+02:00

Goyo siempre fuere de la opinión que les mazanes robaes son les que meyor saben. Llevaba abenayá col rixu de comer una bona platada de farrapes. Asina qu'escurrió que les que meyor-y diben de saber yeren les tresnaes con maíz robao.

Pela nueche garró'l coche y enfiló pa les afueres de la ciudá. Entamó a circular despacín achisbando les güertes y les caseríes. De sutrucu, pasó per delantre d'un horru onde s'aldovinaben panoyes colgando nel corredor. Empecipió a naguar pensando nes farrapes y decidió parar ellí a robar.

Esmucióse despacín pela subidoria y cozcóse a les panoyes. Cuando diba entamar a meter delles na mochila, sintió que-y picaben per detrás.

-Qué, aburríeste y decidisti robar unes panoyines, ¿eh?-.

Tres solombres como tres armarios zarráben-y el pasu.

-Nomenón-tatexó Goyo-. Ye que diba en coche y entós vi... y veréis... el casu ye... nun penséis que yo... ¡préstame tanto comer farrapes...!-.

-Pues nun te preocupes, hom, que vamos date nosotros a embute pa que te fartuques per munchu tiempu-.

Ya'l que dirixía'l tríu, añadió dirixéndose a los otros dos:

-Venga, chachos, vamos "proceder"-.

Los acompañantes garraron a Goyo, baxáron-y pantalones y calzonciellos ya inclináronlu p'alantre. El terceru, garró una panoya, esfoyóla y embocó-yla pel aquello.

-Voi date un supositoriu que te va dexar empalagáu pa una temporada, yá verás-.

-¡Arreniego del degorriu!. Pero, ¿qué vais facer, ho?. ¡Aaaiiii!-.

Nel hospital de Xove en Xixón nun daben creitu a la esfueya que fixeren con aquel home que-yos dexaren a la puerta d'urxencies unos paisanos que colaren nun Renault. El feríu presentaba unos desgarros na regaña como pa respigase. Lleváronlu darréu pal quirófanu onde tuvieron un par d'hores trepando per él.

Cuando llevaba yá un par de díes nel cuartu del hospital, aportó la hora de la xinta. La enfermera apurrió-y a Goyo un platu con daqué desfecho.

-¿Qué ye esto?-entrugó él poniéndose un poco repunantucu-.

-Farrapes. Son farrapes de maíz-.

-¿Cómo ye, ne?. ¡Eso nun lo como yo nin atáu a la cama!-remontóse l'operáu-.

-Nun te preocupes -dixo la enfermera fría como un carámpanu-. Si nun les comes tu per delantre métoteles yo per detrás-.

Cuando fueron a recoyer el platu de Goyo, enxamás recordaren atopar otru tán rellambíu. ¡Nin que-y lu punxeren so los bigotes al mesmísimu gatu...!.

La Estafa.

2011-10-05T09:51:00.000+02:00

"Yo semé les patates y recoyí carbón y vi que la tierruca dábame producción". Si nun me falla l'alcordanza asina rezaba un fragmentu d'un canciu de la primer época de Nuberu onde un paisanu esplicába-y al xuez que tenía una tierra con veta de carbón y una moza pa Les Bories con ganáu que-y daba lleche. Una manera afayadiza naquel entós pa dir tirando pola vida.

Y nós escuchábemos aquel cantar col ciñu de la distancia. Porque aquelles yeren les dómines de los güelos y nosotros empobinábemos per otru camín. Díbemos a escuela, al institutu, a la FP o a la universidá. Buscábemos trabayu na empresa, nel comerciu, nel taller o na constructora. Y los más previsores acolumbrábemos el futuru mirando pa una xubilación con una pensión afayadiza pa pasar la última parte de les nuestres vides ensin l'aforfugu d'otros tiempos.

Quedare entós la tierruca de los güelos allalantrón escaecida en pueblu y na memoria. Hasta perdimos les sos llendes y finxos ensin ser pa saber a ciencia cierta pa ú taba...

Y foi entós cuando los grandes poderes financieros que remanen los filos del mundu y ximielguen como marionetes a los gobiernos de los países decidieron axeitar la gran estafa. Amazcaráronla con una pallabra tabú ma metenos la medrana nel cuerpu y echáronla a andar: "la crisis". Y l'aforfugu, la llerza y un nuedu cada vez más fuerte en gargüelu empecipió a añusganos.

Darréu entamemos a ver les consecuencies de la engatada que nos prepararen. Pesllaron los centros llaborales au trabayábemos nuna enfilandrada macabra, cruel y desvergonzada. Los que teníen trabayu nel aquello público comprobaron cómo-yos empozaben los sueldos nel xeleru. Metieron la tisoria nes pensiones esbillando unes condiciones p'aportar a elles que conderguen a xeneraciones enteres a malvivir persabiendo que cuando lleguen a vieyos van facelo al empar siendo mui probes. Y yá se nortien tamién les tisories que van acortar la nuestra sanidá y educación públiques. En resumíes cuentes, la estafa echó a rodar y cada vuelta ye una bola ñeve de más grandor.

Y asina tamos güei ente encabritaos y plasmaos. Resfregando tovía los güeyos incrédulos de que nun pue ser verdá lo que nos ta pasando. Engarrotaos nunos casos delantre de la estafa y con ganes d'armala notros de pura roxura. Tamién en sin saber hasta qué puntu van siguir apretándonos el corrión y si vamos poder alendar o si van partinos pela mitá.

Ye lo que tien la pequeña historia que caún llevamos nes nuestres vides. Una historia que dacuando vuélvese gafa y cruel llegando a actualizar y facenos partícipes d'episodios que contábemos trancaos nun ayeri abegosu y murniu.

Porque, tornando al canciu col qu'entamaba enantes, vamos per un camín onde tener una tierruca -y meyor si ta asitiada en zona carbonera- va dexar de ser daqué de pocu valor heredao del pasáu pa camudar nun auténticu tesoru...

Ocre.

2011-09-28T17:45:00.002+02:00

Fuera falopa ya'l cutu taraza. Atapez.

Restallen los gárabos na foguera. Suenen los regodones cutíos. Tresnen güesos y pelleyes.

Ruxe'l ríu allabaxones nes coraes de la cueva furando'l so calce cada vez más fondu. Los pingolexos goterien. La escuridá respiga.

Nun requexu la lluz de la cañamina alluma la parede. El xamán ta p'acabar la imaxen d'aquel mamuth que da coruxía. Esparde un mogote d'ocre p'hacia u s'afaya'l coral...

Fuera sigue falopando y taraza'l fríu.

El clan mordigaña los últimos cachos de carne. N'acabando otra vuelta va tornar la fame.

Cola alborada ye mester salir a cazar. Sollertes y arrechos pa cuando'l mamuth que pecigaña agora pente solombres nel somantu'l so abellugu camude en real so la lluz del día.

Cuestión de perspectives. O l'aquél d'una semeya.

2011-09-21T17:45:00.004+02:00

Toos nun vemos les coses de la mesma manera, eso ta claro. Nin siquiera nosotros mesmos vemos siempre les coses igual. La perspectiva pue camudar nel momentu menos esperáu.

Dalgo asina pasóme a min abenayá y too por una semeya. El casu ye qu'hai años conocí unes semeyes qu'andaben per ca güela d'unos antepasaos familiares. Unes fotos pervieyes d'eses color sepia con dos bustos malpenes dibuxaos de manera feble. La so antiguedá paecía talamente de cuando la fotografía inda facía galanes nel nuestru país.

De mano viles como daqué curioso ensin da-yos mayor importancia. Hasta qu'un día reparé na semeya de la muyer. El so pechu diba cubiertu con una prenda cruzada, una especie de mantiella o quiciabes un dengue, dalgo difícil d'estremar. Lo que sí destacaba claro yera la manera de cubrir la cabeza. Yera con un pañuelu que paecía pintu y anudáu na parte d'arriba, una de les maneres tradicionales de llevar les muyeres esta prenda. Pescancié entós que quiciabes taba delantre la semeya d'una persona que naquel entós inda llevaba tou o parte del paxellu tradicional femenín.

Reparé entós nes cases vieyes familiares que conociere. Dambes anteriores al sieglu XX y de tipoloxíes tradicionales (contra turria con corredor y mariñana respectivamente). Entamaron entós a cambiame les perspectives a galmios. Pensé que naquelles cases vivieren antepasaos como la muyer de la semeya que vistieren col traxe que güei llamamos tradicional. Qu'escalecieren nel llar, qu'arroxaren el fornu. Y que tamién abangaren na llosa cola fesoria nes manes, que xuncieren, demieren y anduvieren a la gueta, a la yerba, a llendar, trabayando nes andeches y parllando nos filandones... En definitiva, esi mundu tan caricaturizáu y deformáu tantes vegaes, el mundu rural d'antiguamente, yera'l de la xente que fixo posible que yo tea güei equí tecleando estes pallabres.

Y cambióme la perspectiva de ver esta parte de la nuestra cultura tradicional dafechu. Entamé a sentila dientro, como un rixu, como daqué indisoluble de la mio identidá qu'hasta aquel entós viere con tanta simpatía como alloñamientu.

Asina que d'entós pacá , y d'esto hai un bon puñáu d'años, cuando veo a dalguién vistir con arguyu'l paxellu que llevaren los mios (nuestros) antepasaos paezme dalgo solemne, respetable, y totalmente alloñao de folcloricismos paxareros. Y cuando caleyando perende observo cases centenaries, col so fornu de piedra amestáu a la paré, colos sos corredores, colos sos horros na antoxana, dibuxando esi garrapiellu de tipoloxíes propies de la nuestra arquitectura popular, préstame pola vida.

Porque precisamente too ello contribuyó a dar vida a esta identidá mía y nuestra que tan a dures penes ye a aguantar anguaño los xiringones del tiempu, el desdexamientu y l'escaezu.

El Güevu'l Basiliscu.

2011-09-14T18:15:00.001+02:00

Acabante facer una miñatura maxistral, el monxu Agustín aplicábase historiando una capitular d'aquel códiz cola maña y prestancia qu'avezaba a remanar. Foi entós cuando l'hermanu Cirilo cozcóse-y xuxuriándo-y a la oreya:

-Tenémosla entamada. Apaeció'l güevu d'un basiliscu pa la mano fuera del ventanu'l gallineru.-

Agustín arremelló los güeyos como platos y llevantóse pa siguir a Cirilo empobinando dambos camín del piteru. Ellí nun requexucu'l ventanu había un nial y nél un güevu ñarru y ablancuzáu. Yera un güevu gafu que namás que-yos podía trayer llaceries a la hermandá del conventu, taba claro.

Dambos monxos alcordaron guardar el secretu pa nun axorizar a naide más. Pañaron el güevu a furtadielles y guardáronlu nun llugar seguru na celda Cirilo. Agora habíen d'entainar a destruilu y tar n'adelantre sollertes pa que'l malfadiáu gallu colloráu que lu punxere nun tornare a facelo otra vuelta.

Pasaes les doce de la nueche Agustín y Cirilo garraron el güevu y metiéronlu nuna fardela. Salieron pa la güerta'l conventu y con un martiellu machucáronlu y enterraron los escarrapios echándo-yos penriba cal vivo. Dempués tornaron a les sos celdes asoliviaos pol llabor perfechu.

Yá pela mañana los monxos arremolinábense alredor d'un nial qu'había pa escontra'l ventanu'l gallineru. Facíen comentarios y degomanes. Cuando vieron aquel corriellu pa onde punxere'l gallu colloráu'l güevu'l basiliscu a Agustín y a Cirilo púnxose-yos un nuedu en gargüelu que los añusgaba. ¿Qué taba pasando ellí?. ¿Apruciría otru güevu más?. ¡Rediós d'aforfugu!.

Cuando llegaron al requexu onde s'apiñaba aquella xermandía comprobaron la razón de tantu baturiciu y espectación. Una palomba encrespada daba vueltes como alloriada alredor d'aquel nial mientres miraba pa los presentes como rispiendo por una esplicación de pa ónde recóime fuere a parar el so acoricáu güevu.

El túmulu nacional.

2011-09-07T18:56:00.000+02:00

Tien el nuestru país bayura de túmulos. Construcciones llevantaes na prehistoria que van del neolíticu a la edá del bronce a manera de monumentu funerariu. Pero qu'algamen nel so singificáu sagráu más allá. A los anicios del propiu reinu asturianu, como lo demuestren los enterramientos de Pelayu y Favila venceyaos a esti tipu construcciones.

Pero cuéntennos tamién los estudiosos d'estos túmulos que la so función nun yera sagrada y/o funeraria namás, sinón que facíen de finxos qu'indicaben que'l territoriu onde s'allugaben taba yá ocupáu por una determinada colectividá. Marcaben tamién posesión territorial.

Otramiente, cuéntennos les cróniques que los restos del rei Pelayu foron llevaos dende'l so enterramientu orixinal na ilesa d'Abamia a la cueva de Cuadonga onde güei pue vese'l so sepulcru. Claro qu'otra cosa ye qu'anguaño tea realmete ellí, cuestión perdiscutida. Pero'l sitiu simbólicu sí que lo ta, eso ye evidente y visible.

Si dalgo hai nel subconsciente más emocional y primariu de los asturianos que pervive con fuerza actualmente ye'l del apegu al llugar que se considera aniciu del reinu de so. Un llugar que, faciendo una comparación metafórica, marca a los güeyos del visitante'l territoriu "nacional" nacíu naquelles dómines, el túmulu cimeru que marca la pertenencia d'una tierra a los sos llexítimos dueños y vencedores na batalla ellí celebrada.

Pero faltaba-y un aquello importante al llugar pa ser túmulu sagráu y territorial daveres. Yera que dientro d'él reposaren los restos d'un antecesor notable, d'un cabezaleru reconocíu pola tribu, pola nación en formientu. Y d'ehí'l supuestu treslláu de los restos del so entamador pa reposar nes coraes de la cueva sagrada, del llugar sagráu, del túmulu nacional asturianu. Y, acabante facelo, la obra entós sí que taba yá, definitivamente, peracabada.

Y asina sigui funcionando güei pa una parte mui importante del nuestru pueblu pese a los sieglos trescurríos y magar les interpretaciones polítiques interesoses. Un llugar sagráu con un enterramientu notable que funciona como un finxu que señala, de manera nidia, qu'hai un territoriu ocupáu polos herederos llexítimos d'aquel reinu. Onde s'alluga la milentaria nación asturiana. Un llugar llamáu Cuadonga, el gran túmulu nacional de nuestro.

Los cascabelinos del curriverás.

2011-08-24T10:28:00.001+02:00

Los cabezaleros del PPSOE van encetar la Constitución. Entainando, cuando la llexislatura da les boquiaes y ensin referéndum dalu, nun vaya ser que la xente refalfie de votar.

La llave p'abrir la puerta constitucional ye pone-y llende al déficit públicu. A lo meyor queda too neso namás. Pero conociendo'l percal seique seya una xida qu'escuenda más reformes. Porque cuantayá qu'hai sectores perimportantes nesti reinu español que quieren mete-yos mano a ciertos aspeutos constitucionales como, por exemplu, les autonomíes.

Y eso produz una rocea grande, porque yá se sabe que cuando'l ríu suena... D'otra miente yá vemos cómo nos vienen pintando les coses últimamente, cómo les gasten les monxures polítiques y económiques, quién son en realidá los que texen y destexen al so antoxu.

Inda amburen los rescaldos de la penúltima engatada hai unos meses namás. El pensionazu y los recortes llaborales que nos dexaron coritos y albintestate. Como nesti casu, antes de danos como panzorru na estaya del trabayu tamién ruxía'l ríu mientres los mandones diben abriendo les compuertes del banzáu de los comentarios y opiniones interesoses.

Llueve sobre moyao. Talo paez que'l rixu incontenible de les élites político-económiques del reinu por entamala con reformes constitucionales echa a andar y a plasmase en fechos reales. Nun me fío que too quede namás que na reforma anunciada. Desconfío de que seya namás que'l primer pasu pa, de siguío, avanzar más p'hacia otres reformes tarrecibles.

Según el "xeneralísimu" quedare too atao y bien atao. Colos aires de la transición nun lo creyimos y dalgunos hasta arrollicábense de risa nortiando lo que contaben que yera un auténticu paraísu de llibertaes. Pero los años foron pasando cola paciencia d'un pingolexu y agrandando los pilancos que tornaben abondes ilusiones depositaes. El reló de la historia entama a xirar les sos aguyes p'hacia atrás.

Y cada vegada más oxetivos qu'esperábemos algamar camuden nun curriverás con cascabelinos atrás qu'enxamás llogramos ver porque cenciellamente nun esiste. Si acasu los cascabelinos sí. Esos tan dispuestos a apurrímoslos a condición de que los usemos pa orniar los nuestros gorros de bufones colos que saltar y facer moxigangues pa divertimentu de los que de cutio nos mancornien.

Maleducaos (II).

2011-08-22T20:51:00.001+02:00

Escribía allá pel mes de Xunetu un post sobre esa triba qu'abonda cada vegada más de la xente pa la que la educación y los bonos modales son dalgo asina como una gaxapada tarrecible.

Torno güei a añadir a aquellos exemplos dalgunos relacionaos toos col tema de la xintadera y la bebedera onde comportamientos a lo xole hai a embute.

Tenemos pa entamar el casu de la familia o grupu d'amigos que padecen el síndrome que podríemos bautizar como "Hernán Cortés" o, dicho d'otra miente, ellí onde finquen el pie considérense conquistadores d'espacios. Hai d'estos manguanes dos variantes principales. Una, los atrocadores de barres. Vamos, que tas tu tranquilín na barra d'un bar tomando daqué y pónensete esos especímenes de llau. Empiecen a ganate terrén metiéndote la espalda, el costazu... lo que pinte y, cuando quies date cuenta tas un metru desplazáu de la to posición inicial.

Hai otra variante cinexéticamente interesante d'estos primates bípedos. Son aquellos grupos qu'ocupen una mesa pa ellos, otra pa la reciella y, como son conocedores d'esi dichu que reza que nun hai dos ensin tres, ocupen una tercer mesa poniendo nella les chaquetes, les mochiles y demás indumentaria de turistes verbeneros. Y si ven xente de pies o esperando por una mesa pa xintar muéstrense indiferentes dafechu a nun ser que dalgún camareru con galones-yos solicite que dexen llibre el sitiu ocupáu de más.

Tenemos d'otru llau aquellos suxetos cola enfermedá del "güe truñón" o de la vaca ídem, según el sexu. Esta xente pasa pela entepierna aquella norma elemental d'educación que nos diz qu'enantes d'entrar nun sitiu hai que dexar salir a los que coinciden contigo na puerta. Asina qu'estos cornúpetes vocacionales emburrien puerta alantre pudiendo pasa-y penriba al incautu que nesi momentu trata de salir como si lu arrollare una machucona. Un casu asina asocedióme talamente a min y namás qu'un maxistral xiru de la mio cintura col que consiguí poneme de llau impidió qu'una rapaza afalada -supongo yo- pol ruxir famientu de les sos tripes dexare la mio cadarma cutiendo pel suelu como un vulgar felpeyu.

Y qué dicivos de la última moda que fai furor. Ye la que podríamos denominar "Pa Gallu, Yo". Emplégase cuando un bar ta atarraquitáu de xente. En vez d'esperar a que'l camareru garre nota de lo que quier, el gallu de turnu llevántase, enfila pa la barra y fai el so pidíu señalando col deu pa la mesa onde s'alluga.Si nun cuela la xugada nun pasa nada, pues pa sentir vergoña hai que la tener primero. Pero si sal bien la estratexa pue sirvir pa colase delantre una carrapotada xente.

Y yá p'acabar tenemos tola enfilandrada de repunantucos. El que nun ta conforme cola taza onde-y sirven el café -el mismu tipu que pa tolos demás- y pide otra diferente acordies col so rangu, el qu'alloria al probe camareru pa escoyer el vasu onde quier beber que talo paez que nun hai recipiente amañosu nel llocal pa les sos esquisites esixencies. Y otro tanto pal aquello de la comida, anque seya pa encargar un simple bocadillu: que si les rodaxes son demasiao fines, que si mui gordes, que si munches, que si poques, que si picará'l chorizu, que si sedrá mui dulzón, que si lo quitamos y lo cambiamos por quesu, pero ye que quesos hai tantos tamién... y too ello mientres la cola de los que tán detrás esperando agranda per momentos ante la desesperación de la probe dependiente.

En fin, que dir de folgueta unos miserables díes ta convirtiéndose nuna auténtica esperiencia vital. Tou un cursu superior en comportamientos pazguatos, peores maneres y munchu pioyu resucitáu al que paez que-y queda grande cualquier situación de convivencia colos demás. Pero, como tantes veces se tien dicho, ye lo qu'hai.

El tótem.

2011-08-13T00:50:00.004+02:00

Somos un pueblu vieyu. El nuestru bierzu vien de les dómines del reinu asturianu. Pero reculando más nel tiempu llevamos llixos de civilizaciones anteriores.

Porque esta tierra que nós triamos tuvo habitada de los tiempos. Hasta anguaño somos noticia por tener un importante xacimientu neanderthal en El Sidrón.

Rescamplen les nuestres cueves con representaciones rupestres. Escatafinos d'una civilización atlántica, abellugu d'una humanidá fuxendo de les glaciaciones. Dexó la so buelga'l neolíticu. Coronaron los nuestros cuetos los castros...

Y tenemos el nuestru tótem. O el nuestru gran menhir. El gran finxu onde los nuestros güeyos clávense ya'l nuestru corazón respígase: L'Urriellu. De xuru que lu vieren les civilizaciones que nos precedieron. Los nuestros güelos del reinu astur. Y nós.

Seique por esi tirón telúricu de tiempos remotos que dexen el so biltu nel nuestru ser, el Marqués de Pidal sintió nel so día que diba ser un sacrilexu qu'un pie foriatu triare per vez primera la cuguruta del gran menhir asturianu. Y col Cainejo esguilando descalzu algamáronla y evitaron la violación del llugar sagráu de nuestro y de los antiguos.

Enxamás nos cayeron embaxo les fontes, los ríos, la mar, los cumales, les foces y escobios. La natura siempre foi xuncida con un sobéu imposible de francer colos habitantes d'estes tierres atlántiques. Cuéstanos a embute, tovía güei, ser urbanites perfechos. Resquémanos siempre dientro un rescaldu rural que nos emburria a buscar esa natura, esta tierra, esa viesca y esa mariña.

Nun ye entós d'estrañar un res que seyamos un pueblu esteláu nun tótem que s'aldovina nos díes d'orbayu y borrín y que s'alza impresionante cuando'l sol alluma cola fuerza del so discu doráu talo que si tuviere forxáu col mesmu y llexendariu oru de los ástures.

Tenemos tótem. Tenemos menhir. Tenemos un gran finxu nacional. Tenemos l'Urriellu. Porque inda somos, tamos y esistimos.

De dos en dos.

2011-08-09T22:02:00.005+02:00

Dicen que'l que nun quier taza, taza y media. Y cuando esti probe xanu cuntaba tener un mes d'Agostu tranquilu pa folgar y garrar unes vacaciones, les anuncies desagradables xorrecen como les cogordes. Asina que a trabayar a estaya y a comentar mazcayaes de dos en dos, qu'esto medra que mete mieu.

Ente insultos a banderes y fiestes taurines dexare nel so día nel tinteru les declaraciones a lo xole de Serafín Abilio, presidente de la patronal de la construcción. Dixo apocayá esti señor que la minería ya'l funcionariáu yeren exemplu de sectores improductivos.

Home, qu'en tolos sitios hai de too ye una perogrullada qu'enzarra una gran verdá. Claro qu'hai mineros y funcionarios que traten de nun la bicar. Como hai de xuro en cualquier estaya de trabayu que miremos. Pero tamién ye verdá qu'hai mineros que morrienron nel tayu y non precisamente por tar ellí folgando. Y tamién hai funcionarios que se peguen bones escorzunes con unos sueldinos bien ñarros.

Pero, pa detrás, el sector au ta esti señor nun pue tirar voladores pa dar exemplu de nada. Porque toos conocemos, dayures, casos a esgaya d'amagüestos urbanísticos onde constructores y ayuntamientos pónense moraos especulando y enfolinando perres. Asina que meyor miraba pa esa vigona que tien nel so propiu güeyu en vez d'andar buscando payes nos de los demás.

D'otra miente, l'alcalde de Noreña, César Movilla, ta acabante refugar una moción de Conceyu Abiertu por tar redactada en llingua asturiana. Esto yá paez el cuentu de la bona pipa pol aquello d'interminable. La transición pal cambiu de sistema políticu nel Reinu d'España entamó nos años setenta del sieglu pasáu. La Constitución Española ye nada menos que del añu 1.978 que yá llovió d'entós p'acá. Y nella arrecuéyense los drechos de los ciudadanos qu'abelluga y ente ellos ta'l d'espresase nel propiu idioma.

Porque, magar al alcalde noreñense nun-y cuaque, la llingua asturiana esiste, la xente que quier espresase nella tamién, ya'l drechu de poder facelo habría ser, a estes altures -más de 30 años del cambiu de réximen y de sistema constitucional vixente-, una cosa normal y corriente.

Pero non. Hai xente a embute (como acabamos de ver col seleccionador sub-19) que se niega a asumir l'articulación autonómica del Estáu y, dientro d'ella, el plurillingüismu. Allampien de contino por finxar un cotu priváu alrodiu de so onde la España franquista siga alitando, col so centralismu férreu, ya'l so uniformismu llingüísticu onde tolo que nun mire pa l'embeligru madrilanu y pa la llingua castellana ye carnaza de foguera inquisitorial.

Y como la non declaración, a costa fecha, d'oficialidá pal asturianu ye un clavu ardiendo onde s'agarrar pues puñen a la menor ocasión contra la milenta vegaes mancorniada llingua asturiana. Ponen torgues, prohíben, reprimen... Y al final tien ún la sensación de qu'Asturies ye'l reductu más importante de lo que na transición democrática llamaben "el búnker" pa referise a la resistencia encerriscada de los que se negaben en redondo a facer cambiu políticu nengún.

Si, miániques, tenemos nel nuestru país un auténticu búnker d'atechaos del pasáu y yá nos probez d'una manera descomanada desarticulalu d'una vegada por toes.

Fiesta foriata, fiesta sagrada.

2011-08-06T00:36:00.001+02:00

Foi Xovellanos un xixonés que dexó per escrito'l so refugu a les celebraciones taurines.

Pero los tiempos cambien y, de magar la so época hasta güei, cambiaron a embute.

D'esta miente, Xixón ye anguaño la plaza fuerte asturiana au se festexen les tortures de gües, o de toros, nel llinguaxe que pa eventos talos utilicen per ende p'acullá.

Ello ye que l'alcaldesa de la villa de Xovellanos acaba de declarar, nada menos, que les corríes de toros son cosa "sagrada" nesti llugar. Pero, pa rematala, amestó que ser antitaurín ye una moda, polo que se supón que va acabar sumiéndose dalgún día.

Y non. Si falamos de modes, lo que ye una moda -y macabra- ye la de masacrar gües pa divertimentu de la xente nun espectáculu públicu. Porque esos vezos, amás de mancorniar la sensibilidá de munchos ciudadanos, ye tamién ayenu dafechu a les tradiciones asturianes. Nunca cuacaron per esta tierra y ,arriendes de lo escrito por Xovellanos, otros asturianos ilustres manifestaron la so oposición notres dómines a tales celebraciones, como aquellos versos memorables del poeta Teodoro Cuesta.

Porque n'Asturies lo taurino ye una moda importada, que na ciudá de Xixón anecia en facese fuerte y subsistir gracies a les subvenciones públiques. Y nesto d'emplegar los dineros del contribuyente p'abrir les puertes de par en par a colonizaciones culturales de toa mena tenemos los asturianos exemplos a magüeyu.

Les corrides de toros nun son sagraes. Son un espectáculu tarrecible. Nun soi yo nada partidariu d'aplicar el términu "sagráu" pa nada que nun tenga que ver, estrictamente, col tema relixosu. Pero, en casu de facelo, aplicaríalo pa la defensa de lo ferial d'esta tierra, de lo xenuinamente nuestro, de les ayalgues heredaes de los nuestros antepasaos. Y, ente elles, la "fiesta" de los toros nun s'afaya pa nada.

Porque, de toes toes, la tauromaquia ye una fiesta foriata que s'alloña dafechu de la "sacralidá" na nuestra cultura popular pa entrar, de capitón, no xabaz y tarrecible de toa colonización cultural que, pa detrás, sofítase na tortura animal.

Insultu a la bandera d'Asturies.

2011-08-02T13:32:00.006+02:00

A estes hores fierven redes sociales y foros. El seleccionador español de fútbol sub-19 arrampuñó-y la bandera asturiana al xugador Juan Muñiz demientres la celebración de la victoria del campeonatu d'Europa y delantre de los güeyos de mediu mundu.

L'Insultu d'esti individuu algamó d'esta manera llendes descomanaes. Una bandera llegal y constitucional, l'asturiana, ximielgada bien de veces per dayuri por deportistes de toa mena, futbolistes incluíos, foi tratada como un felpeyu por Ginés Meléndez. Y, repito, delantre de bien de medios de comunicación qu'agranda l'agraviu.

Pero si daquién viere nello un xestu de querer namás que la bandera española fuere la presente nes celebraciones del campu equivócase. Detrás d'esta actitú rescampla una ideoloxía preconstitucional y facistoide del técnicu español. Hai que recordar qu'esisten semeyes pela rede onde apaecen xugadores españoles siendo él entrenador cola bandera franquista y ensin qu'amosare desaprobación dala nesos casos. D'otru llau, esa bandera qu'asoleya'l güe d'Osborne tampoco nun-y paez nada mal al señor Meléndez, que tamién la permite utilizar a los sos xugadores.

Yo pienso qu'esti actu d'insultu y ningunéu hacia Asturies y los asturianos al traviés del despreciu a la nuestra bandera nun debiere cayer en baxo a los organismos competentes. Dende la Federación Asturiana de Fútbol al Gobiernu Asturianu o a la Conseyería correspondiente habríen a estes hores d'esixir les disculpes clares y contundentes al seleccionador.

Diz un refrán nuestru que "la que fixisti en Payares, pagarásla en Campumanes". Esta vida da munches vueltes y tampoco nun sedría raro que dalgún día'l Sr. Ginés tuviere que visitar dalgún campu de fútbol asturianu, bien con una selección española o entrenando a dalgún otru equipu. Y cuando vea entós dalguna bandera asturiana, a ver si se pon tan gallu y s'atreve a pone-y una mano enriba.

A ver.

República Bananera de Chiringolandia.

2011-08-01T15:23:00.000+02:00

Una de les carauterístiques d'un réximen clientelar como'l que lleva asitiáu n'Asturies dende cuantayá ye la proliferación de chiringos. Una rede d'organizaciones y montaxes creaos col envís de da-yos agospiu y peselbe bien cebáu a los participantes d'esi réximen.

Una entruga de les que surden col cambiu de gobiernu reciente ye qué va pasar colos chiringos y la so correspondiente lexón d'espertos en vivir tirando del tetu a costa de los contribuyentes. Nótase nerviosismu nel ambiente y ciertu aforfugu producíu pola posibilidá de que s'acabe'l chollu de bien de xente de siguir viviendo del cuentu. Claro que la pregunta del millón ye si va haber una política arrecha qu'emburrie ensin concesiones contra tantu amagüestu d'aprovechaos -que ye ún de los deseos que más rescamplen ente la xente que s'allegró del sapiazu electoral de los caltenedores del réximen- o si la tentación de zapicar na mesma piedra va acarretar una sustitución d'unos chiringos por otros y siguir nes mesmes.

Porque nesti país hai asitiada dende munchayá una manera peculiar d'entender lo público y d'emplegar les perres de toos non como un seutor y unos recursos bien xestionaos y al serviciu de la ciudadanía, sinón como un sacu ensin fondu col que financiar y xustificar gastos que van namás que a engordar el porgüeyu de xente mui concreto con un averamientu políticu mui concretu y que s'afayen na telaraña del réximen de turnu más felices qu'en ca güelu.

Los milenta chiringos que tenemos espreganciaos a lo llargo y ancho d'Asturies son una de les mayores espresiones del cáncanu que nos ta chupando como una guaxa y que nos tien, anguaño, como comunidá nacional a piques del cagüercu. Representen, d'otra miente, una plasmación de la tremenda inxusticia na que vivimos nesta tierra. Mientres tenemos ciudadanos emigrando como cuentu risa, mientres tenemos ciudadanos desesperadamente a la busca d'un trabayu, mientres tenemos ciudadanos malviviendo con sueldos ñarros, tenemos otros ciudadanos viviendo como reis por aciu de pertenecer y sofitar con enfotu el réximen clientelar que los premia cola participación nel chiringu correspondiente.

Porque Asturies sigue siendo, nel momentu presente, una auténtica República Bananera de Chiringolandia. Una sociedá anclada nel enchufismu y la subvención amiguista, parada, casi ensin iniciatives, empampirolada y que nortia pal futuru asemeyándose a la imaxen del gochín qu'espera desarmáu a que-y llegue'l samartín. Asina qu'un bon niciu de que les coses entamaren daveres a cambiar, una amuesa de que la nuestra sociedá fuere recobrando'l pulsu y l'aliendu, sedría dir comprobando como va esbarrumbando darréu tantu abellugu de vividores.

Discursos con mexacán.

2011-07-30T10:06:00.001+02:00

Alcuérdome, allá de los tiempos cuando rapacinos, que si veíamos un sapu encamentábamonos que podía cuspinos o pasanos la gafura del mexacán que llevaba na pelleya y na gaxapada.

Eso del mexacán, sustancia dañible, vienme dacuando al maxín pa ilustrar delles situaciones. Por exemplu, cuando atopo per ende ciertos discursos.

Ello ye qu'abenayá que vengo observando intervenciones onde se faen de menos cuestiones como la historia o la cultura de nuestro. Incluso rebaxando la importancia de la propia llingua en que tan sopelexaes, pues nun ye raro que tean iguaes n'asturianu. Y esquiten, xeneralmente, de fontes venceyaes a la izquierda política.

Una manera d'enguedeyar les coses a lo tonto y a lo fato. Un vezu que paez xorrecer col pasu'l tiempu esti de tresnar discursos onde s'amenorga la importancia de la nuestra identidá como país, del nuestru fechu diferencial.

Paez claro que los remanadores d'eses espiriques asumen un discursu ayenu que busca un porgüeyu bien lloñe del alitar d'una conciencia asturiana con puxu, anque nun seya pa nada esa la so intención. Enfilen per un caleyu que los lleva a una trampa tresnada por un proceder ayenu que s'esguedeya dende cuantisimayá por esfarrapar toa alternativa que s'oponga al so pensamientu y visión centralista sobre Asturies.

Pero de toles maneres son discursos que suden mexacán y nel casu d'espolletar y xeneralizase puen llograr abrir nueves fuércigues y argayos nel llabor identitariu asturianista que ye precisamente'l terrén onde más llogremos hasta güei avanzar daqué y fundamentalmente na faza de la llingua.

Porque, ampliando lo qu'apunté enantes, esos argumentos oldéense abondo, por nun dicir que son una copia descarada, de los que dende seutores políticos rabiosamente centralistes y antiasturianos nos vienen arreflundiendo dende hai munchos años. Y, anque namás que fuera por esto, yá tendría que ser bastantina pa facer una parada y reflexonar fondo.

Talo paez, entós, como si'l mexacán interesosu de los plantegamientos más uniformistes tuviere engafentando'l nuestru propiu discursu llariegu. Cada vegada con más fuerza y presencia. Convenciendo a más xente col avance del tiempu.

Y camiento que pa los que consideramos que les cuestiones identitaries tienen una importancia cimera dientro de la brenga d'esta vieya nación y son ferial irrenunciable de cualquier plantegamientu reivindicativu de nuestro nun tendríen que nos cayer embaxo tales argumentaciones discursives.

Maleducaos.

2011-07-25T13:34:00.000+02:00

Yá escribiera va un añu, más o menos, d'esti tema. Pero cuando ún garra unos díes de folgueta, como foi nel mio casu y comprueba cómo la triba de los maleducaos sigue xorreciendo imparable nun s'aguanta ensin escribir daqué sobre'l tema.

Resulta casi un imposible triar un hotel y nun t'atopar con maleducaos agospiaos nél. Esa xente que cuenta que tan solos instalaos ellí y nun tienen reparu nengún en cantar a les tres de la mañana, poner la tele al alto la lleva al amanecerín o ponese a charrar a voces o a facer milenta ruidos de lo más variao mientres los demás intenten dormir. Porquen ellos van de gallos y sobraos y a los demás que-yos dean.

Esti añu tuvi esperiencies novedoses a la hora de dir al restaurante a xintar. Como por exemplu'l descubrimientu d'un nuevu deporte consistente en qu'una mamá se ponga a xugar a la pelota col so perqueríu rapacín xustamente a la entrada de los servicios, de manera que pa poder utilizalos necesítase l'aprobación de la señora y la criatura tanto pa entrar como pa salir. Poro ye mui recomendable nun esperar a qu'apure muncho la necesidá, nun vaya ser que acabe ún por facelo peles pates abaxo.

Otru comportamientu que me dexó clisáu foi xintando. Acuto una mesina cabo una ventana pa qu'entre l'airín y ver de pasu la cai cuando veo una mocina qu'enfila direutamente pa contra migo. Pienso de mano que se despistó y empobina pa la mesa equivocada, pero non. Cuando llega au toi yo sofita les sos manes metanos el mio mantel, escuca pela ventana nun sé qué, da media vuelta y cola ensin gorgutar. De toles maneres, pensándolo bien, quédo-y agradecíu pa los mios adientros por tener la delicadeza de nun s'apoyar nel mio platu nin d'espirriar na sopera. Tou un detalle, la verdá.

¿Qué vos puedo cuntar de les peripecies qu'atopa ún na playa y que nun sepáis?. Ehí tenéis esa familia armada de trastos hasta los dientes que, col arenal tou pa ellos, aviéntense lliteralmente enriba ti, arrodiándote como a un heroicu xeneral Custer de la mariña y talo que si naguaren pol golorín a humanidá qu'arreciede cuando tamos toos xuntinos y apitiguñaos. Qué dicir de la xente que si nun xuega con dalgún tipu pelota al mesmu llau de los que s'asoleyen nun s'afaya, anque cada poco tean afalagándote con ella y cola arena qu'avienten arrogantes al aire. O d'esos otros que nun son a esfrutar nel agua ensin chiscar a los d'alredor como si fueren xeranios, quiciabes amosando una frustración xardinera que-yos vien de cuando neños. Y nun digo nada de los que s'enfoten n'usar el sable como ceniceru, dexando tola rodiada estrada de colilles que tienes que dir quitando a patadines pa poder espurrir la toalla ensin acabar, involuntariamente, col restu d'un pitu ayenu en plenos focicos tuyos.

Y d'esta miente, la enfilandrada d'anéudotes podría ser interminable. Por exemplu la cantidá de Fitipaldis qu'observes mientres guíes el coche pela carretera. Pero esti tema meyor dexalu pa prau porque daría él solu pa iguar un blog enteru y actualizalu cada media hora polo menos.

Lo anterior son unes pingarates namás de la sociedá onde vivimos y na que vamos siguir faciéndolo indefinidamente, porque nun paez tener arreglu. Podemos dir picu abaxo en munches coses, dende los drechos hasta la economía. Pero lo que sigue nun ascensu impresionante y descomanáu ye la reproducción de los maleducaos que van por llibre faciendo lo que-yos peta ensin importa-yos un res tolos demás. Un andanciu imparable. Asina que, anque nun seya esa la so principal utilización, procurái llevar una bona cigua al pescuezu por si, casualmente, vos valiere pa daqué cuando, con toa seguridá, atopéis per dayures con ellos si garráis un díes pa espansionar agora que tamos en plenu branu. Que los vais atopar. Garantizao.

La bola ta nel aire.

2011-07-16T12:41:00.002+02:00

Abenayá que nun enveredo nesti pergamín pela carril de la política. Cada vegada me peta menos facelo y menos nun llamargal de cainismu y mezquindá que ye au nos movemos davezu per estos llares y que me refalfia y repuna a esgaya faciéndome desistir bien de veces de meteme nestes espiriques.

Pero ello ye que yá tenemos nuevu gobiernu autonómicu del FAC. Y esti ye un tema que ta perpresente dayures y atroca un sitiu cabezaleru nos filandones de toa mena. Y dientro d'elli, una conseyería de cultura ocupada por una persona con prestixu nel ámbitu cultural y favoratible a la normalización de la llingua como ye Emilio Marcos Vallaure. Perdón si escaezo a daquién, pero esti nomamientu corona la presencia d'otres dos persones bien conocíes nel asturianismu como Inaciu Iglesias que ye conceyal en Noreña y Carlos Rubiera qu'ocupa la conceyalía de cultura nada menos que na ciudá más poblada del país, Xixón.

Dizse perende que ye de cortesía da-y a un gobiernu entrante los cien primeros díes pa pescudar y comprobar si axeiten midides que nos abulten (a nós, porque esto siempre ye bien suxetivo) afayadices nes diferentes estayes de trabayu o de si promeses, programes y espeutatives lleven camín de cayer en sucu baxeru. Poro, nun fixi valoración dala hasta güei nin de programes, nin de conteníos, nin de discursos. Tampoco nun la voi facer sobre'l trabayu a desendolcar pola nueva formación política porque, cenciellamente, nunos casos malpenes entamó a facer galanes y notros endagora nun echó nin siquiera a andar.

Pero too ello nun quita pa dir apuntando dalguna cosa que se ta entamando a ver. Como esa presencia que rescampla y a la que me refería enantes de persones procedentes d'ambitos asturianistes en FAC. Y que, a priori, nel tema llingüísticu y cultural polo menos, podría apuntar nel sen de qu'habría ser posible dalgún tipu d'avance (solliño "dalgún", nin echo les campanes al vuelu nin m'empozo nel desánimu) dempués de les polítiques gafes hacia lo llariego coles qu'arrecostinemos durante munchos años.

Tamién ye fácil d'observar que tou esti tema del nuevu partíu gobernante y los posicionamientos hacia'l mesmu, asoleya bien claro la heteroxeneidá actual del asturianismu y la disparidá de criterios a la hora de valorar los caminos per onde empobinar. D'esta miente, hailos que yá se definieron claramente escontra del trabayu que presuponen que va facer FAC d'equí pa endelantre. D'otru llau, tamién hai xente qu'apostó fuerte sofitándolu.

Polo que se refier a esti xanucu echáu al monte hai yá unos años va optar pola prudencia. Eso sí, aclarando que, de mano, nun-yos va negar la confianza a aquelles presones que s'enfotaron nesti proyeutu nin truñar a lo xole contra'l deséu de munchos miles d'asturianos que quiciabes n'abondos casos dende un asturianismu básicu, percenciellu y mui poco tresnáu (escribí nesti blog hai meses un post tituláu "Sí hai base social" y, en cierta manera, estos resultaos electorales apunten nesi sen de que sí la hai) vieron nesta nueva formación la posibilidá de cambiar daqué. Asina que allúgome nesi estragal prudente d'espera que mencionaba enantes. Porque nun hai nada meyor que pañar fechos reales y non suposiciones nin xuicios preestablecíos pa poder sacar les propies conclusiones d'ún teniendo polo menosc un rispiu de base pa parase a analizar.

Acabo echando mano a un símil d'esos que tanto me presten remanar. Na bolera la política, nesti momentu acaba d'entamar una partida y ta acabante de salir pel aire la primer bola. Camiento que ye abondo ceo pa saber si va facer munchos bolos, pocos o nengún. De dar la partida por ganada o arrenunciar a esa posibilidá cuento que nun ye agora'l momentu d'afirmalo. Toca esperar.

Cliques máxiques.

2011-07-09T22:59:00.000+02:00

Una de les representaciones más célebres de la cueva del Pozu'l Ramu (Tito Bustillo) ye un panel au figuren una serie de cliques. Nes coraes de la tierra lo femenino allúgase nel so simbolismu máxicu.

Ye perconocida na nuestra cultura tradicional la cigua, amuletu normalmente talláu n'acebache, anque tamién fechu en coral o en plata, onde apaez un puñu zarráu col deu pulgar asomando pente l'indiz ya'l mediu. Esti amuletu revieyu y conocíu dayures notres civilizaciones y llugares del mundu dende cuantayá nun ye otra cosa que la representación del sexu femenín y emplégase ente nós pa oxar al mal del güeyu principalmente.

Apaez arrecoyíu pelos investigadores del nuestru folklor tradicional el vezu de que la muyer arremangare les sayes pa enseña-y la so fañagüeta al diañu como manera d'esconxuralu y facelu fuxir. Otra vuelta tenemos esi papel protector de lo femenino apruciendo al traviés de l'alcordanza popular.

Son tres exemplos que me vienen en pelondines a la mente y que talo paecen amosar una creyencia ancestral na capacidá del sexu femenín pa protexenos de lo maligno, de lo escuro y tarrecible. Lo femenino como maxa y protección. Tou un tema pa reflexonar sobre los vieyos sustratos culturales de los que venimos.

Un valtu na ribera.

2011-06-30T19:51:00.001+02:00

Taba l'home de la boina sintiendo aquel ventinueve de xunu recitar l'amuravela metanos un zurriburri tremendu y baxo un sol que derritía les neurones allá na ribera pixueta. El recitador acababa de soltar unos versos mientres miraba pa los que s'allugaben nel palcu d'autoridaes y l'home de la boina esmocayábase de risa. Entós sintió que lu picaben per detrás.

Xiró y vio al home del sombreru que lu miraba entientes y mui seriu.

-¿De qué se rii usté?- espetó-y secu aquel home que tenía detrás con xestu desafiante-

-Home, de lo qu'acaba de dicir el pregoneru, tuvo prestosísimo- contestó l'home de la boina tan campante-.

De sutrucu, l'home del sombreru emburriólu zampándolu en suelu dempués de zapicar na pierna d'un rapazón que paecía más que pierna un pegollu. Nun podía creyer lo que-y acabare de pasar. Bufando, l'home de la boina llevantóse enfilando al home del sombreru y ellí mesmo improvisaron un valtu ente puxos y iñíos.

Féxose entós un corriellu xente ante la indiferencia del restu'l personal que siguía como si nada atendiendo pal pregón. Una llamada de móvil a los municipales fixo que se personaren nel llugar y detuvieren a los dos combatientes. Garraron del suelu les sos respectives prendes de cubrir la tiesta y empobinaron pa les dependencies cuartelaries.

-Pero vamos ver, señores, ¿a qué vieno esta amarraza?, ¿quién d'ustedes la entamó y por qué, si se pue saber?- entrugó un municipal bastante enraxonáu.-

-Foi él- dixo l'home de la boina señalando pal del sombreru que, sorprendentemente, confirmó cola cabeza les pallabres del so rival.-

-¿Y pue sabese por qué agredió usté a esti señor?- volvió a preguntar el municipal al home del sombreru.-

-Pues porque a esti señor de la boina prestó-y cómo se metíen coles autoridaes y rióse, y da la casualidá que yo soi votante por tradición familiar d'esi partíu al que representen dende siempre. Como yá lo fuere mio güelu y mio bisgüelu. Y como lo van siguir faciendo los mios fíos y nietos. Eso ye sagrao y si tengo cerca a dalgún que faiga de tán grandes eminencies risión, aperríllo-y ensin más porque considero que se tán moflando de la mio familia- enxareyó l'home del sombreru poniéndose de pies y con un climen mui solemne y hasta marcial.-

-¿Y d'ónde sacó usté que los versos diben pa contra les autoridaes de la tribuna?. Perdone, pero tien una pinta forasteru de meter mieu. ¿Entiende usté bien el pixuetu?- dixo'l municipal estrañáu pola seguridá del interrogáu.-

-Pues non. Nun entiendo migaya. Pero nin falta que me facía entender nada-

-¿¿Entós??- entrugaron a coru los presentes na estancia arremellándose incrédulos nel home del sombreru.-

-Mui fácil- respondió él mui terriu- durante' restu'l pregón taben toos enchipaos, con cara risa y les cabeces bien altes y, de sópitu, punxéronse serios, húbolos que miraben pal suelu, otros p'arriba, dalgún tusía, y hasta una señora ilustre metió'l focicu pel llibru onde apaez escritu'l testu l'amuravela como pa centrase nos versos... ¡y eso que lu tenía garráu al bies...!-

Esi aquello revesoso d'esplicar.

2011-06-24T09:35:00.000+02:00

L'aire del pasáu fechu soplu cuélase peles resquiebres del tiempu y de la historia y algámanos, cíncanos. Dayuri que teas éntrate esi rixu que guaña en ti como un biltu de dómines fuxíes.

Camines pela viesca y sientes esi aquello revesoso d'esplicar al sentir tascar una caña, ruxir les fueyes, burbusar l'agua del ríu amatagáu. Pescancies que, miániques, acullá en dalgún sitiu escuca una xana, camúdase un diañu o apecigaña un busgosu. Tienen qu'andar per ende. De xuro.

Nes coraes de la cueva notes que daqué to quedare plasmao pa siempre nos grabaos y dibuxos ocres de los paneles milenarios. Hasta'l goteriar de los pingolexos resúltate familiar. Too se torna nun xuxuríu llegáu d'ayuri. Afayadizo y pa nada ayeno.

Milenta vegaes y en sitios a esgaya afálate'l rixu llegáu d'allalantrones, como en pelondines, a posase nel megollu del to ser, biltar y espolletar.

No más fondero, desnudos de toa convención, degomanes, tratos y contratos, somos Pindal, Peñatú, Cuaña, Cuadonga, Tudela, Urriellu, gallón, osu, asturcón, viesca, fonte, vallada, cordal, puertu, vagamar...

Y sentímonos guirrios saltando pilancos pol otru yo insalvables. Vengámonos con ixuxús de los silencios impuestos. Francemos les torgues del futuru y entramos victoriosos ximielgando los pendones del ayeri.

Eso ye concretamente'l rixu, el soplu del pasáu colándose peles resquiebres del tiempu y de la historia.

Eso ye esautamente esi aquello revesoso d'esplicar.

Cohors V Asturum.

2011-06-14T18:25:00.003+02:00

Ye la tercer vegada que me ven cabo'l ríu cuando nun tuvi ellí. Ta bien claro. El güercu anunció per tres veces yá la mio muerte. El badagüeyu nun almite dulda. Mañana, na batalla, voi morrer.

Esta tarde falé col home de más confianza que tengo. Casi un hermanu. El va encargase de facer la mio estela. Va quedar asina afitada la mio alcordanza al traviés de la piedra. Y quiciabes d'esta miente nun seya escaecíu pa siempre endolcáu pola nublina del tiempu.

Queden lloñe'l mio llar y la mio xente. Cuantayá que los dexé atrás por aciu de Roma. Combatí bien y fui honráu. Algamé'l grau de signifer. Eso fixi estos años hasta hoi. Caminar y lluchar. Porque mañana yá nun voi tar nesti mundu. Nin voi poder tornar enxamás a la mio tierra. Nin siquiera nella nunca nun va descansar el mio cuerpu.

La piedra ye duro y dacuando paez eterno. Enfótome na mio estela. Quiciabes cuando pasen munchos años y xeneraciones y yá nun quede escarrapiu míu daquién l'atope. Y pueda veme grabáu nella. Y tamién poles lletres grabaes nella saber quién foi, cuál foi'l pa, de qué castru y tierra vieno, reclutáu na Cohors V Asturum, un signifer de nome Pintaius.

Tiempu de yerba

2011-06-08T19:43:00.003+02:00

"Xunci les vaques, Ramona
que nos vamos a la yerba.
Cátame un zapicu lleche,
que tengo seca la llengua."

Cuando empecipia a turrar el sol camín del branu entama tamién el tiempu la yerba. De segar, esmarayar, voltiar, curar, embalagar, cargar pa llevar a la tenada o facer vares de yerba nel prau. Porque nesta tierra atlántica dan collecha les pumares, les nisales, la güerta... pero tamién los praos. Y la collecha de los praos ye la yerba, bierzu d'una riestra actividaes de la nuestra cultura tradicional.

Cuando la primavera vien afayadiza obsérvense los praos enyerbaos. Y ehí ta la xente, como los antiguos de casa, aplicándose a la xera de curar la yerba pa que'l ganáu nun esglamie pel iviernu. Recuedo, de los tiempos, cuando me tocó dir a la yerba en sitios pindios. El puxar y el sudar prau arriba y abaxo recompensaos pol llabor fechu y afechiscáu. Yo, el meyor llugar pa dir a la yerba ye onde hai un ríu o nun regatu fesquilinos. Presta a embute poder refrescar y garrar fuelgu.

Dacuando tamién pasen coses que dan perceguera. Como l'aquello de garrar una pala yerba onde va acuruxáu un esculibiertu que s'esmuz, foín, pente la fargata del incautu de turnu. Menudos respigos y glayíos, compañeru.

Too cambia y anguaño la mecanización fai que'l trabayu d'andar a la yerba seya daqué estremáu del d'antiguamente. Un pocoñín más llevaderu, pero que naide nun s'engañe, que sudalo hai que lo sudar igual. Hasta los bálagos desapaecen camudaos en paquetes plastificaos. Pero la xera de la yerba sigue y tien puxu enforma pente la población de les zones rurales.

Tan enraigonada ta esta actividá que mesmamente nes nuestes villes nun ye raro enforma sentir comentar a dalgún que tal o cual día va dir echa-yos una gabita nel aquello de la yerba a los familiares que tien na zona rural. Porque esta xera ye una actividá qu'axunta, tovía hoi, a una camaretada d'asturianos.

Dende rapacín siempre tuvi fama de ser bon golifador. Asina que suelo reparar en coses quiciabes rares o inusuales pa otra xente. Una d'elles ye'l golor de la yerba segao. Prestosu a embute, como tamién lo ye prestosu'l golor de la pación y la toñada segaes nel so tiempu. Y ye que cuando la natura d'esti vieyu país esparde'l so esplendor los sentíos argutos antroxen de prestancia.

Pues, en fin, qu'entama'l tiempu d'andar a la yerba. D'atropar p'alimentar al ganáu pel iviernu. Tiempu de sudu y trabayu acompañaos pol sonsoniar de grillos y xilgueros. Pol ruxir de les fueyes de carbayos y castañales. Pol gorgolitiar del agua fresquilino del regueru. Y ehí, en cualquier requexu, la bayura de los praos anunciándonos un branu qu'endagora ye de nuestro...

El Cuquiellu

2011-06-01T16:09:00.002+02:00

Balba y Colás yeren mozos cuantayá, pero a ella nun-y prestaba casase endagora. Esto a Colás probecía-y cada vuelta más y nun veía nunca'l momentu de xuncise cola so moza en matrimoniu.

Un día que Balba taba garrando un calderu d'agua na fonte, sintió cantar al cuquiellu: "¡cu-cu, cu-cu, cu-cu!". Ella creyía muncho nestes coses y entós violo claro. A los tres años xustos taba casada con Colás.

Llevaron toa una vida de felicidá xuntos y pa celebrar les bodes d'oru entamaron una cena nun restaurante de ringurrangu. A la hora los cafés díxo-y Colás:

-A, ne, ¿tu cuando supisti que querís casate comigo?--

-Una tarde cabo la fonte cuando sentí cucar al cuquiellu-.

-¡Ai, bobona!-contestó-y Colás. Nun yera'l cuquiellu sinón yo que taba amatagáu tres la castañalona qu'había ellí achisbándote...-.

A los dos meses d'aquella revelación Balba y Colás taben acabante roblar el so alcuerdu de separación nun bufete d'abogaos au punxeron puntu y final a toa una vida feliz y a comuña. La muyer enxamás-y diba perdonar aquel engañu al so maríu. ¡Asonsañar al cuquiellu pa casase!. ¿Ú se viere cosa tala?.

De la que salíen del despachu, el reló de pendilexu que colgaba nuna de les paredes daba la hora: "¡cu-cu, cu-cu, cu-cu!".

Los Argüellinos.

2011-05-25T13:39:00.000+02:00

Cuando nel mes de Xunu de 1.808 el secretariu de la Xunta Suprema d'Asturies, D. Xuan Argüelles Toral, propunxo crear una Guardia d'Honor que curiare de la nuestra institución proclamada soberana, entamaron a vese a los granaderos del Reximientu d'Infantería d'Hibernia desendolcando tal llabor.

Pero pasó pocu tiempu pa que la xente llano rebautizare con cierta chancia la guardia recién creada poniéndo-y un nomatu acordies col apellíu del so impulsor: los "argüellinos". Y eso metanos un conflictu bélicu con tolo qu'acarreta. Hasta neses circunstancies remanecía'l sentíu del humor per estos llares.

Pue restrexase dende bien antiguo esi vezu nuestru de quita-y reblaneda a lo que se presenta como importante o de ciertu ringorrangu baxándolo a un llinguaxe más de casa o describiéndolo al traviés d'esti sentíu del humor que siempre caracterizó a la nuestra xente. Yá na nuestra lliteratura clásica aprucen exemplos d'esto coles descripciones moxigangueres de los acontecimientos protagonizaos pola xente del más altu bierzu y la nobleza.

Un vezu ésti qu'utilicemos y siguimos utilizándo dacuando como una arbía pa baxar al nivel de lo algamable lo que nos pue paecer allarribón, poco más qu'al llau de los dioses. Pero quiciabes taría bien aplicala a lo más llariego. Porque nosotros mesmos, la xente que con más frecuencia llanzamos discursos y propuestes pa la defensa del país, zapicamos davezu nun escesu de solemnidá, de ponenos tirrios, engarrotaos, escesivamente trescendentes, empicorotiaos y hasta imprescindibles.

Y barrunto yo que si entamáremos a venos a nós mesmos con un pocoñín más de distanciamientu, si fuéremos quien a contemplanos y describinos al traviés d'esa peñera del humor críticu, a baxar del pedestal de la importancia en que - acasu inconscientemente y por puru automatismu- bien de veces nos engolamos, igual pali que pali consiguíamos dir aposentando, reflexonando, mirando les coses dende otres perspectives y, quién sabe, hasta algamando oxetivos qu'anguaño se nos antoxen casi imposibles. Como, por exemplu, consiguir d'una vez por toes que la nuestra vieya Xunta Xeneral vuelva a ser un parllamentu afayadizu pa defender los nuestros intereses, dignu y valoráu daveres pola xente asturiano. Y hoi, cuando se cumple un nuevu aniversariu del llevantamientu históricu del 25 de Mayu de 1.808, paezme un día amañosu pa dexar de llau vieyes zunes perafitaes ente nosotros y nortiar pal futuru con un pocoñín más de gayola y esperanza.

A lo meyor si dalgún día tornaren los "argüellinos" a custodiar la entrada y dependencies del nuestru parllamentu históricu podríamos tar ante toa una bona señal de que les coses van escamplando...

El Vofal.

2011-05-18T18:45:00.006+02:00

¿Que qué ye un vofal?. Pues ye un pallabru qu'acabo d'inventar (o eso creo yo) y que ye un apócope de tres términos: votante-fanáticu-alcagüete. La so esplicación pue que rescample sola, pero vamos poner unes pingarates.

Votante. Porque siempre vota, anque lu lleven en camilla y con goteru. Pero güeyu, nun vota nunca en blanco nin fai esbilla nenguna de les opciones polítiques. Vota siempre a los mesmos ensin posibilidá nenguna de cambiu de criteriu.

Fanáticu. Nun-y importa un res si la so opción gobierna bien o mal. Si mete la mano o non na caxa. Si alluga nos puestos importantes a parrulos con menos sentíu que la pega en rau. Si la política llevada a cabu polos que vota va escontra de los intereses xenerales, incluíos los de so y los suyos, o si ye beneficiosa pa los ciudadanos. Va votalos igual. Y puntu redondu.

Alcagüete. Como consecuencia de lo anterior xustifica y alcagüeta les mayores barbaridaes y los más bultables desantinos. Dende amagüestos alministrativos, hasta represiones xabaces, pasando por tou tipu de corrupteles. Tien un gritu de guerra favoritu: "ta bien que roben los míos, qu'antes robaron los otros".

Dalgunos vofales son quien a sacar de la so actitú porgüeyu pa ellos. Pero otros nun solo nun comen una gaspia, sinón que salen totalmente perxudicaos pola so necedá, o seya, que pa detrás son tontos hasta velo y dexalo.

Finalmente, tienen un efectu perniciosu pal propiu sistema políticu de representación al traviés del votu nes urnes. Esñicen un pautu, non esplícitu, d'honradez pa colos sos conciudadanos. Porque suponse que toos debieren dir buscando lo que consideren meyor pal inerés xeneral a la hora d'escoyer les sos opciones polítiques, lo que xeneralmente se conoz como'l bien común. Los vofales sáltense too esto a lo xole y cuando se convierten nuna xermandía numbéricamente considerable, distorsionen el propiu funcionamientu del sistema. Cometen fraude, anque seya na categoría de la ética o la moral ciudadanes.

Nun vos digo onde podéis atopar vofales. Simplemente invítovos a llevantar los güeyos y afinar la oreya ellí onde teais. De xuro qu'atopáis unos cuantos.

Orquesta desafinada. Orquesta magnífica.

2011-05-13T23:00:00.000+02:00

La Orquesta del Réximen ye una banda zaparrastrosa y cafiante. Atorolla y alloquez al más pintáu. Tien un instrumental acordies a los sos conocimientos musicales: turrulles, berrones, riquerraques, zamploñes, xiblatos, vigulinos de maíz, matraques... Y empleen tou esti arsenal sonoru ensin gota de xacíu nin conocimientu del son. Si tocaren dayuri, fuera de les nuestres llendes, seríen l'exemplu cimeru d'una orquesta desafinada.

Pero'l llugar de los sos actuaciones ta ente nosotros, porque asina lo escoyeron les partitures de les urnes. Y entós les coses cambien dafechu y darréu. Los vigulinos son stradivarius, les turulles mangnífiques trompetes, les matraques timbales almirables y les zamploñes clarinetes melgueros. Equí naide-yos isa los perros como pasaría acullá de la raya. Equí naide los escuerre a gorrazos, nin-yos xibla, nin los acorvia, nin s'espreceten gafos hacia los sos conciertos atorollantes y alloriantes. ¿La razón?. Pues porque equí los gremios de llambeculos, peselbristes, tiradores del tetu profesionales, pañadores de migayes y visitadores impenitentes de tou tipu de comicios y amagüestos encárguense d'aponderar y empicorotiar les magnífiques virtudes musicales de seres tán virtuosos. Asina qu'esa pila incompetentes ponse d'exemplu a siguir como una orquesta magnífica.

Y cuando la ética, la decencia, la honradez o simplemente'l ser persona, caen en sucu baxeru, en cualquier sociedá, la salú de les relaciones sociales, de la xusticia o de la solidaridá zámpen nuna vertixinosa baxada en barrena hasta esfronase y esñizase. Y los ciudadanos llibres camuden nuna corripa de gochos fozando nel duernu de la esllava qu'ellos mesmos contribuyeron a iguar por desdexamientu, desvergüenza o coruxía. Cuando'l dios porgüeyu se fai omnipotente y omnipresente, la orquesta más desafinada y fedionda adórase y empicorótiase como la más magnífica armonía digna d'acompañar a los mesmísimos coros celestiales.

Dos testos del "Llibru De Los Sieglos".

2011-05-11T19:15:00.002+02:00

Tengo un códiz pervieyu, con tapes de cuero y escorneyes, qu'aportó a min de los xanos más antiguos al traviés de la borrina del tiempu. Titúlase el "Llibru De Los Sieglos". Na so tapa principal lleva incrustáu un cuélebre engrifáu d'oru, con dos rubís encarnaos nos güeyos y les ales y el guispiu de nácare. Ta escritu percuriosu en lletra visigótica con santos perfechos nel trazu y nos colores. Nes sos fueyes relátense acontecimientos propios d'una enfilandrada de sieglos pasaos hasta hoi. Ta inacabáu y yo correspuéndeme dir anotando lo qu'al mio entender rescample de les dómines que me toca vivir, siempre poniendo procuru en ser fiel y curiosu cola lletra y les semeyes y llegalu dempués a los xanos que me sucedan. El casu ye qu'abrilu ayeri peles páxines onde se fala de los sieglos X y XIII y atopé dos testos asturianos. El primeru ta en llatín, pero onde l'asturiano entamaba a aprucir dende'l so bierzu. El segundu ta n'asturiano medieval. Voi ponevos dos fragmentos d'ellos:

"...uobis uindo adque concedo in ipsa uilla: terras, pomares, zeresales, kastaniales, prunales, ficares, nissales, nel quantum arbusta ibidem abuerit; montes, fontes, aquis aquarum, exitus per suis terminis, cessum et regressum; quantum omnia ad eandem in ipsa uilla pertinet uidetur; pro quo accepit de uos pro id in pretio: id est zuramen linteo, manta, porca, ziuaria, sizera et conpane sub uno pretio modios quinque..."
(Añu 950)

"...Ea propter ego don Arias Pédriz canónigo de Oviedo fago karta de vendición a vos domna Orraca Díaz abbadessa de Sant Pelayo; viendo a vos una casa que he enna villa de Oviedo enna Nuzeda con so ixido detrás e con so orto assí commo sta finsado, que me pertenez de mia compra per bona karta rovrada, que compré de domna Sancha Alfonso e de don Nunno so marido..."
(Añu 1250)

Una bona muestra de cuando la nuestra llingua yá facía galanes na escritura...

[Dambos fragmentos tán pañaos del llibru "Antoloxía de Prosa Bable". X.Ll. García Arias. Caxa Aforros d'Asturies, 1.981. La semeya del post ye una miñatura d' Alfonso II del "Liber Testamentorum", sieglu XII].

La Carta.

2011-05-04T18:30:00.002+02:00

Siempre pela nueche alcordábase d'ella. Toles nueches estrellaes. Entós alendaba fondo. Resfregaba los güeyos clisaos y cansos. Asomábase pela ventana y miraba pal cielu. Ellí taba la so fía.

Dempués quedaba pensatible una vegada ensin midida nel tiempu. Y sentábase nel bancu vacíu, de la cocina vacía de la casa vacía.

-Voi pone-y una plumada...-xuxuriaba repetidamente toles nueches.-

Porque toles nueches l'afalaba'l rixu de manda-y unes pallabres. Toles nueches durante tantos años yá que nun s'alcordaba de cuándo entamare cola repitición d'aquel ritual: la ventana, el cielu, los güeyos, la carta pa la so fía...

Nortiando pal firmamentu, cuando les estrelles aprucíen ceguñando como una pintalarrama de güeyinos azules y ñarros, buscábala y veíala. Ella tampoco nunca faltare a la cita con so ma cuando pela nueche'l nuberu guardaba'l rebañu algodonáu na so corripa.

Darréu escarabayaba sobre'l papel rebilicoques nun idioma que namás que la so fía y ella pescanciaben. Una nueche, y otra nueche, y otra, y otra...

La llábana de los sos ochenta y seis años arregallába-y el llombu abangándola. La so mano tremando y ensin pulsu dalu siguía escribayando, el so maxín aneciaba recordándola, los sos güeyos mirando allaribones...

Viviere sola tola so vida desque sos padres colaren pa siempre d'esti mundu cuando ella tenía quince años. Enxamás se casare, nin tuviere mozu, nin lo fixere, nin pariere. Tola vida naquel cuetu curiando'l ganáu, fesoriando na llosuca... Y toles nueches estrellaes garabatiando naquel papel nesi idioma qu'empleguen los que nunca nun adeprendieren a escribir...

La so fía nun morriere. Simplemente vivía nel cielu de magar ella tenía quince años. Ellí lleía les cartes que so ma, ensin faltar nin una sola nueche, nidia, estrellada y sele, iguaba mientres resfregaba los güeyos clisaos y cansos.

(Nel XXXII Día de les Lletres Asturianes).

Los Pezos.

2011-04-27T18:20:00.004+02:00

Entamaren a llamalos asina, "los pezos", desque na so piel apaecieren manches y pintalarrama pola mor de les radiaciones. Yá se sabe que pezu ye aquel home o animal con pintes na pelleya. Esta malura y otros cáncanos fueren les consecuencies del material radiactivo guardao nes sos galeríes mineres dende diba pa trenta años.

Cuando dieren l'anuncia de camudar les vieyes mines en depósitu de residuos radiactivos, la xente nun se preocupare un res. Nes sos conversaciones d'aquel entós remanecíen otros temes más importantes:

"Tenemos una selección de fútbol con un gran futuru...". "Esi rapaz de Gran Hermano ye un bragueteru aprovecháu...". "Esti branu voi turrar col sol mediterráneu...".

Dempués pasó'l tiempu y aniciaron les malures. Comentábase entós que si antaño se morría de silicosis, anguaño morríase d'esto otro, que'l trabayu ye lo que tien, y al progresu hai que-y pagar dacuando col tributu de la salú.

Nos hospitales de " los pezos" yá amestaren les unidaes oportunes p'atender al númberu creciente d'enfermos con cáncanos. Les conversaciones de los ingresaos y visitantes nun estremaben migaya de les de bien d'años p'atrás:

"Esti añu'l Madrid sal de la tabla con esi equipazu...". "En Salsa Salsera la cuñada d'aquel toreru dio-y a retorcer...". "Los mios nietos van braniar a una playa d'Alicante...".

Asina trescurría la vida diaria na tierra de "los pezos", antiguamente minero, coles vieyes galeríes abellugando refugayes radiactives, y un final anunciáu pa tantos nos cuartos hospitalarios axeitaos a costa fecha p'aquelles enfermedaes inevitables...

Noble.

2011-04-20T14:05:00.000+02:00

Conocí a un paisanu que viniere a vivir a una finca cerca de la mio viesca. Traxere con él un perru mastín. Pin, qu'asina se llamaba l'home, asitió un tonelón d'esos de los llagares sofitáu nunos pegollos na finca ya instalose nél. Colos restos d'una muria iguó-y al perru una especie de corru pequeñu cabo'l tonel pa qu'abellugare. Y asina vivíen de vecinos y andaben siempre xuntos. Al mastín llamábalu Noble poque esi ye ún de los significaos d'esta pallabra y yéralo daveres.

Pin fuere pastor de rapaz y dempués llevare durante munchos años una casería enantes de treslladase a vivir a la finca. Yera un home sabiu qu'estremaba los páxaros pola so manera de cantar y conocía de qué animal yera cada rastru qu'atopaba pela viesca. Tamién sabía de yerbatos y floritos pa usar de melecines en fervinchos y emplastos. Y de dichos, cosadielles, vezos y sones de nuestro sabía a magüeyu. Hasta dominaba l'arte de cantar acompañándose él mesmu a la gaita.

Una nueche sele del branu, Pin achucóse nel tonelón a dormir y yá nun despertó. El so corazón decidió reposar tamién pa siempre. Noble vieno a avisame de la muerte del so amigu, que non amu, y col trasgu Manfurada y Sidru'l Guirriu, abrimos una fuexa so'l tonel y enterrémoslu onde siempre nos dixere que-y gustaría reposar pa siempre.

D'entós pacá Noble enxamás dexó de curiar la finca de Pin, del so tonelón y d'abellugase nel corru que'l so amigu fallecíu-y axeitare. Pasaba tiempu enforma sentáu xunto al cagüercu de Pin. La xente de la contorna y yo mesmu llevábamos-y de comer y teníamos-y siempre enllenu un duernu redondu de piedra con agua fresco. Como los xanos conocemos el llinguaxe de los animales, una tarde que Noble y yo tábamos pacetibles a la solombra una faya contóme que, en morriendo, quería que lu enterrare nuna fuexa al llau de la de Pin. Consideraba la finca la so tierra, el tonel la so casa y a Pin el so amigu pa siempre anque yá nun tuviere con él nel mundu de los vivos.

Y ye que puedo aseguravos, falando de papu sanu, que nel corazón d'abondos animales que llamamos irracionales añeren una nobleza, una amistá y una fidelidá que yá quisieren poder poseer munchos corazones humanos.

Hermanu Osu.

2011-04-13T18:10:00.000+02:00

Nos capiteles del conventu de Villanueva nel conceyu de Cangues d'Onís podemos ver representada la historia de la despidida de Favila de la so muyer, Froiluba, la partida a la cacería, y la so muerte lluchando con un osu.

Nun dexa de ser curioso que l'unicu rei asturianu que se reconoz como muertu nun combate nun lo fuere a manes d'un enemigu humanu, sinón d'otru rei, el de les viesques asturianes, l'osu.

Tamién me llama l'atención que munchos cuentos y lleendes de personaxes famosos que se tresmitieron a la llume del llar y nes nueches de filandones tienen por protagonistes humanos, non a grandes soldaos o bravos guerreros, sinón a llexendarios cazadores d'osos, o simplemente a estos animales.

La relación de los asturianos colos osos ye mui particular. Compartimos con ellos durante sieglos y xeneraciones el territoriu y guerriamos contra ellos dende la reconocencia d'un animal maxestuosu dignu de batise con un rei hasta la consideración probetaya de siemple alimaña pa desaniciar.

El final previsible de tantu enfrentamientu foi al qu'empobinábamos hai pocos años inda. Tuvimos a piques d'acabar cola especie definitivamente. Y foi entós cuando nos vieno un rellumu a la mente, como una llamada que nos encamentaba de la salvaxada que díbamos peracabar.

Entamemos entós a valorar la triba osera como nos tiempos más vieyos. Devolvímos-y el tronu al rei de les nuestres viesques y enfotémonos n'ayudalu a recuperar población y territoriu. Dexó de ser enemigu y alimaña pa convertise en símbolu de la nuestra natura y hasta n'emblema del nuestru país.

Nun tán los osos a salvu del too del peligru que cuerre la so especie de desapaecer, pero vamos avanzando pel bon camín. Siempre van quedar los xabaces a los que-yos importe un res el so futuru y anecien n'esterminalos. Pero lo importante ye comprobar cómo cada vegada más conciudadanos s'allegren de los esbardos que van poblando los nuestros montes, que refuguen cualquier agresión que se cometa sobre esta especie, y que la consideren como parte de la cultura de nuestro.

Del enemigu osu al hermanu osu. Un bon reblagu pa bien. L'únicu animal de la nuestra biesca al que-y permitimos l'honor de dexanos ensin un rei por aciu d'un combate ente iguales. Casi nada.

El gorru coloráu.

2011-04-06T18:15:00.000+02:00

El mio amigu'l trasgu Manfurada ye la comedia. L'otru día taba yo sentáu cabo'l caborniu cuando lu veo venir tou escalabráu y fechu una llaceria.

-Pero, Manfurada, ¿Qué ta pasó, hom?-

-¡Ai, Xanu, que me puñó un güe semental!-

-¡Rediós!. ¿Y cómo foi eso?-

-Pues verás. Hai una cuerria enllena de castañes valdunes nuna llende u pacen unes vaques con un güe semental. Asina que amazcaréme de verde pa pasar desapercibíu pente'l prau y pañar una goxa castañes... Pero'l malfadiáu animalón namás que me vio de lloñe turrióme y tuvi que salir prau alantre y furar pente unos escayos pa que nun m'enganchare... ¡Y d'estes traces quedé!-

-A, Manfuradina, y el gorru tamién lu llevabes de verde, ho?-

-¡Rediosla, el gorru non, llevábalu coloráu!.-

-Entós nun t'estrañe nada de lo que te pasó. A los gües gústa-yos más dir a lo colorao que a un rapacín un xeláu de chocolate...-

Dempués tuvimos charrando un cachu y el mio amigu trasgu despidióse y siguió'l so camín. Quedé yo reflexonando sobre aquel sucesu y entós el mio maxín llevóme en pelondines a una comparación. Pensé yo qu'hai munchos asturianos que traten d'amazcarar los sos rasgos culturales y llingüísticos col envís de pasar desapercibíos n'ambientes que consideren "finos" y onde sienten vergoña de presentase como son en realidá. Y sucede con frecuencia que se-yos escapa dalguna pallabra, o dalgún detalle, que faen que la so trampa rescample dexándolos n'evidencia...

Y pienso yo cuánto meyor-y diría a esa xente si fueren per esti mundu como realmente son, ensin avergonzase d'ello y llevándolo con arguyu y ensin complexu nengún. De xuro que diben tener muncho adelantao y nun tendríen que pasar la vida con esi aforfugu del que, de contino, s'obliga a comportase como' l que nun ye.

Y nós.

2011-03-30T18:20:00.001+02:00

Tingla sele l'agua que cai de los pingolexos d'El Pindal. Pente les solombres escuquen animales vivos per aciu de la mano que na nueche de los tiempos dexó inmortalizaos los sos trazos nes paredes de la cueva. Y ellí nel so requexu ta'l mamuth, esconxurando la nublina de los sieglos p'aprucir delantre los nuestros güeyos y recordanos la xera de los vieyos cazadores. Too ello acoricao nel vientre amorosiegu de la tierra...

Xibla l'aire nel monte que fai de llende pelos conceyos de L.lena y Quirós. La Cobertoria. L.lagüezos. Impresionante, el dolmen de la Mata'l Casare caltiénse arrechu, cola so llabanona inclinada como antoxana de la necrópolis. Un brazal d'aqueru forxáu n'oru salió de les sos coraes. Más arriba, les llastres fincaes en semicírculu máxicu de Los Fitos. El monte como cagüercu de la tribu...

Cuenten que foron los marineros los últimos en rebautizar el llugar col nome del dios Neptunu. Na Sierra de la Borbolla, álzase maxestuosa la figura de Peñatú, la cabeza del xentil, la peña u la tribu dexare inmortalizada a la so xente y rindiere'l postrer homenaxe al so cabezaleru col so puñal d'ufrienda. El finxu'l cielu, relluma col collor del bronce...

Los tabayones ruxendo. La cueva como aniciu. La batalla. El mitu. El bierzu. La morada de la diosa camudada en virxen. El sepulcru del primer rei. L'abellugu tribal. La lleenda. Cuadonga...

Y, dayures, la viesca, la fonte, el ríu, El Pindal, la mar, la mariña, el monte, La Cobertoria, el guirria, la danza, l'ixuxú, Peñatú, el texu, el llar, l'orpín, Cuadonga, el castru, l'escobiu, l'alborada...

Y nós.

El ferre y les palombes.

2011-03-23T17:05:00.001+01:00

Tan avezáu y seguru anda'l ferre de la inxusticia de cazanos que yá lo fai cuando-y peta ensin falta de quitar el caperuchu.

Tán avezaos y seguros tamos nós de ser palombes, qu'esnalamos desdexaos esperando a que seya otru'l qu'acabe nes sos garres.

Porque nosotros mesmos escoyemos a costa fecha'l destín de ser palombes, magar lu amataguemos cola mázcara de la imposibilidá de camudar les coses y de la resignación.

Y too ello pudiere ser, guapamente, falso. Pues allúgase nes nuestres vides, enfotos y xuntanza'l potencial de convertinos en cetreros que faigan comer al ferre na nuestra mano.

(PD: soi consciente qu'esti post ye pura utopía, pero dacuando ta bien falar d'elles)

La vaquina de Dios.

2011-03-16T18:20:00.003+01:00

Hai dies de suerte. Como aquel qu'entamaba pa Ramón. Porque hai que tener suerte pa llevantase, dir pa la llosa, y comprobar cómo una vaquina de Dios se te pon na chaqueta, cacipla un migayín pela manga, y dempués esnala. Asina que Ramón pensó qu'aquel día taba de suerte y había que lu aprovechar.

A un tiru piedra más p'abaxo taba la casería del so vecín Pericu. Y nella una vaca-guo alloriada ratina, que lo mesmo salía a la caleya a llambete como un perru que te turriaba ensin más.

Dempués de caciplar na so antoxana, Ramón empobinó caleya abaxo y pasó per delantre cá Pericu. Y foi entós cuando a la vaca ratina alloriada faltó-y tiempu pa puñalu dexándo-y la culera fecha una llaceria.

Tuvo la suerte qu'ente unos vecinos que taben per ellí charrando echáron-y una gabita, empixanon a la vaca, y lleváronlu pal hospital.

Ellí, al ver aquella estroza, mientres entainaben a preparar el quirófanu, entrugó-y un médicu:

-Pero, home, ¿qué perru lu encetó d'esta manera?-.

A lo que Ramón arrepostió:

-¡Ca!. ¡Perru nengún!. ¡La vaquina de Dios!-.

¡Ai de min, que m'escurez!.

2011-03-09T16:34:00.001+01:00

1) Al principiu foi'l verbu.

Y falemos de la necesidá de recuperar una llingua que diba quedando adulces como un paxarín. Y entós entamemos a sestaferia-y un camín. Delles veces casi a palpadielles como suel asoceder cuando se faen galanes dayures. Falar y escribir, un proyeutu perguapu.

2) Dempués foi l'erru.

Ye mui importante solliñar la pallabra "dalgunos", porque xeneralizar ye inxusto y escribir a lo xole. Ello foi que dalgunos entamaron a escribir y a nun falar. D'esta miente, entamaron a surdir dalgunos escritores qu'escriben y que nun falen. Dalgunos académicos qu'escriben y que nun falen. Dalgunos profesores qu'escriben y que nun falen. Dalgunos militantes llingüísticos qu'escriben y que nun falen... o que nenguna de les dos coses.

3) La bolera de la sebe foi medrando.

De mano, teníamos una bolerina na sebe de la fala pela que se podía colar un gatu. Dempués foi engrandando hasta facese una bolera per u coyía una oveya. Al final una bolerona pela que pasa ensin raspiar un güe de bon climen y mayor pesu. Cayóse na contradicción. D'un llau la murnia de ver menguar los falantes patrimoniales. D'otru llau aneciar n'escribir muncho y falar poco.

4) L'arte de mirar pa otru llau.

Da igual encamentar tolo que se quiera. De poco o nada val poner el deu na llaga. Xuxuriendo o vocinglando pa ver si s'enteren, dalgunos nun quieren saber nada y miren pa otru llau mientres siguen impasibles per un camín que lleva al precipiciu. Dellos, los más enchipaos, nun tienen miramientu dalu y espétente coses espantibles quedando tan campantes: "lo importante ye escribir, falar yá...".

5) ¡Ai de min, que m'escurez!.

La nueche amiya sobre nosotros. Escurez ya'l candil tien poca mecha y pocu saín. El camín va despintándose y cada vegada caminamos más por inercia. Al aldu y a palpu. Dalgunos paez que nun se van enterar yá enxamás, tiren p'alantre a bota boléu y alón. Fala-yos - falar- ye dar voces en castañéu.

Fálame. Fála-y.

Pues eso.

El reló.

2011-03-02T17:15:00.005+01:00

Esti reló de la semeya yera d'un tataragüelu de mio.

Ye de cuerda con un pendilexu interior de bronce. Toca les hores con repetición, dos vegaes, y da una campanada a la media. Fálta-y la mayor parte de l'aguya pequeña, pero pue vese igual la hora.

Lo que más me sorprendió cuando aportó hasta min ye que sigue funcionando perfeutamente. Asina que cuando toi rabilando per casa puedo guiame por él cuando marca les hores y les medies.

Avezo a sentame nun sofá allugáu embaxo d'él cuando quiero descansar o poneme a reflexonar a la mio manera. Y toi tán acostumáu a la so compañía que puedo pecigañar guapamente ensin que me moleste pa nada.

Delles veces dame por pensar que cuntó les hores de xente que vivió antes que yo y que cuando los sos corazos dexaron de valtar, el reló siguió marcando les hores siempre qu'hubiere una mano que garrare'l testigu de coyer la llave y da-y cuerda.

El casu ye que nestes dómines llegó-y el momentu de cuntar les hores de la mio vida. Seique, cuando yo cole d'esti mundu él podría siguir ximielgando la aguya grande ya'l cachín de la pequeña per bien de tiempu más.

Pero pa ello sedría mester qu'otra mano garrare la llave col envís de facelu funcionar como lo faigo yo agora.

Y esa ye la dulda que tengo y tamién ciertu esmolecimientu, anque pueda paecer a dellos una fatada. Porque quiciabes nun heba naide que-y abulte importante siguir curiando del vieyu reló y acabe nun sobráu, o regaláu, o hasta na basura.

Si asina asocediere sedría una pena. Pues col final de les coses vieyes llega tamién l'escaezu d'una parte de la nuestra alcordanza.

Cultura, folixa y mazcaritos.

2011-02-27T18:15:00.001+01:00

Recuperar les tradiciones ye importante y tamién prestoso. La bayura cultural de les mázcares ivernales ye un terrén onde nun paramos d'atopar ayalgues.

Les xornaes de Valdesoto axunten cultura y folixa como parte d'un tou. Entamen los vienres con ponencies, informantes y conceyu abiertu colos participantes. Y apréndese enforma nelles, ensin dulda nenguna.

Tamién cultura, pero esta vegada xunida la la folixa, ye lo que podemos observar, pero más prestoso inda, compartir, na xornada del desfile del sábadu qu'esti añu tuvo una continuación el domingu pela mañana en Carbayín. Yo tuvi nos actos del vienres y del sábadu. Ye'l tercer añu que voi y la esperiencia ye arriquecedora a embute.

Participar nel desfile de mazcaritos del sábadu ye una esperiencia mui recomendable. Vese de manera estremada participando que mirando. Los sidros empobinando la xermandía marutada como nos vieyos tiempos. Personaxes que dan xuegu a tente bonete desendolcando'l so papel son bien improtantes. Como a basoira barriendo al revés, lo de fuera casa pa dientro y lo de la cuneta pa la carretera. Un rapaz qu'impresiona arrincando tapinos a fesoriazu llimpiu ensin reparar si'l terrén ye comunal o particular. Os choqueiros incansables, xingando cencerros y blincando. Claro que dir nun desfile d'estos tien los sos riesgos. Si ves un mazcaritu vestíu de pelleyes de los pies a la cabeza nun-y quites el güeyu, porque con un mancéu de rames que lleva na mano solmena per detrás y a traición al que se despiste y ye bien normal atopar xente arrascando la culera a lo llargo'l recorríu. Y asina bien de mazcaritos más faciendo'l so papel.

Esti añu pela primer vez hubo invitaos de fuera d'Asturies, de la vecina comunidá gallega, concretamiente de Viana do Bolo. Os boteiros impresionaron a la xente coles sos mázcares de madera rebilicoquiaes y orniaes, xingando esquilones y corriendo pente'l personal. Mientres, o folión, enllenaba la rodiada col so tinglar de fesories cutíes ya'l retumbar descomanaú de la so percusión. Bramente, si te dexes endolcar pel so tronar sonoru, acabes zampuxáu ensin remediu na folixa ya'l xaréu. Ye d'agradecer la so valoratible intervención nes xornaes d'esti añu y felicitalos.

Parte importante y d'agradecer ye l'aportación de dellos vecinos ufiertando a les puertes de les sos cases l'aguilandu. El que nun bebió y comió foi porque andaba despistáu, desganáu... o con una mázcara que-y trancaba'l pasu a la boca. Frixuelos, empanaes, embutíos, vinu, sidra, llicores... vamos pa merendar guapamente nun Xuasús me valga.

Y pa remate, na corrada de la ilesia la representación de la comedia. Los sidros llendando'l corru xente y el diañu faciendo de maestru ceremonies. Una comedia mui bien filvanada y representada, con oficiu, llarada de golpes d'humor que provocaben les carcaxaes d'un públicu siempre atentu pa nun perder gota de los xestos y los diálogos. Pero una representación que tamién dexa sitiu pa la crítica y afala col obleru de la so guiada a quien correspuenda.

Al final cola ún pa casa cola sensación de tenelo pasao estupendamente y pensando qué novedaes habrá pa les xornaes del añu siguiente, si marutase igual o d'otra manera... Y agradeciendo a l'asociación "El Cencerru" el trabayu impecable d'organizar y echar alantre estes xornaes que yá algamaron esti añu la cuarta edición. Y que seyan munches más.

De los sidros.

2011-02-25T13:24:00.005+01:00

Cuando reparo na imaxen d'un sidru o guirriu viénenme a l'alcordanza vieyos tiempos tribales, de druides y xamanes.

Les cintes que coronen el caperuchu representen la maxa. Col rau de raposa de la cogoruta toquen a les muyeres y asemeya daqué fálico. Les esquiles del corrión escorrexen malos espíritus. El collor encarnáu de la careta y la faxa recuerda l'ocre de les representaciones rupestres. El blanco de traxe ye'l color de lo candial y los dibuxos en ziszás de les perneres alcontrámoslos nes dómines prehistóriques.

Nun me cai tampoco embaxo que les melenes tresformen al sidru nun ser metanes lo animal y humano, vezu enraizáu nos tiempos más vieyos de les civilizaciones. Ehí tán los resclavos del busgosu, les tresformaciones del diañu burllón, les representaciones antropomorfes nes cueves o'l dios celta Cernunnos.

Y bien importante'l simbolismu de la piértiga qu'utilicen p'arreblagar penrriba de sebes y portielles y p'algamar más alto y más lloñe que cualquier otru miembru de la tribu...

El Brañeru Marnuetu.

2011-02-23T18:20:00.003+01:00

Conocí siendo un xanu mozu a un brañeru que quixo ser pescador, anque la mar namás que la viere un par de vegaes y dende la oriella. Llamábase Favila como'l famosu rei. Asina qu'un día baxó del so mayáu y enrolóse nun barcu de baxura nun puertu de mar.

La primer selmana nun pescó nada por aciu de que la pasó toa vomitando pela borda ente amoriaciones y pensando que'l mundu diba finar pa él en cualquier momentu. Pero foi alicando y como yera pertrabayador y arteru aprendió llueu l'aquello de la pesca y foi mui apreciáu pol patrón y los compañeros.

Pasó d'esta miente bona parte de la so vida y yá de vieyu fixo alcordanza de la so esistencia humilde y trabayando de contino, y entró-y otra vuelta la señardá de la braña polo que tornó a pasar ellí los sos últimos años dedicándose a pastoriar como cuando yera mozu.

Un día empecipió a sentise mal y foi al médicu que-y dixo que tenía una enfermedá incurable. Esto tráxolu pensatible una temporada, amusgáu y ensin falar nunca con naide. Una tarde sintió comentar a unos pastores qu'andaba pela rodiada un osu bien grande. Entamó entós a buscalu hasta que lu foi atopar nun requexu d'una biescuca. Enfiló pa él y engarráronse. Darréu l'osu desfíxose del brañeru.

Cuando lu atoparon agonizando foron pa escucha-y les últimes pallabres que xuxurió:

"Pasé tola mio vida dende rapacín trabayando honradamente y enxamás salí de probe. Asina que paecióme afayadizo morrer como un rei faciendo honor al mio nome".

Tar de moda.

2011-02-16T17:20:00.001+01:00

Teo un amigu al que-y regalaron unos zuecos d'esos que son como unes botes de cueru con suela de madera. Cayéron-y en gracia y un día d'agua paeció-y afayadizu dir con ellos a los sitios au avezaba a parar.

Empezó entós a dase cuenta de qu'había xente que-y miraba pa los pies y dempués poníense a xuxuriar coses a la oreya. Dio-y a él tamién por ponese a reparar nos marmuradores y diben de toles maneres. Habíalos en playeros pingando como esponxes. Otros en sandalies colos pies enchapinaos. Nun faltaben acróbates engolaes nunos tacones de vértigu faciendo equilibrios pente'l barrizu. Y pensó entós qu'ente toa aquella camaretada'l que más afechiscu diba pal día que taba faciendo yera precisamente él, l'oxetu de les güeyaes ayenes.

-Estimáu collaciu-dixi-y yo mientres me contaba la so esperiencia-, nun ye cuestión de si dibes acordies al tiempu o non, sinón "colos tiempos". El megollu ta en que nun dibes a la moda.-

Y entós respondióme daqué que tovía güei me fai cavilgar enforma:

-Amigu Xanu, la verdá ye que nun me preocupen un res les modes que cinquen la manera de calzar o vistir. Hai otres modes muncho más llastimoses. Son aquelles qu'estremen qué llingües y naciones tán de moda y sirven pa presumir, tar arguyosos y aparentar, y cuáles son pa dexar nel sobráu de les coses anticuaes ya inservibles...-

Far West.

2011-02-10T16:50:00.000+01:00

Definitivamente, el tramperu O'Cágonros taba a piques d'alloquecer. Aquello yera'l mundu al viesu. Yá diba la tercer vegada consecutiva que los castores-y poníen les garduñes a él pa garralu. ¡Les sos propies garduñes!. Nun yera a saber por qué raru mecanismu aquellos animales desarrollaren en cuestión de poques selmanes tanta intelixencia. Nun sólo nun yera a garrar ún, ye que queríen garralu ellos a él.

Y dempués vieno lo del venáu. Aquello yá yera como pa ponese a mexar y nun echar gota. Viólu paciendo tranquilamente. Apuntó p'aperrilla-y, y va l'animal y echóse cuerpu a tierra nel más puru estilu militar pa esquivar el proyectil. Dempués guardóse tres d'un árbol y escucólu dende ellí esquivándo-y tolos tiros. Pero lo qu'escapaba a toa comprendoria foi cuando l'animal dio-y el culu y con una coz artera aventó un morrillu contra O'Cágonros que-y pasó talamente raspiándo-y una vidaya.

Y qué dicir del so amigu, el nativu Pluma Chunga. Años de compañerismu y bon entendimientu, y aquella tarde... Pues que diba'l bon tramperu a regala-y unes pelleyes y unos mogotes de cecina de bisonte al so compañeru del alma y va y recíbelu llantándo-y una flecha nel costazu izquierdu, que a poco más y fíende-y pela metá'l corazón. Dempués empecipió a nubláse-y la vista, a taramiellar... y perdió'l sentíu...

Cuando esconsonó O'Cágonros vio aquella imaxen espantible. El castor, el venáu y Pluma Chunga abangábense enriba d'él sorriendo con unes vestimentes blanques. Pescanció entós que morriere y taba nel mundu de la ultratumba y tornó a desmayáse somorguiándose nel suañu...
(..............................................................................)
Nuna esquina del cuartu del hospital de San Agustín d'Avilés, el médicu esplicaba a la desconsolada muyer del alministrativu camudáu en tramperu imaxinariu espatarráu na cama y al so fíu'l gafu desenllaz d'aquel episodiu llaceriosu:

"Quince díes trancáu en casa delantre del televisor papando les repeticiones de toles películes del Far West qu'echa pela tarde la TPA y alimentándose cásique namás que con palombines de maíz ye normal que dieren esti resultáu. El probe tien una chifladura de campeonatu. A ver si cuando despierte y recupere un migayín lu mandamos a siquiatría. Pero, polo menos, quedónos desnutríu, pero nun morrió de fame. Garrémoslu a tiempu..."

Sobre les portielles.

2011-02-07T19:04:00.003+01:00

Los guirrios, cuando atopaben una portiella, nun se paraben a abrila: saltábenla.

Almeyor pinta qu'un día da-y a la xente por saltar, tan guapamente, les portielles que dalgunos anecien en zarrar.

Cuestión de ganes y de práutica.

Que coses más gordes se vieron.

El cacíu rotu.

2011-02-02T16:30:00.000+01:00

Delles veces, cuando pon ún la oreya a ver qué siente ayuri, el resultáu ye la vircha. Onde menos s'espera apruz esa frase, esa pallabra, esi resclavu llingüísticu de nuestro. Inda nes zones más castellanizaes del país rescampla, dacuando, dalgún bixu llingüísticu del asturianu.

Bien de vegaes la nuestra llingua asemeya un cacíu rotu del que munchos de nós tenemos nes nuestres cases un cachu. Y ye cola andecha de toos como podemos dir iguándolu adulces y con procuru. Tán lloñe tán del xacíu l'enchipamientu como l'escesu de modestia. Nun convién dir de sabicheros nin tampoco pensar que nun tenemos migaya qu'apurrir.

Yo cuantayá que tengo perafitáu'l vezu de dir siempre cola oreya sollerte cuando me muevo pel país. Y non sólo cuando lo faigo per zones au la llingua ta más viva. Tamién lo faigo en llugares onde la castellanización amuésase más bultable. Y en dambos casos, pue siempre deprendese daqué, magar seya un llixu llingüísticu. Pero na situación esgonciada en que ta l'idioma, toa gueta ye positiva.

Porque'l cacíu d'esta vieya llingua ye de toos. Y atropar hasta l'ultimu cachu d'él ye perimportante. Como perimportante ye tamien que caún apurramos el que tenemos na nuestra casa y andemos argutos cuando caleyamos per ende, porque siempre vamos poder deprender daqué de xuro. Y tener bien claro que toos somos importantes y necesarios nel llabor de la so igua ya'l nuestru cachín siempre va ser valoratible pa ufiertar.

Un fuexu de mui difícil salida.

2011-01-28T18:10:00.005+01:00

Metiéronmos nun fuexu, nuna fondigonada, nuna olla de mui difícil salida. Con unes paredes nidies que faen casi imposible esguilar pa salir y ver la lluz. Quiciabes fuere más correuto dicir que mos emburriaron per un sotambiu au vamos a escentellamos con toa seguridá a la vuelta d'unos años.

Una tropiella de políticos, empresarios y sindicalistes que comparten l'oxetivu común de vivir tirando del tetu d'un Estáu que caltenemos colos nuestros impuestos, tán a piques de roblar unos alcuerdos que van dexar les posibilidaes de miles de ciudadanos de xubilase decentemente na llende de la utopía. Y ello acompañao col aguilandu del retrasu en dos años de l'actual edá de xubilación.

Dicir que tamos en crisis pa sofitar ciertes midíes impresentables ye esponer una media verdá qu'amazcara una gran mentira. Porque persabemos que n'époques de crisis ye cuando unes minoríes yá asitiaes nel refalfiu económicu aprovechen pa ver cómo-yos xorrecen los ingresos y la bayura. Del otru llau sí qu'hai crisis, pero pa los de siempre qu'otra vuelta más tenemos qu'arrecostinar col pesu de sacar alantre una situación a la que lleguemos per un camín que sestaferiaron otros.

Lo llamentable y estrompético ye que son eses élites que remanen el poder y los recursos, acompañaes pola so corte de monxinos vividores los que van iguar les midíes pa salir d'una situación que -amenacen ellos- nun se pue caltener y de nun-yos facer casu'l sistema futuru de pensiones va argayar y fundise dafechu. Pero güeyu al cartafueyu: el futuru de pensiones nuestru, non el d'ellos que lu tienen blindáu de por vida.

Mentanto un día sí y otru tamién vemos xorrecer corrupteles como cogordes na seronda, quedamos arremellaos ante marafundios de recursos, contemplamos plasmaos cómo se multipliquen prebendes, chiringos, sueldos descomanaos d'amiguetes puestos a deu, viaxes de placer amatagaos de grandes esfuerzos por abrir mercaos. Adicamos tamién cómo medren les fortunes de grupos empicorotiaos nuna riqueza porcaz, indecente y atropada a costa d'esturniar milenta economíes modestes... Pero ehí nun se toca un res. Porque, a lo que se ve, la crisis nun cinca nesos llugares sagraos de bixorda y despilfarru. La crisis ye la nuestra gran propiedá privada que tenemos que curiar la lexón de currantes y paraos.

Asina que la cosa ta cantada. Cuando s'axunten alrodiu la duerna los matachinos afilando los corones yá sabemos el futuru que-yos espera a los gochinos de la corripa. Ya'l nuestru ta a piques de quedar robláu y rescamplando: si llogramos aportar a ser vieyos tamién vamos llegar a ser probes al empar. Menudu finxu'l cielu que s'acolumbra na llexura. Pa ponese a tremar.

El cuernu, la resignación y l'esbarrumbe.

2011-01-23T17:10:00.001+01:00

Dicen que cuando pierdes una vaca y atopes un cuernu nun lo perdiesti too. Atalantao a bota boléu pue paecer una verdá. Pero escarabicando un pocoñín rescampla la trampa. El dichu encamiéntanos sobre la nuestra inocencia, proceder fatu y comportamientu pinín.

El bombardéu mediáticu ye descomanáu. La programación de les nuestres mentes dende les cogorutes del poder aparrante. Cabrúñennos el cerebru tolos díes con mensaxes que nos empobinen pel camín atopadizu pa los que quieren vivir cada día meyor a costa de que nós vivamos cada día peor. Lo que güei ye blanco, tres del trabayu reprogramador afayadizu, veslo mañana prieto.

Reculamos. Los drechos algamaos con sudu y sangre al traviés de xeneraciones van camudando, darréu, en simples moxigangues. En resclavos d'un pasáu que talo paez que nun nos finca a nós. Tornamos a carrenderes a les dómines de la industrialización. Los nuestros drechos esnalen hasta asitiase nel siglu XIX. Siendo arrogantes, a entamos del XX.

Primero prindáronnos la vaca y convenciéronnos de que la perdimos nós. Dempués, volvieron otra vegada a convencenos de qu'atopando un cuernu teníamos que nos sentir pergayoleros, blincar y echar ixuxús al aire. Antaño enveredaben a les alimañes pal caleyu pa garrales. Anguaño, guíennos pa onde-yos da pola santa gana pa remananos como a pininos descerebraos. Porque saben que los nuestros cerebros son sos, que pa eso tienen les arbíes amañoses pa prindánoslos.

Y, de manera que nun hai quien la torne, avanza l'esbarrumbe. El nuestru futuru ye una simiente echada en sucu baxeru. El so collor, prietu como los coyones d'un burru. Pero remolémonos pola menugancia y les caxigalines. Toi nun bar tomando daqué. Enfila pa min una persona conocida nuna situación económica pa garrar con pinces. Ponse a charrar comigo. Nada del trabayu, nada de la crisis, nada de los recortes llaborales y de toa mena que nos espeten. Coméntame... que la chaqueta que llevo ta fuera de la moda d'anguaño. Quedo xeláu y si me pinchen xúrovos que nun sangro. ¿Cómo cola que ta cayendo pue haber xente tán n'ayén?.

La resignación lleva al esbarrumbe. Tamos nello. Quédanos el cuernu y, anguaño, amosámonos contentos porque nun lo perdimos too. L'ábanu va veninos enriba cuando un día paremos unos segundos a reflexonar pa qué cóime sive'l puñefleru cuernu. Y pescanciemos la cruda realidá de que pa nada. Nin siquiera pa facer un turullu pa llamar a conceyu y reaccionar. Porque pa entós vamos ser unos robots, unos nuevos esclavos ensin posibilidá dala d'esmucinos del xugu.

La mayor llaceria nun ye que traten d'estruyate como un pulgu estruniáu. ¡Cá!. La mayor llaceria, miániques, ye que t'arrampuñen el cerebru y te lu dexen como morgazu secu. Y neso tán. Y neso tamos. Porque lo realmente cierto ye qu'el que pierde una vaca y atopa un cuernu... ¡perdiólo too!.

L'Orpín.

2011-01-19T17:10:00.001+01:00

Güei, col amanecerín, orpinaba na viesca. L'orpín ye como l'afalagu con que nos besa, adulces, na pelleya la borrina. Cai selequino y acaba calando fondo na tierra ensin marafundiar gota dala. Mata'l secañu los raigones y fai xorrecer la yerba na toñada. Anguaño orpina y orbaya menos qu'antaño y ye una pena, porque dambos son parte ferial d'esta tierra de nuestro y regalu del cielu, al traviés del nuberu, a la so natura.

Hai un términu que s'oldea colos anteriores pa espresar cuando cai l'agua como si les nubes lo peñeraren perfino que ye'l de barbuzar. Recuérdame esta pallabra talo que si los vieyos dioses ástures dexaren pingando les sos barbes milenaries hasta amorosanos con ciñu cuando raspiamos con elles. Porque cuando la barbuza nos endolca tamién maten la sede los nuestros raigaños y retueyen les nuestres vides.

Yo, adeprendiéronme de rapacín a estremar l'orpín y l'orbayu. L'orpín sedría inda más fino, como destilao pela borrina. Menudín ye tamién l'orbayu, pero non tanto. Ye como si l'orbayu fuere l'hermanu mayor del orpín que vien a echa-y una gabita pa calistrar más d'arrecio na tierra. Nun sé si, a lo llargo del país, faen tamién esta dixebra ente dambos hermanos o si escurque son ximielgos en significaos dayuri.

Ya'l casu ye qu'ello foi qu'esta mañana caleyaba, al aldu, meciéndome col monte, el mofu, les fontes, les muries... y l'orpín amugándolo too a tatás. Préstenme los díes buxos de nublina y agua. Sedrá que soi xanu. O quiciabes que dende'l bierzu, cuantayá nunes dómines que yá nun s'alluguen na mio alcordanza, viere un día al orpín esbariando callandino, neto a un xuxuriu llentu, pel cristal de la ventana.

Lluna llena.

2011-01-12T18:25:00.000+01:00

-¡Rediós, que nesta casa nun se ve gota!. ¡Apúrrime'l candil, Cesário!-

-¡Cá!. ¡D'apurrir candiles nada, Xuaca, que-y queda poca mecha y l'aceite revenío de freír qu'usamos dexa la casa con un fedor a pescaízu rancio qu'hai qu'andar con pinces nes narices...!-

-¿Entós qué quies que faigamos, que zapiquemos y nos escorniemos, ho?-

-Yo nun quiero nada. Lo que tenemos que facer ye fixanos y andar con procuru pa evitar accidentes-

-Pero vamos ver, Cesario del alma, ¿por qué nun prendemos una migayina la lluz, hom?. ¿Tantu gastu ye?-

-Sí ye gastu, ne, sí ye gastu. Y cola xuba de la lluz que nos acaben de llantar en tol llombu tenemos qu'escoyer: o comemos o nos allumamos. ¡Y habrá que-y dar prioridá a la comedera, digo yo...!-

-¡Alabao, alabao!. Y ¿ qué vamos a tar allumándonos cola lluz de la lluna, ho?-

-Pues sí, Xuaca. Estos díes tamos de suerte porque hai lluna llena y ta'l cielu escampláu. Asina que teniendo bien xubíes les persianes podemos aprovechar bien la so lluz y de pasu aforrar-

-¡Ai, mamina, tu vas matame, Cesario!. Y yá que yes tán llistu, ¿pues dicime cómo nos vamos allumar en cambiando la lluna?-

-Pues como soi tán llistu como tu dices, yá lo tengo tamién previsto. En cambiando la lluna, tiramos unes colchonetes na cocina y llevamos unes bacinilles pa facer ellí la vida. Porque nun sé si cayisti na cuenta que delantre la ventana hai una farola del alluntamientu que nos vien de viciu...-

¡¡Unga-unga-bam-bam!!

2011-01-06T10:15:00.000+01:00

Cuando'l bravu guerreru Bablenada compareció ante'l gran xefe de la tribu de los monollingua, Bablenunca, notaba cómo los pelleyos-y esbariaben pela so aflautada cadarma. Ellí llantaos ún escontra d'otru miráronse un ratadín entientes y, entós Bablenada faló:

--¡Escapósenos!--

--¿Quéeee?. ¿Cóomooo?--glayó Bablenunca arremellando los güeyos como dos llunes llenes.--

--Pues eso, qu'escapósenos...--

--¿Y cómo foi eso posible si lu teníeis arrodiáu ente quince?--volvió a entrugar el gran xefe qu'entamaba a ponese colloráu como un pitu per momentos--.

--Foi too por culpa del diañu burllón--amestó'l bravu guerreru--.Camudóse nun pataricu xigantescu que s'esbabayaba por metenos nos sos paponos y tuvimos que fuxir a carrenderes...--

Fíxose un silenciu sepulcral. El gran xefe Bablenunca daba paseos d'un llau pa otru de la choza coles manes garraes atrás, pensatible. Allá una vegada, qu'al bravu guerreru Bablenada proveciéra-y un mileniu, dixo:

"Llevo naguando tola puñeflera vida por comer un falabable guisáu con castañes y arumáu con fueyes de lloréu. Voi faciéndome vieyu ensin consiguilo y nun pienso morrer ensin prebar esi manxar . ¡Dos díes!. Tenéis dos díes xustos pa poneme un exemplar de falabable bien tresnáu na mio escudiella. En casu contrariu, los vuestros güesos va dir parar al pozu'l Cuélebre Esmellaón pa que dea bona cuenta d'ellos".

L'apolmonáu Bablenada coló coles boleres del gargüelu cásique pesllaes y viendo cómo se-y sumía la vida por falta d'aire ante aquella situación tan aforfugante. Garró un puñáu de guerreros y esmucióse viesca alantre a pola presa que tenía encolingáu'l so destín d'un filu.

(.................................................................)

La tribu baillaba y antroxaba festexando'l banquete del gran xefe Bablenunca. Con un mogote carne nes manes, dába-y taragaños y zarraba los güeyos cola cara p'arriba esfaraguyándose de placer. Enxamás imaxinare que los falabables tuvieren aquel tastu, aquella suavidá, aquel sabor dignu de dioses...

Acabante de rutiar dando asina puntu y final a la pitanza, enfiló pa la choza a descansar como gatu n'escarpín. Enantes d'achucase, garró una llinterna de güesu caña y foi pa un requexu a despidise del so animal favoritu y talismán cimeru. Allumó y... sintióse morrer nel intre. Ellí taba la xaula vacía del so falafino, el páxaru que gorgolitiaba los cancios más melgueros qu'enxamás oyíos monollingua sintieren. De sópitu pescanciárelo too. El maraviyosu manxar qu'acababa d'embutiellar nun yera un falabable, yera'l so adoráu falafino. Salió darréu de la choza y, aconceyando a la tribu, esberridó les pallabres que facíen ferver el sangre y callar al mundu:

--¡¡Unga-unga-bam-bam!!--

Los guerreros, enfotaos y secañosos de venganza, empozáronse pente la viesca a la busca del traidor Bablenada que manchare con un chaplón descomanáu la dignidá y l'arguyu de la valerosa tribu monollingua...

Yá tán equí les mazcaraes d'iviernu.

2011-01-01T15:35:00.000+01:00

Dalgunes tenémosles ehí na antoxana y otres a estes hores yá pasaron pela puerta. Son les vieyes tradiciones que remanecen otra vuelta. Les mazcaraes d'iviernu.

El guirria, los sidros, os reises, los zamarrones... van tornar a tar con nosotros de nuevo esquitando de la nublina de los vieyos tiempos y de los ancestros. Los raigones del pasáu más ancestral van emburriar la cazumbre pa que l'árbol de la cultura milentaria retueye nes dómines del fríu y la escuridá del iviernu.

Los blincos, los esquilones, les moxigangues ya'l xaréu amazcaritáu van allugase ente nós por aciu de xente enfotao en qu'esta herencia de los antiguos siga alitando y percorriendo los nuestros pueblos y caleyes.

Como escribiera cuantayá nesti pergamín, estes xermandíes son caricós encesos que muestren un país inda vivu. Tenemos que los curiar con ciñu pa que sigan allumando al traviés de los años. Paga la pena envizcase nello.

Vaya dende equí'l mio ánimu y felicitación a toa aquella xente que col so trabayu faen posible la pervivencia de los vieyos vezos.

(El santu ye d'una de les mazcaraes celebraes años atrás en Valdesoto).

Lo que yo vi... y un apéndiz de fin d'añu.

2010-12-30T09:45:00.003+01:00

Yo vi la mar enchipase, ya'l faru allumar pa guiar a los navegantes, y la espuma arruxidar pallabres de Neptunu pelos bufones.

Yo vi pacer nes brañes al ganáu; a los ferres, les aigles y les utres peñerar pelos cumales, y al pastor esconxurar axorizáu nel vientre de la borrina.

Yo vi los valles y les vegues verdes, les viesques de fayes y carbayos, los texos milenarios, ya'l güeyu l'agua de milenta fontes gorgolitiar pente'l mofu ya'l felechu.

Yo vi a Taranis nel Monsacro, a Lug nel Naranco, a Belenos en Ponga, a Deva en Cuadonga, y a los xamanes sidros arreblagando la cogoruta l'Urriellu.

Yo vi al nuberu, a les xanes, a los trasgos, a los diaños, a la güestia, al pataricu, al cuélebre, al busgosu...

Too eso vilo yo y abondo más qu'inda recuerdo, nun vieyu país d'esti mundu onde un osu mató a un rei y onde los xanos buscamos el nuestru postrer abellugu.
....................................................................
(Apéndiz de fin d'añu).

Magar lo que se fai ye celebrar la entrada del añu cuando suenen les doce campanaes el día 31 d'Avientu, yo, como xanu que soi, espero un pocoñín más. Celebro la so entrada cuando'l Guirria sal a facer el so percorríu siguíu de los xinetes aguilanderos allá per San Xuan de Beleño en Ponga. Ye entós cuando salgo a la puerta del mio caborniu y grito al alto la lleva:

"¡Ih.uh.ú!. ¡Salió'l Guirria!. ¡Entró l'añu!."

Asina que casi yá na viéspora de qu'eso asoceda, voi deseavos que l'añu 2.011 vos apurra un bon aguilandu y que vos pinte afayadizu.

¡Heba salú!.

Aquella añada... y un apéndiz navidiegu.

2010-12-23T12:50:00.004+01:00

"Ea, ea, el carru cola yerba.
Vaya, vaya, el carru cola paya".

Na época cuando somos neños y rapazos va tresnándose'l formientu de la nuestra identidá.

Los xuegos, cosadielles, tradiciones culturales y la llingua qu'aprendemos neses dómines son les blimes con que vamos iguando'l nuestru ser.

Una identidá y un ser que van despintándose por aciu d' inmersiones culturales y llingüístiques ayenes que van aforoñando les nuestres primeres alcordances y enseñances llariegues.

Vamos asina, pasiquín a pasu, dexando de ser lo que fuimos pa camudar en seres distintos. Llegamos inda a ver lo que fore raigón nuestru como daqué ayeno o endolcao na nublina de lo inservible.

Pero sucede que, dacuando, quieren les circunstancies de la vida, qu'un rellumu aporte hasta nosotros. La nuestra conciencia primera esconsona del lletargu y vuelve los güeyos hacia lo más fondero de nuestro.

Ye entós cuando'l puxu de lo que fuimos allalantrón na nuestra vida vuelve con más fuerza endagora que nel mesmu pasáu.

Y produzse esi fechu maraviyosu que nos fai enfontanos hasta l'últimu aliendu en que los nuestros fíos y los d'ellos, y tola enfilandrada de nuevos retueyos de la nuestra castra, vuelvan a sentir l'afalagu de los sones d'aquella mesma añada qu'a nosotros nos cantaren:

"Ea, ea, el carru cola yerba.
Vaya, vaya, el carru cola paya".
................................................................
(Apéndiz navidiegu)

Cuentes que los antiguos druides poníen túniques blanques y diben cortar les rames del arfueyu con focetes d'oru. Güei llevantéme abondoceo y fui pa un requexu de la viesca au hai un carbayu centenariu col arfueyu endolcáu nes sos cañes. Corté un ramu y pasé pela Fonte les Xanes onde lu amugué na flor del agua. Dempués púnxilu a la entrada'l mio caborniu. Garré'l códiz llamáu "Llibru de los Sieglos" y lleí nes páxines dedicaes a los druides un esconxuru. Recitélu en voz alta pa que la mio voz retriñera na viesca. Permedié asina pa que los vieyos dioses ástures faigan que la bona xente que me visitáis dacuando paséis unes felices fiestes en compañía de los vuestros y tengáis un añu 2.011 fanegueru y afayadizu.

El sieglu XII asturianu.

2010-12-15T18:48:00.006+01:00

Si echamos una güeyada en xunto a la historia asturiana, el sieglu XII ye ún de los que más rescampla por aciu de tres personaxes y los fechos que desendolcaron a lo llargo les sos vides relacionaos col nuestru país.

L'obispu Pelayo guió los destinos de la diócesis ente los años 1.101 y 1.130. Cola pérdida del poder políticu, Asturies diba quedando apostalgada. Pelayo potenció la so diócesis tratando de dar el mayor rellumu a Uviéu y a Asturies. Mandó iguar el "Liber Testamentorum" onde atropaba documentos (camiéntase que dellos inventaos) qu'afitaben les posesiones y privilexos de la diócesis uvieína, sobre too, de magar entró en competencia cola Toledana. Les miniatures d'esti llibru considérense de lo meyor del románicu del so tiempu. Les llendes de la diócesis caltuviéronse hasta l'añu 1.954. Morrió demientres un viaxe a Santillana del Mar onde lu enterraron, anque atrocare en vida un sitiu na Catedral d'Uviéu pa recibir sepultura.

El conde Gonzalo Peláez controlaba la mayor parte del territoriu centru-oriental asturianu. Protagonizó cuatro intentos de secesión nos años 1.132, 1.133, 1.135 y 1.137. Na sublevación de 1.133 tuvo a piques de morrer el propiu rei Alfonso VII que vieno a cercalu a Proaza y onde llegaron a mata-y el caballu que montaba. Dalgunos de los castiellos de so yeren los de Tudela, Gauzón, Proaza, Buanga y Alba de Quirós. Dempués de la derrota de 1.137 desterráronlu a Portugal onde morrió na primavera de 1.138 cuando contaba tornar a Asturies pa entamar un nuevu llevantamientu. Los sos siguidores treslladaron los restos de so pa da-y sepultura n'Uviéu.

Acabo cola referencia a Urraca l'Asturiana, fía bastarda d'Alfonso VII y Gontrodo Petri, nacida hacia 1.133. Vilba del so primer matrimoniu, asitióse n'Asturies au gobernó a títulu de reina, pero siendo fiel a so padre, primero, y al so hermanu Fernando II dempués. Casada per segunda vegada con Alvaro Roderici, protagonizaron un intentu de secesión nel añu 1.163. De magar el fracasu del mesmu foi vivir a Palencia onde morrió hacia l'añu 1.164. Anque la so voluntá yera que la enterraren n'Asturies, el so cuerpu embalsamáu afáyase na Capiella del Sagrario de la catedral palentina (semeya qu'ilustra'l post).

Un atracu.

2010-12-09T10:45:00.000+01:00

Cuando Xulín recordaba aquella recortada metanes les sos ñarres inda tremaba de mieu. Diba unos cuantos años un amazcaráu atracárelu na güevería onde trabayaba. Amás del sustu y les perres, aquel sucesu costáre-y el puestu trabayu. Nun fuere enxamás a salir de probe.

Tolo contrario que Damián. Esi amigu de so, pasare de malvivir como llimpiabotes a engolase na bayura. En bien pocu tiempu pasare de vivir nuna casuca d'alquiler a facelo nun xalé bien grande, y de movese n'autobús a guiar un haiga de los que facíen de naguar.

Una día invitó Damián a Xulín a cenar nel xalé. Cuando taben col café, la copa ya'l puru, punxéronse a remembrar vieyos tiempos. Salió entós la espirica de cuando ún trabayaba na güevería y l'otru de llimpiabotes, y cómo dalgunos llograben espolletar na vida y otros nun yeren pa salir de probes... Tando nestes, entrugó-y Xulín a Damián cómo s'arreglare pa endrechar la so vida hasta consiguir nalar na bayura. Y entós Damián contestó-y:

-Echándo-y...¡güevos!-.

Catando la vaca.

2010-12-02T10:15:00.000+01:00

Siendo un xanu rapacín escuché una historiuca o chiste nuna de les nuestres zones ruales y que, anque la tenga un poco despintada, tovía soi a recordar de qué diba la cosa.

Entrugábase'l relatante en qué se diferenciaba'l tratu del estáu en dellos países pa colos ciudadanos y había delles rempuestes:

-En dalgunos sitios si tienes dos vaques llévateles l'estáu y date él la lleche.

-Notros llugares llévate una vaca y déxate otra pa ti.

-Y n'España déxate les dos contigo, pero... ¡cátateles tolos díes!.

El casu ye que, magar los años trescurríos, paezme que siguen viniendo a catanos les vaques puntualmente y qu'hai tantos empeñaos en vivir tirando del tetu que cualesquier día los probes animales escosen.

Neanderthales de madreñes.

2010-11-25T11:10:00.000+01:00

Dende rapacín siempre me prestaron les coses relatives a la prehistoria. Concretamente a les que fincaben la edá de piedra.

Col descubrimientu hai años de los restos neanderthales de la Cueva del Sidrón y les anuncies que foron surdiendo de los estudios d'aquel descubrimientu foi xorreciendo en min el rixu por esti tema.

El casu ye que taba yo l'otru día repanchingáu contra'l caborniu practicando'l deporte más masoquista qu'esiste, que como tol mundu sabe, ye'l de dedicase a reflexonar sobre la enfilandrada de llaceries que componen lo que conocemos como Asturies.

Y por estes rareces que tenemos los xanos viénome al maxín una relación ente aquella triba del paleolíticu y los asturianos, alcontrando dalgunes semeyances como les siguientes:

-Ellos teníen una tecnoloxía y organización menos afechisca que la del homo sapiens sapiens. Nosotros tenémosles n'inferioridá a la del homo uniformensis uniformensis.

-Ellos entamaron a quedar arrequexaos y a menguar de poblacion al tiempu que los sos competidores facíen lo contrario. Tamién nosotros vamos quedando arrequexaos y en númberu menguante al empar que los otros s'esparden y medren.

-Ellos acabaron empobinando pel camín que los acabó desaniciando como especie. Nosotros empobinamos con pasu arrechu pel camín que nos pue llevar a suminos como país...

Y cuando taba yo rabilando nestes coses quedé apecigañando. Foi entós cuando suañé que pertenecía a un clan de neanderthales con montera y de madreñes...

Reculamos y emigramos.

2010-11-22T12:23:00.005+01:00

Durante sieglos vivimos como pudimos, básicamente, del campu y la mar. Del ganáu, de les lloses, de la pesca... En condiciones perabegoses. Con munchu sudu y sacrificiu de los antiguos. Emigrando tamién, porque pa toos nun daba. Y, asina y too, fuimos adulces avanzando.

Aportaron les dómines del carbón ya'l fierro. De les mines y los fornos de fundición. Tamién ehí hebo abondu sudu y sacrificiu. Empecemos, adulces, a pasar de ser tierra d'emigrantes a acoyer xente procedente dayuri, acullá de les nuestres llendes, que vinieron a esti país buscando un futuru. Y, otra vuelta, fuimos quien, pali que pali, pa siguir avanzando.

Yá nos tiempos más recientes, entamaron a esbarrumbar delantre les nuestres narices el campu, la pesca, la mina, la industria... Y nun fuimos quien, o nun quiximos, o nun supimos, axeitar nueves estayes de llabor con puxu pa siguir avanzando. Miremos entós pa les instancies europees y estatales esperando poles mampurres que nos sacaren del pasu'l mayor tiempu posible. Y neso siguimos...

Porque'l casu ye qu'anguaño nun somos atopar endagora'l nuestru sitiu, a enxaretar el nuestru país económica, cultural y políticamente, y a empobinar pacia un futuru afayadizu. Y, otra vuelta, emigramos pa buscar fuera lo que nun somos a construir dientro.

Ye murnio comprobar cómo, tres una enfilandrada de sieglos de sudu y sacrificiu de tantes xeneraciones de nuestro, reculamos y emigramos. Nun sabemos hasta ónde nin hasta cuándo. Pero, miániques, el nuestru destín actual apunta nun aldu que nos lleva p'atrás.

Les orielles del Atlánticu.

2010-11-19T11:20:00.000+01:00

Onde yo avezo a dir a la gueta hai una finca bien grandona zarrada con muria. Nella destaquen dos fayones pervieyes y bien conservaes. Les úniques qu'hai en tol monte. Tamién se ven los muruecos d'una casa vieya de piedra que, pali que pali, va esbarrumbando. Nesa casa contárenme que se casare un hermanu d'un bisagüelu mio con una moza que vivía ellí y emigraron p'América. Nun foi casu únicu. Per dambes rames de la mio familia cruzaron el fontán atlánticu bien de xente a facer les amériques.

Muncha xente asturiano emigró nel so día col envís de buscar un nuevu finxu'l cielu pa les sos vides. Embarcando nos nuestros puertos pa facer una travesía llarga y abegosa que los llevare a un llugar perlloñe onde intentar refacer la so vida y progresar. Dalgunos d'ellos consiguieron empicorotiase na fortuna y tornaron al so llugar de nacencia amosando la so bayura, los sos haigas... construyeron guapes residencies d'indianos y ayudaron tamién a ameyorar el so pueblu de nacencia. Pero otros, la mayoría, quedaron acullá nel continente americanu ensin poder tornar enxamás perdiéndose-yos el rastru colos años. Dellos tamién tastiaron l'agrín del fracasu y de la chancia. Yeren los "americanos del pote".

D'América aportaron tamién a nós dos productos qu'enraigonaron nes nuestres lloses, ayudando a matar la fame, y que llegaron a ser colos años auténtiques señes identitaries de la nuestra alimentación. El maíz y les fabes. El primeru entró pela primer vez na península al traviés del puertu de Tapia ya inda se conserva l'arca nel que vieno na Casona de los Cancio. Alimentó al ganáu, pero tamién a les persones coles sos farrapes, tortos y boroñes. De les segundes yá nos fala Xovellanos cuando nos cuenta que comiere nuna ocasión fabes con tocín, y col pasu los años fueron a convertise nel platu cimeru en reconocimientu de la nuestra gastronomía: la fabada.

La nuestra patria asturiana nun ye a entendese ensin les sos viesques, montañes y valles. Pero tampoco ensin la mariña y la mar. Y ye que la rosa de los vientos apuntó históricamente nel nuestru país en dos direcciones dambes atlántiques. Un aldu lleva a les orielles del norte al traviés del mar Cantábricu. Ellí atopamos les nueses xermandíes culturales europees, verdes y llentes. L'otru aldu apunta al oeste, onde milenta families de nuestro vieron colar parte de los sos fíos cuantayá. Pero nesti postrer casu, navegando pel mesmu océanu que rebautizáu en mar baña les nuestres costes. Porque pal oeste allúguense les otres orielles del Atlánticu.

Lleche recién.

2010-11-16T13:52:00.006+01:00

Cuando Pericu Pelís vio cozcase a Ramonzón cola so boina terciada y les madreñes de clavos camentó qué patochada cabera-y andaría esnalando pela cabeza.

-Ayó, Pericu-

-¿Qué cuentes, Ramón?-

-Oi, que venía yo pensando si me podrís dar un pintu lleche recién-

-Si, hom, agora te lu apurro-

-¡Ca!, nun fai falta, gárrolu yo-

Y Ramonzón va y enclícase sol caldar de la vaca y entama zucar d'un tetu como si tal cosa.

-A, Ramón, ¿cómo se t'ocurre ponete a mamar la vaca, manín?- remuñó Pericu enfurruscáu-

-Cóime, ye bien práctico y de pasu nun te doi guerra...-

-Mira Ramón, yes un gochonzón y un puzcalabre. Asina que dexa de facer el tonto y yá tas colando-

-¿Qué ye que vas dicime que ta mas llimpio'l lleche que cates cola to mano que la que mamo yo cola mio boca, ho?-

Pericu Pelís nun gorgutó. Echó-y una güeyada como un rayu a Ramonzón que pescanció nel intre que yera meyor marchar d'ellí aína. Pero cuando s'alloñaba entró-y l'aquello y nun foi aguantase a dar la vuelta y retrucar:

-Amás, a la vaca tanto-y da que la cates tu o que la mame yo. Nun sé si cayerás na cuenta que nengún de los dos somos la so nación...-

Selectividá política.

2010-11-11T10:15:00.001+01:00

Arriendes de ganar unes elecciones, como ye de caxón, pienso que a los políticos que tuvieren d'ocupar los cargos correspondientes nes respectives conseyeríes había que-yos facer un esaminucu. Coses triviales y básiques pa ver per ónde andaben. Un pequeña preba escurro que podría ser la siguiente nel casu de la nuestra institución cimera d'autogobiernu:

-Economía y Facienda: estremar un mileurista d'un multimillonariu.
-Cultura y turismu: dixebrar una navaya de taramundi d'un portaaviones. Dir de Candás a Xixón ensin GPS.
-Salú y servicios sanitarios: curar un granu nel... fornicu.
-Mediu rural y pesca: cabruñar una gadaña y despegar una llámpara colos dientes.
-Educación y ciencia: un dictáu n'asturianu y otru na fala. Calentar una probeta con chisqueru por falta presupuestu.
-Bienestar social y vivienda: pagar una hipoteca col sueldu un paráu.
-Mediu ambiente, ordenación del territoriu y infraestructures: vivir al llau una incineradora y recitar darréu tolos tramos y obres pendientes de llicitar y d'acabar.
-Industria y emplegu: pasar una mañanina nuna oficina del INEM.
-Alministraciones públiques y portavoz del gobiernu: pasar cinco minutos falando ensin soltar una trola.
-Presidencia, xusticia y igualdá: asomase polo menos una vez al día a la ventana pa ver lo que pasa realmente na cai.

Como se ve un esámen chupáu que de xuro diben aprobar toos cola gorra.

Buscando un campanariu.

2010-11-08T11:39:00.003+01:00

El mio amigu Don Quixote de Caravia, el madreñeru andante y desfacedor d'entuertos, aprució l'otru día cabo la puerta'l mio caborniu xubíu nel so asturcón Rebalbín y afatáu col traxe tradicional asturianu como suel dir él.

-¡Ayó, Don Quixote!. ¿Qué te trai per equí?. ¡Cuantayá que nun te vía!.-
-Busco un campanariu, Xanu.-
-¿Un qué, ho?. ¿Un campanariu...?-.
-Pues sí, oyisti bien. Necesito un campanariu con una campanona de meter mieu pa garrame a ella y facela sonar hasta qu'atorolle, anque me tenga qu'encolingar d'ella y too.-
-¿Y por qué te dio agora por esa venada, hom?-entrugué-y yo un poco preocupáu pola so salú mental.-
-Pues porque vi ayeri acercase al nuberu con una pinta espantible, arreblagáu nuna nubona más prieta que los coyones d'un burru y más gafa que milenta cuélebres famientos, siguíos per una mar de nubes como enxamás viere.-
-¿Y pacia ónde diba con esi exércitu de rayos y truena?- entrugué-y yo entamando a esmoleceme enforma polo que me taba contando.-
-Pa cubrir Asturies de finxu a finxu ensin dexar nin una regallina de bocana. Vien enberriacáu a descargar tola metralla nubera enriba nós.-
-Pero, ¿por qué nos garró de sópitu esa zuna?. ¿Qué ye lo que-y fiximos?-.
-Pues la zuna garrónosla por xostrones, desdexaos ya inútiles. Y a él nun-y fiximos nada. Cenciellamente nun fiximos, nin facemos, nin llevamos traza de facer. Y esti país fúndese na olla más enllamargada y fonda mientres cruzamos los brazos y xiblamos como si con nós nun fuere la cosa. Esi ye'l motivu del so encabritamientu, sigún me comentó cuando-y echare una voz entrugándo-ylo.-
-Pues amigu madreñeru andante, pámique voi acompañate na busca d'esi campanariu con esa campanona descomanada y encolingame contigo d'ella hasta francer el mayuelu de puru cutir. Porque si esperamos porque la xente esconsone y se ponga con remangu a llevantar esta patria esgoncipliada va vaganos, compañeru. Asina que va ser más rentable y rápido buscar la manera d'esconxurar al nuberu, porque sinón la nube que nos va arreflundir enriba va ser histórica...-

Y p'allá empobinemos Don Quixote de Caravia y yo, entainando tolo que pudimos, pero inda nun atopemos campana lo bastante grande como pa tinglar y esconxurar de manera afayadiza la que se nos avecina...

El sincretismu asturianu.

2010-11-04T09:30:00.000+01:00

Si dalgo caracteriza'l mundu espiritual asturianu ye'l sincretismu cristianu-paganu. De magar va axeitándose'l reinu asturianu, va tresnándose esi sincretismu relixosu que llega hasta güei ente nós.

Los enterramientos de Pelayu y Favila son una bona amuesa d'ello. En dambos casos escoyeron llugaes sagraos precristianos. La ilesia d'Abamia en Cangues d'Onís, tumba del primeru, ta allugada fuera del pobláu nun campu tumular y a pocos metros d'un dolmen anguaño desapaecíu. Nel casu del segundu, tamién la ilesia de la Santa Cruz ta allugada, nesti casu, enriba un túmulu y dende'l so interior pue vese'l dolmen que facía de cámara funeraria. Tamién hai autores que nun descarten que'l llugar de Cuadonga, cuna del reinu, fuere un llugar de cultru precristianu.

Casos de sincretismu tenémoslos abondos si nos ponemos a xurgar nel nuestru pasáu y cultura. Ehí tenemos tamién el vezu d'allugar los texos al llau de les ilesies, o qu'una manera d'esconxurar al nuberu seya tocando la campana de la ilesia. Si nos ponemos a reparar en mazcaritos como los sidros o el guirria ponguetu tal paez que fueren reminiscencies druídiques o de xamanismu.

Tovía anguaño ye bien corriente la utilización de símbolos cristianos y paganos como protección contra los más diversos males. Ehí tenemos les piedres del rayu o la culiebra, les cigües, pero tamién les cruces y les medalles con santos o vírxenes. Llevamos a bendecir el coche a Cuadonga y prendemos calabaces güeques na viéspora de tolosantos. Porque actualmente'l sincretismu de los primeros tiempos onde foi fraguándose'l calter simbólicu y espiritual asturianu sigue vivu ente nós, magar nun nos demos cuenta d'ello davezu.

Poro, una xera bien importante ye acoricar y curiar tou esi bagaxe cultural, esa guaña identitaria que collabora a defininos como pueblu. Cuando por desdexamientu o por zuna, dalguién esborria un dolmen, una capiella medieval, o acaba con un texu centenariu, ta realizando tou un atentáu cultural pa col pueblu asturianu. Y, desgraciadamente, estes actuaciones tán produciéndose con demasiada frecuencia ente nosotros.

La güestia... más o menos.

2010-10-28T11:35:00.003+02:00

Yera'l mes de payares un sábadu pel atardecerín. Los tres rapazos esmuciéronse, callandino, pa la güerta Fausta y arrampláron-y con una calabaza dexándola bien escondida pal día siguiente.

Yá de domingu entamaron la xera. Fixéron-y un furacu circular na zona'l rau y empezaron a agüecala. Dempués tarazáron-y tres güecos triangulares, dos pa los güeyos y l'otru pa la nariz. Una media lluna colos cuernos p'arriba yera la boca onde espetaron cachos de paliyos pa igua-y los dientes. Llantáron-y per dientro un cachu vela y yá taba tresnada la calavera.

Col atapecer del día amatagáronse nun requexu'l camín que llevaba a la fonte onde avezaben a dir por agua los del llugar. Aquel día taben de güevu. Un puñáu rapazuques enfilaben camín p'alantre parlotiando gayoleres. De secute, empieza a xiringase una sebe, xube una pantasma redonda echando fueu per güeyos y boca y, ente rinflíos y gufíos, siéntese burbusar aquella vozona d'ultratumba: "¡Andái de día, que la nueche ye mía!".

Faltó-yos tiempu a les guah.aques p'aventar calderos, perder madreñes y, ente glayíos, berríes y dalgún qu'otru raspionazu escontra'l bardial, salir xispiando pa casa. Al poco, aportaren muyeres y homes con palos, fesories y tolo qu'atoparen a mano pa contra'l sitiu onde s'apaeciere l'aquello. Pero nin rastru de gufíos, xorrascaes, nin bisarma dalguna. Total, qu'arreboniando pa casa.

Aquel llunes foi mui comentáu en tola rodiada aquel sucesu. Coses de rapacetos, seguro. Tamién dalgún vecín tuvo que sentir los llamentos de Fausta por cuenta unos folganzanes -"¡la cuna que los añó!"- que-y furtiaren de la güerta una calabaza guapísima.

Viaxe al fondu del mar.

2010-10-25T11:15:00.000+02:00

El tiempu pasa. La incertidume sigue esnalando nel aire. Endagora nun apruz nada iguao. Entama a caminase sintiendo l'aforfugu.

Caminar sele y con pasu arrechu siempre foi bono. Entainar a última hora tratando d'arreblagar percima lo non iguao suel llevar a sapiazos tarrecibles.

Entamen los avisos pa navegantes. Na Xunta Xeneral puen acabar sentándose los de siempre a la vuelta d'unos meses. Los movimientos, si daveres los hai, han d'empecipiar a aprucir llueu.

Una flota esgonciada tien igua trabayando a comuña nos astilleros del puertu. Tamos inda a tiempu d'axeitala y facela navegable. Pero yá, porque esi tiempu empieza a correr en contra nuestra.

Val más poner d'una vegada'l güeyu nel cartafueyu. Tar sollertes pa que nun funda esa flota a la vuelta d'unos meses por aciu de nun facer los llabores afayadizos a tiempu. Porque d'esgonciada pue pasar a fundida, y una flota fundida yá nun va tener posibilidá de reflotamientu.

Y si nun s'afiten darréu los alcuerdos polos que bien de xente nagua, podemos enfilar el nuestru últimu viaxe políticu que nos lleve al fondu del mar.

Seriedá y arguyu.

2010-10-21T12:45:00.000+02:00

Echándo-y una güeyada a esta semeya antigua podemos reflexonar sobre lo que dacuando consideramos importante o non al traviés de lo que nos tresmiten los sos protagonistes.

Ehí tenemos el documentu fotográficu d'un gaiteru y un tamboriteru d'hai bien d'años en blanco y negro. Aprucen delantre de nós colos sos calzones, la so montera y los sos instrumentos musicales. N'apariencia una pareya músicos afataos col traxe tradicional del país namás.

Pero podemos fixanos tamién na so fachenda. La manera en que s'alluguen delantre la cámara ya, sobre too, nel xestu les sos cares. Nin una sonrisa, nin una moxiganga cómpliz. Una total seriedá como si fueren conscientes de la solemnidá del momentu.

Y esi ye l'aquello del asuntu. Tresmítenmos la postura de dos asturianos identificaos cola imaxen que tán dando. Bien lloñe de les folcloraes paxareres y festexeres. La seriedá del so xestu argutu pa la cámara muéstramos que too yera serio pa ellos, dende los traxes que vestíen hasta los instrumentos y la música qu'interpretaben. Nuna pallabra, la seguridá y l'arguyu de ser dos músicos asturianos posando pa la posteridá.

Toa una invitación a los asturianos que güei heredemos esta tierra, esta cultura, esta llingua y, en definitiva, esta identidá, pa que les tomemos en serio dafechu y non como caxigalines afayadices pal divertimentu y la xirigoncia. Sedría tamién una bona manera de tomanos en serio a nosotros mesmos qu'adeprendiéremos, d'una vegada por toes, a miramos con xestu seriu y arguyosu nel espeyu del nuestru futuru.

Asturiense.

2010-10-14T11:45:00.012+02:00

De mañanina, el grupu distribuyóse caún a realizar la so xera. Dellos homes, empobinaron pa la viesca en busca de daqué pa cazar. Allalantre, pal pielgu del ríu, los rapazos prietu y roxu diben echar los anzuelos col envís de sacar dalgún pexe. Pacia'l pedreru, foron un grupu de muyeres coles erbíes de piedra al llabor de mariscar. Los más vieyos colaron ayuri, pa la viesca cercana, a la gueta de frutes y raigaños...

Na boca de la cueva, quedare namás que l'home reflesivu. Nortiaba pensatible pa u foren unos y otros. Dacuando, pasiaba coles manes garraes atrás, siempre camentando, parando, observando, otra vuelta caminando. Yera la so xera. Tol mundu tenía de respetar el so xacer. Imaxinaba, argutu, cómo desquiñonar lo algamao y axeitar los llabores del siguiente día. Cavilgaba tamién na manera de tornar cualquier niciu d'insumisión que cuestionare'l so sitiu cimeru dientro'l clan.

Cuando aquella tarde, abenayá, s'adentrare sólu nos requexos más solombriegos del abellugu cola so llámpara de cañamina, entendiérelo too. Aquellos grabaos y dibuxos que rescamplaren a los sos güeyos, viaxando en pelondines dende les coraes del pasáu, burbusáren-y que tenía brenga de cabezaleru.

Sí hai base social.

2010-10-07T11:15:00.019+02:00

Una de les entrugues qu'esmolecen davezu a los nacionalistes ye si realmente hai base social pa sofitar nella un movimientu nacionalista n'Asturies. Yo cuento que sí. Otra cosa ye lo revesoso que pueda resultar aportar a ella. Pero, ¿úla?.

Sigún yo lo veo, hai un sector nada despreciable de la nuestra sociedá que ye l'unicu sitiu onde camiento, daveres y sinceramente, que se pue alcontrar un viveru potencialmente granible tanto de militantes como de votantes pal nacionalismu. Ye un sector hetereoxéneu, pero que caltién unes característiques asturianes y/o asturianistes mínimes coles que s'identifica. Podrán abultar a los güeyos d'un nacionalista estes característiques como daqué importante o como caxigalines, depende de les que seyan. Pero la cuestión ye'l grau d'importancia que tienen pa la xente que les vive y comparte y pescancialo, interpretalo, y actuar acordies a ello. Un llabor que requier dexar los prexuicios de llau y les grandes construcciones de nacionalismu cuasi metafísicu allugaes nel sobráu de lo non urxente.

Esi sector o viveru fórmenlu eses persones que conocemos que manden a los rapacinos voluntariamente a clas d'asturianu, qu'escueyen como la profesión del so futuru ser maestros d'esti idioma, que s'axunten en miles de semeyes dando la cara pola oficialidá, que-yos presta espresase ensin renunciar a usar, anque seyan unos pocos rasgos, esti idioma porque se sienten más identificaos al traviés d'ellos cola so identidá d'asturianos. Pero tamién lu formen abonda más xente. Nunos casos, asisten a los sitios onde hai actuaciones de música asturiana de la más diversa mena. Notros, ciudadanos a los que-yos presta facer semeyes a los rapacinos col traxe'l país, participar en grupos folclóricos, en bandes de gaites, en deportes y xuegos populares de nuestro... Asturianos que nun son a entender una primavera n'Asturies ensin espiches o una seronda ensin amagüestos. Que te dicen con arguyu que son del Sporting o del Uviéu, cuando esperes sentir del Madrid o del Barcelona. Que saben quién son Manolo Busto, Chechu, Samu, o'l Biesca Xixón de h.ockey. Ciudadanos que tienen en casa la nuestra bandera, música asturiana, llibros sobre'l país y/o n'asturianu... Y asina podría siguir con una llarguísima enfilandrada de descripciones de lo más hetereoxéneo y ensin entrar a valorar categoríes nin rangos no importante como yá escribí enantes.

Nesti grupu social allúguense tamién los que te dicen que-yos prestaría qu'equí hubiere un partíu "rexonalista", "asturianista", "nacionalista", como tienen los vascos y catalanes pa que mirare un pocoñín polo nuestro, que ta too abandonao. Cuéntente, tamién d'ellos, que si s'axuntaren toos esos grupos "asturianistes" podríen votalos guapamente. Pero... a la hora la verdá queden en casa'l día les elecciones o voten con bien pocu convencimientu a los partíos estatales de siempre. Porque nun acaben d'identificase col nacionalismu/asturianismu políticos. La conexón, a la hora la verdá falla. Y ehí ta otru pilancu fundamental p'arreblagar. Cómo llegar a toa esta carrapotada nada despreciable de ciudadanos de nuestro.

Y enantes de siguir, quiero dexar nidio que nun toi diciendo que cualquier persona d'esos ámbitos vaya aceptar y/o participar del mensaxe nacionalista asturianu, por mui bien iguáu y espuestu que se presente. Habrálos que sí lo faigan. Pero tamién habrá ocasiones en que namás que vamos dar voces en castañéu. Lo que sí digo ye que tenemos que reflexonar a fondo sobre cuálu ye'l castañéu pal que tenemos qu'empobinar y cómo nos tenemos que mover per él si queremos tornar a casa con dalguna gueta, anque seya pequeña, nel zurrón, y non coles manes llastimosamente vacíes que ye, por desgracia pa toos, cásique una constante histórica nel nuestru nacionalismu. Dambes cuestiones son bien estremaes.

Quciabes dende'l puntu vista de la poca xente concienciao nacionalmente nesti país, esti grupu social, o parte d'él polo menos, vese como una folclorada, como ciudadanos escabarriaos políticamente onde nun paga la pena dirixir el discursu nin gastar tiempu. Y ehí ta un de los grandísimos errores, por nun dicir el gran error y fundamental. Porque esa ye la única parte de la ciudadanía asturiana onde se pue intentar sofitar social y electoralmente'l nacionalismu. Porque esa ye la sociedá asturiana real, la qu'esiste, la que se ve na barriada onde vives, nel supermercáu o la tienda la esquina, nel chigre, nel trabayu... Y ye la única a la que se pue dirixir el discursu y pidir apoyu. Porque nun esiste otra sociedá asturiana nenyures, si acasu namás que nos suaños o na mente de los que viven de contino trancaos voluntariamente nes sos llurigues, nel so guetu nacional químicamente puru.

Y nun queda otra qu'enfotase d'una vez por toes en trabayar con esi sector social. De mano, esguedeyándose por entender cómo funciona realmente, cuálu ye'l so bagaxe simbólicu real respetándolu escrupulosamente, refugando dafechu mancorniar cualquier sentimientu de la mena que seya: dende la ufrienda d'un ramu a la Cruz de la Victoria, dende los vezos llariegos al folklor tradicional. Fuxendo como de la güestia de cayer en despotismos ilustraos queriendo axeitar un futuru pa los asturianos dexando de llau les sos opiniones y sentimientos, otra zuna mui espardida ente nós los que nos allugamos -o eso creemos-nun grau mayor de consciencia y conciencia nacional. Si dacuando se fala de la necesidá de facer una inmersión llingüística p'adeprender bien la nuestra llingua, equí habríamos de falar d'entamar una inmersión social y cultural na sociedá asturiana real, na idiosincrasia asturiana real.

Dempués del respetu, queda una xera revesosa y abegosa. Adaptar el discursu nacionalista a esi sector social importante como pasu previu p'algamar a tola sociedá. Saber qué coses puen guañar en cada momentu y la manera afayadiza y entendible de plantegales. Decatase, definitivamente, que se mueven en coordenaes sociales y polítiques moderaes y qu'hai qu'entamar perhí. Porque una escalera tien peldaños y ye mester dir percorriéndolos toos pa llegar al caberu, por muncho que nos afale l'ansiedá de llegar arriba darréu. Y como punxi va tiempu nun exemplu, un paisanu pue dir guiando un carru unos pasos per delantre de los armentíos y éstos síguenlu. Pero si sal xispiando escopetáu acaba sólu. Dir unos pasos per delantre de la sociedá plantegando alternatives novedoses ye una cosa, y pretender que siga y atalante discursos perellaboraos otra mui estremada.

En definitiva, y pa dir acabando, como dixi al principiu sí cuento qu'hai una base social onde semar l'ideariu nacionalista y consiguir resultaos. Pero hai que saber ú ta y empobinar pa ella. Con abonda humildá, respetu, y enfotándonos en perconocer la realidá dixebrándola dafechu de los nuestros xuicios preconcebíos, y siendo conscientes de que si refugamos esi sector y buscamos sofitar el nacionalismu notros que nun esisten, o qu'esistiendo son yá bien ayenos a esta ideoloxía (militantes y simpatizantes concienciaos dafechu de les formaciones españolistes), tenemos munches probabilidaes d'acabar por nun llegar nenyures.

Les fases de la fola.

2010-09-30T10:30:00.012+02:00

Los movimientos sociales y les inclinaciones ideolóxiques de la xente vense afectaos, a vegaes y a lo llargo del tiempu, por procesos cíclicos. Puen asemeyar como les fases d'una fola. Dende'l so mayor grandor hasta llegar a ruxir donda como espuma esnidiando na superficie del agua.

Durante la transición al actual sistema políticu y durante bastantes años desque echare a andar la Constitución la reivindicación de les identidaes nacionales de los pueblos qu'igüen l'Estáu vivieron una época d'esporpolle y viéronse con bonos güeyos per abondos ciudadanos, medios de comunicación y clas política. Foi la fase cimera de la fola qu'unos supieron aprovechar y otros -nós por exemplu- non.

Pero nestos últimos años obsérvase un cambiu de tendencia. Les andanaes condenatories hacia les reivindicaciones nacionalistes "perifériques" medraron en númberu considerable. Aperríllase contra elles ensin contemplación dala dende los medios de comunicación más potentes y organizaciones de toa mena. El discursu d'una parte importante de la clas política tiróse de calón a participar nesta cruzada de descalificaciones y demonizaciones. Bucando los apoyos y sopelexando'l so discursu fundamentalmete naquellos países más fuertemente venceyaos al ideariu centralista y uniformizador dientro de los que formen l'Estáu y ensin renunciar a qu'espollete lo más posible naquellos otros onde la mentalidá nacionalista llariega tien más raigañu. De resultancies d'elli, l'efectu sobre la población entama a medrar y dar los sos frutos.

Aportemos asina a los tiempos d'anguaño au la fola va perdiendo puxu y menguando de tamañu. Nos llugares onde nunca tuvo un desarrollu curiosu tal paez que ye un simple fervor d'espuma ensin mayor importancia. Les circunstancies más afayadices pal desendolcu nacional d'años pasaos camudaron nun terrén onde se multipliquen los pilancos y les dificultaes de toa frasca.

Tamos nestos tiempos empozaos nuna dinámica negativa pa les reivindicaciones nacionalistes. Aquelles naciones que nel so día llograren facer, anque fuere en parte los sos deberes, reciben les truñonaes d'aquellos que con bayura de medios puxen por convertir esti Estáu de nuevo na mapa del centralismu y l'uniformismu. Pero les erbíes coles que llograron dotase años atrás sírven-yos pa poder enfrentase al procesu ya inda pa garrar más conciencia de resistencia pa colos enviones a que les tan sometiendo. Nel casu de la nuestra, onde nunca consiguimos afitar un movimientu de defensa del país con brenga y qu'algamare a implicar a grandes capes de la población, la situación vuélvese casi dramática.

Nel nuestru casu, tamos yá somorguiaos nunes dómines onde se trata de valtar definitivamente cualquier pegollu que tenga pola identidá nacional asturiana. Intenten col mayor descaru achaplar la nuestra cultura camudándola descaradamente pol flamenquismu, la tauromaquia ya'l casticismu españolista. Desaniciar definitivamente la llingua llendando los drechos de los sos usuarios mui per baxo de los qu'utilicen el castellanu. Convertir la histórica Xunta Xeneral nuna ximuestra de lo que debiere ser una institución respetable d'autogobiernu que namás que paez tar pa estrincanos a impuestos pa caltener chiringos y enchufes y casi más nada, consiguiendo asina llevantar el refugu de la xente en vez del so apoyu. Y asina un llargu etcétera.

Nestes circunstancies, nun queda otra salida que mentalizase en qu'hai que trabayar n'andecha por consolidar lo poco que consiguimos nestos últimos años axeitar, atropando les poques fuerces y recursos que tenemos pa tornar lo que nos vien encima. Echar una gabita a les organizaciones que trabayen nes diverses estayes de la nuestra cultura. Blindar lo poco que tenemos avanzao nel camín de la normalización y recuperación de la nuestra llingua. Siguir enfotándonos en construir los nuestros propios ámbitos d'acción social y política, pero siempre abiertos a los sectores más dinámicos y argutos de la sociedá asturiana.

Y tener bien presente que toca resistir con más enfotu que nunca. Porque van venir unos años abegosos, con unos emburriones descomanaos pa esbarrumbar lo poco que llogremos construir hasta güei. Vamos atravesar la parte gafa del ciclu. La fase baxa de la fola. Pero nun va durar siempre y dalgún día va volver a xorrecer. Entrín y non, a ver si somos a salir airosos d'estos tiempos visiegos.

Paxarines de San Matéu.

2010-09-21T10:30:00.003+02:00

Estes figurines de fariña, güevu y azafrán viéndense peles fiestes uvieínes dende cuantayá a la puerta la catedral el día San Matéu. Dicen que foi nel sieglu XVII cuando atoparon nun requexu de la catedral unes figures que foron les que dieron aniciu a esta tradición.

El so emplegu más conocíu ye como amuletu pa contra la truena. Yá se sabe'l sincretismu cristianu-paganu qu'endolca les creencies populares. Hasta los cures teníen l'encargu de tocar les campanes pa esconxurar la presencia del nuberu colos sos bastiazos, xarazu, etc. que podíen arruinar la collecha de les families nes caseríes.

Dientro de los nuesos vezos y tradiciones populares afáyense dalgunos que puen paecenos pequeñinos o simples menugancies en comparación con otros que rellumen como más bultables o importantes. Pero pienso que siempre ye prestoso da-yos continuidá a estes costumes independientemente del so rangu na enfilandrada de lo importante. Dende les tradiciones llocales o del conceyu a les d'ámbitu nacional. Dende la puya'l ramu de les nuestres fiestes patronales a les mazcaraes d'iviernu. Dende les espiches y los amagüestos hasta la nuestra bayura músical. Toes elles contribuyen a dibuxar la nuestra alcordanza colectiva y formen parte del lloriame cultural que nos xunce a esta tierra de nós arriquecíu coles nuestres propies aportaciones xeneracionales.

Y de la mesma manera qu'heredemos tou esti llegáu cultural tradicional de los nuestros antepasaos, camiento que tenemos el deber de tresmitilu a los que nos sucedan. Como los horros. Como los castros. Como la llingua...Como'l país.

Morriere de mieu

2010-09-15T18:50:00.000+02:00

Nel colexu, los cures axorizábenlu con degorrios y fueos onde amburar eternamente.

En casa faláben-y de cocos, paparresolles, y manones que-y podíen facer mal abondo na escuridá del cuartu.

Aquella nueche achucóse y nun foi a zarrar güeyu. Toles bisarmes que-y inxertaren nel cerebru entamaron a danzar espantibles alredor de la so cama.

Sudorientu y tremando salió del cuartu y acurrucóse fuera la casa engurrionáu escontra la parede. Yera'l mes de xineru.

Col alborecer alcontrárenlu muertu. Dalgunos vecinos xuxuriaben que'l probe neñu morriere xeláu de fríu.

Pero equivocábense: morriere de mieu.

Misión de salvapatries.

2010-09-08T10:30:00.000+02:00

La semeya qu'ilustra esta entrada ye d'un grabáu del sieglu XVIII tituláu Topografía Devota de Cuadonga. Nél rescamplen dos datos.

El primeru'l topográficu informándonos cómo yera'l llugar naquelles dómines y la capiella en forma d'arca madera que s'engolaba na cueva y qu'amburó en 1.777.

El migoyu ta na parte devota. Apaecen afinoxaos cabo la virxen, Pelayu y Favila afataos con armadures fuera d'época.

Xuncir el llugar marianu a la monarquía asturiana nun tien nada raro. Col pasu'l tiempu'l Reinu Asturianu perteniciere al corriellu de reinos cristianos y ye normal. Hasta equí tamos moviéndonos dientro de la nuestra propia historia y del nuestru pasáu.

L'enguedeyu ta en que pudiéremos alcontranos tamién énte una representación del mitu'l cuadonguismu, perconocíu dayuri y que nun fai falta describir. Los asturianos como salvapatries ayenes. Un mesmu raigón que pue pasar de nutrir l'árbol de la nuestra identidá colectiva a facelo d'otru ayenu y hasta contrapuestu al nuestru propiu ser identitariu. Cuestión de quién escriba y con qué intereses la historia.

Esa misión de salvapatries ye un ropiellu qu'endolca tola nuestra historia. Resalvando a Gonzálo Peláez d'imposible encaxe na mesma y a Urraca. Pero pa eso esiste cuantayá una melecina afayadiza: l'escaezu ya'l tapecimientu.

Reculando más allá de los sucesos de Cuadonga hai una época que me fai últimamente rir pola so ridiculez. Ye esi enfotu perpolíticu y marutáu d'arqueolóxicu que fai rescamplar lo romano en tolos llaos. Das-y una patada a una piedra y salte un romanu con cascu, espada y sandalies.

Como equí cada vegada que s'avanza na investigación arqueolóxica afítase la importancia de lo prerromano, otra vuelta a tapecer y escaecer. Paralízase La Carisa, mándase pa un mechinal lo atopao na Campa Torres, etc.

En cualquier etapa que pescudemos, el finxu que guía les actuaciones siempre ye'l mesmu. Los asturianos pasemos de ser unos romanizaos exemplares a salvadores tamién exemplares de la gran patria mesetaria. La nuestra misión sagrada ye la de ser unos salvapatries irredentos de lo ayeno.

Y si too ello tuviere la contestación amañosa por parte de la xente que se supón esmolecío por caltener los pegollos d'esti vieyu país, tovía podría llevase arrecostines hasta ciertu puntu. Pero lo que fai empozar a ún nes tenebres más fondes ye'l camientu de que paez ser bien ñarru'l grupu de xente a la que realmente-yos preocupen estes cuestiones.

Una sociedá de cómic.

2010-09-02T10:30:00.002+02:00

Dicen dayuri que cuando ún pierde una vaca y atopa un cuernu nun lo perdió too. Y esti dichu abúltame como un bon traxe a midida pa definir la nuesta sociedá.

Somos fáciles de contentar. Con cualquier caxigalina yá guirriamos pente ixuxús. Y la realidá más cruda escondémosla nel requexu más bisiegu del nuestru maxín.

Puen paranos infraestructures, pesllanos empreses, empobinar a miles de rapazos pa la emigración, esfarrapar la nuestra natura, facer xirigoncia de la nuestra cultura y llingua. Porque, magar nos dean como panzorru, miramos lo que nos pasa per delantre les narices con una indiferencia y desdexamientu qu'asusta.

Vivimos nuna sociedá de cómic... cómicu. Afayámonos con ser un simple oxetu de risión permanente. Con unes viñetes dibuxaes por manes foriates que nos igüen un futuru llastimosu dándonos, empara, unes migayines dacuando, sabedores de lo perfáciles que somos de conformar.

L'orpín cala adulces.

2010-08-26T16:15:00.000+02:00

Cuando una colonización se fai militarmente, con presencia física y bélica tol mundu la presencia. Ye posible entós que surda una resistencia ante ella.

Cuando una colonización se fai sele, ocultando o camudando la historia, convenciendo a los falantes de que la so llingua ye inferior y una torga p'avanzar na vida, la so presencia marutada pue consiguir que nun guañe resistencia dala.

Ye, a fin de cuentes, esti últimu casu'l que resulta más efectivu y eficaz p'algamar el propósitu de xuncir a los anexionaos al xugu de los colonizadores. Y resulta una erbía perutilizda dayuri mesmamente nestes dómines.

L'orpín cala adulces. De mano pue paecer un afalagu pal peyellu. Pero al final acabes caláu hasta la caña'l güesu.

Porque cuando nun te das cuenta de que te tan cambiando la historia, la llingua y , en definitiva, la identidá de la tierra a la que perteneces, al final acabes siendo otru ser distintu al que yeres y perteneciendo a otra tierra estremada a la que pertencecieres.

De calzaos de madera.

2010-08-23T12:40:00.000+02:00

La bayura actual que tenemos en mercáu a la hora de protexer los pies ye bien reciente. Antiguamente poques posibilidaes tenía la xente a la hora de vestir y calzar. Nel nuestru país, por aciu de la muga, espoxigaron los calzaos de madera llegando dalgunos hasta güei mesmamente.

Nun voi descubrir nada nuevo nel tema les madreñes. La protección por escelencia durante abondes xeneraciones pa triar per praos, caleyes enfolleraes, etc. La versión que conocemos anguaño con tres tazos y pa calzar con zapatielles ye la más moderna. Y como resulten afayadices pa tener a la puerta casa nes zones rurales o nes cases con corrada onde nun precises cambiar de calzáu pa salir de casa, valió-yos p'aguantar endagora'l tirón de los tiempos modernos y nun desapaecer. Magar les consideremos mui nuestres tamién les usen gallegos, cántabros y lleoneses, ente otros sitios.

Enantes d'elles hebo otres, güei yá en desusu que yeren les llamaes d'escarpín por ser esta zapatiella blanda y tradicional la que se calzaba con elles. Teníen la boca más estrecha y abrigaben más el pié, y en vez de dos tazos alantre llevaben ún sólu en forma de barra corrida.

Pero nun escosen equí les alternatives del calzáu de madera. Tamién hubo ente los nuestros antepasaos el usu del zuecu d'una pieza de madera ensin tacones alantre. Y tamién s'usaron los zuecos fechos a manera de bota o zapatu de cueru con suela de madera, mui tradicionales na vecina comunidá gallega y de los qu'hai tamién referencies en llugares zamoranos.

El "Diccionario General de la Lengua Asturiana" de García Arias muéstranos na entrada "galocha" un significáu atopáu en Llangréu pa referise a un zuecu con suela de madera y empeine de cueru con una argolla metálica que nos recuerda, en cierta manera, a los escandinavos.

P'acabar recuerdo apocayá navegando per internet tener lleío la noticia de qu'un coleccionista pagare unos miles d'euros en Os Ozcos por unes pieces que vendríen a ser un "eslabón perdíu", yá que sedríen una especie de pasu intermediu dende'l zuecu a la madreña.

Herencies gastronómiques

2010-08-23T11:15:00.000+02:00

Cuando echamos una güeyada dende la nuestra cultura a otres, delles veces nun pescanciamos lo que vemos y abúltanos raro. Cuando falamos de cultura gastronómica, lleguen a paecenos gochaes lo que comen notros sitios. Y al revés tamién, claro. A nosotros pue paecenos una porconzada rucar inseutos turraos, xintar llargatos asaos y, hasta los cascoxos, nun acaben d'entranos pel güeyu y pel butiellu. Pero al revés tamién pasa, y hai vezos gastronómicos de nuestro que pa dalgunos foriatos resúlten-yos raros y chocantes. Yo decateme d'ello cuando comemos esos productos de la mar polos que tenemos una especial querencia: llámpares, oricios y bígaros. Nos dos primeros casos, polo menos, nun se da esti vezu en tolos llaos. Hai zones onde los refugen simplemente, notres consúmenlos como escarrapios a falta de daqué meyor, y casi en nengún llugar tienen l'enfotu por consumilos que se da n'Asturies.

Y, ¿d'ónde nos vendrá eso?. Pues yo soi de los que piensa que na historia hai ocasiones en que, cuando una cultura s'esfarrapa y pasa a ser sustituida por otra, nun lo fai dafechu. Queden, anque seyan unes pingarates, que consiguen asitiase na cultura viniente y entren a formar parte d'ella. El casu ye qu'hai unos milenios allugóse na nuestra fastera centru-oriental una cultura que, arriendes de cazar y recoleutar, prauticaba enforma'l marisquéu. Les entraes de les cueves u s'abellugaben quedaron cásique tapaes pol balagar de cáscares y restos de les llámpares, oricios, bígaros, etc. que consumíen. Conozse como la cultura "asturiense" por mor d'una arbía qu'inventaron, el picu asturiense, que munchos consideren que valía pa desprender les llámpares de les roques. Hasta se fixeron esperiencies nesti sen y paez que ye un aperiu perafayadizu. Dempués fervíen l'agua echando nello regodones en caldia, cocíen lo mariscao y... a xintar.

Asina que, cuando entramos nun chigrín pa celebrar el ritual, que ye como hai que lo llamar falando acordies, de sentanos a la mesa, cola botellina sidra a un llau y la potina llámpares tresnada pola mano afechisca d'una guisandera de les que nun consideren l'aire como un manxar comestible, destapámosla y echamos unes cuyaradines en platu, y volvemos a tapala pa que nun s'esmuzan nin los vafos nin el calor, tamos repitiendo un vezu ancestral y prestosu a esgaya. Anque a los güeyos d'un turista en bermudes, chancles y gafes na tenyera que nos mira ablucáu dende la barra, pueda paece-y que tamos prauticando una gochada y tuerza'l focicu. Diferenciámonos de los padres del inventu nel sitiu onde comemos y de los instrumentos qu'utilizamos pa enllenar el papu. Pero coincidimos con ellos no fundamental: acabar rellambiendo los deos y el focicu. Y, a lo meyor tamién, y con perdón, n'echar un rutiu confirmando l'aprobación del nuestru estómagu ante'l regalu recibíu.

Aquella historia de carlistes...

2010-08-20T23:45:00.008+02:00

"Paciallá había una casa vieya. Tenía como un sótanu tou entrastiáu... Decidieron un día facer llimpieza y acuriosalu. Al dir llimpiando les parés de piedra vieron coses grabaes nelles. Yeren de los carlistes. Escrites por ellos. Había tamién una chimeneona. Punxéronse a desatascar tolo qu'había nella... Y entós entamaron a cayer coses, ropa, tamién de carlistes. Aquel sitiu fuera nel so tiempu como una tabierna o un sitiu onde se reuníen ellos..."

Llevo tola vida sintiendo un respigu cuando recuerdo esto que me contaren mui de neñu en casa una de les mios güeles. Nunca lo escaecí y bien d'años que pasaron.

Les histories de los carlistes formen parte de la nuestra cultura de tradición oral. Poques pasaron a la escritura. Dalgunes quedaron como coples de cantares que yá naide entona.

Nel carlismu militaron escritores clásicos de la nuestra llingua como Xuan María Acebal. Nellos puen restrexase los antecedentes del rexonalismu asturianu, güei evolucionáu hacia'l nacionalismu. Ehí ta la Junta Regionalista del Principado cola so Doctrina Asturianista, por poner un exemplu, casos que siempre hai qu'asitiar nes sos coordenaes históriques pa entendelos amañosamente.

La participación de carlistes del llau franquista na Guerra Civil fixo durante bien de tiempu rescamplar esti fechu tapeciendo tola so historia anterior y hasta la presente.

A partir de la transición los carlistes asturianos asumieron la reivindicación del nuestru autogobiernu y la llingüística hasta güei mesmo, neto a lo que fixeron a nivel de tol Estáu. L'allugamientu ideolóxicu nel socialismu autoxestionariu llevólos a tar del llau de les reivindicaciones del mundu del trabayu.

Un home clave nesti procesu foi Carlos Hugo de Borbón-Parma, que durante dos meses tuviere nel añu 1.962 trabayando na mina nel conceyu Samartín del Rei Aurelio. Estos díes ye noticia por aciu del so fallecimientu.

Y precisamente lleendo sobre la noticia d'esta defunción tornó a rebullir na mio mente aquella pequeña historia entecortada de carlistes que sintiera y m'inquietare cuando neñu.

Xixón, les sardineres, y l'alcordanza pesllada.

2010-08-15T09:15:00.002+02:00

El recuerdu que tengo más afitáu nel maxín de cuando, yá dende neñu, diba a Xixón ye'l del vieyu puertu pesqueru de Cimavilla. Los barcos y les llanches de los pescadores. L'arrecendor a salmoria. La rula col so traxín. Y les sardineres asitiaes cabo d'ella vendiendo'l pescáu recién rulao.

Pero los tiempos cambien y eso que llamen la modernidá fixo que nun primer momentu prohibieren la venta ambulante de pescáu desaniciando'l vieyu oficiu de les sardineres. Dempués treslladaron la rula pal puertu d'El Musel. Y dende entós dalgo fondo cambió na mio manera de ver el barriu pixuetu xixonés. Hasta tal puntu que, magar el tiempu trescurríu, entá nun soi afayame del too cuando caleyo pel actual puertu deportivu. Faltame daqué.

Afortunadamente, una parte d'esi daqué atopélu hai bien d'años cuando visitaba'l muséu allugáu na Cá Xovellanos. Nel so sobráu pudi ver la obra escultórica de "El Retablu del Mar" de Sebastián Miranda. Delantre los mios güeyos espolletaron con tol so esplendor les imáxenes d'antaño. Ellí taben de nuevo la rula, los pexes, les sardineres, la xente... los propios vecinos del barriu fixeren de modelos pal autor. Sí, delantre mio tenía l'alcordanza más playa pesllada naquel cuartu d'esposiciones.

Asina que cuando dalgún foriatu m'entruga ónde pue ver dalgo típico de Xixón siempre-y contesto:

-Pues dir a dar una vuelta per Cimavilla pa ver los oríxenes de la ciudá. Y dempués pues visitar na Cá Xovellanos El Retablu del Mar pa entender la so esencia, el so corazón y la so alma-.

La Pantoja estrella central nel Día d'Asturies.

2010-08-08T22:00:00.007+02:00

La tonadillera Isabel Pantoja va ser la estrella central de les actuaciones que'l Gobiernu Asturianu tien previstes pa festexar la celebración del Día d'Asturies qu'esti añu va celebrase en Ribeseya.

Na celebración onde debiere ensalzase lo autóctono, la nuestra identidá colectiva y la nuestra personalidá cultural como pueblu, los nuestros gobernantes escueyen esta actuación y otres más ayenes dafechu a los raigaños identitarios del nuestru país como resumen afayadizu de too ello. Y conste que nun critico a los cantantes en sí, sinón al marcu escoyíu pa les referíes actuaciones.

Esti proceder rocambolescu y esperpénticu pue debese a varies motivaciones. A botaboléu ocúrrenseme dos:

La primera, que ye tala la ignorancia xunida al despreciu de lo que ye Asturies que tienen los nuestros gobernates que-yos paez de lo más normal y natural tresnar la fiesta d'esa manera.

La segunda, que quieran facer arrémente una provocación y una ofensa polo menos a aquella parte de los asturianos más sensibilizada cola defensa de la so identidá cultural y llingüística. Nesti casu nun soi a entender qué beneficiu puen sacar de too ello.

De toles maneres, y seyan les que fueren les razones, tamos ante una auténtica mofla que de xuro va ferir les sensibilidaes d'abondos asturianos.

La Batalla Opositora.

2010-08-05T10:30:00.003+02:00

La tripulación a les órdenes del capitán Aspirante observaba esmolecida cómo'l barcu dirixíu pol almirante Tribunal avanzaba hacia ellos dispuestu a esñizalos.

Con una maniobra artera, el barcu de Tribunal púnxose-yos a estribor y, de sutrucu, cuspió-yos unes andanaes d'entrugues que a piques tuvieron de desarbola-yos el barcu.

Pero lloñe d'acuruxase, la marinería d'Aspirante respondió con otra andanada de rempuestes que dexó unos desperfectos nel buque enemigu asemeyaos a los qu'él fixere nel de so.

Foron hores dures y heroiques nun día qu'amaneciere soleyeru pa dir camudando en nublu por aciu de tanta pólvora entruguera y fueu rempuesteru. Y tamién hores de sudu amatagáu baxo cares d'aparente valentía como sacaes d'una partida de campeones de póquer.

Al final de la xornada, les víes d'agua repartíense pelos cascos de dambes flotes, los palos valtaos igualaben aquel macabru xuegu de bolos y l'agotamientu facía estragos ente les tripulaciones.

Y entós foi cuando permedió na batalla'l mercante del grumete Bedel que tres una vibrante pedricazaña convenció a los bandos combatientes pa retirase a puertu y reanudar la batalla al día siguiente...

El "bolu berza".

2010-07-30T19:50:00.001+02:00

Antiguamente había boleres dayuri. A esgaya. Había delles nes corraes de los chigres. Boleres, xuegos de llave o de rana, yeren l'entretenimientu enantes qu'entraren de trebolén les máquines tragaperres.

Una tarde soleyera del branu y, a falta de daqué meyor que facer, un grupu mozacos empobinemos pa ún d'estos chigres que a lo último acababa en corrada con bolera. Pidimos unes bebides y dalgo pa merendar y entamemos a xugar a los bolos. (Entamaron, que yo nun participé pensando que podía mancorniar a daquién).

El casu ye que nengún tenía muncha idega de tirar a la cuatriada. Asina que si una bola nun algamaba'l castru, diba pa delláu, pa onde fuere, y mui poques baltaben dalgún bolu, que ye lo normal cuando se ta como un xo nesto como en cualquier otra cosa.

Pero si nun quedare namás que neso... Lo peor ye que la bolera llendaba con una güerta bien curiosuca naquél mes del añu. Y tamién foron boles a embute pacia ella. Y entós sí que s'armó una bona estroza. Esnalaben les berces, glayaben les fabes ya imploraben perdón les llechugues.

Yo miraba de regüellu pa la barra'l chigre por si a la dueña y daba por dir pa la corrada, pero por suerte eso nun pasó.

Asina que, al final, paguemos, salimos y, de sutrucu, entainemos a carrenderes lloñe d'ellí. Los mios collacios acababen d'inventar el "bolu berza", una modalidá qu'enxamás llegó a federase. Coses de los tiempos. Si ye güei a lo meyor entra pela puerta grande de la xermandía de xuegos y deportes autóctonos.