El turismu rural, les gallines y los Monty Python

La ñoticia nun cayeo embaẍo a bien de ẍente. Nun conceyu asturianu obliguen a trancar gallineros porque'l ruíu de les pites molesta nun establecimientu de turismu rural. Tal paez sacada d'un guión de los Monty Python, pero ñon, correspuende a un sucesu real n'Asturies y anguaño.

Pero güeyu al cartafueyu porque llueve sobre moyao. De magar les nuestres zones rurales cada vegada tán más verbenaes de viviendes y ñegocios de o pa urbanites, lo rural de tola vida molesta. Problemes coles piles de cuchu delantre la cuadra, col orín, col cantu los gallos y los lladríos de los perros, coles moñiques na caleya...vienen dándose ente nós cuantayá.

Ello ye qu'hai una parte de la población que-y presta averase al campu dacuando o tener ellí una segunda vivienda. De resultancies d'ello, ñaceo y esporpolló va tiempu lo que se denomina turismu rural. Si too quedare namás que neso, equí tampoco nun pasa mayormente nada, o hasta podría aponderase'l ẍorrecimientu d'un turismu nes nuestres zones rurales, cada vegada más despoblaes y mancorniaes como elementu dinamizador que se diz (con tol procuru qu'hai que poner nello por mor de masificaciones, estroces y demás).

Pero cuando sí pasa daqué, y bien gordo, ye al entrar n'escena una parte d'esos urbanites supuestamente amantes de lo rural -encamiento que namás qu'una parte, que ẍeneralizar ye una fatada- que quieren tar nesi mediu colo que consideren les comodidaes  de la urbe y onde lo rural se reduza prácticamente dafechu a un paisaẍ pa esfrutar, pero onde nun tienen sitiu les actividaes de la ẍente que vive del campu y el ganáu. Y entós esti sector cosmopaletu y inorante turria contra tolo verdadera y auténticamente rural tratando de desanicialo. Pero lo gordo y demoledor ye que dende les alministraciones pónense bien de veces del so llau y les denuncies medren y consiguen el so oẍetivu. ¡Pa ponese a meẍar y nun echar gota, mialma!.

Per esi camín ya derrompíu abenayá podemos llegar a un absurdu. Un mediu rural onde nun pueda haber pites, nin vaques, nin perros lladrando, nin piles de chuchu, nin esquiles sonando, nin paisanos cabruñando, y menos mal que malpenes se sienten yá los carros rinchones, anque ehí ta'l ruíu los tractores y segadores...

Entrúgome entóncenes qué pasaría si se llograre desaniciar tolo anterior. Y entós l'absurdu podría balumbar más tovía. Porque podríamos suponer entós que tamién molestaríen los páẍaros gorgolitiando, les fueyes de los árboles ruẍendo, el güeyu l'agua y el regatu sonando, el cuquiellu anunciando la primavera...Y d'esta miente algamaríamos el finẍu final del procesu: consiguir n'Asturies esa cuadratura del círculu que supondría construyí'l mundu al revés. Facer turismu rural o asitiase a vivir nel campu ensin rispiu de lo rural, nin de la ñatura nin de nada que ñon concase dafechu colo urbanita, sacantes que les cases tean espreganciaes o adosaes en vez de en barriaes d'edificios con una montonera pisos...polo menos de mano...

Pues nada, tornando al principiu, si los Monty Python reparen nesti requeẍu atlánticu au vivimos igual son a facer una película con una sonadía como aquella de la Vida de Brian, pero onde'l protagonista seya un paisanu que crucifiquen por dir con una vaca per una caleya, o una paisana que llapiden por sacar patates na güerta. Con un argumentu asina igual nos empicorotien a la vista del mundu y facémonos famosos en tola galaxia, hom. Faciendo'l ridículu más espantosu, eso sí, pero empicorotiaos a fin de cuentes. ¡Qué rediola!.

                                                                                  

Tiempu d'espirches

Pues ello ye que yá andamos zampuẍaos nes dómines de les espirches. Cada vegada que s'acerca un fin de selmana podemos ver anunciaes delles. El ramu lloréu a la puerta diznos el chigre onde tienen una entamada. Dientro, la pipa -orniada tamién delles veces con lloréu y bautizada con un ñome escritu nella- y alredor unes meses con toa una carrapotada de comida pa forrar (centollos, andariques, güevos cocíos, empanaes, conceyales, tortielles...), qu'hai que preparar bien el butiellu pa que'l caldu a saborgar nun ẍuba aína a la cabeza.

Pente los veceros de la espircha hai de too. Ẍente que charra y espansiona y dalgún que pue animase a echar una tonada o un grupu que la entama con un coriquín.

Claro que, a vegaes, ponen música ambiente y equí de ẍemes en cuando atopes coses tarrecibles, como músiques foriates que nun concasen gota con un actu de la nuestra cultura tradicional como ye la de la preba de la sidra.

Les espirches d'estes feches son pa tastiar la sidra ñuevo, la que se mayó la seronda pasada. La pipa que se ruempe tien una sidra que va acabar de facese na botella pa ponelo a la venta en pasando un tiempu tovía. Poro esta sidra nuevo nun s'escancia. Va de la pipa a la botella y d'equí al vasu en sin tiralo de lo alto. Ye un vezu de dalgunos chigreros pone-yos a estes botelles un distintivu pa cuando salen a echar sidra peles meses sepan que naquelles onde tán  eses botelles marcaes nun tienen que lo facer.

El sabor de la sidra ñuevo y el de la yá perfecho, arriendes del tema de qu'una s'eche y otra ñon, ye estremáu. Poro, los sidreros verdá, van peles espirches pa tastiar la sidra acabante facer nel añu y saborgar los distintos palos, neto a lo que faen cuando van a tomar sidra embotellao y echao dende lo alto. Y si cuadra, meses dempués puen comprobar cómo esa sidra de tal llagar va madureciendo y garrando'l puntín amañosu na botella.

Pero hai un aquello que da un poco preceguera cuando va ún a una espircha. Ello ye qu'abonda ẍente -abúltame que cada vez más- forra bien l'estómagu colos pinchos qu'hai nella, pero nin se molesta en  prebar lo de la pipa, que ye en realidá a lo que se supón que s'entra a tastiar nel chigre de turnu. Peravezáu que ta'l personal a beber sidra fecho y escanciao, la que nun se tira de lo alto y ye tovía mui ñuevo tarrecen tomalo. Dicho d'otra manera, la cultura de prebar esta sidra tal paez que recula y eso ye peligroso. Porque si un chigreru nun ye quien a vender una pipa pequeña de sidra d'espircha en tres díes, pue llegar a plantegase si paga la pena siguir faciéndoles o deẍales pa prau. Camiento que si delles se siguen entamando ye porque-yos salen rentables polos pinchos que venden o pol aquello de que llama a la ẍente lo de qu'hai espircha, anque como digo, dempués la sidra de la pipa que se ruempe nin lo preben.

Pero, espiriques crítiques a parte, el casu ye que, como diẍi al principiu de la entrada, tenemos abondes espirches nestos díes que tamos. Asina qu'invítovos a participar d'elles, pero eso sí, prebá-y la sidra de la pipa, lo ñuevo, educái el gustu al so sabor, y doctoráivos n'estremar la sidra d'un  palu y otru como lo facéis colo yá perfecho. Paga la pena.