Cola botella sidra enriba la mesa, yo diba garrando los bígaros,
apartándo-yos el güeyu, sacándolos y llevándolos a la boca mostrando un
remangu intachable cola alfiler.
Na mesa d'al llau nun sacaben
bígaros. Sacaben el guispiu y despelleyaben a toos y a too pegando unes
berríes tremendes como pa da-yos más consistencia a les sos sesudes
argumentaciones.
Nuna esquina la barra, como quien va sacar un córner, el tecnolóẍicu solitariu esperaba que-y recargara'l móvil qu'enchufare
dayures, escosu de tantu mansuñéu, mientres miraba empapirotiáu pal
televisor recargando de pasu'l so cerebru pa poder asina pensar y opinar
nel momentu afayadizu con solvencia y ẍacíu contrastaos poles monẍures mediátiques.
Fuera descarga la ñube. Al traviés de la puerta acristalada vense pasar rapazos ensin paragües y cola gran pingadura festeẍando l'eventu. Si l'agua fai xorrecer les plantes, ¿por qué non la cocorota de los humanos?. Los
chigres tienen eso. Ente sidra, bígaros, guispios, móviles, televisores, ñubes descargando y
demás aconteceres, comprendes que, de dalguna manera, los
terraplanistes tienen el so mizquín de razón.
P.D.: "En Marzu faigo'l niarzu. N'Abril pongo'l guevín. En Mayu guaro. En Ẍunu plumo. En Ẍunetu écholos a pidir con un cestu. Y n'Agostu si los veo nun los conozo". Primavera. El ciclu de la vida sigue. El casu ye nun aflacar.
Un individuu sáltase toles normes de circulación y espétasela y la culpa ye de la carretera que ta en mal estáu.
Un individuu quema un monte y la culpa ye del amu que nun lu rozó.
Un individuu tira la basura na vía pública y la culpa ye del deficiente serviciu de llimpieza.
Y sigui enriestrando. L'individuu que puña pa entrar nun sitiu ensin dexar salir. L'individuu qu'interrumpe a quien que te ta atendiendo como si fueres invisible. L'individuu que te fai apartate si te cruces con él porque nun fai degomán nengún de mover la trayectoria, L'individuu que lleva un perrazu sueltu y ensin bozal porque nun fai nada, hasta que sí lo fai. L'individuu que dexa'l coche xusto na esquina y si vas col tuyu oblígate a arriesgate a cruzar ensin la visibilidá necesaria...
Y sí, miániques. Pue ser bien cierto que la carretera tea en mal estáu, que'l monte tea ensin rozar y que'l serviciu de recoyida de basura sea meyorable. Pero hai nel cogollu del asuntu más, muncho más, ¿qué cosa cosadiella ye una cosa y nun ye cosadiella revesosa...?
Yo, ego, mi, migo: l'individuu. Lo individual. El cultu al embeligru. Los individuos que confunden democracia y convivencia con marques de galletes y que nunca nun son responsables de nada. O, si acasu, la so responsabilidá ye compartida na colectividá. Esa respondabilidá ye de la xestión de lo colectivo y de los "otros". Una espirica y unos comportamientos que son un andanciu que s'esparde como la meruxa na nuestra sociedá actual.
El mundu al revés esiste. Ye la gran creación y el gran triunfu del
individuu que se salta les normes de circulación, del individuu que
quema'l monte, del individuu que tira la basura na vía pública, del individuu que truña, qu'interrumpe... Pero
los responsables somos los demás y el nuestru complexu d'inferioridá
frente a los individuos antisociales. Y entós alcagüetámoslos,
autoculpámonos y buscamos escuses de toa mena pa rebaxa-yos la
responsabilidá repartiéndola ente toos.
¡Ah!. Y tamién
berramos. Berramos muncho cuando l'individuu espeta contra nosotros
causándonos una desgracia, cuando quema'l monte que yá fora de los antiguos de casa
camudándolu nun ermu, o cuando nos zampamos en suelu por culpa de la
puxarra que dexó ellí. Berrar y alcagüetar pa que'l mundu al revés siga
esistiendo ye bien de veces la nuestra rempuesta y poco más.
El xugu de lo políticamente correcto, de lo socialmente correcto, de los discursos biempensantes y pih.oprogres correctos, tiennos engarrotaos, acuruxaos y desarmaos frente a la xermandía de los individuos antisociales que cada día que pasa medren, empicorótiense más y algamen más espacios privativos de so. Y asina nos va.