jueves, 26 de diciembre de 2019

Antropomorfos y mazcaraes d'iviernu

Entamo esta entrada col fragmentu d'un estudiu xenéticu fechu nel añu 2.014 por un equipu de la Universidá d'Uviéu:

"El trabayu de campu atropó 486 muestres pañaes en 61 conceyos asturianos a individuos que los güelos vivieron na mesma  zona xeográfica(...)L'amuesa asturiana integróse nuna base de datos con más de 9.500 referencies procedentes d'otres poblaciones d'Europa y Africa del Norte p'atopar patrones xeográficos a escala local, rexonal y europea. Les tendencies detectaes nesa comparación estadística permiten relacionar a la población antigua d'Asturies cola d'otres rexones de la llamada zona Franco-Cantábrica."

De suguío, pongo otru fragmentu, del prólogu del llibru Folklore d'Asturies, de María Xosefa Canellada:

"L'home primitivu astur (y acasu cántabru) tien un pasáu históricu peracusáu vitalmente. Ye de cuando cazaba osos y mamuths prehistóricos, y cuando quiciabes tuvo un matriarcáu na so organización. Enagora nos queden n'Asturies nicios  d'aquella civilización. O, polo menos, nicios de la mentalidá d'aquella civilización. ¿Quién pue dicir que nun hubo civilización tala?. ¿Y Altamira?, ¿Y el Pindal?"

Entramos nestes feches nes mazcaraes d'iviernu. Herencies ancestrales de les cultures prehistóriques y relacionaes col ciclu ivernal. Dientro d'elles, destaquen los mazcaritos antropomorfos. Personaxes marutaos con atributos animales como pelleyes o cuernos. Estes representaciones recuérdenmos ritos de sociedaes cazadores recolectores. Y nel casu de nuestro, ¿d'aú vienen?.

Una de les civilizaciones -o una sucesión d'elles- con importancia cimera na prehistoria europea, ye la franco-cantábrica. El suroeste francés y parte del norte peninsular foi abellugu per munchos milenios de les poblaciones del paleolíticu superior cuando avanzaben les glaciaciones. Dexáronmos abondos escatafinos de la so presencia en representaciones d'arte parietal, arbíes y arte mueble.

Dientro d'eses representaciones tenemos les antropomorfes. Figures con rasgos humanos. Y dientro, d'elles representaciones humanes mecíes con rasgos animales. Voi centrame en dos que rescamplen dientro de les que tenemos n'Asturies.

La primera alcuéntrase nel Pozu'l Ramu o Tito Bustillo. Nuna formación estalagmítica tenemos dos antropomorfos, opuestos en cada cara d'ella. Trátase de figures d'home y muyer con cabeza d'animal, probablemente bisonte.

La segunda ye la conocida como Venus de Les Caldes (semeya del post). Tallada sobre una cuerna de ciervu, representa a una muyer con cabeza y pezuñes de cabra. Y amiesto equí un apunte: dientro de los rellatos aportaos por informantes de les vieyes zamarronaes l.lenices, fálenmos de personaxes que salíen marutaos con pelleyes de cabra, incluyendo la cabeza y los cuernos del animal.

Arriendes de la nuestra zona franco-cantábrica, el paleolíticu superior espardióse per tol continente européu. Y, arriendes de les erbíes d'aquelles sociedaes nómades de cazadores recolectores, danse coincidencies a miles de kilómetros nel arte. Por exemplu, les figures llamaes venus, atópense dende los Pirineos hasta Rusia, pasando por Francia, Chequia o italia. Na península cuesta trabayu atopales. N'Asturies tenemos la mencionada de Les Caldes, que nun axunta unanimidá de criterios, y hailos que la consideren un adornu d'un propulsor. L'otru casu que tenemos ye la venus antropomórfica de la cueva de La Riera, en conceyu Llanes.

Nos certámenes de mazcaraes que se celebren perdayuri llamen l'atención les semeyances ente mazcaritos de países alloñaos per miles de kilómetros. Esto asocede mesmamente colos nuestros sidros, que tienen "parientes" bien lloñe de les nuestres fronteres. Nada raro realmente, si treslladamos a esti ámbitu lo dicho nel párrafu anterior col casu de les venus. Los antropomorfos afayámoslos representaos nes civilizaciones paleolítiques de sitios peralloñaos. ¿Cómo nun va haber semeyances nos mazcaritos antropomorfos d'anguaño?.

Nes mazcaraes d'iviernu atopamos elementos -los mazcaritos antropomorfos- que nos treslladen en pelondines a la nueche de los tiempos. A les dómines de les civilizaciones de  cazadores y recolectores. Los datos tán ehí. Les sos representaciones parietales aprucen nes cueves y tamién nel arte mueble. Y tamos ante un casu más de la pervivencia de vieyos elementos culturales y máxicos de sociedaes y civilizaciones prehistóriques que s'asitiaron nel nuestru suelu y nel continente al que pertenecemos. Y ello conviérteles n'elementos culturales de primer orde y d'una importancia nidia.

Tamos nel iviernu. Salen los mazcaritos a antroxar y pidir l'aguilandu. Vamos esfrutar de les vieyes mazcaraes ivernales. Una ayalga viva de los nuestros ancestros.
                                                                                  

jueves, 12 de diciembre de 2019

Muga en monte

Un día d'Avientu. La mochila preparada la xornada anterior albidrando que diba tar escamplao. Pero non. Llueve y ta frío. Había que plantar dos texucos pa ver si espoxiguen pa la primavera. Asina que a enfilar p'allá y a ello.

Na viesca'l suelu ta llentu. A vegaes enllamargáu. Orpina unes vegaes, para un momentu, llueve otra vuelta. El xabalín dexó'l so rastru. De fozar y de pezuñes. Nun hai naide per equí arriba. Siéntese'l burbús de los árboles al pingar y de les fueyes qu'inda tán soltando.

A la vera'l camín hai un plantonín de lloréu. Puestos a ello, vamos llevalu tamién p'allá. El cachu monte d'un día de gües tien castañales, carbayos, abedurios, árgomes, escayos...y munchu felechu que voi tratando de desaniciar pa que bilten árboles y torná la llaceria del fueu si aporta. Pasu ente pasu, voi llantando dalgunos plantones, que cuadren col entornu y queden chuscos: un carrascu, dalgunes fayes, y hoi un par de texos y el lloréu que mencioné enantes.

La xera de ponelo ye cenciella. La tierra ta blando pol agua y deseguida ta too yá asitiao. Sorpréndeme a la espalda un ruíu que nun ye de goteriar nin cayer fueya. Voltio y veo pasar a tou meter un corzu y darréu lladrar un perru. Tiros nun se sienten, asina que nun paez  que naide ande de caza furtiva. Ver a los corzos correr impresiona. Casi nun los ves nin cruzar per delantre ti. Yá otra vegada pasó delantre les mios ñarices ún a toa mecha y téngolos visto dacuando lloñe, pero nun te dexen acercate migaya, ¡ca!.

Empecipia a posá la borrina. Nun ye trupo y vese bastantina. La impresión de la viesca empapada pola muga y cola borrina endolcándola ye máxica. Pues creyer que per ende anda escucándote una xana, o un diañu, o un busgosu. Somorguiáu nesi mantu, la mente esnala a dómines de cuantisimayá.

Taba recién l'anuncia del descubrimientu per tierres del norte francés d'una nueva venus. Eses figurines femenines ñarres con unes formes corporales acutralaes y perbultables. Dicen que puen tener un aquello relacionao cola fertilidá. Nos tiempos au les facíen la supervivencia del clan yera prioritaria. Nun tienen cara davezu y equí guirrió'l mio maxín a otres figures femenines ensin cara y que formen parte d'abondes cultures, incluyida la nuestra. Refiérome a les moñeques de maíz (o d'otros cereales, en xeneral). Les figures iguaes con cereal tamién tienen la so relación cola fertilidá, pero de la semiente y escurque de la tierra.

Figures femenines, ensin cara, relacionaes cola fertilidá del clan y de la semiente. Otra vuelta apruz na alcordanza una nueva referencia femenina: La Vieya. Que ye como dicir el bierzu onde ñacemos, crecemos y vivimos. La Vieya, la venus, la moñeca de cereal, la tierra, la ñatura. Y la viesca falando col agua que l'amuga, coles fueyes qu'anubren los  caminos, col ruíu del corzu que h.ispia.

Tenemos el megollu del nuestru ser formáu por milenta capes. Por ñicios de vieyes cultures. Viéndolos dende la güeyada urbanita igual nos paecen daqué ensin xuntura, ensin relación, coses ensin mayor importancia pa la nuestra vida actual.

Pero non. Tamos fechos de toes eses capes y basta con zampuxase na viesca pa que la nuestra parte animal y ancestral apodere a la racionalidá con que davezu nos mazcaritamos. Y entós, les fayes, los carbayos, les castañales y árgomes, la muga, la borrina, el reinu de La Vieya cola so maxa, estampla con tol so grandor  y trescálamos. Y pescanciamos entós el siginficáu de les venus, de les moñeques de cereal, de la fertilidá que trai bayura y supervivencia al clan humanu.

Porque, por muncho que nos enchipemos sofitándonos nel actual esporpolle tecnolóxicu de la nuestra civilización occidental, la supervivencia sigue siendo daqué qu'enxamás tenemos garantizao. Y, mesmo anguaño, ehí tenemos la gafura tarrecible del cambiu climáticu que nos esmolez y hasta axoriza. Y ye que nun tamos tresnaos d'asfaltu, hormigón y urbe, magar vivamos y nos afayemos nello. Los nuestros raigaños fúndense na tierra, na muga, na viesca...Porque anguaño somos animales de la ñatura, neto a como lo fuimos  milenios atrás, na alborada de la nuestra especie. Y aneciar n'escaecelo nun va resolvenos la nuestra vieya llucha pola supervivencia.
                                                                                

martes, 3 de diciembre de 2019

L'alcalde, l'alcaldesa, el paripé y la momia

Como yá dixi otres vegaes,  lo que yo escribo nesta bitácora sóplamelo'l Xanu. Yá sé que cuesta creyelo, pero ye asina, miániques. Y teo novedaes escayoses. Díxome hoi mesmo que la so paciencia morrió de noxu y tienla momificada nun sarcófagu, que m'apurrió d'él la semeya y too, como podéis ver a la mandrecha. Pero les paciencies de los xanos nun son como les de los humanos y cuando muerren siguen afalando dacuando cola so guiada gafienta. Asina que tremé yo pensando les verdiascaes tres de les oreyes que se-y pudieren ocurrir al Xanu al traviés de la so momia paciente y acerté. Ehí van dalgunes:

L'alcalde d'Uviéu promete dar munchu xuegu nesta llexislatura. Acaba de llantanos en llombu una bandera, que sólo'l palu yá anda polos cincuenta mil euros, que vien a sé lo que a un mileurista-y cuesta ganar casi cuatro años, ¡adepuxa, nin!. Pasé yo pel sitiu y ta asitiada la bandera en cuestión a mui pocos metros de la Xunta Xeneral, onde ondeen tres banderes bien grandes, una d'elles la española. ¡Que cuando sople l'aire van acabar bicándose los trapos de les roxigualdes, rediós!. Pero cuando tábamos envizcaos con esti asuntu, resulta que rescampló otru pola mor de que nun viaxe que'l rexidor fixo p'allalantrones pasó gastos de la so muyer al ayuntamientu, onde nun trabaya nin tien cargu eleutu dalu nél. Pero como al implicáu paez-y too de lo más normal y de xacíu, cuento que sedrá pasando estos cargos n'adelantre.

Más p'hacia la mar, per Xixón, tenemos alcaldesa. Entró nel cargu de trebolén, con ganes de fincá'l canil n'asuntos que-y paecen perxugosos y fíxolo darréu. Malpenes tuvo tiempu de poné'l pie nel consistoriu, cargóse'l festival del Arcu Atlánticu, un eventu que la drecha nun-y importa mayormente nada (resalvando quien lu creó) y que la izquierda teníalu agüeyáu, porque la manzorga xixonesa -y asturiana en xeneral- ye más de selmanes ñegres, cutres y con golor a aceitizu, que d'atlantismos culturales. Pero la mandataria tamién dexó a les clares, dende'l minutu ún, les sos zunes pa col asturianu. Asina que, pali que pali, va desaniciando la presencia del nuestru idioma de les actividaes del ayuntamientu. Y al llegar equí hai una cosa que nun me cuadra. Apocayá salía pelos medios la semeya roblando una futura collaboración ente l'ALLA y l'ayuntamientu xixonés. Y entrugo yo: ¿qué rediós firmaron?. Misterios insondables de la vida, que diría l'otru.

Hai semeyes que tal paecen amosá'l subconsciente de quien les pon. Clisáu quedé yo al vé la foto de la estatua xixonesa del romanu Octavio Augusto col deu señalado como pal cielu del atapecer, como queriendo ilustrar con ella los autores lo que consideren un requexu xenuín y identificativu de la ciudá de Xixón. Pues poníala una formación política onde fueron a desamar bien de xente que tuvo años faciéndose pasar por nacionalistes asturianos, hasta que golifaron puestinos y perres cerca y falto-yos tiempu pa h.ispiar pa otros sitios con más posibilidaes d'algamá los sos petites. Tien el so aquello. Una cosa tan cenciella, y aparentemente intrescendente como la semeya referida, esplica guapamente por qué'l nacionalismu asturianu -o, simplemente, l'asturianismu d'izquierdes- esfarrapó nun va tanto, resalvando'l pequeñu ya irreductible aruelu del soberanismu que llogró quedar mancorniáu, pero de pies.

Hai xente que fala asturianu porque ye como falaron siempre. Otro failo anguaño a costa fecha, porque camienten, persabiamente, que ye la manera más amañosa de que l'idioma siga vivu. Pero hai tamién una triba de falantes pa la galería. Usen esti idioma n'ocasiones concretes, cuando tán los medios de comunicación delantre, que ye una manera estupenda de destacar y aumentá la sonadía, pero...Dempués yá non. O, si acasu, de xemes en cuando, porque viste en ciertes llurigues. A esto postrero ye a lo que-y se llama facé'l paripé. Y tien un ésitu bien bultable pente'l zurriburri reivindicativu y, bien de vegaes, amomiáu. Cada vez qu'estos usuarios circunstanciales tienen a bien usar l'asturianu, empondérenlos, empicorótienlos, úpenlos altor d'héroes y salvadores llingüísticos, y pónenmoslos como exemplos a venerar y siguir. Son les servidumes de la endogamia militante, del conceyín d'amiguetes eleváu a reivindicación llingüística nacional, de l'ausencia clamorosa d'autocrítica, y tamién esa traición del subconsciente que produz que, arrascando la primer capa de munchu patriota llingüísticu, apaez daqué tan vieyo como'l mundu: la busca del porgüeyu, de destacar, d'esguilar. Cenciellamente y alón.

Pues, bono, per hoi voi poné'l ramu a esta entrada con una segunda mitá d'ella políticamente incorreuta. Golíame yo que'l Xanu diba xuxuriame les coses per esi camín, qu'hasta me cimblaba'l pulsu al escribir lo que taba sintiendo. El diz que ye cosa de la so momia paciente. Pero nun sé yo si me tará tomando'l pelo y sedrá cosa d'él a seques. Asina qu'equí vos dexo la espirica escrita y despídome hasta la entrada viniente.
                                                                         

viernes, 29 de noviembre de 2019

La Vieya y el Nuberu anden enfurruñaos.

Esta mañana taba ñublo con llugaes en cielu. Y pa un llau podía vese l'arcu la vieya. Al final, orbayó
un puquiñín, pero acabó escamplando dafechu ya'l Sol rescampló nun cielu azul.

El tiempu anda llocu, al dicir de la xente, y les estaciones mecíes. Igual enxareyamos una carrapotada de díes ensin llover y la seca amenaza, que se pon a echar agua de contino y la posibilidá d'inundaciones aforfuga.

Antes orpinaba y orbayaba más. Yera lo normal, la manera en que la ñublina y les ñubes nos dexaben l'agua. Agora eso cambió. Llueve más gordo. En plan de ñube y xarabatu. O, lo que ye peor, entama a llover y pasa díes que nun para y lléguenmos les que llamen gotes fríes. Valta l'agua árboles y arrinca'l somantu fértil que favorez que guañe la semiente.

Pel branu la seca ye una visitante que yá nun falla nunca. Les fontes escosen. Los regatos paecen filinos d'agua o escosen tamién. Los praos camunden nun color roxu y ruxen al trialos. Hai poca yerba y la xente del campu tien que dir fuera a comprar forraxe pal ganáu.

Antaño les estaciones veníen marcaes y dixebraes. Anguaño paez que namás que queden dos: el branu y l'iviernu. Pero entemecíes tamién. Porque nun ye tan raro, por poner un exemplu, qu'en plenu mes d'avientu xuban les temperatures y ande'l personal en mangues de camisa. La nuestra incultura fai que bien de xente llame a eso facer bon tiempu, pero en realidá ye permalu, fatal. Los árboles echen fueya a destiempu y hasta los páxaros andes desorientaos p'añerar.

Too ello y abondo más ye lo que nos ta dexando'l cambiu climáticu. L'andanciu qu'acute a la ñatura nestes dómines. Encamiéntenmos que va xubí'l nivel de la mar en non tantos años y dibúxenmos la estroza que va facer nes nuestres costes onde van desapaecer playes y les zones más baxes van poder vese inundaes.

La xuba de les temperatures tamién va frayar les nuestres viesques y fauna. Si yá casi dan por desaniciáu'l gallu monte, esa xuba pue rematalu dafechu. Y ver veremos cómo acaben los nuestros maxestuosos y máxicos fayeos, que busquen p'afayase'l norte y la humedanza.

Cuento que La Vieya ta enfurruñada porque tamos dexando'l somantu onde nos añó y acoricó fechu una llaceria. Y, a lo meyor, el Ñuberu anda encabritáu también con nós y yá nun sabe si colar dafechu o aprucir pa soltamos agua como cuentu risa y a destiempu.

Esto pinta mui feo. Porque nós podemos apurrí'l nuestru granín d'arena pa collaborar en tornar tanta llaceria climática y ecolóxica. Pero la igua tien de se facer a nivel planetariu, de la humanidá en xunto. Y eso ye revesoso a zurriburri. Y hai grandísimos poderes ya intereses emburriando a la contra que nun tan dispuestos a arrenunciar a los sos porgüeyos.

Dicía enantes que'l tiempu andaba llocu. Pues igual non. Almeyor el tiempu ta percuerdu y los que tamos llocos d'atar somos los humanos qu'aneciamos too darréu en carganos el planeta onde vivimos.
                                                                                 


sábado, 23 de noviembre de 2019

¡Uxa, uxa!

Pues ello ye que los diputaos asturianos de la Xunta Xeneral van xubise'l sueldu un 2,2%. Una xuba que nun van percibir los funcionarios, nin los xubilaos, por citar dos grupos que reciben los sos ingresos de les arques públiques, neto a los de les señoríes parllamentaries. Y de los que trabayen nel seutor priváu, pues más de lo mesmo, claro.

Sopeléxase tamién que los nuestros representantes van doblar les asignaciones en dietes en comparanza coles que percibíen l'añu pasáu. Pero igual son llevantos de xente picotero, que conste.

Tamién recibimos l'anuncia de que dende instancies europees van mandamos 5.000 millones pa les comarques mineres.

Hai xente mal pensao pa too. Y eses mentes perverses, de guispios gafos y males zunes, mosquéense por aciu de que coincida l'apurrimano europea cola xubida de sueldos y dietes de los políticos que calienten sillones allá pela cai Fruela d'Uviéu. Pero trátase d'una coincidencia namás, cóime. Pura coincidencia, miániques. Que vos lo digo yo, que d'esto entiendo tanto como de pilotar astronaves.

Per Uviéu anden de cruzada. Quieren llantar una banderona que vean hasta los cuponeros na plaza La Escandalera. Non una banderona del conceyu, nin asturiana, nin europea. Una banderona española. Ye curioso. De magar va un tiempu que cierta xente empecipió a poner banderes españoles nos balcones de les viviendes, afalao pol asuntu catalán, tal paez qu'evolucionó pa un esconxuru que va iguar abondos males: paru, sueldos ruinos, trabayos de risión, sanidá, educación...Pero ¡ca!, díxome un paxarín a min que si los abanderaos piensen que van arreglar daqué colocando per dayures roxigualdes que lo vayan escaeciendo, porque nun va ser asina. Y esi paxarín ye un raitán, que son mui llistos.

En monte onde yo voi a la gueta peles serondes hai zones que paecen un paisaxe llunar. Débese a que, notres dómines, la xente xubía p'allá col paxu y la fesoria a  sacar carbón pa les cocines económiques que tizaben con esti mineral fósil. Naquelles cocines tresnábase la comida, pero tamién escalecía la xente de la casa, porque los de los radiadores eléctricos y les calderes d'agua vieno dempués.

Poro, a la hora de dir echase, metíase un lladriyu caliente, o una bolsa de goma con agua calentao pa poner a los pies y entrar en calor, porque los cuartos taben fríos. Cuando s'achucaba a los rapacinos espantábase'l fríu diciendo "¡uxa, uxa!", que tamién s'usa pa cuando se manquen o quemen, y que tien variantes como "úxara" y "úxica", que tamién s'usen pa espantar persones en dalgunos sitios. Un vezu qu'escurque pueda tener unos raigaños vieyos y que paez toa una invocación proteutora.

Cuando tovía nun fuimos pa sacar del too'l piscuezu de la crisis-estafa d'hai unos años, yá mos vienen col burbús de que s'acerca otra. Son esto que nos venden como crisis daque raro. Porque suponse que a tol mundu-y va dir mal con elles. Pero non. El númberu de ricos nel Estáu Español medró nun 40%  nesta cabera. Y nel últimu añu hubo fortunes qu'espoxigaron una barbaridá. Asina que'l términu estafa apodera al de crisis a la hora de definir esti andanciu.

En fin, qu'esperemos que pa que los ricachones nun vuelvan a aumentar les sos fortunes a costa de los de siempre, nun aporte un momentu en que los demás tengamos que tornar al monte, col paxu y la fesoria, a escargatiar buscando carbón pa dalguna cocina de les d'antaño onde podamos escalecer, o a  pañar lleña pa una estufa bilbaína vieya qu'ande escaecía pel sobráu de casa.

De toles maneres, y por si cuadrare que pinta bien pa espantar gafures, igual podemos xuxuriar, a la hora d'achucamos el "¡uxa, uxa!" d'arropar a los rapacinos. Que bien pudiere ser que valga tamién pa los mayoronos.

Por si acasu, cho, que nunca se sabe. Nun vaya ser que funcione daveres y non como lo de les banderones, que ye una pascaxada que pa iguar problemes nun va nenyures.
                                                                              
                                                                                 

lunes, 11 de noviembre de 2019

El carru y el llobu

Día 11 de Payares. Samartín. Cellebración de la matanza del gochu. Día der resaca eleutoral tamién. De quexes y llantos pol ascensu del ADN español, el de tola vida, el de la "unidad de destino en lo universal". El de los qu'ayeri gritaben "a por ellos" como matachinos, corón en mano, que van pa la corripa a pol gochín refalfiáu.

Reza un dichu asturianu qu'hai que dexar que cante'l carru porque espanta al llobu. Tres el recuentu de votos d'ayeri, paez que'l carru cantó, entornáu y esgonciáu, eso sí. Pero'l llobu acercóse más que nunca nes últimes décades y metió'l mieu en cuerpu. Arregañó claramente los caniles y acuruxó abondo.

Hai paradoxes polítiques que nun dexen de tené'l so aquello. Los demonizaos nacionalistes y secesionistes periféricos tienen nes sos manes les llaves que piesllen la puerta al fascismu españolista y que la dexen abierta pa que siga circulando enagora'l poquísimu aire que-y va quedando a esti Estáu como democráticu y de drechu.

Lo que se sema arrecuéyese. N'Asturies llevamos cuantísimayá con unos gobiernos socialistes que prauticaron nesta tierra'l nacionalismu español más patrioteril, ranciu y carca, hermanu del más xenuín de la drechona. Al empar, prauticaron ellos y esa drechona un antiasturianismu xabaz. Ello iguó un caldu de cultivu afayadizu pa lo qu'hoi tenemos: escaños pa formaciones claramente antidemocrátiques y rabiosamente antiasturianes.

Pero nun ye namás qu'eso. N'Asturies siempre se votó madrilano y eso dexa una güelga de llaceries. Los resultaos qu'equí se dan son hermanos a los de les comunidaes onde'l nacionalismu español domina dafechu. L'electoráu asturianu compórtase, dende la Transición, como si fuere'l d'un simple barriu madrilanu más. Ayeri quedó perdemostrao una vegada más. Hasta Teruel (dicho seya con tolos respetos) algamó más representación en Madrid qu'Asturies.

Enfotu y formación son dos cualidaes inprescindibles pa enxaretar proyeutos políticos propios. Formación hai perpoca. Ente nós abunda'l mantra, la frase curtia, l'argumentu de tres llinies. Escasea la espirica razonada, la contrastación crítica y argumentada. Tarrezse muncho lleer y presta pola vida glayar, quexase y entafarrase nel victimismu.

Escasea tamién ente nós l'enfotu nel país. Llevo tola vida sintiendo xente dicir que-yos gustaría tener equí partíos propios como los tienen catalantes y vascos pa tener pesu nel embeligru'l reinu. Pero dempués esa mesma xente pierde les madreñes corriendo a votar a los partíos centraliegos. Si se presenten opciones netamente asturianes pasen d'elles dafechu. Figúraseme a min que los partíos propios que-yos gusten deben esistir namás que nes llendes de la so cabeza.

Tampoco nun hai enfotu ente muncha xente que quier trabayar na política. Ye de lo más corriente atopar persones que se definen políticamente como asturianistes y hasta nacionalistes que militen y voten en partíos españoles. Nun imaxino yo nacionalistes catalanes o vascos militando y votando al PP, PSOE y demás. Equí ye'l pan políticu de tolos díes.

Dempués tán esos otros qu'amuesen tanta impaciencia y priesa por consiguir sentá les ñalgues nes instituciones que  h.ispien a les primeres de cambiu de los partíos asturianos onde militen  pa entrar notres formaciones d'ambitu estatal onde sí tienen esa posibilidá. Exemplos de lo anterior y d'esto cabero tenémoslos a esgaya.

Poca xente d'izquierdes, y poca xente en xeneral de la que se mueve nos aruelos asturianistes/nacionalistes, votó nestes eleiciones qu'acaben de cellebrase a la única candidatura asturiana y d'izquierdes que se presentaba, Andecha Astur, magar xubió'l so porcentaxe nel recuentu votos con relación a les anteriores. Nada nuevo, pues siempre pasó lo mesmo cuando esistíen otres formaciones llariegues (Conceyu Nacionalista Astur, Ensame, UNA, Pas...). El personal nun les vota, garrándose a sides de toa mena. ¿Posibilismu?. ¿Votu útil?. Non. Falta total y absoluta d'enfotu nes propies fuerces y, por qué non dicilo, nel propiu país.

La involución nel Estáu Español nun pue ñegase. La Constitución ye un papel moyáu. ¿Un exemplu?. Va unos díes, el Tribunal Constitucional roblaba que se pueda despidir a un trabayador por garrar baxes llaborales. Estorba y púñase contra les llingües non castellanes. Estorba y púñase contra les autonomíes. Reculen los drechos llaborales y sociales de toa mena. Sopeléxense pelos medios escritos y audiovisuales, ensin molestase yá nin en despistar, conteníos impecablemente reaicionarios y fascistes...

Escribí nos primeros párrafos del artículu qu'ayeri cantó'l carru. Sí, paez que'l llobu arregañó los caniles pero nun los fincó tovía. Pero que lo faiga va ser cuestión de tiempu. La tendencia va per esi camín. Cuando'l candidatu más votáu salió a falar a los sos simpatizantes veíense bien de banderes españoles, pero non autonómiques, que yera lo que se veía cuando'l que ganaba yera un candidatu de la drecha. Tou un badagüeyu que pa mio idea va más allá de lo aneudótico.

Cuando les coordinaes cambien d'una manera bultable, ye mester replantegase a fondu les coses. Pa que siga cantando'l carru va haber que-y xuncir otra gabita. Y dende Asturies esa gabita pasa por enfotase nel propiu país y construir dende y pal propiu país  ensin arrenunciar a nada. Tamos entrando en dómines nueves y abegoses. Siguir, políticamente, dexándose llevar pola inercia de siempre d'andar al rau de lo foriato pue resultar, coleutivamente, suicida. Y si cai l'Estáu na boca del llobu nun podemos quedar esperando como corderinos a que mos encete.
                                                                               



  

jueves, 7 de noviembre de 2019

La moñeca ensin rostru

Ello yera un rapacín que-y regalaron una moñeca que tresnaren en casa los güelos una tarde d'esfoyaza. Yera mui guapina, fecha con fueyes de maíz y el pelo roxo iguao coles barbes de la panoya. Pero tenía un aquello, la cabeza nun tenía rostru. La cara taba vacía de güeyos, ñarices, y boca. Asina que decidió pone-ylo  elli. Garró un llapiceru y entretúvose pintándo-ylo. Pero nun lo fixo una vegada namás. Prestó-y tanto la xera, que borraba lo que pintare y volvía a pintalo d'otra manera cada poco. D'esta miente, unes vegaes ponía-y a la moñeca unos güeyos grandonos, otres pequeñinos, otres redondos, otres achinaos...Coles ñarices facía otro tanto, unes vegaes grandes, otres pequeñes, otres llargues, otres chates...Y la boca podía facela llarga o curtia, en forma de media lluna colos cuernos apuntando p'arriba, sonriendo, o con ellos picabaxo, murnia. Tanto s'envizcó en cambia-y el rostru a la moñeca que, al final, acabó dexándo-y tola cara entafarrada, como si fuera un chaplón, y yá nun quedaben nada bien  los güeyos, les ñarices y la boca que s'enfotaba en pinta-y. Acabó entós cansando d'ella y dexóla escaecida nun requexu del sobráu, onde en casa apilaben les coses inservibles.

Pasaron los años y el guah.e espoxigó y acabó camudando nun mozu de pelo roxo como'l de la moñeca, parllanchín y gayasperu, que cayía bien ellí onde se presentaba. Pasaba'l tiempu ensin qu'atopare ocupación que-y prestare hasta qu'un día sintió'l rixu de la política y empecipió a facer galanes nella hasta acabar somorguiáu dafechu nesta actividá. Escomencipió a tener sonadía y reconocimientu pente la xente y too paecía que furrulaba tan guapamente...Pero col tiempu pintó que, arriendes del pelo roxo, aprució-y otra coincidencia con aquella moñeca que-y regalaren de neñu. Pali que pali, adulces, foi despintándose-y el rostru hasta perdelu. O pa dicilo más aquello, nun lu perdiera, sinón que lu tenía cambiante dafechu y de contino. Cutiólu una metamorfosis que-y facía tener milenta rostros, milenta cares, milenta aspeutos. Unes vegaes llevaba unos, otres veces amosaba otros. Hasta que llegó un momentu que la xente nun sabía en realidá cuálos yeren los sos güeyos, ñarices y boca reales. Al final, cuando lu miraben los que s'enfotaren nelli apocayá, veíenlu como si tuviere tola cara entafarrada, como ensin rasgos, y nun yeren pa reconocelu baxo nengún aspeutu concretu. Entamaron entós a miralu con rocea, a esquivalu, a nun se fiar gota cuando lu atopaben...Y, a la postre,  la so carrera política nun pasó de sé la d'un simple charrán ensin chapeta y acabó escaecida nun requexu del sobráu de la casa onde s'apilaben les coses inservibles, al delláu d'aquella moñeca que tuviera de rapacín.
                                                                          


jueves, 31 de octubre de 2019

L'amagüestu de la Nueche d'Animes

La mañana de la viéspora del Día de Tolosantos presentóse sele y l'agua que cayera'l día anterior dio pasu a un día ñublu con llugaes. Una mañana afayadiza entós pa empobinar a caleyar pel monte.

La viesca ta llento y la muga baña árboles, felechos y caminos tapizaos poles fueyes de les castañales, los carbayos, los abedurios, les fayes...

Tamos metanos la época de la gueta. Oricios esbillaos en suelu. Otros inda ensin esbillar. Castañes sueltes. Dacuando sientes el ruíu d'un oriciu qu'una castañal suelta. Pues pañar tranquilamente. Col palu remueves la foyarasca y asomen castañes bien curioses. Esti añu hai bayura de castañes en monte. Práuticamente vas faciendo la rebusca con sólo agachate a pañar.

L'agua que cayó'l día anterior fai qu'espoxiguen les cogordes, dalgunes descomanaes. Ves una amanites pequeña, setes lluciendo unos chapinos bien grandes, peos de llobu per ende...

Va pasando la mañana. Pali que pali, pañes unes ambozaes de castañes y tornes pa casa. Pela nueche tocará facé l'amagüestu que per estes feches ye ferial de la nuestra cultura.

La mañana de la viéspora del Día de Tolosantos precede tamién a la Nueche d'Animes. Y pela tarde o yá entrada la nueche yera tradición facer un amagüestu. Si restallaba dalguna castaña yera una ánima que salía del purgatoriu. Nun se comíen toles castañes, pues había que dexar delles pa les ánimes que diben percorrer pela nueche los caminos y llugares onde vivieren.

Poro, dexábase-yos a les ánimes daqué pa comer, agua pa matá la sede. Y lluz pa orientase. Una lluz que s'iguaba con calaveres feches con calabaces o ñabos agüecaos y una vela dientro prendida.  Tampoco nun faltaba quien usare una calavera de verdá.

Son les solombres del atapecer y de la nueche yá entrada momentos amañosos pa facer trastaes metiendo mieu. Marutándose. Ximielgando les calaveres allumando tres d'una sebe, nun requexu del camín...Tamién ye tiempu de que los rapacinos pidan l'aguilandu y reciban dalguna llambiotada.

Pero vamos tornar a lo d'enantes. Al amagüestu. Antaño la mocedá axuntábase en monte a guetar y podíen facelu ellí mesmo. Hoi lo más corriente y facelu en casa. Y asina cumplir con una tradición vieya. Que vien ser tamién como una comunión. Nos vieyos casañeos onde yá guetaben los antiguos, facémoslo nós anguaño. Y siguimos comiendo les castañes d'esos castañeos amagostaes, como les comíen ellos.

Como tamién siguimos agüecando calabaces y ñabos pa facer calaveres con veles enceses dientro. O como trebeyamos dando dalgún qu'otru axorizu a un vecín despistáu. O como dalgunos guah.es siguen pidiendo l'aguilandu.

Faciendo un xuegu fácil de pallabres, la Nueche d'Animes tradicional resístese a morrer. Y mientres haya xente, anque seya unos pocos garrapiellos d'ello, con enfotu en preservar les nuestres tradiciones, miániques que va siguir viva. Y hasta, por qué non, llograr col tiempu que torne a tené'l puxu d'antaño.
                                                                               
                                                                                  
                                                                               
                                                                                 
                                                                                 
                                                                                   
                                                                                      
                                                                                 

sábado, 19 de octubre de 2019

Ochobre

Tarde de muga d'Ochobre. Ayeri, mañana de gueta y nueche d'amagüestu. Tamién nueche de ñoticies d'alluendi, de tierres catalanes. Xaréu y escurribandes. Medios d'información que recuerden a los partes del réxime anterior. Güel a mugor nel Estáu Español de güei. A mugor del pasáu.

Dayures, grupos minoritarios entamen actos d'alcordanza de la revolución qu'aniceo un mes d'Ochobre del añu 34. Pasanon años y xeneraciones d'entós p'acá. Pero paez qu'hai coses que nun cambien.

Nun tira l'aire les castañes. Soplen otros aires, d'involución. Xorrez la xermandía reaicionaria que quier afalamos pa conceiciones del Estáu d'otres dómines. La mecha prendida por esos sectores baltando l'estatutu catalán enguedeyó a la sociedá d'esi país y a la de los demás nun procesu de consecuencies imprevisibles.

Hai años que reculamos en drechos y llibertaes. N'Asturies nin siquiera ta recoñocíu'l drechu a espresase n'asturianu, magar lo que diga la Constitución, l'Estatutu Autonomía, o la Llei d'Usu. Da perceguera sentir a xente espatuxar y esberridar porque nel Campoamor s'anuncie una función n'asturianu, dempués de facelo n'inglés y castellanu. Hai que resfregá los güeyos pa creyelo. La drecha abangada actualmente hacia posicones fascistes descaradamente, torga l'emplegu del idioma vernáculu asturianu na Xunta Xeneral y viéndelo como un gran llogru pa sintise arguyosos. Y dempués dicen que son ¡constitucionalistes!. ¡Rediós, nin!.

El procesu d'esbarrumbe de la sociedá asturiana ye dignu d'estudiu. Dende cuantayá foi una sociedá que s'atitió na vanguardia de les lluches sociales de toa frasca. Tamién na de rispir por un sistema políticu de llibertaes. Llevánonse palos de tolos collores. Esmanganiellanon la minería, la industria, el campu, la pesca. Dexanon el nuesu suelu como un ermu productivu. Manifestaciones, barricaes, enfrentamientos, detenciones...y, al final, la cosa acabó como la vemos anguaño.

Y toa esa historia reivindicativa d'ayeri mesmo cayeo en sucu baxeru de trebolén. Entainó na nuesa sociedá un procesu de cambiu que dexa clisáu a cualquiera. De reivindicar pasóse, por una parte escurque mayoritaria de la nuesa sociedá, a dase ensin más, a aguantar los bastiazos como bonamente de pueda. La solidaridá sustituyéose pol individualismu y les zunes. La reivindicación de drechos, por pañar migayes y dá les gracies. Y, por si too ello nun fuera poco, xorrez  como les cogordes la triba de ciudadanos arrastraos, llambeculos, desdexaos de lluchar polos drechos que mos van arrampuñando día a día...

Pero, como la famosa llei de Murphy guañó con puxu na nuesa tierra, tovía vamos a peor. Agora llévase l'enchipase y presumir de ser vasallos, de rindir pleitesía, de considerar que la nuesa tierra tien de ser un Principáu al más puru estilu medieval. Y esto ye lo que tenemos tolos años cuando aporta Ochobre. Una exhibición d'andar al rau de la monarquía y de les monxures económiques y polítiques que dexanon la nuesa tierra fecha una llaceria.

Yo a too ello llámolo'l síndrome d'Ochobre. Un fenómenu qu'había d'estudiase nes más prestixoses universidaes del mundu. Un andanciu que fai qu'un pueblu reivindicativu y lluchador apocayá, seya güei (resalvando les esceiciones de rigor, por si fai falta aclaralo) una masa amomiada, mardomada, reaicionaria y vasalla. Quien te vio y quien te ve, Asturies.
                                                                           


viernes, 11 de octubre de 2019

Les ferradures del perru'l cura

Yeres un guah.ucu y cruzábeste con un paisanu. Entós elli mirábate entientes, seriu, señalábate col deu y sentenciaba:

-Tu fuisti'l que-y robó les ferradures al perru'l cura.

Ante aquella acusación sentíes un ñudu en gargüelu que t'añusgaba, percorríate'l cuerpu enteru un axorizu tremendu y tremabes pensando qué llaceries te podría acarretar aquel robu que nun fixeres.

Lo que menos parabes a pensar naquel momentu yera que los perros nun teníen ferradures. Eso yera pa los burros, mules, caballos, vaques...Asina que malamente dibes tu nin naide roba-yles al cuzu del cura'l pueblu.

Dempués pasaben los díes y comprobabes que nun te pasaba nada. Naide venía por ti pa trancate quiciabes en dalgún cuartón o enxaretate dalgún castigu tarrecible. Asina l'acusación acababa sumiéndose y en paz.

Yera entós cuando un día acababes decatándote del aquello de que los perros nun tienen ferradures y que lo de furtia-yles al del cura nun tenía xacíu nengún. Too yera una tomadura de pelo y más nada.

Pero aquella anéudota pue valir guapamete pa güei. Cuántes vegaes dende les cugurutes del poder mírenmos entientes, pónense perserios arrestiellando la voz, señálenmos col deu, y acúsenmos de sé los responsables de tal o cual estroza.

Éntramos entós la curuxía, quedamos clisaos y aforfugaos, y esnálenmos pel maxín milenta imáxenes de les consecuencies que mos pue acarretar esa acusación que mos faen dende allarribones.

Podemos persaber que nós nun tenemos culpa dala d'eses estroces que mos acusen d'elles, pero camentamos que la maquinaria del poder ye como una machucona que mos pue estrapayar por más que mos esguedeyemos y esprecetemos n'amosá la nuesa inocencia y que lo meyor ye nun gorgutiar nin facer nada, penitenciando coles culpes y alón.

Y al final d'esti rebilicoque discursivu atopamos l'ayalga que comparten a comuña l'asocedíu que te pasare cuando neñu y les pantasmes que t'escuerren anguaño:

El mieu como carrobexu amañosu pa baltar la nuesa voluntá, pa torgar la nuesa capacidá de razonar, pa tornar la nuesa capacida de reaición.

El mieu. La llerza. La medrana. Una maquinaria casi perfeuta pa encamentamos qu'hai daquién penriba de nós con capacidá de frayamos si nun empobinamos pel camín que mos señalen, por inxustu que mos paeza.

Pero la historia apúrremos exemplos a embute de qu'en toles dómines hubo xente que se remontó contra los acusadores, que francienon les cornales que los ataben al xugu del mieu y que puxanon por camudá les coses.

Nunos casos algamanon los sos oxetivos. Notros nun fonon a ello, pero semanon la semiente pa que xeneraciones venideres garraren el testigu.

Pero en dambos casos, dexanon bien claro y demostrao, que'l perru'l cura nun llevaba ferradures.
                                                                                     


viernes, 4 de octubre de 2019

Aires de seronda

Nes boquiaes de Setiembre entró la seronda y nella tamos. Lo que nun sé ye si mos afayamos. Ye la seronda la estación de la collecha por escelencia. Y, dientro d'ella, la de la vendimia y la pañada de la mazana. Tiempu d'andar a la gueta. De sidra'l duernu y amagüestos. D'anubrise los caminos del monte cola pintalarrama de la foyarasca. Escurque ye nesta estación cuando la viesca algama la picorota de la guapura pola bayura de matices con que se viste. En pasando los díes soplará l'aire les castañes. Esi airón que balta los oricios de les cañes y alloria a dalguna xente, segun dicen. Tamién va venir otru branu, el branín de Samartín, díes poco afayadizos pa los gochos que van acabar coraos en duernu, miániques.

Los aires de seronda tamién traen ñoticies volanderes. Un espolín na Xunta Xeneral por mor del idioma asturianu. Polo visto, hai una diputada que sabe lleer poemes d'una conseyera, pero que diz que si esa conseyera fala lo qu'escribe, entós nun la entiende. Tamién esa perceguera que da ver cómo les monxures del asturianismu oficial reculen y cambien de rexistru llingüísticu cada vegada que les amenacen con da-yos cola verdiasca tres les oreyes, como me dicíen de guah.e que-yos facíen a los probes burros. Dempués vinienon los qu'a la menor ocasión pónense a recitar lo de la oficialidá como si d'un mantra se tratare y como únicu remediu pa los males del bable. Pero paez ser que basta con iguá'l reglamentu de la Xunta Xeneral pa que se pueda falar n'asturianu nella tan guapamente. Quede afitao que soi partidariu de la oficialidá (la de verdá, qu'eso de l'amable...), mialma, porque ye una arbía mui importante p'ayudar a echar p'alantre l'idioma. Pero dame repunancia esi discursu con bien de siguidores que presenten la oficialidá como si fuere una varina máxica que tolo va iguar. Y ñon. Eso nun va ser asina. La oficialidá val pa destorgar caminos y abrir puertes, pero dempués ye la xente la que tien qu'empobinar per esos caminos y cruzar eses puertes y, pa ello tien que tener conciencia...de país. Y equí entramos notru megollu importante de la cuestión. Enfotóse'l personal dende cuantayá en qu'espoxigare una conciencia llingüística n'Asturies, pero ñon de país. Y esi ye un caleyu onde l'asuntu llingüísticu pue cayer y acabar mui mal. Por dicilo de manera breve, llingua ensin país, campana ensin mayuelu.

Cellebrose una edición más del día del traxe. Los paxellos tradicionales ocupen un llugar bien importante en munches cultures como elementu d'identificación. N'Asturies dende abenayá lleva faciéndose un trabayu de recuperación de la manera de vistir de los antiguos, sacándola de les deformaciones y moxigangues que se fixo con ella notres dómines. Usala con toa ñormalidá en tou tipu d'actos ye un bon camín pa echala p'alantre, neto a lo que faen notros países y notres cultures. Agüeyo semeyes d'esti día del traxe y, en xeneral, gústenme y la iniciativa paezme bona y a ver si perdura nel tiempu. Lo único que nun acaba d'entrame pel güeyu ye lo del concursu con pasarela y premios. Pienso cuando lu veo na xente que vistía asina por pura ñecesidá y porque, cenciellamente, yera la so manera de vistir y rínchame l'asuntu. Pero tampoco nun vamos armar un espolín por eso. En xunto, l'eventu paezme interesante.

Aires de seronda. Asturies alluma'l to camín, rezaba un calandariu allá a finales de los setenta garrando pa ilustralo la litografía de Picasso con una mano teniendo por una lámpara de mina encesa. El problema ye que les mines tán casique toes pesllaes anguaño y les lámpares apagaes. Mal badagüeyu. Veremos ver cómo mos pinta'l futuru. Mentes haya vida hai esperanza p'allumar caminos propios. Y vida, anque feble y esgonciada, tovía l'hai nesti vieyu país atlánticu llamáu Asturies.

                                                                               


jueves, 26 de septiembre de 2019

Ñalguetada saludable

¿Quién nun punxo dacuando una inyeición o tuvienon que lu pinchar na vena d'un brazu pa saca-y sangre?. Si hai daquién que a lo llargo de la vida nun pasó por una esperiencia d'eses, felicidaes porque ye de la triba del mesmísimu Supermán.

Nesto de furá la pelleya pa metemos un melecinatu hai de too como en toles profesiones. Xente mañoso y otro ñon tanto. Con unos prauticamente nun t'enteres del pinchazu y con otros éntrente ganes de pegar unos glayíos tremendos de puru dolor, y si nun lo faes ye porque t'apodera la vergoña, por falar sinceramente.

P'algamá la titulación correspondiente que permita a una persona exercer de prauticante hai tené los estudios y práutiques requeríos, evidentemente. Pero camiento qu'hai un sistema meyor p'acertar dafechu na escoyeta d'estos profesionales y vo güei a dicívoslo nun Xuasús me valga.

Pa esbillar a la xente más curioso pa remaná la xeringa hai que lo facer como si tuviéremos nun concursu gastornómicu d'esos onde cada miembru del ẍuráu va prebando unes tarreñines cola comida que tresnó cada concursante. Y esi ye l'aquello de la cuestión. Buscar un xuráu. Y la manera de proceder con esti métodu que yo propongo sedría la que vien de siguío:

Escuéyese ente la población un grupu de xente con una sensibilidá especial nes ñalgues. Una xente persensible al calor ya'l fríu, al dolor y a la prestancia, al tactu sele y ya'l emburrión tochu, en resumíes cuentes, con una cualidá especial nes mullíes que tenemos a dambos llaos del culu. Esi va sé'l xuráu del concursu d'afaladores prauticantes.

Dempués esi xuráu eliẍíu ponse col culu al aire  y en fila. Los aspirantes a algamá la titulación van pinchándolos ún a ún. Entós cada miebru del xuráu va apuntando nuna llibretina'l xacer que-y merez cada aspirante. Si lu pinchó de manera melguera, que casi nin sinteo la xeringa nin nada. Si, pola contra, metéo-y un espetonazu que lu fixo amoriar y tar a piques de zampase en suelu espatuxando  ente berríes. Si tardó un migayín llevaderu o si aquello se-y fixo eterno ente empapiellos y llárimes xaguando yá los güeyos, etc.

Al final faise recuentu de toles puntuaciones del xuráu y aquellos aspirantes d'enfermería que meyores puntuaciones llograren sedríen los escoyíos pa empicorotiase nel olimpu de les bates blanques y les xeringues no alto.

Pues yo ehí dexo la propuesta. Como soi arrogante y nada peseteru, asoléyola de baldre y ensin rispir por nengún drechu d'autor nin nada que se-y paeza. ¡Too seya pol bien de la humanidá ñalguetera, recóime!.
                                                                             


                                                                                   

sábado, 14 de septiembre de 2019

Toca zamploña que vamos pa Roma

En prau semáu d'alcacer cortabes una caña cola ñavaya. Facíes-y un tayu nun llau iguando asina una llingüeta simple que daba soníu al cimblar cuando soplabes y yá teníes la zamploña fecha. Un instrumentu cenciellu, pero que yá podemos restrexar na prehistoria como parte d'instrumentos musicales perantiguos qu'aportanon a nós, como la launeddas sarda.

Endolcando una corteya de castañal o otru árbol facíes una corneta. Con cáscares de ñuez tresnabes un riquirraque. Con cañes de maíz sacabes un vigulín. Col güesu d'un piescu o una ciruela dibes frotándolu contra les paredes rugoses de la que dibes y veníes de clas hasta furalu y consiguir asina un xiblatu, con lates y un palu salíen unos tambores estupendos, ensin escaecé la voz, que cantaraes tamién s'echaben, faltaría más...

Nos tiempos onde reinaba la radio, la televisión facía galanes adulces y esto de los ordenadores ya'l mundu virtual nun aprucía nenyures, axuntase pa enredar na cai con milenta xuegos yera'l divertimentu dempués de salir de la escuela hasta que de cada casa diben echando voz pa embobinar a facé los deberes, cenar y achucase.

Y ente esos trebeyos taba'l d'enxaretar instrumentos musicales colo que se pañaba per ende. Un deprendimientu musical onde'l conservatoriu yera la cai, los maestros luthiers los más mañosos de la reciella y los músicos tolos rapacinos qu'andaben de corrigüela.

Pero'l llabor constructivu nun escosaba na estaya musical. Pa xugar a otres coses tamién s'iguaben les correspondientes arbíes. Con rames y cartones facíes una choza. Rebuscando pente les sebes de sanxuaninos atopabes forcaos pa gomeros, en dalgún taller cercanu consiguíes llantes pa pone-y les gomes, y cola lligüeta d'un zapatu vieyu yá teníes la badana. Con cordel de bramante y un palu cimble salíate un arcu. Con simples cachos de teya xugaben al cascayu, magar esti xuegu yera predominante ente les ñeñes. Con dos palos espetaos y otru enriba n'horizontal armabes un concursu d'hípica faciendo tu de xinete y caballu al empar. Con una cuerda y un sacu pa sentase montábase un cañiqueru. Y cuando s'averaba la Nueche d'Ánimes ya'l Día de Tolosantos, dir a robar a una güerta una calabaza, facer con ella una calavera y axorizar a daquién al atapecer nun tenía preciu, porque yera lo másimo.

Camiento qu'echar a esnalá la imaxinación y construyir coles propies manes, cuando somos rapacinos, ye un camín afayadizu que convién nun perder, escurque adautándose a cada tiempu, anque yo coles arbíes de los guaẖes de güei yá nun m'amaño porque naquelles dómines tenía otres.

Toca zamploña que vamos pa Roma, tu a por pan y yo a por boroña.

Bonos tiempos pa la llírica yeren aquellos, miániques.
                                                                                   

martes, 10 de septiembre de 2019

Día d'Asturies, escaezos y zunes vieyes


Amatáguense los ecos del Día d'Asturies. Una fecha que sirveo pa comprobar, una ñueva vegada, que pintamos poco tirando a nada en conciertu autonómicu. Naide s'álcuerda de nós (entamando por nós mesmos), nin pintamos cosa dala. Somos una sociedá ensin puẍu que nin se recoñoz nin la reconocen, miániques, y eso nótase en cellebraciones como esta.

Y cuando nesta fecha dalguna monẍura gorguta ye pa echá la llingua a pacer. Echóla en Cuadonga l'arzobispu metiéndose a predicador d'una ideoloẍía concreta. Pudiere aprovechá l'actu pa iguar un discursu centráu n'Asturies y pa capiar al personal a comprometese con esta tierra. Pero, ¡ca!, meyor escaecela y puñar contra lo que se ẍimielga na fastera contraria a la so ideoloẍía conservadora y alcanforada. Tal paez que tenemos la cigua colos arzobispos que mos afalen p'acá. Almeyor ye que, como tenemos una cueva como bierzu ñacional, mándenmos al personal más cavernariu qu'atopen...

Tamién echanon la llingua a pacer na lluriga política institucional. Dende ella, encamentánonmos de los peligrosos ñacionalismos, que son toos menos l'español que ye'l de so, claro. El resclavu del cuadonguismu reaicionariu tienlu perafitáu esta ẍente en cerebru y cuando ven la ocasión bríndenmos a la ẍente asturiano a reconquistá la España uniformista oponiéndomos a los ñacionalismos ñon españoles y, de pasu, arrenegando del riẍu que mos pueda entrar de sofitar plantegamientos ñacionalistes asturianos. Eso de tener un enemigu pa sacar a pasiar cuando les coses van mal pa llograr que la ẍente se centre nél y escaeza los trafuscos de los gobernantes ye una estrateẍa bien vieya, pero efeutiva, mialma.

Y, ente uno y otro, nós siguimos con esa versión actualizada de los vezos romeros d'antiguamente. Antaño yera vezu desarmá la danza de la romería a palos. Lo de solmenamos siempres se mos dio perbién. Anguaño siguimos dándomos palos, pero nin siquiera somos p'armá la danza. Vamos p'atrás como'l cámbaru.

D'otru llau, siguimos envizcaos n'andar al rau de cualquier charrán foriatu que venga a vendemos gafes de madera. Los pilancos que ponemos a los de casa, camunden en vives ya ixuxús pa lo qu'aporte d'alluendi y empicorotiámoslo siempre como lo meyor.

Siguimos moviéndomos a palpu, estiñazaos polos prexuicios y les zunes. Por mecanismos automatizaos con raigaños vieyos y podres que nun mos lleven nenyures. Naguamos de contino porque vengan a iguamos los problemes dende perende p'acullá, que pa eso fuimos la cuna de...y bla, bla, xu, xu...Y avieyamos socialmente de manera alarmante, mentes que la mocedá ẖispia a buscase la vida mundu alantre, porque equí la cosa pinta mui fea.

La cuguruta social, económica, política y cultural -ensin escaecé'l  llabor d'adoctrinamientu y tracamundiu informativos desendolcáu nel aruelu mediáticu- afáyase cuantayá nesta situación como gatu n'escarpín. Xestionen la nuesa crisis crónica ensin más, que-yos val pa siguir tirando del tetu tan guapamente, o puxen por empozá la nuesa sociedá nun inmovilismu que la escosa y que-yos val pa caltené los sos privilexos.

Y estes son namái qu'unes poquiñines pingarates de lo qu'anguaño asocede ente nós. La realidá de gu, l'apalpuñable. Y si'l nuesu grandonismu mos fai envizcamos en que ye otra, lo meyor ye que vayamos a facémoslo mirar darréu.

Ponía'l ramu a la entrada anterior encamentando que tenemos que cabruñar colos nuesos propios fierros. Enfótome en que nun hai otra salida. Esperar por mesíes salvadores (entamando pol propiu Estáu) qu'aporten de dayures a iguamos los problemes va ser perdé'l tiempu. Equí o se pon la sociedá asturiana de cabezalera pa tirar pol carru, construyendo lo qu'heba de construyir, y rispiendo polo qu'heba que rispir, o agüeyar pal finxu'l cielu va ser pa velu siempres ñublu. 

Y agora vien la entruga del millón: ¿podemos sestaferiar un futuru afechiscu p'Asturies con tola carrapotada de torgues que mos arcoxen güei?. La rempuesta nun ta nel vientu, como diz el percoñocíu cantar. La rempuesta ta en nós.
                                                                               

miércoles, 4 de septiembre de 2019

El camín que derrompimos

Foi allá peles dómines del rei asturianu Alfonsu II cuando s'afitó'l camín a Santiago y espolletó una pelegrinación venida de perdayures qu'aporta hasta güei. Más sero, tamién empobinanon al llugar compostelanu'l rei Alfonsu III y la so muyer, la reina Ximena, que dellos consideren la primer pelegrina de la historia.

Naquel entós el Reinu d'Asturies algamaba una importancia cimera con embaxaes a Carlomagno incluyíes. Yéremos daquién na península y n'Europa.

Los raigones de los asturianos actuales vienen d'aquellos tiempos  y d'aquel reinu. Hai resclavos anteriores, porque les civilizaciones que trianon esti suelu dexanon los sos ñicios equí. Pero'l pasu d'ástures a asturianos formientó naquella etapa histórica.

Como país tenemos un aniciu claramente medieval. Impecablemente documentáu y sofitáu pola arqueoloxía y los monumentos qu'aportanon a nós. Ehí tenemos Cuadonga, l'arte asturianu, el Reinu d'Asturies, y tamién la defensa de la diócesis de magar la pérdida del poder políticu (Liber Testamentorum del obispu Pelayu), los intentos secesionistes (Felix Agelaci, Gonzalo Peláez, Urraca l'Asturiana). L'idioma que tovía conservamos. Trazos culturales, distribución del territoriu (parroquies, conceyos, poles), esplotación económica de los nuesos recursos (caseríes, brañes, puertos pixuetos...).

Tampoco nun fuimos una triba aisllada dafechu como davezu se nos pinta. Aquel reinu y aquel camín que derrompimos truxenon a esta ñación xente, vezos y comerciu de dayures. Queden enagora rescamplando topónimos que mos lo recuerden: Balandrán, Bretones, Gascona... Porque la estructura y pesu políticos propios, la combinación de parroquies y villes, los caminos pela tierra, pero tamién pela mar, fixénonmos coneutar cola realidá alluendi de les nueses llendes.

Preséntasemos l'europeísmu como daqué relativamente reciente y fincáu fundamentalmente nel mercantilismu, pero ñon no cultural. Un error absurdu nel nuesu casu. Porque los asturianos hai yá una carrapotada de sieglos que fuimos y somos pereuropeos. Seique nel pasáu más inda de lo que somos güei onde bien de vegaes siguimos viendo lo que vien d'acullá de los Pirineos con rocea. Nun ye descartable que nestos tiempos seyamos menos cosmopolites que nel propiu medievu. Pero rescampla que somos más cosmopaletos.

Al final,  ocurreo qu'aquel camín que derrompimos nel reináu d'Alfonsu II quedó apostalgáu y escaecíu. Fuimos perdiendo pesu, pali que pali, y los pelegrinos empobinanon per otres siendes pacullá del Payares. Engurriémonos y empocémonos nuna ñublina trupo. Perdimos les vinculaciones europees y la nuesa güelga histórica (resalvando rellugos gloriosos como'l del 25 de Mayu de 1.808) enfotándomos en mirar siempre pal sur buscando ellí lo que ñunca nun fuimos. En definitiva, escaeciendo'l  camín que per sieglos nos coneutare col continente del que fuimos parte sustancial y fundamental.

Anguaño, cuando malpenes pintamos nada nel conciertu de les ñaciones europees, con o ensin estáu. Cuando somos un requexu perdíu qu'abonda xente nun sabe asitiar nel mapa, magar el nuesu grandonismu babayu mos faiga creyer lo contrario. Cuando naguamos por calcar lo mediterránio y tapecer lo atlántico y asina un llargu etcétera, escurro que ye afayadizo y hasta vital tornar los güeyos al pasáu pa reconocemos. Y mirar más pal norte, pal continente y les nueses relaciones con elli. Tornar a lo atlántico y a les nueses xermandíes europees. Y partiendo del nuesu propiu reconocimientu, perdiendo dafechu  los complexos y afitándomos nos nuesos raigaños ancestrales, capiar al caminante invitándolu, arrogantes, a caleyar per aquel vieyu camín que derrompimos allá de los tiempos, al empar que dir derrompiendo'l nuesu camín coleutivu pal futuru cabruñando colos nuesos propios fierros.
                                                                            

sábado, 17 de agosto de 2019

De pelegrinos, surferos, piẖos y pazguatos

Deẍar escaecíos dayures los medios de tresporte motorizaos y echar a andar camín alatre da pa muncho, y nos díes llargos y soleyeros del branu, pa más entá.

Averase a la mariña ye una bona alternativa pa espansionar, caleyar y observar. Arriendes de los paisaẍes, onde la nuesa tierra tien bayura pa esfrutar, tamién atopa ún los paisanaẍes. Y equí pue haber material, más que pa un artículu nun blog, pa toa una enciclopedia.

Una de les rutes del Camín de Santiagu percuerre la costa asturiana. Asina que ye bien fácil nestes dómines cruzase con pelegrinos per ende. Unos faen el camín a la manera tradicional, caminando. Otros tiren de bicicleta. Pero yo'l casu que más me llamó l'atención foi'l d'una pelegrina que lu facía con una mula y un burru, acarretando les pertenencies, y un perru. De les perres que lleve'l caminante depende cómo va comer y dormir. N'albergues públicos, privaos, camping, hoteles... Tirando de bocadiellos y comida tresnao como bonamente puen, o ẍintando de bar. Anque en toles ẍermandíes atopes de too, lo corriente ye que los pelegrinos conque te cruces seyan ẍente educao, que va a lo so, saluden tan guapamente, entruguen si fai falta, y tiren camín alantre, pues a vegaes da la impresión que ye precisamente afayase nel camín l'oẍetivu'l caminante. Y de les motivaciones de facelu hai de too, unes reliẍoses y otres que s'estremen de lo reliẍoso. Per onde van los pelegrinos caléyase tan guapamente.

El deporte del surf esporpolló enforma nes últimes décades. Resulta de lo más corriente ver surferos cabalgando enriba les foles nes nueses playes o ñalando coles tables a la busca d'una fola afayadiza. Dalgunos garren el coche, van a una sablera y al atapecer colen. Pero otros van en furgonetes onde lleven de too, les tables, la comida y pa cocinar, y tamién l'aquello pa dormir. Una vida bohemia a la so manera. Como nel casu anterior son ẍente que va a lo suyo, pues afayate tranquilamente ente ello y, si pinta, yá tien pasao d'echar una gabita a dalgún bañista que, por imprudencia, metéose peradientro na mar y ta pasando apuros.

Estes dos ẍermandíes podemos asitiales nel llau positivu la balanza de los personaẍes qu'atopes cabo la mar. Pero esa balanza tien otru platu onde podemos allugar a otru tipu de personaẍes que nun resulten tán llevaderos. Vo poner dos eẍemplos. El primeru'l de los piẖos. Esa ẍente que van de tener bayura y ringorrangu, unes vegaes sofitaos nos munchos bienes y perres que tienen de verdá y otres allancaos namái que na apariencia. De mano, anque ñon siempre seya asina, si te cruces con esti personal y saludes, cuerres el peligru de que te miren aquello, tuerzan el focicu, y nun gorguten. Y cuando van calladinos tovía pasa, pero si falen la cosa pue dar auténtica perceguera. Tas na terraza del bar y veslos en conceyu metíos como nun campeonatu de demostrar quién tien más facienda, más coches, más ñegocios, los fíos estudiando nes meyores universidaes...Tas sentáu tan guapamente enfrente la mar y pasa'l piẖu de turnu comentando la esperiencia de dir en bici de montaña a facer rutes a los Alpes suizos (claro, como n'Asturies too ye plano y nun hai cuestes...). Vas caminando y pásente dos piẖines que malpenes acabanon d'escutruẍar y una coménta-y a la otra la so universidá norteamericana favorita pa dir facé la carrera (¡nun va dí la probe a la d'Uviéu, o cualquier española, o cualquier europea, que son como de provincies pa ẍente de tan altu bierzu!).

Y vamos acabar colos pazguatos de playa, por llamalos de dalguna manera. A una playa pue dise a echase pámpana arriba y pámpana abaxo a tomá'l sol. A pasiar, correr, o prauticar cualisquier otru deporte, a bañase...pero'l pazguatu de playa nun va a eso. Esti personal la única manera que tien d'entretenese ye molestando a cualquier bichu viviente. Da perceguera ver enfilar a güelos, padres y ñeños armaos con redes con palu, piedres, calderos, cuchiellos y lo que pinte pa los pedreros. Ellí dedíquense a fustacar y escarabicar hasta los últimos requeẍos y resquiebres amargándo-yos la vida a les sapes o a dalgún peẍe que tuvo la desgracia de quedar nun fontán al baẍá la marea. Por ver tengo visto hasta quien intenta pescar dalgún pulpu. Pa cualquier vecín mariñán o piẍuetu, lo de mariscar ñecesita de la llicencia correspondiente, pero pal turista pazguatu playeru ñon fai falta, nun vaya ser que s'espanten y dean mala fama de la zona ente'l mundu turísticu.

Y esto ye lo que tengo que vos cuntar güei. Si andáis o vais andar pela costa, deséovos qu'esfrutéis a magüeyu de los paisaẍes perguapos que tenemos nella. Y, de cruzavos con daquién, que vos crucéis con pelegrinos y surferos. Colos piẖos y pazguatos meyor que ñon. Pero va ser que sí. Nun pidamos utopíes...
                                                                                  



domingo, 4 de agosto de 2019

A la gueta la centaura somedana

Abeyar per un parque ñatural ye añicase en somantu de La Vieya. Nesta ocasión tocó somorguiase pel parque ñatural somedán.

Descripciones d'esti llugar y sitios onde les atopar hai a embute, asina que nun me voi espurrir con bayura de datos p'atarraquitar la cabeza del llector. Pero dalguna pinceladina sí, mialma.

El mediu físicu per au vamos movemos rescampla polos sos picos y cordales escarpaos, auténticos gurugús dacuando, y pela riestra de valles qu'igüen. La caliza reina nel sustratu ẍeolóẍicu, coles sos cueves, pinganeẍos, columnes...Y hai que se referir, a costa fecha, al agua. Milenta remeẍones, bien de tabayones, fontes con tueros pa guiá l'agua pal caminante o con barcales pa bebé'l ganáu o una simple fueya pa poder enllenar la cantimpla, pimpanes... Un agua frío y fresco que da gloria tastialo, porque nel agua, camo notres bebíes, tamién hai calidaes, mialma.

Na estaya etnográfica tenemos coses bien prestoses p'agüeyar. Oḻḻeras, llavaderos, fontes, molinos, horros, construciones techaes con teitu (casas, cabanas...), corros y cases de tipoloẍía tradicional, ilesies pelos pueblos coles sos espadañes y campanes bien cuidaes, amañoses ñon namái que p'aconceyar a los vecinos, sinón p'avisar en casu ñecesariu y, allá nuna picorota escarpada, camín de La Pola a Aguinu, los muruecos de la torre del Castiellu del Alba...

Nesti mediu físicu, La Vieya permite tou un esporpolle del mundu animal y veẍetal. Mítica nel llugar ye la presencia del osu, que nes últimes d'écades entamó un procesu de recuperación dende una situación cercana al desaniciu que lu llevó a una situación más afayadiza anguaño, magar nun tea iguada dafechu la so situación. L'otru ser míticu de los nuesos montes, el faisán o gallón, ta muncho más llaceriosa. Desconozo nesti momentu si nel conceyu somedán queden cantaderos, pero vienme a l'alcordanza'l fechu doliosu asocedíu hai unos años cuando garranon un eẍemplar, pela zona de la braña de Mumián porque dicíen qu'aẍorizaba a los turistes urbanites que de medios ñaturales nun saben un res. Esi eẍemplar morreo y quedó como eẍemplu de cómo nun se puen facé les coses nesti ámbitu. Corzos, rebezos, venaos, cuervos, aigles reales, utres...en resultancia, el mundu animal ta bien representáu.

Na faza botánica hai una guaña curiosa pa esfrutar. Dientro d'ella, rescamplen dalgunes especies. Por poner un eẍemplu, ehí tenemos la encina carrasca, resclavu d'otres dómines climátiques y que podemos ver bien representada. Carbayos, fayes, castañales, ablanos, ẍaranzana, fenoyu, tirañes, droseres...y la planta que da ñome a esti artículu: la centaura somedana.

Ye esta planta un endemismu del conceyu somedán, onde s'atopen la mayoría de los eẍemplares observaos (calcúlase la población total d'unos quinientos eẍemplares). Tamién se tien constatada la presencia d'esta centaura nos conceyos vecinos de Teberga y Balmonte, asina como na Babia llionesa. Ye una especie en grave peligru de desaniciu y catalogada col mayor índiz de protección, llegando a facese recuentos por eẍemplares individuales nos sitios onde ẍorrez pa ver si, en pasando'l tiempu, siguen na zona. Pero, asina y too, va tiempu armóse la de coyer, pues al rozar los llaos de les carreteres que van a Perḻḻunes y a Balmonte arrasanon bien d'eẍemplares  de centaura, que supón una auténtica catástrofe ecolóẍica.

La centaura de Somiedu atópase en zones mui llentes, onde cuerre l'agua, tapizaes con mofu y ente caliza disuelto y falta de nitróẍenu. Poro, aveza a vivir ente plantes de tiraña, "carnívora" que garra los insectos que queden pegaos nes sos fueyes. Nun ye fácil de ver. Les sos fueyes malpenes destaquen de la vexetación y la flor abierta nun va más alla en tamañu de la uña del deu moñín. Pa detrás, zarra pela nueche , y si cuando pases enagora nun abreo, vela tovía se fai más abegoso. Esa flor ye de color rosáu, con cinco pétalos (a vegaes seis) y cinco estambres. En cada sitiu onde s'afaya hai perpocos eẍemplares. Too ello fai qu'heba que tener los güeyos bien argutos pa poder vela, echa-y paciencia y guetar con procuru y en tolos requeẍos de les paredes que tienen les característiques enantes mencionaes, y si tan tapizaes cola tiraña muncho más, pues les posibilidaes de vela aumenten enforma.

Pues ello ye que na revolada que fiẍi estos díes caberos fui quien a atopá la centaura de Somiedu. Pero de mano tocóme informame a fondu nel tema, ver vidios, agüeyar pa milenta fotografíes, lleer otres milenta descripciones. Y ello por una razón bien cenciella. Hai otres flores que se paecen a les de la centaura somedana, casi ẍimielgues en dalgun casu, y dalgunes ẍuẍen en sustratos asemeyaos, polo que equivocase ye fácil. La primer vez que di con ella foi nel sitiu que se considera que tien más abundancia d'elles: en La Malva. Y namás que vi dos plantes, una con una flor y otra con dos. Díes dempués torné a observá l'ayalga y atopé una tercera planta. Toes elles nuna zona encharcada, con sustratu calizu disueltu y con presencia de tiraña, o seya, onde se supón que tien que se ver. Como anduvi dellos díes guetando per sitios coles característiques atopadices pa que ñazan centaures, llogre ver más eẍemplares dayures, pero siempre mui pocos y entepolaos con tirañes.

Y asina foi como punẍi'l ramu a la mio aventura de dir a la gueta la centaura. Con un final prestosu, y güei, yá de vuelta en casa, decidime a dar cuenta d'ella per aciu d'esta bitácora pa que tuviéreis ñoticia d'ello. Que paséis un branu afayadizu y un saludín.
                                                                           

lunes, 22 de julio de 2019

Aviones de papel

Alcuérdome cuando de guaẖes facíamos aviones de papel. Dempues, a vegaes, echábamos-yos aliendu na pica -ñunca supe mui bien pa qué- y tirábamoslos a volar. Dalgunos cayíen darréu picabaẍo. Pero otros calteníense nel aire, como en pelondines, y diben planiando hasta posase en suelu adulces. Estos caberos yeren, evidentemente, los que prestaben y esmerábamonos n'igualos pa qu'aguantaren nel aire.

Podía pintar tamién, esta vegada como daqué bastante raro qu'asocediere, que sintiéramos ruíu en cielu y entós mirábamos p'allarribón y veíamos pasar una avioneta o un elicópteru. Quedabamos entós ababoriaos mirando pa ellos, porque diba ser difícil observalos en bien de tiempu. Y, entrín y ñon pintaba otru avistamientu, bien que mos prestaba'l famosu madreñoẍiru de Pinín, qu'amás de volar tamien ñavegaba, recóime...

Pero los tiempos cambien una barbaridá. Nun sé yo si anguaño los rapacinos saben facer aviones de papel, envizcaos qu'anden con tanta pantalla y tantu meriñaque eléctricu. Pero actualmente ñon namás que se ven dacuando avionetes o elicópteros en cielu. De magar hai bien d'años punẍénonse de moda les exhibiciones d'aviación militar en dalgunos sitios. Yo tocóme una vegada una d'elles onde vivo y respigábeste con ella. El ruíu yera d'atorollar y cimblaben los cristales de la casa. Nun me cuacó gota la cosa, pa dicir la verdá. Y nun voi poneme a facer una espirica antimilitarista nin nada d'eso, ñon. Simplemente escurro que les ciudaes, villes y pueblos de nuestro nun son un sitiu afayadizu pa esos actos y más nada.

En resumíes cuentes, el reblagu que dimos nunes décades foi bien curiosu. D'aqueños ñeños que facíamos aviones de papel y veíamos mui de ralo en ralo sechá'l cielu a dalguna avioneta o elicópteru, pasemos a otros ñeños que puen estelase viendo demostraciones aeries espectaculares d'aviones de verdá, qu'hasta deẍen unes esteles de fumu encarnaes y marielles que nun adoctrinen nin nada d'eso, como sí lo faen los ñacionalistes periféricos cuando usen los collores representativos de los llugares de so.

Pero voi ser sinceru. Si me ponen a escoyer ente aquellos aviones de papel que tresnábamos nos mios tiempos de guaẖe y los espectáculos aerios a los que lleven a milenta rapacinos d'hoi, quédome colos tiempos de mio. Y ello, arriendes de que pueda deẍar llevame por sentimentalismos d'otres dómines, porque camiento qu'aquellos aviones de papel ayudábenmos a desendolcar dos cualidaes que, quiciabes, los reales de combate nun seyan pa competir con ellos: La Creatividá y La Imaẍinación. Escrites asina con mayúscules, como s'escriben los ñomes de les coses importantes y con reblanea.
                                                                                        

sábado, 13 de julio de 2019

Marqués del Pelleyu

Somos la ẍente asturiano amigos del humor y de la ẍirigoncia. Pero ñon siempre acertamos cuando tamos pa la mano neso de la chancia y ello pue empatonamos en delles ocasiones. Cuantayá  contánonme l'anécdota que vien de siguío, que-y pasare a un conocíu miuyu, y que m'aseguranon, da papu sanu, que fore verdá. Asina que voi treslladávosla pa pone-y un migayín d'humor al archivu d'esta bitácora...

Ello ye qu'una vegada una pareẍa decideo dir cenar a un restaurante de munchu ringorrango de Ẍiẍón. Llamanon y atrocanon mesa. Vistiénonse colos paẍellos más elegantes que teníen y empobinanon p'allá.

Cuando taben yá sentaos a la mesa vieno a atendelos un camareru que, pola manera de falar, amosaba que yera foriatu. A la hora d'escoyé'l vinu, por aquello d'aẍeitar un ambiente afayadizu, diẍénon-y en broma que diben tomar un Marqués del Pelleyu. Pa la so sorpresa, el camareru nun gorgutó, dio la vuelta y marchó. Contanon entós que taben nun sitiu onde andar con graciosaes nun cuacaba migaya, cho.

El casu ye que pasaba'l tiempu y per ellí nun apaecía naide. Empecipianon entós a esmolecese pensando que quiciabes se pasaren de graciosos y que-y sentare mal al que los atendiere l'aquello del vinu. Taben con esto enguedeyaos cuando ven apaecer otra vuelta al camareru, contrariáu y afanosu que diriẍéndose a ellos va y diz-yos:

"Disculpen los señores, pero en nuestra bodega no hemos encontrado el vino que desean. Si son tan amables, escojan algún otro de los que les ofrecemos en la carta...". Pidienon entós otru, deẍánonse de bromes...y a cenar.

Afortunadamente, too quedó namás que nel asuntu del vinu. Porque si se-yos llega a ocurrir pidir pa cenar cordobeyu al fornu, gamusinos a la plancha o ñuños n'almíbare, la cosa pudría acabar en surrealismu de ñiveles estratosféricos...