jueves, 20 de diciembre de 2018

Trepando pel monte

Alborecía ayeri orpinando. Anunciaren agua y púnxime a facer dalguna cosa antes de dir a pasiar cabo'l ríu.

Pero dempués, cola mañana entrada, vi bocanes en cielu. Agüeyé pal oeste y nun lo vi nubarriao, asina que camenté qu'igual podía arriesgame a tirar monte arriba. Porque siempre que piquen a la puerta les fiestes navidiegues éntrame a mi'l rixu de zampuxame na viesca, pa esfrutar y espansionar.

Asina que tiré pa casa, calcé les botes, garré'l bastón, allugué la mochila al llombu y tiré p'allá.

La viesca taba somorguiándose nel pecigañu ivernal. Cola foyarasca cubriendo'l suelu y esa paz sele sólo interrumpida pol xuxuriar de los páxaros, el llatir de dalgún perru alluendi o el berrar allalantrones d'una cabra.

Cuatro hores trepando pel monte ensin cruzame con naide. Pero sí anduvo faciendo trastaes quien yo sé: el xabalín. Ello foi que tiré pa ver cómo taba una fayuca que plantare quince díes enantes. Y taba arrincada a un metru de la poza. Nun ye la primer vez que'l castronazu me l'arma esfozando per au yo planto. Yá persabemos qu'anguaño hai un auténticu andanciu d'estos animales per dayures.

Total que volví a plantala otra vuelta porque nun secare y arrodiéla con piedres grandes pa pone-ylo difícil si torna a les andaes. Dempués anduvi entreteniéndome quitando dalgunos chupones a castañales vieyes, clariando la viesca pa qu'entre meyor el sol... Puxé abondo y sudé lo mío.

Porque'l casu  ye que diome va tiempu por acuriosar un requexu del vieyu monte de los Pataleh.os. Precisamente unos díes antes tuviera echándo-y una güeyada al documentu onde atopé esti nome pela primer vez. Trátase d'una referencia notarial del últimu terciu del sieglu XIX au se menciona la herencia qu'una tataragüela materna mía recibiere de so ma. Que yá llovió d'entós p'acá, mialma.

Esti monte formáronlu siempre, principalmente, carbayos y castañales. Viesca mista bien corriente na nuestra tierra. Como hai unos cuantos años amburó de manera brutal, les castañales que sobrevivieron medio curioses fueron tres d'una ventena y lo que yera prau quedó camudao nun felechal que pel branu nun te dexa entrar nel llugar. Pero les castañes que dan el tríu superviviente son espectaculares (y falo de papu sanu), anque'l xabalín o familia xabalinos que s'asitió a vivir pellí ponen perdifícil sacar gueta pela seronda. Col pasu de los años fueron toñando castañales y carbayos nuevos, pero enagora-yos falta tiempu pa espolletar a modo.

Lo que pues atopar anguaño cuando xubes al monte ye de lo más estremao. Ye una especie de llotería onde nun sabes si vas a atopar coses prestoses o a llevar sorpreses desagradables. Dende árboles centenarios y maxestuosos a zones quemaes o árboles vieyos baltaos pa serrar y marchar cola madera. Como asocede siempre, al final nun ye'l xabalín, nin el corzu, nin animal dalu'l que fraya'l monte de manera llastimosa. Ye'l ser humanu, y bien de veces ensin parase siquiera a reparar si ta esgonciando una propiedá de suyo o d'otra persona. Qu'eso del civismu ye un valor que cuantayá cayó en desgracia.

Al final torné pa casa frayáu de tanto espatuxar y trabayar saniando aquel requexu. Pero cola gozada de pasar cuatro hores empozáu na naturaleza y na observación d'una viesca que, pese a too, ofrezte tovía bayura pa esfrutar.
                                                                   

lunes, 10 de diciembre de 2018

Estimáu xabalín

Estimáu xabalín:

Pues asina, pali que pali, yá vamos mentenos en danza, d'equí a poco, con esto de les feches navidiegues.

Y tamién apocayá que tol asuntu de la gueta quedó p'atrás. Esti añu acabóse ceo, por nun dicir que casi nun entamó.

La primer vegada que xubí al monte, tresllumbada la mitá d'Ochobre, quedé pensatible al ver lo qu'atopé pellí. Poco y esbillao. Torné pa casa coles ganes de pañar daqué y l'amagüestu que tenía pensao facer quedare pa prau.

Entamóseme meyor la segunda intentona, esto yá metíos nel mes de Payares. Pero la escorzuna que me metí foi d'agarrase. De mano, pasóme como la primer vegada. Tolos oricios esbillaos y nin siquiera rebuscando yera pa garrar daqué. Dempués de fartucame a caminar pel monte tuvi un golpe de suerte. Allabaxón, sofitándome nel palu y a piques d'acabar arrollicones y dando de focicos colos felechos y los escayos, di con unes castañales onde, por fin, pudi pañar. Salí d'ellí puxando y afanosu polo pindio y esbariosu del terrén. Dempués tuvi'l golpe de suerte definitivu. Nun camín onde nin suañando pensaba garrar daqué, quixo la mio fortuna qu'una castañal bien curiosa echare aquella mañana los oricios que quixo y más, asina que fui a volver pa casa frayáu, pero gayoleru.

Pero la tercer vez, pa últimos de Payares pasóme como la primera. Caminar a embute y nun guetar casi nada.

Y ello ye que me chocó abondo qu'esti añu tuviere aquello tan arrasao. Cavilgué que xente esfamiao pasare pellí arramplando con tolo que se-y ponía per delantre. Hasta que  cayí na cuenta qu'igual nun yera tala xente, sinón usté, estimáu xabalí, quiciabes acompañáu pola so tropiella con rayones incluyíos. Pescudé per ende ya'l casu ye que me comentaron qu'esti añu eso da la gueta punxérase complicao porque los xabalinos dexaren tremando bien de castañeos. Dempués recordé que per onde yo anduviera dexaren el ratru los de la so triba y, entós, empecipió a cuadrame l'asuntu.

De toles maneres quiero encamenta-y de que yo nun tengo nada escontra suyo. Nun soi cazador. Si vio dalgunos cartuchos pel suelu, asegúro-y, falando de papu sanu, que nun son míos. Tampoco soi yo tan puzcalabre como pa querer enfonilar toles castañes de los sitios per au paso. ¡Ca!. Nada d'eso. Si nun nos dexamos envizcar pol egoísmu pue haber pa toos. Amás usté tien a la so disposición tamién una montonera curiosa de bellotes y hasta unes bones ambozaes de fayucos, arriendes d'una carrapotada de raigaños y demás pitances de la viesca qu'a min nun me cuaquen. Yo nun garro nin un res de too ello. Asegúro-ylo dafechu. Namás que castañes.

En resumíes cuentes, que güei, festividá de la nuestra antigua patrona asturiana, Santolaya, decidí escribi-y a usté estes llinies. Popóngo-y con elles que pa la seronda viniente, quede usté con tola collecha de beyotes, fayucos y  demás, y con una parte de la de castañes. Pero, ¡hai, hom!, déxeme pa min unes ambozaduques curioses, qu'eso de facer amagüestos préstame pola vida, pa que se faiga una idea, préstame tanto como a usté esfozar y arrollicase nos folleros.

Y yá puestu a escoyer, pa que vea que nun tengo mal enclín, voi dici-y más. Si teo la desgracia de nun pañar gota, prefiero que lo d'esti añu fuere xera suya en vez d'humanos como yo. Porque si fueron estos caberos tengo mieu nun ser quien a pañar más, y, pa detrás, que talen les castañales o que-y metan fueu al monte, como desgraciadamente yá fixeron otres vegaes.

Y más nada. Que pase usté unes bones fiestes navidiegues cola xabalina y los rayones.

sábado, 1 de diciembre de 2018

De tonaes y monólogos

El canciu individual ya'l recitáu teatral, tamién individual, tienen raigaños fondos ente nós. La tonada ya'l monólogu, cantadores y monologuistes, algamaron al traviés del tiempu un sitiu importante na nuestra cultura popular. Y, como curiosidá, bien de vegaes preséntesenos xuníos, siendo corriente qu'un festival de tonada incluya la representación de dalgún monólogu.

La tonada, l'asturianada, ye una manifestación musical percaracterística de nuestro. Si la tuviéremos que definir d'una manera breve, rescamplen nella dos característiques na so singularidá (La Canción Asturiana. Benito A. Buylla. Ed. Ayalga, 1.977). D'un llau, ye arrítmica, d'interpretación llibre, resístese abondo que-y marquen el pasu instrumentalmente. Ello fai qu'algame tola so espresividá echándola a capella y que cuando vien acompañada con instrumentación (davezu a la gaita), esi acompañamientu endólcala, adórnala como un fondu sonoru, da-y la entrada al cantador, pero nun-y marca ritmu nengún. La otra característica de la tonada son los rebilicoques con que s'adorna, les vueltes, los gorgoritos, musicalmente, lo que se conoz como melismes. Arriendes de los diferentes estilos de l'asturianada y de la estructura del cantar (cuartetes normalmente), esos dos componentes dichos enantes defínenla guapamente.  Entrambes a dos característiques faen que resulte posible garrar un tema musical d'otra cultura ya interpretalu talo que si d'una asturianada se tratare.  Y esto demuestra la importancia y pesu que tien na nuestra cultura musical. Y tamién el futuru que pue algamar si se curia y trabaya a modo.

El monólogu dexó una güelga bien visible al traviés de los sieglos na nuestra lliteratura. Foi un xéneru bien trabayáu polos escritores clásicos de nós. Va davezu xuníu al humor. Pero un humor llariegu ya intencionáu. D'esta manera, los aconteceres de lo cotidiano espeñíquense críticamente, practícase l'aquello de facer risión entamando por ún mesmu y aquello que lu arrodia. Pero non sólo los asocedíos de casa.  Al traviés d'elli, bien de veces faise chancia de vezos, inventos, o aconteceres foriatos, que se peñeren humorísticamente ridiculizándolos o camudándolos nel oxetu de la risión. La mesma Xosefa Xovellanos escribió monólogos nesti sen nel so tiempu y foi una arbía usada polos nuestros autores clásicos pa facer crítica de los aconteceres naquelles dómines. Lo ayeno y, aparentemente serio, inxértase d'esta miente na propia cultura, pero envuelto na xirigoncia y la moxiganga. La cultura propia, la visión autóctona nun s'asitia nun planu inferior como anguaño faen los envizcaos pol cosmopaletismu acomplexáu y provincianu, sinón que mira entientes lo de fuera, en planu d'igualdá, o simplemente refúgalo al traviés de l'asonsañamientu si abulta poco importante o disparatao a los güeyos del monologuista.

Anguaño, tonada y monólogu siguen de pies y hasta atreveríame a dicir que gocien d'una salú relativamente aceptable, pese a los tiempos d'esbarrumbe cultural que padecemos y magar podamos facer toa una riestra de puntualizaciones y crítiques, o a suxerir caminos a derromper pa qu'en dambos casos puedan evolucionar y afitase nel futuru. Pues que sigan con puxu y p'alantre.
                                                                   
                                                                                  
                                                                                   

martes, 30 de octubre de 2018

De calabaces, amagüestos y ánimes.

Enfilamos pa la Nueche d'Ánimes ya'l Día de Difuntos o Tolosantos. Rescamplen ente nós tradiciones revieyes que nos xuncen a otros tiempos continentales y atlánticos. El vieyu Samain plasmáu a la nuestra manera, colos nuestros particularismos y llinguax.

D'esti tema tengo escrito dayures na bitácora. Pero güei nun voi facer un recuentu puntillosu de los vezos de nuestro venceyaos con estes dómines. Voi centrame en dos elementos, les calabaces y los amagüestos.

Furar una calabaza o un ñabu (o garrar directamente una calavera d'una güesera) y prende-yos dientro una vela camudándolos asina nuna calavera "viva" ye un vezu perantiguu ente nós. Utilícense con dos funciones. D'un llau, p'axorizar a daquién, pues resulta bien amañoso pa ello.

Pero, d'otru llau, la calabaza prendida tien una función, quiciabes la más antigua, que la xune coles ánimes. Ye la d'alluma-yos el camín. D'esta manera, asítiase nel corredor de la casa, avérase a la ventana, ponse na cruciada del camín...Too ello col envís de que les ánimes de los difuntos de la casa puedan aportar a ella. Porque esa calavera "viva" al traviés de la lluz empobina a los calabres de les ánimes que garren "vida" na nueche que fai d'antoxana a la fecha dedicada a elles. El nome que se-y da a la calabaza déxalo too bien claro: "calabaza de tolosantos".

Otramiente, tamos somorguiaos na época de los amagüestos y de la sidra'l duernu. De dir al monte a la gueta, a demer, a echar na cuerria o a acarretar directamente les castañes pa casa.

Y si agüeyamos pa estes celebraciones tan prestoses, rescampla una, precisamente por tar relacionada coles feches dedicaes a ánimes y difuntos. Trátase del amagüestu que se fai xustamente'l día que fina cola entrada de la Nueche d'Ánimes y que ye tamién viéspora del Día de Difuntos o Tolosantos. Ello ye que yera tradición nesta fecha dir a la gueta y facer un amagüestu, mesmamente ellí nel monte. Pero, güeyu al cartafueyu, l'amagüestu nun consistía namás que'n folixa y pasalo bien. ¡Ca!. Tenía tou un conteníu ritual. Porque, al acabar, dexábense unes ambozaes de castañes  nel sitiu pa que, cuando pasaren les ánimes, pudieren matar con elles la fame. Suena a toa una comunión ente los qu'enagora tan vivos y los que yá colaron, pero qu'esa nueche del añu tienen permisu pa tornar a los llares y llugares au vivieron.

En resumíes cuentes, calabaces "vives" y amagüestos de "comunión" formen parte de tou un ritual (que nun escosa equí, pues hai más elementos, que gu nun me refiero a ellos) de xuntanza ente'l mundu de los vivos ya'l de los muertos. A les ánimes de los que yá nun tan allúmase-yos el camín nel so retornu y apacíguase-yos la fame entrín y non aporten a lo que fuera'l so llar.

Too ello, resclavos inda vivos de tradiciones pervieyes, de tiempos escurque remotos, anque xorrascando na nuestra cultura quiciabes nun lo seyan tanto. La entrada d'un ciclu nuevu, d'un añu nuevu según el calandariu de mui antiguamente. Pues qu'esi nuevu ciclu y nuevu añu nos vengan afayadizos.

                                                                                   

viernes, 26 de octubre de 2018

Cuentiquinos d'Ochobre

Restallaben les castañes en farol. La sidra'l duernu amugaba los gargüelos que daba gloria. El vieyu Xanu carpió y faló-yos asina a los rapacinos que formaben aruelu cabo d'elli.

"Ello yera una vegada un grupu peludinos qu'aconceyó nel fondu del océanu. Taben siguiendo'l rellatu qu'una serena-yos facía d'unos premios principescos de gran sonadía. Pintó entós qu'apaeció pellí Tolanonos, un reporteru que tenía fama de metese nos sitios más gafos y peligrosos. Venía d'una reunión de Yetis allarribones nun monte que fincaba'l mesmu cielu y que tamién taben siguiendo aquellos premios. Decidió entós somorguiase na mar y escribir lo que taba viendo. Al día siguiente dio anuncia de lo planetariu que fuera aquel acontecimientu qu'hasta algamara de les altes cumes a lo fondero la mar. Otra reportera, Pegadina, prefirió informar de lo maraviyosos que yeren los virigüetos de les tierres que s'alcontraben más p'acullá, camín del Finisterre. Vese que Pegadina nun entendía nada de cumes, d'océanos, nin de premios principescos."

Los rapacinos siguíen empapirotiaos el rellatu del Xanu mentes espeñicaben castañes y sorbiataben sidra. El Xanu tizó'l llar pa escalecer toos y siguió.

"Había un país llonxanu, mesetariu y secu, onde mandaba un rei. Pero esto nun cuacaba a dellos que queríen otra forma de gobiernu. Un día na lluriga onde aconceyaben decidieron que la manera más afayadiza d'acabar col monarca yera facer xirigoncia d'otru rei, d'un vieyu país atlánticu, que lu matare un osu diba más de mil años. Y, a manera de conxuru, dedicábense tolos años a entamar tal moxiganga. Como la bandera de los herederos d'aquel rei muertu cuantisimayá llevaba una cruz, decidieron tamién puñar contra ella pa ver si asina puxaben con más brenga pa cambiar el réxime monárquicu del país mesetariu pol republicanu de suyo. Pero nada, el rei mesetariu siguió mandando tan guapamente. ¿Por qué?. Pues porque s'equivocaron d'época, de monarca, de bandera y de país."

Escucó'l Xanu pela ventana de la cocinona y agüeyó pa la lluna que rescamplaba sele allarribón nel cielu. Dempués miró pa los rapacinos y púnxose elli:

-Yá ye sero. Mañana la viesca va rellucir al amanecerín cola orbayada. Ye hora de dir achucamos, que tamién mañana toca dir a escuela.

Y los rapacinos, acabando les últimes castañes del amagüestu y dando los sorbiatos caberos a la sidra'l duernu, colaron a echase sonriendo y contentos d'escuchar los cuentiquinos qu'aquel mes d'Ochobre-yos contare'l Xanu.
                                                                           




domingo, 14 de octubre de 2018

L'hábitu, el moxu, l'aculturación y l'intercambiu cultural.

En sociedaes fosilizaes ya inmovilistes como la de nuestro, enxertar una güeyada crítica ye arriesgase a ponese fuera bolos. Lo esperable ye facer la bonetada, callar y aplaudir. Pero, nesta bitácora, pues va ser que non, como persaben los llectoes qu'escuquen pequí.

Ello ye que reza un dichu que l'hábitu nun fai al monxu. Y miániques que ye una gran verdá. Una cosa ye'l paxellu y otra lo qu'esi paxellu tapa.

Cuando s'entama la xera abegosa y perpoco reconocida en sociedaes empapirotiaes colo foriato como l'asturiana, de recuperar el bagax tradicional, puen facese avances valoratibles y tamién zapicar n'erros por mor de nun tar tolo centraos que la xera requier. Y equí ye onde entramos na dicotomía del hábitu ya'l monxu.

Voi entainar a dir al granu. Cuando tratamos de recular al nuestu pasáu y rescatar d'elli elementos qu'anguaño, utilizaos de manera amañosa, puen ser perfectamente vidables, entramos nun terrén esbariosu onde toos, ensin escepción, podemos zampanos en suelu.

Ello ye qu'afatase d'una manera determinada a lo antiguo conlleva un doble esfuerzu. D'un llau, ser pa rescatar cómo se vistíen notres dómines. Y d'otru, cómo vivíen esa manera de vistise notres dómines. Y puestos a esbillar, esto cabero resulta, a la postre, lo más enguedeyao y revesoso de rescatar.

El papel del personax, del ser que va detrás de la vestimenta, ye fundamental. D'ello depende que'l que va afatáu d'una manera determinada seya fiel a ella o camude nun simple maniquí, nun modelu de pasarela onde nun concasa lo que lleva colo que representa.

Diendo más al detalle y pa velo d'una manera fotográfica. Si'l Guirria de Ponga dexare d'echar ceniza a los homes y d'echase a besar a les muyeres, o si pasare olímpicamente de pidir l'aguilandu, yá nun sedría tal guirria, por mui acordies que fuera marutáu pa la ocasión. Forzando l'exemplu, hasta sedría más guirria si fuera con pantalones vaqueros y una gorra visera faciendo'l so papel, que vistiéndose sigún los cánones, pero tando n'ayén, como papiáu y ensin facer un res del llabor que-y correspondiere como tal guirria.

Y l'exemplu anterior ye d'aplicación xeneral. Por exemplu, dame un aquello, una perceguera, ver cómo anguaño hai xente que da gloria velo vistiendo unos paxellos del país tresnaos d'una manera afechisca, pescudada y trabayada, pero que tal paez que los portantes nun van más allá de vese como los participantes d'un desfile de modelos. Centrándonos nel traxe masculín, ¿cuántos mozos se molesten n'orniar l'ala de la montera con un ramiquín de siemprevives, una pluma o cualquier otru adornu como facíen antaño?. ¿Cuántos asitien correctamente la montera na cabeza, col puntu que dixebra'l reborde del ala p'hacia la metá d'un güeyu como nos encamienten testimonios gráficos a porrillu?. ¿Cuántos lleven na mano o al costazu un palu pintu, de ñudos, de cachiporra, una cachaba o un palancón?. Cada vez menos y, a vegaes, nengún. Pues ehí ta una de les diferencies ente dir marutáu y dir consciente de vistir el pallexu'l país como antaño. (La semeya del post ye d'hai cien años y nun almite duldes pa sirvir d'exemplu).

¡Ca!. Nun nos dexemos envizcar pola estética de pasarela y vamos enfotamos en da-y al monxu'l papel que-y correspuende, perimportante, ensin convertilu namás que nun maniquí del hábitu.

Cambiando'l bichi de llau, vamos encetar otru tema mui d'actualidá. Trátase d'estremar cuándo nos alcontramos delantre d'un intercambiu cultural, siempre granible y deseable, y cuándo tamos asistiendo a un espectáculu penosu d'aculturación per aciu de dalgunos elementos de ciertes cultures, remanaos de manera deformada ya interesada, pa envizcar a la xente nuna cruzada nacionalista española rancia y fedionda que güei espolleta d'una manera impresionante.

Y d'esto tenemos bastantes casos ente nós. Del llau de l'aculturación, les mal llamaes feries d'Abril, organizaes cola intención de sustituir la nuestra cultura por una ximuestra de l'andaluza, pero munchu güeyu, una ximuestra, un patagüeyu, porque cualquier andaluz amante de la so valoratible y respetable cultura verdá, siente vergoña d'esa xirigoncia. Equí tenemos, bien espardida por Asturies y por desgracia, una espantible campaña, dende acuantayá, de tratar de convencenos que lo español ye esa moxiganga artificial y non lo autóctono nuesto.

D'otru llau, hai otros eventos que nos amuesen otres cultures, otros vezos dayuri, invitándonos a participar d'ellos y onde la sustitución cultural nun tien llugar, cenciellamente, porque nun ta nos sos plantegamientos. Ente otros motivos, porque nun vienen endolcaos en nacionalismos estatales uniformistes de nenguna triba y porque son p'acoyer nel so somantu la nuestra propia cultura y llingua faciendo una xermandía prestosa. El saber estremar cuándo tamos nun casu o l'otru nun ye mui difícil, pero convién encamentar a la xente que s'esfuerce en dixebrar cuándo hai trampa y cuándo non.

Y güei yá pongo'l ramu a la espirica d'esta entrada y emplázovos pa la viniente. Saludos candiales.
                                                                           




lunes, 1 de octubre de 2018

Del traxe'l país

Los paxellos tradicionales representen lo que se considera la última manera de vistir estremada d'una comunidá antes del procesu que llevó a la igualación na vestimenta que se da anguaño nes sociedaes occidentales. El so ocasu entamó resalvada la primer mitá del sieglu XIX y malpenes algamó les primeres décades del XX.

Esta ropa heredada d'otres dómines funciona davezu como un identificador cultural visual. Como pue suceder al sentir falar a daquién, o ante la presencia d'elementos identificativos como les banderes, la manera de vestise muéstranos el sitiu d'onde'l portador de trax ye. Nel nuestru casu, como un rasgu identificativu d'asturianidá.

La utilización actual d'estos traxes ye dixebrada según los países. Hai sitios onde se dio una folklorización -na peor acepción del términu- y una falsificación de los paxellos tradicionales al empar que foi quedado'l so usu pa lo meramente festexero y alloñáu de lo solemne. Notros casos non, y l'usu d'estos traxes, o elementos d'ellos, algamó los actos de más ringorrango y solemnidá. Un exemplu d'ello tenémoslu n'Europa nel casu escocés, onde hasta nes celebraciones de más altu nivel social y estatal llucen dellos el perconocíu kilt.

Nel nuestru casu, el paxellu'l país sufrió una desvirtuación y banalización importantes en tiempos pasaos que tovía nun se desaniciaron dafechu na actualidá. Pero, nes últimes décades, diose nesti ámbitu un importante llabor de recuperación y dignificación tratando d'averar la vestimenta a cómo yera realmente nel pasáu. D'otru llau, empecipió a usase fuera de los aruelos meramente folkloricos algamando ciertu grau de solemnidá. Asina úsase dacuando pa dellos actos institucionales o sociales, arriendes d'otros de tipu ritual que nunca nun llegaron a escaecese dafechu.

Esi usu más d'etiqueta o solemne del traxe'l país refuerza'l so valir como identificador visual de pertenencia a la comunidá cultural asturiana, allóñalu del folkloricismu simplemente folixeru y avéralu a les utilizaciones que de los sos paxellos tradicionales faen notros llugares. Recuperar l'autenticidá y utilizala n'actos sociales de prestixu y reblanea ye un camín afayadizu pa la pervivencia de la manera peculiar de vistir heredada de los antiguos. Tampoco nun ye inventar nada. Tenemos semeyes antigües de xente posando col paxellu'l país pa  la posteridá, porque lu consideraben suyu y seriu pa  ello, y en tiempos onde l'usu d'esta manera de vestir diba quedando apostalgada pol uniformismu que s'espardía dayures, polo que la so utilización averábase al ámbitu de lo ritual y de la identificación identitaria asturiana. Asina que normalizar esi emplegu nes celebraciones o actos onde se quiera asistir vestíos con él ye un llabor perfectamente vidable y merecedor d'apoyu y respetu.
                                                                        
                                                                                

miércoles, 12 de septiembre de 2018

Carné de carreteru

Una de les ilusiones que siempre tuvi de rapacín yera la de poneme delantre d'una parexa xuncida a un carru y guiar aquellos animales col so correspondiente vehículu cola guiada. Pero nun fui a ello, porque yera yo mui ñarru como pa que me dexaren intentalo. La imaxe d'una parexa de gües o vaques con tol lloriame enriba, el xugu puestu, les mullíes pa solliviar el pesu, les melenes de piel d'oveya o de cueru, les mosqueres cayendo pela cabeza, ya'l caminar acompasáu y lentu de los animales siguiendo la dirección que cola guiada-yos diben señalando siempre m'abultó  daqué perprestoso como pa facerlo yo mesmu consiguiendo, d'esta miente, el mio hipotétiu carné de carreteru. Pero, miániques, nun se m'entamó naquelles dómines  y anguaño nun ye qu'abunden peles nuestres carriles les parexes tirando de los carros, asina que resígnome, per agora, a quedar ensin esi carné que mencioné enantes.

Tuvi meyor suerte con otra frasca de vehículos. Una bicicleta vieya coles llantes pinchaes y de persona adulta valióme para percorrer de suso a yuso los aprosimadamente cincuenta metros d'una caleya  hasta que llogré tener esi equilibriu que yá nun se t'escaez enxamás y que te permite montar nuna bici cuando te pruya. Más serondu foi'l mio enclín  pa guiar vehículos a motor. Aportó hasta un momentu que pensé que me diba pasar col carné de conducir daqué hermano a la mio experiencia infantil col de de carreteru, pero esta vegada por desdexamientu míu y ensin que nadie me torgare. Pero un bon día conseguí desaniciame de la mio vagancia conductora, saqué'l permisu pertinente y compré'l mio primer coche. Un poco sero, pero fíxilo.

El caso ye que güei ando en bicicleta o en coche, según lo que pinte en cada momentu. Pero voi ser sinceru. Sigo con una espina espetada na mio trayectoria conductora. Fáltame poneme con una guiada delantre d'una parexa y acoyela. Llograr qu'echen a andar. Comprobar que cuando cambie de sen los animales también lo faigan. Y ser pa paralos cuando me pete. También ser quien pa llevalos p'hacia atrás. Facer que funcionen el "tira", "guo", "tras" y demás. Realizar, en resumíes cuentes, toa una serie de maniobres que, de llograles con maña y remangu , valgan p'añadir a la mio capacidá para guiar una bicicleta o un coche la de llogralo tamién con una parexa y un carru (a poder ser rinchón, si nun ye muncho pidir). Si daqué día lo consigo, a lo meyor camudo nun  ser enagora más ambiciosu ya intento llevar una motocicleta o deprender a montar a caballu. Pero esto ya son otres histories, que me falta pa elles esa motivación estra de tener querío faceles de neñu ensin consiguilo, vamos, que nun llevo espina nenguna espetada por mor de alguna esperiencia conductora que quedare ente dolco y la media manga allá cuando neñu. Asina que primero, lo primero, el carné de carreteru...
                                                                         

domingo, 2 de septiembre de 2018

La nave Convivencia.

Cuerren tiempos gafos pal pensamientu democráticu, críticu y llibre. Impónse'l cada vuelta más l'adoctrinamientu d'una sociedá rebañu afalada por turullos que llamen al odiu y al enfrentamientu.

La nave Convivencia zarapica ente tambascaes que faen duldar si arribará a bon puertu.

Los drechos democráticos atránquense o reculen. El camín a percorrer voltia. Empara empobinar pa sociedaes más xustes y llibres, la utre del totalitarismu peñera sobre les nuestres cabeces de manera más bultable cada día que pasa.

Los discursos basaos nel enfrentamientu y l'odiu apoderen a los que nagüen pol diálogu y la concordia. L'insultu, la descalificación fácil, el bilordiu interesáu y compartíu a magüeyu, y la sustitución de la espirica argumentada pola fras curtia, fácil y qu'acapia los nuestros instintos más primarios faise perevidente.

La convivencia na nuestra sociedá cada vegada se fai más difícil. Proliferen individuos y grupos ensin un gotu de xacíu comunitariu, que consideren el so embeligru'l centru del universu, emburrecíos d'una manera alarmante y con una capacidá intelectual tan ñarrísima qu'axoricen. Salir a la cai y nun atopar a ún d'estos especímenes empecipia a ser una utopía alloñada ya irrealizable.

Echar una güeyada a les redes sociales respiga. La espiral d'enfretamientu xorrez. Los conteníos puxarra espolleten. La balanza arromana cada día más pal llau de los ventilamierdes. Esa xente que se dedica con enfotu a esparder porquería en toles direcciones y ensin respetar a nada nin a naide vendiendo la so alma al diablu si fai falta por algamar un puñáu de "me gusta" qu'afalague al so ego acomplexáu.

Asturies tien de los tiempos bayura de peludinos qu'apaecen nel sable de les sos playes. Ye una pequeña mapa d'ellos. Tal paez un badagüeyu de lo que ta por venir na nuestra sociedá. El kraken y la nave. El monstruu y la convivencia. Un pulsu onde anguaño nun se pue predecir cómo va acabar nel nuestru país.

Cuantayá que pienso que la nuestra tierra cumple'l triste papel de llaboratoriu d'esperimentos foriatos. Somos tierra de cobayes y préstanos, magar esta actitú nos emburrie pal suicidiu colectivu. En resultancia, esi fueu del fanatismu totalitariu que va imponiéndose dayures medra ente nós tizáu por tirios y troyanos. El personal entaína a apuntase a tal o cual frente bélicu y la posibilidá d'avanzar y afondar pa una sociedá más democrática engurria y mengua.

¿Arribará a bon puertu la nave Convivencia?. ¿Resalvará la nave Democracia los enviyones que la solmenen güei?.

Prestaríame pola vida que sí lo llograren. Pero, pa ser sinceru, a la vuelta d'unos años nun sé cómo va acabar too esto según vamos. Nun lo tengo nada claro.
                                                                               





miércoles, 15 de agosto de 2018

Espirica somedana

Ya lo escribí dayures nesta bitácora. Adientrase nun fayéu ye tresllumbar les llendes d'otru mundu. Metanos d'elli yes pa raspiar la esistencia de diaños, xanes, busgosos o cuélebres. La solombra, los requexos, el ruxerrux de les fueyes o los regatos. Y los fayucos, relluciendo al sol como ñarros vellones doraos.

Camín de La L.lamera altravieses viesques con fayes y acompáñate l'agua de contino. Un agua fresquilino, que taraza, pero que fai les delicies del gargüelu secañosu. Al llegar allaribón, vese'l maxestuosu tabayón franciendo pente les peñes. Enfrente, el garrapiellu de cases d'esti llugarín. Conservando delles les subidories esteriores o los fornos vieyos amestaos la la parede. Pa escontra'l final, un teitu asemeya vixilar la contorna.

El fayéu de La Enramada ye ún de los más meyores que tenemos na nuestra tierra, y afortunadamente inda tenemos abondos. La xubida ye pindia y casi dafechu a la solombra, pues les fayes espurren les cañes buscando la horizontal y en resultancia creen el so mundu particular y bisiegu. Cola orientación siempre al norte. A la vera del camín, los miruéndanos escuquen pente les fueyes, con un tamañu que malpenes algama a ser mayor que'l d'un arbeyu. Cuando algames lo cimero alcuentres bones representaciones de carrascos, escoba y xaranzanes, plantes de raigaños melecinales dende los tiempos reveyegos. Y a la vista apaez la braña de Mumián, col barcal, las ol.leras y los teitos. Unos cuantos yá esbarrumbando y otros esgonciaos dafechu. Otru grupu d'ellos, afortunadamente, siguen de pies y formen un conxuntu etnográficu prestosu.

Cruzando'l pueblu vaqueiru de La Peral, que conserva tamién unos pocos teitos curiosinos, entama una xubida non mui llarga pero sí enforma pindia. Aliendes un aire que t'abulta más secu, escurque pola cercanía de les tierres llioneses. El paisax que se nortia ye de lo más espectacular que se pue ver.
Les finques pa pastiar o segar tan llendaes con muria. Podemos observar zarros iguaos d'esta manera a esgaya. Y la sorpresa qu'atopes al aportar a lo cimero ye prestosa: rebaños bien grandes de vaques roxes y caballos pastiando n'axuntanza.

Allá pela Edá Media, controlar el pasu ente les tierres llioneses y asturianes al traviés del Puertu yera una xera apetecible. Preba d'ello quédenmos los muruecos del Castiellu del Alba. Engoláu nun picorotu escarpáu que talo paez más afayadizu p'añerar les utres que pa edificar nada, controla la rodiada dende'l so asitiamientu estratéxicamente impecable. Ves les fayes allalantrones, pero la carretera qu'esguila pal mirador qu'hai nel cumal ta llendada por castañales, cerezales, carbayos, bericios y, n'época afayadiza, dalgunes tribes d'orquidies autóctones. Dende'l mirador podemos otra vuelta agüeyar pa unos paisaxes memorables mentes sientes chiar los páxaros o cantar los grillos. Abaxo, alcuéntrase'l pueblu d'Aguino y más p'allá'l de Perl.lunes, con construcciones tradicionales, horros y molín incluyíos.

Pel antiguu camín a Veigas hai una sienda adaptada bien amañosa pa esparcer y ver ablanos, fresnos, ñozales, encines... Si'l día ta pa la mano, pues adicar nel cielu les utres. Y cuando tornes yá atapeciendo igual atopes dalgún esguil blincando pente les cañes de los árboles, o los esperteyos col so esnalar característicu. A la vera del camín, cola nueche yá anubriendo'l paisax, les gates de lluz allumen nos matos del camín. Ceguñen en cielu les estrelles y camientes entós naquello de la relatividá del tiempu, que somorguiáu per estos paraxes, esnidiase adulces, ensin priesa, supliendo abondo, como si los díes tuvieren pequí más hores qu'allá na villa d'au vienes como visitante.
                                                                            

domingo, 22 de julio de 2018

La isla de les gaviotes

Díes nublos estos caberos. D'agua y borrina pacia'l monte. De mar cantábrica col finxu'l cielu encapotáu. Díes del branu astur.

Aproveches que dexe d'echar agua pa caleyar per ende. Avéreste pa la costa, ellí onde la mar y la montaña s'axunten nuna imaxe metafórica de lo que ye Asturies. Entames a caleyar. El sonsón de les esquiles ye una costante a lo llargo del camín. Oveyes, vaques, cabres...colos sos campanos colgando del pescuezu pa dar cuenta de per ú tán.

Estrémense bien los xalés y casones indicatives -polo menos n'apariencia- d'ónde hai bayura. Delles construcciones repítense y recuerden les vieyes maneres de construir ampliando l'espaciu de la vieya torre. Pero estes son más modernes, anque non d'anguaño. Una torre cuadrada inxertada nel edificiu del xalé o palacete.

Agüeyar p'árboles centenarios ye un regalu pa la vista. Son como menhires que van marcando'l paisax dende cuantayá y que vieron xeneraciones anteriores. Allá pelos años 60 del sieglu XIX un flaire gallegu traxo d'Australia un árbol metá ornamental y medicinal. L'ocalitu. Güei una especie dañible pa les nuestres viesques cuando ella forma viesca tamién. Pero, paradóxicamente, quédennos tamién exemplares centenarios na nuestra tierra, testigos quiciabes de cuando aportó esta triba arbórea a la península y de cuando tovía yeren daqué esótico qu'enagora nun se dedicara a cultivos estensivos pa fabricar pasta de papel. Resulten maxestuosos a la vista y dignos de conservar como testigos d'otros tiempos. Dalgunos podemos observalos nel paséu de la sablera de La Isla en Colunga.

Claro que nun taría bien mencionar estos exemplares dexando en tinteru otru autóctonu y maxestuosu, como ye'l texu que s'alcuentra cabo la ilesia de Caravia Baxa. La visita a esti árbol totémicu y máxicu astur ye casique obligada. Y, de pasu, echa-yos una  güeyada a la cruz que asitiada na puerta d'entrada del templu, recuperada d'un monasteriu medieval y la perfamosa estela de Duesos que nos tresllada en pelondines a les dómines de la nuestra cultura castreña.

Na nuestra llingua nun s'usa la pallabra islote, sinón isla o islla, que de les dos maneres se diz nella. La nuestra costa tien bien d'estes islles pequeñines, allugaes a pocos metros de cantiles y playes. En dellos casos puen algamase en marea baxa al traviés de los tómbolos que se formaron a lo llargo de los sieglos. Tamién ye cierto que nun convién engolase nelles. Son auténticos abellugos pa les aves marines qu'avecen a añerar nelles. En dalgunes ocasiones atopamos cartelos que nos encamienten de que nun les triemos.

La fastera de la costa que va dende Xixón a Ribeseya ye una güaña d'icnites, que son nicios d'animales del xurásicu. Ente les más famoses que se puen adicar de manera perfácil tan les de la playa de La Griega, en Colunga. Pertenecen les más visibles a dinosaurios de cuatro pates y dalgunes son les más grandes atopaes hasta agora y pertenecientes a un exemplar xigantescu. Cuntáronme va años xente del llugar, que nuna d'estes pozones que dexaron les pisaes del dinosauriu en cuestión, bañábense los rapacinos a manera de piscina en miñatura. Alredor de tolo qu'arrodia esti mundu xurásicu hai tou un turismu cultural. El MUJA (sigles del muséu del xurásicu de nuestro), asitiáu nel conceyu colungués tien visites a esgaya y a lo llargo de tol añu.

Poder averase nun sólu día al cordal del Sueve xubiendo pal mirador del Fitu, o a les playes que s'afayen a la so falda (Arenal de Morís, La Espasa, El Barrigón, La Isla, La Griega...) ye una prestancia. Y pa los que'l butiellu nos afala ensin compasión, tenemos tamién gastronomía a embute, onde podemos saborgar carnes, pescaos, llámpares, pantrucu o emberzáu...y nun sigo pa nun facer de naguar al llector, que tampoco se trata d'eso.

Reparemos tamién en dellos horros centenarios de cuando la economía de la zona, arriendes de la pesca, tenía un pesu perimportante del campu. Nun avecen a tener corredor. Mángueste na xubidoria, algames la talandoria y pa dientro. Pa sofitase tienen pegoyos de piedra y tamién de madera. Cuantisimayá tuvi lleío que nel nuestru drechu consuetudinariu, un horru con pegoyos de madera nun daba drechos sobre la propiedá del suelu, pero si los tenía de piedra sí. De toles maneres, nun se fíe muncho'l llector d'esto cabero, pues yá se sabe que la memoria ye la intelixencia de los burros y l'apreciación mía ta fecha dende la memoria y más nada.

Voi poner el ramu a esta entrada con una anécdota que me fixo reflexonar. Tando sentáu nel paséu de la sablera de La Isla vi pasar una rapacina con una camistea que dicía "La Isla es mía". Desconozo si ye un suvenir y ta plagao d'elles per ende. Camiento tamién que pue tratase d'un llema pa identificar dende'l ciñu a los neños o non tan neños col llugar. Pero dexóme una impresión un tanto aquello, porque cuido qu'estos sitios, arriendes de públicos,  son de toa aquella xente que s'avere a ellos dende'l respetu y la educación, premises previes y fundamentales. Prestaríame más una camiseta que punxera "La Isla ye de les gaviotes", que son les habitantes reales del sitiu en cuestión y con drechu a agospiu permanente. Hasta taría yo dispuestu a comprar una y too.
                                                                              

sábado, 14 de julio de 2018

Del filandón al internet.

Agüeyaba yo un día d'estos caberos pa un baúl decoráu con una escena camiento qu'inglesa. Xente de clas alta aconceyaba nuna casona pa facer café o te nel llar, tomar unos llicores y tabaquiar. Alrodiu d'ello la espirica pertinente.

Aconceyase pa falar ye un vezu que remanez de los tiempos más vieyos. Les llurigues, los aruelos, les rocaes en camín...Somos seres comunicativos y sofitándonos nesa comunicación desendolcamos les nuestres relaciones sociales.

Hai na nuestra cultura una ayalga venceyada a esi enfotu por comunicanos. Trátase del filandón. Una costume consistente n'axuntase na casa d'un vecín pa filar les muyeres, iguar daqué coses los homes, comer si cuadra un pote castañes o una garulla y falar. Principalmente falar, comunicase, tresmitir esperiencies, histories y conocimientos.

Peros los tiempos camuden una barbaridá y anguaño tenemos otros medios pa comunicanos perdixebraos de los d'antiguamente. Los aconceyamientos d'antañu remanecen de maneres pernovedoses al traviés del mundu virtual. Internet entró de trebolén nes nuestres vides y abriónos un abanicu con gran bayura de posibilidaes comunicatives. Les redes sociales algamen, nestes dómines, un esporpolle descomanáu y son unos auténticos filandones contemporanios.

Pero esi mundu virtual tamién envizca y lleva a comportamientos, polo menos, cuestionables. Va tiempu afayábame nun bar y entró una parexa. Sentáronse ún enfrente de la otra y sacaron los móviles. Entamaron entós a da-yos colos deos a les pantalles inorándose mutuamente. Tuvieron una vegadona con esi comportamientu. De sutrucu, sorprendióme qu'entamaren a falucar ente ellos pero...al traviés de los móviles. Rizar el rizu, se llama.

Camiento que les tecnoloxíes tienen de tar al serviciu de les persones y non al revés. Si los humanos nos dexamos embarbiar por elles podemos acabar robotizaos y siendo nós los mardomaos polos oxetos envede usalos nosotros a ellos. Recuerdo dir nun viaxe pela costa nun autocar va pa un añu. Delantre mi diba una moza que nun dexó en tol viaxe de wasapiar col aparatu que llevaba con ella. Pasábemos per unos paraxes prestosísimos de contemplar, pero pa ella nun esistíen empapirotiada como taba nel so aparatín que la conectaba allalantrón desconectándola de lo que-y pasaba per delantre les ñarices.

Cuento qu'habríamos de pone-y el ñarigón a la tecnoloxía que nos apodera pa llevala per caminos más afayadizos. Utilizala intelixentemente, saca-y tol provechu que seyamos quien, que se xuro que ye abondu, pero ensin dexanos ababoriar por ella hasta dexanos n'ayén. Y, al llau d'ello, nun escaecer que la rocada cara a cara, la tertulia del bar o del café, la lluriga d'un grupu de persones pa comunicase falando y non sólo tecliando, son actividaes vitales pa les persones, porque nun somos robots, sinón humanos, y esa comunicación directa ye perimportante y necesaria. Les nueves tecnoloxíes y los vieyos vezos d'axuntase pa falar son perfectamente compatibles y arriquecedores. Ye too mentalizase pa ello.

                                                                              

sábado, 30 de junio de 2018

El nuestru norte

Convién nunca nun perder el norte propiu. Ellí ye onde s'alcuentra'l bon puertu de les nuestres vides.

Ellí ta la nación, el bierzu, el somantu, la identidá.

Cuando se pierde'l norte namás queda una Güestia ayena y d'alluendi. Y entós penitenciamos con ella al debalu y ensin llar.

El nuestru norte rux nos tabayones de Cuadonga, na Cámara Santa de la Catedral, nel ramu que s'ornia y ufierta, na tonada recia, na danza, na llingua...

Soplen aires foriatos cuantayá qu'amenacen con anubrinos. Aires calentuzos, pegañosos, aforfugantes, acompañaos de cancios de serena que nos envizquen pa los cantiles...

El nuestru norte ye del orpín, del mofu, de la fonte, de la ñeve, del ruxerux del fayéu, del molín que mueve'l ríu, de la montaña y de la mar atlántica...

Ensin esi norte súmense les xanes, los trasgos, los nuberos, los cuélebres...Namás que la Güestia permanez.

Pero una Güestia ayena y ensin Samain. Porque ye la d'aquellos que perdieron el so norte, la so patria, el so llar.
                                                                                

domingo, 3 de junio de 2018

Un ritual gastronómicu

En chigre hai ambientucu. Ye un sitiu vieyu ya iguáu a la manera de los chigres d'antes. Tien esa canaleta alredor de la barra pa echar lo último del culete sidra. Meses y sielles cencielles. Alloñáu del cuentu ya'l ringorrango. Nes parés semeyes vieyes y la referencia obligada al fútbol.

Antóxaseme un sitiu afayadizu pal ritual que me pruye facer güei. Siéntome na mesa qu'atrocare y póngome a echar una güeyada a la prensa cosmopaleta provinciana. Miro pa los titulares en lletra gordo y pa los santos. Malpenes lleo un par d'artículos apelucaos de tanta puxarra escrito.

Siento rebusquinos en butiellu entrín y non espero pola primera parte del ritual gastronómicu que voi realizar. Normalmente, pídense primero'l platu fríu y dempués el caliente, pero nesta ocasión pa mio idea que yera meyor facelo al vies y asina lo encargué. Según pasa'l tiempu naguo cada vegada más.

La guisandera capia al camareru y apúrre-y el primer platu. Vien con él na bandexa y pósamelu na mesa. Trátase d'una potina esmaltada n'encarnao, cola tapa puesta. Quíto-yla y sal un vafu arrecendiendo a un arume de dioses.

Son llámpares. Esi manxar de los nuestros pedreros que yá descubrieren cuantisimayá, va pa nueve mil años, los nuestros antepasaos mariñanes. Hasta inventaron una arbía iguada nun regodón p'arrincales que los arqueólogos bautizaron como picu asturiense. Claro que, daquella, quiciabes les comieren crudes o escurque arroxando piedres pa echar nun odre enllenu d'agua pa calentalo.

Empecipio a saborgales adulces, petezme zarramicar los güeyos. Hai que tastiar despacín y dir pingando cachos de pan na salsa. El ritual escomenzó y alcuéntrome zampuxáu nél.

Acabo la primer parte de la xinta y enseguidina apruz el camareru cola segunda onde voi perfacer la mio particular comunión n'acabóndola. Trátase d'un centollu. Les pates pa un llau, los cachos d'abaxo preparaos, ya'l carru apináu coles coraes y cachos de güevu.

Otra vuelta sigo col ritual. Francer les pates pa saca-yos la caña. Espellicar los cachos de la panza. Y, pa finar, entamar a saborgar el conteníu del carru.

Acabo cola segunda parte de la xinta y, entós sí, aportó'l momentu de pone-y el ramu al ritual gastronómicu qu'acabo de tastiar. Garro'l carru del centollu y enllénolu de sidra. Mezse colos escarrapios que queden de les coraes del crustáceu. La sangre de la mazana y la carne del centollu en xuntanza, un ritual que paez sacáu de tiempos  revieyos.

Acerco'l cacíu prehistóricu a los llabios y voi echando sorbiatos hasta acabar el conteníu. Acaba d'esta manera'l ritual gastronómicu. La comunión del presente col pasáu, la confirmación de que, anque abondo escalabrada, tenemos una cultura qu'alita en milenta manifestaciones, nesti casu gastronómica. Y que lo siga faciendo, mialma.
                                                                          

domingo, 27 de mayo de 2018

La penúltima cruzada.

Apocayá cellebrábemos una nueva alcordanza del llevantamientu heroicu asturianu escontra les tropes napoleóniques allá un 25 de Mayu de 1.808.

D'aquella los franceses echaren d'España al rei Fernando VII. La estructura estatal sofitada tovía en parllamentos como la nuestra Xunta Xeneral, posibilitó que pudiere dase aquella declaración.

Pero, acabada la guerra, el rei tornó y la so manera d'agradecer la victoria escontra los franceses foi cargándose aquella estructura estatal y, nel nuestru casu, la nuestra institución autonómica.

Entamaba asina una época histórica de tensiones ente un poder absolutista central y aquellos pueblos que queríen conservar el so autogobiernu. Carlistaes, pronunciamientos militares, guerres civiles... El poder absolutista español axeitando cruzada tres cruzada pa eliminar cualquier niciu de poder territorial periféricu, cualquier idioma que nun fuere'l castellanu, etc.

Tres el fallecimientu del xeneral Franco abrióse otra vuelta la posibilidá de devolve-yos a les naciones qu'igüen l'Estáu una parte del poder que-yor arramplaren cuantayá. Nació entós la denominada España de les autonomíes.

Naquellos momentos, emprimó a crecer la fola de la querencia polo propio, la historia, la cultura, l'idioma, les instituciones d'autogobiernu, etc., a lo llargo y ancho del territoriu estatal. El caldu de cultivu yera afayadizu, tres salir d'una dictadura.

Pero, güeyu al cartafueyu, hubo quien encamentaba que tou aquel procesu llevaba una trampa que diba acabar rescamplando, y que les dómines de llibertaes qu'escomenzaben podíen acabar nuna dictablanda más que nuna democracia arrecha y bien tresnada.

Col pasu de los años aquella fola autonomista foi amenorgando y xuxó entós otra centraliega onde podíemos dir agüeyando los vieyos vicios absolutistes del pasáu coles sos zunes escontra cualquier fechu históricu, cultural o llingüísticu que puñare contra una concepción uniformista d'España, al empar que se daba un cuestionamientu creciente del estáu autonómicu rispiendo por tornar a un modelu políticu centralizáu. Grandes poderes económicos y políticos encontaben la "reconquista" de vieyos privilexos que veíen amenazaos.

Esa nueva fola algama nestes dómines un tamañu bultable y tarrecible. Anguaño, tamos somorguiaos nuna nueva cruzada pa reconquistar les "provincies" a cargu del poder centralista, con unes zunes hacia les llingües ya identidaes non castellanes que dan medrana. Con voceros d'esa nueva cruzada espardiendo mensaxes espantibles como facer llamamientos a bombardiar con aviones a una comunidá autónoma ensin que pase absolutamente nada.

Pero nun queda equí la cuestión. Xuncida a esa recentralización vien una xera de recortes brutales de drechos básicos de cualquier sociedá democrática. Nestos momentos yá hai xente na cárcel por exercer una llibertá d'espresión que-yos manca a les monxutes que mangonien los asuntos estatales, por poner un sólu exemplu. Y xorrecen discursos políticos calcaos a los propios de fuerces antidemocrátiques d'otros tiempos sopelexaos por fuerces polítiques al alza que puen acabar gobernando, guapamente, l'Estáu y munches comunidaes autónomes.

Pa dir acabando, podríemos resumir la espirica anterior diciendo que güei tenemos una cruzada onde un nazionalismu españolista trata de desaniciar cualquier rastru de nacionalismu "periféricu", por mui democráticu y dialogante qu'amuese ser esti caberu.

Ya'l futuru que se nortia nel finxu'l cielu ye prietu, esmolecedor y tarrecible. Ver veremos en qué para too ello, pero entrín y non, n'Asturies sigue siendo la hora de la llucha ya'l llabor.
                                                                        





jueves, 24 de mayo de 2018

El fatu de los fatos

"D'ilusiones vivía'l tontu los coyones". Esta sentencia tan contundente téngola sintío cuantayá y pieslla una gran verdá.

Dicen los espertos en cuestiones educatives que nun hai una intelixencia pa too. Un ñeñu pue ser tochu en matemátiques y perllistu en dibuxu, por exemplu. Asina que toos tenemos daqué que se nos entama meyor y onde podemos inxertanos dientro de los llistos. Y tamién daqué u somos más fatos y con menos posibilidaes d'avanzar.


Hai tamién un tipu privilexáu y minoritariu de llistos. Ye'l daquellos que son arteros pa esguilar pela pirámide social p'arriba anque pa ello tengan que se sofitar notros que dexen fundíos na llamarga.

D'otra banda, siguiendo col casu de suso, tamos los más fatos pa esa actividá. Y pa compensar los nuestros esfuerzos ensin resultáu por medrar -anque seya de la manera más honrada posible-  llevamos nesta vida con nós un fatu d'ilusiones colgáu d'un palu nel costazu. Sírvennos como motor, bien de vegaes, pa siguir trepando nel día a día ensin escangayanos.

Lo que suel asoceder ye que, cuando vamos aportando a la vieyera y nos da por desañudar esi fatu, decatámonos que munches d'eses ilusiones qu'acarretemos siguen intactes por nun tar cumplíes, y que llevamos camín de llevales vírxenes con nosotros pal cagüercu.

Cuando somos rapacinos cuéntennos aquello de que nos traxo una cigüeña nun fatu colgáu del picu. Toa una metáfora de lo que nos espera nesta vida que nun fuimos a ver o a entender nel so momentu. Esi sábanu au nos tresporta la cigüeña trátase del fatu de les ilusiones que munchos nun vamos ver cumplíes enxamás por más que nos enfotemos nelles... Porque cayimos, llamentablemente, del llau de los fatos. 
                                                                    

 

miércoles, 9 de mayo de 2018

El Fueru d'Avilés

El primer Fueru d'Avilés concediólu'l rei Alfonsu VI nel añu 1.085. Posteriormente, Alfonsu VII confirmólu y dio-y a esta villa la categoría de ciudá al traviés d'un documentu del añu 1.155 que se conserva nel archivu municipal avilesín. Trátase de dos pergaminos cosíos per un cordón. Consérvase ellí tamién otra copia del añu 1.289.

Nesti fueru arrecuéyense les llibertaes, franquicies y privilexos que la corona otorgaba a la villa avilesina que yera per aquelles dómines la segunda más importante d'Asturies, dempués de la capital, Uviéu.

L'escribanu yera un presbíteru llamáu Suarius (Suero) un nome naquel entós bastante corriente nel noroeste peninsular. Considérase que yera  de la zona y que tenía relaciones col conventu de San Vicente. El testu ta escritu en lletra carolina, nunes dómines onde lo corriente yera usar la visigótica. D'esti escribanu conócense más documentos salíos de la so pluma.

Arriendes de la importancia histórica del documentu, tien otra que rescampla dende'l puntu de vista llingüísticu. Ello ye que ta escritu n'asturianu con abondes entepoladures del provenzal. Ello conviértelu nun de los primeros testos conocíos del idioma asturianu y una auténtica xoya histórica y llingüística que, afortunadamente, aportó hasta nós.
                                                                              


jueves, 5 de abril de 2018

Un templu cultural llamáu "llagar"

Los templos son construcciones vinculaes a les actividaes relixoses.

Pero non siempre ye asina. Hai tamién templos culturales. N'Asturies hai d'estos. Y ún que destaca ye'l llagar de sidra.

El llagar nun ye sólo'l sitiu onde se maya y pisa la sidra. Tamién ye onde se consume. Y tamién onde se xinta, dende taquinos a platos más contundentes. Pero inda hai más.

Nel llagar atópase tamién el santuariu de los cancios tradicionales. Dende'l cantar individual de l'asturianada, hasta los coriquinos colectivos.

Escurque nesti vezu de cantar nos llagares echa la so gabita la sidra. Porque la sidra tien fama de ser cantarina, d'afalar al cantu a aquelles persones que la tán tastiando.

Pero, arriendes de ser el sitiu onde se fai la sidra y onde se canta, tamién ye'l llagar un templu pa la xuntaza, pa da-y a la parpayuela y pa formar aruelos prestosos de convivencia.

Y esa xuntanza tien un aquello reseñable. Trátase nuna xuntanza na igualdá. Porque'l templu del llagar iguala a los sos particulares feligreses. Pa entrar nél, el señoritismu hai que lu dexar a la puerta, como se fai coles madreñes pa entrar en casa.

Hai dos momentos que rescamplen nel templu del llagar.

Un d'ellos ye'l momentu de mayar y pisar la mazana. De vela tresformase en sidra'l duernu y prebar el zusmiu acompañáu, si cuadrare, d'unes castañines amagostaes que faen un maridaxe perfectu.

L'otru ye'l momentu de la espicha. De asitiar na puerta un ramu lloréu que nos indica que vamos a romper un tonel p'asistir a la preba de la sidra del añu. O tamién les espiches de sidra yá más fecho, pues al funcionar comu templu cultural y de xuntanza, el llagar abres les puertes del so cultu particular tol añu.

Convién curiar con mimu'l templu del llagar. Porque ello supón tamién curiar con procuru de les vieyes tradiciones que formen parte de los raigones que nos xunen a esta tierra.
                                                               



domingo, 25 de marzo de 2018

Pues va ser que non

Asturies ye un territoriu vieyu. Funde los raigones poblacionales en dómines qu'algamen al paleolíticu. Y fai galanes como país, nun esbozu de lo que conocemos hoi, nel Reinu Asturianu.

Esta tierra ye complexa ya ígüenla milenta calteres. Tien territoriu, historia, cultura material y inmaterial, idioma, estructura social y económica...Tou un bagax que comparte, en mayor o menor midida, con milenta sociedaes actuales.

Pero, desgraciadamente, Asturies anguaño ye daqué mui asemeyao a un ermu intelectual y discursivu. Les espirques qu'observamos per ende tienen l'aquello de los discursos rancios, atrasaos y fosilizaos.

Y esi ermu espárdese tresversalmente. Nun ye ferial de les llurigues centraliegues, nin de les izquierdes o dreches. Toles estayes discursives del país zapiquen nesi inmovilismu alcanforáu y estéril. Y l'asturianismu llingüísticu nun ye una escepción.

Ello ye que dende les monxures llingüistiques llariegues acaba de lleganos la última perla cultivada. Sigún esta espirica, Asturies ye un paisax y un idioma. Asina que si muerre esti últimu namás que nos queda'l paisax.

Que la desapaición del idioma asturianu diba ponenos delantre d'un país bien estremáu al que conocemos anguaño abúltame indiscutible. La llaceria sedría tremenda y la pérdida históricamente llamentable. Poro, ye de caxón que'l deber y la obligación de les xeneraciones qu'actualmente tamos nesta tierra seya evitar qu'eso ocurra.

Pero sopelexar dende les altures llingüístiques que la nación asturiana ye identitariamente sólo un fechu llingüísticu inxertáu nun paisax ye una gran falsedá. Y, pa detrás, tien una carga de profundidá tan demoledora que fai que taramiellen los propios cimientos de la propia reivindicación llingüística enfrentándola a otros sectores sociales qu'esbrexen por caltener viva la identidá cultural del país.

Asina que munchu cuidáu colo que se declara y difunde públicamente al traviés de los medios de comunicación dende los púlpitos del idioma. Pue ser un bumerán perpeligrosu pal propiu idioma y pal país en xunto.

Asturies tien un fechu identitariu de primer orde, la llingua asturiana, que tenemos que curiar y esguedeyanos por defender. Pero d'ehí a considerar la nuestra tierra un binomiu onde sólo cueyen un paisax y una llingua va un abismu.

Y eso, pues va ser que non.

jueves, 15 de marzo de 2018

Los gües como aval

Los asuntos económicos tienen dalgunes característiques propies según la época en que sucedan. La figura del avalista o del bien ofrecíu como aval ye una cláusula que figura nos contratos hasta anguaño mesmo, y según los tiempos que cuerran esi apartáu pue danos una idea de lo que se valoren ciertos bienes neses dómines, como vamos ver de siguío.

Pues d'esto vamos tratar hoi nesta entrada. Ello ye que nun documentu fecháu nel mes de Xineru del añu 1.884 (semeya del post), un firmante, J.G.C, reconoz que tien una deuda de 800 riales por aciu de la reparación d'unos carros nel taller de F.A.F, asitiáu nel llugar de La Ponte, na parroquia llangreana de Santolaya de Turiellos.

Dicha deuda comprométese a dir pagándola nunes cuotes mensuales qu'entamen nel siguiente mes de Febreru. Hasta equí un contratu de lo más corriente.

Pero onde l'asuntu tien el so aquello ye al aportar al apartáu del aval. Y ye que'l deudor comprométese a nun vender la parexa de gües cola que xuncía entrín y non nun tuviere satisfechos tolos pagos, quedando asina los armentíos como una especie de garantía pal acreedor.

Visto dende'l puntu de vista de la nuestra sociedá actual pue abultanos una anécdota simpática. Pero si nos treslladamos al últimu terciu del sieglu XIX infórmanos de la importancia que la parexa, el carru y el lloriame teníen naquella sociedá, pues yera'l mediu de tresporte  per caleyes y carreteres non sólo dientro de les llendes de la casería, sinón tamién de tou tipu de mercancíes nunos conceyos asturianos, como'l de Llangréu, onde la minería y la industria entamaben a esporpollar enforma.
                                                                                       

                                                                   


domingo, 4 de marzo de 2018

"Mazcarita, ¿quién soi?"

Algamar once ediciones d'unes mazcaraes (o de cualquier otra actividá cultural) nun sitiu tan aquello como Asturies ayuda a compender eso que conocemos como "milagru".

Ello ye qu'esti añu aportemos a esi númberu d'ediciones nes mazcaraes d'iviernu que tienen como megollu Valdesoto. Y tamién a la sesta d'unes xornaes astur-luses con bas na Pola de Siero. Esto cabero tien el so aquello. Al traviés de la cultura llégase a un conocimientu ente pueblos que se supón que tendría que se facer sofitándose na política.

Esti añu tuvi en dos actos. El vienres nel centru polivalente de Valdesoto hubo unes charles a tres bandes. Presentóse un llibru dedicáu a les comedies de los sidros, entamando poles d'ayeri hasta llegar a hoi. Ta colgáu n'internet pa que toa aquella persona que lu quiera consultar pueda facelo de baldre y ta abiertu a suxerencies de los llectores. Presentóse tamién un mapa au s'asitien les mazcaraes peninsulares y europees. Un documentu perinteresante p'alluganos xeográficamente nel tema. Diose conocencia d'un entroidu recuperáu en galicia, el d'un pueblín llamáu Samede. Moviéndose, trabayando, entrugando a informantes, fueron quien a sacar a la lluz un antroxu escaecíu hai años. P'acabar, anuncióse'l primer certame de comedies qu'entama l'asociación El Cencerru, onde los vinculaos col teatru puen concursar pa ver cómo-yos pinta.

De los dos desfiles de mazcaraes tuvi nel d'esti domingu en Valdesoto. Contó con una abundante representación de mazcaraes gallegues, lo qu'amuesa'l puxu que tienen na nuestra comunidá vecina. Los guirrios encabezaben el desfile y dellos vecinos ofrecíen l'aguilandu, que siempre tuvo xuncíu a les actividaes de la xermandía marutada. Acompañó'l día, lo que ye d'agradecer. Por cierto, tengo qu'encamentar a les moces que los guirrios más mozos vienen con ganes de guerra. Métense per elles y si nun anden sollertes puen caye-yos unos peñizcos nes piernes ente blincos y glayíos. L'alvertencia queda fecha.

Dexo a parte'l comentariu d'una mazcarada felizmente recuperada. Ye la de los Mazcaritos d'Uviéu. Na planta d'arriba del centru polivalente de Valdesoto fixeron una esposición con semeyes de los personaxes antroxaos y paneles esplicativos. Nuna mesa había semeyes de too ello pa quien quixera pañales. Participaron nel desfile d'esti domingu y foi mui prestoso velos, incluyendo hasta un pelele qu'acarretaben nun paxu y que mantiaron na antoxana de la ilesia. Al traviés d'ellos faise ún una idega mui bona de lo que yera un antroxu tradicional. Cumplen dos antroxos y esperemos que seyan munchos más.

Esti sábadu pela tarde tuvi viendo cuadros del pintor Evaristo Valle. Una de les fontes que tenemos pa echar una gabita na recuperación de les mazcaraes. Xente marutao con sayes, sábanos, pelleyes d'animales. L'antroxu tradicional.

Nos últimos años ta dándose un espoxigar de les mazcaraes na península y fuera d'ella. Ta creándose al traviés d'elles una rede cultural que camiento que ye perinteresante. Partiendo de la bas de dales a conocer nel sitiu onde son, cosa que cai de caxón, ta filándose un texíu d'intercambios culturales onde eses mazcaraes van dándose a conocer notros llugares. Y con ello un arriquecimentu cultural mutuu y un mensax claru de qu'al traviés de la cultura pue algamase l'amistanza ente pueblos, y que la diversidá pue llograr esa xuntanza con muncho más tiez y posibilidaes de cuayar que'l tarrecible uniformismu de cultura enlatada y sinsustancia que nos traten d'enxaretar dende les llurigues cosmopaletes.

"Mazcarita, ¿quién soi?". Pues ye la cultura tradicional, de raigañu, d'alcordanza colectiva. Y que venga pa quedase.

miércoles, 28 de febrero de 2018

Facer País

N'Asturies tamos avezaos, desgraciadaente, a persones y grupos sociales que trabayen escontra'l país, buscando con ello'l so porgüeyu.

Pero na nuestra tierra tamién hai xente que fai país. Unes vegaes a costa fecha, conscientes de la necesidá de puxar por ella porque ello va en beneficiu colectivu. Otres vegaes, fáenlo ensin decatase d'ello, simplemente faciendo aquello qu'heredaron y repiten y tresmiten ensin más porque ye la so manera de vivir. Dambes maneres válides y respetables porque empobinen a un oxetivu que ye'l del bien de toos y de la tierra de nuestro.

Dicho lo anterior notres pallabres, anguaño tenemos n'Asturies xente qu'esbrexa por frayar lo propio d'esta tierra porque asina ven mayores posibilidaes d'esguilar na estructura social. Pero tenemos tamién xente que nun renuncia a les sos raíces y que nun ven incompatible defendeles y tresmitiles col so interés personal.

Esta ye, anguaño, una amarraza clara qu'algama dende'l nivel de les monxures polítiques, económiques y sociales aculturizaes y cosmopaletes hata otros sectores sociales qu'agüeyen la nuestra sociedá dende otres perspectives dixebraes a les anteriores.

Al final lo que tamos necesitando  nestes dómines que vivimos ye un exerciciu de sinceridá individual y colectiva que nos lleve a decidinos de qué llau tamos. Si vamos axuntanos con aquellos que busquen esguilar socialmente a costa de frayar y destruir el país o si vamos enfotamos na so pervivencia como mediu de supervivencia digna individual y colectiva.

Destruir el país o facer país. Esa ye la cuestión. Cada cual qu'escueya'l so posicionamietu nesti tema fundamental pal futuru de la nuestra tierra. Y qu'apechugue coles consecuencies de la so decisión.
                                                                        

domingo, 18 de febrero de 2018

Llevántate y cucha

"Dios y el cuchu puen munchu, pero sobre too'l cuchu". Asina encamienta un dichu popular asturianu perconocíu. Dexa clara la importancia d'esti abonu d'orixe animal na nuestra sociedá rural yá de los tiempos.

Vila cuantayá y nun me cayó embaxo. Ye la imaxe de la silueta d'una persona que llevanta una pala dientes y al pie una conseña: "Llevántate y cucha". Toa una metáfora d'enfotu nel futuru. Al cuchar preparamos la tierra pa que la semiente guañe, espoxigue y dea collecha. La nuestra tierra, la nuestra collecha.

El cuchu vien usándose en sentíu metafóricu dende tiempos vieyos nun doble sen. D'un llau, como elementu perimportante na sociedá campesino de nuestro. Hasta nel mundu de l'asturianada úsase pa espresar qu'el cantar que se ta sintiendo ta bien echáu y presta. Pero d'otru, pela parte del cosmopaletismu, como elementu pa desprestixar lo que nun consideren urbanita y paxolero.

Como los tiempos cambien abondo, yá tenemos nes nuestres aldees habitantes que construin nelles morada pa dir a espansionar. Pero, ¡ai, hom!, a dalgunos d'ellos molésta-yos el golor del cuchu y l'orín, avezaos que tan a goler escapes de coches, mexaes nes esquines y demás puxarra que contamina les nuestres villes y ciudaes. Hasta se quexen si una vaca qu'afalen pa la llende echa una moñica delantre de la portiella de la so casa o xalé.

Y agora resulta que ta acabante de dase una normativa europea onde puñen -nunca meyor dicho- escontra l'emplegu del orín y el cuchu nel campu. Normal. El porgüeyu que puen sacar d'ello les industries fabricantes d'abonos químicos ye enorme. Y los bolseros d'elles yá esbabayen con pensar los ingresos que puen enfonilar. Dempués si la nuestra salú se resiente de tanta química estrada na tierra ye'l nuestru problema, faltaría más.

Apocayá los cosmopaletos qu'abeyen pel nuestru país  espatuxaben nel Campoamor porque xunto al inglés y el castellanu usaren enantes d'entamar una ópera l'asturianu. El cuchu, el bable, la gaita...¡puxarrona pa xente tan fino y educao!. Anque pa mio idea, nel sucesu tuvo tamién que ver la vertiente política del asuntu, y los bederres maleducaos escurque tamién aprovecharon el tema llingüísticu pa protestar contra l'actual corporación que gobierna'l conceyu, que too pudiera dir xunío.

Pero la realidá ye que'l cuchu pue munchu, como bien nos recuerda'l dichu que punxi enantes. Y la invitación a llevantase y cuchar pa preparar la nuestra tierra asturiana de cara al futuru ye tou un gritu dignu de sofitancia. Cadún tien que lo facer na estaya que meyor se-y entame. Asina que, pa pone-y el ramu a esta entrada, bríndovos a que vos llevantéis y cuchéis la vuestra estaya col vuestru trabayu. Asina ente toos arriqueceremos la nuestra tierra pa que xuxa la nuestra collecha y la del futuru pa que puedan afayase nella aquellos que nos sucedan.
                                                                               

lunes, 12 de febrero de 2018

¡Antroxu fuera!

Andaba yo pel branu per una parroquia xixonesa. Poco antes comprara nunes fiestes una montera picona de papel. Diome por ponera pellí. Baxaba per una caleya cuando me crucé con un paisanu, vieyu daquella, que lu llamaben "El Tambor" por mor de que fuere tamboriteru nos sos tiempos. Andaba con un palu a la rebusca de cascoxos pente los bardiales. Cuando me vio d'aquelles traces comentó "¡antroxu fuera!". Nun pescancié naquel momentu a qué se refería. Cuando-y lo entrugué a mio güela comentóme a que se refería a la época del antroxu pol aquello que-y llamare l'atención la mio montera de papel.

Tiempu dempués afondé nel significáu de la espresión hasta informame que s'usaba antiguamente pa invitar a los vecinos a participar nel antroxu, hasta'l puntu d'aventa-yos potes a la puerta pa facelos salir. Tamién m'enteré d'otru significáu de la espresión que ye'l de nun tener mieu, dexar los complexos aparcaos y salir albientestate.

Ello ye que nestes dómines tamos empozaos nel antroxu. Nel sen tradicional y llariegu del términu, afayámonos nos tiempos de los aguilandos, comedies y mazcaraes tradicionales. Tamién nos alcontramos nel tiempu previu a la cuaresma, onde les llacuaes reinen antes d'entrar nesi ermu. Hai que se fartucar abondo pa lo que pueda pasar en tiempos venideros.

Tradiciones venceyaes a estos díes hai abondes, independientemente de que se conserven anguaño o de que tean ehí apigazaes esperando pola so recuperación siempre posible si hai voluntá pa ello. La quema de los payones. El echar el goxu amburando cuesta abaxo...

No que ser refier a los mazcaritos y agulandos nos últimos años vienen recuperándose un garrapiellu d'ellos. Anque queda enagora muncha xera por facer. Claro qu'hai un llabor caseru onde cadún de nosotros podemos echar la nuestra gabita. Marutanos como antaño. Con ropes vieyes de casa, sábanes, sacos, capiruchos, mázcares feches por nós, entafarrando la cara con corchos quemaos y tou un etcétera al respectu.

Resumiendo, tamos en díes d'antroxu, de pitances, de mazcaritos, de folixa y de tresgresión. Pues dende esta bitácora fáigovos un brinde pa participar en too ello. Asina que queda dicho:

¡Antroxu fuera!.