Los milagros esisten, miániques. N'Asturies pudimos presenciar ún nestes fiestes navidiegues. El presidente del Gobiernín, famosu por falar de poco a nada, volvióse de sópitu políglota.Y armóse entós la escandalera. Porque resulta que se-y ocurrió felicitar les fiestes en catorce idiomes. Pero nengún d'ellos yera'l bable. Y, claro, estes coses rinchen tanto que ye prácticamente imposible busca-yos xustificación dalguna, porque l'escaezu abulta tanto que resulta abegoso atopar una esplicación ayuri.
Pa detrás, nel colmu de la mala suerte, sal el presidente cántabru felicitando tamién les fiestes. Pero nesti casu tuvo tanta puntería qu'escoyó un villancicu que taba precisamente en bable, l'idioma que faltaba na felicitación plurillingüe del nuestru mandatariu autonómicu.
Entós claro, ves a un presidente asturianu felicitar les fiestes en catorce idiomes menos nel vernáculu del país y ves a un presidente cántabru usar esi idioma na so felicitación y talo paez que tamos presenciando una comedia maxistral de guirrios. P'arrollicase de risa lliteralmente, vamos.
L'asuntu de la felicitación navideña corrió como la pólvora per redes sociales y medios de prensa. Hasta lloñe de les nuestres fronteres algamó la espantayada y dieron cuenta d'ella tamién. Porque vamos a ver, por munchu noxu que se-y pueda tener a un idioma, hai unes llinies encarnaes que nun se puen trespasar, porque facelo ye esponese a quedar retratáu dafechu delantre de tol mundu. Y si, pa detrás, lo fai el presidente de la comunidá a la que pertenez l'idioma en cuestión, entós yá la cantada conviértese n'antolóxica.
Y ye que, a estes altures, cuando dende'l mundu de la política se quieran canalizar les zunes que dalgunos tienen pa col idioma asturianu yá nun val facelo a lo xole, comportándose como si esa tirria fuera xeneral y compartida pola población (que ta claro que nun lo ye nin migaya). Hai que filar muncho más fino pa nun quedar n'evidencia énte propios y estraños. Porque al quedar tan col aquello al aire como nel casu de la felicitación presidencial, muncha xente que pudiera creyer nel discursu retorcigañáu de que dende'l Gobiernín quieren trabayar por curiar la llingua, va empecipiar a ver mui claro de que se trata d'una mentira descomanada. Y, al final, envede aperrilla-y a esa llingua, lo que se consigue ye axuntar a más xente a la causa de la so defensa.
Asina que, a lo meyor, tenemos que-y acabar dando les gracies al presidente por presentase mostrando de manera nidia la so posición nel tema de la llingua asturiana per aciu d'una felicitación que lleva una trayectoria meteórica pa convertise nun clásicu del despropósitu llingüísticu.
