jueves, 23 de octubre de 2014

Tradiciones y rituales

Averase a les tradiciones y ritos d'antiguamente nun ye ferial de ciencies esactes. Lleva interpretación, suxerencia y, en definitiva, lo mesmo se pue opinar con xacíu como escabarriase per ende. Valga lo anterior como un capiar a la benevolencia del llector.

Dientro del folklor asturianu hai manifestaciones festexeres, pal divertimientu y la folixa. Puen tener raigaños antiguos o ser adaptaciones, más o menos recientes, d'elementos importaos d'otros llaos. Asina, baillamos xotes, fandangos, etc. que, en xunto, formen un bagaxe cultural nuestru prestosu y valoratible.

Pero hai otres manifestaciones que s'adientren notros ámbitos estremaos de los anteriores. Ye cuando nos somorguiamos nel mundu de les tradiciones y los ritos, conceptos que, davezu, aprucen xuncíos pol mesmu lloriame de lo ancestral. Vamos poner un par d'exemplos d'esto cabero.

Una de les tradiciones con raigones más fondos de la nuestra cultura musical ye la danza prima. Al son d'un romance, dánzala la xente formando círculu, enxareyada, moviéndose p'alantre y p'atrás y desplazándose de llau. Yera -y enagora lo ye en bien d'ocasiones- la manera de zarrar les romeríes y fiestes patronales. Tamién la que fai de xuntanza alrodiu de la foguera de San Xuan, pa celebrar el solsticiu de branu, de fondes reminiscencies precristianes. Tamos, quiciabes, ante un ritual de xuntanza de la tribu, del pueblu, de la vecindá, de la xente que comparte un territoriu, una nación.

El segundu exemplu vamos buscalu nel corri corri cabraliegu. Un grupu de muyeres -seis davezu- desplácense alliniaes moviendo ramos que lleven nes manes. L'únicu home que participa na danza allúgase enfrente d'elles, baillando, moviéndose de llau a llau, xirando... Pudiere representar un doble ritual de fecundidá: hacia la tierra y/o hacia'l clan. Un aquello suxerente: nes figures humanes representaes en Peñatú, xunto al ídolu, hai un grupu d'elles -seis- casi alliniaes y en postura asemeyada (¿caminando?). Frente a elles,  hai otra con una posición de los brazos y les piernes estremada a la d'elles, como blincando. ¿Simple coincidencia... o daqué más fondero?.

Axuntando dambos casos, tenemos una xuntanza de la colectividá cola tierra y ente los propios individuos que la formen. Nun tamos ante la folixa ya'l divertimientu. Allugámonos ante la solemnidá del ritual, ante la repetición d'unos actos con un finxu de partida que se pierde na nuestra particular nueche de los tiempos. Poro, procede acabar con una puntualización importante. Pa poder pescanciar o participar de les nuestres manifestaciones culturales d'esta triba, pa poder sentir daqué pa con elles, ye necesario facelo dende la predisposición anímica ya'l conocimientu previu de lo que tamos viviendo: la tradición, el ritual, la herencia de los ancestros.

jueves, 9 de octubre de 2014

Un viaxe hacia l'absurdu

Nes sociedaes más primitives y tribales adícase una doble xuntanza. D'un llau,  la de los miembros de la propia tribu. D'otru llau, cola ñatura y les plantes y animales que s'alluguen nella. L'antropomorfu, el marutase d'animal o representalu en cueves y escultures da-y a ésti un valor cimeru. Porque nél tán la comída y la pervivencia de la propia tribu.

Cola evolución tecnolóxica ya'l mayor tamañu y complexidá de les sociedaes, empiecen a dase dos procesos. De mano, l'animal ye un ser inferior. La caza pa comer sustitúise pola caza pa divertise. Aprucen y espolleten los espectáculos de tortura animal. Xuégase cola pieza, faise que sufra. Y esfrútase del espectáculu. Fráyase la guaña vexetal avanzando lo ermo. D'otru llau, espolleta'l  biltu de lo individual como preferible a lo social. Búscase'l porgüeyu del individuu, non sólo frente a la sociedá onde vive, sinón a costa d'ella. Y ruempe d'esta miente l'eslabón de la vieya podrella que nos xunía a la Tierra como madre camudándola n'oxetu de negociu, a La Vieya como somantu vital.

L'esporpolle del individualismu ya'l distanciamientu de la ñatura algamen nos tiempos actuales un finxu que marca la última fase d'un viaxe a l'absurdu como especie y como sociedá. Los desanicios nel ferial de la vida algamen el so mayor sinsentíu. L'avance hacia la destrucción del planeta como hábitat afayaízu pa vivir entaina a reblagos. Otramiente, l'individualismu empicorótiase como l'oxetivu deseable. El triunfu individual, magar haya qu'esgonciar los proyeutos vitales de milenta conciudadanos, ye la meta a algamar.El porgüeyu colectivu sucumbe ante l'envizcamientu nel embeligru propiu.

En cada época histórica remanecieron contradicciones qu'acabaron resolviéndose nuna dirección determinada, acertada o erronia. Y, anguaño, tamos nuna d'eses encruciyaes onde toca iguar una situación enguedeyada abondo pa col mediu biolóxicu y ambiental d'esti planeta qu'habitamos y pal col modelu de convivencia pa onde empobinamos. Suena'l turullu qu'alerta del camín abegosu que llevamos como colectividá y que nos indica que ye una necesidá vital atopar alternatives que corrixan la trayectoria escabarriada de les nuestres sociedaes antes de que zapiquen nun caleyu d'imposible salida.