Restallen los voladores. Hai espicha...

 "Axuntábense con una xiblata  al pie d'un tonel..."

 Asina entama un de los nuestros cantares corales más conocíos. Y ye qu'entramos nel tiempu de les espiches. En dellos chigres y llagares asturianos vamos poder ver inda los ramos qu'anuncien esta folixa tán nuestra. Dalgunos hasta lo anunciarán faciendo españar voladores.


Una tradición, la de la espicha, qu'endagora se caltién ente nosotros. Sigue prestándonos amugar el gargüelu cola sidra fresquino (o'l vinu nos conceyos suroccidentales) tastiando lo recién fecho pela primavera.

Tamién pa los más somorguiaos nes vieyes costumes, un tiempu afayadizu p'axuntase en coriquinos y cantales toes, lo que se diz, toes. Y hasta dalgún gargoliará una recia tonada consiguiendo l'aprobación sonora de los oyentes o provocando la sonrisa cómpliz de los qu'esperen sentir cantar bien y sienten a dalguién que glaya.

Y como tou bon parroquianu sabe, forrar l'estómagu, porque la danza sal de la panza. Tamién comprobar quién tien el bon aquello de "saber mexalo" o a quién hai que sacar en pelondines con una pigorcia épica.

Asina que vamos disfrutar de les espiches pa garrar fuelgu, que'l camín ye pindiu enforma. A ver si dalgún día vamos allugando esi ramu que nos anuncia la folixa y la candonga en dalguna de les munches andeches que tenemos entamaes anunciando asina que la finalicemos con éxitu.

Fumata Blanca.

Taben un cardenal qu'andaba de visita per Asturies y un paisanu xubiláu esperando por un tren nuna estación de cercaníes. Llega y monten nél sentándose frente a frente. El cardenal, al ver aquella alma cándida enfrente, siente'l rixu pastoral y entama a da-y la vara al paisanu ensin contemplaciones.

-¿Va usted muy lejos?-

-Yo pósome en Pinzales-

-¿Es usted de allí, quizás?-

-Sí, nacíu, criau y residente en Pinzales. D'ellí de tola vida.-

-Disfrutando de la jubilación, ¿eh?.-

-Mientres se tengan fuerces hai que disfrutar de la vieyera...-

-Lo veo a usted en ropa deportiva. ¿Viene de hacer ejercicio?-

-Dalgo asemeyao, sí.-

-¿De caminar, tal vez?-

-Concretamete de cá Rosario, que tien una fañagüetina que ye la gloria, y con un par d'arrollicones remocícame trenta años polo menos.-

-Ah, viene usted de comer. Desconozco ese plato. ¿Es típico de la zona?.-

-Sí, hom, ye la hostia. Como les amasueles a la marinera. Una cosa asina.-

-¡Ay los placeres terrenales!. Pero todo se acaba en esta vida. Y cuando llegue ese momento, ¿a dónde cree usted que vamos a ir?.-

-Yo polo menos pal cementeriu.-

-¡Pero, hombre!. ¿Acaso no cree usted que hay un más allá?.-

-¡Claro que sí, cómo nun lo voi creyer!. El más allá queda... ¡dempués de pasar Pinzales!-

Cuando'l carbón buscaba puertu.

La historia de la nuestra minería ya industrialización tienen un apartáu que ye la busca de puertu na costa onde colocar los productos.

Concretamente, l'espollete de les esplotaciones de carbón fixo que de bien antiguo se buscare la manera afayadiza d'averar el productu a la costa, en concreto a la ciudá de Xixón. Yá en 1.842 inauguróse la llamada carretera carbonera que diba dende Turiellos en Llangréu a esta ciudá.

El ferrocarril entainó tamién nesta xera. Asina en 1.846 fúndase la compañía del que conocemos como Ferrocarril de Llangréu con un capital mayoritariamente asturianu. El so primer tramu inauguróse nel añu 1.852 y xunía Xixón con Pinzales. Asistió al actu la reina María Cristina de Borbón, de la que cuenten l'anécdota de que s'agachó a ver los raíles y comentó si sedríen de plata polo cares que-y abultaren les obres. Foi la cuarta llinia peninsular. La semeya qu'ilustra esti post ye del cuadru de Pérez Villamil que representa la inauguración d'aquel primer tramu. Posteriormente llegó a Llangréu en 1.854 (estación  de Vega)  y a Llaviana en 1.885.

D'esta miente, el carbón de los xacimientos del la Cuenca'l Nalón y de Siero algamaba salida per vía férrea al puertu xixonés y tamién el tresporte d'otres mercancíes y de pasaxeros. El ferrocarril contribuía asina a comunicar  estos conceyos  cola ciudá de Xixón. Otres llocomotores facíen trayectos llocales adaptaos a sacar el carbón de les mines. Y la historia del ferrocarril  echaba raíces y nome propiu nel nuestru país de la mano de les esplotaciones mineres.

Pero non tolos proyectos foron quien a finalizase. Hubo otru que trató se xunir el conceyu de Samartín del Rei Aurelio tamién cola ciudá de Xixón. Anicióse y fixéronse tramos. Pero, al final, nun acabó de perfacese ya inauguráse y quedó ente dolco y la media manga. Pero, curiosidaes de la historia y del folclor, esti fechu orixinó ún de los cantares de tonada más conocíos güei y que nun ye otru qu'esi qu'entama: "Hai una llinia trazada". Pues sí, escuchándolu conocemos per ónde tendría que pasar, d'inaugurase, aquel tren proyectáu...

Somos un país d'agua y dende cuantisimayá usamos esti elementu como fuerza motriz. Ehí tán los nuestros batanes, los nuestros mazos, los nuestros molinos, los nuestros saltos pa xenerar electricidá. Y tamién hai yá más de sieglu y mediu (que se diz llueu) esi agua fechu vapor movió les primeres llocomotores qu'acarretaron el nuestru carbón buscando puertu xixonés. Y, de siguío, otres mercancíes y pasaxeros. Y, al final, tuvimos llinia... y cantar.

Tizando la cocina.

Nun me tocó a min escalecer cabo un llar. Nel mio casu soi de los que nos tocó facelo al llau d'una cocina de carbón, d'aquelles de fierro. Unes cocines que se podíen tizar con lleña o carbón y que por ser esti caberu abondosu n'Asturies conócense ente nós con esti nome. Y, anque fale d'un  tiempu pa min pasáu, que tovía perviven na actualidá.

Tou un artiluxu onde podía cocinase buscando distintes temperatures colocando les potes en determinaos sitios de la chapa. Con un fornu p'asar. Tamién con un calderín pa poder tener agua caliente.

Si taba prendida y dibes salir un tiempu de casa anubríase'l fueu  pa qu'aguantaren les áscuares hasta que llegabes, amatagábase que se dicía tamién. Y taben, d'otru llau,  aquelles bolses d'arena cola que se fregaba la chapa. Ya'l  ganchu pa tizala y manexar la tapa y los aros que l'arrodiaben... ¡Y pa ponelu'n caldia y pasalu penriba'l zucre que cubría l'arroz con llechi camudándolu en carambelu!.

Arriendes de les qu'había nes cases de les güeles, na primer casa onde viví de rapacín teníemos una de collor negro, asemeyada a la de la foto (que garré n'internet). Dempués cambiemos de casa y tuvimos otra, un modelu más modernu y qu'avanzaba per ú diba la modernidá cocinera. El frente yera blacu y yera mista, de carbón y gas, pues a un llau yá venía con dos quemadores pa esti combustible. Asina que xunto a l'aprovisionamientu de carbón teníemos tamién les correspondientes bombones de butanu.

Taba tamién el tema del vale de carbón. Recuerdo los encargaos d'acarretátelo a casa con carros tiraos por caballos y un sacu capiellu pa cubrir cabeza y llombu mientres cargaben y descargaben los sacos. Y cuando yá te desfacíes de les vieyes cocines la venta del vale pa sacar unes perruques. Dempués yá entainó'l mundu'l motor y con él  les furgonetes pa llevalo. Claro qu'estes cocines nun ta desaniciaes dafechu y enagora hai xente que les tien en casa y usa, magar entamen a ser una reliquia del pasáu pa muchos de nosotros yá. Porque, si bien ye cierto que nos cascos urbanos de les nuestres ciudaes y villes yá escaseen abondo, notres zones como les rurales siguen faciendo un bon serviciu y económicu, viendo cómo anden anguaño los precios de la electricida ya'l gas.

De toles maneres, los tiempos truxeron los sos cambios como davezu asocede. Y les cocines de gas, d'electricidá y les más actuales de vitrocerámica foron apoderando y sustituyendo a les vieyes de lleña o carbón. Ya'l microondes, que tamién hai xente que se-y entama cocinar nél. Claro que, pa la xente a la que-y presta siguir tizando, tovía hai marques que siguen fabricando y comercializando cocines pa lleña o carbón y hai tamién ufiertes de venta pola mor de xente que se desfái de la que tenía en casa.

Actualmente considérase les cocines modernes son más ecolóxiques porque yá nun contaminen con fumu. Tamién ta claro que son más rápides pa remanar y pa tresnar nelles la comida. Pero, al dicir de guisanderes con oficiu, el sabor d'un potaxe iguáu nuna cocina de carbón -o nun llar el que-y vague ponese a ello- sigue siendo superior al que se consigue preparándolu nes actuales. Nun m'estraña. Porque la comida fecha nos vieyos llares y nes sos sucesores les cocines de carbón tien que dexar, de xuro, esi gustu especial de la ellaboración sele y con procuru que remanez de los vieyos fogones.