Llévase
esto de ver la vida en blanco o negro. Comigo o contra min. O de los
nuestros o enemigu. Guañen los integrismos como cogordes. Ayuri. Per
uquiera que vayas.
Nun me val esmucime d'un xugu pa que me xunzan
a otru. Axuntame a los que critiquen maneres totalitaries y darréu
muestren les mesmes zunes que critiquen. Y d'esto ta estrao. Atópeslo a
cada pasu.
Según lo averada que tea a la nuestra ideoloxía a un
determináu tema refugámoslu o alcagüetámoslu o simplemente apoyámoslu.
El mesmu aquello ta bien o mal non en función del análisis sinceru que
faigamos d'él, sinón de lo cerca que tea de la nuestra relixón
ideolóxica irrenunciable.
Son too catecismos, normes sagraes,
llinies trazaes, dogmes d'obligáu cumplimientu. Pero güeyu: en tolos
ámbitos empecipiando polos que consideramos nuestros. Nun tamos pa tirar
la primer piedra en nada. Nun convién que cuspamos mui alto alardeando
de la nuestra integridá y coherencia porque la gaxapada pue aterrizar
metanos la nuestra frente.
Toos somos inxustos, tremendamente
inxustos a favor de lo nuestro y gafos colo ayeno. Dannos noxu munches
coses qu'observamos, pero quiciabes nos lu diéremos nosotros mesmos si
nos miráremos con muncha humildá y enorme severidá nel espeyu.
De
xugu en xugu, de dogma en dogma, de fe en fe, convirtiendo en xusto pa
nosotros lo que denunciábemos por inxusto nos demás diremos a dalgún
sitiu, pero nun paga la pena marafundiar l'esfuerzu nello.
P'acabar
en destinos ximielgos a los que refugamos, meyor nun garrar nengún tren que nos lleve a visiones zarraes, dogmátiques, santificaes y escluyentes de la sociedá, y caminar sele guiándonos pola arrogancia, el diálogu yla busca d'una sociedá xusta y plural, que ye l'unicu camín que nos pue averar a esi finxu'l cielu siempre utópicu que llamamos llibertá.
Nos primeros
años del sistema políticu qu'emprimaba intentó axeitase un movimientu nuevu
n'Asturies. Quería preservase del desaniciu la llingua y la identidá cultural
d'esti pueblu y demandábase pa ello la erbía política estatutaria que notros llaos del estáu esixíen. Abondo ceo
entamó a desvirtuase lo que se quería construir. Los procedimientos emplegaos
fueron varios. De la zanahoria de la subvención a la invitación a participar en
proyectos ayenos. De la demonización al ostracismu. Del paternalismu al duernu. Y los cantos de serena, palos, duernos
y zanahories llograron el so oxetivu y empobinóse per otru camín. Anguaño too
paecía acabao. Y, casi de sutrucu, remaneció lo que taba amortigañao y
asemeyaba qu'enxamás yá diba alitar. Oxáronse los güercos de la quintana asturianista y surdió un nuevu intentu de llanzar un mensaxe nuevu metanes una ambozada de discursos alcanforaos. Perdióse'l mieu a reivindicar la territorialidá, la historia, la cuna de la nación, los símbolos del
país ensin castraciones nin añadidures. Y rescampló otra vuelta, polo menos en parte, lo plantegao
diba cuantayá nos anicios. Les voces
reclamando la pervivencia de la identidá asturiana y del autogobiernu d'esta
vieya nación milenaria vuelven a sentise. De mano un ruxerrux namás. Según avanza'l tiempu un discursu claru que va, pali que pali, amestando antipatíes y simpatíes, como nun podía ser d'otra miente. El
nacionalismu democráticu asturianu, non sectariu, abiertu, plural ya integrador
esiste. Nun podemos falar enagora de movimientu social, pues escurque sedría desaxerar ensin necesidá. Magar, como escribí ayuri nesta bitácora, sí qu'hai base social p'afitalu si se trabaya dende'l respetu y el xacíu. Pero tamién hai cada vez más xente que creemos nuna propuesta arrogante ya integradora p'Asturies y que la
difundimos. Y onde contaben
que munchayá taba too controlao y mardomao empecipien a preocupase. Entainen a bilordiar y a llanzar los sos carrobexos y anzuelos como tiempu atrás. Pero, nel fondu,
persaben qu'esta vegada nun van llograr los sos oxetivos. Sabemos lo que queremos y lo que plantegamos. Un proyectu nacional pa tolos asturianos y asturianes que quieran sumase a él ensin esclusiones. Puxar pol llogru d'otra sociedá estremada dafechu a la qu'actualmete nos afuega. Allugar nel nuestru país un aténticu estáu democrátcu y de derechu que sustituya a esta ximuestra u naufragamos na actualidá. Persabemos tamién ónde s'alluga la podrén que ta aforuñando esta tierra. El réxime
corruptu y clientelar y los sos coros de voces títeres de los aruelos oficiales o
marxinales. Nunca nun fui partidariu de dar feches de defunción. Pero nesti casu faigo una escepción. Cuento que si d'esta nun somos a enxaretar esi nacionalismu democráticu y plural al que me refería enantes, la situación asturiana ye tán pergrave y ta tán abirugada pol desaniciu qu'intentalo a la vuelta d'uños años nun va ser posible yá. Pa entós sedremos, seique, una simple provincia castellana más que mira al Cantábricu. Notres pallabres, creo que tamos ante l'últimu intentu dempués de perder trenta años valiosos caminando al aldu y al debalu. Gritar alto y
claro "Identidá y Autogobiernu" siempre mancó y sigue mancando muncho per ende. Sobre too nes cugurutes del poder d'ideoloxía fuertemente uniformista preconstitucional amazcaráu de xenerosidá y convencimientu democráticos que nos gobiernen. D'otru llau, utilizar
discursos y simboloxíes claramente afitaos nel país taraza les conciencies apecigañaes nes espiriques política y socialmente
correctes y a la postre ineficaces que combayen colos anteriores. Y entós de la rocea inicial pasen al mieu. Y nótase-yos, como se-yos notó nel so día y tamién hoi, preocupación cuando arrecienden dalguna propuesta política que, ensin refugar un res l'esmolecimientu polos temas sociales, apruz anclada fuertemente no identitario. Nun ye casualidá que siempre amosaren un engrifamientu especial contra esti tipu de propuestes. Ven nelles una alternativa que d'espoxigar sí podría valtar el so entramáu de vividores qu'escosen la cazumbre d'esta nación que talo paez chupada pola guaxa. Lo que nun molesta nun se
tien en cuenta nin s'ataca. Lo que sí lo fai provoca reacciones gafes. Poro,
vamos pel bon camín. Si lladren, cabalgamos. Convién más que nunca ser conscientes del estáu casi que terminal de la nuestra patria asturiana, enfotase nel intentu y nun aflacar.
Delles veces enguedeyámonos tratando d'argumentar y racionalizar el por qué de la nuestra querencia hacia lo ermuno asturiano. Y esguedeyámonos en convencer, dayures, de la necesidá de puxar pola so pervivencia y xixa. Evidentemente, espiricar serio y con xacíu puen llevar a fomentar una opinión valoratible y tamién enveredar a postures de querencia sobre temes culturales y llingüísticos nuestros. Pero escurque, no fondero, seya necesario dar col nial de los sentimientos y emociones de caún como pasu previu al convencimientu. Dicía Pascal que'l corazón tien razones que la razón desconoz. Y, a lo meyor, hai qu'escarabicar ehí p'atopar el biltu de dalgunos comportamientos y actitúes. Porque nesti país nuestru hai xente que se respiga ante la presencia d'un sidru, escuchando una tonada, enxareyaos na danza o adicando Santa María del Naranco, por esbillar dalgunos exemplos de botavolén. Pero tamién lo hai que-yos resulten asuntos irrelevantes o que los refugen con despreciu. Seique, la piedra filosofal del asuntu pudiere tar, guapamente, n'atopar esa clave que fixere que la xente asturiano deprendiere a escuchar les razones del so corazu. Pudieren tar llatiendo adulces, callandino, nun requexín del ser de caún de nós. Pero los prexuicios, la inculcación del autoodiu, el tapecimientu vergonzante de lo nuestro y una aculturación gafa, ente otres milenta razones, pudieren producir que munchos de los nuestros conciudadanos nun fueren a escuchar esi llatir y con ello'l so corazón y razón empobinaren per caminos dixebraos. Pa los que tenemos esa querencia pa colo nuestro, resúltamos perdifícil de comprender cómo pue haber persones qu'arrenieguen de la cuna u los añaron, que refuguen los cancios qu'escucharon en chigre de neños, que sientan noxu pola fala qu'ellos mesmos siguen enagora usando más o menos amestada. Miániques, qué bono sedría que fuéremos pa dar con esa clave que mencionaba enantes y que llográremos que tolos fíos y fíes d'esta tierra fueren quien a escuchar les razones amatagaes que, bien de veces, de xuro que-yos xuxuria ayuri olvidáu nel sobráu de les emociones sele y solu'lcorazón.