domingo, 29 de diciembre de 2013

Yá aprucen los mazcaritos.

Otru añu más torna la xermandía de les mazcaraes ivernales.

Na nuestra cultura, el tiempu de los mazcaritos aníciase cuando da les boquiaes l'añu vieyu y entama'l nuevu y non sólo ye ferial del antroxu de Febreru.

Tamos somorguiaos entós na época del añu onde se pidi l'aguilandu, onde se faen representaciones y moxigangues. Y cuando percuerren dayures pel país personaxes amazcaraos.

Son rellumos, resclavos, d'una cultura ancestral qu'inda alita. El Guirria ponguetu colos aguilanderos a caballu. Os reises de Tormaleo o El Valledor, l'aguilandu de Xedré,  Los Guirrios y la Comedia en Valdesoto...

Sedría una mui bona noticia y un fechu perinteresante que, col pasu'l tiempu, fueren recuperándose bien de mazcaraes y vezos venceyaos a esta dómina que güe, llastimosamente, pigacen nel olvidu. Pero ello lleva xera abondo por aciu del uniformismu y sustitución cultural que nos embarbien dende cuantayá.

Porque toes estes manifestaciones formen una parte bramente importante de la nuestra cultura. Representa  la nuestra manera tradicional de cambiar d'añu. Una guaña de vieyes costumes que per munches xeneraciones remanecieron pel iviernu. Raigaños fondos qu'en dalgunos llugares de la nuestra tierra enagora perviven y siguen apruciendo na actualidá.


viernes, 20 de diciembre de 2013

El Fervinchu.

La cocina bien tizada. Enriba la chapa, pela nueche y antes d'achucase, la pota ferviendo agua pa facer fervinchu. Manzaniella, tila...

Una alcordanza de les más vieyes que teo de rapacín. Mio güela faciendo fervinchu. Y ye que l'aquello de los floritos pesllaba toa una sabencia tradicional. Porque antaño les tribes botániques del llugar beneficioses pa la salú conocíense, coyíense y usábense. Unes vegaes pa ferviatos. Otres vegaes tamién pa cuando andabes escalabráu, como la cirigüeña o'l peu llobu. Y con esi complementu tan tradicional pa curar gorruñeres como ye la miel.  

Tamién recuerdo tar dayures con xente que tovía conservaba, polo menos en parte, esa cultura ancestral y enseñame tal o cual planta o árbol afadizos pa los fervichos, los requemaos o les aplicaciones en mancadures. Nun ye un bagaxe perdíu dafechu na cultura de tresmisión oral, pero camín lleva dello.

Y ye que tamién, como tantes otres coses ermunes nuestres, too ello va sumiéndose pali que pali. Urbanites que somos, o non tan urbanites, pero colos vieyos conocimientos escaecíos abondo, esta cultura de saber reconocer les plantes y árboles melecinables del nuestru entornu natural yá esbarrumba y esmuzse de los nuestros vezos.


Bien ye cierto qu'actualmente tenemos otros medios p'averanos y afondar nella. Nun escaseen informaciones, mesmamente na rede d'internet, publicaciones, etc. onde podemos atopar datos de les plantes y floritos con propiedaes beneficioses pa la nuestra salú con santos ilustrativos, vidios, etc., incluyendo un sector dedicáu a la comercialización o el tratamientu con ellos onde podemos buscar conseyu pa solliviar los nuestros alifaces.

Claro que, como caún tien les sos caunaes y yo les míes, eso de dir caminando per ende al llau d'una persona que tovía conserva'l conocimientu de los usos de les plantes de la nuestra contorna y que te les vaya amosando y esplicando pa qué valen y cómo s'usen, sigue teniendo pa min -reconozo qu'escurque por cuestiones de señaldá más que nada- un aquello especial.

Y ye qu'hai vezos saludables y afayadizos que resulten bien prestosos de repitir tovía anguaño. Como, por exemplu, agora qu'entama a aprucir el tiempu fríu, facer pela nueche un bon fervinchín caliente, metese na cama, enropiellase bien y ¡uxa!.

martes, 3 de diciembre de 2013

Arrea, carreteru.

"Arrea, carreteru", asina entama una de les nuestres tonaes más llíriques.Un cantar de carreteru (magar nesti casu fale de machos empara bues, quiciabes por influencia na lletra de l'arriería forastera), d'echar pel camín mientres se guía a la pareya que tira pel carru, cola guiada al costazu. Guiar, afalar, acarretar.

Somos país d'utilizar los bues como animales de tiru. Notros llaos son más del caballu, pero equí usámoslu más pa montar y desplazanos nél. Pero p'acarretar, armentíos y carru. Con tola parafernalia del xuncir, qu'equí llamamos lloriame: mullíes, cornales, sobéu, melenes, mosqueres... 

La estampa de los bues xuncíos al carru, el rinchón antiguu o el más modernu de rayos ye maxestuosa. Repítese en semeyes mileta vegaes y otres tantes a la xente présta-y pola vida veles. 

Ente otros llabores, fuimos país de carreteros. Cola guiada delantre de la pareya gritándo-yos "tira" y "guo" pa echala p'alantre o facela parar. Una pallabra, esta cabera, que pasó al nuestru acervu musical p'animar a los cantantes qu'echen ciertu tipu de tonada.

Porque allá, cuando daquién empobina pal olimpu de los vieyos dioses ástures, pue sentir enagora'l rinchar de los carros y el gargoliar d'una recia tonada de carreteru. Porque ellí los carreteros son los encargaos de llevá la povisa rellumante qu'ornia'l cielu d'estrelles al cayé la nueche.

jueves, 28 de noviembre de 2013

La cultura del vinu n'Asturies

El cultivu de les vides tuvo estendíu nel pasáu n'abondos llugares del territoriu asturianu. Mesmo la toponimia danos noticia d'ello con nomes como viña, viñas/es, viñuela, viñal, viñaleru... Tamién tenemos nel nuestru lésicu'l verbu viñar que significa anguaño prender y espoxigar. 

Figuren estos cultivos en documentos medievales de donaciones y tamién sobre les viñes recayía l'impuestu del quiñón a pagar a la ilesia o particulares. Nel sieglu XVIII cultivábense viñes en Les Regueres y nel XIX tenemos noticies d'esti cultivu na zona del Naranco. Una de les tradiciones afitaes nes sociedaes de festeyos a lo llargo del tiempu, y de la que yá tenemos noticia na fiesta d'aniciu medieval de La Balesquida, ye la del repartu ente los socios del bollu de pan y de la botella vinu.

Pero la plaga de filoxera qu'asoló les viñes europees en 1.895 desanició estes plantaciones en bona parte del nuestru territoriu y yá nun volvieron a espolletar, sacantes la parte más occidental del país onde pervivieron hasta l'actualidá.

Tocántenes a los recipientes pa tomalo tenemos ún tradicional que llegó hasta estes dómines nel suroccidente asturianu que ye'l cachu, un cacíu de madera onde pues beber sólu o apurriéndolu dientro d'un grupu bebedores (el santu d'esta entrada muestra ún). Hasta nun va tanto en chigres y tabiernes pedíense "pintes" y "caciples" que servíen nunos vasos asemeyaos a los de sidra, pero más curtios y con una señal nel cristal qu'indicaba hasta ú diba la pinta (aprosimao a lo que güe nos sirven al pidir un vinu) y la cacipla que yá yera una vasicada mayor. Tamién el típicu porru grande pa compartir o pequeñu y individual que tovía pue vese en bien de sitios. Pal trabayu y les fiestes llevábase (y llévense) les botes, que llegó a haber artesanos que les fabricaron na nuestra tierra.

Pero, arriendes de consumidores, tamién somos nesta dómina productores. Ye nesa zona suroccidental del país enantes mencionada onde s'alluga la nuestra producción vitícola, de tinto y blanco, y con variedaes de cepes autóctones y denominación d'orixe. Una producción que nos últimos años vien ameyorando en cantidá y calidá hasta llegar a consiguir premios internacionales pa los nuestros caldos. Unos vinos cada vez más conocíos ente nós y fuera de les nuestres llendes y que yá podemos atopar en dalgunes tiendes y supermercaos. Anque tamién ye cierto que tovía ye revesoso atopalos nes ufiertes de vinos de la nuestra hostelería.

Claro que, a lo meyor, de la mesma manera que tenemos bien afitáu'l sector sidreru a lo llargo del país, igual llega'l día en que s'esparda'l consumu del vinu de nuestro d'una manera más xeneralizada y podamos pidir cachos, pintes, caciples, porros y enllenar botes con él, arriendes de velu nes botelles qu'acompañen a los bollos (que si son d'escanda estupendo) qu'apurren les sociedaes de festeyos. ¿Pura ficción?. Pues igual non. Lo que si sedría, de xuro, ye bien prestoso y un claru niciu de qu'empobinamos pel camín de potenciá lo nuestro.

miércoles, 20 de noviembre de 2013

L'obispu que curiaba de los finxos.

Cuenten que, cuando daquién mueve los finxos d'una propiedá, en morriendo vese obligáu a arrecostinalos xuníu a la güestia hasta que los repón nel so llugar.

Ello foi que nel primer terciu del sieglu XII fixérase cargu de la diócesis eclesiástica uvieína l'obispu Pelayu. Daquella diba abenayá qu'Asturies reculaba en poder políticu y eclesiásticu pola mor del treslláu hacia'l sur de la corte y la pérdida del poder real.

Ello fixo que l'obispu asturianu la entamare cola igua d'un cartulariu, en tiempos del rei Alfonsu VI, col envís potenciá la sede uvieína, onde quedare reflexada la importancia histórica de la so diócesis y los privilexos y donaciones que l'acompañaben. L'encargu d'atropar y tresnar esi trabayu dio-ylu a un copista y iluminador de códices tocayu suyu que se punxo a la xera.

Pero, dempués de morrer el rei d'Alfonsu VI, fíxose cargu de la diócesis toledana l'arzobispu Bernardu de Cluny y la cosa enrevesóse abondo, pues esti cabezaleru eclesiásticu encerriscóse en mové los finxos de los dominios del  obispu asturianu intentando que la diócesis asturiana fuere, como si dixéramos, un apéndiz de la de so. Asina que'l códiz yera un conxuntu documental perimportante pa retrucá les pretensiones ayenes que peñeraben sobre ella.

Al final pintaron bien les coses pa Pelayu qu'algamó l'oxetivu de preservá les llendes y los privilexos de la so sede y interrumpió de sópetu la igua del trabayu porque camentó que yá nun facía falta enxareya-y más cartafueyos. De rebote, llibró tamién d'acarretar al tal Cluny, como ánima de la güestia, los finxos qu'intentara mover . Y equí paz y dempués gloria.

Pero, por esos picos rabucos que da la historia, a aquel códiz escritu en lletra visigótica (la propia del norte peninsular naquelles dómines) con capitulares historiaes, viñetes y miñatures, consideráronlu munchos sieglos dempués los qu'esturnien la cabeza con estes coses, como ún de los meyores del sieglu XII y güe forma parte del tesoru del nuestru patrimoniu material: el Liber Testamentorum.

Y ye que naquel entós sí había n'Asturies xente que s'enfotaba pa defendé les llendes propies. Por cierto, nesi mesmu sieglu foi cuando se dieron los intentos secesionistes de Gonzalo Peláez y Urraca l'Asturiana. Pero esto cabero yá son... otros finxos de la nuestra historia.

domingo, 10 de noviembre de 2013

Nicios del pasáu



Nel Pozu’l Ramu hai una cresta estalagmítica con dos cares onde tán representaes dos figures antropomorfes d’un ser femenín y otru masculín nuna escena que se considera sexual y con rasgos nel dibuxu que pudieren ser de bisontes. Notru requexu de la cueva hai un panel llaráu de vulves. A lo llargo de les galeríes aprucen figures d’animales, bisontes, caballos, ciervos, renos… Y too ello formando un monumental santuariu tresnáu a lo llargo de miles d’años.

Tovía na nuestra cultura tecnolóxicamente avanzada perviven tradiciones onde salen mazcaritaos con pelleyes d’animales y averase, tocar o besar a les moces forma parte de la moxiganga. Llevamos una cigua al pescuezu (representación d’una clica) pa oxar el mal del güeyu y nun hai tanto recoyíase pelos pueblos el vezu de que la muyer arremangaba les sayes enseñando la fañagüeta pa espantar al diablu. Domestiquemos animales, pero l’actividá de la caza sigue contando con un númberu bien bultable de llicencies, cotos y practicantes.

Cuando civilizaciones vieyes s’estinguen siempre queda l’aquello de si dalgún llixu d’elles consigue pervivir, como lleváu en pelondines, al traviés del tiempu heredándose poles sucesives civilizaciones que se van superponiendo. Llogren d’esta manera alitar ritos xamánicos perdíos na nueche de los tiempos, anque escurque ensin una conciencia clara polos que los repiten de cuála yera la so antigua utilidá. Les representaciones de les antigües cliques siguen sirviéndonos como protección escontra diaños y agüeyamientos. Sigue entrándonos un aquello cuando nos empozamos nuna viesca y escuchamos acullá un ruxerrux o cuando adivinamos una solombra nel llechu d'un ríu… Porque nós tamién tuvimos les nueses civilizaciones tribales nesta mesma tierra que triamos hoi y nun podemos afirmar que les tenemos desaniciaes dafechu del nuestru subconsciente colectivu.

Vivimos anguaño somorguiaos pente tecnoloxíes de vanguardia. Manifestamos davezu’l nuestru calter de xente evolucionao que mira pa les vieyes sociedaes n’estaos tecnolóxicos primitivos enchipaos na nuestra incuestionable superioridá. Presumimos de llograr  ser quien a superponer la razón penriba los impulsos del corazón. Considerámonos sociedá avanzada técnica y  racionalmente. Pero na nuestra vida individual y colectiva guañen davezu comportamientos que talo paecen cuestionar esi mundu superior nel que nos consideramos asitiaos. Allumen inda en dalgún requexu del nuestru interior caricós de lo que fuimos y d’ú venimos. Y, quiciabes, nun nos vendría mal reconocer qu’a lo meyor nun ye tan grande esa fuérciga que nos dixebra d’eses otres sociedaes tribales que remanecen anguaño ayuri.

Porque, seique, mirándonos nel espeyu de los nuestros comportamientos y, magar los milenios trescurríos, endagora somos a reconocer en nós dellos nicios del pasáu…



viernes, 1 de noviembre de 2013

La llinterna de Jack, la llámpara de Picasso y la Güestia.

Cuenta la lleenda que Jack fuere un home que pactare col diañu nun dir pal infiernu y que cuando morrió tampoco nun lu quixeron en cielu, polo que se vio condergáu a vagar per ende buscando un sitiu onde descansar y allumándose con una llinterna fecha con un nabu güecu con un caricós dientro.

Allá pelos años sesenta del sieglu pasáu'l pintor Picasso fixo un dibuxu onde representaba una llámpara minera aguantada per una mano, simbolizando la lluz qu'allumaba la buelga a siguir que diba dexando la xente de la nuestra minería nel so llabor reivindicativu.

Allugámonos actualmente na segunda década del sieglu XXI y podemos entruganos qué lluz ye la que remanamos los asturianos nestes dómines.

Quciabes haya quien siga creyendo que marcamos y allumamos dalgún camín, non solo a nosotros, sinón a otros pueblos. Los qu'asina piensen equivóquense dafechu. Non. Roturndamente non. Los asturianos, anguaño, nun allumamos sienda dala nin pa nós nin pa naide. Esos son resclavos del pasáu -suponiendo que dacuando fuéremos faru de daqué y pa daquién-, pero non fechos del presente.

Porque lo cierto ye qu'hoi, los naturales d'esta vieya nación que milagrosamente alienda enagora, tamos muncho más cerca de llevar la llinterna de Jack que la llámpara de Picasso. Nun atopamos sitiu nin equí nin allá. Abeyamos al debalu ensin saber bien aú vamos y, lo que ye peor, pa ónde queremos dir. Vivimos n'ayén y alloriaos.

Y ye que, en miániques, mientres fai galanes esti añu nuevu siguiendo la cronoloxía del samhain recién celebráu, hemos reconocer con humildá que somos, colectivamente, una Güestia Nacional penitenciando pente'l mundu de les naciones vives, moviéndonos al aldu, arrecostinando colos finxos qu'un día arrinquemos del nuestru camín colectivu y condergaos a reponelos entamando a sestaferialu otra vuelta, si realmente queremos empobinar pa dayures, o a suminos, definitivamente, nel llimbu de la historia.

miércoles, 16 de octubre de 2013

Del imprescindible cambiu de mentalidá n'Asturies.

Una anécdota. Andaba yo abeyando per un mercáu y averéme a un puestu de quesu asturiano. Una moza ventiañera atendióme. Tuvi charrando con ella y contóme que'l quesu facíalu la güela y que yera un puestu familiar. Entrugué-y qué quesu me recomendaba (más curao, menos...) y quedé claváu. Díxome que nun podía facelo porque a ella esi quesu nun-y gustaba. Una estratexa de venta en miániques revolucionaria. Díces-y al cliente que lo que vendes nun te gusta nin a ti.

Otra anécdota. Empobino pela seronda camín del monte a la gueta. Crúzome con un paisanu y echamos una parrafada. Cuando-y digo aú voi señálame un castañéu que diz que ye suyu pa que pañe tolo que quiera porque él nun se molesta en guetar. Pregúnto-y si nun-y gusten les castañes y dizme que sí, pero que cuando-y entra'l rixu por elles va pal supermercáu y cómprales. Nesi super les castañes suelen ser bercianes o estremeñes. Nun lo entiendo. Tienes castañes tuyes apodreciendo a cien metros de casa y vas comprales a un quilómetru y, pa detrás, de fuera.

Lo anterior pudieren paecer simples casos aisllaos ensin más. Pero non. Son la punta d'un iceberg fondu y muestren unos comportamientos perafitaos pente los asturianos d'hoi. El refugu de lo propio o , simplemente, l'abandonu, y l'arranar polo ayeno. El tar tán n'ayén que nin siquiera nos decatamos que tamos tirando piedres escontra'l nuestru teyáu y perxudicando la nuestra propia economia, mesmo la que tenemos de puertes de casa p'adientro.

Y casos pa seguir enriestrando tenemos abondos. Nestes feches anden pela vendimia per tierres de Cangas del Narcea. El sector vitícola nesti conceyu espoxigó bien nos años postreros. Ameyoró en cantidá y calidá. Hasta tenemos anuncies de premios algamaos en certámenes internacionales polos caldos cangueses. Pero si-y entrugamos a un asturianu pol vinu la zona, ¿qué te contesta?. Pues mui corriente ye sentir qu'aquello ye pistraca, poco bebible y recomendable y que, si quies beber vinu, que busques no de fuera que ye lo bono. Y de la sidra, magar pueda paecer que ta notra situación, meyor andar col güeyu argutu. Ehí tenemos l'avance enorme de lo vasco mientres equí tenemos la última moda de tratar d'impedir l'escanciáu nes terraces. Venga, a poner torgues. Nun m'estrañaría un res que, de siguir per esta espiral absurda, cualquier día nos chigres y sidreríes nos anuncien en cartelonos bien grandes la sidra de los vecinos o cualquier otra d'ayuri mientres la nuestra empecipia a recular irremediablemente.

Delles vegaes pienso qu'una de les causes de tantu despropósitu ye una mentalidá heredada de cuando, apocayá, yera l'Estáu'l principal empresariu del nuestru país. Escurro que, quiciabes, haya tovía xente pensando qu'esi Estáu va venir a reabrir mines otra vegada, o a potenciar los puestos de trabayu de l'actual siderurxa, o a ponenos un tingláu tipu Eurovegas que nos va facer refalfiar de tantu trabayu como se va aniciar equí. Y, claro, tolo que seya construir dende abaxo, con redes propies y de manera ayena a esa estructura vese con rocea, ensin enfotu dalu y como maneres de perder el tiempu. Pero'l resultáu ehí lu tenemos. Cada día a menos y peor. Pero bastante personal inda anecia y sólo-yos val lo que venga de la iniciativa de Papá Estáu y el so maná salvador. 

Pero esa, por doliosa y tarrecible que nos resulte, ye la realidá nuestra del día a día. El vivir fuera bolos, n'ayén, nuna alienación de tala magnitú que nun somos a ver nin a reaccionar ante lo que nos ta pasando delantre les mesmísimes narices. Poro, una de les condiciones previes pa poder dir a dalgún llugar de futuru colectivu ye un cambiu pernecesariu, urxente y vital de la nuestra mentalidá. Un cambiu revesosu y dificilísimu de llograr, porque camudar los vezos, los pensamientos fosilizaos y les actitúes ye un camín pindiu a embute. Pero ye l'únicu que nos queda por sestaferiar y con posibilidaes de dir saliendo del enguedeyu actual. Pero, entrín y non,  per agora nun nos queda otra que reconocer que los asturianos siguimos tando en Babia... y comprando castañes. Ye lo qu'hai.

jueves, 3 de octubre de 2013

Félix Agelaci y los normandos.

La historia medieval ta llarada d'amistances y enfrentamientos, d'aliances y contraaliances, d'intereses de poder de toa mena. Reinos amigos que pasen a ser enemigos. Guerres internes pol poder (Nepociano y Ramiro I n'Asturies, por exemplu). Too perlloñe de visiones patrioteres interesoses de reconquistes n'amor y compaña y nacionalismos españoles xustificaos en cunes cuadonguistes.

Escribía apocayá de la importancia de la mar atlántica na formación de la nuestra identidá. Hoi voi deteneme nun personaxe históricu escaecíu prácticamente pa tol mundu, incluíu'l de los más amorosaos colo llariego. El del  noble gozoniegu -o ellí allugen los sos dominios los historiadores- Félix Agelaci. Nesti personaxe amiéstense dos característiques. Una la de ser escurque'l primer noble del que se tien noticia de remontase contra'l poder que remanaba Asturies dempués de que finare'l so reinu. Otra la de les relaciones marítimes del mesmu, concretamente colos pueblos normandos.

De les incursiones normandes n'Asturies tenemos anuncia de la llegada a Xixón nel 843 y de la batalla en territoriu gallegu coruñés que llibrare contra ellos el rei Ramiro I. Posteriormente en tiempos d'Ordoño I rechazárenlos otra vuelta tamién en territoriu gallegu. Y anteriormente a dambos hai autores que camienten que llucharon xunto a les tropes d'Alfonso II contra los árabes. 

Tornando al personaxe d'esti post, hai un documentu del añu 1.028 onde'l rei Alfonso V perdona a Félix Agelaci dexándolu regresar del so exiliu a Asturies. Los dominios d'esti noble taben, a lo que paez como apunté enantes, pela zona del actual conceyu de Gozón. Dende ellí remontóse contra'l poder real y, al acabar derrotáu, embarcó colos normandos exiliáu pa les tierres d'ellos. ¿Por qué precisamente colos normandos?. ¿Otra época d'aliances nobiliaries con estos pueblos como dellos suxeren que pasare nes dómines d'Alfonso II?. ¿Sedríen aliaos del noble asturianu na so rebelión contra'l poder real?. Un bon abanicu de preguntes el que se nos abre.

El casu ye que'l primer noble asturianu de que tenemos noticia por que se rebelare contra la realeza foriata, al  que siguen otros a lo llargo de la Edá Media como Gonzalo Peláez o Urraca l'Asturiana, tenía les sos conexones marítimes atlántiques. Con normandos, concretamente. Asina ta afitao documentalmente. Y ye que a poco qu'un escarabique na historia d'esti país nuestru rescampla que ye bien estremada de la oficial que siempre nos contaron y siguen contando...

jueves, 26 de septiembre de 2013

Monster Chef

Queríos televidentes, bienveníos a un nuevu programa de Monster Chef nesta cadena que ye la de toos vosotros, la televisión pantagruélica asturiana, la TPA. Nel programa d'hoi vamos aprendevos a cocinar un pexe que va facer les delicies de tolos comensales. Un pexe autóctonu a más nun poder y endémicu de los nuestros llagos, auténticu rei piscícola d'ellos. Un apabardexu.

Como siempre encamentamos, lo primero de too que tenemos que facer ye consiguir un productu de la másima calidá. ¿Y qué meyor manera de llogralo que pescar un exemplar nós mesmos?. Pues atendéi pa lo que tenéis que facer pa llevar pa casa un exeplar preciosu d'esti pescao.

Teneis que madrugar abondo ceo pa tar al amanecerín, cuando empecipia a riscar l'alba, cabo'l llagu que más vos preste, pues nestes dómines anden toos estraos d'estos pexes. L'instrumental a llevar ye de lo más cenciello. Un goxu. Namás qu'eso. Dempués procederéis d'esta manera. Arremangáis los pantalones o faldes penrriba les rodíes y lo más cerca de los cadriles que podáis y metéisvos nel llagu. Dempués somorguiáis el goxu nel agua y ponéisvos a xiblar aquel cantar de "Dicen que van a poner/un ferrocarril a Mieres...". L'apabardexu, que ye un pexe boborolo hasta velo y dexalo, va metese él solín nel cestu. Tiráis de sópetu p'arriba ¡y yá ta pescáu!.

Agora vamos a esplicavos como se cocina. Faise nel fornu y al papillote. De mano, claro ta, nada de saca-y les tripes nin quita-y les escames. Sólo ponelu enriba una tabla y solmena-y col cantu les manes unos golpes como si fuéreis caratecas espertos p'ablandalu y puntu. De siguío, echáis-y sal y perexil. Ponéis-y alredor una guarnición de ñuños masacraos y metéislo too al fornu, arroxáu media hora antes, endolcando'l pexe en fueyes de berza o de figal, según les que tengáis más a mano, pa tresná'l papillote. Nada de papel que queda poco llariego. Dempués podéis dedicavos a trebeyar pela casa despreocupaos dafechu hasta que sintáis un tufu curiosu a chamusquina que vos va indicar que l'apabardexu ta nel so puntu. Sacáislu, emplatáis y ¡a la mesa!.

Como podéis comprobar, estimaos amigos del programa, un platu cenciellu de buscar y d'iguar que va facer de naguar, incrédulu y plasmáu, a cualquier comensal qu'invitéis a la vuestra casa. Y p'acabar, adelantavos que pal programa que vien vamos davos una receta escepcional y sabrosísima. Vamos aprendevos a cocinar un revueltu de cordobeyos y gamusinos con guarnicion de chinflos espirriaos. ¡Nun vos lo perder!. ¡Esperámosvos!...

jueves, 19 de septiembre de 2013

Les paxarines de San Matéu.


Estes figurines de fariña, güevu y azafrán viéndense peles fiestes uvieínes dende cuantayá a la puerta la catedral el día San Matéu. Dicen que foi nel sieglu XVII cuando atoparon nun requexu de la catedral unes figures que foron les que dieron aniciu a esta tradición.

El so emplegu más conocíu ye como amuletu pa contra la truena. Yá se sabe'l sincretismu cristianu-paganu qu'endolca les creencies populares. Hasta los curas teníen l'encargu de tocar les campanes pa esconxurar la presencia del nuberu colos sos bastiazos, xarazu, etc. que podíen arruinar la collecha de les families nes caseríes.

Dientro de los nuesos vezos y tradiciones populares afáyense dalgunos que puen paecenos pequeñinos o simples menugancies en comparación con otros que rellumen como más bultables o importantes. Pero pienso que siempre ye prestoso da-yos continuidá a estes costumes independientemente del so rangu na enfilandrada de lo importante. Dende les tradiciones llocales o del conceyu a les d'ámbitu nacional. Dende la puya'l ramu de les nuestres fiestes patronales a les mazcaraes d'iviernu. Dende les espiches y los amagüestos hasta la nuestra bayura músical. Toes elles contribuyen a dibuxar la nuestra alcordanza colectiva y formen parte del lloriame cultural que nos xunce a esta tierra de nós arriquecíu coles nuestres propies aportaciones xeneracionales.

Y de la mesma manera qu'heredemos tou esti llegáu cultural tradicional de los nuestros antepasaos, camiento que tenemos el deber de tresmitilu a los que nos sucedan. Como los horros. Como los castros. Como la llingua...Como'l país.

lunes, 9 de septiembre de 2013

El día dempués.

Imaxino que vien de visita a Asturies un nacionalista d'una nación européa ensin estáu que desea construir un discursu nacional pa la patria de so. Llévenlu a Cuadonga y atópase que naquel llugar diose una batalla nel sieglu VIII que foi l'embrión d'un reinu medieval del que proceden los actuales asturianos. Que la lleenda cristiana fai una intervención mariana y la representación d'esa virxe ta nel llugar y ye la patrona d'esti país. Que na cueva ta'l sepulcru del cabezaleru de la rebelión. Y veo entós al invitáu foriatu sorprendese por esa ayalga histórica de la tierra que visita.

Cuénten-y darréu la historia del reinu naciente y tamién los episodios de rebeldía y los intentos secesionistas posteriores a la desapaición del reinu. Félix Agelaci, Gonzalo Peláez, Urraca l'Asturiana... Llévenlu a la Cámara Santa de la Catedral y enséñen-y les reliquies ellí espuestes. Muéstren-y en concreto la Cruz de la Victoria y cuénten-y la lleenda de que l'alma de roble recubiertu d'oru y pedrería yera, la que llevare'l primer rei-caudiellu. Visita'l panteón de los reis asturianos...

Dempués acérquenlu a ver dalgunos de los monumentos llevantaos en tiempos d'aquel reinu y conocíos hoi como arte asturianu. Tamién lu averen a ver les ruines de dalgún castiellu medieval como'l de Gauzón, el de Tudela... Y l'invitáu empecipia entós a allampiar definitivamente por tener él tou esi bagaxe históricu pa construir el discursu nacional del so país.

Y ye entós cuando'l visitante nacionalista foriatu, nun entiende nada. Nun ye a pescanciar cómo nuna tierra con bayura tala d'historia medieval nun hai construíu enagora un discursu históricu nacionalista qu'esllume a propios estraños. Pero inda más. Nun-y entra na cabeza que xente que se diz nacionalista d'esi sitiu nun sólo refugue construir esi discursu, sinón que puña contra los que lo intenten nun picurrabucu maxistral por construir el mundu al revés. Pues sí, l'invitáu, definitivamente, nun entiende nada de nada y cola pal so país d'orixe plasmáu dafechu.

Pero si-y desplicaren les coses de manera amañosa, nun tendría por qué se plasmar gota. Bastaría con que-y recordaren, con unes poques pincelaes, que'l llugar que visita camina cuantayá pal suicidiu colectivu y pal absurdu. Porque trátase d'Asturies. Y Asturies... ye diferente.

miércoles, 4 de septiembre de 2013

Cantando la soberana...


Dientro'l cancioneru de Torner, arrecueye l'autor un cantar con una lletra qu'entama asina:

¡La Soberana!
La que va pela pedrera
cómo ximielga la saya.
¡La Soberana!
Y si yo fuera con ella
muncho más la ximielgara.

La mio relación con esta tonada ye bien peculiar. Y non poque yo sepa cantala curioso, que vozona tengo, pero la mio entonación ta más averada al glayíu qu'al cantar afechiscu. Nada d'eso. La cuestión va notru sen.

El casu ye que la primer vegada que sentí esta asturianada foi hai abondos años. Nun se trataba de nenguna interpretación en directu, sinón tando repanchingáu nun sofá y per aciu de la radio. Escuchéla na voz d'una muyer y a capela, y recuerdo que me respigué tou.

D'entós p'acá sentila delles veces y el llirismu qu'esnala de los sos melismas siempre fixo qu'acabare de la mesma manera. Respigándome dende les dees a la coroniella. Talo ye asina que llegué al convencimientu que mientres viva esa va ser la reacción que voi tener ante esti cantar asturianu cuando una voz bien templada nel nuestru canciu tradicional la entone.

La última vez que sentí La Soberana foi apocayá por mor d'una cantadora que la echó nun concursu ayuri. Y fincóme pa nun variar como siempre. Claro que d'otramiente ye cierto qu'esi rixu tamién lu siento cuando escucho gargoliar munchos cantares d'esti xéneru musical tán xenuinamente de nuestro. Porque la tonada asturiana, l'asturianada, ye una manifestación musical autóctona que funde los sos raigones no más fondo de la nuestra tierra.

Quiciabes seya cuestión de raigaños musicales llantaos nel subconsciente. D'un tirón llariegu llegáu d'un pasáu que se pierde na borrina del tiempu. De reminiscencies y alcordances agospiaes nel sobráu identitariu de cuando neñu que rescamplen de sópitu al traviés de vieyos sones.

Realmente nun soi a dar cola clave del por qué de la mio reacción ante'l canciu de La Soberana. Y a lo meyor ye babayada andar buscando esplicaciones a lo que quiciabes nun lo tenga dende un puntu vista estrictamente racional.

El casu ye que sentí y siento La Soberana y respígome y identifícome cola cultura musical y l'universu emocional del país que representa.

Y con eso basta y sobra. 




sábado, 31 de agosto de 2013

Vieyos iconos. Dibuxantes y escritores.


La población asturiana ta bien avieyada, como dayuri se repite bien de veces y ye verdá. Nun sé yo hasta qué puntu pue tener eso relación cola pervivencia actual de vieyos, voi llamalos "iconos", anque la pallabra pue que nun seya afayadiza, na alcordanza d'una parte nada despreciable de la nuestra xente.

Siempre me sorprendió'l puxu de dalgunos personaxes nacíos na estaya del cómic cuantayá, enantes del cambiu politicu producíu col final de l'anterior dictadura. Por citar un par de casos, d'un llau ehí tán los personaxes de Telva, Pinón y Pinín usaos  anguaño como recuerdos pa llevar nes tiendes de regalos. Otramiente, muncha xente nun escaeció endagora nos ambientes playos aquél personaxe inolvidable del Gaviotu, que consiguió conquistar dende la mariña toa Asturies, pa llegar a afincase na fala oral como sinónimu de ñarigudu. Yo mesmu conocí a dalgún entrañable "gaviotu" hai tiempu.

El triunfu claru d'esti tipu personaxes na nuestra sociedá d'hai años hasta'l puntu de ser reconocíos tovía hoi por bien de xente, faime entrugame si realmente podemos afirmar qu'al traviés d'ellos se dio nel so tiempu una conexón real con eso que suel llamase "idiosincrasia" aplicada, nesti casu, a los asturianos. Yo namás qu'al traviés de dalgún tipu de conexón, como digo, soi a esplicame que,  col puxu brutal qu'actualmente tenemos de tou tipu de medios de difusión, otros personaxes nun foren p'arrequexar d'afechu a estos que pongo d'exemplu, y eso que munchayá que les sos "aventures" dexaron d'escribise polos sos autores yá fallecíos (Alfonso Iglesias y Rovés).

D'otru llau, tampoco nun dexa de sorprendeme cómo na actualidá siguen teniendo ganchu ente bien de xente que s'avera a les lletres asturianes autores como Pachín de Melás, o Teodoro Cuesta, por dar namás dos nomes. Magar l'actual espoxigue escritu del asturiano, los autores clásicos siguen tando ehí bien de veces, y ello anque en bien de casos (con razón o ensin ella, que yo nun soi espertu nin críticu lliterariu) díxosenos que muncha d'esta xente escribia un "xéneru menor". Como apegadiella a esto tenemos la xixa que tovía conserva'l llamáu teatru costumbrista asturianu. ¿A qué se debe ello nestos tiempos?. ¿Nuevamente hai que se referir a esa "conexón cola idiosincrasia" (reconozo otra vuelta la probable vaguedá del términu) de nuestro?. ¿O quiciabes nesti casu y nel anterior del cómic podamos desplicalo tamién baxo'l puntu de vista de la diglosia y de la creación "artificial" de dellos estereotipos llariegos?.

Yo too esto nun lo tengo claro. Pero como dixi, en dambes faces sigo notando esa pervivencia. Lo que tamién tengo qu'añadir, ye que la prefiero penriba de tanta invasión ayena de personaxes de ficción y hasta de modes lliteraries qu'arranen descaradamente por calcar y esplicar el mundu al traviés de modelos foriatos.

martes, 20 de agosto de 2013

Lluz de lluna.

-¡Rediós, que nesta casa nun se ve gota!. ¡Apúrrime'l candil, Cesário!-

-¡Cá!. ¡D'apurrir candiles nada, Xuaca, que-y queda poca mecha y l'aceite revenío de freír qu'usamos dexa la casa con un fedor a pescaízu rancio qu'hai qu'andar con pinces nes narices...!-

-¿Entós qué quies que faigamos, que zapiquemos y nos escorniemos, ho?-

-Yo nun quiero nada. Lo que tenemos que facer ye fixanos y andar con procuru pa evitar accidentes-

-Pero vamos ver, Cesario del alma, ¿por qué nun prendemos una migayina la lluz, hom?. ¿Tantu gastu ye?-

-Sí ye gastu, ne, sí ye gastu. Y cola xuba de la lluz que nos acaben de llantar en tol llombu tenemos qu'escoyer: o comemos o nos allumamos. ¡Y habrá que-y dar prioridá a la comedera, digo yo...!-

-¡Alabao, alabao!. Y ¿ qué vamos a tar allumándonos cola lluz de la lluna, ho?-

-Pues sí, Xuaca. Estos díes tamos de suerte porque hai lluna llena y ta'l cielu escampláu. Asina que teniendo bien xubíes les persianes podemos aprovechar bien la so lluz y de pasu aforrar-

-¡Ai, mamina, tu vas matame, Cesario!. Y yá que yes tán llistu, ¿pues dicime cómo nos vamos allumar en cambiando la lluna?-

-Pues como soi tán llistu como tu dices, yá lo tengo tamién previsto. En cambiando la lluna, tiramos unes colchonetes na cocina y llevamos unes bacinilles pa facer ellí la vida. Porque nun sé si cayisti na cuenta que delantre la ventana hai una farola del alluntamientu que nos vien de viciu...-

jueves, 1 de agosto de 2013

La nuestra mar.

La nuestra vinculación cola mar vien de vieyo, como nun podía ser d'otra manera por aciu de pertenecer a un país atlánticu. 

Les nuestres relaciones colos pueblos del atlánticu européu tán constataes per sieglos. Unes vegaes comerciales. Otres non tán amistoses. Pero relaciones vía marítima que dexaron constancia na mesma toponimia de nuestro (bretones, balandrán...). Tampocu nun dexa de llamar l'atención que'l nome del primer rei asturianu, Pelayu, tenga un aniciu marín evidente.

Dempués col pasar del tiempu talo paez que fuimos dando'l llombu a esa vecindá atlántica como si más allá del finxu'l cielu qu'observamos dende la costa nun hubiere casi más nada.

Avecemos los nuestros güeyos ya'l nuestru pensamientu a nortiar pa la meseta ya tamién pa lo mediterráneo. La pervieya relación atlántica quedó como apostalgada y podemos escuchar, con tola naturalidá del mudu, a xente nacío na mesma mariña d'esti país considerase mediterráneo.

Lleguemos a un puntu en que lo atlántico figúrasenos como ermuno de lo estranxero y lo peninsular lo xenuino de casa. Ensin cuestionar les clares bases históriques de lo segundo, camiento que, polo menos, esi plantegamientu ye más que discutible. Y pienso que nos tiempos actuales, onde esti Estáu al que pertenecemos cada día esbarrumba un poco más empozáu nunes coordenaes culturales ayenes a nós y con un proyectu políticu "común" qu'apodrenta ente corrupteles, echar la vista al norte pue ser un exerciciu especialmente afayadizu.

Porque los asturianos llevamos tiempu abondu cayendo en barrena d'una manera imparable. Y un de los milenta aspectos d'esa cayida ta en que, ente les pérdides que vamos dexando como buelga llastimosa nesti camín a nenyures, ta la del nuestru norte atlánticu. Sí, tamos perdiendo, si nun lu perdimos yá, el norte. En sentíu metafóricu, cultural y tamién físicu. Escaeciendo esa mar atlántica ensin la que nun ye posible pescanciar correctamente quién somos nin d'ónde venimos. 

 

viernes, 19 de julio de 2013

Pequeñes redes que van faciendo país.

Cuando la xelada y la truena arrecien aneciar n'andar albintestate nun ye práctica afayadiza. Pero ello nun quier dicir que nun tengamos sitiu onde tar, alendar y subsistir.

Movémonos aguaño metanos l'esbarrumbe del modelu de socedá aniciáu cuantayá, cuando les esplotaciones mineres y la siderurxa yeren los dos grandes armentíos que tiraben pela economía del país.

Cola la mocedá, aumenta'l paru y pensar nes posibilidaes de futuru fainos sentir un aforfugu en garüelu. Los peores badagüeyos peñeren nel finxu'l cielu.

Pero hai rellumos. Nortiamos y observamos que daqué sigue rebullendo dayures. Adicamos qu'hai xente que trata de salir alantre nesta tierra, entamando y probando iniciatives nueves.

Unes iniciatives qu'abarquen bien d'estayes. De lo cultural a lo económico. Del sector primariu al de servicios. Hai una serie de persones y colectivos construyendo dende'l país y, al traviés d'ello, faciendo país.

Ello vien a representar como pequeños abellugos onde nos arrimar a escalecer nestos tiempos gafos como  gatos del fornu a la espera d'un futuru afayadizu. Nun son panacea rellumante nin van sustuir darréu al vieyu texíu económicu que ta dando les boquiaes.

Pero son pequeños finxos que nos puen indicar nuevos caminos si, col tiempu, fuéremos quien a llograr que medren enforma. Porque toes eses nueves iniciatives, davezu pequeñes, formen en xunto pequeñes redes que van encontando'l país. Qu'eviten que seya yá, dafechu, un ermu irrecuperable. Un conxuntu de pequeños xacimientos de partida p'avanzar hacia un futuru meyor y más granible.

Poro, apoyar y difundir toos esos garrapiellos d'actividaes qu'aliten ente nós ye una xera fundamental. Sofitar eses redes, faceles que s'afiten y llograr que vayan creciendo pali que pali. 

Les dómines de los grandes proyectos  fuxó y quiciabes nun torne enxamás. Tamos nel tiempu de facer rede partiendo de lo propio. De buscar alternatives poniendo en valor eses iniciatives de toa mena que grupos d'asturianos casi qu'anónimos traten de dir sacando alantre día a día.

Tenemos que nos esforzar por dir derrompiendo caminos nuevos de futuru na nuestra tierra. Comprobamos qu'aquellos sectores económicos qu'apocayá facíen de pegoyos na nuestra comunidá hoi tán cada vez más lloñe de siguir faciéndolo, incluso si llográremos tornar que piesllen dafechu. Que nos fadie reconocelo yá ye otra cuestión. Pero ye la realidá testona que tenemos delantre y la que manda. Toca anovar estayes, apoyar nueves redes, buscar y encontar maneres de facer país...

sábado, 13 de julio de 2013

Del nuestru patrimoniu material y inmaterial.

Milenta vegaes enguedeyámonos en discusiones sobre temes políticos. Debatimos sobre la idea que caún de nós tien d'Asturies, d'alternatives de presente y de futuru... Pero seique un camín onde podríamos sestaferiar bien de xente discrepante notros asuntos fuere'l de puxar por defender, preservar y afitar el nuestru patrimoniu material y inmaterial.

Nesba bitácora, centrada fundamentalmente en temas asturianos, yá traté d'esta cuestión delles vegaes, polo que reconozo que soi repetitivu. Pero camiento que tamién ye cierto y necesario aneciar nestos asuntos porque tolo que seya asoleyalos una y otra vegada ye poco y convién entamala una y otra vuelta con ello.

Somos un país con bayura patrimonial indudable. Arte rupestre, neolíticu, castros, construcciones medievales, escatafinos mineros, industriales... arquitectura y construcciones populares (cases, horros, teitos, pontes, fontes, molinos, batanes)... una guaña musical descomanada... y una llingua o llingües (nun entro na catalogación de lo que se fala ente'l Navia y Eo porque me queda grande). La esbilla podría facese llarga a embute, pero tampoco avaga cansar al llector con una lletanía d'elementos patrimoniales qu'aliten anguaño nel nuestru territoriu.

Y echando una güeyada a esi patrimoniu vemos que bien de veces los calificativos que-y podemos aplicar nun son precisamente falagueros: esbarrumbe, abandonu, llaceria, desdexamientu, despreciu... Porque, mialma, nun somos los asturianos una xente que destaquemos pola defensa enfotada del bagaxe patrimonial qu'acumulemos col pasar de los sieglos.

Pero esi patrimoniu sigue ehí enagora. Y cuando daqué tovía pervive siempre ye posible afitalo y recuperalo. Siempre queda la posibilida de que, trabayando con brenga y amor polo ferial de la tierra, pueda siguir tresmitiéndose a les xeneraciones vinientes. Asina que, como dixi enantes, toles vegaes que s'insista na necesidá d'una concienciación de cada vez más xente de nuestro na defensa d'esi patrimoniu paga la pena intentalo.

Tamos somorguiaos en plenu branu. Una época afayadiza pa movese per dayures y visitar toa una carrapotada de sitios onde inda podemos observar esi patrimoniu asturianu. Pa participar en folixes y actividaes con fondu raigañu astur. Y pa reflexonar fondo persabiendo que depende de la nuestra actitú y enfotu la preservación d'esi tesoru nuestru y de la humanidá del que somos herederos y depositarios.

miércoles, 3 de julio de 2013

Coses normales y esperables.

Cuando posa la bruma y destila un orpín que t'afalaga mientres sientes el ruxerrux de la mar sales de la dimensión de lo cotidiano y entres notra onde notes que t'afayes.

Allalantrón un barcu faenando. Les cais casi vacíes. Les gaviotes chiando. L'ocle, la salmoria, la brisa, los cantiles y la playa. El fortín col cañón. La mariña.

Cuando  circunstancies favoratibles faen  que la rutina empalagosa acabe esñizada, magar seya namás que per un paréntesis breve de tiempu, momentos aparentemente insignificantes puen resultar memorables.

Y asina pue asoceder que, caminando al debalu finxáu d'un llau peles dunes y del otru pelos llamargales, alloñáu de los coches, del xaréu y de la urbe hai coses que tendríen que t'abultar rares, pero que bien pensao puen resultar de lo más normales y esperables.

Como, por exemplu, apoyáu nuna barandiella observar cómo una xaronca camina penriba les nates, ponse mirando pa ti y inflando dos paponos a los llaos de la cabeza entama a croar tan guapamente.

domingo, 23 de junio de 2013

De poner en valor y ufiertar lo propio.

Escuchaba va tiempu yo un programa de radio onde los tertulianos se quexaben porque, al paecer, los datos turísticos asturianos reflexaben cifres menores que los de les demás comunidaes norteñes.

Daquién opinaba que la culpa yera pol turismu etnográficu qu'amosábamos equí y que la nuestra oferta tendría que s'empobinar a modelos tipu Niemeyer.

Lo de que la nuestra alministración apueste pol turismu etnográficu ye una gran verdá. Pola etnografía sureña. Pa muestra, la carrapotada de feries d'abril que sufrumos cada añu y que va n'aumentu. Y de lo ayenu que ta'l famosu centru no que se refier a sopelexar la nuestra cultura hai poques duldes. Y puntualizo que nun refugo una ufierta cultural lo más amplia posible nel nuestru país, pero d'ehí a amatagar, sustituir o apostalgar lo propio va un abismu.

D'otru llau recuerdo tar nuna charla y esposición d'una persona non asturiana que trabaya nel sector vinculáu col turismu cultural qu'encamentaba a los presentes nel sen contrariu al casu anterior. El de potenciar el turismu basáu en mostrar lo propio, lo etnográfico incluío. Por poner un exemplu de fuera de les nuestres fronteres, ehí tenemos el festival de la Mázcara Ibérica de Lisboa qu'axunta miles de persones alrodiu d'un eventu claramente etnográficu y identitariu onde, por cierto, hai representación asturiana (sidros y comedies ente otra más xente). Que los medios de comunicación tan aquello que tenemos nun dean la cobertura afayadiza a estos temas yá ye otru cantar.

Y ello ye que'l país aturianu tien recursos a esgaya pa ofrecer un turismu cultural atractivu. Dende l'arte asturianu a fiestes de fondu raigañu astur, dende rutes onde podemos contemplar molinos, pontes medievales, horros, teitos, casones, etc. a una gastronomía con un tirón fuera de toa dulda. Pero potencialo y divulgalo de manera amañosa yá ye otru tema. Y cuando la política cultural del país envereda hacia la megalomanía y el cosmopalentismu acomplexáu de lo propio, refugando claramente lo autóctono, ye de lo más normal que nun avancemos y que nos coma les sopes cualquiera.

Porque ente les mileta asignatures pendientes que tenemos nesti país nuestru ta la d'enfotanos claramente en potenciar lo propio. Necesitamos yá y con urxencia desprendenos d'esi complexu d'inferioridá que nos agarrota y que nos fai naguar por cualquier cosa de fuera, magar seya la mayor pascaxada que parió madre, y ocultar lo propio avergonzándonos d'ello. Tamién hai vegaes que talo paez que siguimos anclaos nuna mentalidá d'hai munchos años, cuando teníamos sectores que daben miles de puestos de trabayu,  y que pensamos que va venir daquién a crear, de golpe y porrazu, miles y miles d'esos puestos polo guapos y simpáticos que somos.

Dicen qu'a la fuerza aforquen. Más nos val, pola cuenta que nos trai, entainar a valorar lo propio y a mentalizanos en dir sofitando nello'l nuestru futuru. Porque sinón vamos pasalo inda peor de lo qu'anguaño yá lo tamos pasando, por difícil que pueda paecenos. Yá sabemos lo que nos alvierte la llei de Murphy...

jueves, 13 de junio de 2013

N'asturiano contra lo asturiano.

De va tiempu p'acá pue observase perende (nes redes sociales, por exemplu) una nueva vuelta de tuerca, un nuevu rizar el rizu nesa xera enfotada que dalgunos tienen de turriar contra lo ferial asturiano.

Lo que fai resfregar los güeyos casi d'incredulidá ye que'l vehículu llingüísticu emplegáu pa ello ye la propia llingua asturiana. Increible, miániques, pero completamente cierto.

Xente qu'escribe n'asturiano pa defender la proliferación de feries d'abril n'Asturies. Pa refugar episodios destacaos de la nuestra historia o pasáu. Pa despreciar el nuestru patrimoniu o cultura. Y hasta, nel mayor de los picurrabucos circenses, p'acusar a la propia llingua na qu'escriben de ser una de les mayores responsables de ciertes llaceries polítiques que cuten a tal o cual formación política.

D'esta miente, camiento que tien que resultar ablucante y desconcertante pa cualquier persona que llea un mensaxe de defensa de dalguna cuestión asturiana comprobar cómo darréu salen otres poniéndolu pingando y allugándose del llau de los que nagüen pol desaniciu de la nuestra identidá utilizando pa ello la llingua del país.

Y qué dicir del capítulu de demonizaciones, descalificaciones y insultos gratuitos qu'estos singulares apóstoles del esbarrumbe asturianu dediquen a quien s'atreva a reclamar cualquier aspectu de la nuestra especificidá identitaria. Pero esto vamos dexalo tar poque merez tratamientu a parte.

El casu ye que tenemos afitada anguaño ente nós una nueva absurdidá qu'indica'l grau d'enfermedá escurque terminal que xiringa a la nuestra identidá diferenciada: usar l'asturiano contra lo asturiano. 

Claro que tendríamos d'entruganos d'ú vien esa "moda" fata postrera. Si ye xente que ta n'ayén simplemente. Si se trata de dalguna estratexa programada, dayuri, pa desactivar cualquier discursu qu'afonde na personalidá astur. Si ye'l preciu que dalgunos pactaron pagar a cambiu d'un platu de llenteyes del poder...

Allá cuando l'anterior réxime acuñóse una frase pa xustificar lo inxustificable que dicía "España es diferente". Paezme que, tristemente, heredémosla nesta tierra y podemos observar que "Asturies ye diferente". Porque, bramente, les coses que pasen equí son, dende'l puntu vista de la negatividá, el despropósitu y el desastre, prácticamente irrepetibles.

jueves, 6 de junio de 2013

El puntu de la bandera.

La imaxe véola repitida milenta vegaes. Hai un acontecimientu de la mena que seya, perende p'acullá, y metanos el xaréu ves un puntu con una bandera asturiana.

Tocántenes al fechu de ximielgar una bandera, choca l'enfotu que dellos ponen en sacala ayuri pel mundu y lo escaso que resulta vela en bien d'acontecimientos dientro casa.

Y si nos asitiamos nun puntu vista más xeneral, una de les coses poles que destacamos los naturales d'esti país ye por asoleyanos fuera y acuruxanos dientro. Hailos que lo llamen grandonismu y miserabilismu respectivamente. Caún que lo califique como quiera.

Pero la dixebra de comportamientos de xente d'esta nación cuando ta fuera y dientro casa rescampla. De la mano d'afuera de les nuestres fronteres xiringamos banderes, tomamos posiciones y dexamos claro quien somos. Y cuando tamos de puertes p'adientro, callamos, consentimos y hasta refugamos lo ermuno nuestro.

Una contradición evidente. El por qué d'ella yá ye otru cantar. Pero cuando'l puntu de la bandera se tresforme nel ciudadanu que defiende, con enfotu y toles consecuencies, esta tierra de nós escurque les coses puen entamar a cambiar daveres.

Y ye que nesta Asturies d'anguaño hai muncha xente nel llugar que s'enchipa arguyosa fuera, pero qu'una vez dientro camuda d'una manera prácticamente irreconocible.


jueves, 30 de mayo de 2013

La guapura de la centaura.

Una de les plantes en peligru d'estinción que tenemos ye la endémica de la cordelera cantábrica conocida como la Centaura de Somiedu. Allúgase n'humedales.

Si-y echamos una güeyada vemos un floritu de tantos y si pasáremos al so llau probablemente nun nos llamare l'atención porque rescamplare la so guapura.

Pero tienla. Y ye la que-y da ser una planta minoritaria, arrinconada, una xoya botánica qu'alita enagora contribuyendo asina a la bayura biolóxica de nuestro.

Y el casu ye que, faciendo un paralelismu notru terrén, escurro que  les cultures y llingües minoritaries tienen tamién una guapura que rescampla. Una guapura que nun se debe a que seyan por sigo mesmes más galanes qu'otres, nin meyores, nin más afechisques. Tampoco nun ye que zapiquen en tolo contrario.

Camiento yo qu'eses cultures y llingües minoritaries, que son una carrapotada d'elles nel nuestru mundu actual y ente les que s'alcuentren les nuestres, son a la so manera xoyes inestimables de cada pueblu que les tien y tamién xoyes y patrimoniu de valor incalculable de tola humanidá. 

A lo llargo de la historia morrieron munches cultures y llingües. Y na actualidá hai una cantidá perimportante d'elles en grave peligru de desaniciu. Les asturianes tamién. Y toes formen una especie d'axuntanza de centaures guapes polo úniques y por apurrir el so granín d'arena a la riqueza d'esti patrimoniu de la humanidá al que me refería enantes.

Poro, consiguir unes condiciones afayadices pa la so supervivencia presente y la so tresmisión a les xeneraciones futures ye un llabor cimeru ya inescusable p'aquellos pueblos que somos depositarios d'elles y pal conxuntu de les sociedaes y naciones qu'habitamos esti planeta  y ante'l que nun podemos adoptar el posicionamientu fatu de quedar desdexaos o indiferentes.   

jueves, 23 de mayo de 2013

Del 25 de Mayu de 1.808

Dientro de les feches memorables de la historia asturiana rescampla la del llevantamientu del 25 de Mayu de 1.808 escontra la invasión napoleónica.

Naquelles dómines la Xunta Xeneral toma'l mandu de tol territoriu asturianu, declara la guerra al invasor, organiza un exércitu propiu y manda embaxadores a Inglaterra pa solicitar ayuda.

Aquel llevantamientu foi posible por aciu d'una xuntanza de los estamentos sociales asturianos (nobleza, campesináu, gremios d'ofcios...) col enfotu común de defender el país. 

Otru datu a nun escaecer ye que daquella Asturies yera biprovincial. Constaba de les Asturies d'Uviéu y de les Asturies de Santillana, zona esta última onde se celebraron delles batalles.

Tamién daquellos tiempos vien la bandera asturiana, que foi escoyida a propuesta de Xovellanos.

De magar finales de los 70 del sieglu pasáu, colectivos y persones vinieron faciendo alcordanza d'esta fecha. Hubo años que se facía una fiesta na plaza la Catedral, un actu na Sala Capitular y una ofrenda floral. Anguaño yá nun se celebra col puxu d'entós, pero asina y too sigue siendo una fecha presente nel calandariu reivindicativu asturianu.

Sirve tamién pa recordar que les nuestres instituciones d'autogobiernu nun son un inventu o concesión nacíes al calor del actual sistema autonómicu español. Tienen raigaños fondos nel pasáu y antigüedá. Y, allá un día hai más de doscientos años, fueron instituciones d'un pequeñu país que tuvo la decisión y valentía de declara-y la guerra al meyor exércitu del momentu. Que nun ye cosa menor.

jueves, 16 de mayo de 2013

La romería de la Santa Crisis.

"Co la chaqueta terciada/y el civiellu llevantadu/Pericón el de Maruxa/non tien miedu al más pintadu/y piernes llime y costielles/como quien llime morgazu".

Asina entamaba Caveda una de les sos poesíes onde describía una engarradiella nuna romería de les d'antaño.

Y el casu ye que tando yo relleendo estos versos viénome nun refocilu a l'acordanza un paralelismu cola situación que vivimos nestes dómines.

Porque esa romería pa onde empobinemos  gayasperos y gargoliando cancios dempues del franquismu cambió de santa (Democracia por Crisis) y d'entós p'acá nun hai manera d'enxareyar una danza colectiva y de futuru que preste.

Antaño por culpa de Zapaterón el de Pucela, anguaño por Marianón el de Compostela, apruciendo dacuando Xabelón el de Mieres... el casu ye que llevámosles toes en llombu una tres d'otra. 


Porque vivimos arrodiaos per farfantones que nun paren d'echar ronques, gritar ixuxús y solmenar civiellazos a la nuestra economía y a los nuestros derechos de toa mena ensin danos tiempu nin a gorgutar siquiamente.

Y l'asuntu ye qu'esa inmensa mayoría que formamos la xente que participamos na romería de la Santa Crisis nun atopemos enagora manera de safanos de tantu mazcayu que nos tien aforfugaos y faciéndonos la vida imposible. 

Rebullimos, pelámonos la cabeza escurriendo qué facer, buscamos y rebuscamos cómo valtar a tantu abusón, pero nada. Que nun hai manera. 

Y asina andamos, como almes en pena, estrapayaos de tanto llevales un día sí y otru tamién.

¿Hasta cuándo?.

-¿Sabes que vienen perhí afalándonos pa la romería de la Santa Crisis, cho?-
-¡Hai, hom!. ¿Pa llevales otra vuelta, manín?. ¡Yá nun sé si tengo costielles o farrapes por cadarma...!-