domingo, 15 de julio de 2012

Cuestión de pexes.


Xuacu'l Pixuatu ye un vieyu llobu de mar que fai bonu'l dichu de que sabe más el diablu por vieyu que por diablu.

Yo avezo cuantayá a practicar un deporte que bauticé como espigoning. De la mesma manera que me presta caleyar pela viesca, tamién esfruto caminando pela mariña y pelos cais de los nuestros puertos. Nuna d'estes caminates conocí a Xuacu ya'l so saber adeprendíu pola esperiencia, los erros y los aciertos atropaos al traviés de los años.

La última vegada que lu vi, andaba yo remolíu tratando de desenguedeyar los mecanismos polos que se mueven les sociedaes y el mesmu mundu. Lleí filósofos, pescudé nes coraes de los llibros escritos pola xente más sesudo, reflexoné fondo y nunca fui pa esmucime de les duldes que m'enartaron.

Tando una tardi dando la parpayuela con Xuacu espúnxi-y toles mios esmoliciones y la mio impotencia pa ser a da-yos una esplicación a los socedíos que dende los más vieyos tiempos mueven esti mundu dirixíu polos humanos. Y entós llargóme esta reflexón cenciella y básica que tovía güei recuerdo cuando aquel atapecer falábemos asomaos nos cantiles nun llugar de les nuestres costes.

-Xanu, lus puablus nacin ya muarrin. La xanti pasa calamidadis ya emigra. Entámansi guerras que deixan muartus ya penas, ya que a la postri nun iguan nada. Dempuás de milenius, de civilizacionis, d'abondas llacerias ya mui poucas allegrías, entovía nun fuimus a cambiar el motor que muavi al mundu: siampri el peix grande comi al pequeñu-.

-¿Y qué propones, Xuacu -entrugué-y yo atentu a la so espirica-, que tolos pexes pequeños puxemos por axuntanos y papar los pexes grandes, ho?-. Si fixéremos asina, a lo meyor yéremos pa valtar esa enfilandrada interminable de les desigualdaes y les inxusticies...-

-¡Ai, Xanín del alma! -respondióme él arrascando'l cazu con un xestu ente escépticu y pensatible-, you nun sei respondeti a lu que mi entrugas. Esu yá ya una cuastión de lus peixis pequeñus...-