Quiciabes nun esperáremos la dicisión tan llueu, pero lo cierto ye que la situación política u se llegare tenía una salida perabegosa. Con un parllamentu con mayoría pa refugar les propuestes del gobiernu y l'enfotu demostráu por facelo, con devolución de presupuestos incluida, les salíes que s'albidraben yeren dos.
La primera d'elles, una moción de censura con sustitución del actual gobiernu por otru surdíu d'un alcuerdu ente les fuerces de la oposición. Magar la clara intención de facer piñu contra'l gobiernu forista, el pasu pa sustituilu por otru a comuña ente les citaes fuerces nun paecía nada claro de que tuvieren dispuestes a dalu. D'esta miente y colos precedentes de les dificultaes pa formar gobiernu na Xunta y los problemes surdíos en dellos ayuntamientos la situación d'atascu institucional rescamplaba como'l camín per onde se podía empobinar nos prósimos meses.
La otra solución yera la de disolver el parllamentu y convocar nueves elecciones. Y mui ceo esta foi l'alternativa que nos anunciaba'l presidente. Quiciabes nun la esperáremos tan aína, pero acolumbrábase nel finxu'l cielu como una posibilidá vidable si non se quería perpetuar una situación d'empatonamientu institucional permanente.
Afayámonos asina nuna situación pindia y mui revesosa de resolver. Tenemos ende bien fitu l'antiguu réximen clientelar cola so rede de chiringos que, como pudimos observar estos meses, ta dispuestu a dar una batalla ensin cuartel pa defender los sos privilexos y prebendes. La pérdida del poder na Xunta Xeneral encontó inda más una alianza, aparentemente contra natura, pero que de manera amatagada venía funcionando de los tiempos: Uviéu pa la drecha, la Xunta pa la izquierda plural y a tirar del tetu tan guapamente. Agora, coles nueves elecciones van tener la oportunidá de recuperar el terrén institucional perdíu, anque'l resultáu que se vaya dar nun ye mui predecible ya'l repartu d'escaños pudiere nun variar enforma col actual.
Na mio opinión lo meyor que pue pasar cuando una fuerza gana unes elecciones ye que tenga la oportunidá de llevar hasta'l final la llexislatura pa poder arromanar los llogros y los erros y sacar asina les conclusiones afayadices. Nun va ser esti'l casu asturianu onde nin siquiera vamos llegar al añu del nuevu gobiernu. Nun foi asina y vamos quedar coles ganes de saber hasta ónde podía dar de sí'l llabor de gobiernu d'un partíu que cumple agora l'añu d'esistencia y nel qu'entraron a participar xente procedente del asturianismu políticu.
Pero esta ye la situación real de la nuestra política, la marcación na que nos movemos y onde se va desendolcar la batalla social ya institucional. El camín que se derrompa a partir de la cita nes urnes el prósimu mes de Marzu ye enagora desconocíu y pola mio parte -anque lo visto hasta agora na curtia acción d'esti gobiernu me provocare lluces y sombres- sólo espreso'l mio deséu de que nun volvamos a empozanos otra vuelta nel tarrecíu llamargal corruptu, clientelar y etnocida de les últimes décades. Esiste esa posibilidá y de reactivase y garrar nuevu puxu la estroza que pudiere ocasionar nesta perfrayada tierra de nuestro podría algamar un puntu de non retornu y de casi imposible igua.
6 comentarios:
Yá españó. La operación Acosu y Derribu aportó por fin. Yá tarán contentes les llámpares de la TpA, les del Niemeyer, los duernos de la Selmana Negra, del FICX. Los mui cucos quieren canonxíes y sinecures vitalicies ensin preparar un solu tema d´Oposición. Y van recuperalo too, escurque, el 25 de marzu. El carné y l´amiguismu dan esos cargos vitalicios.
Lo de preparar cien o doscientos temes pa poder ser funcionariu ensin padrinos, quédamos a nós, la plebe de la boina y la madreña. Lo d´emigrar o tomar otres iniciatives arriesgaes pa salir alantre y empobinar al futuru, quédanos a nós, la aldeanada de la boina y la madreña. Yá tienen lo que queríen esos cosmopaletos de les gafes de pasta, esos sindicaleros millonarios, esos empresarios sobvencionaos que, como les chinches, los cocos, los guxanes, les cascarries y demás parásitos, medren a la solombra del enchufe y del tratu de favor. Yá tienen el Niemeyer pa so, pa qu´almacenen mierda y l´amuesen un cientu d´años más.
Yá va volver Asturies a la normalidá: la normalidá del mugor, del arcaísmu, del modelu andaluz de chiringos pa los amigos, de deucracia y rampuña pa mercar cocaína y xin-tonics. Vamos siguir pagándo-yos los xint-tonics y los muxones en terraces careres de New York. Nataliu, tranquilu. Lastra, ánimu, Cherines, p´alantre…qu´esti “cortijo” ye vuestru. Asturies como Cortijo pala 3ª Edá.
Yá se prexubiló la patria, y tan reconvertía quedó que son amos d´una Asturies zombi.
Cascos ye un paisanu. Nun sedrá nacionalista, pero … ¿cuántos nacionalistes vivos quedamos nel País? ¿Esisten esos osos panda de la ideoloxía asturiana sacantes cuando hai convocatoria d´elecciones? El qué ¿hom? Los zombis del “soberanismu” nunca nun dieron palu al agua, y salen de les tumbes namás cada Haloween de les urnes. Esta cabera anuncia de Cascos, el presidente más asturianista que nunca tuvo Asturies, pon n´evidencia la clas política de la provincia uvieína: gandaya, manguanes remanaos al cien por cien pola FSA, dende´l propiu PP (falsa oposición) pasando por IU y los micropartíos. Les estratexes de fagocitación de la democracia a cargu de la FSA siguen imparables.
(Regionalistas astures)
Camiento que Foro ta desinfláu. PSOE arrastra entovía la xostrada eleutoral pasada (nun mos va sacar del pozu quien mos metió n'él). El PP asturianu va sofrir les zorrampleríes que tan saliendo de Rajoy y la so compaña (dicir una cosa en campaña eleutoral y facer otra llegaos al poder, ye dicir, mentir) y como dixo'l xefe, les sos decisiones nun van gustar.
Con esti panorama bien murniu, porque cualquier opción abarrunto que va ser mala, quiciás yera momentu pa un espoxigue, pequeñu pero significativu, de ciertu "asturianismu". Too s'andará.
Como escribí enantes paezme que la cosa va tar bastante equilibrada, pero eso son conxetures namás y hasta ver los resultaos... Tamién vamos comprobar si lo que diz Ricardo se da, pero nesti terrén yá sabemos les torgues qu'hai. La que ta montada ye mui gorda y si torna'l réximen apaga y vamos.
Tres de les elecciones les cuentes van ser les mesmes. Cambiaran los d`unos pa otros, pero pa mi qu`el resultau va ser igual.
Almiro`l vuesu enfotu nel espoxigue de dalgún "asturianismu".
Pa mi que nin se va presentar naide. Sicasi, yo non tengo pensao votar a naide, y muncho m`estrañaría que cambiase d`idea.
Cuando utilizo la pallabra "torgues" pa referime al espoxigue de ciertu asturianismu nun me toi refiriendo, precisamente, a temes de xuntances, sinón a la tendencia -consciente o inconsciente eso nun lo sé- cada vegada más clara (invito a visitar les redes sociales) d'una parte d'esi asturianismu de funcionar como meros satélites de la izquierda estatal n'Asturies. Simplemente por aclaralo y nun llevar a equívocu a naide sobre lo qu'opino al respectu.
el Tarabicu, auto-entrevistáu, nel so blogue : "La unidad, por la que tanto luchamos algunos con tan poco éxito, podría acelerarse". De risa.
Publicar un comentario en la entrada