Acabante presentase'l CEA d'anguaño pétame dedica-yos unes poques llinies nel blog a esti grupu de xente asturiano enfotao en trabayar pol conocimientu y difusión de lo ferial del país.
Préstenme bien de coses d'esti remanecer del CEA (Centru d'Estudios Asturianos). Y podría entamar pola alcoranza histórica que nos trai. Pues recueye'l testigu del primer CEA fundáu allá per 1.920 y esboroñáu cuando la guerra civil. Recuérdanos d'esta miente que l'asturianismu cultural nun ye nengún inventu recién de cuando la transición y yo préstame y do-y la so induldable importancia.
D'otra miente, camiento que yéremos bien de xente los que naguábemos hai tiempu por una organización d'esta frasca. Multidisciplinar, qu'axunte a aquelles persones enfotaes en trabayar con arrogancia na andecha siempre necesaria -imprescindible meyor diría- d'afondar nes nuestres coses, na nuestra cultura, na nuestra llingua. Vien a enllenar un vacíu cultural que yá se facía aforfugante y, espero y deseo, a poner un pocoñín de xacíu nesti zurriburri (con truñonaes y desalcuentros incluyíos) nel que dacuando zarapica'l facer asturianista actual.
Pola procedencia y nome de les persones qu'asistieron a la presentación abúltame qu'hai un sitiu pa la esperanza del que'l proyectu cuaye y espollete. Si de magar esti momentu pa endelantre hai xente que ye quien a axuntase, apurrir caún el trabayu que fai na so faza, dialogar, estudiar, sopelexar lo relacionao cola nuestra tierra... si se llogra facer dende la fonda voluntá del entendimientu, del respetu na discrepancia y poniendo l'interés xeneral d'esta vieya nación penriba del porgüeyu personal, la collecha que pue dar el remanecíu CEA pue ser bien granible y viñar abondo.
Asina que simplemente quixere namás que da-yos a los entamadores la mio felicitación, manda-yos tol ánimu del mundu y desea-yos -falando de papu sanu daveres- el mayor de los ésitos nesta xera qu'acaben d'echar a andar.
6 comentarios:
Súmome a esos deseos, Xanu. Bona suerte al CEA. CXB.
A ver si ye a convertines nun noyu d'estudiu, debate y espardimientu de tolo nuestro, que bona falta nos faen iniciatives constructives...
Un saludu candial.
Suscribo to lo que dixisti nel to comentariu, Xanu. Yera hora de que nel pais tuvieramos dalguna bona noticia.
Dígotelo yo, Pablo, que s'amiesten nueves iniciatives a les de la xente que venís trabayando y bien en distintes facetes de la nuestra cultura xube la moral...
Xanu, sigo el to blogue pero nunca pongo nada pero voi facer una escepción. Soscribo les tos pallabres. Pero, como yera d'esperar, nos foros "asturianistes" y "nacionalistes" too ye descalificación, insultos personales y otres coses. Quiero pensar que son trolls o, incluso, que son namás que un par de persones. Tildar de chiringuito a un aconceyamientu como esi, polo menos viendo los nomes que yo conozo, que son la mayoría, reflexa provocación, mui mala sangre o envidia, o les tres coses. A mi paezme una bona idea y ya veremos lo que da de sí. Pero en principio seya bienvenida.
De siempre conocí estes actitúes de presones que s'afayen como gatos n'escarpín poniendo torgues y soltando bilordios sobre cualquier iniciativa, asina que los ataques que yá arrecien sobre esti proyectu recién presentáu nun m'estrañen un res. Pa mio idea que lo meyor que podemos facer ye pasar d'esos ataques y centranos no verdaderamente importante que ye, por exemplu, conseguir qu'iniciatives como'l CEA salgan alantre.
Bienllegáu a esta viesca, Pepe Miranda, y un saludu candial.
Publicar un comentario en la entrada