martes, 23 de febrero de 2010

Xermanín, échame un culín.


Aquella mañana Don Quienseya salía de la Ca Conceyu gayasperu y enchipáu acabante roblar les mil quinientes trenta y dos últimes prohibiciones pa los ciudadanos de la mardoniada ciudá. Cuando pasaba per delantre la terraza d'un chigre sintió un orpín posáse-y nes perneres de los pantalones a l'altor de los papos de les piernes. Paró y esnidió per elles el deu llevándolu dempués a les ñarres pa golifar. De sutrucu, un glayíu arruxidó na contorna faciendo qu'hasta'l mesmu sol arreblagare a escondese tres una nube que tenía bien lloñe allá en cielu:

-¡Chiscáronmeeeee!-

Como por arte de barrabiellu, dos uniformaos apaecieron escoltándolu y echando unes güeyaes como rayos matachinos pa les meses de la terraza. El silenciu que se fixere pudiere facer pensar que taben vacíes cuando en realidá yera tolo contrario. Los camareros, a lo zorro, foíno ya insolidario, corrieren a escondese dientro'l llocal pesllando la puerta y echando les cortines. Ún de los uniformaos arrestiellando la voz y señalando a los presentes con un deu que talamente paecía que diba soltar una andanada de los cañones d'estribor del barcu del pirata Morgan entrugó alto y claro:

-¿Quién foi?-

Dengún d'ente aquel garrapiellu cobardes gorgutó ante la entruga. L'uniformáu, dirixéndose al so compañeru, encamentólu:

-Procede tu, Pepe-.

El segundu uniformáu púnxose en suelu a cuatro pates y entamó a golifar a modo, talo que'l sabuesu del mesmísimu Colombo. Al llegar a la mesa onde se sentaba un puntu calzáu con unos castellanos rescamplantes pol serbus caro, con unos pantaloninos blancos de pih.u y que lleía'l diaru llocal "Uvaspinín" d'una manera rara enforma, pues garrábalu al vies y colos testos picabaxo, el sabuesu llevantóse y acusó:

-¡Foi ésti!-.

Los dos llendadores del orden llevantáronlu nel intre en pelondines y esberrelláron-y ún per cada oreya:

-¿Fuisti tú'l qu'echó'l culín o nun fuisti, eeeehhh?.-

La pinpana en forma de filín de voz que l'acusáu, con un esfuerzu titánicu, foi pa sacar del so gargüelu, confesó:

-Síii... fui yo... nun sabía que... ye que yo yá... yá yo...-

Derrotáu, acuruxáu y confesu, y tal como taba lleváu en pelondines, los uniformaos perdiéronse con él allalantrones camín del cuartón.

Repuestu nel so honor y dempués de dexar afitao y ensin llugar a dulda dala quién yera quién nel escalafón ciudadanu, Don Quienseya alloñóse cola cabeza bien arguyosa y alta xuxuriando con zuna:

-¡Vasallos!-

viernes, 19 de febrero de 2010

Pel ñarigón.


Tiénennos bien garraos pel ñarigón, mialma. Pa que nun truñemos, nin esporitiemos, nin siquiera nos ximielguemos.

Tenemos bayura d'erbíes inmovilizantes: torgues, mancornies, arcoxos... Y en resultancia pacemos mansolinos na llende que nos tienen preparada. En realidá llevamos paciendo nella cuantayá. Y tán avezaos tamos a ello que cásique se nos escaeció cómo pue ser la vida ehí fuera, pacullá del barganaz.

Ya'l casu ye que nun somos a esmucinos de tantu corripiu y de tantu amu llendándonos darréu. Pasa'l tiempu y pínguennos los años enriba los llombos como una pimpana qu'enxamás dexa d'esquitar. Yo albidro qu'hasta nel nuestru más fondu subconsciente tamos como daos y ensin ser pa escurrir discursos nin postures alternatives verdá a los de los que nos frayen.

Pero quiciabes una de les claves qu'afiten el nuestru murniu destín vagarientu na nuestra propia tierra seya qu'esos sucos, eses fuércigues, eses muries, eses llendes y tola carrapotada de tarecos que propicien que nos tengan perbién garraos del ñarigón son en bona midida ferial... nuestru.

Miániques, esi ye'l problema principal. Nosotros somos los primeros qu'iguamos tou tipu de torgues que nos impiden avanzar. Los que col nuestru cainismu y la nuestra actitú revieya d'aneciar nos erros y d'autocomplacencia no impotente apurrímos-yos a los que nos mayen tol lluriamen pa que lleven a cabu'l so llabor.

Tal paez que'l ñarigón nun nos mancare. Realmente difícil de pescanciar.

domingo, 14 de febrero de 2010

Mazcaritos, aguilandos, comedies.


La mañana trayía malos badagüeyos pa la xornada. La ñeve, la xaraza, ya'l fríu xeláu fixérenme duldar si nun esgonciaríen el desfile d'antroxaos. Dempués de xintar empobiné pa Valdesoto. Al llegar al centru social de Lliceñes dalgo cambió. De sutrucu, el nuberu ordenó rotundamente que nun cayere nin falopu nin gota d'agua del cielu y entamaron a vese nes altures bocanes qu'indicaben que diba haber tregua meteorolóxica pa poder realizar prestosamente la xornada.

Nel edificiu de Lliceñes entraba la xente con traza de ciudadanu y salía camudáu en mazcaritu. Traxín y bon humor facía que t'afayares como gatu n'escarpín. Poco dempués de la hora señalada, cuatro sidros guiaben la cabeza del desfile. Un grupín con gaiteros y percusión animaben cola so música. Os Reises allandeses dáben-y tiez a la xermandía marutada desendolcando con maestría la so xera. Los miembros de les comedies de rapacinos y adultos y xente amazcarao pa tolos gustos componíen un grupu que diba agrandándose según trescurría'l desfile y al que se xunía hasta xente ensin amazcarar que nun yeren quien a aguantase de simples espectadores. Cabo min pasaba un paisanu bien mayor colos güeyos llarimosos d'emoción.

Siento unos glayíos descomanaos delantre min. Voi p'allá y veo en suelu'l mazcaritu d'una muyer embarazada apellidando por un médicu que l'ayudaren nel partu. El doctor acude, cacipla pente les sayes de la parturienta y al final vuela pel aire un meñacu d'un rapacín. A lo llargo del recorríu la perfértil embarazada parió alredor de media docena de vegaes. Otru mazcaritu, peractivu y reblincón d'un burru buxu aprovechaba pa llanzase enriba la recién parida quiciabes buscando qu'ente tantu rapacín saliere polo menos un burrín. Nun se-y llogró. Pa otra vez sedrá...

Dellos vecinos de Valdesoto respuenden arrogantes a les coples de solicitú d'aguilandu. Rosquielles, frixuelos, llicores, sidra... too se-yos ufierta la la hermanancia mazcaritada que dan bona cuenta d'ello. Muncha xente sacando semeyes. Dalguna cámara tamién... Y asina, ente folixa y aguilandos lleguemos a la ilesia.

Cabo ella, íguase'l corru pa ver les comedies. Entama la de los rapacinos. Una piecina curtia y perbién realizada polos encargaos de garrar nel futuru les riendes d'estes prestoses representaciones, produz les carcaxaes de la xente qu'esfruta de la so acutación. Un fuerte aplausu reconoz el llabor representativu de los neños. Tóca-yos agora'l turnu a los mayores pa echar la so comedia. Nótase-yos oficiu, soltura y dan la impresión d'afayase como pexe nel agua nel so llabor teatreru. Milenta guiños d'humor son contestaos poles carcaxaes de los asistentes. Col tapecer acaben d'echar la comedia y una ovación zarrada premia lo güeyao. Llega la hora de la dispidida. Cai yá la nueche sobre Valdesoto.

Entamo yo a tornar pal mio caborniu. Pel camín voi rabilando na cabeza delles reflexones. La primera, que bien ciertu ye'l dichu que nos encamienta que fai más el que quier que'l que pue. Un piñu xente enfotao y namorao de les vieyes tradiciones vien consiguiendo dende hai unos años p'acá que sidros, aguilandos, comedia y mazcaraes d'iviernu aliten de nuevo dende Valdesoto. Van tres xornaes yá qu' entamen con un primer día onde la bayura informativa sobre les mazcaraes fai d'asistencia "obligatoria" pa tolos que quieran adeprender esta parte perimportante de les nuestres tradiciones. Y tocántenes al desfile del segundu día, vienme la segunda reflexón. Nun tien nada que ver siguilu d'espectador o de mazcaritu. Selo por propia esperiencia porque fui lo primero l'añu pasáu y lo segundo ésti. El balagar de sensanciones que sentí siendo un mazacaritu más esti añu ye pa nun lo escaecer enxamás. Y asina cuento dir nos años vinientes... P'acabar, atalanto lo importante que ye pa la nuestra cultura ya identidá recuperar les mazcaraes d'iviernu. L'ánima de los actuales asturianos ye un crisol onde s'amiesten dende'l posu cristianu representáu pola cruz de la victoria o la herencia histórica del nuestru reinu representada pola fueya de carbayu, ya'l perimportante llegáu paganu, que non atéu, del que son representación cimera les nuestres mazcaraes d'iviernu y la fueya de los vieyos ya inda veneraos texos centenarios.

jueves, 11 de febrero de 2010

D'un papel que m'apurrió Sidru'l Guirriu.


Tábamos ayeri parllando Guoné, Manfurada y yo sentaos na muria d'una cuerria cuando sentimos un ruxerrux pente unos árboles y de sutrucu apaeció Sidru'l Guirriu. Vieno pa escontra nosotros y, fincando'l rexu de la so pértiga en suelu, esnaló penriba les nuestres cabeces casi raspiándoles. Dempués posóse faciendo ruxir enforma los lloqueros. Metió la mano nel corrión y apurrióme un papel que me punxi a lleer en voz alta pa que toos m'escucharen. Dicía asina:

{Los díes 12 y 13 d'esti mes de Febreru van celebráse en Valdesoto, conceyu Sieru les III Xornaes de Mazcaraes d'iviernu.

Pal día 12, vienres, nel centru social de Lliceñes y a partir de les 19:30h van presentase delles ponencies sobre mazcaraes con alderique incluyíu pa que participe la xente y moderao too por Alberto Alvarez Peña.

El sábadu día 13 van salir les mazcaraes de Lliceñes camín de l'antoxana de la ilesia a partir de les 16:15 h y ellí van echase les comedies:

"La modernidá" de Pergentino, polos escolinos de la escuela de Faes.

"Vaya traces de comedia" de José Ramón Oliva, pola Asociación pola Recuperación de Sidros y Comedies "El Cencerru".

Darréu, va entamar un desfile de mazcaraes peles cais de Valdesoto cola participación de Os Reises de Valledor, Os Reises de Tormaleo, Zamarrones de Carreñu, Vezos Astures, Grupu de Teatru Carbayín, los Sidros de Valdesoto...¡ y tolos mazcaritos que se-yos quieran axuntar marutaos a la manera tradicional!.}

Acabante lleer esta prestosa anuncia, Sidru'l Guirriu alloñóse blincando viesca alantre. Y díxome Guoné:

-¿Viesti, Xanu?. Güei el nuestru amigu'l sidru salta con más gana y fai sonar les esquiles con más prestancia que d'avezu. Nótase-y percontentu.-

-Ye normal, Guoné,-contesté-y yo-. Ten en cuenta que les mazcaraes d'iviernu son les que-y dan la vida al nuestru collaciu. Ensin elles dexaría d'esistir. Como nos pasaría a nosotros si un día desapaeciere esta viesca onde vivimos...-

sábado, 6 de febrero de 2010

El xanu ya'l pataricu.

Siempre sentí cuntar en casa qu'un tataragüelu de mio, campeón de tiru con gomeru por más señes, viviere axorizáu de mozu por culpa d'un pataricu.


Cuando'l xigante llegáu d'acullá de la mar aprucía per onde vivía'l xanu, ésti tenía que-y apurrir lleña pa qu'escaleciere y da-y abonda comida y bebida pa que se fartucare y matare'l secañu.


Notres ocasiones namás que'l mio antepasáu acollumbraba al pataricu fuxía a empozase na viesca dexando-y la cueva onde vivía al mangullón pa que s'instalare nella tol tiempu que-y petare mentes el probe xanu aterecía de fríu lloñe del so abellugu.


Llegó a ser tan desesperada la so situación qu'un día convencióse que nun pagaba la pena siguir viviendo asina y que más-y valía morrer en manes del pataricu qu' afogase tola vida na llaceria.


Asina qu'un día que taba nortiando vió llegar al xigantón y salió-y al pasu. Púnxose delantre d'él coles piernes abiertes, los brazos en xarres y tolo espurríu que pudo echándo-y les güeyaes más gafes que foi quien. De sutrucu, el pataricu pensó n'estrapayar a aquel insolente ñarru d'un pisotón ensin más contemplaciones. Pero dempués foi afalándolu un pensamientu tenebrosu. Camentó qu'aquel comportamientu del xanu que tenía delantre podía debese a que tomare dalgún beberaxu que lu dotare d'estraños poderes y que si lu atacaba igual ponía en peligru la so propia vida. Esti pensamientu entamó a espolletar tanto nel so maxín qu'empecipió a sentir un mieu decomanáu y unos temblores tremendos. Entós dio media vuelta y salió a carrenderes d'aquel llugar pa nun tornar enxamás.


Y ye qu'abondes vegaes lo que creyemos que ye una demostración de valor y enfotu por parte de los nuestros enemigos nun ye otra cosa que'l reflexu de la nuesta escesiva cobardía y falta de decisión que nos fai ver xigantes invencibles ellí onde quiera que miramos.


jueves, 4 de febrero de 2010

El nuestru torqués.


Cuenten qu'ente los vezos de los antiguos pueblos celtes taba'l de practicar dacuando la llucha desnudos y namás que col torqués puestu en pescuezu.

La nuestra llingua vien a ser el nuestru símbolu cimeru, esi torqués que siempre llevamos puestu y col qu'anguaño lluchamos por algamar la nuestra supervivencia como pueblu.

Representa la brenga del nuestru arguyu. Y mientres ésti nun nos falte, podemos resistir, magar les nuestres armes seyan tán ruines comparaes coles del enemigu, que bien de veces asemeye que lluchamos desnudos.
................................................................................................................................

(Vaya esta entraduca n'agradecimientu, persinceru y fondu, a tola bloguesfera nesta llingua. Reiterar la mio felicitación a "La Verdá ye Mentira" y a "Gonzalez y González", asina como a la organización pol so trabayu. Recordavos como yá acabo de facer nel anterior post del blogue, que ensin vosotros nun esistiría esti pergamín. Dempués de da-y vueltes, decidime a poner na bitácora los dos galardones creaos pola organización. Nun veais nello enchipamientu, sinón agradecimientu y arguyu de pertenecer a esta comuña bloguera que, pali que pali, cada día aumenta en cantidá y calidá).
¡¡Un abrazu!!.)