martes, 26 de mayo de 2009

Danza Prima


Miráilos. Rapacinos enxareyaos al son de la Danza. Son el futuru, dicen en frase mansuñada. Pero de nosotros depende qué futuru ye'l que van ser.


Xente esguedeyándose na so estaya. Abangao trabayando. Nel anonimatu dando lo que saben y puen. Trabayando pol país, tresmitiendo la brenga d'esta vieya nación pa que'l so caricós nun muerra.


Porque ye, miániques, cierto dafechu qu'hai abonda xente trabayando pol alitar d'esta tierra. Unos tresmiten les poques pingarates que-yos aprendieron de la nuestra historia. Otros muestren arguyosos los sos conocimientos de la nuestra cultura. Tamién tán los qu'esbrexen dando a conocer la llingua de los nuestros güelos.


Pero toa esa xente, xunto a la que trabaya en faces como la sindical o la política, necesita que d'una vegada por toes suene'l turullu tán esperáu que llame a conceyu. Porque caún pel so llau nun son a iguar el país. Falta axuntase nuna gran xermandía. Y ye la hora d'afalar a tol que tenga na so mano la posibilidá d'apurrir un granu d'arena nesta xera a dar esi pasu alantre que la historia-y demanda. Que la vieya nación asturiana-y reclama y desixe.


Yá, ensin perder nin un segundu más, porque yá nos vaga y probez infinito, ye'l momentu de prender la foguera colos caricós encesos que caún portamos y entamar la mayor Danza Prima de la historia del nuestru País. Acabóse'l tiempu de la espera y les llamentaciones. Yá, darréu, entainando, esguedayándonos, puxando, esbrexando, llegó la hora de la xuntanza de fuerces.


Malpenes amortigañando los rescoldos de la celebración del 25 de Mayu:


Pola alcordanza de los que nos precedieron,
polos nuestros rapacinos,
pol nuestru futuru,
pola nuestra patria,

¡Xuntanza y Puxa Asturies!


lunes, 25 de mayo de 2009

El 25 de Mayu ya'l tren de la historia.

El tren de la historia ta paráu na nuestra estación esperando porque subamos a él. Podemos facelo o non, pero tenemos que tener bien claro qu'esi tren nun pasa siempre o cuando nos pete. Ye incluso probable que seya la última parada que podamos tener p' arreblagar al vagón que nos tien atrocáu.

Güei celébrase'l 25 de Mayu. Una fecha cimera de la nuestra historia que nos recuerda qu'un día fuimos y comportémonos como un auténticu país. Como un pueblu trabáu, arrechu y arguyosu. Y como una xermandía xunida.

La comparanza de los asturianos d'aquel entós y los d'anguaño muestra un reblagu considerable d'actitúes y comportamientos. Porque, mialma, nestes dómines que cuerren pasemos a ser un pueblu desdexáu, insolidariu, acuruxáu y dixebráu.

Y ehí ta'l nuestru gran problema. Cuéstanos un trabayu titánicu convencenos individual y colectivamente que tenemos que garrar esi tren que tenemos ehí delantre yá. Enantes de que toque'l turullu y cuele.

Un gran problema. Un pergrave problema. Una auténtica llaceria. Y un comportamientu daveres suicida.

Porque tenemos abondes probabilidaes de que si perdemos esti tren de la historia yá nunca nun lu volvamos poder garrar.

jueves, 21 de mayo de 2009

POLA XUNTANZA


Ta acabante nacer un sitiu web col nome qu'entama esta entrada. El so oxetivu ye acutar un espaciu onde tola xente que tea por un procesu qu'axunte a los nacionalistes pueda participar.


Unes andarines que vinieron al mio caborniu xuxuriáronme enantes de que naciere coses de Pola Xuntanza. Y puedo dicivos que detrás ta xente con un enfotu y trabayu na estaya nacionalista fuera de toa dulda. Asina que va ser de xuru un sitiu afayadizu y de confianza.


Podéis echar una gabita al traviés de los bloques, participando con opiniones y comentarios y tamién -cosa ésta mui importante- apurriendo noticies que conozáis alrodiu de les formaciones y movimientos nacionalistes asturianos.

La so dirección ye: polaxuntanza.webcindario.com

Namás me queda manda-yos un saludu candial ya invitavos a pasar darréu per ellí. Va prestavos.












sábado, 16 de mayo de 2009

Frente Democráticu Nacionalista Asturianu.


Yá tán ehí picándonos a la puerta casa. Encamentábalo hai dos entraes d'esti blogue ("Reculamos") y la busca del nacionalismu asturianu pa estrapayalu ye una evidencia. Los llobos arregañen los caniles y tenémoslos ende.


Ye más fácil desaniciar un movimientu cuando ye pequeñu y ta dixebráu que cuando espolleta y se muestra xuníu. Eso ye de xacíu y cai de caxón. El nacionalismu asturianu fadia y molesta. Por eso lu puñen dende periódicos como la Razón y tiénenlu en cuenta pa frayalu tanto dientro de les nuestres llendes como de fuera.


Lo asocedío cola UNA nesta antoxana de les elecciones europees ye un avisu y un exemplu que rescamplen tanto que namás dalguién que quiera facese'l ciegu a costa fecha o dalguién que tenga la desgracia de ser un fatu dafechu puen nun dase por enteraos como si tal cosa.


Porque enantes d'esti episodiu yá tuvimos exemplos a esgaya de persecución nun sólo sobre los nacionalistes asturianos sinón también sobre miembros del movimientu de reivindicación de la nuestra llingua. Y vamos siguir teniéndolos cada día más y más gafos, que naide nun lo dulde.


Nel momentu que nos atopamos nun queda otru remediu qu'entainar con auténticos reblagos a un procesu de coordinación/xuntanza de los nacionalistes asturianos. Pruye la formación yá y darréu d'un Frente Democráticu Nacionalista Asturianu. Yá nun ye cuestión de petites nin paeceres ye una urxencia por una cuestión elemental de supervivencia. Vienen descaradamente a por nosotros y si nun esconsonamos a too meter van esfarrapanos como a una cuyarapa.


A la vuelta nueve díes tenemos nel nuestru calandariu nacional l'aniversariu d'un de los finxos más gloriosos de la nuestra historia: el llevantamientu de los asturianos el 25 de Mayu de 1.808 y la proclamación del nuestru país como soberanu. Esta fecha debiere ser el puntu de partida pa entamar el procesu del que falaba enantes.


Porque si cola que nos ta cayendo realmente los nacionalistes siguen encerriscaos en dase'l llombu y nun tán dispuestos a andechar nun sen común, ye como pa replantegase si realmente la xente d'esta triba ye adulto o tamos falando de simple reciella qu'empobina absurdamente hacia'l so propiu desaniciu.


miércoles, 13 de mayo de 2009

Reculamos.


Xente averao a asociaciones vecinales, sindicatos, partíos, organizaciones ciudadanes de toa mena, movimientu ecoloxista, etc. podríen aportanos casos a esgaya.


D'unos años p'acá caminamos hacia aquello del que se ximielgue nun sal na foto camudao por el que se ximielgue cáen-y enriba tou tipu demonizaciones, criminalizaciones y si les circunstancies se-y ponen pal pulgar pue acabar cola so cadarma na mesma cárcel.


Llibertá de pensamientu, d'espresión y de manifestación. Tres pegollos de la democracia que dábamos por fitos y que cada día que pasa taramiellen más. Enfilamos derechos hacia la profesionalización y conversión de l'actividá política nuna casta, nuna clase social poderosa, que magar aparente tar formada por opciones discrepantes opónense en bloque a cualquier cambiu del status establecíu. L'Estáu ya'l sistema políticu engolaos a la categoría de dioses. Y toa discrepancia d'un orden zarráu y establecíu ye sospechoso de delinquir.


Con motivu de les prósimes elecciones europees ta escribiéndose estos díes una páxina mui triste de la nuestra historia reciente onde la represión medra en cantidá directamente proporcional a la mengua de derechos civiles. Yá nun ye que tea quedando estrapayáu el derechu al trabayu, o a una vivienda digna. Ye que nin siquiera la llibertá pa organizase políticamente se cumple. La persecución implacable de dos candidatures que se van a presentar n'Asturies, la de la Unidá Nacionalista Asturiana y la de Iniciativa Internacionalista por un tema de avales ta algamando una sonadía mediática y una implicación d'estamentos estatales d'auténtica vergüenza. Hai que denunciar al alto la lleva que dambes candidatures tienen plenu derechu a presentase nestos comicios.


Porque como sigamos reculando ensin torna pel camín del recorte de los más elementales derechos ciudadanos va llegar el momentu de volver a usar a nivel d'Estáu una simboloxía que creíamos escaecida.


martes, 12 de mayo de 2009

L'exemplu del nacionalismu español.

El nacionalismu español ta acabante de dar un exemplu que bien fadríen n'aprovechar los nacionallistes d'otros llugares como Asturies pongamos por casu.

Ante la posibilidá d'arrampuña-yos el poder a los nacionalistes vascos entainaron pa llegar a un alcuerdu les dos principales fuerces españoles y mialma que lo llograron.

Dos fuerces antagóniques dafechu a nivel del estáu y de comunidaes autónomes axuntándose anteponiendo los sos intereses nacionales españoles pa valtar un prósimu gobiernu nacionalista vascu.

Esti fechu rescampla a los güeyos de cualquiera y nun ye mester realizar sesudos análisis pa comprendelu por evidente.

Indica tamien por qué'l nacionalismu español triunfa penriba de los demás nesti estáu. Nun ye namás una cuestión de poder económicu y políticu, que sí lo ye, sinón de saber axuntase y facer un piñu cuando les circunstancies se ponen picu arriba.

Nuna tierra como la nuestra onde tamos tan avezaos a ver cómo los nacionalistes se tiren carrobexazos a la menor ocasión y onde la dixebra algama finxos d'auténtica vocación, esta actuación de los nacionalistes españoles debiere servir pa ilustrar qu'hai otres maneres y xeitos de facer les coses.

lunes, 11 de mayo de 2009

Taifasilandia.

Ello yera un país atlánticu preñáu de paisinos. De paisinos preñaos d'estayines. D'estayines preñaes de fasterines. De cuadrinos preñaos de cuadriquinos. De cuadriquinos preñaos de cuadriquininos. De cuadriquininos preñaos de baldosines onde con munchu procuru namás que coyíen los pies d'un rapacín cola mixuela pingando ya'l cocu duru.

Ello yera'l reinu de la empanada mental ensin neurones. De memoria a farturones. De los embeligros coronaos. De los cerebros amomiaos. Del xacíu al paredón. De la sencia'l corripión: el cumal los alloriaos.


Ello yera una vez Taifasilandia. Onde tou dios torpe a mamplén ordena y manda. Onde a menor cantidá mayor tochura. Onde'l saber alcontró la sepultura. Onde'l más feu vese guapu nel espeyu ya'l más torpe vese artista universal ensin remediu.


Ello yera una vez un tenebreru. Un llugar escuru pal pensar, negáu pa escutruxar y onde'l sentíu común enxamás pasó de ser un estranxeru.

jueves, 7 de mayo de 2009

L'ayalga de la cueva'l Cuélebre Célebre.

A unos diez minutos d'onde vivo atópase la cueva'l Cuélebre Célebre. Según una lleenda del llugar ellí vivía un cuélebre gafu qu'amedranaba a los vecinos hasta qu'un día matárenlu dándo-y pa comer un boroñu preñáu d'anfileres.

Pero yo conocílu y la cosa nun foi asina. El cuélebre enxamás saliere de la so cueva, pues tenía encamentao que naide nun escaciplare nella porque ocultaba una ayalga pervaliosa de los asturianos. Y asina lo fixo hasta qu'un día, yá mui vieyu, decidió retirase a descansar al olimpu de los mitos.


Siempre tuvi yo curiosidá por conocer esa ayalga que naide nunca consiguiere descubrir, asina que tando un día charrando con Xuan Moñiz d'Ambás y con Sidru'l Guirriu decidimos dir a buscar a un ayalgueru mui famosu de Tinéu pa ver si nos podía asesorar nel tema. Entamó a rebuscar per unos cartafueyos vieyos y apurriónos un dibuxu de la cueva col sitiu onde se suponia que taba l'ayalga.


Empobinemos paciallá y empecipiemos a percorrela según les instrucciones de la gaceta que llevábamos. Nun requexu había un pasadizu estrechu. Como yo yera'l más ñarru y menudu de los tres metíme gatiando per él hasta que llegué a una especie de fornicu onde atopé una caxa.


Saquéla d'ellí y a la lluz de los candiles que llevábamos vimos que yera de texu ferrada con abarcones y clavos. Abrímosla y nel so interior había un pergamín enrolláu. Garrólu Xuan, desendolcólu y lleó unos versos que me sonaben enforma de sentilos siendo un xanu rapacín:


"Cuando examen les abeyes

y posen de flor en flor

si les escorren s'espanten

vanse y non facen llabor...
.........................................."


Sidru'l Guirriu tamién reconociere aquellos versos y Xuan Moñiz d'Ambás lloraba como un críu porque yeren d'un antepasáu de so natural del conceyu de Carreñu.


Decidimos aquel día que l'ayalga de la cueva'l Cuélebre Célebre debiere pervivir a lo llargo de los sieglos nel so abellugu y dar anuncia a tolos nuberos, cuélebres, xanes, busgosos y demás xermandía del olimpu de los mitos pa que tuvieren siempre sollertes col envís de que nengún lladrón nin manguán pudiere nunca enxamás esfarrapar esti tesoru de tolos asturianos.